Totenhemi

TOTENHEMI-CELSI-KUPA-E-LIGES-1-1280x634.jpg
ent ela14:51 | 04/04/2019

Totenhemi e përuroi me sukses stadiumin e tij të ri. Skuadra Londineze arriti fitore në Premier Ligë, dhe forcoi pozitat në zonën Champions. Totenhemi e peruroi me fitore stadiumin e tij të ri. Impianti, një vepër arti që kushtoi 1 miliard paund. Shikojeni mirë këtë mrekulli.

Është shtëpia e re e Totenhemit, e cila u hap për herë të parë këtë mesjavë.

Vetëm “Uembli”, lavdia e madhe e Londrës, ka kushtuar thuajse kaq sa ai, rreth 1 miliard paund stërlina, ndërsa futbolli po bëhet gjithnjë e më shumë një biznes global.

Klubi Londinez i presidentit Levi organizoi një ceremoni të shkëlqyer, e plotësisht të merituar, dhe skuadra e trajnerit Maurisio Poçetino u kthye më në fund në fushën e saj, pas gati tre vjetësh pikërisht në “Uembli”.

Kjo vepër arti me emrin “Totenhem Hotspur Stejdium” u ndërtua mbi ish-stadiumin e vjetër “Uajt Hart Lejn”, ka një kapacitet prej mbi 62 000 spektatorësh, ndërsa fusha e futbollit mund të zhvendoset e ndarë në dy pjesë, duke pasur nën të, një fushë me bar sintetik, që do të jetë për ndeshjet e futbollit amerikan apo për koncertet.

Totenhemi e përuroi siç duhet stadiumin, duke e fituar derbin e vogël të Premier Ligës ndaj Kristël Palasit.

Nderi i golit të parë i takoi një miku nga shumë larg, sulmuesit nga Koreja e Jugut, Son Heung-min, dhe kjo ndodhi në minutën e 55-të.

Mesfushori danez, Kristian Eriksen, shtoi të dytin 10 minuta përpara fundit.

“Kjo ishte dita jonë e dytë në stadium, por gjithnjë e më shumë po ndihemi si në shtëpi, do të jetë një vend i rëndësishëm për ne, në të ardhmen, dhe mendoj se bëmë zgjedhjen e duhur. Rreziqet janë, por në futboll, ashtu si në jetë, duhet t’i marrësh në parasysh rreziqet”, tha trajneri Poçetino në përfundim.

Ndeshja e javës së 32-të të kampionatit ishte jo vetëm festë, në prani të mbi 59 000 tifozëve, por edhe një hap para në objektivin për në Champions.

Totenhemi u rikthye në vendin e tretë të Premier Ligës me 64 pikë, ndaj 63 të Arsenalit e Çelsit.

E vërteta është që Arsenali ka luajtur një ndeshje më pak, ndërsa Mançester United ka zbritur në vend të gjashtë me 61 pikë./abcnews.al

TOTENHEMI-CELSI-KUPA-E-LIGES-1-1280x634.jpg
ent ela11:56 | 09/01/2019

Totenhemi mundi Çelsin në gjysmëfinalen e parë të Kupës së Ligës në Angli. Gjithsesi, pati polemika të shumta pas derbit të Londrës në stadiumin “Uembli”.

Dueli i parë shkoi në favor të vendasve. Totenhem Hotspuri e konfirmoi veten, të paktën për momentin, si skuadra më e mirë e Londrës, këtë herë edhe në Kupën e Ligës.

Të mbiquajturit “gjelat” triumfuan minimalisht 1-0 në gjysmëfinalen e parë ndaj Çelsit, dhe bënë një gjysmëhapi drejt objektivit për të fituar më në fund një trofe, veçse polemikat sikur e errësuan suksesin.

Goli i vetëm në “Uembli” u shënua me 11-metërsh, madje pas një penalltie të dhënë me ndihmën e VAR-it.

Gjyqtari Majkëll Oliver fillimisht nuk sinjalizoi asgjë, ashtu siç kishte hedhur poshtë pretendimet e mëparshme të Totenhemit për penallti, por vendasit protestuan dhe ai kërkoi ndihmën e teknologjisë.

VAR-i vendosi për ndëshkim maksimal, dhe Harri Kejn nuk gaboi nga 11 metra larg, duke vendosur fatin e ndeshjes, por ende jo fatin e kualifikimit.

Trajneri i Çelsit, Mauricio Sarri, u shpreh shumë i pakënaqur për vendimin.

“Pas ndeshjes, e pashë aksionin e penalltisë në kameran tonë, dhe mund të them se ishte pozicion jashtë loje, – tha italiani, – kamera jonë ishte në vijë të drejtë me Harri Kejnin. Për fat të keq, vijërojtësi ndaloi dhe mbrojtësit tanë menduan se do të jepej pozicion jashtë loje. Në Angli nuk dinë ta përdorin VAR-in, ndaj gjyqtarët duhet të ndjekin aksionin kur nuk janë të sigurt”.

Edhe trajneri i Totenhemit, Mauricio Poçetino, i dha të drejtë në një farë mënyre, kolegut të tij.

“E vërteta është se VAR-i nuk më pëlqen, – u shpreh argjentinasi, – Këtë herë ne përfituam prej tij, por nga në Kupën e Botës dhe në ligën spanjolle kanë dalë shumë pakënaqësi. Nuk jam kundër teknologjisë, sepse nuk jam kundër përparimit, por rregullat duhet të jenë më të qarta. Nuk më pëlqen të fitoj në këtë mënyrë”.

Çelsi ishte i pafat në “Uembli”, pasi goditi dy herë shtyllën, por nuk arriti të shënonte.

Blutë e Londrës kanë ende shpresë për të përmbysur rezultatin në “Stemford Brixh”, por sezoni bëhet gjithnjë e më i vështirë, sidomos në mungesë të një qendërsulmuesi.

Totenhemi, ndërkaq, shpreson të arrijë finalen dhe të fitojë trofeun e parë që nga vitit 2008. /abcnews.al

Harry-Kane.jpg
ent ela11:27 | 24/12/2018

Premier Liga angleze ka një tjetër pretendent për titull. Ky është Totenhemi, që ndodhet pranë kreut, ndonëse trajneri Poçetino bën thirrje për kujdes.

Nuk ishte vetëm fitorja që krijoi entuziazmin.

Më shumë se kaq, vetë shifrat 6-2 në fushën e Evertonit treguan se Totenhem Hotspuri ia ka mbërritur ditës për të qenë në nivelin e më të mirëve në Angli.

Vetëm 2 pikë larg kampiones Mançester Siti, dhe 6 pikë prapa kreut që mbahet nga Liverpuli.

Ylli kryesor, Harri Kejn, dhe koreanojugori Son, ishin ata që shkëlqyen më shumë, me nga dy gola secili, në një paraqitje ku nuk mund të shahej askush.

Një skuadër mjaft e mirë si Evertoni, të cilën Liverpuli e mundi vetëm në sekondat shtesë, u mposht sikur të ishte një ekip fëmijësh.

Përtej protagonistëve në fushë, tek të cilët bëjnë pjesë edhe Eriksen, Dele Ali, Vertongen apo Joris, meritën kryesore besohet se e ka trajneri Maurisio Poçetino, ai që vlerësohet si tekniku më i kërkuar në Europë, sot pët sot.

Reali e Mançester Junajtidi janë ndër klubet që duan argjentinasin.

Gazetat shkruan pa doreza për rritjen e londinezëve.

“Deili Meil”: Kush thotë se Spërsat nuk mund ta fitojnë titullin? Son dhe Kejn udhëhoqën triumfin, me djemtë e Poçetinos që shënuan 6 gola ndaj Evertonit, për t’u afruar me kreun e ligës”.

“BBC” bën analizën me ish-futbollistin Xhermën Xhenas: Everton-Totenhem 2-6! Si ia doli Poçetino ta bënte Totenhemin, pretendent për titull?

“Deili Mirrër”: Harri Kejni dhe Totenhemi dërguan kartolinën e tyre të Krishtlindjeve me fitoren ndaj Evertonit!

Por, çfarë thotë vetë Poçetino?

“Ende besoj se Liverpuli dhe Man. Siti janë favoritët për titullin, – tha trajneri argjentinas, – pastaj vijmë ne, Çelsi, Arsenali dhe Mançester Junajtidi. Rruga është ende e gjatë për të thënë nëse jemi pretendentë të vërtetë. Shqetësimi im më i madh është që Totenhemi do të ketë vazhdimësi, pasi ndryshe nuk mund të fitosh asnjë trofe”.

Falë Poçetinos, Totenhemi është jo vetëm pranë kreut në Premier, por i pozicionuar shumë mirë në Ligën e Kampionëve.

Shorti I turit të dytë ndaj Dortmundit është vërtet tepër i vështirë, por Spërsat janë për herë të dytë radhazi në këtë nivel, ndërsa prej dekadash as nuk e dinin se çfarë ishte Championsi.

Kualifikimi në një grup me Barcelonën, Interin dhe PSV Ajndhovenin ishte prova më e qartë sesa e fortë është skuadra e Londrës së Veriut. /abcnews.al

FITOJNE-TOTENHEMI-DHE-BAJERNI.mpg_snapshot_00.36-1280x721.jpg
ad min20:17 | 20/12/2018

Disa ndeshje të rëndësishme u luajtën në mesjavë në Europë. Tottenham fitoi derbin ndaj Arsenalit në Kupën e Ligës në Angli, ndërsa Bayern shkurtoi diferencën me kreun e Bundesligës në Gjermani.

Dy fitore të ndryshme, por njëlloj të rëndësishme. Tottenham në Kupën e Ligës në Angli dhe Bayern në Bundesligë, i mbyllën me sukses ndeshjet e mesjavës, në ndjekje të objektivave. Spërsat triumfuan në derbin e Londrës së Veriut në fushën e Arsenalit, duke konfirmuar statusin si skuadra më e fortë e kryeqytetit britanik për momentin. Edhe pse Chelsea dhe Arsenali gjithashtu po zhvillojnë sezon pozitiv, skuadra e trajnerit Mauricio Poccetino bën diferencën. Koreanojugori Son dhe sulmuesi i Anglisë, Dele Ali, ishin autorët e golave dhe Tottenham u kualifikua për në gjysmëfinale të Kupës së Ligës.

Do të ketë përballë Chelsea, që fitoi me Bournmouth-in, ndërsa do të kërkojë trofeun e parë që nga viti 2008. Një incident ndodhi në minutat e fundit, pasi Dele Alli u godit me shishe plastike nga një tifoz i Arsenalit. Ylli i Tottenham-it reagoi duke i treguar rezultatin me gishta, tifozëve vendas, diçka për të cilën u kritikua nga kapiteni i tij, Harry Kane. Në Gjermani, ndërkaq, Bayern bëri detyrën në Bundesligë, por me shumë vështirësi ndaj Lajpcigut.

U desh të vinte minuta e 83-ët që të shënohej goli i vetëm i ndeshjes. Veterani Franck Ribery shpëtoi bavarezët dhe trajnerin Niko Kovaç, dhe tregoi se mbetet sërish i vlefshëm edhe pse klubi mendon ta largojë në fund të sezonit. Me këtë fitore, dhe me humbjen e Dortmundit, Bayern u afrua në 6 pikë distancë nga kreu i kampionatit, që mbahet po nga Dortmundi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono