TIFOZE

atmosfera.jpg
G. P.16:10 | 22/03/2019

Shkodra po bëhet gati për ndeshjen e sotme të kombëtares sonë me Turqinë në “Loro Boriçi”. Në stadium do të jenë rreth 10 mijë tifozë.

Kombëtarja shqiptare e futbollit do të ketë një mbështetje të madhe sonte në mbrëmje ndaj Turqisë edhe pse atmosfera nuk ka qenë shumë elektrizuese në qytetin  e Shkodrës si në ndeshjet e kaluara. Për këtë duel janë shitur rreth 10 mijë bileta, ku 1 mijë prej tyre i përkasin tifozerisë mike, asaj të Turqisë.

Ashtu si në çdo takim ku luan kombëtarja shqiptare, prezent në stadium do të jetë edhe tifogrupi “Tifozat Kuqezi”, të cilët do të qëndrojnë tek tribuna C5. Tifozët kanë ardhur nga të gjitha trojet shqiptare, por edhe nga diaspora. Nuk do të mungojnë në këtë përballje as plisat e Prishtinës, të cilët janë të kudondodhur ku luan kombëtarja.

Në stadium do të jenë edhe tifogrupe të tjera mbështetëse të ngjyrave kuqezi, të cilët do të përgatisin një atmosfere të ngrohtë për skuadren kombëtare. Shqipëria e ka patur gjithmonë me vete lojtarin e saj të 12, tifozët. E sonte në mbrëmje duhet ta shpërblejnë me fitore sakrificën e tyre./abcnews.al

PARTIZANI-ME-TIFOZE-NDAJ-TEUTES.mpg_snapshot_00.02-1280x720.jpg
G. P.17:37 | 13/03/2019

Partizani do të luajë me tifozë ndaj Teutës për Superligën. Disiplina e dënoi me dy ndeshje, por klubi kryeqytetas vendosi ta shlyejë gjysmën e ndëshkimit, duke paguar gjobën.

Padyshim që do të vrapojnë për në stadium. Tifozët e Partizanit morën një dhuratë nga klubi i tyre, për të qenë të pranishëm në “Selman Stërmasi” në sfidën e rëndësishme ndaj Teutës për Superligën. Luhet të dielën në orën 17:00, dhe vendimi i Komisionit të Disiplinës pak ditë më parë, e detyronte skuadrën kryeqytetase që të luante pa tifozë.

Kjo, pas dhunimit të fotografit të Flamurtarit në ndeshjen po për Superligën në “Selman Stërmasi”. Dënimi ishte për dy ndeshje me dyer të mbyllura, por gjysma e tij u shlye nga ndeshja e Kupës luajtur ndaj Luftëtarit në Kupë, në “Elbasan Arena”.

Fillimisht, drejtuesit e klubit ishin shprehur se nuk kishin ndërmend të paguanin para për të kthyer tifozët, në mënyrë që dënimi të bëhej mësim dhe të mos ndodhnin në të ardhmen ngjarje të tilla të rënda. Sidoqoftë, Teuta është rival direkt për titull, ndërsa Kukësi ndodhet vetëm 6 pikë larg, ndaj kryeqytetasit ndryshuan mendim dhe do të paguajnë 500 mijë lekë të rinj për të larë plotësisht dënimin e Disiplinës./abcnews.al

stadium-1280x717.jpg
G. P.15:32 | 01/03/2019

Pak para fillimit nga derbi i kryeqytetit Tirana-Partizani, policia ka publikuar planin e masave për të garantuar mbarëvajtjen e evenimentit futbollistit. Policia ashtu si edhe në ndeshjet e tjera të zhvilluara gjatë këtij kampionati të Superiores nuk do të jetë e pranishme brenda stadiumit “Selman Stërmasi”, por njofton se do të ndërhyjë në rast se do të ketë konflikt nga tifozët respektivë.

Derbi starton sot në orën 18:00 dhe kontrolle do të ushtrohen nga uniformat blu ndaj tifozëve para hyrjes në stadium për sende të kundraligjshme si armë apo lëndë piroteknike. Gjithashtu çdo tifoz duhet të jetë i pajisur me dokument identifikimi, ndërsa do të lejohen të futen në stadium fëmijët nën moshën 16 vjeç, pa praninë e prindërit apo kujdestarit.

Në momentin e kalimit të tifozëve, do të bllokohen disa akse rrugore, njofton policia. Konkretisht nuk lejohet kalimi për automjete në rrugën “Gjin Bue Shpata”, nga kryqëzimi me Rrugën “Emin Duraku” deri tek kryqëzimi me Rrugën “Sulejman Delvina”. Për këtë arsye drejtuesit e automjeteve duhet të përdorin rrugë të tjera alternative për të mbërritur në destinacion./abcnews.al

kukesi-goditja.jpg
G. P.16:45 | 27/01/2019

Kukësi pritet të dënohet rëndë pasi tifozët e tij goditën arbitrin anësor në ndeshjen ndaj Laçit. Kodi i Displinës parashikon ndëshkim të ashpër.

Është skuadra më “emigrante” e kampionatit, por mund ta pësojë edhe më keq. Mjaftoi një send i fortë në kokën e një arbitri që Kukësi të rrezikojë seriozisht në vazhdimin e Superligës, për të mos pasur me vete edhe ata pak tifozë që e ndjekin. Përkrahës kuksianë goditën gjyqtarin anësor Denis Rexha, në sfidën ndaj Laçit në Kamzë, në stadiumin që quhej i Kukësit dhe rregullorja parashikon dënim të ashpër për një veprim të tillë.

Neni 66 i Kodit të Disiplinës Sportive, në pikën 3d, parashikon që një ekip dënohet me jo më pak se 8 ndeshje pa luajtur në stadiumin e tij. Rasti i kuksianëve është specifik, pasi takimet nuk luhen në Kukës, pra dënimi mbetet vetëm për t’i zhvilluar pa spektatorë.

Neni 66 ka edhe pikën 3b, që parashikon jo më pak se 4 ndeshje jashtë fushe, por kur nuk ka akte dhune ndaj zyrtarëve të ndeshjes, ndaj për bazë duhet të merret pika 3d. Në ndeshjen ndaj Laçit, gjyqtari Rexha u godit dhe u rrëzua në tokë, pati ndëpreje për disa minuta, por për fat arbitri u ngrit dhe vazhdoi detyrën deri në fund.

Gjithsesi, mjafton goditja, hedhja e sendeve të forta brenda rrethimit të fushës, dhe ndërprerja e takimit, që Komisioni i Disiplinës të marrë vendim. Ky pritet të jetë një minus tjetër i madh i Kukësit, që nuk luan në Kukës, ndërsa trajneri Cungu ka edhe problemin e Rezhinaldos, sulmuesit kryesor që nuk ishte as në stol ndaj Laçit, dhe që nuk dihet mirë nëse është i dëmtuar, i dënuar, apo vetë ai nuk dëshiron që të luajë./abcnews.al

skocia-1.jpg
G. P.22:23 | 16/11/2018

Në Shkodër kanë mbërritur tifozët skocezë për ndeshjen Shqipëri–Skoci që zhvillohet ditën e nesërme. Rreth 300 shtetas skocezë pritet të jenë të shtunën në stadiumin Loro Boriçi për të ndjekur ndeshjen që është e vleshme për Ligën e Kombeve.

Deri atëherë, ata po shijojnë atsmoferën në kryeqytet duke shpresuar për një fitore të shtunën në mbrëmje. Edhe policia e Shkodrës ka marrë një sërë masash për të menaxhuar trafikun në qytet në orarin e ndeshjes dhe për të shmangur ndonjë incident të mundshëm./abcnews.al

skocia.jpg
ent ela22:22 | 15/11/2018

Plot 26 autobusë me tifozë skocezë pritet të mbërrijnë këtë të shtunë në Shkodër. Ata do të mbështesin ekipin e tyre kombëtar për ndeshjen ndaj Shqipërisë

Tradita ia do që të jenë të shumtë.

Tifozët skocezë pritet të jenë në numër të madh në stadiumin “Loro Boriçi” të Shkodrës, për ndeshjen ndaj Shqipërisë. Tabloidi “The Sun” raporton se do të jenë plot 26 autobusë me përkrahës së Skocisë këtë të shtunë, dhe e përkthyer në numra, kjo do të thotë ndoshta mbi 2 000. Të mbiquajtur si “Ushtria e Tartanit”, tifozët skocezë janë të famshëm për mbështetjen e tyre të pakufishme për ekipin e tyre përfaqësues, që është një simbol i kombit të tyre, në mungesë të një shteti të pavarur.

Autoritetet shqiptare nuk kanë arsye të shqetësohen, pasi tifozët skocezë, ndryshe nga disa anglezë, nuk sillen si huliganë, përveçse në ndeshjet Skoci-Angli, madje ata kanë marrë edhe çmim për sjelljen e kulturuar, siç ndodhi në Bruksel apo Zagreb. Një grupim i tifozëve skocezë, të njohur për veprime humanitare, kanë vendosur të dhurojnë 5 000 paund stërlina për një fondacion bamirësie në Shqipëri. Kjo është një traditë këtij grupimi, e nisur që nga viti 2003, në një ndeshje në Lituani, ndërsa sasia e përgjithshme e dhuruar arrin në 120 000 paund stërlina.

Numri i tifozëve skocezë në Shkodër është i përafërt me atë të tifozëve të Uellsit, që pritet të jenë në “Elbasan Arena”, për miqësoren e datës 20 Nëntor. Për Uellsin janë dhënë 2 000 bileta, por tifozët uellsianë janë ankuar për çmimin e lartë të biletave në “Elbasan Arena”, prej 15 paund stërlinash për copë, ndërsa tifozët skocezë, sipas tyre, i kanë marrë biletat me vetëm 4 paund stërlina./abcnews.al

PARTIZANI-ME-TIFOZE-NDAJ-LACIT.mpg_snapshot_00.11-1280x720.jpg
G. P.08:20 | 09/11/2018

Partizani do ta luajë me tifozë ndeshjen e rëndësishme të radhës në Superligë. Klubi do ta shlyejë dënimin, duke paguar gjobën, ndërsa synon të mbajë kreun e renditjes.

Do të ketë një plus më shumë kur të dalin në fushë. Futbollistët e Partizanit pritet të luajnë me mbështetjen e mijëra tifozëve në ndeshjen e fundjavës në Superligë ndaj Laçit, në “Selman Stërmasi”. Klubi bën me dijë zyrtarisht se do të paguajë financiarisht për të shlyer dënimin prej 2 ndeshjesh pa tifozë, që iu bë nga Komisioni i Disiplinës në Federatë. Gjoba që do të paguhet është gjysmë milionë lekë të reja, ndërsa ndëshkimi erdhi pas parullës raciste antigreke të nxjerrë nga disa tifozë në ndeshjen kundër Skënderbeut.

Partizani u rikthye në vendin e parë në renditjen e Superligës pas fitores së arritur në fushë Krujë ndaj Kastriotit, ndërsa përfitoi edhe nga humbja e Skënderbeut me Laçin.
Skuadra e trajnerit Skënder Gega ka tani 28 pikë ndaj 26 të rivalit kryesor, dhe mbështetja e tifozëve shihet si shumë e rëndësishme për të pretenduar titullin.
Për më tepër, Laçi është treguar ekip i fortë këtë sezon, duke qenë në vend të tretë, vetëm 6 pikë larg kreut, dhe vetë Partizani nuk e ka pasur të lehtë këta vite për ta mposhtur. Gjithsesi, të kuqtë cilësohen favoritë në përballjen e fundjavës, edhe sepse luajnë në fushën e tyre, për më tepër me tifozë./abcnews.al

shalla-2.jpg
G. P.20:31 | 23/10/2018

Një incident tronditi të martën tifozët rusë të mbledhur në kryeqytetin e Italisë për ndeshjen e futbollit Romë-CSKA. Shkallët lëvizëse të një stacioni metroje u shembën duke plagosur 20 prej tyre dhe bllokuar disa të tjerë. Sipas mediave italiane, struktura u shemb për shkak se tifozët rusë po këndonin dhe po kërcenin teksa shkalla ishte në lëvizje.

Të lënduarit u dëmtuan kryesisht tek këmbët. Prej tyre, vetëm një person është në gjendje të rëndë. Ndërkohë, në një ngjarje tjetër, një tifoz rus u plagos me thikë dhe dy të tjerë u sulmuan fizikisht gjatë një përleshje mes tifozërive, në një zonë pranë stadiumit “Olimpiko”. Forcat e rendit përdorën gaz lotësjellës për të ndaluar sherrin dhe ndaluan 15 tifozë italianë./abcnews.al

milan.png
G. P.18:26 | 21/10/2018

Seria A do të ketë sot sfidën e madhe mes Interit dhe Milanit. Të dyja skuadrat janë kthyer në pretendente dhe do të synojnë vetëm fitoren në stadiumin “San Siro”.

Nuk vlen titullin, por është më e rëndësishme se çdo ndeshje. Është pra derbi i mbiquajtur “i Madoninës”, ai i Milanos, në Serinë A. Interi do të presë Milanin në stadiumin e famshëm “San Siro”, në ndeshjen zyrtare numër 222 dhe e vetmja gjë që kërkohet është fitorja. Emocionet pritet të jenë të forta, ndërsa dy ekipet janë kthyer më në fund në pretendentë, pas shumë vitesh zhgënjimi.Trajneri interist, Spaleti, komenton shkurt dhe qetë.

“Nuk e di nëse dy skuadrat kanë frikë nga njëra-tjetra. Nuk dua që të merrem me këtë. Unë mendoj vetëm që të kërkoj maksimumin nga lojtarët e mi, të kërkoj që ata të mos kenë frikë. Mund të kemi sukses vetëm nëse kemi besim tek puna dhe tek forcat tona. Duhet të luajmë për fitore për të kënaqur tifozët tanë që do të jenë të shumtë në stadium”, tha ai.

Kolegu i tij, ish-ylli milanist, Gatuzo, është më konkret në analizë.

“E kam pasur shumë të lehtë ta përgatis ndeshjen. Duhet të jemi të fortë dhe të mos ndikohemi nga emocionet, pasi kjo do të na lodhte para kohe. Interi është një skuadër e fortë, teknikisht dhe fizikisht, pra nuk duhet të gabojmë. Gjithsesi, mendoj se Milani sot është më lart teknikisht, ndërsa synimi ynë është gjithnjë vetëm fitorja”, u shpreh trajneri.

Interi kryeson në bilanc ndaj rivalëve me 62 fitore ndaj 51 humbjeve në Serinë A, dhe me 78 fitore e 76 humbje në total. Të dyja skuadrat nuk kanë probleme me dëmtimet apo pezullimet, dhe vetëm Milani ka në dyshim kroatin Striniç, si dhe mungesë Kontin.

Skemat pritet të jenë të ndryshme, 4-2-3-1 ajo e Spaletit tek Interi, dhe 4-3-3 moduli i Gatuzos për kuqezinjtë. Në fushë pritet të jenë lojtarët më të mirë, me zikaltërit që do të mbështetet tek Ikardi në sulm, Perishiç, Naingolan, por me Vrsaljkon apo Kandrevën në stol.

Edhe tek Milani, pritet që sulmuesi i ri, Kutrone ta nisë si rezervë, ndërsa në sulm do të jenë Higuain, Suso apo Çalhanoglu. Sipas parashikimeve, Interi është favorit me kuotën 2.5, ndërsa suksesi milanist ka koefiçient 2.95./abcnews.al

dhunaa.png
G. P.11:01 | 12/10/2018

Mali i Zi nuk arriti të fitojë asnjë pikë të vetëm në Podgoricë, pasi përfaqësuesja malazeze u mund me rezultat 0:2 nga Serbia, në ndeshjen e së enjtes në kuadër të Ligës së Kombeve. Mediat kosovare raportojnë se mes tifozëve ka pasur përplasje të dhunshme. Tifozët e Malit të Zi, përfshirë edhe shqiptarë u përleshën me tifozët serbë, pasi këta të fundit brohorisnin “Kosova është Serbi”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono