Tirana

Luftetari-Tirana-Superiore.jpg
Vladimir Prenga08:21 | 26/01/2020

Superiorja dhe e Para vijojnë marshimin. Futbolli në vendin tonë e merr skenën që në orën 13:00, kur Dinamo 15 herë kampione e Shqipërisë do të përballet me Egnatian në Pezë-Helmës. Blutë e kryeqytetit po kalojnë një nga momentet më të vështira dhe rrezikojnë të bien në Kategorinë e Dytë.

Ndryshe nga se ndodh me ta, dy skuadrat e tjera të kryeqytetit duan titullin kampion. Tirana ka mundësinë të marrë fitoren e pestë radhazi dhe i ka të gjitha shanset, duke pasur parasysh se në orën 16:00 përballet me Luftëtarin dhe mund të marrë kreun të paktën deri në përfundim të Kukësi-Partizani.

Në të njëjtën orë me bardheblutë luhet edhe në Durrës, aty ku Teuta kërkon të bëjë autokritikë pas humbjes me Laccit. “Djemtë e Detit” do të duhet të përballen me një kundërshtar të fortë si Bylisi, që mban vendin e tretë në klasifikim.

Kjo javë mbyllet në “Air Albania Stadium”, që ndez prozhektorët prej orës 19:00. Kukësi kryesues i kampionatit përballet me Partizanin kampion në fuqi, në një ndeshje që tërheq vëmendjen e sportdashësve të këtyre dy klubeve dhe jo vetëm. /abcnews.al

Takimet e ditës së sotme
Egbo-Tirana-2.jpg
Veronik Istrefaj22:10 | 25/01/2020

Tirana nuk mendon aspak fitimin e titullit, por ndeshjen e radhës. Trajneri Emanuel Egbo vlerëson Luftëtarin, në prag të duelit të javës së 19-të të Superligës në “Selman Stërmasi”.

Thjeshtësia është virtyt i madh, dhe për fat ai e ka. Emanuel Egbo është po aq i urtë sot pas katër fitoreve radhazi me Tiranën në Superiore, sa edhe para ndeshjes së tij të parë, derbit.

Në radhë është Luftëtari, një ekip teorikisht i lehtë, pasi ndodhet i parafundit.

“Ne e dimë pak a shumë çfarë ekipi ka Luftëtari, siç e kam thënë gjithmonë, nuk ka ekip të vogël në Kategorinë Superiore. Të gjitha ekipet për mua janë njësoj, ka 11 lojtarë brenda fushës. Ai ekip që vrapon më shumë, del triumfues”.

Mos ka eufori tek lojtarët pas 4 fitoreve radhazi?

“Ka filluar faza e tretë, ka dhe një fazë të katër, pra ka dhe shumë ndeshje. Unë e kam thënë gjithmonë, Tirana duhet të mendojë vetëm ndeshje pas ndeshje. Nuk po mendoj për titullin kampion. Pastaj në fund, do të bëjmë llogaritë”.

Si ndikojnë fitoret radhazi në ecurinë e skuadrës?

“Rruga është akoma shumë e gjatë, ne gjithmonë do të vazhdojmë. Sa më shumë ndeshje do të fitojmë, aq më shumë do të rritet vetëbesimi dhe vazhdimësia do të jetë e mirë. Sa më mirë do të luajmë, aq më shumë pikë do të marrim dhe aq më mirë do të jetë ekipi”.

Tirana është vetëm një pikë larg kreut, ndërsa Egbo nuk e mohoi mundësinë që mund të bëjë edhe ndonjë përforcim tjetër në janar./abcnews.al

Bruno-Dita.png
Vladimir Prenga08:23 | 25/01/2020

Bruno Dita në modë. Mesfushori i përshtatur si qendërmbrojtës është pjesë e Skënderbeut, por prej ditësh është raportuar se ka nisur një proces gjyqësor në Dhomën Kombëtare të Zgjidhjes së Konflikteve. Kjo prej problemeve me pagesat që Dita ka pasur në Korçë.

Deri më tani raportohej se atë e priste Teuta, që së fundmi afroi një boshnjak për mbrojtjen. Tani në skenë për Ditën ka dalë një klub tjetër, i lakuar edhe në të shkuarën.

“Panorama Sport” raporton se për të e ka gati një ofertë Tirana dhe në gazetë ky është një nga artikujt kryesorë. Bardheblutë kanë një mbipopullim në mesfushë, por Dita mund të projektohet për në mbrojtje.

Duket e çuditshme kjo lëvizje për Ditën, pasi një ditë më parë u arrit marrëveshja për transferimin e Lancinet Sidibe nga Besëlidhja. Edhe lojtari nga Guinea luan në mesfushë dhe në qendër të mbrojtjes. /abcnews.al

IMG-20200124-WA0048.jpg
Vladimir Prenga23:10 | 24/01/2020

Partizani vijon të afrojë të rinj. Tedi Cara pritet të nënshkruajë së shpejti, teksa “demat e kuq” kanë arritur marrëveshjen me klubin e Besës. Formula është huazim me të drejtë blerje, ndërkohë që nuk dihet shifra për të cilën klubet kanë rënë dakord mes tyre.

Të kuqtë kanë menduar nga ana tjetër ta ndihmojnë klubin verdhezi, duke i çuar një sulmues tjetër anësor. Dionis Çikani, i cili është produkt i Tiranës, do të veshë fanellën e Besës deri në fund të sezonit. Në verë ai do të kalojë te Partizani.

Çikani në verë u kthye në Shqipëri, pasi ishte pjesë e Torre Levante në Spanjë. Te Tirana nuk u aktivizua, pasi klubi bardheblu nuk u bind të paguante taksën e formimit për dy vite që sulmuesi ishte pjesë e spanjollëve. /abcnews.al

tirana-2.jpg
Vladimir Prenga20:47 | 24/01/2020

Tirana i ka shpëtuar dënimit nga Komisioni i Disiplinës, ndërkohë që klubi u bën sërish apel tifozëve që të ketë një sjellje korrekte në stadium. Shpesh herë ka pasur gjoba për klubin bardheblu, ndërkohë që pas derbit edhe është mbyllur stadiumi.

Në kushtet që Tirana po tenton të marrë kreun e klasifikimit, mbështetja e tifozëve është shumë e rëndësishme. “Komisioni i Disiplinës ka dhënë dje një paralajmërim për sjelljen jo korrekte të tifozëve bardheblu në ndeshjen Tirana – Bylis.

Në mënyrë të përsëritur kërkojmë nga tifozët të mos dëmtojnë skuadrën klubin dhe veten me hedhje shishesh plastike apo dhe sjellje antisportive. Te dielën të gjithë bashkë për një tjetër fitore”, shkruhet në thirrjen që klubi i Tiranës ka bërë përmes rrjeteve sociale. /abcnews.al

Cale-Tirana-Goli.jpg
Vladimir Prenga14:20 | 24/01/2020

Tirana ka punuar e qetë këtë janar dhe synimi ka qenë vetëm afrimi i një mbrojtësi qendre. Drejtuesit bardheblu, por edhe stafi teknik, janë të mendimit se grupi i lojtarëve është i plotë dhe është e kotë të fryhet edhe më tepër organika.

Çdo rol është i dubluar, ndërkohë që tanimë është gjetur marrëveshja edhe me mesfushorin nga Guinea, Lancinet Sidibe. Ai mund të luajë edhe si qendërmbrojtës dhe klubi i Tiranës, pas bisedimeve me Besëlidhjen, ka arritur ta bëjë tijin futbollistin.

Sidibe më parë është aktivizuar në Superiore me Flamurtarin dhe Teutën, kurse gjatë këtij muaji u stërvit me Skënderbeun. Korçarët, në pamundësi për të bindur lezhjanët, janë detyruar të heqin dorën dhe është Tirana që do i ketë shërbimet e mesfushorit në vazhdim. /abcnews.al

 

Sidibe kur prezantohej te Flamurtari
presing-2.jpg
Veronik Istrefaj23:37 | 23/01/2020

Albano Janku, specialist gjykimi, është i ftuar në emisionin Pressing, në ABC News. Java e 18-të e Superiore pati shumë raste të kontestuara dhe Janku foli për të gjitha rastet e dyshimta, duke dhënë mendimet e tij.

GOLI I CALE – “Nuk po them që nuk kemi prekje me dorë. Por që është e vështirë, është e vështirë për arbitrin kryesor. Sot jemi të qetë pasi i kemi parë rastet dhe në këtë moment, pavarësisht se është dorë e pavullnetshme, që nga 1 Qershori i vitit të kaluar, çdo sulmues që e prek topin me dorë, kemi të bëjmë me faull. Në këtë moment, duhet të ishte faull i Cale.

PENALLTIA E BYLISIT – “Shikojmë dorën e majtë të Dokës, të hapur, pozicion jo natyral, me të drejtë Jorgji ka vërshëllyer për penallti”.

GOLI I NGOO – “Është një moment që duhet diskutuar, sepse nuk mund të jap opinionin tim me pamjet vizive që kemi. Nuk mund të themi nëse Ngoo është pozicion jashtë loje. Topi kthehet nga shtylla dhe prapë nuk mund të themi nëse Ngoo ka shënuar me dorë apo jo. Shikojmë këtë pamje që Gentian Muça është larg Hidit dhe absolutisht nuk e pengon Hidin”./abcnews.al

egbo-2.jpg
Vladimir Prenga10:19 | 23/01/2020

Protesta të ashpra të Bylisit pas humbjes me Tiranën në Superligë, por për vendasit fitorja ishte e merituar. Trajneri Emanuel Egbo vlerësoi se golat e skuadrës së tij ishin të rregullt

Zemërimi ishte i dukshëm pas ndeshjes. Bylisi akuzoi arbitrin pas humbjes 1-2 me Tiranën në Superligë në “Selman Stërmasi”dhe ndonëse trajneri Dovedan e presidenti Kapllanaj nuk folën, gjithçka ishte e qartë.

Skuadra nga Ballshi protestoi sidomos për golin e dytë, atë të fitores në minutën e 6-të shtesë, shënuar nga Ngoo. Jo vetëm kaq, por nga acarimi, gjyqtarët u detyruan të dilnin nga stadiumi në fshehtësi dhe nën mbrojtje të fortë.

Për golat e kundërshtuar u pyet edhe trajneri tiranas, Emanuel Egbo. “Nuk e di, edhe unë mund të kem dyshime për penalltinë e dhënë kundër nesh. Pamja nuk ka qenë e qartë, pasi duhet kamera nga krahu tjetër për ta parë është apo nuk është penallti. Të tre golat e shënuar mendoj se janë të saktë. Nuk kam çfarë them për arbitrimin, gjithmonë merrem me ekipin tim”.

Gjithsesi, a e cilëson Egbo fitoren si të merituar? Mendoj se ne e merituam fitoren, pavarësisht se si shkoi ndeshja. E dinim që në fillim se do të ishte një përballje e vështirë. Vazhduam me këmbëngulje dhe në fund Zoti ka vendosur. Meritat i shkojnë atij”.

Tirana e Egbo ka 4 fitore radhazi, por sikur nuk bindi shumë. “Nuk jemi 100 për qind siç kemi qenë në ndeshjen e fundit në dhjetor. Është sikur të ketë nisur sërish kampionati dhe ekipi do kohë të marrë veten dhe për të qenë në maksimum”.

Trajneri nga Nigeria vazhdon me rekordin e 100 për qind të fitoreve, që kur mori në dorë skuadrën që më parë e drejtuan Ardian Mema dhe Julian Ahmataj. Vetë Mema, si një legjendë bardheblu, nuk ngurron ta ndjerë Tiranën në çdo ndeshje, të paktën në kryeqytet. /abcnews.al

ngo-1280x853.jpg
Veronik Istrefaj19:43 | 22/01/2020

Sulmuesi i Tiranës, Michael Ngoo, shënoi golin e fitores për bardheblutë kryeqytetas në sekondat e fundit të sfidës kundër Bylisit. Pas ndeshjes, gjiganti anglez foli për Supersport, aty ku u shpreh:

GOLI – “Jo, unë thjesht e pashë topin, pashë 10 futbollistë afër meje dhe mendova: Këtë top e kap unë. Për fat të mirë, ia dola të shkoj i pari tek ai top dhe vendosa ta shtyj në rrjetë së bashku me çdo futbollist që më doli para”.

PARAQITJET – “Kam shumë më tepër për të dhënë. Kam pasur një problem me tranzicionin nga Turqia në Shqipëri, orari, klima, ndryshimi i orës e disa faktorë të tjerë. Isha më i shpejtë, më i mprehtë në Turqi. Ardhja këtu kërkon pak ambientim, por sigurisht që Tirana e dominoi lojën sot dhe kështu duhet të vazhdojmë. Në aspektin personal, synoj të jem akoma dhe më lart”.

GOLAT – “Thjesht ndjej se në 30 metrat e fundit, si numër 9 me duhet të pres, të pres. Mendoj se duhet të jemi më shumë kreativë me lojtarët që kemi dhe unë të qëndroj si numër 9. Nëse do të jem aty në qendër, do të shënoj më shumë. Nuk do të më duhej të vrapoja aq shumë dhe të kthehesha aq shumë mbrapa. Kështu që mendoj se duhet të jemi më kreativë në 30 metrat e fundit./abcnews.al

Egbo-Tirana-1.jpg
Veronik Istrefaj19:13 | 22/01/2020

Katër fitore radhazi, Emanuel Egbo vazhdon të jetë i suksesshëm me Tiranën. Sot, bardheblutë fituan në sekondat e fundit 2-1 kundër Bylisit dhe pas ndeshjes, Egbo foli për Supersport, ku u shpreh:

REZULTATI – “Tirana fitoi sot, sepse ka besuar deri në momentet e fundit, duke vazhduar me presing lart, sidomos kur Bylisi u ndëshkua me karton të kuq”.

GOLI I NGOO – “Nuk e shoh qartë, ka qenë rrëmujë aty në zonë. Nuk e di nëse e ka prekur me dorë lojtari i Tiranës apo i Bylisit, por më shumë e ka prekur me dorë lojtari i Ballshit. Për mua, është gol i rregullt”.

PENALLTIA – “Kur mbaroi pjesa e parë, iu kërkova djemve të mos e lëshojnë lojën dhe të luajnë si në pjesën e parë, me intensitet të lartë. Njëherë që zbritëm poshtë, pësuam penallti. Një lojtar i Bylisit kundër katër lojtarëve tanë arriti të krosojë. Nuk e di nëse është prekje me dorë apo jo, nuk janë pamjet e qarta”.

KROSIMET – “Ndoshta ke qenë në studio, por ne në fushë e kemi kërkuar që të luajmë në krahët e sulmit, të krosojmë dhe të shfrytëzojmë shtatlartësinë e Ngoo. E kemi kërkuar nga lojtarët që të luajnë në sulm, por ata preferuan të qarkullonin topin në qendër”.

VANGJELI – “Vangjeli e kemi menduar si qendërmbrojtës, mendoj se nuk është mirë të ndryshoj ekipin fitues”.

OSMANI – “Osmani nuk është akoma në 100%, ai e di dhe vetë që ka pasur dhimbje në shpinë. Do të futet në kohën e duhur”.

MUÇI – “Muçi bëri ndeshje të mirë me Laçin, nuk dua të bëj polemika, por ai do të futet në kohën e duhur. Ai është pjesë e ekipit dhe ne kemi shumë besim në aftësitë e tij dhe do ta përdorim në kohën e duhur”.

ZËVENDËSIMET – “Nuk duhet të bëjmë zëvendësime thjesht për të thënë që bëjmë zëvendësime. Një lojtar që futet, do minimumi 5 minuta të futet në lojë. Të gjithë lojtarët që kishim në lojë, ishin të freskët deri në sekondat e fundit, prandaj bëmë vetëm një zëvendësim”.

FITORJA – “Zoti na ka ndihmuar të marrim këtë fitore, pa dashur të heq meritat e asnjë prej çunave”, përfundoi Egbo./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono