tsipras

GORO-TSIPRAS-ZGJEDHJET-1280x720.jpg
ent ela19:29 | 03/06/2019

Aleksis Tsipras do të shpallë më 10 qershor, datën e zgjedhjeve të parakohshme që do të mbahen në Greqi. Vendimin kreu i qeverisë helene e ka marrë pas humbjes së rëndë në zgjedhjet lokale, në të cilat triumfoi partia opozitare Demokracia e Re.

Partia më e madhe e opozitës greke, Demokracia e re ka fituar shumicën dërrmuese të bashkive të mëdha, si dhe 12 nga 13 qarqet e vendit, në turin e dytë të zgjedhjeve administrative. Kryetari i demokracisë së re, Kyriakos Mitsotakis deklaroi menjëherë pas shpalljes së rezultateve të para, se harta e Greqisë u ngjyros e gjitha në blu. “Vetëm se kësaj here është ngjyra e atdheut”, shtoi Mitsotakis, një javë pas triumfit që kishte arritur partia e tij në zgjedhjet europiane të 26 majit. Në përfundim të zgjedhjeve administrative, Demokracia e re ka fituar 12 nga 13 qarqet e vendit, si dhe shumicën dërrmuese të bashkive me mbi 50.000 banorë. Konservatorët kanë fituar 35 nga bashkitë e mëdha, socialistët e Kinalit 9 dhe SYRIZA e kryeministrit Tsipras ka fituar vetëm në 5 prej këtyre bashkive.

Tsipras tha se “në politikë, ashtu si dhe në jetë, ka rëndësi të dish të fitosh, por ka rëndësi të dish edhe të humbasësh”. ”Por më e rëndësishme është të ngrihesh përsëri e të luftosh”, shtoi Tsipras, duke dashur të japë një mesazh në prag të nisjes së fushatës për zgjedhjet e parakohshme të 7 korrikut. Edhe pse kishte thënë që do të shkojë te presidenti i republikës menjëherë pas përfundimit të balotazhit, për të kërkuar shpalljen e zgjedhjeve, kryeministri grek do ta bëjë këtë më 10 qershor. Kjo shtyrje e afatit që vetë ai kishte deklaruar, u dha vrull skenarëve për një shtyrje deri në vjeshtë të zgjedhjeve të përgjithshme. Por këto skenarë u përgënjeshtruan nga selia e kryeministrit.

“Fitorja e dyfishtë e Demokracisë së Re konsiderohet nga konservatorët si një prelud i triumfit edhe në zgjedhjet parlamentare. Sondazhi më i fundit, i publikuar të dielën në mbrëmje, i jep partisë më të madhe opozitare kuota të njëjta me ato të zgjedhjeve europiane”.

Demokracia e re paraqitet të fitojë 36,5% të votave, kundrejt 27,5 për SYRIZA-n. Pasojnë socialistët e Kinalit me 9,5%, partia komuniste me 6,5%, ndërsa Agimi i Artë konfirmon sërish rënien drastike teksa në rastin më të mirë merr 6 për qind të votave. /ABC News Albania 24/7

SPECIALE-HUMBJA-E-TSIPRAS-BRUNA.mpg_snapshot_00.28-1280x720.jpg
ent ela12:40 | 01/06/2019

Zgjedhjet e 26 majit ne Greqi, ku përveç zgjedhjeve europarlamentare u zhvilluan dhe ato lokale rezultuan me humbje për partinë “Syriza” të Aleksis Tsipras. Fitorja i shkoi kundërshtarit të tij politik, kreut të “Demokracisë së Re” Kiriakos Mitsotakis. Plot 26 kandidatë shqiptarë garuan në këto zgjedhje, por asnjë prej tyre nuk mundi të fitonte, ndërsa suprizë e zgjedhjeve ishin rezultatet negative per partinë neonaziste “Agimi i Arte”. Detajet i sjell “Balkan Abc” i Bruna Çifligut. /ABC News Albania 24/7

GREQI-ZGJEDHJET-ABC-M4-T1.mpg_snapshot_00.09-1280x720.jpg
ent ela16:03 | 27/05/2019

Të dielën në Greqi pritet të caktohet data e zgjedhjeve të parakohshme në vend. Kryeministri grek Aleksis Tsipras konfirmoi lajmin menjëherë pas humbjes së pësuar në zgjedhjet parlamentare europiane të së dielës.

Pas humbjes në zgjedhjet europiane, kryeministri grek Aleksis Tsipras deklaroi se do të kërkojë shpalljen e zgjedhjeve kombëtare. Data e zgjedhjeve do të shpallet pas 2 qershorit, kur përfundon balotazhi i zgjedhjeve për administratat rajonale dhe bashkitë.

“Menjëherë pas raundit të dytë të zgjedhjeve lokale, do t’i kërkoj Presidentit të Republikës shpalljen e zgjedhjeve. Që të jetë populli grek ai që do të marrë vendimin përfundimtar”, deklaroi Tsipras në një mesazh të drejtëpërdrejtë televiziv në orët e vona të mbrëmjes së të dielës.

Më herët, lideri i opozitës, Kyriakos Mitsotakis, tha se Tsipras duhet të japë menjëherë dorëheqjen.

“Kryeministri duhet të marrë përsipër përgjegjësitë e tij. Për të mirën e vendit duhet të japë dorëheqjen për të shkuar sa më shpejt që të jetë e mundur në zgjedhjet kombëtare”, deklaroi Mitsotakis pasi nisën të konfirmohen edhe zyrtarisht rezultatet e exit polleve.

Normalisht, zgjedhjet e përgjithshme në Greqi do të mbaheshin në muajin tetor, kur përfundonte mandati kushtetues i qeverisë Tsipras.

Tashmë, ato pritet të mbahen më 30 qershor, ose më 7 korrik.

 “Në zgjedhjet e djeshme në Greqi kandidoi edhe një numër i konsiderueshëm shqiptarësh, ndërkohë që më shumë se 100 mijë bashkatdhetarë kanë ushtruar të drejtën e votës, pas marrjes së nënshtetësisë greke.

Por ata kandidonin kryesisht me parti dhe koalicione të orientimit të majtë që zgjedhin një numër mjaft të vogël këshilltarësh në bashkitë dhe administratat rajonale.

Megjithatë ka shumë mundësi që disa pak prej tyre të jenë zgjedhur tashmë në këshillat e administratës rajonale, në Athinë dhe Selanik.

Por kjo do të mësohet pjesërisht të mërkurën, kur do të shpallen rezultatet përfundimtare për zonat ku nuk do të ketë balotazh”.

/ABC news Albania 24/7

Tsipras-prgazgjedhje.jpg
Sej rie17:30 | 11/05/2019

Kryeministri i Greqisë Aleksis Tsipras ka shpallur miratimin e masave të reja menjëherë pasi qeveria e tij i mbijetoi mocionit të votëbesimit në parlamentin e vendit. Një mocion i kërkuar nga kreu i ekzekutivit grek.

Qeveria e kryeministrit Aleksis Tsipras i ka mbijetuar mocionit të besimit që paraqiti opozita. Pas votimit, Tsipras tha se ditët e ardhshme parlamenti do të miratojë masat lehtësuese që komunikoi në fillim të javës.

Aleksis Tsipras jo thjesht i ka mbijetuar mocionit të mosbesimit, por ka filluar dhe një votë më shumë nga ç’llogaritej para votimit. 152 votave të maxhorancës qeveritare i është shtuar dhe një deputet i Unionit të Qendrës, duke i çuar në 153 votat në favor të qeverisë. Në anën tjetër, mocioni i mosbesimit të paraqitur nga Demokracia e re, mori vetëm 136 vota.

Debati parlamentar që zgjati tri ditë, ishte një spektakël elektoral me tone tepër të larta. Kyriakos Mitsotakis, kreu i partisë më të madhe opozitare, demokracia e re, kërkoi që kryeministri Tsipras të shpallë zgjedhje të parakohshme kombëtare mbrëmjen e 26 majit.

Mitsotakis: “Mbrëmjen e 26 majit dhe përderisa SYRIZA do të humbasë-siç vlerësoj unë- nuk ju mbetet asnjë alternativë. Të shpallni zgjedhje kombëtare dhe t’i jepni shansin popullit që të marrë në duar fatet e veta”.

Por kryeministri preferoi mos t’i përgjigjet sfidës së opozitës.

Pas marrjes së votëbesimit, Tsipras tha se javën e ardhshme parlamenti do të votojë paketën e masave lehtësuese që u shpallën ditët e fundit. Tsipras tha se masat nuk u morën me qëllim që të joshin votat e qytetarëve për zgjedhjet e 26 majit.

“Është një strategji që synon mbështetjen e shumicës së popullsisë, me qëllim që ata qytetarë të cilët nuk e kanë ndjerë akoma përfundimin e krizës, të kenë në jetën e tyre të përditshme frymëmarrje, lehtësi dhe perspektivë”, deklaroi kryeministri grek./ABC News Albania 24/7

CIPTRAS-1280x707.jpg
Sej rie11:15 | 27/04/2019

Kryeministri grek Aleksis Tsipras deklaroi në Pekin se vendi i tij promovon një marrëdhënie strategjike me Kinën, por duke respektuar edhe angazhimet e Greqisë si vend anëtar i Bashkimit Evropian.

Aleksis Tsipras është një nga pak liderët prej vendeve anëtare të bashkimit Europian, që po merr pjesë aktivisht në samitin e Rrugës së mëndafshtë.

Gjatë ndërhyrjes së tij, Tsipras ka theksuar se Greqia shfrytëzon pozitën unikale, siç tha, gjeopolitike, në pikëtakimin e tre kontinenteve.

“Duam që rajoni ynë, Mesdheu Juglindor, por edhe Ballkani të mos jenë kufijtë, po urat ndërmjet Lindjes dhe perëndimit”.

Teksa afrohet fundi i mandatit katërvjeçar, Aleksis Tsipras po punon kohët e fundit që të përcjellë në opinionin vendas imazhin e Greqisë si një fuqi e butë rajonale.

Në këtë drejtim e kanë ndihmuar sinergjitë dy e trepalëshe, me vende të Ballkanit e të Mesdheut Lindor.

Përcjellja e këtij imazhi, natyrisht, lidhet edhe me zgjedhjet evropiane dhe lokale që do të mbahen muajin e ardhshëm, por edhe ato kombëtare që sipas të gjitha gjasave do të mbahen në vjeshtë.

Një nga kompanitë më të mëdha kineze, Cosco, ka marrë me koncension portin e Pireut, ku po kryen një investim gjigand, me vlerë të përgjithshme 600 milionë euro.

Tsipras tha në samitin e Pekinit se objektivi është që porti të lidhet me akset rrugore Bullgari – Deti i Zi – Rumani si dhe Maqedoni e veriut dhe Serbi.

“Rrjetet e interkonjeksionit do të forcohen me investimet e Kinës në vendin tonë, në fushën financiare dhe teknologjike gjatë viteve të ardhshëm”, tha kryeministri grek.

Më herët këtë muaj, kryeministri grek mori pjesë në takimin e Dubrovnikut, ku Greqia u bë pjesëtari më i ri i Iniciativës 16+1.

greqi-zgjedhje.jpg
nev ila00:00 | 17/04/2019

Kryeministri grek thotë se nuk do të ketë zgjedhje të parakohshme. Në një intervistë televizive, Tsipras deklaroi se zgjedhjet parlamentare do të mbahen në përfundim të mandatit qeveritar të SYRIZA-s, që është muaji tetor.

Në Greqi, kryeministri Aleksis Tsipras u ka dhënë fund skenarëve për zgjedhje parlamentare të parakohshme, duke përsëritur se ato do të mbahen në përfundim të mandatit të qeverisë së tij, në muajin tetor.

Në Greqi është intensifikuar fushata për zgjedhjet evropiane dhe ato lokale që do të mbahen më 26 maj.

Edhe grekët pajtohen që këto zgjedhje konsiderohen si vendimtare për të ardhmen e Evropës.

Por këtu beteja elektorale ka tone të theksuara kombëtare.

Sepse partitë kryesore greke i kanë dhënë fushatës karakterin e një ballafaqimi elektoral, prej të cilit do të rezultojë qeveria e ardhshme e vendit.

Gjithë partitë e opozitës bashkohen në kërkesën e tyre për t’u mbajtur sa më shpejt zgjedhje të parakohshme.

Por kryeministri Aleksis Tsipras ka deklaruar se zgjedhjet parlamentare do të mbahen në përfundim të mandatit qeveritar të SYRIZA-s, që është muaji tetor.

Kjo është një përzgjedhje strategjike. Tashmë ka dëshmi të prekshme se vendi po i rikthehet normalitetit”, tha kryeministri grek gjatë një interviste televizive.

I pyetur për sondazhet që i japin një avantazh mjaft të madh partisë më të madhe opozitare, Demokracia e re, Tsipras u përgjigj me një nuancë humori:

Jam mësuar që të humbas në sondazhe dhe të fitoj në kutinë e votimit”, tha kryeministri grek.

Përkundër reagimeve të fuqishme kundër marrëveshjes së Prespës, Tsipras vlerësoi se realiteti i ri i krijuar në marrëdhëniet me Maqedoninë e Veriut do të ketë impakt pozitiv për SYRIZA-n në zgjedhjet e përgjithshme.

Sipas tij, qytetarët e ndjejnë se çfarë është në dobi të vendit dhe këtë do ta shprehin në momentin e votimit.

Ndërkaq, partia më e madhe e opozitës, komentoi se Tsipras “përsëriti të njëjtat gënjeshtra për Marrëveshjen e Prespës”.

Përgjigjen do ta marrë pas 40 ditësh në kutitë e votimit”, përfundon komenti lakonik i Demokracisë së re./abcnews.al

55a9b832c04c6d52fedb29fbc803e76d.jpg
nev ila15:28 | 12/04/2019

Athina konsideron si kriter bazë për hapjen e negociatave respektimin e të drejtave të minoritetit grek në Shqipëri. Është ky kushti që i ka vendosur kryeministri grek Aleksis Tsipras homologut shqiptar gjatë takimit që zhvilluan në Samitin 16+1 i vendeve të Europës Juglindore me Kinën.

Janë kursyer në dhënien e detajeve për takimin që zhvilluan me dyer të mbyllura kryeministri Edi Rama me homologun e tij grek Aleksis Tsipras. I pari që shpërndau një informacion rreth këtij takimi ishte kryeministri i Greqisë.

“Takim me kryeministrin e Shqipërisë, Edi Rama, në kuadër të punimeve të takimit të kryetarëve të shteteve të Europës Qendrore, Lindore dhe Juglindore dhe Republikës Popullore të Kinës”, shkruan kreu i qeverisë greke në foton e publikuar në rrjetet sociale.

Burime diplomatike në Athinë, të pyetura nga televizioni ABC News thanë se takimi zgjati gati një orë dhe u zhvillua në një “klimë shumë pozitive”. Sipas burimeve, Tsipras ka nënvizuar se krahas realizimit të reformave të nevojshme, Athina konsideron si kriter bazë për hapjen e negociatave respektimin e të drejtave të minoritetit grek në Shqipëri.

Në këtë kuadër, Tsipras e Rama kanë diskutuar për çështjen e pasurive të minoritarëve, por edhe për aktet zbatuese të ligjit mbi minoritetet që u miratua para disa muajsh. Një tjetër çështje që u diskutua gjatë takimit lidhej me rishikimin e teksteve shkollore të historisë.

Ndërsa zyra e shtypit e Kryeministrisë shqiptare njofton se biseda mes kryeministrave shqiptare dhe grek u përqendrua në reformat e ndërmarra nga Shqipëria me synim hapjen e negociatave me Bashkimin Europian si edhe në nxitjen e mëtejshme të marrëdhënieve dypalëshe jo vetëm në rrafshin politik e të fqinjësisë së mirë, por edhe në shkëmbimet tregtare dhe investimet e huaja.

Gjatë më shumë se katër viteve që ndodhet në pushtet Aleksis Tsipras ka vizituar apo pritur kryeministrat e gjithë vendeve të rajonit, me përjashtim të Kosovës, që Athina nuk e ka njohur zyrtarisht si shtet të pavarur. E vetmja vizitë e munguar është ajo e zotit Tsipras në Tiranë apo anasjelltas, e kryeministrit Edi Rama në Athinë.

Por analistët grekë vërejnë se, pavarësisht mungesës së një vizite të tillë, është e rëndësishme që dy kryeministrat i mbajnë hapur urat e komunikimit, qoftë dhe “në fushë asnjanëse”.

Kryeministri Edi Rama zhvilloi takim dypalësh në Dubrovnik edhe me kryeministrin e Republikës Popullore të Kinës, Li Keqiang gjatë samitit të 16+1 mes vendeve të Evropës Juglindore dhe Kinës.

Gjatë këtij takimi kreu i qeverisë shqiptare i kërkoi homologut të tij përshpejtimin e procedurave që do të lejonin hyrjen e disa produkteve ushqimore në tregun kinez. Kërkesa e kryeministrit Rama për heqjen e ndërsjellë të vizave mori premtimin e kryeministrit Li Keqiang, i cili konfirmoi edhe heqjen e çdo barriere për importin e mjaltit, verës dhe vajit të ullirit shqiptar.

Qëndrimin e tij në Kroaci, kryeministri Edi Rama e ka ndarë edhe me ndjekësit në mediat sociale./abcnews.al

Tsipra-dhe-zaev-1280x713.jpg
G. P.23:01 | 02/04/2019

Kryeministri Aleksis Tsipras ka vizituar të martën Shkupin, duke u bërë lideri i parë grek që viziton fqinjin verior që prej vitit 1991, tashmë të riemëruar Maqedonia e Veriut. Me një seri fotosh “SELLFI” të bëra në momentin e shtrëngimit të duarve, Tsipras dhe homologu Zoran Zaev kanë treguar se përplasjet i takojnë se shkuarës dhe se tani dy vendet janë të hapura për bashkëpunim./abcnews.al

tsipras-800x445.jpg
ent ela19:39 | 01/04/2019

Kryeministri grek Aleksis Tsipras fillon neser një vizitë zyrtare historike në Shkup, i shoqëruar nga një delegacion i madh qeveritar e dhjetra biznesmenë të rëndësishëm. Kjo  vizite kërkon të dëshmojë se tashmë janë hapur perspektiva të reja për bashkëpunimin ndërmjet të dy vendeve.

Mbërritja të martën në Shkup e zotit Tsipras konsiderohet një vizitë historike, pasi është e para e një kryeministri grek në Maqedoninë e Veriut.

Aleksis Tsipras do të shoqërohet nga një delegacion që përfshin gati gjysmën e ministrave të qeverisë së tij, por edhe një numër i madh biznesmenësh.

 “Ndërsa lista ende nuk është konfirmuar zyrtarisht, mediat thonë se do të jenë 120 afaristë, mes të cilëve bosat e disa prej grupeve më të fuqishme të biznesit grek.

Sipas analistëve vendas, vizita synon të ndryshojë impaktin negativ që është krijuar në opinionin grek pas miratimit të marrëveshjes së Prespës.

Tsipras gjithashtu kërkon të dëshmojë se tashmë janë hapur perspektiva të reja për bashkëpunimin ndërmjet të dy vendeve”.

Tsipras e Zaev do të bëjnë deklarata të përbashkëta për shtyp, për herë të parë që nga qershori i kaluar, kur u miratua marrëveshja e Prespës.

Kryeministri grek do të takohet me kryetarin e parlamentit, Talat Xhaferi, ndërsa nuk parashikohet të pritet nga presidenti i vendit Gjorgje Ivanov.

Gjatë qëndrimit në Shkup të kryeministrit grek, pritet të nënshkruhen një sërë marrëveshjesh të rëndësishme.

Mes tyre, një në fushën e mbrojtjes, hapjen e një pike të re të kalimit kufitar dhe për aviacionin civil.

Gazetar ABC News, Greqi: Robert Goro

 

TSIPRAS-DEKLARATA-1280x609.jpg
ent ela22:12 | 25/03/2019

Aleksis Tsipras ka akuzuar Turqinë se në Ditën e Pavarësisë së Greqisë ka shkelur hapësirën ajrore të saj, duke ndërhyrë me avionë ushtarakë edhe në kursin e helikopterit të tij.

Kryeministri grek Aleksis Tsipras ka akuzuar Turqinë se ka “ngacmuar” helikopterin e tij me avionë luftarakë, teksa po udhëtonte me rastin e ditës së pavarësisë. Tsipras ka deklaruar se helikopteri i tij u detyrua të fluturonte në nivel të ulët për shkak se avionët turq hynë në hapësirën ajrore greke. Kryeministri ka akuzuar Turqinë për veprime të pamatura që nuk kanë asnjë kuptim. “Ushtria greke i lokalizoi mjetet që shkelën hapësirën ajrore kombëtare”, ka deklaruar Tsipras gjatë një fjalimi në ishullin e vogël të Egjeut, Agathonisi, i ndodhur pranë Turqisë dhe i zgjedhur për të përkujtuar ditën e pavarësisë. Në ditën në fjalë, grekët festojnë ngritjen e popullit të tyre kundër Perandorisë Otomane në vitin 1821. “Pata nderin të pres këtu në Agathonisi juve dhe disa avionë të forcave ajrore turke.

Ndoshta donin të merrnin pjesë në festën tonë”, tha me ironi Tsipras para të pranishëmve. Por kryeministri grek nuk e fshehu irritimin. “Çfarë u tha mendja?”, u shpreh ai. Më tej Tsipras shtoi se, Greqia është e gatshme të bashkëpunojë me Turqinë, por ajo do ta mbrojë gjithmonë integritetin e saj kombëtar. Nga ana e tyre, forcat turke të sigurisë i kanë hedhur poshtë akuzat, duke deklaruar se avionët po kryenin vetëm një mision rutinë. Marrëdhëniet mes dy vendeve janë të tensionuara prej dekadash për shkak të pretendimeve territoriale në detin Egje. Por si Tsipras ashtu edhe lideri turk Recep Tajip Erdogan janë përpjekur t’i përmirësojnë ato. Në vitin 2017, Erdogan u bë presidenti i parë turk që vizitonte Greqinënë 65 vjet./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono