turizem

OK-MBYTET-ANIJA-MBULIM_ABC-M2-T1.mpg_snapshot_00.03-1280x722.jpg
G. P.12:16 | 26/11/2018

Një anije e cila shërbente për turizëm është mbytur në bregdetin e Himarës. Për fat nuk ka patur njerëz në bord dhe sipas peshkatarëve kjo ka ndodhur për shkak të motit të keq. Era e fortë ka këputur litarët dhe dallgët morën me vete anijen e drurit e cila ka mbetur gjysëm në ujë. Ndërkohë era e fortë vazhdon në bregdetin jonian dhe asnjë mjet nuk ka dalë në lundrim. Kapiteneria ka pezulluar punën në port deri në një urdhër të dytë./abcnews.al

 

KBR-PER-TURIZMIN-ABC-M5-T2.mpg_snapshot_01.22-1280x720.jpg
G. P.19:39 | 17/11/2018

Këshilli i Bashkëpunimit Rajonal ka dhënë 12 grante për promovimin e turizmit në Ballkanin Perëndimor. Grantet me vlerë 548 mijë euro në total janë pjesë e një projekti 5 milionë euro të Bashkimit Europian për krijimin e një oferte turistike rajonale.

Këshilli i Bashkëpunimit Rajonal ka dhënë 12 grantet e para të projektit të financuar nga Bashkimi Europian me qëllim promovimin e turizmit në Ballkanin Perëndimor. Qëllimi i granteve me vlerë 548 mijë euro në total, një prej të cilëve i përfituar nga Shqipëria, është krijimi i një oferte të përbashkët rajonale të turizmit kulturor dhe atij të aventurës.

Në ceremoninë e zhvilluar në Sarajeve, Bosnjë Hercegovinë, sekretari i Përgjithtshëm i Këshillit, Goran Svilanoviç, tha se këto grante do të kontrinbuojnë në zgjerimin e ofertës turistike rajonale, pasi mbulojnë të gjashta ekonomitë e Ballkanit Perëndimor. Sipas Genoveva Ruiz Calavera, drejtore për Ballkanin Perëndimor në Komisionin Europian për Fqinjësinë dhe Negociatat e Zgjerimit, projekte të tilla do të ndihmojnë rajonin në përmbushjen e aspiratës së Bashkimit Europian.
“Bashkëpunimi ekonomik rajonal është prioritet për ne, pasi ne duam të japim më shumë vende punë, më shumë rritje dhe më shumë prosperitet për qytetarët e rajonit. Duke u bashkuar si një rajon dhe zhvilluar e promovuar produkte të njësuara turizmi, Ballkani perëndimor mund të krijojë një ofertë shumë më të gjërë dhe ngacmuese për tregun europian dhe më gjërë”, tha Calavera. Në mesin e gjashtë përfituesve është edhe Shqipëria.

Romina Sahiti, Instituti i Politikave Publike dhe Private: “Ky grant ka për qëllim që të zhvillojë një produkt turistik, i cili do të prekë 3 shtete, Shqipërinë, Kosovën dhe Maqedoninë. Zakonisht në rajonin e Bjeshkëve të Namuna. Sikundër edhe sektori i turizmit, edhe ky produkt ka gjithashtu për qëllim që të rrisi punësimin dhe të zhvillojë vlerat e përbbashkëta turistike që ka ky rajon.”

Zhvillimi dhe promovimi i turizmit në Ballkanin Perëndimor, përfshi Shqipërinë, është thelbi i një projekti me vlerë 5 milionë euro të financuar nga Bashkimi Europian që do të zbatohet nga Këshilli i Bashkëpunimit Rajonal./abcnews.al

FSHATI-ARREZ-RRUGA_ABC-M2-T1.mpg_snapshot_00.25-1280x681.jpg
G. P.20:50 | 15/11/2018

Një ndër 100 fshatrat turistikë të Shqipërisë, Arrza, në Bashkinë e Bilishtit është lënë në harresë. Segmenti rrugor ndodhet në gjendje të mjerueshme. Mënyra e vetme për ta përshkuar rrugën që të çon në fshat është me fuoristradë.

Udhëtimi drejt Arrzës, fshatit, që njihet për resurset natyrore dhe potenciale turistike, bëhet vetëm me fuoristradë. I gjithë segmenti, prej 11 kilometrash, që lidh Mirasin më Arrzën, është i degraduar. Me gropa dhe i rrezikshëm gjatë dimrit. Zona është e izoluar pjesën më të madhe të vitit. Në të njëjtën gjendje është edhe segmenti tjetër, prej 4 kilometrash, që lidh Dardhën me këtë fshat, nëse niseni nga Korça.

Banori 1: “Një të sëmurë ta vizitosh në spital nuk e çon dot se e bën më keq. Sepse derisa të arrijë në spital bëhet si leckë e prishur.”

Banori 2: “Se këtu po të bëhet rruga, këtu ka turizëm.”

Banori 3: “Arrëza ka resurse që rrallë mund ti gjesh në vendet e tjera.”

Mbetur prej vitesh jashtë hartës se investimeve, banorët e fshatit, që mund t’ju ofrojë turistëve, asgjë më pak se Dardha, sot mbijetojnë me të ardhurat nga blegtoria.

Kryetari i fshatit Arrzë, Andrea Hanelli:“Për çfarë turizmi mund të flasësh në Arrëz, kur ti duhet të marrësh traktor të tërheqësh lopët”.

Arrza, pjesë e Bashkisë se Bilishtit, është përzgjedhur për programin zhvillimor të 100 fshatrave të Shqipërisë për turizëm rural./abcnews.al

MOZAIKU-ATHINASE-APOLLONI-ABC-M2-T1.mpg_snapshot_01.09.jpg
G. P.18:55 | 06/11/2018

Një mozaik që konsiderohet nga më të bukurit është hapur në Apolloni për tu pastruar, kurse për publikun ai do të jetë gati vitin tjetër.

Është vila më e madhe në Apolloninë Antike dhe ka një nga mozaikët më të bukur. I fshehur ose i mbyllur për publikun, mozaiku i Athinasë po sheh dritën e diellit 20 vjet pas zbulimit të tij të parë. Drejtues të parkut dhe arkeologë thonë se mozaiku po i nënshtrohet kontrollit për dëmtime të mundshme e më pas do pastrohet. Për publikun do të hapet viti e ardhshëm.

Ornela Dyrmishaj, drejtoreshë e Parkut Apollonisë: “Monumenti ka një kohëzgjatje apo një shtrirje shumë të gjatë, por që e kemi të shek.III p.k. Pjesa që kemi hapur në ka motive florale dhe gjeometrike dhe është në monokrom, bardhezi, nuk kemi shumë ngyra të përdorudra në të. Besoj që vitin tjetër do të jetë një nga atraksionet plus për Apolloninë, siç ishte edhe vila sivjet që u hap. Vitin tjetër do të kemi edhe këtë vilë që do të jetë një shtesë për monumentet që do të kemi në mozaik.”

Mozaiku i Vilës së Athinasë perfaqëson një aset të pa studiuar ende brenda parkut arkeologjik të qytetit antik. Ky i fundit është themeluar 2700 vjet më parë./abcnews.al

SHENGJIN-KOSOVARET-PUSHUES_ABC-M2-T1.mpg_snapshot_01.03-1280x723.jpg
G. P.15:28 | 30/09/2018

Në Shëngjin numri kryesor i pushuesve përbëhet nga shqiptarët e Kosovës. Por operatorët turistikë parashikojnë një ikje graduale të tyre pas liberalizimit të vizave dhe për këtë arsye po kërkojnë tregje të reja.

Të huajt që vizitojnë Lezhën dhe kryesisht bregdetin e Shëngjinit ishin të shumtë këtë sezon. Por sërish i gjithë sektori i turizmit është i varur nga pushuesit kosovarë. Frika e një largimi gradual të tyre nga kjo zonë turistike ka nxitur operatorët turistikë të mendojnë eksplorimin e tregjeve të reja. Operacionet e tyre kanë nisur. Europa lindore dhe Ballkani janë objektivi i parë, ndaj sipas operatorëve po bashkëpunohet me agjenci vendase dhe të huaja.

Helga Ceni, Menaxhere: “Përveç pushuesve nga Kosova kemi bërë përpjekje për të bashkëpunuar me asgjenci të huaja si në Poloni dhe Rusi.”

Eduart Shtjefni, Menaxher: “Kemi marrë pjesë vazhdimisht nëpër panaire, jemi lidh me agjenci të ndryshme si kombëtare edhe ndërkombëtare. Qëllimi jonë është që të afrojmë sa më shumë grupe të ndryshme turistash.”

Marin Nikolli: “Bëmë një lloj turizmi jo më spontan, por paksa të koordinuar.”

Turizmi duhet të jetë më i koordinuar duke rritur mundësitë e eksplorimit për vizitorët dhe të huajt dhe jo thjesht ujë dhe rërë. Kjo kërkon një promovim më të madh të zonës dhe jo vetëm marketing individual.

Marin Nikolli: “Jo në shkallë të biznesit, duhet të bëhet në shkallë zone e rajoni. Ky mendoj se është çelësi.”

Vetëm gjatë këtij viti, turizmi në Lezhë njohu rritje me 20 % të turistëve të huaj që e frekuentuan zonën, por kjo rritje u dedikohet disa operatorëve turistikë dhe jo një mirë organizimi të këtij sektori./abcnews.al

Gazetar: Gjergj Figuri
Operator: Gac Hila

turistii.jpg
G. P.19:17 | 19/09/2018

Turisti i parë hapësinor që do të bëjë një udhëtim rreth hënës, i cili do të zgjasë pesë ditë, është një miliarder japonez 42 vjeç. Udhëtimi pritet të bëhet në vitin 2023, ndërsa nuk bëhet e ditur shuma e parave që ai ka paguar për këtë udhëtim në hapësirë.

Do të jetë japonez, turisti i parë që do të udhëtojë në vitin 2023 përreth Hënës. Lajmi është konfirmuar nga “Space X”, shoqëria hapësinore e transportit e krijuar nga Elon Musk, themeluesi i Tesla. Personi i parë që do të udhëtojë në bortin e “Big Falcon Rocket” është miliarderi dhe koleksionisti i artit Jusaku Maezaua, 42 vjeç, pronar i Zozo, shoqëri mode që shet produktet e saj online.

Administrator i deleguar i qendrës më të madhe tregtare online të specializuar në fushën e modës në Japoni, ai ka një pasuri prej 3 miliardë dollarësh. Maezaua bëri të ditur se do të ftojë dhe tetë artistë që të marrin pjesë në udhëtim në mënyrë që të frymëzohen për krijimet e  tyre të ardhshme. Në një deklaratë për mediat miliarderi u shpreh se kjo ishte ëndrra e jetës së tij.

“Space X” ka ndërmend të përdorë për udhëtimin, raketën më të madhe e cila aktualisht është endë në fazë zhvillimi. Testi i parë i fluturimit sipas ekspertëve do të ndodhë brenda dy vitesh. Sipas Musk ky është një hap i rëndësishëm para për t’i lejuar njerëzve të zakonshëm që të realizojnë ëndrrën e tyre duke udhëtuar në hapësirë. Udhëtimi do të zgjasë katër deri në pesë ditë.

Shuma që ka paguar miliarderi japonez për këtë udhëtim, nuk është bërë publike, por është e qartë se turizmi hapësinor është një privilegj që u takon shumë pak personave.

Ishin miliarderë dhe shtatë turistët hapësinorë që blenë një udhëtim të shkurtër me anijen kozmike ruse Soiuz për të shkuar në stacionin hapësinor ndërkombëtar. Turisti i parë që ka vizituar orbitën tokësore në prill të 2001-shit ishte Denis Tito, me një pushim mes yjesh që zgjati shtatë ditë./abcnews.al

KLOSI-NE-BERAT-MBULIM.mpg_snapshot_00.35-1280x720.jpg
G. P.15:40 | 17/09/2018

Berati ka nevojë urgjente për punëtorë të kualifikuar me qëllim që ti përgjigjen numrit të shtuar të turistëve. Apeli vjen nga ministri i Turizmit dhe Mjedisit Blendi Klsoi, i cili në nisje të vitit të ri shkollor vizitoi shkollën profesionale të këtij qyteti. Sipas ministrit Klosi numri i turistëve në Kalanë e Beratit këtë vit është dyfishuar prandaj ka dale në pah edhe nevoja për më tepër personel të kualifikuar.

Ministri Klosi i bëri thirrje biznesit të kthejë sytë nga nxënësit e shkollave profesionale për të pasur një staf të qëndrueshëm. Njëkohësisht ministri i Turizmit dhe Mjedisit kërkoi shtimin e kapaciteteve akomoduese dhe rritjen e cilësisë së shërbimit./abcnews.al

RRUGA-POJAN.mpg_snapshot_00.42-1280x720.jpg
G. P.14:50 | 08/09/2018

Në zonën e Pojanit ku nuk është vënë dorë prej vitesh kanë nisur investimet e para. Aktualisht po kryhen ndërhyrje për sistemin e kanalizimeve në rrugën e fshatit. Pojani, që ndodhet pranë parkut të Apollonisë, është përfshirë në projektin kombëtar të 100 fshatrave turistikë.

Ndodhemi në Pojan të Fierit. Deri dje ishte një fshat i harruar. Mungonte rruga, kanalizimet. Vetëm pak ditë më parë ka nisur puna për të rehabilituar zonën. Banorët shprehen të kënaqur veçanërisht për sistemin e kanalizimeve.

Banori 1: “Kemi qenë shumë keq tani po rregullohemi. Po bëhet kanali, po bëhet shumë shumë i mirë, me tuba me të gjitha.”
Banori 2: “Na mbytën mushkonjat, na mbytën plehrat.”

Këtu nevojiten investime të mëdha për ti ofruar një pamje të denjë zonës fare pranë Apollonisë antike.

Banori 3: “Në fashatin tonë duhet shumë edhe kujdesi për sa i përket investimeve.”

Pojani me rreth 300 familje është përfshirë në hartën e 100 fshatrave turistikë. Një problem që mori fund ishte edhe rruga që lidhte Fierin me Pojanin dhe Apolloninë. Shtrimi i saj ndikoi edhe në rritjen e numrit të vizitorëve në Apoloni, në 8000 të tillë në vit./abcnews.al

paris-1280x723.jpg
G. P.21:43 | 02/09/2018

Shumё shoqёrues turistёsh besojnё, se qytetet e Europёs duhet tё shihen patjetёr: ndёrtesa tё mrekullueshme historike, si nё njё libёr historie. Por ato pёrfundojnё vetёm nё skenat e Games of Thrones, si p.sh.Dubrovniku.

Turizmi ёshtё njё festё tregtimi gjatё gjithё vitit: festivale elektro, ngjarje sportive, udhёtime me transoqeanikё. Qyteteve u merret fryma nga masa e turistёve. Unё e shoh kёtё zhvillim prej vitesh nё Kroaci. Éshtё e thjeshtё t’ia rrisёsh vlerёn kёtij vendi: Mjafton vetёm natyra, malet karstike dhe ishujt, deti i kthjellёt, larmia e pejzazhit nё distanca fare tё shkurtra. E megjithatё menaxherёt e turizmit predikojnё qё kjo nuk mjafton: „Kjo nuk mjafton! Duhet tё ketё mё shumё ofertё, ndryshe turistёt nuk vijnё pёrgjatё gjithё vitit.”

Kroacia ёshtё tani nё modё, kuzhinieri me famё botёrore, qё ndёrooi jetё para pak kohёsh, Anthony Bourdain qysh nё vitin 2012 ka thёnё:”If you have not been here, you are an idiot!”

Sivjet u shtua edhe Kampionati Botёror i Futbollit, gjё qё  e bёn tё njohur nё mbarё botёn kёtё cep tё vogёl toke pёrgjatё Adriatikut.

Zhvillim me ҁdo kusht. E kjo nё njё vend, bregdeti i tё cilit nga njёra anё kufizohet me male dhe nga ana tjetёr me det. Mbi pesё milionё prenotime turistike brenda fare pak muajsh, rrugёt e tragetet janё tё tejmbushura.

Disa brohorasin: shanse tё pafund, pёr tё nxjerrё para! Disa legalisht e disa tё tjerё duke iu shmangur zyrёs së financave.

Paraja josh

Ofertat janё tё shumta. Turistёt tani s’kanё nevojё tё mjaftohen mё vetёm me peshkun e bardhё dhe blitvan (kontornoja tradicionale dalmatine me patate dhe mangold). Jo, sepse sot janё tё gjitha, qё nga sushi e deri tek tapas e acai boёls. Autentike? Askush nuk do mё. Udhёtarёt kёrkojnё tani “global-urban-feeling”:  njeriu udhёton pёr ta ndjerё veten sikur ndodhet kudo.

Spliti, i njohur pёr festёn nё pallatin e vjetёr romak diokletian? Ishulli Hvar prej vitesh konsideorhet si destinacion kryesor. Vendasit nuk mbrohen prej zhurmёs si p.sh. banorёt e Barcelonёs nё Katalonjё. Nga njёra anё ishulli jeton prej turizmit. Qyteti Hvar sivjet megjithatё ka vendosur rregulla rigoroze: pikniku nё sheshin e pazarit mund tё tё kushtojё disa qindra Euro gjobё. Zhurma natёn nёpёr qytet po ashtu kushton shtrenjtё, Menaxhimi i turizmit punon tani, qё tё tёrheqё grupe tё tjerё turistёsh dhe jo ata qё festojnё me furi. Kamerierёt, qё servirin pijet natёn, servirin tё nesёrmen mëngjesin. Ata tё kёrkojnё ndjesё me kortezi, nёse harrojnё diҁka. „Sorry, nata ishte e gjatё”. Mbrojtje e punёmarrёsit? E vёshtirё. Personel? Kjo rregullohet pёrmes kontratave afatshkurtёra. Studentёt rrinё nё radhё pёr tё punuar nё verё pёr pak para, nёpёr baret e plazheve. Çmimet? Tё paarritshme. Por edhe pёr ndonjё turist.

Autentike? Harroje…

Spliti, ky qytet i bardhё krenar, trashёgimi kulturore e UNESCO-s, ёshtё kthyer nё njё muze pёr turistёt. Aty nuk gjen mё jetё autoktone. „Splicani”, qё e kanё kaluar fёmijёrinё nёpёr gurёt e mermertё tё kёtij qyteti, shkojnё rrallёherё nё qendrёn historike. „Pёrse? Pёr t’u shtyrё prej masёs turistёve?”

Kur sivjet vajta nё pallatin diokletian dhe pashё qё ishte mbyllur

Croatia Records, dyqani im i vogёl i preferuar, sa nuk mё pushoi zemra. Kuptohet, koha e dyqaneve tё disqeve ka marrё fund, e ngushёllova veten. Por tani ka gjithnjё e mё pak dyqane tё vogla si dikur, mbijetojnё vetёm ato qё u shёrbёjne turizmit.

Dyqanet tёrhiqen nёpёr qendra tregtare nё periferitё e qyteteve, nё shumicёn e rasteve ato u pёrkasin rrjeteve ndёrkombёtare. Turizmi po i ndryshon gjithnjё e mё shumё qendrat e qyteteve europiane, aq sa ato po shndёrrohen nё „askund”, ashtu si aeroportet, kafenetё, restorantet, dyqanet, tё gjitha njёsoj anё e mbanё. Vetёm sfondi ndryshon, emrat e qyteteve, qё ndodhen nё suvenire nёpёr dyqanet e suvenirёve. Jeta, e gjitha ҁfarё e bёn njё qytet urban autentik, po spostohet prej udhёtarёve, qё ta kenё sa mё tё lehtё pёr tё derdhur paranё.

Prej tetё serish qendra historike e Dubrovnikut kthehet nё qytetin Königsmund nga seriali Game of Thrones…E „pacёnuar” ёshtё fjala paradoksale e bumit. Dikur nё qendrёn historike tё qyteteve kishte njerёz qё ushqenin macet e rrugёs. Fёmijё, qё thёrrisnin, kur luanin futboll nё rrugё. Plazhi i qytetit ishte dikur vendi i shlodhjes sё vendasve, edhe i tё varfёrve. Sot gjithҁka ёshtё skenё: nё plazh tё duhet tё marrёsh njё shezlon me qira, nё tё cilin tё duhet tё shtrihesh mbi djersёn e atij qё ka pushuar aty para teje, tё bёsh fotografi pёr instagramin – madje mё e mira duke pasur nё dorё edhe njё gotё kokteji tё shtrenjtё.

Gjire tё fshehta nuk ka mё, sepse anё e mbanё janё ankoruar anije, duke notuar nuk sheh me horizontin e kuqerremtё, por kiҁin e anijes. Nёse dёshiron tё shijosh nё qetёsi perёndimin e diellit, tё del pёrpara ndonjё turist me dronin e tij, qё gjёmon nё qiell pёr ta konservuar kёtё ҁast.

Madje edhe nёn ujё tё dalin turistёt me kamera. Sivjet njё risi ishte qё nuk tё duhej mё njё mbajtëse e zgjatuar për celularin, sepse ndёrkohё celulari pothuajse ёshtё i ngjitur nё dorё. Celulari i turistit filmon gjithҁka pёr tё, skanon mjedisin pёrreth si nёpёr nёndetёse.

Ndёrsa vetë turisti ecёn me kokёn pёrpara, sepse kamera ia filmon tё gjitha. Ndoshta nё mbrёmje ai arrin tё shohё se ku ka qenё gjatё ditёs.

Skenё e kohёs sё lirё pёr masat

Nё radhё pёr t’u bёrё viktimё e bumit ёshtё Vis-i, ishulli i vogёl para Splitit, sepse atje do tё luhet pjesa e dytё e Mamma Mia. Ishulli grek Skopelos, ku ёshtё xhiruar pjesa e parё, e ka humbur ndёrkohё shpirtin e vet. Nё ishullin pёrrallor Brac ndёrkohё banorёt janё duke u stёrvitur pёr kryengritjen kundёr koncernit turistik gjerman TUI dhe njё investitori vendas, qё po planifikojnё njё kompleks hoteli pёr tre mijё turistё – kjo nё njё fshat peshkatarёsh me mё pak se tre mijё banorё!

Ishte njё kohё, kur nё Euopё jetohej, studiohej, hulumtohej, peshkohej. Bёheshin kёpucё, e qepeshin rroba – dhe bёhej turizёm human. Por turizmi oktapod po zgjerohet gjithnjё e mё shumё dhe fitimet nuk po investohen pёr pёrmirёsimin e infrastrukturёs vendase.

….ҁfarё i josh tjetёr mijёra turistё nё rrugicat e ngushta tё „perlёs sё Adriatikut”

Natyrisht pёrfitojnё shumё vendas. Derisa ata, si nё Dubrovnik, e kuptojnё, qё papritur dhjetё mijё vetё nё ditё e vizitojnё perlёn e Adriatikut. Pikёrisht Dubrovniku, qyteti i lirisё, qё dikur kishte tё shkruar pavarёsinё nё portat e veta dhe ka luftuar pёr shekuj nёpёr beteja. Por nё shekullin e 21-të erdhi dёshtimi i fundit: turizmi e ka pushtuar qytetin, pa asnjё rezistencё.

Bekimi me paranё qё sjell turizmi po shndёrrohet nё njё plagё, nёse synimi i vetёm mbetet qё qyteti tё kthehet nё njё skenё pushimesh pёr ata qё mund t’i financojnё udhёtimet. Nёse vendi shitet pёr hiҁ gjё, tek ata qё mendojnё vetёm pёr vete. Shpirti i kёtyre qyteteve tё kontinentit ka qenё dikur polisi. Qyteti! Ato janё menduar si bashkёsi qytetarёsh dhe hapёsirё publike. Ka ardhur koha qё Europa t’u japё tё drejtёn e bashkёvendosjes vendasve, se ҁfarё turizmi konsiderojnё tё favorshёm pёr qytetet dhe fshatrat e tyre tё peshkatarёve, se si mund tё pёrfitojё prej kёsaj infrastruktura lokale dhe si natyra mund tё vihet sёrish nё qendёr tё vёmendjes e jo pёrfitimi. Ka ardhur koha nё radhё tё parё, qё tё flitet pёr njё Europё, qё sёrish tё ketё mё shumё se sa turizёm, kryesisht nё jug./DW

RAMA-PER-TURIZMIN-VLORE-ABC-M5-T1.mpg_snapshot_00.49-1280x720.jpg
G. P.14:26 | 01/09/2018

Qeveria po pret përgjigjen përfundimtare nga Banka Europiane për Rindërtim dhe Zhvillim për të nisur për punën për ndërtimin e by pass-it të Fierit. Kryeministri Edi Rama e bëri të ditur nga Vlora ku tregoi edhe pritshmëritë për turizmin deri në fund të vitit.

Qeveria pret që deri në fund të vitit numri i turistëve që vizitojnë Shqipërinë të arrijë rreth gjashtë milionë. Kryeminstri Edi Rama e bëri të ditur nga Vlora.

“Është një shifër e konsiderueshme. Nuk është e mjaftueshme për atë që ne kemi nevojë dhe për sa ekonomia jonë ka nevojë, por është në të njëjtën kohë një shprehje kuptimplotë e progresit që kemi bërë.”

Shefi i qeverisë përsëriti se ky ishte sezoni më i pastër turistik megjithkëtë problem i mbetjeve në Vlorë do të marrë zgjidhje me ndërtimin e fushës sanitare. Kryeminsitri deklaroi se puna për ndërtimin e saj do të nisë vitin e ardhshëm.

“Projektet e mëdha nuk nisin në momentin kur hidhet lopata e parë. Ne kemi 4 vjet që punojmë për fushën sanitare të mbetjeve të Vlorës.”

Sa i përket derdhjes së ujrave të zeza në det një program ndërhyrje në ujësjellës e kanalizime për Jonin do të nisë të zbatohet në vjeshtë. Ndërkohë që, puna për zgjatimin e Lungomares deri tek tuneli e më pas drejt Orikumit do të nisë së shpejti. Ndërsa tregonte projektet në infrastrukturë, kryeministri ndalet tek by passi i Fierit.

“E kam shumë të qartë që ndërkohë që ne flasim aty vazhdojnë komentet, po by pass-i i Fierit?, që na është bërë taman si by passi i fytit. Sinqerisht përditë në fyt nga sikleti, sepse është një legjendë katastrofike paaftësie, papërgjegjshmërie dhe korrupsioni. Na është dashur ta prishim komplet kontratët dhe ta bëjmë komplet nga e parame Bankën Europiane për Ndërtim dhe Zhvillim.”

Duket se epilogu i kësaj legjende do të jetë fundi i shtatorit.

“Brenda disa javëve do të na vijë përgjigja përfundimtare e bankës të lidhet kontrata dhe sezoni i ardhshëm ta gjejë rrugën e by passit të hapur për të qenë e kalueshme, nëse jo e përfunduar tërësisht, por të jetë e lirshme dhe e kalueshmë, kështu që kompletohet e gjithë lidhja me Vlorën.”

Shefi i qeverisë e mbyll fjalën e tij optimist dhe thekson se për të përshkuar rrugën nga Tirana në Vlorë do të duhen 55 minuta. Por kjo vetëm pas ndërtimit edhe të segmentit nga Kashari në Rrogozhinë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono