takim

libohova.jpg
G. P.19:20 | 17/01/2019

Klubet shqiptare do të kërkojnë takim me pushtetin vendor për të nisur mbrojtjen e interesave të tyre. Të organizuar në ligën e futbollit, ata do të përqëndrohen tek infrastruktura dhe ligji për sponsorizimet.

Ende nuk janë gati, por kanë vendosur të veprojnë. Klubet e Superligës shqiptare do të kërkojnë një takim me titullarët e pushtetit vendor, për të nisur mbrojtjen e interesave të tyre. Presidentët, pas takimit themelues në Federatën Shqiptare të Futbollit, kanë vendosur të këmbëngulin në dy pika, së pari infrastruktura, dhe së dyti, ligji për sponsorizimet.

Burime pranë Ligës bëjnë me dijë se, presidenti i ri i saj, Edvin Libohova, ka në plan që të kërkojë nga kryetarët e bashkive që të mos lejojnë tjetërsimin e fushave të futbollit. Dëmtimi i deritanishëm nuk duhet të vazhdojë, gjykojnë presidentët e klubeve, të cilët kanë kuptuar se pa një infrastrukturë të mjaftueshme, nuk mund të bëjnë biznes me futbollin.

Takimi do të kërkohet të zhvillohet përpara zgjedhjeve vendore, besohet në muajin mars ose prill, në mënyrë që vëmendja e bashkive të mos jetë e fokusuar ende në fushatën elektorale. Më pas, në Ligë do të diskutohet edhe ligji për sponsorizimet.

Aktualisht, ky ligj në Shqipëri u jep lehtësi bizneseve që shpenzojnë për futbollin, deri në masën 3 apo 5 për qind zbritje nga tatimet mbi fitimin. Në Kosovë, ligji është shumë më inkurajues për sponsorizimin e sportit, pasi u jep të drejtën bizneseve që të zbresin deri në 30 për qind të tatimit mbi fitimin.

Besohet se ky është një nga shkaqet kryesorë, që në klubet shqiptare korrektesa në pagesa është shumë më e vogël sesa në klubet e Kosovës./abcnews.al

hahn.png
G. P.13:20 | 17/01/2019

Pas vizitës në Kosovë  komisioneri për zgjerimin Johanes Hahn ka programuar të takohet me kryeministrin Edi Rama në Tiranë. Konfirmimin e bën ambasadori i BE në Shqipëri Luigi Soreca.

“Ky takim vjen në një moment kur është me rëndësi të madhe vijimi me vendosmëri i ecurisë së reformave, të cilat janë të nevojshme për të ecur përpara drejt rrugës së Bashkimit Europian”, thuhet në një njoftim për shtyp të Komisionit Europian.

Në rrjetet sociale ambasadori Soreca shkruan se ky takim zhvillohet për të vlerësuar së bashku ecurinë e përpjekjeve të vazhdueshme për reforma, të cilat duhet të ndiqen me vendosmëri në muajt e ardhshëm./abcnews.al

takimi.jpg
G. P.20:54 | 09/01/2019

Angela Merkel nis nesër një vizitë dy ditore në Athinë, ku do të takohet me presidentin e vendit dhe kryeministrin Tsipras. Mediat greke raportojnë se një nga temat kryesore të bisedimeve do të jetë dhe marrëveshja e arritur mes Athinës dhe Shkupit.

Kancelarja gjermane, Angela Merkel mbërrin të enjten në Athinë, në vizitën e parë të saj në kryeqytetin helen që nga pranvera e 2014-s, në prag të zgjedhjeve për në Parlamentin Europian. Atëherë, kryeministri i sotëm, Aleksis Tsipras, ishte kundërshtari më i vendosur i Merkel dhe ministrit të atëhershëm të Financave, Volfgang Schauble, të cilët i identifikonte me masat shtrënguese që sipas tij Berlini i impononte Greqisë, në betejën për daljen nga kriza.  Në një nga tubimet elektorale, Tsipras kishte thënë frazën që mbeti e paharruar, sidomos për kundërshtarët e tij.

“Kthehu mbrapa, zonja Merkel! Kthehu mbrapa zoti Schauble!… Greqia nuk është kavie për eksperimente…”.

Por pas ardhjes në pushtet, Tsipras gradualisht u shndërrua në një partner të rëndësishëm e të besueshëm për kancelaren gjermane. Në këtë transformim luajti padyshim rol pragmatizmi i kryeministrit majtist radikal, që zbatoi me përpikmëri programin e tretë të shpëtimit, me masa shumë të ashpra. Por po aq i rëndësishëm ishte vendimi i Merkel që t’u hapë dyert refugjatëve sirianë, gjë që shkaktoi zemërimin e populistëve të djathtë në Gjermani. Në betejën e kancelares për mbijetesë politike, Tsipras u dëshmua një aleat plot kredibilitet, duke pranuar marrëveshjen me Turqinë në Maj të 2016-s dhe duke mbështetur iniciativat e Merkel për një zgjidhje europiane në krizën e refugjatëve. Tsipras është pritur disa herë në Berlin, me nderime të mëdha.

E njëjta pritje mendohet se do t’i rezervohet tashmë edhe zonjës Merkel në Athinë. Një pritje që parashikohet të jetë krejt e ndryshme nga sa në vizitat e mëparshme. Atëherë kur prania e kancelares gjermane në kryeqytetin helen i vinte zjarrin zemërimit mbarëpopullor. Angela Merkel mbërrin në Athinë pasditen e të enjtes, kur do të takohet me kryeministrin Tsipras. Të premten, kancelarja gjermane do të pritet nga presidenti i Republikës, Prokopis Pavlopulos dhe pastaj do të takohet me kryetarin e demokracisë së re të opozitës, Kyriakos Mitsotakis.

Burime diplomatike në Athinë thanë se kancelarja Merkel vjen me një synim të dyfishtë. Së pari për të përcjellë një mesazh vlerësimi ndaj përpjekjeve të Greqisë pas finalizimit të programit të shpëtimit. Dhe së dyti, t’i ofrojë mbështetje kryeministrit Aleksis Tsipras, në prag të procedurës parlamentare për votimin e marrëveshjes së Prespës edhe në parlamentin grek. Të njëjtat burime shtuan se jo më kot Merkel vjen në Athinë 24 orë pasi në parlamentin maqedonas fillon faza përfundimtare për miratimin e ndryshimeve kushtetuese./abcnews.al

donald-trump-3.jpg
G. P.23:01 | 26/12/2018

Presidenti Donald Trump ka bërë vizitën e parë në një zonë lufte që nga marrja e detyrës. Nga Bagdadi, ku u takua me trupat amerikane, Trump ka mbrojtur vendimin e tij për tërheqjen e trupave nga Siria.

Presidenti Donald Trump ka nisur të mërkurën një vizitë surprizë në Irak, ku fillimisht është takuar me trupat amerikane, ndërsa në axhendë ka edhe takime me zyrtarët vendas. Bëhet fjalë për vizitën e tij të parë në një zonë lufte në 2 vjet detyrë, pak ditë pasi njoftoi tërheqjen e trupave nga Siria dhe Afganistani.

Trump ishte kritikuar ashpër nga krerët e ushtrisë amerikane për faktin se nuk kishte vizituar kurrë trupat në zonat e konflikteve që nga marrja e detyrës në Janar 2017. Pa harruar këtu anulimin që ai i bëri vizitës në memorialin e Luftës së Parë Botërore muajin e kaluar në Francë, për shkak të shiut. Avioni presidencial “Air Force One” u ul të mërkurën në bazën ajrore “Al Asad”, në perëndim të Bagdadit.

Pas tkurrjes së ndjeshme të valës së dhunës që erdhi pas goditjeve të njëpasnjëshme të Shtetit Islamik vitin e kaluar, aktualisht trupat amerikane janë të angazhuara në stërvitjen e ushtrisë vendase. Mediat amerikane e kanë komentuar vizitën si një përpjekje të presidentit për të fituar simpati, pas kritikave që vërshuan në adresë të tij pas vendimeve për të tërhequr të gjitha trupat nga Siria dhe gjysmën e atyre të pozicionuara në Afganistan.

Por nga Bagdadi, Trump mbrojti vendimin e tij sa i takon Sirisë, duke ritheksuar se pas mposhtjes së Shtetit Islamik misioni amerikan nuk është më i nevojshëm. Një përgjigje e thatë kjo drejtuar kritikëve të tij, që paralajmërojnë se fitorja ndaj terrorizmit është ende larg dhe se tërheqja do të çojë në braktisjen e aleatëve. Në rrugën e kthimit nga Iraku, presidenti do të ndalojë për të vizituar edhe trupat amerikane në bazën ajrore Ramshtajn, në Gjermani./abcnews.al

wo24-erdogan.jpg
G. P.19:49 | 25/12/2018

Pas vendimit të presidentit amerikan Donald Tramp për tërheqjen e trupave ushtarake nga Siria, një delegacion amerikan do të udhëtojë në Turqi këtë javë për koordinimin e tërheqjes nga Siria. Ky vendim i Trump në lidhje me Sirinë, i dha një tjetër frymë raporteve të tensionuara së fundi mes Uashingtonit dhe Ankarasë.

Presidenti turk Erdoan ftoi homologun e tij amerikan Donald Trump që të vizitojë Turqinë në vitin 2019, ndërsa Ankara dhe Uashingtoni forcojnë marrëdhënien mes tyre për të koordinuar tërheqjen e parashikuar të trupave amerikane ushtarake nga Siria. Lajmi është konfirmuar nga Shtëpia e Bardhë. Ndërkohë presidenti amerikan në një mesazh në profilin e tij në Tuiter bën të ditur se aktualisht është përqendruar në krijimin e ekipit të punës për Korenë e Veriut. Kreu i Shtëpisë së Bardhë shkruan se janë shënuar progrese në pritje të takimit të rradhës me Kim Jong Un.
Edhe pse nuk është përcaktuar ende diçka zyrtarisht, Tramp është më se i gatshëm për një takim të tillë në të ardhmen, konfirmoi zëdhënësi i ekzekutivit amerikan. Ndërkohë një delegacion amerikan do të udhëtojë në Turqi këtë javë për koordinimin e tërheqjes nga Siria.

Të dielën pas një bisede telefonike mes Tramp e Erdogan, presidenca turke konfirmoi se dy liderët kanë pranuar të koordinojnë ushtarët, diplomatët dhe liderë të tjerë të vendeve të tyre për të shmangur një boshllëk pushteti që mund të shfrytëzojë largimin e SHBA nga vendi si dhe fazën e tranzicionit në Siri.
Turqia dërgoi të hënën përforcime të reja ushtarake në kufi me Sirinë./abcnews.al

MBULIM-LLESHAJ-ME-KOSOVARIN.mpg_snapshot_00.06-1280x720.jpg
G. P.15:14 | 22/12/2018

Ministri i Brendshëm Sandër Lleshaj u takua me homologun e Ekrem Mustafa, ku në fokus ishte forcimi i kontrollit të kufijve dhe lehtësimin e lëvizjes së lirë të qytetarëve në dy shtetet përkatëse. Takimi mes dy ministrave të Brendshëm pason mbledhjen e përbashkët të dy qeverive, mbajtur në Pejë disa javë më parë.

“Delegacionet diskutuan gjithashtu mbi thellimin e bashkëpunimit policor dhe koordinimin e përpjekjeve të përbashkëta në proceset e integrimit evropian, në të dy vendet”, thuhet në njoftimin e shpërndarë në media nga ministria e Brendshme./abcnews.al

PUTIN-UKRAINA-1280x720.jpg
G. P.11:38 | 22/12/2018

Në një deklaratë për shtyp presidenti i Serbisë ALeksandër Vuçiç konfirmoi lajmin se presidenti rus Vladimir Putin do të vizitojë vendin në 17 janar. Vuçiç premtoi se do të fliste hapur dhe për gjithçka me të.

Presidenti serb ALeksandër Vuçiç deklaroi se homologu i tij rus Putin do të vizitojë vendin në 17 janar të vitit të ardhshëm. Kreu i shtetti serb theksoi se do të bisedojë për gjithçka me liderin e Kremlinit, përfshirë këtu dhe letrën e dërguar nga presidenti amerikan Donald Tramp për sa i përket dialogut me Kosovën.

Duke iu përgjigjur gazetarëve nëse Moska kishte reaguar negativisht ndaj kësaj letre, Vuçiç u shpreh se deri tani nuk kishte asnjë informacion dhe se po priste të takohej me Putin. Presidenti serb premtoi se do të fliste shumë hapur me të ashtu si kishte bërë gjithnjë.

Ai tha se gjithsesi letra e Trump ishte racionale duke pasur parasysh se Shtetet e Bashkuara të Amerikës e kanë njohur Kosovën si shtet. Por sipas tij lajmi i mirë ishte se roli i Beogradit është i qartë, ndërsa Prishtinës i është kërkuar të negociojë me Beogradin./abcnews.al

MBULIM-LLESHAJ-PER-KIBERNETIKEN-ABC-M3-T1.mp4_snapshot_00.08-1280x720.jpg
G. P.14:59 | 21/12/2018

Ministri i Brendshëm Sandër Lleshaj zhvilloi një mbledhje me Prefektët, Kryetarët e Bashkive dhe drejtuesit e lartë të Policisë së Shtetit, ku në fokus të takimit ishin çështjet që lidhen me përgatitjet e procesit zgjedhor për qershorin 2019. Lleshaj kërkoi nga njësitë vendore; afishimin në vende të dukshme të listave zgjedhore, zgjedhja në kohë e ambienteve për qendra votimi, për të shmangur në maksimum ambientet private, përditësim të Adresarit; shtimi i zyrave të Gjendjes Civile përgjatë 2019, vit kur duhen rinovuar rreth 1.4 milionë karta identiteti, të cilave u skadon vlefshmëria. Ministri u kërkoi kryetarëve të bashkive, të tregojnë kujdes të shtuar, për të shmangur lëvizjet dhe regjistrimet fiktive të shtetasve, para periudhës elektorale duke theksuar se do të ketë kontrolle dhe do të merren masa për shkeljet./abcnews.al

MOGERINI-TAKSA-1280x720.jpg
G. P.09:44 | 19/12/2018

Në Bruksel mbahet takimi i organizuar nga përfaqësuesja e lartë për sigurinë dhe politikat e jashtme në Bashkimin Europian Federica Mogherini. Në këtë takim do të jenë të ftuar tre presidentë dhe tre kryeministra të vendeve të Ballkanit Perëndimor. Nga Kosova, Mogherini ka ftuar presidentin Hashim Thaçi, nga Serbia Aleksandër Vuçic, nga Mali i Zi Milo Gjukanoviç, kurse nga Shqipëria, Maqedonia e Bosnja, kryeministrat e tri vendeve. Deri tani vetëm kryeministri shqiptar, Edi Rama, nuk ka konfirmuar pjesëmarrjen për shkak të protestave të studentëve në Shqipëri./abcnews.al

studente-te-ekonomikut.jpg
G. P.19:45 | 17/12/2018

E kërkonin që prej të shtunës, por e hëna ishte dita e përballjes. Në mjediset e qendrës “Liria” në qytetin Studenti, studentët e Fakultetit Ekonomik i paraqitën ankesat e tyre dekanit të këtij fakulteti, Dhori Kule.

Studentët i kërkojnë dekanit Kule transparencën financiare, për të cilën, ai është shprehur i gatshëm të publikohet që nesër. Ndërsa studentët e ekselencës ankohen se nuk marrin bursat.

“Në qoftë se pyesim kolegët tanë në universitetin e Durrësit studentët ekselentë me mesatare 9 deri në 10 marrin bursë vit për vit, ndërkohë që në fakultetin tonë kriteri është që studenti të ketë notën 10 maksimale dhe nuk pranohet as me një 9 as me dy 9 as me tre 9”, tha një studente.

“Nuk mund të bëjë një fakultet ndryshe nga fakultetet e tjera sepse rregulli është i miratuar nga bordi në përputhje me ligjin”, u shpreh Kule.

Disa nga studentët kërkuan dorëheqjen e dekanit Dhori Kule, si përgjegjes të keqmenaxhimit dhe abuzimit, sipas tyre, në këtë fakultet. Studentët kërkojnë gjithashtu që dekani të shprehet nëse i mbështet apo jo kërkesat e paraqitura prej tyre në protestë. Por Kule është shprehur se dekanati mbështet vetem kërkesat që ka në dorë për të plotësuar, jo të gjitha.

“Për problemin e tarifave që kërkohet të përgjysmohet, nuk janë kompetencë as e dekanit, as e rektorit”, tha Kule.

Takimi i dekanit Kule me studentët vjen pak ditë pas kritikave të Kryeministrit Edi Rama për rektorët dhe dekanët e Universiteteve, në një takim me ta. Kreu i qeverisë paralajmëroi edhe rishikimin e autonomisë së universiteteve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono