Tirana

tirana-partizani.jpg
Vladimir Prenga10:46 | 07/12/2019

Derbi Partizani-Tirana nuk ka një datë se kur do zhvillohet. FSHF po heziton të vendosë në lidhje me javën e ardhshme të Superiores dhe kështu ndeshja e shumëpritur në kryeqytet dhe më gjerë është ende në ajër. Gjithsesi do të duhen disa ditë para derbit.

Tirana dhe Partizani zbresin nesër në fushë, ndërkohë që do të jenë disa futbollistë që rrezikojnë prej kartonëve të humbasin sfidën e zjarrtë të kryeqytetit. Lista e “demave të kuq” ka emra si Jasir Asani dhe Rron Broja, të cilët duhet të bëjnë kujdes nesër në Ballsh.

Në kampin bardheblu janë më të shumtë ata që duhet t’i ruhen kartonit të verdhë. Michael Ngo, Jurgen Çelhaka dhe Grent Halili janë ata që rrezikojnë prej lojtarëve që priten titullarë nesër kundër Kukësit. Kujdes duhet të bëjnë edhe Elton Cale e Agustin Torassa, nëse trajneri Julian Ahmataj vendos t’i aktivizojë gjatë ndeshjes. /abcnews.al

partizani-kukesi.jpg
Vladimir Prenga08:28 | 07/12/2019

Superiorja rikthehet sot dhe zhvillohen tre përballje mjaft interesante. Prej orës 13:30 skuadrat zbresin në fushë, ndërkohë që sytë fillimisht do të jenë në Ballsh dhe Gjirokastër. Kryesuesit e Partizanit kanë një sfidë të vështirë me Bylisin surprizues, që në shtëpi do kërkojë kthesën pas dy humbjeve radhazi.

Në Gjirokastër luhet një ndeshje për “jetë a vdekje”. Luftëtarit i bën punë vetëm fitorja dhe trajneri Giorgos Marantas e shprehu diçka të tillë edhe në konferencën e djeshme për shtyp. Nga ana tjetër edhe Vllaznia shkon për të marrë maksimumin. Bluzinjtë janë një ekip i kalueshëm dhe pritet një ndeshje e hapur.

Dita mbyllet me ndeshjen kryesore të kësaj jave në Superiore. Tirana-Kukësi, në fushë për maksimumin. Presioni është më së shumti te bardheblutë, që në tre javët e fundit nuk fitojnë. Humbja në Korçë dy javë më parë e trazoi edhe më shumë situatën në skuadrën e Ahmatajt, që sot ka edhe disa mungesa të rëndësishme dhe stafi teknik ka bërë ndryshime të shumta në formacion.

/abcnews.al

lineup.png
Vladimir Prenga18:27 | 06/12/2019

Tirana kërkon maksimumin e pikëve, ndaj një ekipi si Kukësi. Skuadra e drejtuar nga Julian Ahmataj synon kthesën te rezultatet pozitive dhe trajneri i bardhebluve ka programuar ndryshime të shumta në formacion për sfidën e nesërme, që nis prej orës 16:30.

Lëvizjet nisin që në mbrojtje, teksa Osmani mungon për shkak dëmtimi. Korçari edhe sot u stërvit i veçuar, ndërkohë që në rreshtimin e skuadrës së Tiranës u pa që Muça dhe Hoxhallari do ta nisin nga fillimi në qendër të prapavijës. Risia është në linjën e majtë, ku është parë i pozicionuar Albi Doka.

Edhe në mesfushë ka lëvizje. Rikthehet Batha nga pezullimi dhe e nis titullar, ndërkohë që një vend në formacion e ka rifituar edhe Jurgen Çelhaka. Në stol përfundojnë Karabeci, Cale dhe Torassa.  Hasani do të jetë pak para qendrës së mesfushës, në mbështetje të Ngoo, ashtu si Halili dhe Cobbinah nga krahët.

Formacioni i mundshëm (4-2-3-1): Lika – Vangjeli, Muça, Hoxhallari, Doka – Batha, Çelhaka – Cobbinah, Hasani, Halili – Ngoo.

Ahmataj.png
Igli Nikolli14:55 | 06/12/2019

Kategoria Superiore rikthehet dhe Tirana pret Kukësin nesër në orën 16:30. Objektivi i vetëm është fitorja, edhe përballë bardheblutë kanë një rival shumë të fortë. Trajneri i Tiranës, Julian Ahmataj ka dalë në konferencën për shtyp, aty ku prek disa tema të ndryshme.

GJENDJA – “Gjendja  e skuadrës është e mirë. Problemet e tërmetit kanë kaluar. Kemi punuar shumë këto kohë, kemi vënë disa gjëra në rrugën e duhur, shpresoj të marrim benefitet e kësaj pune që kemi bërë”.

MUNGESA E FITORES – “Po t’i shikosh ndeshjet, jemi ndëshkuar nga kundërsulmet e skuadrave të tjera, gjëra që do një kohë të madhe për t’u riparuar. Për të qenë në ekuilibër dhe për të krijuar një lojë sulmuese, duhet më shumë ekuilibër taktik. Kjo mungon në momente të caktuara, rezultati shtyn lojtarët që të dalin nga detyrat. Kjo është e mirë që duhet rregulluar dhe përmirësuar që të kemi sa më shumë ekuilibër”.

NDESHJA – “Nuk mendoj se Tirana nuk ka qenë ndonjëherë favorite. Për ne është ndeshja e radhës, është një ndeshje që duhet fituar, si çdo ndeshje e kampionatit. Çdo ndeshje vlen tre pikë. Nuk kënaqem kurrë më barazim. Ne do hyjmë në fushën e lojës për të bërë maksimumin”.

QETËSIA – “Normalisht që po punohet shumë te Tirana. Duhet t’i përgatisim ndeshjet në mënyrën e duhur dhe me qetësinë e duhur. Në fund fare është një ndeshje që ka vetëm tre pikë”.

PRESION? – “Nuk ka presion fare, sepse çdo lloj presioni e kam marrë mbi shpinë. Të gjithë janë marrë me mua gjë që unë do ta bëj gjithmonë. E kam anashkaluar skuadrën nga kjo pjesë, kam hequr presionin e rezultateve dhe çdo gjë do ta marr përsipër unë”.

PËRGJEGJËSITË – “Për mua është e rëndësishme të marr përgjegjësi, sepse, për mua, funksionimi i një klubi ekziston në mënyrë të mirë kur të gjithë drejtuesit marrin përgjegjësitë. Përgjegjësia vjen nga lart, nuk vjen nga poshtë siç kërkohet shpeshherë”.

PËRMIRËSIMI – “Kam thënë që skuadra ka nevojë për përmirësim. Kemi momente në lojë, në ekuilibër, kur nuk sillemi siç duhet, reagojmë me vonesë, kemi disa pauza që duhen rikuperuar, sepse ato na sjellin deficite në fazën defensive, por edhe në fazën ofensive. Kjo nuk arrihet me fjalë, arrihet me orë pune. Duhen ditë dhe muaj stërvitje që kjo gjë të përmirësohet”.

NDRYSHIMET – “Momenti i ndryshimeve është në varësi edhe të mungesave, edhe asaj që japin lojtarët në fushë. Unë gjithmonë kam vendosur në bazë të asaj që lojtarët kanë dhënë në stërvitje. Ka momente që të gjithë nuk janë në një ditë të mirë, ka momente kur duhet të marrim vendime të tjera. Pauzat janë mendore, në kokat e futbollistit, nuk kanë lidhje me gjendjen fizike”.

TITULLI – “Besoj se do të shkojmë përpara që të shkojmë te titulli. Kemi detyre të japim maksimumin në fushë e lojës, si unë dhe lojtarët. Rezultatet nuk janë në dorën tonë, ne duhet të japim maksimumin”.

DY JAVËT E ARDHSHME – “Janë ndeshje që vlejnë 6 pikë. Mungesa e këtyre pikëve në shtëpinë tonë krijon diferencë me kundërshtarët. Nuk jemi në një moment jo të mirë, jemi në një moment problemesh në strukturën e lojës, por janë të rikuperueshme”.

MERKATO – “Është shumë herët. Kemi edhe 6 ndeshje për të luajtur. Nuk ka skuadër në botë që nuk do të përmirësohet dhe të ndërhyjë në merkato. Për momentin duhet të jemi të përqendruar te ndeshja e radhës”. /abcnews.al

Ngoo-Ahmataj.png
Veronik Istrefaj08:43 | 06/12/2019

Michael Ngoo është një ndër personazhet më të përfolur në Shqipëri, pasi sulmuesi i Tiranës ka karakter të paqëndrueshëm dhe shpeshherë është në qendër të vëmendjes për arsyet e gabuara. Edhe dje, shtatlarti i sulmit është tradhëtuar nga nervat dhe sicc raporton Panorama Sport, ka përplasur dy lojtarë të rinj në stërvitje.

Ngoo ka përplasur fillimisht Eldis Krajës, duke marrë dhe kritikat e para nga trajneri Julian Ahamtaj. Britaniku ka përplasur më pas në tokë edhe mesfushorin Alban Cejku. Në këtë moment, Ahmataj i ka dhënë këshillimin e fundit dhe Ngoo ndaloi me sjelljet e gabuara.

Sa i takon merkatos, Tirana mund të humbasë sulmuesin e talentuar, Ernes Mucci. 18 vjeccari është në fokusin e Skënderbeut, pasi trajneri Ilir Daja është një admirues i tij. Bregu, Krasniqi dhe Gripshi mund të jenë të përfshirë në merkato në dalje dhe Daja duket se e ka gjetur zëvendësuesin./abcnews.al

Michael-Ngo.png
Igli Nikolli19:52 | 05/12/2019

Michale Ngo’o s’e kishte provuar kurrë më parë një tërmet të tillë. Ngjarja e tmerrshme e mëngjesit të 26 nëntorit shkaktoi një tragjedi në Shqipëri dhe shumë persona humbën jetën. Sulmuesi i Tiranës rrëfen momentet e frikës së madhe në një prononcim për Supersport.

27-vjeçari anglez tregon gjithçka me detaje. Lutjet në Zot nuk munguan, teksa mendja i ka mbetur te personat që nuk janë më dhe ata që humbën gjithçka. Të shtunën është ndeshja me Kukësin dhe Ngo’o shpreson të shënojë e fitojë për të gjithë njerëzit që provuan nga dhimbje të madhe nga situata e krijuar.

FRIKA E MADHE – “Ditën e parë isha i trembur. Një tërmet aq i madh ishte diçka që ndodhte për herë të parë në jetën time. Jetoj në katin e 7-të të një pallati dhe e ndjeva që lëkundej i tëri. Më shkoi mendja që do ishte diçka natyrore ose një bombë. U çova menjëherë dhe thashë me vete: ‘Hej, çfarë po ndodh?’. Iu drejtova Zotit dhe i thashë: ‘Më fal mëkatet e mia’. Ose si i thoni ju në shqip: ‘Zot, kam bërë gabime’. Kur ndaloi e falënderova”.

TRAGJEDIA – “Kur mbaroi mora çelësat, pantallonat dhe zbrita poshtë. Pashë shumë njerëz dhe e kuptova që kishte qenë tërmet. Ishte një situatë serioze, pasi shumë njerëz humbën jetën. Ngushëllimet dhe mendimet e mia shkojnë për shpirtrat e atyre që u larguan nga kjo jetë. I telefonova Hasanit dhe e pyeta se çfarë ishte kjo. Më tha se e kishte ndjerë edhe ai. Qëndrova poshtë 2 orë, për t’u ngjitur sërish në shtëpi. Nuk ishte diçka normale. Është diçka që nuk e kam përjetuar më parë në jetë. Ishte një situatë shumë e trishtë dhe mendja të shkon tek personat që humbën jetën”.

STËRVITJA – “Kur erdha në stërvitje kishte më shumë qetësi në fushë, por mendja na shkonte te njerëzit që u larguan nga kjo jetë, apo tek ata që mbetën pa banesa. Toka vijonte të lëkundej. Nuk mund ta imagjinoj një situatë të tillë. Do të luaj për njerëzit që humbën jetën dhe familjet e tyre. Jam në formë dhe fatmirësisht gjallë. Mund të flas me familjen dhe të luaj çdo ndeshje”.

KUNDËRSHTARI – “Me Kukësin është një sfidë e rëndësishme për rrethanat ku ndodhemi. Trajneri e ka përgatitur mirë këtë përballje. Do të japim 120 % për Tiranën dhe njerëzit që humbën jetën. Jemi përgatitur mirë”. /abcnews.al

Dunga.png
Vladimir Prenga09:43 | 05/12/2019

Ismael Dunga është lojtari që shqetëson Tiranën. Sulmuesi i afruar në verë është dëmtuar dhe nga kontrollet mjekësore është vënë re që ka nevojë për një ndërhyrje kirurgjikale. Keniani nuk ka diçka serioze, por do të duhet të qëndrojë një muaj pushim pas operimit.

Sikurse kuptohet, sulmuesi shtatlartë do të duhet të presë pjesën e dytë të kampionatit për të dhënë kontributin e tij për Tiranën. Së bashku me Andi Lilën, ai do të jetë gati në janar për trajnerin Julian Ahmataj.

Te Tirana për momentin po mendojnë për ndeshjen e radhës me Kukësin, që zhvillohet të shtunën prej orës 16:30 në stadiumin “Selman Stërmasi”. Stafi teknik pritet të bëjë disa ndryshime në formacion, me synim marrjen e tre pikëve me verilindorët. /abcnews.al

kukesi-tirana-1.jpg
Vladimir Prenga08:06 | 03/12/2019

Tirana-Kukësi është një nga ndeshjet më të rëndësishme të javës së 14-të të Superiores. Bardheblutë kërkojnë fitoren e kthesës dhe me shumë mundësi do të luajnë në stadiumin “Selman Stërmasi”, pasi deri të shtunën parashikohet që gjendja e tapetit të jetë më e mira pas mbjelljes.

Postimi i Kukësit, bërë që në orën 05:49

Nga ana tjetër te Kukësi janë bërë nostalgjikë dhe që në orën 05:49 kanë postuar rastet e ndeshjes së luajtur në prill të këtij viti. Në atë përballje verilindorët triumfuan me dy gola të shënuar nga sulmuesi Vasil Shkurtaj.

Edhe këtë sezon Kukësi e ka mposhtur Tiranën në “Elbasan Arena” me rezultatin 2-1, ndërkohë që do tentojë të bëjë të njëjtën gjë edhe të shtunën në shtëpinë e bardhebluve. /abcbews.al

romero-1280x853.jpg
Vladimir Prenga08:11 | 01/12/2019

Aristoteles Romero është kthyer në çështje te Partizani. Mesfushori nga Venezuela është paditur në polici nga banorët e pallatit ku jeton, për shkak të festave që ai organizon në shtëpinë e tij. Sipas banorëve diçka e tillë ka qenë e përsëritur.

Nga ana tjetër, klubi i kuq ka nisur të marrë informacione në lidhje me atë që ka ndodhur. Pretendimet e Romero janë që ka ndodhur vetëm një herë, në ditëlindjen e tij. Klubi thuhet se e ka paralajmëruar atë dhe mesfushori rrezikon një gjobë për sjellje jo të hijshme.

TIRANA – Në kampin bardheblu ka shumë pikëpyetje për lojtarët që mund të largohen në janar. “Panorama Sport” liston disa emra, me sulmuesin Ismael Dunga të parin në listë. Sulmuesi kenian thuhet se nuk i ka kënaqur drejtuesit plotësisht dhe rrezikon të ndërpritet kontrata.

Sigurisht për këtë duhet gjetur gjuha e përbashkët. Dy emra të tjerë që mund të ndryshojnë ambient në janar janë edhe Ernest Muçi e Dorian Kërçiku. E paqartë edhe situatë e mbrojtësit Albi Doka.

Tirana, siç edhe është raportuar në emisionin “Pressing” në ABC News, i ka dhënë afat dy javë për të rinovuar kontratën, ose ndryshe do të kalojë tek ekipi B. Në fund të sezonit i përfundon kontrata, por në kampin bardheblu mund të detyrohen ta mbyllin bashkëpunimin më parë. /abcnews.al

a712e751-72df-473d-b90e-f06cad9e2a08-1280x720.jpg
in a12:11 | 30/11/2019

Kur sot filmon një ndërtesë me çarje, nuk bën ndonjë zbulim të madh. Të tilla ka me qindra, për fat të keq, në rrethet e Durrësit, Lezhës, Krujës, Kurbinit apo Tiranës, veçse një pallat me dy kate të nëndheshme në dritë të diellit, kjo është vërtet diçka tronditëse.

I tillë ky tek lagjja më lindore e kryeqytetit, e quajtur “Tek Fresku”, pranë zonës së Thesarit të Shtetit. I ndërtuar në shtratin e një përroi të devijuar, që sillte ujërat e Dajtit, e përjetoi kështu tërmetin e 26 nëntorit.

Kur mbërritëm aty, banorët po debatonin me vëllanë e ndërtuesit. Ky i fundit thoshte se kolonat e struktura ishte shumë në rregull, por njëri nga qytetarët, i quajtur Fatbardh Haka, i quan parregullsi të mëdha.

Debati ishte i ashpër, por për fat të keq, nga vetëm pak prej qindra banorëve, të cilët ose janë larguar, ose kanë frikë të flasin. Dëmtimet në ndërtesë janë të mëdha, dhe me Bardhin nisemi për t’i parë nga afër. Bardhi thotë se pallati është ndërtuar aty ku ka qenë kolektori.

Më pas tregon dëmtime në katin e parë nëntokë, një pjesë e pallatit që nuk mbështetet mbi kolona, por që vetë bizneset aty kanë vendosur kolona hekuri.

Banore e pallatit, pronare e tokës, është një qytetare e quajtur Hanza Deliu.  Ajo tregon se pallati është i papërfunduar, sipas saj pronari i pallatit nuk ka marrë asnjë masë për përfundimin e ndërtimeve. “Pronari, Rrok Gjoka ka lënë pallatin të papërfunduar, kolonat e pallatit janë të pambuluara, gati të shemben të gjitha, brezi përfundimtar i pallatit është në ajër, nuk është si gjithë të tjerët”, shprehet Deliu.

A ka pasur interesim nga pushteti, dhe çfarë do të bëjnë banorët? “Të gjithë si banorë i jemi drejtuar Bashkisë me shkresë me dokumente, por deri tani asnjë përgjigje. Do e çojmë në Prokuroi sepse nuk po marrim asnjë përgjigje”, tha ajo. Fatbardhi sqaron sesa kohë kanë këto probleme.

“Pa përfunduar mirë punimet i kemi marrë hipotekat, shumë qartë mund të shohim se dy katet e nëndheshme nuk janë mbuluar siç i kemi parë në projekt”, tregon Fatbardhi. Aty ndodhet edhe një grua që nuk është banore, por që ka aty njerëzit e saj.

Nuk banoj në atë pallat, por jetonin të afërmit që tashmë kanë frikë të futen në shtëpi. E kanë blerë 44 milionë dhe tashmë janë strehuar në shtëpinë time. Duan siguri, të jetojmë aty apo jo”, tha ajo.

Futemi në pallat me Bardhin. Hyjmë në një apartament, ku dëmtimet duken qartë.

Banori largon suvanë me dorë, punime shumë të dobëta. “Kemi shpenzuar paratë e jetës në emigrim, ku do të shkojmë tani, jemi rrugëve”. tha ai.

Në ndërtesë vijnë dy punonjës policie, që fotografojnë dëmet, dhe foto do t’i jepen autoriteteve kompetente. Është dita e katërt pas tërmetit.

Pak më poshtë Freskut, tek Rruga Myslym Keta, është një kompleks pallatesh të nxjerrë të pabanueshëm. Janë ndërtuar në 1989, në periudhën më të keqe të sistemit të kaluar, kur vjedhjet e materialit të ndërtimit ishin sheshit.

Vendimi i bashkisë dhe i Institutit të Ndërtimit është kategorik.

Një nga banoret e pallatit, nuk dëshiron të dalë nga shtëpia. Çfarë ka ndodhur në këtë pallat?

“Ku do ti çoj materialet me vlerë, të më garantojnë që më mbron shtëpinë 30 vjeçare, por jo të më nxirren jashtë, shtëpi tjetër dua nëse kjo është e pabanueshme”, thotë ajo.

Dëmtime jashtë. Edhe këtu hyjmë në një shtëpi.

Banori i saj na tregon dëmet, ndërsa e pyesim se ku do të shkojnë. “Ku të na çojnë ato, ne nuk kemi dalë, do rrimë të vdesim këtu, deri tani asnjë nuk ka ardhur të analizojë situatën”, tha ai.

Dëmtimet nuk duken tepër të mëdha, të paktën me sy të lirë, por specialistët thonë ndryshe. Halli është i mprehtë pasi flitet për qindra familje që mbeten pa strehë, që duhet të lenë shtëpitë pas 30 vjetësh. Nga kthesa e Tufinës, ja ku jemi tek ish-konviktet e shkollës së Komunales në Allias.

Këtu gjendja duket që është katastrofike. Ndërtesa të vjetra, pa breza betoni antisizmikë, dëmtime të mëdha. Hyjmë në ndërtesë nën shoqërinë e një banori, të quajtur Renato. Është vështirë të mendosh se këto mund të quhen ambiente banimi.

“Shyqyr zotit nuk ka pasur njëri në banjo në momentin e tërmetit, gjithë këto betone do të shkaktonin pasoja të rënda”, shprehet ai.

Renato ka 30 vjet këtu, dhe pavarësisht gjithçkaje është i detyruar të mbajë fort këtë të ashtuquajtur apartament, pa dyer e dritare.

Ai thotë se nuk mund të largohet nga banesa. “Nuk dimë ku të shkojmë, na presim vetëm rruga, çadrat, nuk kam asnjë garanci rikthimi. Nuk largohem nga këtu, kam punën këtu, shkollën e fëmijëve, nuk mund të zhvendosem në vendet ku na thonë”, tha ai.

Ka edhe më shumë se kaq. Duhet të kalojmë nga dritarja për në në tarracën e jashtme.

Pamje të frikshme, ndërsa autoritetet nuk duket se u ka rënë ndonjëherë rruga këtej. Një dru fiku ka mbirë dhe është rritur aty, padyshim rrënjët e tij kanë dëmtuar muret. Banorët e mbetur aty, hyjnë e dalin nëpër godina, ndërsa qendrojnë të mbledhur në sheshin para tyre.

Hyjmë brenda sërish, dhe takojmë babain e Renatos, Bertin i cili thotë se ka qënë i internuar. “Kam qënë i internuar, babai më ka vdekur në internim dhe sërish këtu na sollën, në internim”, tregon ai i revoltuar.

Bertit i ka ardhur deri në fyt me partitë që duken veç për zgjedhje, teksa thotë se kujtohen vetëm për zgjedhje. “Na dërgojnë disa ushqime, 1 kg oriz, sheqer, makarona dhe rroftë Partia e Punës, rroftë Xhaxhi Enver thonë këto, jemi në internim, këta janë zero”, thotë ai. Nëse këtu nuk bëhet diçka, tragjedia e Durrësit apo Thumanës mund të jetë në kryeqytet.

Në skajin tjetër të Tiranës, në Rrugën e Elbasanit, ndodhet Fakulteti Ekonomik. Këtu nuk mund të takoje studentë apo pedagogë, pasi është ditë pushimi, plus që shkollat janë mbyllur. Ekonomiku është kthyer në kantier ndërtimi, për rregullimin e dëmeve të tërmetit të shtatorit, ndërsa ky i nëntorit krijoi të tjera.

Ndërsa udhëtojmë nëpër Unazën e Madhe, drejtohemi për në Kombinat.

Ndërtimet vazhdojnë dhe për fat aty nuk është krijuar rrezik. Ja edhe zona më e rrezikuar e këtyre ditëve në qytetin tonë më të madh.

Pallati 160 në Kombinat, por edhe të tjerë. Disa banorë janë në çadrën e vetme përpara tij.

Të tjerë, të ulur aty rrotull, të dëshpëruar. Dëmtimet janë të shumta në tarraca, që rrezikojnë jetë njerëzish, ndërsa shiritat kërkojnë që njerëzit të mos afrohen.

Ja një banor i moshuar, i quajtur Halit Haznedari. “Asnjë gjë, asnjë ekip specialistësh, 4 ditë jemi në pritje dhe sipas fjalës së kryeministrit do të vinin specialistët, por asgjë deri tani thotë” ai.

Ndjenja e braktisjes dhe e pasigurisë është kudo, dhe shtohet nga pamjet e shkatërrimeve e apartamentet e braktisura. Ngjitemi në pallatin e dëmtuar, bashkë me një banor, me Florin. Rreziku është i madh sepse një tërmet tjetër mund ta rrënojë ndërtesën.

Hyjmë në një apartament. Bilanci duket si prej lufte, sidomos në njërën nga dhomat.

Flori tregon gjendjen e rëndë. “Ka dëmtime muri, pllakat janë dëmtuara, shihet qartë”, tregon ai.

Ndërsa ngjitemi në katet e sipërme, dallojmë më mirë gjendjen rreth e rrotull. Në pallatin përballë, punonjësit zjarrfikës po largojnë copa tullash nga tarraca që të mos rrezikojnë jetë njerëzish poshtë.

Vështirë të parashikosh sesa gjatë do të mbeten jashtë këta banorë. Ajo që dihet është vetëm se ka rrezik shembjeje, pra edhe jete.

Jemi në Festat e Nëntorit, por qytetarëve sot as nuk u shkon ndër mende për të kremtuar. Na thonë se ka shumë më tepër ndërtesa të rrezikuar por banorët e tyre nuk u bënë bashkë si ata të pallatit numër 160. Gjithsesi, autoritetet e kanë kuptuar.

Ndërsa largohemi shohim punonjësit zjarrfikës që rrethojnë me shirita objekte të tjerë banimi në Kombinat. Etapa jonë e fundit për të parë dëmet e tërmetit në Tiranë, ishte në lagjen e re në zonën e ish-komunës së Kasharit.

Një pallat i ri, me dëmtime të mëdha. Edhe këtu gjithçka duket qartë, qoftë në fasadë, qoftë edhe në ambientet e brendshme të përbashkëta.

Cilësia e punimeve kuptohet menjëherë që ka qenë e dobët. Kolonat ndoshta mbajnë mirë, por jeta apo shëndeti rrezikohen edhe kështu.

Hyjmë në një apartament, ku banorët janë të shqetësuar, por edhe të lumtur për një fakt, siç e sqaron i zoti i shtëpisë, Mahmut Çera.

“Fati më i madh për mua ishte se më shpëtoi djali i cili në momentin e parë u zgjua dhe erdhi pranë nesh”, tregon ai.

Dalim nga shtëpia, na përcjell e zonja e shtëpisë. Aty shihet një lokal me mure të shkatërruar që nga tërmeti i shtatorit.

Po ashtu, muri në pallatin përballë, i çarë lart dhe poshtë. Sokoli, një banor tjetër, shpjegon se dy pallatet nuk janë ndarë nga njëri-tjetri sipas rregullave.

Banorët përpiqen të qendrojnë sa më pak aty, për të ruajtur veten dhe fëmijët. Shkatërrim edhe në krahun tjetër. Mur i rrëzuar në këtë dyqan, por edhe në ndarësen për transformatorin e energjisë elektrike.

“ Ky mur e ka pasur ndërtimin siç e ka niveli i ndërtimin te pallati lart, në shtator ky është dëmtuar, pra një luhatje tjetër do sjellë dëmtime më të mëdha. Kanë ardhur e kanë parë murin, por nuk kanë bërë asnjë lloj reagimi” thotë ai.

Fusha me bar pranë pallatit, natën ishte plot me makina me njerëz, por që u larguan prej aty për shkak të reshjeve të shiut.

Ata janë të pakënaqur me autoritetet. “Vetëm pas dy ditësh erdhi policia për të parë, bënë vëtëm dy tre foto anjë fo  rmular i plotësuar asnjë dokument, me duar në xhepa më këkruan numrin pa një mjet dëshmie”, tregon Çera.

Largohemi edhe nga kjo godinë e ndërtuar së fundmi, e re, por thuajse e pabanueshme. Hulumtimi ynë përfundon këtu, ndërsa trishtimi është I madh kur sheh kryeqytetin e Shqipërisë, ndërsa bie nata. Ndërtesat janë thuajse të zbrazura, dhe rrugët janë bosh, në një orar zakonisht me trafik të rënduar.

Tirana ngjan me një qytet fantazëm. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono