thumane

fbdfdf.jpg
Autor E16:13 | 15/01/2020

Banorët e Durrësit që po jetojnë në hotele pas tërmetit ndihen të pashpresë për një strehim të shpejtë.

Afatet kohore për të qëndruar në hotele po shkojnë drejt fundit pasi sipërmarrësit kanë vendosur që në muajin mars ata të dalin pasi do përgatiten për sezonin veror.

Një pjesë ende nuk i ka dalë bonusi i qirasë dhe nuk mund të kërkojnë parapakisht banesë me qira.

“Kam nxjerrë djalin për të kërkuar shtëpi me qira në Durrës, por nuk ka gjetur gjë”, shprehet një zonjë, ndërsa një tjetër grua thotë se kanë aplikuar për bonus, por se shtëpitë me qira janë mjaft të shtrenjta.

Ndërsa një tjetër zotëri ka shpresa që do të kthehet në banesën e tij pasi ajo do riparohet.

“Mendojmë që brenda dhjetë ditësh të shkojmë tek banesa jonë sepse nuk është dëmtuar shumë”, thotë ai.

Ka dhe ndërtues që janë kujdesur vetë për banorët. Ndërtuesi i pallatit të këtij të moshuari ka marrë vetë përsipër dërgimin e tij në hotel.

“Ata që kemi blerë pallatin na morën dhe na thanë të rrimë në këtë hotel”, shprehet ai.

Durrësi ishte qarku më i dëmtuar nga tërmeti i 26 nëntorit të 2019.

Prej ndërtimeve të dobta dhe ndërhyrjeve në strukturat e shumë godinave pati dhe humbje jetësh. Ndërsa qindra banorë janë strehuar në hotele në pritje të marrjes së bonusit të qirasë. /abcnews.al

 

 

termet.jpg
Autor E16:08 | 07/01/2020

Tetë nga nëntë anëtarët e familjes Lala humbën jetën më 26 nëntor, pasi lëkundjet e tërmetit shkatërrimtar e kthyen ndërtesën 4-katëshe ku ata banonin, brenda pak sekondash, në një pirg rrënojash betoni dhe hekuri në zonën e ish-kënetës në Durrës.

Dy muaj më vonë, prokurorët po analizojnë me kujdes të dhënat e përftuara nga analizat laboratorike të materialeve të ndërtimit të përdorura në ndërtesën e rrënuar, në përpjekje për të gjetur shkaqet e rrëzimit të saj.

“Prokuroria Durrës ka administruar analizat laboratorike nga laboratori ‘A.L.T.E.A. & Geostudio 2000’ dhe nga të dhënat paraprake dyshohet se betoni i përdorur është jashtë standardeve të ndërtimit,” sqaroi për BIRN një prej tre prokurorëve që po hetojnë çështjen.

Pas tërmetit, Prokuroria e Rrethit Gjyqësor Durrës regjistroi një procedim penal për veprat e shpërdorimit të detyrës, ndërtimit në kundërshtim me rregullat teknike me pasojë vdekjen dhe vrasjen me dashje.

Më 14 dhjetor, me urdhër të prokurorisë, Policia e Shtetit arrestoi 9 persona dhe shpalli në kërkim 8 të tjerë, të dyshuar si përgjegjës për shembjen e 4 ndërtesave me pasojë humbjen e jetëve njerëzore. Në total vetëm në Durrës, nga tërmeti u shembën tërësisht 7 ndërtesa ku humbën jetën 23 persona – përshirë dhe 8 anëtarë të familjes Lala.

Analizat e betonit për 7 ndërtesat e shkatërruara, të para nga BIRN, tregojnë se në të paktën 4 prej tyre, marka e betonit të përdorur për ndërtim dyshohet se ka qenë nën standard. Megjithatë, tre inxhinierë ndërtimi të pavarur, të konsultuar nga BIRN, këshilluan që të bëhet kujdes për të arritur në përfundime mbi shkaqet që mund të kenë determinuar ose kontribuar në kolapsin e ndërtesave.

Përveç shtatë ndërtesave ku u regjistruan viktima, hetimi i Prokurorisë së Durrësit mbi materialet e ndërtimit pritet të shtrihet edhe në qindra pallatet e dëmtuara nga tërmeti, duke pasur qëllim zbardhjen e shkaqeve dhe përgjegjësit që kanë kontribuar në dëmtimin e tyre.

Beton jashtë standardit

Tërmeti shkatërrimtar me magnitudë 6.3 i shkallës Rihter i 26 nëntorit shkaktoi 51 viktima dhe më shumë se 900 të plagosur në Durrës, Krujë, Tiranë dhe Lezhë, ndërkohë që qindra ndërtesa u dëmtuan duke u kthyer në të pabanueshme dhe mijëra vetë u lanë të pastrehë.

Klasa e betonit apo “marka”, siç njihet në gjuhën e përditshme, shpreh cilësinë e betonit kur ai testohet përmes forcave shtypëse. Nga analizat e lexuara nga BIRN, të realizuara nga laboratori ‘A.L.T.E.A. & Geostudio 2000’ me kërkesë të Prokurorisë, rezultoi se gjysma e 20 mostrave të ndryshme të betonit të marrë nga 7 ndërtesat e shkatërruara rezultojnë me vlera rezistence në shtypje kubike nën standard.

Fletët e analizave për cilësinë e betonit përfshijnë shtëpinë e familjes Lala, pallatin 6-katësh ku ndodhej ish-bar “Baron’s”, pallatin 6-katësh pronë e familjes Konomi, hotelet ‘Mira Mare’, ‘Vila Palma’ ‘ Tropikal’, si dhe “Godinën e Re numër 4” tek Shtëpia e Pushimit të Ministrisë së Brendshme.  Për të mos cënuar sekretin hetimor, BIRN do t’i referohet rezultatit te analizave të këtyre ndërtesave vetëm nëpërmjet një numri rendor.

Sipas fletëve të analizave, pas testimit të rezistencës në shtypje kubike të betonit, rezultoi se nga mostrat e marra në 7 objektet, janë përdorur klasa të betonit që luhaten nga  6.32 megapaskal deri në 42.08 megapaskal.

“Grupi hetimor sapo ka nisur hetimet për 7 objektet me pasoja në njerëz, ka marrë pjesë betoni nga strukturat e godinave, në prani të një specialisti të Institutit të Ndërtimit, për t’u analizuar më pas,” sqaroi për BIRN një prej 3 prokurorëve që udhëheqin hetimin.

“Jo gjithmonë klasa e ulët është tregues i keq. Nga këto përjashtohen vlera nën 20 megapaskal. Çfarë është nën të, teorikisht është gabim sepse nuk është beton strukturor,” shtoi ai.

Nga analizat laboratorike të 7 ndërtesave të shkatërruara nga tërmeti, 3 objekte i kishin të gjitha mostrat nën 20 megapaskal, 2 objekte i kishin të gjitha mostrat e betonit mbi 20 megapaskal, ndërsa në dy të tjerat, mostrat ndaheshin në gjysmë – poshtë dhe lart vlerës 20 megapaskal që i kalsifikon ose jo si beton strukturor.

I kontaktuar nga BIRN, menaxheri i laboratorit “A.L.T.E.A. & Geostudio 2000’, Skënder Allkja konfirmoi realizimin e analizave të betonit me kërkesë të Prokurorisë, por shtoi se laboratori i tij, përveç rezultateve nuk mund të jepte përfundime nëse cilësia e betonit kishte kontribuar në kolapsin e ndërtesave nga tërmeti.

“Ne kemi realizuar analizat për mostrat e betonit të marra dhe ia kemi vendosur në dispozicion prokurorisë, por nuk bëjmë interpretimin e tyre,” sqaroi Allkja. “Për këtë duhet të shprehet një specialist i fushës,” shtoi ai.

Sipas ekspertëve, standardi minimal për betonin që përdoret në konstruktin e godinave është C16/20, pra klasa 20 e betonit.

Alier Cara, një inxhinier strukturor nga Durrësi me të cilin BIRN konsultoi të dhënat e analizave laboratorike të betonit të ndërtesave të shkatërruara nga tërmeti, vuri në dukje se vetëm 3 nga 7 objektet kishin marka betoni brenda normave.

“Objekti 1 dhe Objekti 3 duken me klasë normale betoni dhe pjesërisht Objekti 5 deri diku është brenda normave,” tha Cara. “Në vitet ’90, kur ka nisur ndërtimi në Shqipëri ka pasur një gamë të vogël klasash betoni, të vlerave 20, 25 dhe rrallëherë 30 megapaskal,” shtoi ai.

Sipas inxhinierit durrsak, edhe në raste si ai i objektit 2, ku vetëm një nga mostrat e betonit tregon vlerë poshtë standardit të betonit strukturor, ky i fundit mund të ketë kontribuar në rrëzimin e ndërtesës.

“Mostrat e betonit në “Objektin 2” tregojnë për përdorimin e klasës së betonit 40, por nëse ajo është përdorur në katin e dytë dhe në të parin betoni ka pasur vlerën 17.74 megapaskal sipas analizave, objekti e ka marrë goditjen nga kjo cilësi betoni,” tha ai.

“Më duket e çuditshme se si në një objekt është përdorur beton i klasës 40 dhe një vlerë tjetër, që nuk konsiderohet fare klasë betoni për strukturë,” shtoi ai.

Cara shpjegoi se ka godina ku nga tërmeti i 21 shtatorit, betoni mund të ketë pësuar plasaritje apo të ketë dalë jashtë funksionit dhe tërmeti i 26 nëntorit e ka shembur strukturën që mbështetej deri në atë moment vetëm në hekurat e godinës.

“Nëse betoni porositet në një pikë prodhimi, vjen i garantuar dhe ke garancinë se ka një shmangie prej 3 njësi nga klasa e kërkuar, që është normale,” tha Cara. “Ndërsa kur betonin e bën vetë me punëtorë dhe betoniere, nëse nuk ndjek gramaturën e saktë, merr klasën e betonit nga 7 deri tek 40 megapaskal,” shpjegoi ai.

Megjithatë, Cara dhe dy inxhinierët konstruktorë të pyetur nga BIRN theksuan se çdo gjykim mbi analizat është paraprak, pasi ka shumë rëndësi edhe mënyra se si janë marrë mostrat e betonit. Sipas tyre, ato duhen marrë në elementët strukturorë, në disa kolona të objektit, trarë dhe soletë, që të krijojnë një panoramë të plotë.

“Është pak të gjykosh mbi 2 rezultate analizash [për një objekt], por sigurisht që kupton se ka një lajthitje të vlerave në mes,” tha Cara.

Këto dilema, sipas prokurorisë do të zgjidhen nëpërmjet akteve të ekspertimit teknik që do të përpilohen nga specialistë për secilën nga ndërtesat e shkatërruara.

“Pasi t’i vendosen në dispozicion një specialisti analizat e betonit, hekurit, ato gjeologjike, aktet e këqyrjes së vendit të ngjarjes dhe aktet e tjera, më pas do të dilet në një konkluzion përfundimtar se kush është shkaku i rrëzimit të godinave,” sqaroi një prej prokurorëve të çështjes.

Ndërtues pa shkollë

Hotel Mira Mare. Rruga Pavarësia, Plazh, pas kolapsimit nga tërmeti. Foto Geri Emiri

Ruzhdi Xheka, pronari i hotel ‘Mira Mare’-s në plazhin e Durrësit është njëri prej 9 të arrestuarve nga prokuroria, me akuzën e vrasjes me dashje. Nga shembja e hotelit të tij më 26 nëntor humbën jetën dy persona.

Gjatë caktimit të masës së sigurisë për Xhekën në Gjykatën e Durrësit, avokati i tij mbrojtës deklaroi se 79-vjeçari kishte vetëm 7 klasë shkollë dhe ai ishte fajtor vetëm se kishte ndërtuar në mënyrë të paligjshme – si shumica e shqiptarëve.

“Ruzhdiu nuk kishte njohuritë e nevojshme,” u shpreh avokati mbrojtës gjatë seancës gjyqësore. “Dy ditë pas shembjes doli nga rrënojat, për të vetmin fakt se ka ndërtuar pa leje si gjysma e shqiptarëve,” shtoi ai.

Pëerveç hotel ‘Mira Mare’-s, grupi hetimor i përbërë nga prokurorët Edmond Kaloshi, Madrid Kullolli dhe Pali Deçolli ka evidentuar si ndërtime pa leje hotelin “Tropikal”, lokalin në katin e parë të pallatit 6-katësh në Durrës ku humbën jetën Hatije Rexhepi dhe Xhulieta Gjana, si dhe banesën 4-katëshe të familjes Lala. Ndërkohë, edhe hoteli “Vila Palma” ka pasur 3 kate shtesë, jashtë projektit fillestar.

Një nga pjesëtarët e grupit hetimor i tha BIRN se ndërtimet pa leje, në mungesë të një projekti, “librit të masave” ku përshkruhen me detaje punimet e realizuara, materiali i përdorur, burimi i tyre, kanë kufizuar dhe vështirësuar hetimin e prokurorisë.

“Godina është ndërtuar në vitet ’94-‘96 nuk e prodhoi vetë hekurin, tullën dhe nëse do kishte të arrestuar, duhej të ishin ndërtuesit,” tha në seancën gjyqësore avokatja Shqiponja Meta, që mbronte ndërtuesin e “Hotel Tropikal”, Avdulla Osmani.

Sipas kërkesës për masë sigurie kundër Osmanit, hotelit i tij është ndërtuar “pa studim gjeologjiko-sizmik, pa projekt konstruksioni dhe pa mbikëqyrje punimesh.”

“Për efekt të marrjes së lejes së ndërtimit dhe legalizimit, projekti është bërë pas realizimit të ndërtimit,” shpjegojnë prokurorët në kërkesën e tyre drejtuar gjykatës, ku kanë kërkuar burg pa afat për Osmanin, i akuzuar për veprën penale ‘vrasje në rrethana të tjera cilësuese.”

Hetime për ndërtuesit e pallateve

Pallat i dëmtuar nga tërmeti në Durrës | Foto : LSA

Grupi hetimor i Prokurorisë së Durrësit e ka fokusuar hetimin tek përgjegjësit për shembjen e 7 godinave ku humbën jetën 23 persona. Përveç ndërtuesve të këtyre godinave informale, në pranga kanë përfunduar dhe zyrtarë të ALUIZNI-it dhe bashkisë së Durrësit.

BIRN ka mësuar gjithashtu se paralelisht me hetimin për përgjegjësit në humbjen e jetëve njerëzore, policia po referon çdo ditë materiale për një tjetër çështje, që pritet të kalojë në sitë cilësinë e ndërtimit në pallatet ku janë shënuar dëme të mëdha materiale.

Në këtë hetim përfshihen rastet e pallateve, të cilat kanë pësuar dëme në strukturë ose në muraturë. Mostra betoni janë marrë edhe në godinat e shembura nga qeveria, pasi u shpallën të pabanueshme. Ato janë këqyrur përpara shembjes dhe është mbledhur materiali dokumentues i gjendjes së tyre fizike, përpara shembjes së komanduar.

Megjithatë, njëri nga anëtarët e grupit hetimor i tha BIRN se jo domosdoshmërish faji për këto dëme mund t’u adresohet pronarëve të kompanive të ndërtimit.

“Ndërtuesit në vetvete mund të kenë probleme të tjera, por nuk mund të merren menjëherë në përgjegjësi penale,” shpjegoi njëri prej prokurorëve në kushtet e anonimatit.

“Projektin e ka bërë një projektues, bëhet edhe studimi sizmologjik etj. dhe nëse në njërën nga këto hallka ka abuzime, identifikohet më lehtë përgjegjësi,” përfundoi ai. /Reporter.al

gaze.jpg
in a14:42 | 07/01/2020

Nxënësit e Borizanës nga frika se mos humbin vitin po ndjekin mësimin pasdite në shkollën e Thumanës.

Shkolla e Borizanës u shemb pas tërmetit pasi u vlerësua si e rrezikshme për nxënësit edhe pse në verë të 2019-tës ajo u restaurua. Vetë nxënësit sqarojnë se shkolla e tyre kishte kushte më të mira se kjo në Thumanë ku janë transferuar dhe se nuk kanë as ngrohje.

“Kushtet e shkollës janë më të pakta, është shumë ftohtë”, shprehen fëmijët.

Gjithësesi ata pohojnë se jo të gjithë ndjekin mësimin pasi nuk kanë mundësi të udhëtojnë me autobusat e vëna në dispozicion. Faktin që ka mungesa dhe vështirësi e pohon edhe një mësuese.

“Janë rreth 400 nxënës dhe nuk mund të ulen të gjithë”, thonë nxënësit.

Ndërsa njëra prej mësueseve është shprehur se ka mungesa të nxënësve.

Këta nxënës ngrenë e shqetësimin për mangësi në marrjen e njohurive në Shkollën e Mesme të Thumaës. Pasi dhe ajo 9 vjeçare u shemb edhe pse ishte duke përfunduar restaurimi.

“Orët nuk janë të plota, mësimin nuk e zhvillojmë dot të plotë”, thonë fëmijët.

Mësohet se vetëm fëmijët e parashkollorit dhe ata të ciklit të ulët po zhvillojnë mësim në Borizanë në një palestër të improvizuar si klasë./abcnews.al

banoret-thumane-cadra.jpg
nev ila18:00 | 06/01/2020

Me ftohjen e motit, vështirësohet akoma më shumë edhe jetesa për banorët e Thumanës, të cilët prej më shumë se një muaji jetojnë në çadër. Këta banorë nuk kanë pranuar të braktisin shtëpitë dhe të strehohen në hotele pasi kanë bagëti dhe duhet të kujdesen për to.

Banorët e Thumanës që jetojnë në çadra, kaluan një natë tepër ftohtë.

Kjo është  Xhume Jangozi. Ajo bashkë me fëmijët e saj të mitur jeton prej më shumë se një muaji në çadër.

Temperaturat e ulta, përgjatë këtyre dy ditëve e kanë vështirësuar më shumë qëndrimin e saj dhe të fëmijëve në këtë çadër.

Në një tjetër çadër, me kushte aspak të favorshme për të përballuar të ftohtin e dimrit, jeton edhe familja Xhixha. E zonja e shtëpisë shprehet se dita ditës situata e tyre vështirësohet më shumë.

Pranë familjes Xhixha ndodhet familja e Ndue Bakës. Vajza e tyre e madhe është me aftësi të kufizuara. Nëna e saj tregon për peripecitë që po kalon prej një muaji

“Në hotel nuk shkoj dot me vajzën se ngrohet me zjarr pasi  kondicioneri i than ajrin”.

Në të njëjtën situatë janë edhe shumë familje në këtë zonë, të cilët duhet ti kalojnë këto ditë të ftohta Janari në ambient aspak favorizues. Seit Mirdita ka menduar qe familjen e tij ta strehojë në kasollen e bagëtive.

Edhe pse qeveria u ka ofruar bonusin e qerasë, banorët deklarojnë se ata nuk mund ti braktisin shtëpitë pasi kanë bagëti dhe duhet të përkujdesen për to./abcnews.al

Screenshot_10.png
R D13:10 | 06/01/2020

Familja Caka me 4 anëtarë jeton në çadër prej 1 muaji e gjysëm. Pa energji elektrike, pa ngrohje, në ditët më të ftohta të vitit kur temperaturat kanë zbritur në minus zero gradë.

“Abc News” pa nga afër sot kushtet ekstremisht të vështira ku jetojnë familjet e Thumanës, dhe u ndal pikërisht në familjet me nevoja të veçanta. E tillë është dhe familja Caka, me djalin autik.

Nëna e 13 vjeçarit, Flora bën apel për ndihmë.

“Jemi në çadër prej 26 nëntorit. Pak shpresë ka për ne…kemi bërë apel shumë herë por askush nuk na është përgjigjur. Shtëpinë që u shemb nuk e kemi patur tonën, ishim me qira. Gjithçka patëm brenda u shkatërrua (orenditë). Tani kërkojmë së paku një kontenier. Nuk kemi të ardhura, ndaj kemi mbetur këtu në çadër, në të ftohtë…jetojmë vetëm me KEMP-in e djalit, 10 mijë lekë në muaj”, shprehet ajo. /abcnews.al

Lexo edhe: “Abc News” në Thumanë/ Gruaja e paralizuar lëngon në barake prej 3 muajsh 

 

 

 

 

Screenshot_5.png
R D11:37 | 06/01/2020

Fran Lleshi me gruan e paralizuar jetojnë në një barake, në kushte të mjerueshme që prej termetit të 21 shtatorit.

Gazetari Juxhin Mustafaraj dhe grupi i xhirimit të Abc News udhëtoi sot drejt Thumanës për të parë nga afër gjendjen e banorëve që kanë mbetur jashtë në ditët e ftohta të dimrit.

Në familjen e Fran Lleshit, në Thumanë mësojmë se burrë e grua kanë mbetur jashtë që prej termetit të parë, atij të 21 shtatorit. Prej më shumë se 3 muajsh, Fran Lleshi dhe gruaja e tij e paralizuar qendrojnë në barake, në kushte mesjetare.

“Shtepia u dëmtua në shtator, pastaj me këtë termetin e dytë (26 nentor) u shemb komplet…Akoma s’na kanë thënë asgjë…As bonus qiraje asnjë send në botë. Ne s’kemi ku shkojmë, vetëm me u mbyt në ujë…më keq nuk ka ku shkon. Gruan e kam të paralizuar…”, shprehet i brengosur Fran LLeshi.

Ai ka migruar nga zona e thellë e Fanit në Mirditë, drejt Thumanës për një jete më të mirë, por shtëpia që ndërtoi me mundim u shemb. Ata apelojnë që shteti ti ndihmojë për të rindërtuar banesën ku të fusin kokën./abcnews.al

kruje.jpg
ger ta14:28 | 02/01/2020

Banorët e Thumanës të strehuar në hotelet e Shëngjinit do të vijojnë të qëndrojnë aty deri në gjetjen një banese.

Protestat dhe rezistenca e banorëve bëri që bashkia e Krujës të tërhiqej nga vendimi i parë.

Mësohet se mbrëmjen e së mërkurës kryetari i bashkisë Artur Bushi ka biseduar me familjet, të cilëve u ka thënë se mund të qëndrojnë në hotel deri sa të gjejnë një shtëpi me qira.

Banorët thanë për Abc.Neës se se kanë marrë garanci nga kryetari i bashkisë se do ti ndihmojë në gjetjen e shtëpive.

“Po jemi të kënaqëur se të paktën në rrugë të madhe nuk dalim nesër. E kemi pak optimizmimin sesa do na ndihmojë nuk e di”, shprehet një banore.

Por në këtë hotel ka edhe familjarë që tregojnë se nuk kanë mundësi të gjejnë një banesë me qira.

Më  e rëndë situata është për këtë zonjë e cila jeton e vetme me fëmijët e saj në një nga dhomat e hotelit, pasi bashkëshorti është i shtuar në spital.

Mijëra familje janë në udhëkryq, pasi nuk e dinë çdo të ndodhë me fatin e tyre, në një kohë kur edhe temperaturat janë ulur ndjeshëm.

3 janari ishte afati i fundit që banorët e Thumanës shtëpitë e të cilëve u shkatarruan nga tërmeti i 26 nëntorit mund të qëndronin në hotel./abcnews.al

77-3.jpg
in a22:14 | 30/12/2019

Pak orë para ndërrimit të viteve, zëvendës Ministrja e Brendshme, Romina Kuko ishte në Shëngjin për të shpërndarë dhurata për fëmijët që janë strehuar bashkë me familjet e tyre në hotel, pasi humbën shtëpitë nga tërmeti i 26 nëntorit.

Por në hollin e hotelit, një zonjë që pa kameren, shprehu zemërimin e saj.

“Vuajmë për shtëpi jo për dhurata. Çfarë janë këto, bëjnë lodra për fëmijët, ky është një turp, turp”, theksoi qytetarja.

Pas aktivitetit Zv.ministrja e Brendshme Kuko u pyet nga “ABC News” se ku do të strehohen këta banorë pasi të lënë hotelin.

“Ky është problem që do të kërkojë pak kohë. Banorët do të mund të banojnë ku të duan, bonusi i qerasë është një bonus i konsiderueshëm”, u shpreh Kuko.

Banorët e Thumanës që ndodhen në hotelet e Shëngjinit thonë se nuk do të dalin prej tyre në 3 janar siç ju kërkuan përfaqësuesit e Bashkisë së Krujës. Ata nuk firmosën as dokumetat për marrjen e bonusit të strehimit nga Bashkia të cilin e quajnë të pamjaftueshëm.

“Jemi 349 vetë nga Thumana, nuk dalim nga hoteli pa një vendim Bashkie”, shprehen banorët.

Këta banorë thonë se gjetja e një shtëpie me qira është e vështirë për sa kohë që çmimet janë rritur dhe vlera e bonusit nuk përputhet.

“Kemi kërkuar, por ka një rritje të çmimeve”, shprehen banorët.

Pjesa më e madhe e këtyre banorëve që prej më shumë se një muaj janë vendosur në hotelet e Shëngjinit janë nga Thumana. Ata kanë jetuar tek pallatet që u shembën totalisht ose pranë tyre./abcnews.al

53edc4d1-2a65-42e8-a9a3-179ed158529f-1280x720.jpg
in a18:07 | 30/12/2019

Banorët e Thumanës që i mbijetuan tërmetit dhe ndodhen në hotelet e Shëngjinit kanë dalë me një vendim. Ata nuk do të lënë hotelet siç ju kërkuan përfaqësuesit e Bashkisë së Krujës në 3 janar. Kujtojmë këtu se ditën e shtunë ata nuk firmosën as dokumetet për marrjen e bonusit të strehimit dhe kërkojnë që Bashkia të jetë më e përgjegjshme në vendimet që merr. Gazetari i “ABC News”, Gjergj Figuri bisedoi me disa prej tyre të cilët u shprehën se do të largohen vetëm nëse shteti përdor dhunë. Ata sqarojnë se janë interesuar për banesa me qira dhe bonusi i caktuar nuk përputhet me vlerën e tregut.

“Jemi 349 vetë nga Thumana, nuk dalim nga hoteli pa një vendim Bashkie”, shprehen banorët.

“Vetëm nëse na nxjerr policia me shkopa gome do dalim”, thotë një tjetër.

Për “Abc News” banorët e Thumanës sqarojnë se gjetja e një shtëpie me qira është e vështirë për sa kohë që çmimet janë rritur dhe vlera e bonusit nuk përputhet.

“Pronarët e dinë se ka rënë tërmeti, por i kanë rritur çmimet”, thonë ata.

Pjesa më e madhe e këtyre banorëve që prej më shumë se një muaj janë vendosur në hotelet e Shëngjinit janë nga Thumana. Ata kanë jetuar tek pallatet që u shëmbën totalisht ose pranë tyre. Disa madje kanë lidhje gjaku dhe me viktimat dhe janë ende të tronditur. Tani duhet të përballen dhe me dalje në rrugë, pasi vendimin e qeverisë për marrjen e bonusit e kanë kundërshtuar./abcnews.al

sot-2.jpg
in a13:20 | 30/12/2019

Festa e ndërrimit të viteve do të përjetohet ndryshe në familjet e prekura nga tërmeti. “ABC News” ishte në Manzë në familjen e Xhemal Tolës, i cili ngeli në qiell të hapur pas tërmetit të 26 nëntorit, por pavarësisht kësaj rikthehet çdo ditë në shtëpinë e tij ku rrit gjelat që do t’i dhurojë për tryezën e fëmijëve të tij.

Nata e ndërrimit të viteve do të vijë e trishtë dhe ashtu siç nuk e kishin imagjinuar për të gjithë familjet që nga tërmeti i 26 nëntorit humbën njerëzit e tyre të dashur apo banesat ku kishin investuar gjithë jetën. Xhemali është 78 vjeç dhe jeton në Manzë. Pas 26 nëntorit, shtëpia e tij u shpall e pabanueshme. E pavarësisht kësaj, ai ka gjetur arsyen për t’u rikthyer çdo ditë në atë godinë. Gjelat e detit që kishte nisur të rriste prej 6 muajsh, vijon t’i rrisë për të kaluar festat e fundvitit me fëmijët e tij.

“I kam për fëmijët gjelat”,shprehet ai.

Kur sheh muret e dëmtuara rëndë, kujton sakrificat që iu deshën për ta ndërtuar atë shtëpi dhe pamundësinë që do të ketë për ta rikthyer në gjendjen e mëparshme.

“Ça të bëj me 100 mijë lekë pension”

Shpresat i ka te zoti ndërkohë që sytë i ka drejtuar vetëm tek qeveria.

“Shpresa te zoti”, thotë ai ndër të tjera.

Këtë fund dhjetori, këto gjela janë e vetmja arsye që e sjell Xhemalin në shtëpinë e tij, ndërkohë që pas 26 nëntorit u zhvendos në shtëpinë e djalit të tij ndërkohë që vetëdijen për situatën e vështirë e ka për çdo familje që këtë fundvit do ta kalojnë në çadër.

Në natën e ndërrimit të viteve thotë se gotën do ta ngrejë me urimin që zoti mos i vërë më kurrë në të tilla sprova si ajo e një muaji më parë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono