titulli

serie-a.jpg
G. P.14:10 | 30/07/2019

Duele të fortë në Serinë A, që në javët e para. Kalendari i përcaktuar në Milano ka derbin e Milanos që në javën e katërt, dhe ndeshje të tjera emocionuese.

Sezoni i fundit tashmë quhet legjenda e asaj që shkoi. Juventusi kampion për herë të tetë radhazi i përket historisë, dhe pas arkivimit, vjen menjëherë edicioni i ri, 2019-2020.

Seria A ka tashmë kalendarin e kampionatit të ri, përcaktuar me short në Milano, dhe emocionet janë të garantuara që në fillim, me ndeshje derbi dhe me duele të fortë.

Një “nxemje” në javën e parë, në program në 25 Gusht, me Fiorentina-Napoli, që është konkurrimi më i fortë. Në javën e dytë vjen një duel i nivelit “bombë”, Juventus-Napoli, në stadiumin “Allianz” të Torinos.

Vërtet pa fat skuadra e Carlo Ançelotit, që do të luajë dy herë radhazi jashtë fushe, ndaj rivalëve tepër të fortë. Po në javën e dytë, në 1 Shtator, do të jetë edhe derbi i kryeqytetit, Lacio-Roma, një nga ndeshjet më të ndjera në Itali, padyshim derbi më i ashpër.

Vjet, Roma fitoi 3-1 në fazën e parë, dhe Lacio iu përgjigj me 3-0 në të dytën. Në javën e tretë Juventusi shkon në fushën e Fiorentinës, diçka jo e garantuar si sukses.

Java e 4-ët, në 22 shtator, sjell derbin e madh të “Madoninës”, Milan-Inter në “San Siro”. Edicioni i kaluar ishte për zikaltërit që drejtoheshin nga Luçiano Spaleti, me dy fitore, dhe këtë vit do të duan të vazhdojnë sukseset me trajnerin e ri, Antonio Konte.

Në javën e pestë do të kemi Inter-Lacio dhe Torino-Milan, pra, tifozët do të kenë ç’të shohin në televizor dhe në stadium. Seria A nis në 25 gusht dhe përfundon në 24 maj, gjithashtu me një duel të madh si ai Roma-Juventus.

Juventusi është favorit për titullin, ndjekur nga Interi dhe Napoli./ABC News Albania 24/7

brazil-kupa.jpg
ent ela12:15 | 08/07/2019

Brazili është në festë pas fitores së Kupës së Amerikës. Trajneri Tite vlerësoi skuadrën, ndërsa mediat braziliane i bënë jehonë triumfit të parë pas 12 vjetësh.

Ishte një kremtim i merituar në stadiumin mitik.

Dhjetëra mijë tifozë brohoritën me të madhe në “Marakana” të Rio de Zhaneiros, ndërsa Brazili priste të merrte trofeun e Kupës së Amerikës, pas suksesit 3-1 në finalen ndaj Perusë.

Për një komb kaq të madh futbolli, 12 vjet pa asnjë sukses ishin shumë, ndaj edhe lumturia ishte e madhe.

Në pritje të një triumfi në Kupën e Botës, publiku dhe mediat le të kënaqen me arritjen kontinentale.

Brezi i Dani Alveshit, Tiago Silvës, portierit Alison, Roberto Firminos, Filip Kutinjos apo Gabriel Zhezusit besohet se ka hapur një epokë të re suksesi, dhe mungesa e Nejmarit nuk i prishi aspak punë.

Nuk mund të thuhet se ishte Brazili më i shkëlqyer i mundshëm, madje shpesh u vërshëllye, por rëndësi pati rezultati.

Edhe finalja ndaj Perusë ishte e vështirë, me vendasit që kaluan të parën në epërsi, me rrjetën e Evertonit, por me peruvianët që barazuan pak përpara fundit të pjesës së parë, kur Paulo Gerrero realizoi me penallti.

Pas pushimit, shkëlqeu Gabriel Zhezus, që riktheu avantazhin shumë shpejt, ndonëse sulmuesi i Mançester Sitit e mbylli keq ndeshjen.

Ai u përjashtua me karton të kuq në minutën e 71-të.

Vuajtjet morën fund, në sekondat përmbyllëse kur sulmuesi tjetër, Riçarlison, ktheu në gol një penallti për 3-1.

Ky triumf mund të quhet padyshim meritë e madhe e trajnerit Tite, që në 3 vjet ka kthyer besimin në ekip, si edhe lojën e bukur.

“Jam shumë i lumtur që fituam kupën në vendin tonë, madje pa humbur asnjë ndeshje, – tha Tite, – ishte sukses i merituar, edhe pse shumë i vështirë. Shpresoj që të kemi më shumë besim për në Botëror, apo kompeticionet e ardhshme. Merita ishte e gjitha e lojtarëve që dhanë maksimumin. Nuk më vjen mirë nga fjalët e Mesit, unë e trajtova si jashtëtokësor, por ai duhet të tregojë më shumë respekt”.

Gazetat braziliane patën rast të krenoheshin.

“O Dia”: Shkëlqen më shumë se një e verdhë! Selesao mundi Perunë dhe fitoi Kupën e Amerikës pas 12 vitesh! Në 13 edicionet e fundit ka fituar 6!

“Korreio Braziliense”: Kampioni u kthye! Mjeshtri Tite pati vështirësi, por arriti t’i kalonte të gjitha!

“Tribuna”: Brazili kampion, Danieli ishte ylli! Një vit e një ditë pas eleminimit në Botërorin e Rusisë, seleksioni buzëqesh përsëri!

“Estado de Minas”: Kthimi i kampionit! Në “Marakana” ishin 70 000 tifozë, dhe nga biletat u fituan 38.7 milionë realë brazilianë!

Kjo do të thotë se shuma e mbledhur nga shitja e biletave ishte mbi 10 milionë dollarë amerikanë.

Edhe tifozët brazilianë ishin euforikë, duke kujtuar kohët e lavdishme, vitet kur fitonin me Pelen, Zhairzinjon, Romarion, Ronaldon apo Ronaldinjon.

Siç ndodh gjithnjë me tifozët, ata besojnë se ky është vetëm fillimi I një epoke të re, të madhe. /ABC news Albania 24/7

qytetare-nderi.jpg
nev ila22:00 | 22/05/2019

Ish-atletja rekordmene Marinda Preka është nderuar në qytetin e Laçit me titullin “Qytetare Nderi”. Dy muaj më parë, ish-sportistja mori të njëjtin vlerësim edhe nga ana e Bashkisë Berat.

Marinda Preka, ish-atletja kampione, është nderuar  në qytetin e Laçit me titullin “Qytetare Nderi” nga Bashkia Kurbin.

Krahas sukseseve kombëtare, ish-sportistja është vlerësuar edhe për paraqitjet fantastike që arriti në aktivitetet e ndërkombëtares .

Në Bashkinë Kurbin u zhvillua një ceremoni kushtuar ish-kampiones së atletikes në nivel kombëtar e ndërkombëtar.

Në fjalën e saj, ish sportistja e u shpreh mjaft  krenare për vlerësimin kushtuar karrierës së mrekullueshme.

Dy muaj më parë rekordmenia kurbinase Marinda Preka mori të njëjtin vlerësim edhe nga ana e Bashkisë Berat./ABC News Albania 24/7

PARTIZANI-FESTA-E-TITULLIT.mpg_snapshot_00.02-1280x720.jpg
ent ela13:26 | 22/05/2019

Do të zhvillohet të dielën festa e titullit e Partizanit. Kryeqytetasit do të kenë mundësi të kremtojnë bashkë me tifozët në “Selman Stërmasi”, pas ndeshjes së Superligës ndaj Kukësit.

Nuk ka pse të presë edhe një javë tjetër. Tifozët e Partizanit janë fatlumë që vendimi për festën e titullit u mor në Federatë, dhe u la për këtë të diel.

Trofeu do të dorëzohet, pra, një javë përpara përfundimit të Superligës, në “Selman Stërmasi”, pas ndeshjes së radhës, asaj ndaj Kukësit.

Për mbështetësit e zjarrtë të të kuqve, nuk do të jetë e nevojshme të bëjnë rrugën e gjatë dhe deri diku të vështirë drejt Gjirokastrës, aty ku disa herë ka ndodhur të kurorëzohen kampionët e Shqipërisë.

Kujtojmë Kukësin e vitit 2017, ndërsa vetë trajneri Skënder Gega aty e bëri festën e titullit në 1987, Dinamo e pati në 1986 dhe Tirana e dikurshme, 17 Nëntori, në 1982.

Do të jetë një përsëritje, më pak dramatike, më pak spontane, por më e qetë, më e organizuar dhe ndoshta më masive sesa festa kur titulli u fitua matematikisht në mbyllje të derbit ndaj Tiranës, po në “Selman Stërmasi”.

Tifozët shpresojnë që skuadra e tyre të kthehet tek fitorja, ndryshe nga sa ndodhi menjëherë pas derbit, kur në një farë mënyre iu fal ndeshja Teutës në Durrës, me rezultatin 2-0 për vendasit.

Për më tepër do të jetë sfida me rivalin e vetëm direkt këtë kampionat, Kukësin, si dhe hera e fundit që tifozët do të kenë pranë lojtarët e tyre në sezonin 2018-2019. /ABC News Albania 24/7

 

BOKS-JURGEN-ULDEDAJ-PER-TITULL-BOTERORE.mpg_snapshot_00.26-1280x720.jpg
ent ela14:16 | 11/05/2019

Boksieri shqiptar, Jurgen Uldedadj, mund të fitojë një tjetër brez botëror. Lezhjani ndeshet sonte në Magdeburg të Gjermanisë, për federatën WBC.

Pas dy titujve, kërkon edhe të tretin. Boksieri shqiptar, Jurgen Uldedaj, do të provojë të fitojë titullin botëror për të rinjtë në këtë sport profesionist.

Lezhjani ndeshet sonte me polakun Krzhistof Tvardovski, në sallën e Magdeburgut, qytetit gjerman ku edhe jeton.

Ai e vlerëson shumë lart titullin e sotëm, në federatën WBC.

“Është titulli më i lartë deri në moshën 24 vjeçare dhe pas kësaj moshe arrij të futem në top 10, e cila është më e rënëdëshishme në boksin profesionist”.

Më herët, 21-vjeçari fitoi titullin kampion të Gjermanisë në peshat e mesme, pasi mundi kundërshtarin Jakub Sinek, ndërsa në dhjetor të vitit të kaluar u shpall kampion i botës në versionin ËBO, pas triumfit ndaj argjentinasit Arganjaraz.

Cilat janë synimet e Uldedajt?

“Për momentin synoj të mbroj këto dy tituj që kam dhe të shtoj dhe titullin WBO”.

Boksieri lezhjan ka 10 ndeshje në boksin profesionist për të rinjtë, duke i fituar të 10-ta, dhe dy suksese i ka me nokaut. /ABC News Albania 24/7

olsi-rama.jpg
nev ila15:52 | 07/05/2019

Drejtori i Partizanit Olsi Rama i ftuar në emisionin “PRESSING” ne Abc News tha se, synimi i klubit nuk ishte titulli kampion. Rama zbuloi projektin e skuadrës për të ardhmen.

Partizani eshte shume prane titullit kampion i cili do të ishte i pari pas më shumë se 30 vitesh. I ftuar në emisionin Pressing ne Abc News, drejtori i partizanit Olsi Rama tha se titulli nuk ishte synimi i klubit. Rama siguroi se partizani ka një projekt për të krijuar një grup model për të ardhmen, ndërkohë që hodhi poshtë aleancat.

Piksynimi ynë nuk ishte titulli kampion në fillim të kampionatit. Piksynimi ynë ishte të rrisnim nivelin individual të lojtarëve dhe nivelin e lojës së ekipit. Në sajë të punës së mirë të stafit teknik dhe përkushtimit të lojtarëve u arrit në rezultate më shpejt. Puna është vetëm në fillimet e veta. Objektivi ynë është të ndërtojmë një skuadër që do të jetë aty gjithmonë për të luftuar për titullin, për të prodhura lojtarë, për ti transferuar në kampionate më të forta”, tha Rama.

Olsi Rama zbuloi objektivin e partizanit për të ardhmen.

Kryesore për të ardhmen është ndërtimi i atij kompleksi që do të krijojë mundësinë e akademisë së partizanit në kushte normale. Academia e partizanit do të jetë burimi i lojtarëve”, deklaroi Rama.

Sa i përket dënimit të Skënderbeut, Drejtori i Përgjithshëm i Partizanit u shpreh:

Nuk e doja dënimin e Korçës sepse ishte një njollë për futbollin shqiptar dhe preferoj që të mos ndërtoj suksesin tim mbi fatkeqësinë e të tjerëve. Do doja shumë që Skënderbeu të kthehej ai ekip që ka qenë dhe partizani të tregojë se sa bukur është ta mundësh Skënderbeun”.

Në lidhje me të ardhmen  e Jasir Asanit, Rama tha se objektivi i klubit është ti rrisim lojtarët profesionalisht  dhe më pas ti transferojmë jashtë, pasi fitojnë të dyja palët.

“Synimi është që lojtarët që marrim ti rrisim profesionalisht, e pastaj tu krijojmë mundësinë që ato të transferohen diku jashtë, në kampionate edhe më të mira. Në këtë mënyrë fiton dhe partizani edhe lojtari. Asani është në kontratë, kështuqë kudo që të iki dhe kushdo që do ta marri, duhet të flasë më parë me Partizanin” u shpreh ai./abcnews.al

partizanii.jpg
G. P.21:15 | 04/05/2019

Skuadra  e Partizanit shkatërroi Flamurtarin në Vlorë me rezultatin 3-0. Asani, Çinari dhe Mensah mbajnë firmën e golave. Të kuqtë ruajnë distancën në 10 pikë nga Kukësi.

Asani, Mensah dhe Çinari hedhin hapin më të rëndësishëm drejt titullit kampion në këtë transfertë shumë të vështirë në Vlorë, ku godasin tre herë. Tashmë skuadra e Gegës, Partizani është një hap larg titullit kampion, që do të mundohet ta festojë që javën e ardhshme në derbin e madh kundër Tiranës, ku edhe kjo e fundit ka marrë atë që duhej.

Për Partizanin me mungesa ishte një sfidë shumë e vështirë, por në fushë ishte krejtësisht ndryshe. Flamurtari duket se tashmë nuk ka më forcë, mbi të gjitha mendore, për të vijuar garën, kjo e ndikuar jo pak edhe nga situate e pagave.

Në minutën e 27-të Jasir Asani arriti të thyente Koliçin me tentativën e dytë rresht. Partizani nuk vuajti më, duke gjetur edhe golin e dytë me Mensah në minutën e 52-të, para golit të Çinarit në minutën e 90-të.

Të kuqtë administruan gjithçka me shumë zgjuarsi, duke marrë 3 pikë të arta, sepse distanca nga Kukësi mbetet 10 pikë dhe në derbi mund të nisë festa e madhe, në rast suksesi, ose nëse nuk fiton Kukësi në Gjirokastër. Ajo që dëmtoi deri diku skuadrën e Partizanit ishin kartonët e verdhë të Mensah e Asani të cilët  do të mungojnë në derbi për pezullim.

Vlonjatët ndërkaq mbeten po aty në vendin e tretë në renditje por me pikë të barabarta me Teutën dhe javën e ardhshme në Fushë-Krujë misioni duket sërish i pamundur sepse Kastrioti luan sezonin dhe garën e nxehtë./ABC News Albania 24/7

partizani-kukes-1280x622.jpg
ent ela13:48 | 05/04/2019

Këtë të shtunë do të zhvillohen katër ndeshjet e javës së 27 të kategorisë superiore. Partizani do të luajë në shtëpi ndaj Luftëtarit që i eleminoi nga Kupa e Shqipërisë, ndërkohë që Kukesit udhëton në transfertën e Kastriotit. Sfidë mjaft e bukur do të zhvillohet në Vlorë mes Flamurtarit dhe Tiranës ndërkohë që Laçi pret në shtëpi Teutën.

Të shtunën do të zhvillohen katër ndeshjet e javës së 27 të Kategorisë Superiore. Kryesuesit e Partizanit do të presin në shtëpi Luftëtarin e trajnerit Ahmataj. Të kuqtë vijnë në këtë duel pas humbjes në Kupe pikërisht ndaj gjirokastritëve, ndërkohë që në ndeshjen e kaluar në kampionat barazuan përballë Kukësit. Partizani është lider në sezonin aktual dhe udhëheq kampionatin me 9 pikë më shumë se Kukësi i vendit të dytë. Një fitore ndaj bluzinjve do ta ndihmonte shumë skuadrën e trajnerit Gega të afrohej me titulluin kampion. Kukësi do të udhëtojë në transfertën e Kastriotit. Një ndeshje e kalueshme në letër për verilindorët që vijnë në këtë takim pas fitores ndaj Teutës në Kupën e Shqipërisë. Për verilindorët është një ndeshje delikate pasi krutanët kërkojnë pikët e mbijetesës, por gjithsesi janë favoritë në letër.

Skuadra e Tiranës do të udhëtojë në transfertën e Flamurtarit. Një ndeshje mjaft e rëndësishme për të dyja skuadrat sa i përket objektivave sezonalë. Kuqezinjtë kërkojnë tri pikët për të shpresuar tek ndalesa e Teutës pasi objektivi është vendi i tretë që të kualifikon në Kupat e Europës. Ndërkohë që Tirana e sheh veten 6 pikë më shumë se Kastritoti që është në zonën e ftohtë dhe rreziku është prezent. Bardheblutë kërkojnë rikthimin në kampionat pas barazimit dramatik ndaj Laçit fundjavën e kaluar.

Kurbinasit do të sfidojnë në shtëpi skuadrën e Teutes. Laçi pozicionohet në vendin e 5 në tabelë, 5 pikë larg zonës së Europës dhe një fitore ndaj Teutës do të hapte garën për vendin e tretë.  Ndërkohe që Teuta që ka humbur shpresar për titullin kampion, kërkon të blindojë vendin e tretë. /abcnews.al

 

PARTIZANI-FITON-NDAJ-KASTRIOTIT-1280x720.jpg
ent ela20:57 | 09/02/2019

Partizani vazhdon rrugëtimin drejt titullit kampion. Të kuqtë fituan pastër 2-0 ndaj Kastritot duke thelluar në 8 pikë diferencën me Kukësin që luan të dielen ndaj Tiranës.

Partizani vazhdon rrugën drejt titulli kampion. Të kuqtë fituan përballë Kastriotit me shifrat e pastra 2-0 në ndeshjen hapëse të javës së 21 të kategorisë superiore. Dy golat në pjesën e dytë që mbajnë firmën e Telushit dhe Bardhit i dhanë fitoren Partizanitt e trajnerit Skender Gega, e cila e sheh veten 8 pikë më shumë se Kukësi që luan këtë të dielë ndaj Tiranës. Pjesa e parë ishte pothuajse e barabartë aq sa goditja e parë drejt portës erdhi në minutën e 27 me Asanin. Të kuqtë i shkuan shumë pranë golit të avantazhit në minutën e 44 me Kristi Kote, por topi shkon ngjitur me shtyllën. Fraksioni i dytë i lojes nis në mënyrën më të mirë për kryeqytetasit.

Bruno Telushi realizon një supergol nga distanca duke i dhënë avantazhin Partizanit. Një gol që ia vlen të rishihet. Të kuqtë nuk ndalen me kaq pasi dyfushojnë rezultatin pak minuta më vonë me Bardhin.  Sulmuesi përfiton nga një goditje e Males që ndalet në shtylle duke realizuar qetësisht me portën e boshatisur. Të kuqtë administrojnë mirë lojën duke mos lënë shumë hapësira pas, ndërkohë që i shkojnë pranë golit të tretë me Asanin. Në minutat e mbetura nuk ka ndryshim rezultati dhe Partizani fiton tre pikë të arta. /abcnews.al

9-2.jpg
ent ela20:46 | 19/01/2019

Bajerni është optimist për të mbrojtur titullin kampion në Gjermani. Trajneri Niko Kovaç vlerësoi skuadrën pas fitores me Hofenhajmin.

Vit i ri, histori e re. Tek Bajerni e dinë se çdo të thotë të luftosh në Bundesligë, dhe duket se të besuarit e trajnerit Niko Kovaç, më në fund, gjetën rrugën e duhur për të shkuar tek fitorja.

Suksesi 2-1 në stadiumin e Hofenhajmit ishte një rezultat i rëndësishëm, dhe që e lejoi të vazhdonte duelin për titull me kryesuesen Dortmund.

Hofenhajmi lufton për kupat e Europës, ndaj ishte detyrë e vështirë për Bajernin, por kampionët e Gjermanisë duket se janë kthyer nga faza përgatitore me mendje të mbledhur.

Leon Gorecka shënoi dy gola në pjesën e parë, dhe Robert Levandovski vulosi gjithçka në minutat e fundit, ndërsa vendasit thjesht shkurtuan diferencën pas pushimit.

Gazeta “Bild” lavdëron trajnerin dhe titullon: Tre mesazhet e Kovaçit!

“Jemi gati për të sfiduar Dortmundin deri në fund, – ishin fjalët e kroatit pas ndeshjes, – ne jemi gjahtarët për titullin. Pjesa e parë ishte fenomenale. Kështu donim të luanim dhe kështu bëmë. Gjëja kryesore është të jesh në krye në fund të sezonit”.

Njeriu që shënoi më shumë ishte Gorecka, por ai që po shkon drejt rekodeve është Levandovski.

Ky ishte goli i 191-të i polakut në Bundesligë.

Sulmuesi 30-vjeçar është vetëm 3 gola larg Klaudio Pizarros, ndërsa pak më larg janë Manfred Burgsmyler (213) dhe ish-trajneri i tij, Jup Hajnkes (220).

Besohet se polaku mund t’i arrijë këta, për t’u ngjitur në podiumin e shënuesve më të mirë në historinë e Bundesligës.

Sidoqoftë, nuk dihet nëse do të ketë aq jetë sportive sa të pretendojë për të kaluar numrin 2 në histori, Klaus Fisherin me 268 rrjeta, dhe rekordmenin absolut, Gerd Mylerin që ka 365. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono