TIFOZE

tifozet.jpg
Vladimir Prenga11:43 | 24/10/2019

Anglezët janë të veçantë dhe gabime të tilla i kanë bërë edhe në të shkuarën. Këtë herë janë dy tifozë të Liverpool që kanë humbur mundësinë të ndjekin skuadrën e tyre të zemrës në stadium, pasi kanë ngatërruar qytet.

“The Reds” luajtën me Genk mbrëmë dhe për të shkuar aty, dy tifozëve u duheshin dy orë. Kur e mësuan se ishin në qytetin e gabuar, në Gent, kishte edhe gjysmë ore për të nisur ndeshja. 150 kilometra në aq kohë ishte e pamundur të përshkoheshin.

Sporz shkruan se të dy tifozët kishin shkuar në qendër të Gent dhe po silleshin vërdallë për të gjetur stadiumin. Në fund e kanë kuptuar gabimin dhe kanë pozuar së bashku me biletat e stadiumit. Më t’u bërë publike kjo histori, KAA Gent u ka bërë tifozëve të Liverpool një ftesë.

” Nëse ndokush i njeh këtë të dy, ose ka kontaktet e tyre, t’u thonë që janë të ftuar për ndeshjen tonë kundër Wolfsburg sontw. Do t’u japim edhe disa leksione me gjeografinë e Belgjikës më pas”, shkruan klubi belg në faqen zyrtare në Twitter. /abcnews.al

arrestime.jpg
Vladimir Prenga10:31 | 12/10/2019

Anglezët janë të pandreqshëm kur vjen puna për sherret në ndeshje futbolli. Kohët e trazirave në stadiume kanë ikur, por në rrugë u pëlqen akoma të kenë përplasje. Të fundit sherr e kanë regjistruar në Çeki, aty ku kombëtaraja e tyre është mundur me rezultatin 2-1 një ditë më parë.

Sky Sports ka publikuar video nga trazirat që kanë shkaktuar tifozët anglezë, të cilët janë konfrontuar me policinë çeke dhe tifozë vendas. Sende të forta të hedhura dhe kapsolla, kjo është ajo çka shihet në videon, ku forcat e rendit vërshojnë për të shpërndarë turmën e tifozëve. Disa përfundojnë të shtrirë, pasi u përdor edhe gaz lotësjellës.

Policia çeke ka bërë me dije se janë bërë 31 arrestime, 14 prej tyre të anglezë. Incidentet ndodhen në dy bare. Tifozët anglezë kishin konsumuar sasi të mëdha alkooli dhe i janë përgjigjur negativisht kërkesës së policisë për të larguar flamujt e mëdhenj nga ndërtesat, si dhe të hiqnin maskat dhe materialet piroteknike. /abcnews.al

ultras-dinamo.jpg
Vladimir Prenga11:51 | 25/09/2019

Plas në Rumani mes tifozëve. Tifozët e Poli Timisoara dhe ata të Dinamo Bucuresti janë përplasur mes tyre një ditë më parë. Gjithçka ndodhi para ndeshjes së Kupës së Rumanisë, mes UTA Arad-Dinamo Bucurest (përfundoi 1-3).

Timisoara është rreth 60 kilometra larg Arad dhe tifozët e Dinamos menduan të ndalojnë aty në një lokal, ku më pas u sulmuan dhe pati një sherr ku u përdorën sende të forta nga më të ndryshmet. Më pas mjaftuan dy policë për të shpërndarë turmën. /abcnews.al

tifozet-e-brages.png
Vladimir Prenga09:12 | 21/09/2019

Futbolli i bashkon njerëzit, por me raste edhe i bën armiq. Rasti për të cilin po shkruajmë fakton të parën. Të enjten, para ndeshjes Wolves-Sporting Braga, disa tifozë portugezë dhuruan një shfaqje jashtë hotelit ku qëndronin.

Pasi kanë parë një fans të klubit anglez, ata e kanë marrë atë dhe kanë kënduar së bashku. Fillimisht e mbajnë në duar dhe më pas e fusin në mes. Djaloshi duket i emocionuar, kurse e ëma zhvendoset pak më tej dhe filmon gjithçka.

/abcnews.al

conte.jpg
ad min22:06 | 18/09/2019

Trajneri i Interit Antonio Conte merr përgjegjësitë për barazimin me Slavia Pragë. Italiani kërkon reagim nga skuadra për derbin me Milanin në fundjavë.

Interi barazoi në minutat e fundit të ndeshjes ndaj Slavia Pragë. Goli i Barelas i mban në lojë zikaltërit për kualifikim ndërkohë që trajneri i Interit Antonio Conte merr përsipër përgjegjësitë e tij dhe thekson se kundërshtari ishte shumë më lartë se skuadra e tij.

“Lojtarët ishin shumë fizikisht, por kundërshtari luajti më mirë gjatë gjithë lojës. Paraqitja ndaj Slavias la shumë për të dëshiruar. Nuk duhet kurrsesi të kritikojmë lojtarët. Duhet të rritemi nga ndeshja në ndeshje. Kemi një rrugëtim të gjatë së bashku. E di se në çfarë situate ndodhet klubi. Duhet të vraponim me shumë se ata. Ka shumë vend për përmirësime. Nuk mund të luanim me krosime të gjata pasi stërvitemi për një tjetër strategji loje. Lojtarët nuk ishin në ditët e tyre më të mirë. Unë marr përsipër përgjegjësinë si trajner. Kjo ndeshje nuk do të ndikojë për duelin ndaj Milanit në fundjavë. Candreva ka pësuar një goditje dhe duhet parë gjendja e tij. Nuk mund të bëjmë çcdo gjë shpejt pasi rezultatet kërkojnë kohën e tyre. Nuk bën diferencë ajo pikë që fituam pasi për mua është si një humbje. Kemi treguar shumë pak nga ideja që ne kemi për futbollin. Tifozëve i kërkoj të jenë të qetë pasi djemtë japin maksimumin”.

Objektivi primar i Interit në Ligën e Kampionëve është kalimi i grupit./ABC News Albania 24/7

shqiperia-1.jpg
ad min09:43 | 10/09/2019

Ndeshjen Shqipëri-Islandë do ta shikojë edhe Presidenti i Republikës, Ilir Meta. Në një postim në rrjetet sociale, kreu i shtetit thotë që nuk e kishte në plan të shkonte sot në “Elbasan Arena”, por e sheh si detyrim ndaj kombëtares pas shkëlqimit në Europianin e Francës. Ai u bën thirrje tifozëve që të bashkohen në këtë moment të vështirë të skuadrës.

“Shpesh tifozët kërkojnë vetëm fitore, por topi është i rrumbullakët. E di që shumë tifozë janë mërzitur nga humbja me Francën, kampionen e botës, por mos harroni si humbi Brazili me Gjermaninë 1-7. Le të mësojmë dhe nga tifozët e Kosovës, që pikërisht kur ekipi është në disavantazh, ndizen më shumë në përkrahjen e ekipit. Sot në “Elbasan Arena” me Kuqezinjtë”, shkruan Meta në Facebook.

Kombëtarja e futbollit pësoi një humbje të thellë me kampionët e botës, 4-1. Kjo ndeshje zhgënjeu shumë tifozët pasi shpresat për një kualifikim për në Euro 2020 pothuajse janë shuar.

Shqipëria ndodhet në vendin e katërt në Grupin H me 6 pikë. Kuqezinjtë janë pas Islandës, Turqisë dhe Francës të cilat kanë nga 12 pikë. “Gjelat” janë në krye të tabelës së klasifikimit në grupin H./abcnews.al

europa-league.jpg
ad min19:21 | 26/06/2019

Tifozët e Frankfurtit e treguan veten si të jashtëzakonshëm, duke blerë të gjitha biletat për ndeshjet në kontinent. Ata nuk u shqetësuan as nga fakti se konkurrimi do të nisë në muajin Korrik.

Sezonin e kaluar ata u bënë lajm i madh i Ligës së Europës, ashtu si skuadra e tyre.

Tifozët e Eintrachtit të Frankfurtit shkëlqyen në numra dhe në mbështetje, ndërsa ekipi gjerman kaloi tur pas turi, derisa u ndal me vështirësi nga Chelsea (kampioni i ardhshëm) në gjysmëfinale.

Ky marshim i shkëlqyer i bëri entuziastë mbështetësit e tij të zjarrtë, që e treguan veten menjëherë. Revista gjermane “Kiker” njofton se për 3 orë u shitën 40 000 abone për sezonin e ri të Ligës së Europës.

Kjo, edhe pse ndeshjet e Frankfurtit nisin në 24 korrik, në turin e dytë eleminator, pra në mes të vapës. Tifozët nuk pyetën për këtë, as për faktin se këtë sezon Ajntrahtit do t’i duhet të kalojë nëpër turin e tretë dhe pastaj në plej of, që të kualifikohet për në grupe.

Kjo, për shkak të koeficientit të ulët, pavarësisht heroizimit të vjetshëm. Kundërshtari i parë do të jetë ose Flora e Talinit nga Estonia, ose Radniçi i Nishit nga Serbia.

Edicionin e kaluar, skuadra gjermane e nisi Ligën e Europës në fazën e grupeve, duke bërë një paraqitje të shkëlqyer, pasi zuri vendin e parë në grupin H me 12 pikë nga 12 të mundshme, pra duke i fituar të 6-të ndeshjet, edhe luajti ndaj Lacios, Marsejës dhe Apollonit të Limasolit.

Në raundin e dytë eleminoi bindshëm Shahtarin e Donjeckut, më pas Interin e Milanos dhe në çerekfinale kaloi me përmbysje Benfikën. Eintracht u ndalua në gjysmëfinale nga Chelsea, por vetëm pas gjuajtjes së penalltive, pasi të dyja ndeshjet përfunduan në barazim 1-1./ABC News Albania 24/7

kombetarja-3.jpg
ad min22:01 | 12/06/2019

Pak tifozë, por kënaqësi e madhe për kombëtaren në Elbasan, për ndeshjen europiane. Përkrahës nga Shqipëria e Kosova nuk munguan për ekipin e trajnerit Reja, ndërsa vlerësimet për paraqitjen ishin të ndryshme.

U desh kohë që atmosfera të ishte ajo e duhura. Kur luan kombëtarja zakonisht ka festë, veçse vapa e qershorit e shtyu jo pak orarin e saj këtë të martë në Elbasan.

Më shumë për shkak të detyrës, nxehtësinë e përballuan forcat e policisë, që ishin vendosur në pozicionet e tyre shumë orë përpara orarit të ndeshjes, parashikuar në 20:45.

Entuziazmi mund të mos ishte ai më i madhi i mundshëm, sidomos pas humbjes në Islandë, në të njëjtën kohë që Kosova bënte heroizëm duke triumfuar në Bullgari. Sidoqoftë, u desh të takoheshin pak shqiptarë kosove për të ndryshuar mendim.

Tifozët nga Kosova ishin sërish të shumtë, po ashtu kënaqësia ishte e veçantë që shumë femra pëlqejnë të vijnë në stadium, kuptohet tashmë që ata të Elbasanit apo Shkodrës janë krejt ndryshe nga më parë.

Të gjithë shpreheshin me besim për fitoren, pak rëndësi nëse e thoshin me bindje apo thjesht sepse tifozët kështu duhet të flasin. Përkrahja më e fuqishme si gjithnjë nga grupet e organizuara, me përkrahës nga Shqipëria, Kosova apo Maqedonia, si Tifozët Kuqezi, Plisat e Prishtinës apo Ilirët.

Më në fund, erdhi koha që kombëtaret të mbërrinin në “Elbasan Arena”. Kuqezinjtë e trajnerit Reja, padyshim me më shumë presion, pasi prej tyre kërkohej fitorja si detyrim.

Pyetja ishte, a do t’ia dilnin?

Kundërshtarët nga Moldavia mbërritën me synimin për të mos i lejuar, në fund të fundit askush nuk dëshiron të humbasë, edhe pse ndaj Shqipërisë bilanci nuk fliste për ta.

Ndërsa ndeshja bëhej gati të fillonte, të interesuarit e fundit apo të ardhur nga larg nxitonin të blinin bileta, që nuk ishin aspak të pakta. Padyshim, edhe çështje çmimi, ndërsa në stadium nuk do të kishte më shumë se 4 000 njerëz. Një lojtar i kombëtares, këtë herë jo pjesë e saj, Andi Lila, nuk mund të mos i ndiqte shokët.

Pas rreth dy orësh përfundimi ishte i lumtur, fitore 2-0. Një ish-yll i kombëtares së viteve 80-të, Fatbardh Jera, bëri këtë vlerësim. Një kampioni i takon të flasë, ja drejtori sportiv i Partizanit, Olsi Rama.

Të përqendruar tek intervistat, nuk ishte e mundur të rrokej festa e tifozëve pas ndeshjes. E sigurt është që ajo do të jetë shumë më e madhe pas një tjetër fitoreje në shtëpi./ABC News Albania 24/7

liverpool.jpg
ad min11:30 | 03/06/2019

Plot 750 000 tifozë të Liverpulit festuan në rrugët e qytetit fitoren e Championsit në Madrid. Skuadra udhëtoi në autobusin tradicional pa çati, në një festë që nuk ishte parë prej 14 vitesh

Gjithçka nisi që përpara ndeshjes, në Madrid. Mbi 50 000 tifozë të Liverpulit e bënë të shkëlqyer atmosferën në vigjilje të finales së Ligës së Kampionëve ndaj Totenhemit, dhe festimi i tyre, për fat, nuk do të prishej në përfundim.

Ndërsa, skuadra harbohej në dhomën e zhveshjes në stadiumin “Uanda Metropolitano”, qyteti priste kthimin e saj në shtëpi, për t’i dhënë mirëseardhjen e merituar. Ndodhi pikërisht si 14 vjet më parë, pas finales së paharruar të Stambollit fituar me penallti ndaj Milanit, duke u ndodhur në humbje 0-3.

Drama në Madrid nuk ishte e njëjta, por elektrizimi nga triumfi nuk ishte aspak më i vogël. Plot 750 000 tifozë u mblodhën në rrugët e qytetit bregdetas anglez, duke e kthyer parakalimin e të kuqve, në një ceremoni triumfale.

Ajri u mbush me tymin me ngjyrë të kuqe, lëshuar nga flakadanë dhe gjithçka tjetër tymuese, me letra të vogla gjithashtu të kuqe, ndërsa flamujt e banderolat ishin të shumta, sipas traditës liverpulase, thuajse unike në futbollin anglez.

Rrugët drejt qendrës së qytetit u bllokuan për shumë orë, ndërsa tabelat e qarkullimit dhe semaforët u kthyen në ulëse për tifozët më të zjarrtë. Tifozët mezi pritën një rast për të kremtuar, pasi kishin kaluar 7 vjet nga trofeu më i vonshëm, Kupa e Ligës, si dhe 14 vjet që nga Championsi i fundit.

Përkrahësit shpresojnë që trajneri Jurgen Klop do të dijë ta forcojë skuadrën për të fituar edhe titullin kampion sezonin e ardhshëm./ABC News Albania 24/7

tifoze-1280x714.jpg
ad min16:20 | 01/06/2019

Plot 100 000 tifozë anglezë ndodhen në Madrid për finalen e Championsit. Shpenzime të jashtëzakonshme për udhëtimin, biletat dhe akomodimin në kryeqytetin e Spanjës

Dikur, në kohën para 1990-ës, Kinostudio “Shqipëria e Re” realizoi një film për përkrahësit fanatikë të futbollit, të quajtur “Odisea e tifozëve”.

Nëse në atë kohë çmenduria të bënte të vije me biçikletë nga Shkodra në Tiranë, të vuaje trenave, e autobusëve, apo të hipje në karroceri të ZIS-ve e Skodave, si makina rasti, sot “Odisea” vazhdon në mënyrë “moderne”.

Nga 100 000 tifozët e ardhur për Liverpul-Totenhem në finalen e Championsit, historitë janë nga më të ndryshmet.

Biletat e udhëtimit direkt nga Anglia për në Madrid arritën në 1 000 paundë stërlina, ndërsa çdo dhomë hoteli në kryeqytet u prenotua dhe tani nuk ka më të lira.

Si një “goditje” për tifozët ishte lajmi se këtë të premte mund të gjeje bileta me vetëm 100 paundë stërlina.

Me mijëra tifozë mbërritën në Madrid me makinat e tyre personale e familjare, shumë të tjerë bënë udhëtime ajore në qytete të tjera të Spanjës, apo edhe në vende fqinjë, për të mbërritur pastaj në Madrid me autobusë, makina apo trena.

Fjetja është hall më vete, ndërsa shumë anglezë kanë ngritur tenda në një nga parqet më të mëdhenj të qytetit, madje ka nga ata që janë gati të flenë në dysheme, thjesht për të mos humbur rastin për të qenë pranë finales.

Tetë tifozë të Liverpulit të ardhur nga Kalifornia dhe Australia shpenzuan 45 000 euro së bashku në udhëtim.

Njëri prej tyre udhëtoi 25 orë me aeroplan nga Melburni, që i kushtoi rreth 2 300 euro, dhe po aq bleu biletën e ndeshjes, ndërsa shpenzimet e tjera shkuan edhe më shumë.

Halli i fundit zuri qindra tifozë të Totenhemit, të cilëve iu vonua udhëtimi, dhe do të mbërrijnë në Madrid më pak se 5 orë para fillimit të ndeshjes.

Nga 100 000 tifozë, vetëm 32 000 pajisen zyrtarisht me bileta, ndërsa shumë prej tyre mund të mos I gjejnë as në treg të zi.

Ka tifozë që janë gati të shpenzojnë nga 8 000 deri në 11 000 euro për një biletë të vetme, sidomos nga ata të Totenhemit, për të cilët është finalja e parë.

Problemi më i madh për ta është falsifikimi.

Policia spanjolle ka arrestuar deri tani 3 persona për shitje biletash false, dhe atyre u janë gjetur disa mijëra euro, si dhe mjaft bileta të falsifikuara./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono