Turqi

pixlr_20200120082848306-1280x959.jpg
Vladimir Prenga08:20 | 20/01/2020

E pabesueshme ajo që ka ndodhur në Turqi, në ligën e tretë, në një ndeshje mes Usakspor dhe Velimesespor. Protagonist ka qenë portieri i ekipit vendas, i cili ka pritur dy penallti dhe është ndëshkuar me karton të kuq.

Si ndodhi e gjitha? Portieri i Usakspor ndali herën e parë penalltinë, por arbitri me ndihmën e asistentit vendosi ta përsëriste. Protestat e portierit vendas u shoqëruan me karton të verdhë.

Ai e priti edhe penalltinë e dytë dhe sërish u vendos të përsëritej. E pamundur të përmbahej “gardiani”, i cili mori edhe të verdhin e dytë dhe me të kuq duhet të linte fushën e lojës.

Por siç thonë, “Zoti i sheh të gjitha” dhe në portë u fut një prej lojtarëve të Usakspor dhe ia priti penalltinë futbollistit kundërshtar. Gjithçka e rregullt këtë herë dhe festa ishte e madhe. /abcnews.al

Muriqi-1-1280x666.jpg
Vladimir Prenga11:53 | 19/01/2020

Vedat Muriqi ka përfunduar në akuzë në Turqi, pas kartonit të kuq që mori në ndeshjen e djeshme kundër Gaziantep.  Gazetari i Hurrieyt, Guntekin Onay, nuk e ka kursyer sulmuesi dardan, duke e konsideruar të pandershme veprimin e sulmuesit.

Muriqi, thuhet se e ka marrë qëllimisht kartonin e dytë të verdhë ditën e djeshme. Kjo sepse ai mund të luajë në derbin me Basaksehir në kampionat. Të kuqin e djeshëm ai do ta shlyejë në mesjavë, në ndeshjen e Kupës me Kayserispor.

E gjitha me llogari dhe kjo normalisht në Turqi nuk është duartrokitur. Sigurisht te Fenerbahce po, pasi sulmuesi është një nga lojtarët kryesorë të skuadrës së tyre dhe në një ndeshje si ajo me Basaksehir është i domosdoshëm.

Muriqi gjithsesi nuk është se ka shpëtuar përfundimisht, pasi rrezikon të dënohet me provë televizive. Në rast se vërtetohet se kartoni i dytë i verdhë u mor qëllimisht, ai rrezikon të pezullohet me tre ndeshje në total. /abcnews.al

selami-shimshek--1280x720.jpeg
nev ila16:39 | 08/01/2020

Selami Shimshek, është një tjetër turk që pritet të ketë të njëjtin fat me Harun Çelik, i cili u dëbua nga autoritetet shqiptare me 1 janar..

Shimshek ka treguar para grupit hetimor rrethanat se si e kishte siguruar vizën kanadeze, ndërsa përballjen me gjykatën do ta ketë më 13 janar.

“ABC News” siguron dëshminë e shtetasit turk Selami Shimshek, i ndaluar në 8 gusht pas ka hyrë nga Kosova në territorin shqiptar nga pika kufitare e Morinës. Në 13 janar, Simsek pritet të dalë përpara Gjykatës së Tiranës në seancë paraprake pasi prokuroria ka mbyllur hetimin për akuzën e falsifikimit të dokumenteve.

Në  pasaportën e tij autoritetet shqiptare konstatuan një vizë të falsifikuar për në Kanada.

Burime janë shprehur për “ABC News” se ka dyshime të forta për spiunim të Shimshek, por edhe të Harun Çelik, i dëbuar ditën e parë të janarit.

Në dëshminë e siguruar nga ABC News, shtetasi turk Selami Shimshek ka shpjeguar edhe mënyrën se si është pajisur me vizë. Ai ka deklaruar se pagesën e ka kryer kushëriri i tij nëpërmjet bankës.

Simsek identifikon një shtetas me emrin Kursat, të cilit i ka dërguar foton dhe pasaportën e tij. Pas kësaj shtetasi turk Kursat i ka kërkuar Shimsek të shkonte në Kosovë ku do t’i dërgonte dokumentin për të udhëtuar drejt Kanadasë.

Komunikimi mes Shimshek dhe Kursat është bërë në gjuhën turke. Në dëshminë e siguruar nga ABC Neës, Shimsek ka deklaruar se pasi ka mbërritur në Prishtinë ka qëndruar në një banesë për 3 ditë,  së bashku me shtetasin turk Harun Çelik.

Pasi ka marrë pasaportën me vizë kanadeze, Shimsek ka prenotuar biletën e udhëtimit me intinerarin Rinas-Vjenë-Toronto.  Harun Çelik u deportua në Turqi mbrëmjen e 1 janarit.

Bashkë me mikun e tij ata dyshohet se janë pjesë e lëvizjes FETO, të Fetullah Gylen që në Turqi konsiderohet organizatë terroriste nga Presidenti Rexhep Taip Erdogan.

Ndërkohë në vesh të shurdhër duket se ka rënë kërkesa e avokatëve të Harun Çelik për të marrë informacion se çfarë është vendosur për mësuesin 42 vjeçar, deportim apo dëbim.

Ministria e brendshme dhe Policia e shtetit nuk kanë kthyer një përgjigje zyrtare, duke i kryer veprimet në mungesë të theksuar transparence./abcnews.al

 

 

auto_eu1578440166.jpeg
So Nila09:08 | 08/01/2020

Kreu i diplomacisë europiane, Joseph Borell dënoi sot ndërhyrjen e Turqisë në konfliktin në Libi, gjatë një takimi në Bruksel me ministrat e Jashtëm të Francës, Gjermanisë, Italisë dhe Britanisë së Madhe.

“Është një gjë që ne e kundërshtojmë dhe që rrit shqetësimin tonë për situatën në këtë vend”, u shpreh Borrell.

“Është urgjente të ndërpriten armiqësitë e krijuara në Tripoli dhe afër saj.

Çdo përshkallëzim, si dhe ndërhyrje, do ta bëjnë konfliktin më të zgjatur, do t’i sjellë më shumë vuajtje njerëzve në Libi,  dhe do të përkeqësojë mosmarrëveshjet.

Borrell dhe katër homologët e tij të vendeve anëtare të BE-së u mblodhën në një takim urgjent për të diskutuar situatën në Libi, ku marshalli Khalifa Haftar po vazhdon sulmin e tij me shenjestër Tripolin.

Europianët kanë frikë se ndërhyrja ushtarake e Ankarasë në mbështetje të Qeverisë së Unitetit Kombëtar (GNA), e njohur nga OKB, mund ta përkeqësojë situatën.

“BE është plotësisht e bindur se nuk ka zgjidhje ushtarake për krizën në Libi”, thuhet në deklaratën e përbashkët, e cila kërkon ndërprerje të menjëhershme të veprimeve ushtarake.

Alles Europa news kujtoi se pas rrëzimit të regjimit të Muammar Gaddafi në 2011, Libia mbetet e ndarë sipas parimit të territorit.

Tripoli dhe perëndimi i vendit po përpiqen të kontrollojnë qeverinë e Akordit Kombëtar (PNC), të udhëhequr nga Fayez Sarraj./abcnews.al

2020-1.jpg
in a14:30 | 06/01/2020

Në Shtetet e Bashkuara, zgjedhjet e 3 nëntorit do të jenë me shumë rëndësi sepse do të dihet cili do të jetë kandidati i Partisë Demokratike për zgjedhjet presidenciale. Ndërkohë presidenti aktual Trump do të vazhdojë të jetë në gjykim për akuzat në senatin amerikan, për shkak të “abuzimit me pushtetin dhe ndërhyrje në Kongres”.

Në Izrael, vazhdon saga e krizës politike. Parlamenti izraelit u shpërbë në dhjetor të 2019-tës dhe zgjedhjet e reja duhet të mbahen në 2 mars, tre muaj pasi zgjedhjet e përgjithshme nuk nxorën një fitues përfundimtar dhe as kryeministri Benjamin Netanyahu dhe as Benny Gantz nuk mundën të krijojnë një koalicion qeverisës.

Ndër konfliktet, Siria vazhdon të mbetet kryetemë, pasi sulmet ajrore ruse dhe të regjimit vazhdojnë të bëjnë kërdinë në rajonet e mbajtura nga rebelët.

Ndërkohë në 2020 pritet të mbahen disa samite dhe konferenca të rëndësishme, si konferenca e OKB-së për ndryshimet klimatike e planifikuar për në nëntor në Glasgow dhe presidenca e G20, ku Arabia Saudite pret liderët botërorë për një samit global në kryeqytetin arab më 21-22 nëntor, ndërkohë që vazhdon të mbetet hije e rëndë për të vrasja brutale e gazetarit Jamal Khashoggi. Një samit tjetër është ai i qershorit ku Shtetet e Bashkuara presin udhëheqësit e G7 në Camp David në Maryland.

Ndër zhvillimet e pritshme konfliktuoze janë ato që kanë të bëjnë me politikat e Turqisë, ku afrimi i saj gjithnjë e më shumë me Libinë, ka çuar në një marrëveshje që zgjeron pretendimet e Turqisë mbi një zonë të madhe të pasur me gaz të Detit Mesdhe dhe që është denoncuar nga Greqia, Egjipti dhe Qipro.

Presidenti turk Rexhep Tajip Erdogan ka premtuar të shtojë mbështetjen ushtarake për Libinë nëse është e nevojshme, duke hapur derën për përfshirje të angazhuar ushtarake në vitin e ri.

Ndërkohë Irani në pjesën tjetër të botës shkon në zgjedhje që pritet të mbahen më 21 shkurt. Pothuajse 16,000 njerëz janë regjistruar për të garuar për 290 vendet parlamentare.

Jemeni mbetet një fushë-betejë e hidhur. 26 marsi i 2020-tës shënon përvjetorin e pestë të ndërhyrjes ushtarake të udhëhequr nga Sauditët në Jemen për të mbështetur qeverinë kundër rebelëve Houthi të lidhur me Iranin. Muajt e fundit, rebelët kanë ndalur sulmet kundër Arabisë Saudite, dhe Riadi ka folur për një “kanal të hapur” të komunikimit me Houthis.

Ndërkohë në Kinë vazhdon të jetë e hapur çështja e pakicës ujgure. Kina u përball me dënim ndërkombëtar për rrethimin e 1 milion ujgurëve dhe pakicave të tjera etnike kryesisht myslimane në kampe internimi në rajonin veriperëndimor të Xinjiang ndërkohë që Parlamenti Evropian dhe Shtetet e Bashkuara shqyrtojnë sanksionet mbi këtë çështje.

Ndër gjykimet që priten në vende të ndryshme dhe që janë ngjarje me një mbulim shumë të madh ndërkombëtar janë ato të gjykimit të australianit të akuzuar për masakrën në një xhami në Christchurch, në Zelandën e Re që fillon më 3 maj, gjyqet e disidentëve në Arabinë Saudite; mes të cilave edhe një duzinë gra aktiviste. Gjyqi turk kundër udhëheqësit pro-kurd Selahattin Demirtas në janar dhe seanca dëgjimore në gjyqin e drejtorit të Amnesty International në Turqi që pritet të mbahet më 19 shkurt.

Ndërkohë, Omani mund të ketë në 2020-tën një sundimtar të ri pasi shëndeti i Sulltan Qaboos bin Said vazhdon të përkeqësohet. Sipas “The Guardian”, diskutimet tashmë janë duke u zhvilluar për të emëruar pasardhësin e tij. Omani është një vend mjaft i rëndësishëm në Lindjen e Mesme, që nuk është prekur nga trazirat e dhunshme apo luftërat./abcnews.al

muriqi-1.jpg
Vladimir Prenga12:08 | 06/01/2020

Vedat Muriqi është një nga lojtarë shqiptarë më të kërkuar. Sulmuesi, i cili aktivizohet në Turqi me Fenerbahce, synohet madje edhe nga klube të Premier League. Gjithsesi klubi turk nuk dëshiron të heqë dorë nga shërbimet e tij pa u mbyllur sezonin.

Në lidhje me zërat e merkatos ka folur edhe vetë Muriqi, i cili synon të mos shpërqendrohet prej tyre dhe topin e ofertave ia ka kalon menaxherit të tij. Synimi i sulmuesit nga Prizreni është i qartë: të fitojë titullin kampion. Sigurisht kur flitet për Tottenham që e di, ai ndihet mirë dhe e pranon diçka të tillë.

“Objektivi im është të bëhem kampion me Fenerbahcen. Normalisht që është një ndjenjë e bukur kur skuadra të mëdha europiane interesohen dhe më duan mua. Këto oferta më bëjnë të lumtur”, thotë Muriqi.

Sulmuesi nuk ndalet me kaq dhe shton: “Sidomos është diçka e shkëlqyer të jesh në listën e Tottenham. Do më pëlqente të punoja me Mourinho, por së pari ëndërr të fitoj titullin kampion me Fenerbahce”. Muriqi këtë sezon ka shënuar 10 gola në kampionat dhe është shënuesi më i mirë i skuadrës së tij. /abcnews.al

gjykata-harun-celik-1280x600.jpg
nev ila19:42 | 03/01/2020

Gjykata në Turqi ka vendosur  të lërë në burg të akuzuarin si pjesëmarrës në organizata terroriste, Harun Çelik, i cili dy ditë më parë u deportua nga Shqipëria në Turqi.

Gjykata vendosi masën e paraburgimit me akuzat për “pjesëmarrje si anëtar në organizatë të armatosur terroriste”.

Çelik më herët ka qenë i dënuar disa muaj në Shqipëri, i cili u arrestua në aeroport si i akuzuar për veprat penale “falsifikim i letërnjoftimeve, i pasaportave ose i vizave” dhe “falsifikim i dokumenteve”.

Po kush është Harun Çelik?

Harun Çelik nuk ka punuar asnjë ditë në Shqipëri dhe ka ardhur në vendin tonë vetëm për ta përdorur si mundësi kalimi drejt një vendi perëndimor.

ABC News kontaktoi të njohur të tij në Shqipëri, të cilën nuk pranojnë të shfaqen, por që rrëfejnë jetën e mësuesit 42 vjeçar.

Ai ka studiuar për mësuesi në Stamboll dhe deri në vitin 2016 ka dhënë mësim në Ankara dhe Bursa.

Çelik është i martuar dhe ka 4 fëmijë, 1 prej të cilëve e ka adoptuar jashtë vendit teksa merrej paralelisht edhe me tregti tekstilesh.

Mësuesi kishte filluar të mos ndjente siguri për jetën e tij dhe familjes që prej vitit 2013 kur nisi agresioni i Erdogan ndaj gylenistëve, ndaj, në vitin 2016 Harun Çelik u shpërngul bashkë me familjen e tij në Kazakistan, aty ku ndodhej edhe kur u tentua grushti i shtetit.

Që prej asaj kohe, ai ishte gjithnjë në kërkim të një mundësie për të shkuar në një vend perëndimor e për të kërkuar azil politik.

Një i njohur i tij në Kosovë e pajisi me një vizë false kanadeze dhe përmes saj, mësuesi turk tentoi të udhëtonte nga Tirana në Toronto në korrik 2019.

Por polica shqiptare e zbuloi dhe e arrestoi. Ai bëri burg deri në 1 janar kur u lirua. Ai u dëbua menjëherë dhe u dorëzua tek antiterrori turk.

Avokati i tij, Alban Bengasi i tha ABC News, se Harun Çelik nuk ishte njoftuar për dëbimin, siç ligji e kërkon, dhe për këtë arsye, ai nuk kishte pasur mundësi të bënte ankimim./abcnews.al

tirana-feston.jpg
Veronik Istrefaj17:46 | 03/01/2020

Skuadra e Tiranës do të bëjë mini-fazën përgatitore 2 javore në Turqi. Klubi bardheblu ka zgjedhur Antalian për të kryer këtë mini-fazë dhe për t’u përgatitur për gjysmën e dytë të sezonit në Superiore. Bardhbelutë kryeqytetas do të luajnë edhe tre ndeshje miqësore gjatë këtij afati dy javor. Alaniaspor dhe Korona Kielce ishin dy ekipet që njiheshin dhe më parë, ndërsa Mezokovedi, ekipi hungarez, është konfirmuar sot nga klubi i Tiranës si një nga tre rivalët. Me anë të një njoftimi në faqet zyrtare të klubit, Tirana konfirmoi të tre skuadrat rivale, si dhe tre datat kur do të luhen sfidat.

Gjate kësaj periudhe KF Tirana ka përcaktuar të zhvillojë 3 ndeshje miqësore:

08.01.2020 Alaniaspor (Tur) KF Tirana
11.01.2020 Mezokovezdi (Hun) – KF Tirana
15.01.2020 Korona Kielce (Pol) – KF Tirana

 

rudi-hajdari-1280x668.jpg
nev ila16:45 | 03/01/2020

Reagime të shumta ka patur nga gjithë aktorët politikë por jo vetëm ekstradimi i shtetasit turk Harun Celik drejt shtetit turk.

Ditën e sotme në një postim në rrjetet sociale, kryetarja e grupit së opozitës parlamentare Rudina Hajdari shkruan se ekstradimi i shtetasit turk pa një vendim gjyqsor, dhe drejtë një vendi ku ka rrezik serioz për jetën e tij, përbën shkelje të të drejtave të njeriut, dhe Konventën e Këshillit të Europës për Ekstradimin.

Sipas Hajdarit institucionet përkatëse duhet të marrin masa për zhvillimin e plotë të një procesi të rregullt ligjor për subjektin, dhe të ndalohen aktet politike në cënim të të drejtave të njeriut.

Postimi i plotë:

“Me ekstradimin e shtetasit turk Harun Çelik, pa një vendim gjyqësor dhe drejt një vendi ku ka rrezik serioz për jetën dhe trajtimin e tij, gjendemi përball shkeljeve të të drejtave të njeriut, ligjeve në fuqi të RSh, Kartës Europiane të të Drejtave të Njeriut dhe Konventën e Këshillit të Europës për Ekstradimin.
Institucionet përkatëse të ndërmarrin masa për zhvillimin e procesit të rregullt ligjor për subjektin dhe të ndalohen aktet politike në cënim të të drejtave të njeriut”, shkruan kryetarja e opozites parlamentare./abcnews.al

gylenist.jpg
in a20:21 | 01/01/2020

42-vjeçari turk, Harun Çelik është  dëbuar me urgjencë nga Shqipëria mbrëmjen e sotme. Abc News ka arritur të mësojë përmes burimeve të besuara, se 42-vjeçari është ndaluar në aeroportin e Rinasit në korrik 2019, teksa hynte tranzit me vizë kanadeze false. Ai kishte arritur ti shëptonte përndjekjes së regjimit turk, por u arrestua në Shqipëri për “dokumente false”.

Harun Çelik vuajti dënimin prej 5 muaj e gjysmë në burgun 302 tek rruga “Mine Peza” në Tiranë. Sot (1 janar 2020) ai është njoftuar se i ka përfunduar dënimi. Por as sot, 42 vjeçari nuk është lënë i lirë….

Menjëherë është transportuar nga qelia e burgut, në Drejtorinë e Migracionit që ndodhet në Laprakë. Pasi është mbajtur disa orë aty në mënyrë të paligjshme, Harun Celik është shoqëruar me makina policie në aeroportin e Rinasit, siç shihet në pamjet e siguruara nga Abc News.

Miqtë e tij kanë reaguar në rrjetet sociale duke e cilësuar të padrejtë vendimin e autoriteteve shqiptare për të dëbuar mësuesin turk. Ata apelojnë për lirimin e 42-vjeçarit që përndiqet në Turqi, vetem se është mbështetës i Lëvizjes Gylen.

“Harun Çelik u dërgua në zyrën e Migracionit dhe prej andej u rrëmbye dhe u fut me forcë në një automjet. Miqtë e tij ndërhynë në aeroport. A ka ndonjë ligj në Shqipëri?”, shkruan Barbarossa Kaya, e cila bën tag në twitter Kryeministrin Rama.

“Turp për qeverinë shqiptare! Kryeministri Edi Rama shpërfilli dinjitetin e vendit të tij dhe zbatoi urdhrin e Erdoganit.

Të drejtat e njeriut të Harun Çelik janë shkelur, ai dëbohet në mënyrë të paligjshme në një operacion policor të rreptë”, shkruhet në një tjetër status.

Harun Çelik, 42 vjeç, është mësues me profesion dhe i shpëtoi përndjekjes në Turqi, pasi vuajti dënimin në Shqipëri po dërgohet jashtë vullnetit të tij sërish në Turqi. Nuk dihet akoma saktësisht nëse iu dha mundësia të bëjë kërkesë për azil ose te apelojë vendimin e deportimit apo jo pasi as avokati i tij nuk është njoftuar për vendimin për deportim, që është bërë më 1 janar, një ditë pushimi. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono