toyota yaris

toyota-yaris.jpg
ad min12:57 | 29/10/2019

Dosja e 3.4 milionë eurove të gjetura në Toyota Yaris do të kalojë serish për rihetim në organin e akuzës. Drejtuesja e Krimeve të Rënda kishte kërkuar dërgimin e çështjes në Gjykatë, por togat e zeza kërkuan plotësim të dosjes dhe vazhdim të hetimit.

Gjykata për Krimet e Rënda kthen për hetime të mëtejshme dosjen “Toyota Yaris”, për të cilën drejtuesja e komanduar e Prokurorisë për Krime të Rënda Donika Prela udhëzoi prokurorët që të bëjë komunikimin e akuzës 4 të pandehurve dhe të dërgojnë çështjen për gjykim.

Në shkresën e firmosur me 11 Shtator, Prela u kërkon dy prokurorëve Doloreza Musabelliu dhe Eneid Nakuçi që të dërgojnë dosjen për gjykim. Duke shkelur ligjit për funksionimin e prokurorive në Republikën e Shqipërisë, pasi në nenin 48 pika 3 thuhet, se drejtuesi i prokurorisë mund t’i udhëzojë prokurorët e çështjes vetëm për mbarëvajtjen e ecurisë së procedimit.

Dosja e 3.4 milion eurove ka shkaktuar debate gjatë seancës paraprake  pasi Gjyqtari Fran Prendi, ka rrëzuar kërkesën e prokurorisë për kalimin e çështjes për gjykim, me argumentin se hetimet janë të paplota.

Rikthimi i dosjes për rihetim nga gjyqtari Prendi kishte të bënte me dy akte të reja që prokuroria i kishte marrë nga Belgjika dhe Italia, por që  ende ishin të papërkthyera. Gjithashtu burime konfirmojnë se prokurorët dhe gjyqtari kanë debatuar për faktin se nga ana e organit të akuzës nuk janë kryer të gjitha veprimet hetimore për identifikimin e personave të tjerë që mund të jenë të përfshirë në këtë çështje.

Të arrestuar janë Agim Ceka, Alban Mollaymeri, Edi Lika, Klevi Lika dhe të shpallur në kërkim Alfred e Elvis Vladi, të akuzuar për sjelljen në Shqipëri të 3.4 mln eurove me “Toyotat Yaris”. Për këtë çështje po zhvillohen hetime në Shqipëri dhe në Belgjikë. Alfred dhe Elvis Vladi, dy vëllezërit që janë në kërkim për dosjen kanë dijeni për ngjarjen dhe në gjykatë ishin të përfaqësuar me avokatë mbrojtës./ABC News Albania

toyota-yaris.jpg
ad min16:01 | 01/10/2019

Gjykata e Krimeve tw Rënda ka shtyrë seancën paraprake për çështjen “Toyota Yaris”, pasi mungonte avokati i dy prej të pandehurve. Në këtë seancë do të vendosej nëse çështja do të kalonte për gjykim, apo do të pushoheshin hetimet.

Në të njëjtën seancë, do shqyrtohej kërkesa e avokatëve për masë më të butë sigurie, për 4 personat nën hetim, që ndodhen në arrest me burg. Të pandehur për 3.4 milionw eurot e sekuestruar në dy makinat “Toyota Yaris” në portin e Durrësit më 24 Qershor të vitit të shkuar janë babë e bir Edi Lika e Klevi Cani, si dhe Alban Mallymeri.

Ata akuzohen për “pastrim parash në kuadër të grupit të strukturuar kriminal”. Ndërsa i katërti, Agim Çeka akuzohet për “armëmbajtje pa leje”. Në kërkim për këtë ccështje janë edhe dy kushërinjtë Alfred dhe Elvis Vladi, të dyshuar si porositësit e parave. Seanca e radhës u la për në datë 8 Tetor ora 10:00./ABC News Albania 24/7

toyota-yaris.jpg
ad min15:41 | 24/09/2019

Pas mbylljes se hetimeve për çështjen “Toyota Yaris” në media është publikuar një udhëzim i drejtueses se Prokurorisë për Krime të Rënda, Donika Prela, dërguar prokurorëve të çështjes. Por në një reagim për mediat, Prokuroria shprehet se udhëzimi nuk ka cënuar punën hetimore të prokurorëve.

Mbyllja e hetimeve për dosjen “Toyota Yaris” ka shkaktuar debate në prokurori. Shkak është bërë udhëzimi i firmosur nga drejtuesja e komanduar e Prokurorisë për Krime të Rënda, Donika Prela, e cila udhëzon prokurorët e çështjes që të mbyllin hetimet brenda datës 24 Shtator.

Përmes shkresës së firmosur me 11 Shtator, Prela u kërkon dy prokurorëve Doloreza Musabelliu dhe Eneid Nakuçi që të dërgojnë dosjen për gjykim. Në shkresën e siguruar nga ABC News thuhet:

“Prokurorët e ngarkuar me hetimin të kryejnë veprimet si edhe të marrin masa për dërgimin e çështjes për gjykim përpara datës 24/09/2019, datë në të cilën përfundon afati tërësor i paraburgimit në hetim për katër të pandehurit”.

Drejtuesja e Prokurorisë për Krime të Rënda, Donika Prela ka reaguar për këtë çështje duke sqaruar udhëzimi i saj nuk cënon punën e prokurorëve të çështjes.

“Drejtuesi i Prokurorisë, ashtu sikurse ka ndodhur në rastin konkret ka të drejtë, vetëm të udhëzojë prokurorët dhe oficerët e policisë gjyqësore, me udhëzim jo të detyrueshëm për të kryer veprime hetimore, përfundimin e shpejtë dhe në afat të dosjes, duke mos cenuar në asnjë rast të drejtën e prokurorëve për zgjidhje”.

Por sipas ligjit për funksionimin e prokurorive në Republikën e Shqipërisë, në nenin 48 pika 3 thuhet: Udhëzimet në lidhje me procedime konkrete, sipas pikave 1 dhe 2, të këtij neni, mund të jepen kryesisht në momentin e caktimit të çështjes për ndjekje prokurorit, ose më pas, kur vlerësohet e nevojshme për mbarëvajtjen e ecurisë së procedimit.

Të arrestuar për çështjen  “Toyota Yaris” ku brenda dy makinave u gjetën 3.4 milionë euro në portin e Durrësit janë babë e bir Edi Lika e Klevi Cani, Alban Mollaymeri, dhe Agim Cekaj, ndërsa në kërkim janë kushërinjtë Alfred dhe Elvis Vladi./ABC News Albania 24/7

toyota-yaris.jpg
ad min11:52 | 12/09/2019

Mbyllen hetimet për 3.4 milionë eurot e sekuestruara në dy makinat, “Toyota Yaris”. Prokuroria për Krime të Rënda i ka komunikuar akuzën, e “pastrimit të parave në kuadër të grupit të strukturuar kriminal”, 3 prej 4 të arrestuarve. Agim Ceka akuzohet vetëm për armëmbajtje pa leje.

Prokuroria e Krimeve të Rënda ka mbyllur hetimet për dosjen e njohur si “Toyota Yaris” dhe ka ngritur akuza ndaj 4 personave të arrestuar në Shqipëri. Prokurorët i kanë komunikuar akuzën e pastrimit të parave në kuadër të grupit të strukturuar kriminal, Alban Mollaymerit, Edi dhe Klevi Likës.

Ndërsa Agim Cekës i është komunikuar akuza për armëmbajtje pa leje, për shkak se gjatë kontrollit në banesë, i është gjetur një armë zjarri. Pas mbylljes së hetimeve dosja për 10 ditë do të zhvillohet seanca paraprake dhe do të vendoset nëse kjo dosje do të shkojë ose jo për gjykim.

Në 24 Qershor 2018, autoritetet sekuestruan në portin e Durrësit 3.4 milionë euro në dy automjete “Toyota Yaris” që vinin nga Belgjika. Katër të arrestuarit ishin pjesë e kompanisë, që sillte makinat.

Ata kanë mohuar të kishin dijeni për 3.4 milionë eurot e fshehura në dy automjetet e ardhura nga Belgjika. Në arrati, me një urdhër arresti ndaj tyre janë dy kushërinjtë Elvis dhe Alfred Vladi, porositës të makinave. Hetimet për të dy vijojnë, pasi policia i ka shpallë në kërkim ndërkombëtarë.

Për të njëjtën dosje po kryhen hetime edhe nga prokuroria belge, e cila më 25 Korrik më mori në pyetje të arrestuarit në Shqipëri, si dhe kreun e opozitës Lulzim Basha, se nga e kishte marrë informacionin se drejt Portit të Durrësit ishin nisur të fshehura miliona euro me “Toyota Yaris”.

Para për të cilat lideri i opozitës ka akuzuar numrin dy të partisë Socialiste Taulant Balla, 3 ditë përpara se 3.4 milionë eurot të sekuestroheshin.

/ABC News Albania 24/7

SINKRON-BASHA-PAS-PYETJEVE-ABCM5T1.mpg_snapshot_00.49-1280x720.jpg
ent ela11:19 | 25/07/2019

Kreu i PD Lulzim Basha ishte në Prokurorinë për Krime të Rënda për atë që njihet si çështja Toyota Yaris. Basha ka deklaruar për mediat se ka dhënë informacione të reja në lidhje me këtë çështje.

Për rreth 1 orë e 30 minuta Kryetari i PD Lulzim Basha ka dhënë sqarime para grupit të prokurorëve belgë dhe dy prokurorëve shqiptarë për atë që njihet si çështja e Toyota Yaris. Jashtë dyerve të prokurorisë Kreu i opozitës deklaroi se ka dhënë më tepër informacione nga ato që kishte bërë publike.

Kryetari i PD vijoi akuzat për mazhorancën duke u shprehur se ata po përdorin koncesionet dhe tenderat për të pastruar paratë e drogës.

Më herët në prokurorinë për Krime të Rënda kishin mbërritur me letërporosi 3 pyetje për liderin e opozitës ku konsistonin në mënyrën sesi ai është informuar për mbërritjen në vendin tonë të 3.4 milonë eurove.  Basha u largua pa dhënë një përgjigjie.

Të martën prokurorët belgë kanë morën në pyetje 4 të pandehurit Edi dhe Klevi Lika, Alban Mollaymeri dhe Agim Çeka, të cilët ndodhen të arrestuar në vendin tonë. Ndërkohë në kërkim nga autoritetet e të dy vendeve janë kushërinjtë Alfred dhe Elvis Vladi. /ABC News Albania 24/7

 

 

 

lulzim-basha-1.jpg
ent ela16:10 | 23/07/2019

Burime nga Partia Demokratike bëjnë të ditur se kryedemokrati Lulzim Basha ka shprehur gatishmërinë e plotë të kontribuojë në hetimin e autoriteteve të drejtësisë belge për dosjen e njohur si “Toyota Yaris” ku u kapën 3.4 milionë euro.

Kryetari i opozitës është shprehur i gatshëm për të ndihmuar me informacionet që disponon në zbardhjen e kësaj çështjeje ku ai pretendon se krimi është i lidhur me politikën në aferën e pastrimit të miliona eurove me garanci politike të përfaqësuesve më të lartë të kupolës së Rilindjes.

Kreu demokrat është në kontakt me autoritetet belge dhe mbetet në pritje të rakordimit me ta për mënyrën e bashkëpunimit. /ABC News Albania 24/7

toyotaaaa.jpg
ent ela15:10 | 23/07/2019

Kryedemokrati Lulzim Basha do të merret në pyetje ditën e enjte nga grupi i prokurorëve belgë, të cilët kanë mbërritur në Shqipëri për të hetuar lidhur me çështjen e 3.4 milion eurove te gjetura në 2 makinat ‘Toyota Yaris’. Belgët ditën e sotme kanë marrë në pyetje edhe 4 të arrestuarit për këtë çështje Edi dhe Klevi Lika, Alban Mollaymeri dhe Agim Çeka.

Një grup prokurorësh belgë kanë mbërritur në Tiranë, për t’u kërkuar prokurorëve të Krimeve të Rënda informacion të plotë lidhur me hetimet e deritanishme për 3.4 milionë eurot që u gjeten në Toyota Yaris. Ditën e Enjte përballë grupit të prokurorëve Belg do të qëndroj Lideri i Opozitës Lulëzim Basha, ku do tu përgjigjet pyetjeve që më herët kishin mbërritur me letërporosi. Kryedemokratit Basha do t’i bëhen 3 pyetje: si është informuar ai për prejardhjen e parave, si është informacioni i saktë që ka marrë dhe nga kush i ka marrë këto informacione. Dy ditë para se 3.4 milionë euro të kapeshin në dy makina Toyota Yaris në Durrës, Lulzim Basha akuzoi nga foltorja e kuvendit kreun e grupit parlamentar socialist Taulant Balla si i përfshirë në këtë çështje, ndërsa Balla i cilësoi akuzat si shpifje.

Burime kanë konfirmuar se hetuesit belgë kanë marrë në pyetje 4 të pandehurit Edi dhe Klevi Lika, Alban Mollaymeri dhe Agim Çeka, të cilët ndodhen të arrestuar në vendin tonë. Ndërkohë nga ana tjetër nuk është bërë akoma e ditur nëse belgët i kanë sekuestruar paratë për llogari të tyre ashtu siç kishin kërkuar edhe me anë të letër porosive të mbërritura më herët në Prokurorinë e Krimeve të Rënda. Ata i kanë kërkuar paraprakisht kolegëve të Krimeve të Rënda që ta mbajnë larg nga mediat këtë hetim.  Për këtë çështje të shpallur në kërkim janë edhe dy kushërinjtë Alfred dhe Elvis Vladi. Emrin e Alfred Vladit në prokurori e ka zbuluar pikërisht Alban Mollaymeri. Ai ka deklaruar para grupit hetimor, se disa muaj më pare, kishte porositur disa makina të tipit “Toyota”, nëpërmjet njeriut të tij Alfred Vladi, por nuk ka pasur aspak dijeni për shumën e parave, që u gjet brenda makinave. Referuar përgjimeve telefonike rezulton se Mollaymeri ka komunikuar me Alfred Vladin, menjëherë sapo është vendosur bllokimi i automjeteve.

/ABC News Albania 24/7

 

toyota-yaris.jpg
nev ila22:49 | 11/06/2019

Prokuroria Belge me anë të letër-porosisë që mban datën 30 prill, i ka kërkuar Prokurorisë për Krime të Rënda, që të marrë për llogari të hetimit të tyre dëshminë e kreut të PD Lulzim Basha në lidhje me 3.4 milionë eurot që u gjetën në makinat Toyota Yaris që u kapën në portin e Durrësit në fund të qershorit e kaluar. Autoritetet belge kanë nisur një hetim paralel me autoritetet shqiptare mbi këtë çështje dhe kanë 12 persona nën hetim.

Me anë të një letër porosie Prokuroria Belge, i ka kërkuar Prokurorisë së Krimeve të Rënda, që të marrë në pyetje kryedemokratin Lulzim Basha, në cilësinë e personit që ka dijeni për ngjarjen e sekuestrimit të 3.4 milion eurove në portin e Durrësit. Edhe prokuroria Belge po kryen prej disa muajsh një hetim për 3.4 milionë eurot dhe janë duke hetuar 12 persona me akuzën e pastrimit të parave. Në kuadër të këtij hetimi, autoritetet belge kanë kërkuar që kryedemokratit Basha ti bëhen 3 pyetje:

-Si është informuar ai për prejardhjen e parave?

-Si është informacioni i saktë që ka marrë?

-Dhe nga kush i ka marrë këto informacione?

Vetë Basha është thirrur në prokurori 23 tetorin e vitit 2018 për të dëshmuar në lidhje me një hetim të nisur ndaj tij për nxjerrje të sekretit shtetëror për çështjen e “Toyota Yaris”-it.

Nga ana tjetër belgët kërkojnë që prokuroria e krimeve  të rënda t’u vërë në dispozicion, një kopje të dosjes, nëse kanë nisur një hetim menjëherë pas deklaratave të liderit të opozitës. Në kërkesën që mban datën 30 prill, ata kërkojnë që këto informacione së bashku me përgjigjet e Bashës t’i dërgohen në një kohë sa më të shpejtë.

Prokurorët e çështjes pritet që në ditët në vazhdim të thërrasin kryedemokratin  të japë shpjegime për 3.4 milion eurot që u gjetën në makinën “Toyota Yaris”.

Personat e proceduar në Belgjikë janë Alfred Vladi, Elvis Vladi, Edi Lika, Agim Ceka, Alban Mollaymeri, Niman Nimani, Alman Nimani, Albana Vladi, Arianit Nimani, Drita Sopo dhe Driton Hakaj.

Ndërsa në letër-porosinë e dytë që ka mbërritur në prokurorinë e krimeve të rënda, belgët kanë kërkuar që shuma e parave të sekuestrohet për llogari të atyre dhe të rimerren në pyetje 4 të arrestuarit Edi dhe Klevis Lika, Agim Ceka dhe Alban Mollaymeri.

Dy ditë para se 3.4 milionë euro të kapeshin në dy makina Toyota Yaris në Durrës, Lulzim Basha akuzoi nga foltorja e kuvendit kreun e grupit parlamentar socialist Taulant Balla si i përfshirë në këtë çështje, ndërsa Balla i cilësoi akuzat si shpifje.

Shitësi belg i makinave Toyota Yaris gjatë dëshmisë së tij, ka pohuar se nuk e njihte më parë personin shqiptar të cilit, ia ka shitur makinën, pasi e kishte kontaktuar përmes internetit e vetëm në një moment të dytë janë takuar nga afër, ku ka rënë dakord që t’i shiste automjetin Alban Mollaymerit. Emrin e Alfred Vladit në prokurori e ka zbuluar pikërisht Alban Mollaymeri.

Ai ka deklaruar para grupit hetimor, se disa muaj më parë, kishte porositur disa makina të tipit “Toyota”, nëpërmjet njeriut të tij Alfred Vladi, por nuk ka pasur aspak dijeni për shumën e parave, që u gjet brenda makinave.  Referuar përgjimeve telefonike rezulton se Mollaymeri ka komunikuar me Alfred Vladin, menjëherë sapo është vendosur bllokimi i automjeteve./ABC News Albania 24/7

Untitled-1-1.jpg
ad min15:38 | 01/05/2019

Alfred dhe Elvis Vladi, dy personat e dyshuar si porositësit e makinave “Toyota Yaris”, ku rreth 1 vit më parë u kapën 3.4 milionë euro rezultojnë të pastër penalisht në Belgjikë dhe Gjermani. ABC News ka siguruar përgjigjet e letërporosive e të ardhura nga këto dy vende pas kërkesave të drejtuara nga prokuroria shqiptare për informacion.

Prokuroria e Krimeve të Rënda ka në dorë informacionet e ardhura nga autoritetet belge dhe gjermane për dy kushërinjtë Elvis dhe Alfred Vladi, të dyshuar për aferën e 3.4 milionë eurove që u gjetën në makinat “Toyota Yaris” e sekuestruara rreth një vit më parë në portin e Durrësit.

Nga përgjigjet e kthyera nga drejtësitë e dy shteteve europiane rezulton se Elvis dhe Alfred Vladi janë të pastër dhe pa precedentë të mëparshëm penalë në këto dy shtete.

Burime për ABC News theksojnë se në letërporosinë e kthyer nga autoritetet belge është e zbardhur edhe dëshmia e shitësve të makinave që janë marrë në  pyetje për këtë ngjarje. Në deklarimet e tyre thuhet se ata kanë bërë një kontratë shitje të rregullt dhe se nuk disponojnë asnjë informacion në lidhje me paratë e gjetura brenda makinave.

Po ashtu, organi i akuzës shqiptare, nëpërmjet letërporosive i ka kërkuar informacion autoriteteve britanike në lidhje më këta dy persona.

Nga verifikimi i dokumentacionit rezulton se “Toyota Yaris”, ku ndodheshin paratë ishte porositur nga Alban Mollaymeri, që është i arrestuar. Mollaymeri, në deklarimet para grupit të hetimit, ka pohuar se ka një servis privat me makina dhe se “Toyotat” i ka porositur nëpërmjet të njohurit të tij, Alfred Vladit.

Nisur nga dëshmia e tij, prokuroria ka dyshime se “Toyota Yaris” është blerë nga Alfred Vladi dhe në rrethana ende të pazbardhura prej tyre, në dyert e makinës është fshehur edhe shuma e parave.

Për 3.4 milionë eurot që vinin në Shqipëri përmes portit të Durrësit janë arrestuar babë e bir Edi dhe Klevis Lika, Agim Caka, Alban Mollaymeri. Ndërsa kushërinjtë Alfred dhe Elvis Vladi janë të shpalllur në kërkim./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono