Tabaku

INTERVISTE-JORIDA-TABAKU.mpg_snapshot_00.33-1280x720.jpg
ent ela15:20 | 05/10/2019

Partia Demokratike ngre alarmin se në ekonominë shqiptare po qarkullojnë jashtë bankave sasi të mëdha të parave të drogës. Duke iu referuar një raporti të fundit të Bankës së Shqipërisë, ish-deputetja Jorida Tabaku në një intervistë për ABC News deklaron se paratë e ardhura nga rrugë kriminale po çojnë drejt falimentit biznese të ndershme. 

Jashtë bankave të Shqipërisë qarkullojnë 2.3 miliardë euro. Sipas Bankës së Shqipërisë 22.2% e gjithë parasë në vend, qarkullon jashtë sistemit bankar në formën e parasë cash. Për Partinë Demokratike kjo shifër alarmante është tregues se para të pista kryesisht të ardhura nga trafiku i lëndëve narkotike po qarkullojnë me shpejtësi në ekonominë shqiptare.

Shifra e 288 miliardësh lekësh që qarkullon në ekonomi është më e larta që nga viti 2009, kohë kur kishte një valë tërheqje depozitash për shkak të panikut që u krijua nga kriza globale financiare. Për ish-nënkryetaren e Komisionit të Ekonomisë kjo është një këmbanë alarmi për daljen e bizneseve të ndershme jashtë ekonomisë.

Demokratët shohin një kontrast të fortë mes boomit të lartë të ndërtimeve dhe parasë së madhe që qarkullon jashtë sistemit. Dhe këtu sërish dyshimi i çon tek burimi i palighshëm nga i cili vijnë këto para.

Ministria e Financave ka hartuar ligjin e ri “Për faturën dhe sistemin e monitorimit të qarkullimit”, i njohur ndryshe edhe si “Fiskalizimi”, që synon që të gjitha transaksionet midis bizneseve dhe konsumatorit do të raportohen tek Administrata Tatimore në kohë reale. /ABC News Albania 24/7

 

tabaku-1280x727.jpg
ent ela12:19 | 04/10/2019

Ish deputetja demokrate Jorida Tabaku ka reaguar pas miratimit të qeverisë së kryeministrit Rama të disa ligjeve për për pronat. Në një deklaratë nga selia blu Tabaku shprehet se PD ka denoncuar këto ligje. Sipas saj për këto ligje edhe Komisioni i Venecias ndan të njëjtin opinion.

“I mungon qartësia, saktësia dhe ka mungesë proceduriale dhe afatet papërcaktuara qartë. Qeveria ka marrë kompetenca që nuk i takojnë duke ndarë pronën private e publike. PD e ka njohur Komisionin e Venecias me plan të ri për njohjen e pronave. Ka shkelur kushtetutën ka marrë kompetenca që nuk i takojnë.

PD do pezullojë ligjet që mohojnë të drejtën e pronës dhe një grup paketash ligjore që qeveria ka marrë muajt  fundit”.

Deklaratë e Partisë Demokratike, Jorida Tabaku

Që nga viti 2013 Qeveria e Edi Ramës ka miratuar disa ligje për pronën, të cilat kanë një qëllim të vetëm: zaptimin e pronës private dhe publike dhe tranferimin e saj tek disa klientë të Edi Ramës.

Çdo ligj për pronën i kësaj qeverie është kundër pronarëve dhe në shkelje të të drejtave të njeriut.

Në këtë përfundim ka dalë edhe Komisioni i Venezias, i cili ndan të njëjtin opinion si opozita, Presidenti dhe shoqatat e pronarëve se qeveria shqiptare, me të padrejtë, u heq mundësinë e kompensimit fizik pronarëve, duke i përdorur këto toka për interesat grabitqarë të disa oligarkëve, pa u dhënë pronarëve të vërtetë mundësinë e gëzimit të pronës.

Komisioni i Venecias ka dalë në përfundimin se edhe ligji i ri për “Tokën”, është në kundërshti me të drejtat e njeriut dhe nuk merr parasysh të drejtat e sanksionuara në konventat ndërkombëtare të njeriut.

Ashtu si çdo ligj tjetër që kanë hartuar për pronën, gjithë paketës ligjore i mungon qartësia, – thotë Venecia,- i mungon saktësia dhe, ç’është më e rëndëisshme, ka një fuqi shumë të gjerë rregulluese të Këshillit të Ministrave, ka mungesë të hapave procedurialë dhe afate të caktuara qartë.

Me këtë paragraf Komisioni Venecias përmbledh shumë qartë çdo gjë që ka bërë qeveria për pronën: ka shkelur kushtetutën, ka zaptuar pronën private dhe publike, ka marrë kompetenca që nuk i takojnë, duke ndarë prona private dhe publike me Korporatën e investimeve.

Me vetëdijen se gjatë qeverisjes sonë nuk I dhamë zgjidhje çështjes së pronës, Partia Demokratike e ka njohur Komisionin e Venezias me një plan të ri të opozitës për të zgjidhur problemin e pronave.

Partia Demokratike në qeveri do të pezullojë të gjitha ligjet anti-kushtetuese, që mohojnë të drejtën e pronës si Ligji Investimeve Strategjike, Ligji për Kompensimin e Pronës të vitit 2015, Ligjin e Kadastrës dhe ligjet e tjera në lidhje me pronën.

Partia Demokratike në qeveri do të krijojë një bazë të dhënash me të gjitha pronat publike që sot jepen për 1 euro, por në vend që t’u jepen pronarëve, shfrytëzohen nga oligarkët.

Me besimin se pa gëzuar pronën, nuk mund të gezojmë liri të vërtetë, Partia Demokratike do të bëjë të mundur që të drejtën e pronës ta gëzojnë pronarët e vërtetë, jo miqtë dhe klientët e kryeministrit, siç po ndodh me qeverinë e Edi Ramës.

Këto janë bazat mbi të cilat Partia Demokratike do të miratojë një paketë të plotë ligjore që respekton pronarët dhe trajton me drejtësi çështjet e pronave, kthimin apo kompensimin fizik të tyre. /abcnews.al

TABAKU-BYLYKBASHI-PER-VENECIAN.mpg_snapshot_00.24-1280x720.jpg
ent ela13:00 | 19/09/2019

Me bllokimin e sistemit të drejtësisë, pronarët nuk kanë mundësi të ankohen në Gjykatë Kushtetuese kundër padrejtësive të ligjeve antikushtetuese. Këtë qëndrim i dhanë përfaqësuesit e Partisë Demokratike Komisionit të Venecias të cilët kanë ardhur në Shqipëri për të bërë një analizë dhe për të dhënë një opinion mbi situatën e çështjeve të pronave në Shqipëri.

Kanë marrë përsipër t’i shpjegojnë Komisionit të Venecias në detaje çfarë ka ndodhur që nga viti 2013 e këtej me çështjen e pronave në Shqipëri.

Jorida Tabaku dhe Oerd Bylykbashi këmbëngulin se shkelja e të drejtave të pronarëve nga njëra anë, dhe hartimi i ligjeve që  krijojnë norma të paprecedentë për vende të tjera të rajonit kanë një përgjegjes.

Tabaku: “Njohëm delegacionin e Komisionit të Venecias me problemin e pronave në Shqipëri, i cili është një nga kriteret për hapjen e negociatave.  Çështja e pronave ka pasur përkeqësim gjatë qeverisjes së Edi Ramës me miratimin e ligjeve antikushtetuese që bien ndesh me të drejtat e pronarëve”.

Bylykbashi: “Gjithashtu patëm mundësinë që me ekspertët e Komisionit të Venecias të shpjegojmë edhe themelin e gjithë këtij mekanizmi djallëzor që ka futur Edi Rama në raport me të drejtën e pronarëve për të marrë përsëri pronën e tyre. Kemi vite tashmë që e dimë që qeveria nuk kthen më prona, nuk kompenson dhe ka vënë një mekanizëm me të cilën ka rishpronësuar përsëri pronarët”.

I gjithë ky proces që bllokoi kthimin e pronave dhe vë në pikëpyetje titujt ekzistues të pronave, sipas demokratëve, ka një qëllim të vetëm që nëpërmjet këtyre mekanizmave; të Koorporatës Shtetërore të Investimeve, ligjit për Investime Strategjike ta marrë këtë pronë dhe t’ia japë oligarkëve për të zhvilluar ata interesat e tyre të biznesit sikur kjo të jetë interes publikë.

Bylykbashi: “Interesi publik është respektimi i Kushtetutës dhe të drejtave që pronarët shqiptarë kanë dhe u bëmë të qartë që fikja dhe eleminimi i Gjykatës Kushtetuese dhe bllokimi tashmë i sistemit të drejtësisë për të vënë në vend të drejtat e pronarëve qoftë për sa i përket aspektit kushtetues apo të drejtave të tyre ligjore është i qëllimshëm në kuadër të këtij mekanizmi, që pronarët të mos kenë mundësi të ankohen në Gjykatë Kushtetuese dhe në gjykatë kundër padrejtësive të ligjit”.

Dy ish deputetët demokratë thanë se i bënë të qartë Komisionit të Venecias që kur Partia Demokratike të kthehet në pushtet  këto ligje që shkojnë në dëm të pronarëve sipas tyre do të zhbëhen duke pretenduar se do të rikthejnë të drejtat e tyre duke përmirësuar të gjitha defektet që kanë çuar në zvarritjen e rëndë dhe duke eliminuar korrupsionin  në kthimin e pronave. /ABC News Albania 24/7

5b02a462-4484-402c-a3b7-d97840ea7e82-1280x853.jpg
ent ela13:50 | 13/07/2019

Me kryeministrin Edi Rama Shqipëria është e para për korrupsion, e fundit për mirëqenien e qytetarëve. Kështu ka deklaruar ish deputetja e Partisë Demokratike Jorida Tabaku duke iu refuar raporteve që ka publikuar Departamenti Amerikan i Shtetit, Fondi Monetar Ndërkombëtar dhe Bashkimi Evropian.

Deklaratë e Partisë Demokratike, Jorida Tabaku

Shqipëria ka qeverinë më të korruptuar të Ballkanit;

Vuan nga varfëria e shtuar dhe papunësia e rritur,

Ekonomia lëngon sepse vendi nuk është aspak tërheqës për investimet e huaja!

Ky është konkluzioni i 3 raporteve të njëpasnjëshme këto ditë nga Departamenti i Shtetit,

Nga FMN dhe nga BE lidhur me krizën që po kalon vendi.

Shqipëria është vendi më i korruptuar në Ballkanin Perëndimor, sipas raportit të Klimës së Investimeve për vitin 2019 publikuar nga Departamenti i Shtetit.

Qeveria është kthyer në një gjobëvënës të madh karshi sipërmarrësve të huaj.

Qeveria është pengesë kryesore për ekonominë cka nis që me vendosjen e gjobave anti-ligjore e deri tek votimi i ligjeve dhe rregulloreve të “vështira për t’u interpretuar dhe jo konsistente, si mjete për të mënjanuar investitorët e huaj dhe për të favorizuar kompanitë e lidhura me politikën,” konstaton Departamenti i Shtetit në raport.

Vendi lëngon në thatësirën ekonomike dhe të investimeve të huaja, shqiptarët vazhdojnë të vuajnë nga varfëria dhe papunësia është rritur.

Raporti i Departamentit Amerikan të Shtetit përshkruan arsyet se përse ekonomia shqiptare është e izoluar dhe pa investitorë të huaj.

Raporti vlerëson se shkaqet janë korrupsioni, presioni politik për kontraktorët, ndryshimi i shpeshtë dhe i pakonsultuar i ligjeve, kalimi i ligjeve klienteliste.

Bizneset e huaja pohojnë se qeveria ndërhyn tek ato për ti detyruar që të ndërmarrin nënkontraktor të caktuar të lidhur me qeverinë.

Raporti citon problemet me të cilat përballet Shqipëria me projektet PPP që e janë të pastudiuara dhe të pakonsultuara.

Një tjetër çështje e rëndësishme është edhe e drejta e pronës, raporti vlerëson se pronarët nuk marrin pronat e tyre të tjetërsuara nga regjimi komunist.

Është rasti i vetëm në botë ku shumë prej investorëve amerikanë janë larguar nga Shqipëria si pasojë e këtyre problemeve jetike.

Raporti i FMN evidenton problemin kyç të ekonomisë sonë gjatë qeverisjes Rama, mungesën totale të një plani dhe vizioni ekonomik.

Të dhënat e paraqitura nga FMN tregojnë se gjatë intervalit 2015-2019 mosha e re ka rënë me 0,6% ndërsa mosha e tretë është rritur me 12%. Kjo vjen si pasojë e rritjes së numrit të shqiptarëve që largohen nga Shqipëria.

Një vend që plaket, që varfërohet nga të rinjtë, që nuk ka një vizion ekonomik dhe që zhytet më thellë në gropën e korrupsionit ka prodhuar një ekonomi të dobët pa mundësi reale punësimi dhe mirëqenie. Prej 6 vitesh me radhë, të vetmet investime të huaja janë ato të tashëguara nga qeverisja demokratike.

Situata ekonomike e vendit është edhe më tragjike në krahasim me vendet e rajonit. Në raportin e fundit të Bashkimit Europian, rezulton se ne kemi rritjen ekonomike më të ulët në Ballkan. Edhe kjo vetēm falë shiut dhe eksportit të energjisë, pra pa krijuar vende të reja pune.

Shqipëria po zbrazet nga të rinjtë, sipërmarrja nuk gjen terren dhe liri për të lëvizur, vendi është drobitur nga korrupsioni dhe grabitjet e oligarkëve me qeverinë Rama. Konkurrenca e ndershme dhe tregu i lirë janë zhdukur.

Për Partinë Demokratike sfida jonë e parë për ekonominë e lirë dhe konkurencën e ndershme është lufta kundër monopolove, kundër oligarkisë dhe klientelizmit, kundër kapjes së ekonomisë.

Beteja jonë kundër oligarkisë, duke anulluar ligjet me emër oligarku miratuar nga qeveria Rama dhe hetuar dhe anulluar çdo kontratë korruptive PPP-je, do të jenë masat e para që Partia Demokratike do të ndërmarrë që në ditët e para të qeverisjes.

Programi pro punësim dhe pro-biznes i PD parashikon vendosjen e taksës së sheshtë prej 9%, rregullimin i politikave fiskale në favor të një plani pro-biznes që do t’i japë frymëmarrjen e nevojshme ekonomisë sonë.

Ne do të angazhohemi në uljen e burokracisë dhe lehtësimit të procedurave sipërmarrëse. Në betejën për të siguruar punësim me paga dinjitoze ne do të luftojmë për të qenë sa më mikpritës ndaj investitorëve të huaj, duke ofruar garanci më të mëdha në fushën e taksave, sigurisë ekonomike, investimeve në infrastrukturë dhe trajnimin e forcës punëtore. Partia Demokratike do të luftojë për cdo investitor të huaj e për cdo vend të ri pune!

Sot ka vetëm një përgjegjës për korrupsionin, kriminalitetin, vjedhjen e zgjedhjeve, rënien ekonomike dhe mbylljen e bizneseve. Ai është Edi Rama!

Shqipëria sot është një vend pa ligj, pa rregulla, pa drejtësi. Në Shqipëri mbretëron një njeri i vetëm. Të gjitha pushtetet i ka Edi Rama. Ai kontrollon pasuritë dhe paratë e shqiptarëve.

Në Shqipëri nuk udhëheq interesi i njerëzve, por sundon vullneti i Edi Ramës.

Ne, nuk do të bëjmë asnjë hap pas për të luftuar tiraninë dhe autokracinë. Ne nuk do të bëjmë asnjë hap pas për të rikthyer tregun e lirë dhe iniciativën e lirë në duart e shqiptarëve.

Nuk do të bëjmë asnjë hap pas deri në largimin e Edi Ramës!

82a3e639-028b-46d7-8e5b-df06b6981d8e-1280x853.jpg
ad min14:30 | 28/06/2019

Jorida Tabaku në një deklaratë pë media tha se “Punonjësit e administratës dhe të kompanive shtetërore po shantazhohen në mënyrë kriminale dhe antidemokratike për të marrë pjesë në votimet moniste të 30 Qershorit”.

DEKLARATA E JORIDA TABAKUT

Edi Rama edhe kur është i vetëm në votime, nuk mund të rrijë pa i manipuluar ato, megjithëse kontrollon gjithçka vetë – kontrollon Komisionin Qendror të Zgjedhjeve, listat e zgjedhësve, komisionet zonale, qendrat e votimit, numërimin e votave, madje edhe vëzhguesit.

Një nga mjetet e manipulimit është presioni ndaj administratës publike për të marrë pjesë forcërisht në votime. Një presion i njëjtë me atë që shqiptarët dëgjuan që ishte ushtruar në votimet e pjesshme të Dibrës e në çdo palë zgjedhje që ka organizuar kjo qeveri.

Punonjësit e administratës dhe të kompanive shtetërore po shantazhohen në mënyrë kriminale dhe antidemokratike për të marrë pjesë në votimet moniste të 30 qershorit.

Mesazhe zanore, urdhra verbale, formularë detyrues që shkelin të drejtat kushtetuese të u janë dhënë njerëzve të administratës, duke i paralajmëruar që mosdalja në votime të dielën, do të shoqërohet të hënën me largim nga puna.

Është e njëjta gjë bënte Pjerin Ndreu në zgjedhjet e Dibrës, i dalë në përgjimet e gazetës gjermane Bild.

Skema kriminale e detyrimit të paraqitjes me dhunë është e tillë që detyron këta individë që të marrin me vete të paktën 5 persona të tjerë në votime. Emrat e tyre janë në formularët e shpërndarë punonjësve në çdo bashki të vendit të kontrolluar nga Partia Socialiste, në çdo ministri dhe institucion varësie prej tyre, madje e kanë shtrirë edhe në bizneset private, që kontrollojnë nëpërmjet tenderave korruptivë.

Të kërcënosh një nënë, një baba me vendin e punës është njësoj si t’I kërcënosh ata se do t;u heqësh bukën e fëmijëve. Është njësoj si t’i kesh kërcënuar me jetën e tyre.

Përdorimi i burimeve shtetërore dhe presioni i administatrës janë evidentuar si problemet kyç në zgjedhjet e shkuara të organizuara nga Edi Rama dhe OSBE/ODIHR, i përfshiu ato si prioritetin numër tre, të rekomandimeve në zgjehdjet e 2017-ës, pas blerjes së votës.

Partia Demokratike beson fuqimisht se faktet e presionit kriminal ndaj administratës do të zënë vend sërish në raportin e misionit vëzhgues të OSBE/ODIHR.

Të nderuar qytetarë,
Demokracia është shpresë se nesër guximi ynë për të refuzuar shantazhin kriminal që po ushtrohet sot ndaj familjarëve, do të krijojë një Shqipëri më të mirë.

Guxoni, refuzoni, denonconi çdo rast të tillë.

PD dhe Opozita janë të vendosur për ta refuzuar këtë farsë elektorale. Te gjithë së bashku duhet te bëjmë gjithçka per te garantuar shqiptareve zgjedhje te lira dhe te ndershme.

Një proces që vjen vetëm pasi armiku i tyre, armiku I demokracisë të jetë larguar me turp.

Sot është e sigurt se me Edi Ramen nuk ka zgjedhje te lira dhe te ndershme, nuk ka hapje negociatash.

Demokracia është guxim për t’i thënë jo të keqes dhe diktaturës. Dhe shqiptarët do ta bëjnë këtë dielën!/abcnews.al

Tabaku-1-1280x696.jpg
ad min14:40 | 07/05/2019

Ish-nënkryetarja demokrate e Komisionit të Ekonomisë ka akuzuar qeverinë se po shkatërron ekonominë e veendit. Në një deklaratë nga selia blu, duke iu referuar konluzioneve të një dite më parë të FMN, Jordia Tabaku tha se borxhi i lartë i vendit vjen për shkak politikave të gabuara të qeverisë, të cilat i ka denoncuar që herët Partia Demokratike.

Në deklaratën e thirrur për media, ish-nënkryetarja e Komisionit të Ekonomisë Jorida Tabaku, gjetjet e Fondit Monetar Ndërkombëtar i sheh si shqetësime të artikuluara prej kohësh nga forca politike ku bën pjesë.

“Rritja e borxhit publik, ulja selektive e taksave për bizneset e disa oligarkëve dhe PPP-të korruptive kanë dobësuar ekonominë, duke ndikuar për keq në çdo familje që nuk është në biznes me qeverinë”.

Shqetësimet për rritjen ekonomike, borxhin publik dhe detyrimet e prapambetura, janë vetëm një pjesë e gjendjes kritike sipas demokratëve.

“Këtë konfirmoi edhe FMN-ja, e cila parashikon këtë vit rënie të ekonomisë për shkak të thatësirës. Borxhi i lartë publik është një faktor në dobësimin e ekonomisë dhe po ndiqet me shqetësim si nga Fondi, ashtu edhe nga opozita. Me një borxh ekonomik në kufijtë e 70% të PBB-së, FMN i tërheq vëmendjen qeverisë se ka shteruar pothuajse çdo mundësi tjetër për të marrë borxh. Pavarësisht se qeveria ka gënjyer, e ka fshehur dhe nuk e ka raportuar këtë të dhënë, FMN e tha qartë se detyrimi prej 300 milionë euro është pjesë e borxhit të rritur publik”. 

Rimbursimi i TVSH-së, politikat fiskale favorizuese ndaj një grupi njerëzish dhe koncesionet dhe PP-të kanë krijuar një rrezik të vazhdueshëm në buxhetin e shtetit, thekson Tabaku.

“Investimet në infrastrukturë, që hapin vende pune dhe nxisin ekonominë, vazhdojnë të pakësohen çdo vit, sepse qeveria paguan 1.7 miliard euro ose 13% të Prodhimit të Brendshëm Bruto për faturat e PP-vë që kanë shkuar tek një grusht oligarkësh të lidhur me qeverinë e Edi Ramës”. 

Klientelist e quan Tabaku edhe ligjin e ri për Koorporatën e Investimeve, i cili e kthen kryeministrin në pronar de facto të pasurive publike.

“Diagnoza që FMN ka për ekonominë shqiptare është se ajo vuan nga sëmundja e rrezikshme: është një ekonomi që pasuron një grusht njerëzish pranë pushtetit, që punon për pakicën dhe jo për shumicën”.

Zgjidhja për këtë vjen përmes alternativës së partisë demokratike – deklaron Tabaku – që promovon konkurencën e lirë, mundësitë e barabarta për të gjithë dhe taksa të ulëta./ABC News Albania 24/7

jorida-1280x702.jpg
ent ela19:36 | 02/05/2019

Ish depueteja demokrate Jorida Tabaku ka folur në studion e Mbrëmje në ABC News Mirela Milorit lidhur me protestën e sotme të opozitës.  Sot ajo bllokuar 12 akse rrugore kryesore në vend, nga 6 akse që u bllokuan një javë më parë, ndërsa pritet rritje edhe javës që vjen. Tabaku theksoi se ka pasur pjesëmarrje të jashtëzakonshme jo vetëm nga njerëz partiakë, por edhe nga qytetarë. Dhe kjo sipas saj është arritje.

“U mendua që të kishte një përshkallëzim, rritje të pikave të autostradave dhe nga një orë në dy orë dhe javës tjetër do jetë 3 orë. I kalon caqet e protestës së militantëve ka qytetarë, familjarë që janë bashkuar, ka pasur pjesëmarrje të jashtëzakonshme që vjen si rezultat i punës me struktuart e partisë, por edhe bashkimit të qytetarëve pa lidhje partiake dhe kjo është një arritje”.

Qëllimi i protestës sipas saj është për të treguar që Shqipëria është në krizë dhe ka një këmbanë alarmi që duhet dëgjuar. Sipas saj rritja e presionit do jetë sinjal për qeverinë dhe do të sjellë rezultate të shpejta.

“Unë i mirëkuptoj të gjithë ata që nuk janë dakord me këtë formë proteste, por në këtë protestë kombëtare të gjithë janë bashkuar, ka pasur rritje dhe kjo ka rëndësi që në protestën kombëtare të kemi pjesëmarrje dinjitoze. Kjo është formë demokratike proteste dhe tregon që jemi në krizë nuk ka asgjë normale, nuk funksionon parlamenti, institucionet është rritur kapja e drejtësisë. Fronti i parë është fronti i protestave, dhe protesta kombëtare që janë një herë në muaj. Është arritur që është tërhequr vëmendja te Shqiëpria. Ka një këmbanë alarmi që duhet dëgjuar se nuk është dëgjuar deri tani dhe rritja e preisonti do jetë sinjal për qeverinë dhe unë besoj që rezultatet të jenë të shpejta. Nuk po punojmë vetëm për protesta. Sot u prezantua programi për qeverinë tranzitore me paketë  dhe ofertë konkrete, politike, ekonomike e sociale. Po punohet për çdo shqiptar dhe për t’i dhënë një ofertë të plotë.

Nuk ka më normalitet, a ka pasur një seancë normale parlamenti? A ka diskutim. Në 3 muaj unë kam dëgjuar vetëm kush jam unë e kush je ti”.

Milori: Vetëm me protesta apo do keni edhe aksione të tjera, apo do përsërisni veten?

Tabaku: Vendimi që ka marr kolegji i kryetarëve dhe PD do përshkallëzohet dhe në varësi të asaj që ndodh. Unë nuk kam dëgjuar asnjë oponencë për vendim të qevrisë, përkundrazi rritje e arrogancës. Dhe të shohësh atë parlament që nuk prodhon asgjë është bindja më e mirë që ne atje ishim kot dhe ai parament nuk funksionon. Një parlament që miraton 6 ligje me qeveri që nuk funksinon tregon që ka njq ngërç”

Milori: Strategjia deri më 30 qershor?

Tabaku: Strategjia deri më 30 qershor do përshkakllëzohet do ketë forma të ndryshme të mosbindjes civile edhe në ditët në vijim. Nuk do jetë kjo e vetmja formë protesta, për mua ka rëndësi pjesëmarrja. Protesta që kanë zgjatur në kohë kanë patur rënie të numrit, në këtë rast qëndresa është rritur. Jemi në rrugën e duhur se po rritet mbështeja për PD.

Milori: Mosbindja civile do jetë vetëm pasdite?

Tabaku: Paraditja ka qene e forumit rinor dhe çdo ditë që ka seancë dhe i gjithë angazhimi ynë është për protestën e 11 majit. Është krijuar një formë që njerëzit vijnë vetë në protestë. Nuk kemi 100% mbështetje ka edhe njerëz që e mbeshtësin, por e rëndësishme është që janë ndërgjegjësuar dhe kemi arritur në një siuttaë që ka nevojë për ndryshim. /abcnews.al

jorida-tabaku-1280x731.jpg
ad min14:50 | 24/04/2019

Ish-deputetja demokrate Jorida Tabaku përmes një deklarate për media ka akuzuar Kryeministrin Rama se po përgatit vjedhjen e radhës përmes ligjit për “Korporatën e Investimeve Shqiptare” i cili sipas demokratëve jo vetëm grabit me ligj pronën publike dhe e jep atë e pa kontrolluar nga ligji i prokurimeve publike, por njëkohësisht shkon kundër marrëveshjes së stabilizim asocimit./abcnews.al

byro-10-prill-1280x710.jpg
nev ila21:38 | 10/04/2019

A do të hyjë opozita në zgjedhjet vendore?

Ishte kjo pyetja, që u bë nga drejtuesja e emisionit, Juli Xhokaxhi, që ngacmoi 2 përfaqësueset e opozitës mbrëmjen e sotme në “Byro Politike”.

Gjosha dhe Tabaku u përgjigjën se, ka ende kohë që opozita të dalë në një version zyrtar, gjithsesi ato kanë theksuar se PD ka deklaruar se e ka një objektiv që është mbajtja e zgjedhjeve të jashtëzakonshme, pasi asnjë institucion shtetëror nuk funksionon.

“Asnjë institucion nuk funksionon, përveç KLSH dhe Presidentit. Gjithsesi kemi kohë deri në përfundim të afatit, për të dalë në një version zyrtar. Partia Demokratike ka deklaruar se ka një objektiv, janë zgjedhjet qendrore të jashtëzakonshme”, tha Tabaku.

Te njëjtin qëndrim pati edhe Klajda Gjosha në lidhje me pjesëmarrjen në zgjedhjet vendore duke lënë të kuptohet se versioni zyrtar për pjesëmarrjen në to, nuk është marrë ende, nga strukturat e opozitës.

Kujtojmë që, afati përfundimtar ligjor, për të zyrtarizuar pjesëmarrjen në zgjedhjet vendore, është data 21 Prill./abcnews.al

Jonida-tabaku-1280x693.jpg
ent ela10:08 | 09/04/2019

Tek zona e Bregut të Lumit kanë shkuar disa ish-deputetë të Partisë Demokratike, mes tyre edhe Jorida Tabaku. Ajo ka denoncuar dhunën policore ndaj banorëve dhe u ka bërë thirrje qytetarëve të ngrihen e të reagojnë sepse nesër sipas saj do jetë radha e tyre.

“Është e paprecedentë ajo që po ndodh në këtë zonë dhe është e padrejtë nga ana e shtetit ku po dhunohet prona dhe banesa. Është e paprecedentë dhuna shtazarake dhe unë kam ngelur pa fjalë. Zonjat që kanë mbrojtur shtëpitë e tyre sot janë dhunuar dhe janë rrahur. Që në orët e para të mëngjesit fëmijët janë zgjuar nga zhurma e këtyre makinerive dhe nuk janë lejuar që të shkojnë në shkollë. Ka mbi 5 muaj që luftojnë për të drejtën e tyre për pronën e tyre, por sot i tërhoqën zvarrë dhe i nxorën nga shtëpia. Nuk e dimë se çfarë po ndodh me banorët që janë akoma të ngujuar. Këto banorë duhet të trajtohen njësoj si 200 familjet e para të Bulevardit, duan të dëmshpërblehen për pronën e tyre dhe duan të trajtohen njësoj para ligjit. Ata po i kërkojnë qeverisë dhe shtetit që të zbatojë ligjin dhe kushtetutën”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono