takime

takimi-presidenca-1280x853.jpeg
nev ila08:54 | 19/11/2019

Kreu i Shtetit, Ilir Meta pret sot në orën 09:00 në një takim në Presidencë, krerët e partive opozitare, që janë jashtë parlamentit. Siç shihet edhe në foto, mësohet se disa prej tyre kanë mbërritur tashmë në Presidencë.

Takimi vjen pak ditë pasi Presidenti Ilir Meta u bëri ftesë publike dhe kërkoi të takohet me të gjithë kryetarët e Partive, për të diskutuar lidhur me situatën ku ndodhet vendi.

Në fakt ky është takimi i parë që presidenti Meta merr pas krizës që ndodhi në zgjedhjet vendore të 30 qershorit. Meta edhe atëherë tentoi dhe zhvilloi takime me përfaqësuesit e opozitës.

Meta do të zhvillojë sot takime me Këshillin e Ambasadorëve, ish-Ministra të Jashtëm dhe përfaqësues të lartë diplomatik. Më pas Meta do të ketë edhe takime me ish-presidentët e Republikës.

Meta ka deklaruar se do të konsultohet me të gjithë faktorët dhe aktorët politikë, për të marrë vendime të forta. Gjithashtu Presidenti, do të zhvillojë takim edhe me ish-ministrat e drejtësisë, me sa duket për të diskutuar lidhur me Gjykatën Kushtetuese.

Mbetet për tu parë se çfarë vendimesh do të marrë Kreu i Shtetit pas takimeve dhe konsultave me ta./abcnews.al

takim-fed-1280x877.jpg
Vladimir Prenga14:48 | 25/10/2019

Procesi i Licencimit për sezonin 2020-2021 ka nisur. FSHF, sipas planit të bërë që në takimin që presidenti Armand Duka bëri me presidentët e klubeve, ka nisur takimet me drejtuesit e klubeve, të Superiores dhe të Kategorisë së Parë. Veç takimeve, më pas do të ketë edhe trajneri dhe seminare që do të organizohen nga qeveria e futbollit shqiptar. Klubet janë vënë në dijeni për rëndësinë e tyre.

Që prej ditës së martë, 29 tetor, do të ketë trajneri në lidhje me marketingun, që është një hallkë e rëndësishme dhe shikohet si elementi kryesor për të gjeneruar të ardhura për klubet e futbollit. Synimi është ndërtimi i një strukture financiare që do të garantojë qëndrueshmëri afatgjatë. Në të do trajtohen elementë të tillë si e drejta televizive dhe shitja e tyre, sponsorizimet dhe specifikat përkatëse, si dhe shitja e biletave.

Duke pasur parasysh edhe paketën e re ligjore që pritet të miratohet, ky trajnim merr një rëndësi të madhe. Gazmend Malo, Drejtor i Marketingut, dhe Andi Verçani, Drejtor i PR, do ta kryesojnë këtë trajnim të përfaqësuesve të klubeve.

Në këtë seminar janë të ftuar Përgjegjësit e marketingut të çdo klubi, oficerët e Mediave dhe Manaxherët e Përgjithshëm të klubeve të Kategorisë Superiore, Kategorisë së Parë dhe Akademive kryesore të futbollit në vend.

Trajneri tjetër është në lidhje me akademitë dhe do të bëhet nga Drejtori Teknik i Departamentit të Futbollit në FSHF, Dzemal Mustedanagic. Më 1 nëntor ai do të zhvillojë një takim më të gjithë Drejtuesit Teknik te Klubeve dhe akademive. Në këtë takim do të jepen informacione mbi organizimin e akademive, strutkturat që duhen dhe gjithçka tjetër.

Cikli i trajnimeve do të vijojë me anën sportive, duke u fokusuar në mënyrën e stërvitjes së ekipeve të moshave. Sektori i Edukimit në FSHF do të organizojë 3 trajnime të ndryshme në ambientet e Qendrës Sportive Kamzë. Sipas grupmoshave, trajnimet për grupmoshën U7-U11 do të zhvillohen në datën 4 nëntor 2019, për U12-U13 në datë 18 nëntor dhe për U14-U19 në datën 25 nëntor.

Në të ardhmen do të ketë trajnime në lidhje me Mjekësinë Sportive, Marrëdhëniet Publike, Ekspertizën Ligjore dhe Ekspertizën Financiare. Të gjitha realizohen me qëllim që klubet të jenë gati në momentin e Licencimit. /abcnews.al

kuvendi-i-republikes.jpg
ad min15:07 | 26/09/2019

Kuvendi nuk u mblodh sot në seancë plenare dhe një javë në muaj do të jetë pushim, kjo pasi rregullorja ka ndryshuar, dhe i detyron deputetët që javën e katërt të çdo muaji ta kalojnë në zonë, me banorët që përfaqësojnë. Të hënën do të zhvillohet një seancë parlamentare e posaçme për të diskutuar mbi problemet e zgjedhësve. 

Kjo e enjten e gjen oborrin e parlamentit pa makinat luksoze apo parakalimet përpara kamerave të deputetëve. Nuk ka seancë plenare. Kështu do të jetë në fakt një prej të enjteve të çdo muaji. Rregullorja e Kuvendit ka ndryshuar dhe java e katërt e çdo muaji nuk do të ketë as seancë parlamentare e as komisione, por ligjvënësit duhet të zhvillojnë gjithë javën takime me banorët e zonave që përfaqësojnë.

Në përfundim të kësaj jave të gjelbër siç e quajnë deputetët, menjëherë të hënën pasdite do të zhvillohet një seancë e posaçme parlamentare. Në të deputetët do të diskutojnë për 4 orë, mbi problemet që kanë evidentuar gjatë takimeve me zgjedhësit.

Të hënën e ardhshme do të zhvillohet një seancë e tillë në orën 5 pasdite, dhe meqë kjo javë e parë dedikuar zgjedhësve përkoi me tërmetet dhe përmbytjet, këto çështje do të jenë tema kryesore e debatit si nga mazhoranca edhe nga opozita e re./ABC News Albania 24/7

MAQEDONI-TAKIMI-MBULIM_ABC-M4-T2.mpg_snapshot_00.01-1280x720.jpg
ent ela23:01 | 10/09/2019

Partitë politike në Maqedoninë e Veriut janë mbledhur që prej orës 20.00 të mbrëmjes, në një tryezë të përbashkët, për të diskutuar mbi ligjin për Prokurorinë Speciale. Në tryezë janë të pranishëm edhe krerët e partive më të mëdha, Zoran Zaev nga LSDM dhe Hristijan Mickoski nga VMRO-DPMNE. Takimi po zhvillohet me dyer të mbyllura, pa praninë e asnjë prej partive shqiptare. Ligji për Prokurorinë Speciale, diskutimet mbi të cilin përkojnë me publikimin e skandalit “Zhvatja”, është jetik për marrjen e dritës jeshile për hapjen e negociatave të anëtarësimit me BE-në në tetor. Më herët gjatë së martës, partitë politike shqiptare reaguan lidhur me takimin, duke shprehur indinjatën për përjashtimin e tyre. Aleanca Shqiptare dhe Lëvizja BESA kërkun angazhimin e profesionistëve nga Bashkimi Europian ose Shtetet e Bashkuara për zbardhjen e proceseve hetimore në vend. /ABC News Albania 24/7

 

komisioni-i-venecias.jpg
ad min09:30 | 10/09/2019

Komisioni i Venecias ndodhet në Tiranë që prej ditës së djeshme pas kërkesës së Komisionit Hetimor për të dhënë opinionin e saj në lidhje me shkarkimin e Presidentit të Republikës, Ilir Meta.

Mëngjesin e kësaj të marte, delegacioni i “Venecias” zhvilloi një takim me dy përfaqësues të opozitës joparlamentare, respektivisht Oerd Bylykbashin për PD-në dhe Klajda Gjoshan për LSI-në. Ish-deputetët patën një prononcim të shkurtër për mediat në përfundim të takimit.

Ata thanë se kanë sqaruar pozicionin e tyre, që sicc e quajtën ata për tentativën në lidhje me shkarkimin e Presidentit. Gjithashtu, Bylykbashi dhe Gjosha i kanë thënë komisionerëve të “Venecias” që Presidenti nuk e shkeli ligjin dhe se ai mund të shkarkohet vetëm nga Gjykata Kushtetuese.

“Komisioni i Venecias ka ardhur këtu me ftesë të Kuvendit për të dhënë një opinion në lidhje me procedurën e turpshme për shkarkimin e Presidentit të Republikës që Parlamenti ka nisur. Ne ua bëmë të qartë se kjo është një përpjekje e qeverisë që, në mungesë të Gjykatës Kushtetuese, në themelet e një krize kaq të madhe, Parlamenti përpiqet që të tërheqë Komisionin e Venecias dhe Këshillit të Europës në lojën e tij të turpshme për të kapur të gjitha pushtetet, përfshirë Presidentin e Republikës. Kushtetuta është e qartë. Presidenti i Republikës shkarkohet vetëm nga Gjykata Kushtetuese, nëse ka shkelur rëndë Kushtetutën. Presidenti i Republikës është përpjekur të garantojë zgjedhje të lira dhe të ndershme, unitetin e popullit dhe pluralizmin politik në Shqipëri dhe kjo është një nga detyrat fisnike që ka luajtur në këtë rast Presidenti i Republikës. Presidenti i Republikës u dha garancinë zgjedhësve shqiptarë që zgjedhjet të bëheshin në një moment të dytë, në kushte më të mira. Parlamenti përpiqet që të shkarkojë Presidentin dhe në këtë lojë të turpshme përpiqet të bëjë palë institucionet ndërkombëtare, të cilat janë shumë të qarta në lidhje me këtë”, tha Bylykbashi.

“Sot diskutuam për një çështje që është e paprecedentë, aq më tepër për një vend që kërkon të çelë negociatat, për një vend që dëshiron të jetë anëtar i BE-së dhe në momentet kyçe, kur të gjitha palët sidomos qeveria do duhej të përqendrohej në plotësimin e kushteve për të marrë çeljen e negociatave në tetor ne merremi me një çështje që është jashtëzakonisht e rëndë edhe për imazhin e vendit. Aq më tepër të ftosh institucionet ndërkombëtare për të zgjidhur një çështje që në fakt për mua është për të mbuluar gjithçka që sot shkon keq me qeverisjen shqiptare”, tha Gjosha.

Ndërkohë, delegacioni është duke zhvilluar një takim në këto momente me një grup deputetësh të Partisë Socialiste. Më vonë ata do të takohen me deputetët e opozitës parlamentare. Gjithashtu një takim është planifikuar me kryetarin e Kuvendit, Gramoz Ruçi.

Pas tij, komisionerët do të takohen me Presidentin e Republikës, Ilir Meta, i cili po hetohen nga komisioni parlamentar nëse ka shkelur ligjin apo jo me shfuqizimin e dekretit të 30 Qershorit.

Pas drekës, do të jetë ministri i Brendshëm, Sandër Lleshaj që do të presë delegacioni, ndërsa më vonë ata do të shkojnë në kryeministri për t’u takuar me kryetarin e qeverisë, Edi Rama.

Gjatë së martës është rezervuar gjithashtu takim edhe me anëtarët e KQZ-së si edhe me anëtaren e vetme të Gjykatës Kushtetuese, Vitore Tusha. Delegacioni i Komisionit të Venecias do ta përfundojë punën e saj nesër pas takimit me anëtarët e Komisionit Hetimor Parlamentar dhe shoqërisë civile.

Në Tetor pritet përgjigja e Komisionit Hetimor nëse Meta e shkeli ose jo Kushtetutën kur firmosi anulimin e datës së zgjedhjeve në 30 Qershor./abcnews.al

BASHA-PPE-MBULIM-ABCM5T1.mpg_snapshot_00.10-1280x720.jpg
ent ela20:00 | 09/09/2019

Kryetari i Partisë Demokratike Lulzim Basha po merr pjesë në Asamblenë Politike të Partisë Popullore Europiane, që po zhvillon punimet në Bruksel.

Në ditën e parë të punimeve të Asamblesë, Basha u takua me përfaqësues të partive Popullore, drejtues të politikës së jashtme dhe të zgjerimit në Parlamentin dhe Komisionin Europian, si dhe ne Parlamentet e vendeve anëtare.

Sic njofton zyra e shtypit te PD, kryedemokrati ka kërkuar mbështetjen e tyre për hapjen e negociatave për Shqipërinë si një aspiratë e shqiptarëve, por edhe si garanci për të ndërtuar në Shqipëri një shtet demokratik, me pushtete të ndara, ku të garantohet vota e lirë.

“Shqipëria sot ka një krizë të thellë politike, institucionale dhe ekonomike. Zgjidhja janë zgjedhjet e lira dhe të ndershme, të mbikqyrura nga një qeveri tranzitore- theksoi Basha.

Punimet e Asambelesë Politike të PPE-së do të vazhdojnë dhe gjatë ditës së nesërme, ku në axhendën e diskutimit, do të jenë sfidat me të cilat përballet Evropa aktualisht dhe përgatitjet për Kongresin e PPE-së, i cili këtë vit mbahet në Zagreb. /ABC News Albania 24/7

ldk-dhe-vv.jpg
ad min17:00 | 29/08/2019

Një ditë para përfundimit të afatit të regjistrimit të koalicioneve parazgjedhore në Kosovë, Lidhja Demokratike e Kosovës dhe Lëvizja Vetëvendosje kanë shpeshtuar takimet në kërkim të një marrëveshjeje të mundshme.

Kur ka mbetur vetëm edhe një  ditë për t’u regjistruar në KQZ partitë politike dhe koalicionet parazgjedhore për zgjedhjet e 6 Tetorit, Lidhja Demokratike e Kosovës dhe Lëvizje Vetëvendosje kanë intensifikuar takimet për një marrëveshje për koalicion parazgjedhor. Sot janë takuar sërish krerët e këtyre dy partive politike Isa Mustafa e Albin Kurti në një nga restorantet e Prishtinës.

Ndërkohë Partia Demokratike e Kosovës vazhdon të jetë e mbyllur për media sa i përket koalicioneve parazgjedhore, deri më tash vetëm kanë paralajmëruar se do të ketë befasi edhe nga kjo parti.

Shikuar nga praktikat e mëhershme partitë politike gjithmonë e lënë ditën e fundit për të treguar për marrëveshjet e koalicioneve parazgjedhore, duke shikuar veprimet e njëra tjetrës paraprakisht.

Ndërsa koalicioni i OJQ-ve për vëzhgimin e zgjedhjeve Demokracia në Veprim u ka bërë thirrje partive politike që të respektohet barazia gjinore në lista zgjedhore. Zgjedhjet e parakohshme mbahen me 6 Tetor pas dorëheqjes së Ramush Haradinajt nga posti i kryeministrit./ABC News Albania 24/7

edi-rama-ne-lezhe.jpg
ad min15:17 | 27/08/2019

Kryeministri Edi Rama ka mbledhur në Lezhë drejtuesit e qarqeve veriore të Partisë Socialiste. Burime për ABC Neës bëjnë me dije se është diskutuar ristrukturimi i bashkive që deri dje drejtoheshin nga Partia Demokratike ku ka nënvizuar edhe një herë kërkesën për të mos larguar asnjë nëpunës të kualifikuar edhe pse ndajnë bindje politike të ndryshme.

Kreu i qeverisë ka kërkuar që një prej nënkryetarëve të bashkive të jenë gra dhe zgjedhja e tyre të nisë pa humbur kohë. Nuk dihet ende se çfarë do të vendosë shefi i mazhorancës me vendin vakant që ka krijuar dorëheqja e Valdrin Pjetrit nga posti i kryebashkiakut të Shkodrës. Nesër paradite kryeministri do të zhvillojë një mbledhje me ministrat ndërsa pasdite me anëtarët e kryesisë së Partisë Socialiste./ABC News Albania 24/7

veliaj-4-1280x724.jpg
ad min19:50 | 07/06/2019

Kreu i Bashkisë së Tiranës, Erion Veliaj i cili kërkon të fitoje një mandat të dytë zhvilloi takim me banorët e njësisë Nr. 6 në kryeqytet dhe prezantoi kandidatët e PS për Këshillin Bashkiak. Veliaj bëri një rezyme të projekteve që kanë transformuar zonën e kësaj njësie gjatë këtij mandati, që sipas tij ishte lënë jashtë në harresë.

Sipas Veliajt, në 4 vitet e ardhshme në njësinë nr. 6 do të vihen në zbatim projekte mjaft të rëndësishme siç është zona ekonomike mes Kombinatit dhe Kasharit që do iu vijë në ndihmë kompanive të huaja

Gjatë takimit me qytetarët në Kombinat, Veliaj tha se transformimi i Tiranës do të vijojë pavarësisht dallimeve nëse votohet nga socialistët apo demokratët./ABC News Albania 24/7

presheve-1280x728.jpg
ad min22:15 | 05/06/2019

Një grup deputetësh nga Kosova, gjatë një takimi me banorë të Luginës së Preshevës, kanë deklaruar se mbështesin referendumin për bashkim. Gjithashtu, ata kanë premtuar ndihma për banorët, të cilat deri më sot kanë qenë të pakta e të pamundura.

Tri komisione të Kuvendit të Kosovës kanë vizituar Luginën e Preshevës dhe kanë takuar përfaqësuesit politik të shqiptarëve nga Medvegja, Bujanoci e Presheva. Deputetet nga Prishtina kanë premtuar ndihmë në arsim, administratë publike, qeverisje lokale dhe në kujdesin për ta. Gazetarët shqiptarë të këtushëm i ka interesuar çfarë konkretisht dhe a do të bëhet bashkimi me Kosovën.

Përfaqësuesit shqiptarë që i kanë pritur në Këshillin Kombëtarë të Shqiptarëve dhe në Komunën e Bujanocit kanë falënderuar delegacionin dhe kanë kërkuar që Kosova, por edhe Shqipëria të mos i harrojnë.

Ndihmat kanë qenë të vogla dhe pak të mundshme deri më tani. Së fundmi qeveria shqiptare ka premtuar mbështetje. Deputetët e Kosovës që arritën këtu u kanë premtuar se kërkesat e tyre do ti delegojnë në Kuvend dhe do të lobojnë në qeveri që të bëhen të aprovuara zyrtarisht./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono