superiore

sport-presing-3.jpg
Vladimir Prenga23:45 | 20/01/2020

Ledio Pano, ish-mesfushori i Partizanit, pjesë e klubit të kuq, i ftuar në emisionin “Pressing” në ABC News, ka folur për tema të ndryshme. Nuk lihet mënjanë edh Kukësi i drejtuar nga Shpëtim Duro dhe Pano thotë: “Kukësi nuk ishte i ndërlidhur në fillim kështu, si tani. Lojtarët janë njohur dhe janë ndërthurur.

Gavazaj dhe Abazaj me kalimin e ndeshjeve u futën në grupin e lojtarëve të tjerë. Grupi është cilësor, sulmi është shumë i mirë. Ka kapitenin Musolli, nga më të mirët në kampionat. Prapavija lë pak për të dëshiruar. Vendin e parë s’ke ku e shan. Por kur ke një sulm si Kukësi, prapavija do vuajë”. Më tej ai foli për rivalitetin për titull.

“Katër skuadrat kanë presionin më të madh, me Partizanin në krye. Kukësi ka ekipin më të mirë, sa është i pari. Kemi një Bylis në rritje, që askush nuk e mendonte të dytin. Teuta nuk ka presion, s’ka pasur kurrë. Nuk e ka pasur peshën për të luftuar për titullin. Mjaftohej me Europën, edhe pse luftonte deri në fund”, u shpreh Pano.

Ish-mesfushori analizoi më pas Partizani dhe nuk mungojnë kritikat: “Prisja shumë më tepër nga Partizani, duhet të ishte më kompetitiv dhe më i forcuar nga vjet. Nuk më ka lënë shije të mirë Partizani i gjysmës së parë. Gjithsesi, me ndërrimin e trajnerit, pres të ketë një ndryshim nga të gjitha anët.

Logjikisht, lind pyetja pse nuk jam optimist: Sepse Partizani nuk ka treguar rritje në lojën e saj. Prisja shumë më tepër. Me fitimin e titullit besoja se do shkonte çdo gjë për mirë.  Partizani e kishte stafin që solli titullin, jo spekatkolar, por që kishe qejf ta shihje. Prisja të bëheshin ndërhyrjet e duhura me po atë trajner, jo kaq të mëdha, por cilësorë.

E kam te mentaliteti se si një Partizan duhet të ndërtohet. Pa diskutim që kam spekticizëm. Nuk e kam me Sormanin. Kam parë dy miqësore dhe nuk kam mbetur i kënaqur me lojën. Prisja më shumë, prisja ndryshim. Nuk e pashë. Prapë kampionati këtu është tjetër. Nesër është një test që do të tregojë nëse Partizani është i gatshëm të luftojë me rivalët për titullin”.

“Sormanin e kemi parë para dy vitesh. Nuk ka treguar ndonjë nivel të mirë. Iku për mungesë rezultatesh. Ndaj thashë që nuk jam optimist. Bën stërvitje të shkëlqyer, por mendimin tim nuk e lexon mirë ndeshjen. Duhet ta lexojë që të jetë sa më efikas. Është mendimi im ky dhe nuk e ndryshoj dot”, tha Pano. / abcnews.al

shpetimi-durua.jpg
Veronik Istrefaj23:10 | 20/01/2020

Trajneri i Kukësit, Shpëtim Duro, ka bërë një lidhje direkte me emisionin “Pressing”, aty ku ka folur për shumë tema rreth ekipit të tij.

KAMPIONATI – “Ky kampionat është shumë i ekuilibruar, shumë i paparashikueshëm. Ne jemi në situatë komode në aspektin e kualifikimit, por është gjysma e kampionatit. E mendojmë edhe më të vështirë gjysmën e dytë. Skuadra ka bërë mirë, por ka pasur oshilacione si të gjitha skuadrat e tjera”.

MERKATO – “Normalisht, unë nuk kam qenë ndonjëherë “partizan” i merkatos së janarit, pasi për shumë faktorë, është e kushtëzuar. Një nga faktorët kryesorë që nuk kam ndërhyrë, është se skuadra është e plotë dhe nuk e kam pasur të nevojshme. Doja që të vinte ndonjë futbollist që bën diferencën, ndryshe nuk ia vlen. Janë larguar dy futbollistë, Daku dhe Kitanovski, dhe deri në momentin e fundit, do të shohim për t’i zëvendësuar. Është afruar pas një dëmtimi të gjatë Krasniqi, që rrit konkurrencën në repartin e mbrojtjes”.

KUKËSI – “Nuk mund të them që Kukësi bën diferencën në këtë kampionat. Nuk ma lejon pozicioni, pasi është një garë e gjatë. Duhen respektuar të gjithë kundërshtarët, ka shumë kundërshtarë seriozë, siç janë Partizani, Tirana, por nuk dua të veçoj dhe skuadrat e tjera që po bëjnë shumë mirë, si Bylisi, Teuta apo Laçi. Është meritë e jona që jemi kampionë dimri, kjo është meritë e të gjithë strukturave të klubit, por e thashë se është gjysma e kampionatit dhe do të jetë edhe më e vështirë gjysma e dytë”.

Trajneri i Kukësit, Shpëtim Duro

GRUPI – “Tregues teknikë nuk të japin të drejtë ta bësh këtë pyetje, pasi Kukësi është një skuadër shumë e ekuilibruar. Është në dy skuadrat e para që ka shënuar më shumë gola, dhe është në dy skuadrat më të mira që kanë pësuar më pak gola. Gjysmën e golave e kemi pësuar me penallti. Në treguesit teknikë, jemi shumë mirë në të dy aspektet.

GAVAZAJ & ABAZAJ – “Ka shumë futbollistë si Abazaj dhe Gavazaj, që kanë qenë ardhjet më cilësore të merkatos së verës. Abazaj është aktivizuar në javën e katërt të kampionatit. Një futbollist jashtëzakonisht cilësor, por mungesa e fazës përgatitore kishte ndikimin e vet. Duket qartë se në 5-6 javët e fundit, në saj të profesionalizmit, ka arritur formë shumë të mirë. E njëjta situatë edhe me Gavazajn.

ALTERNATIVAT – “Përveç Shkurtajt, ka qenë nga java 5, 6, 7, që kemi pasur 7 mungesa. Kanë ndikuar në disa rezultate negative këto mungesa. Shkurtaj është ndër më të mirët në Shqipëri, golashënuesi më i mirë. Shpresoj të mos dëmtohet. Ka cilësi shumë të mira dhe e ka dëshmuar. Daku është larguar, djalë i ri, shumë i mirë. Por ai ka ardhur në huazim dhe donte minuta më shumë. Në mungesë të Shkurtajt, kam provuar Abazajn në qendër të sulmit. Unë kam mendimin se e bën shumë mirë edhe atë pozicion. Ndërsa Kitanovski luante në shumë pozicione, por Maliqi është një lojtar cilësor në krahun e djathtë të mbrojtjes”.

STADIUMI – “Nuk doja ta prekja këtë temë, por e dini shumë mirë sa minus i madh është të mos luash në fushën tënde. Kjo është meritë e Kukësit. Unë e mbaj mend që edhe Partizani ka luajtur para ca sezonesh në fushë asnjanëse. Por Partizani ka qenë i shoqëruar nga 700 deri në 1000 tifozë dhe nuk e ka ndjerë mungesën e tifozëve. Ne kur luajmë në Elbasan, nuk e kemi përkrahjen e tifozëve. Dua të komplimentoj çunat dhe skuadrën që kanë bërë maksimumin”.

TITULLI – “Nuk është fundi edhe po dolëm në vend të katërt. Është futboll, është garë, duhet respektuar garë. Çdo president i ekipeve kryesore futet për të fituar titullin. Kukësi ka luftuar për të dyja trofetë në sezonet e fundit. Unë e kam pasur të qartë që në fillim, duhen trofe te Kukësi. Kam bërë punën time profesionale bashkë me stafin tim, bashkë me futbollistët. Kemi pasur marrëdhënie të mira me drejtuesit e klubit, kur kemi pasur probleme, kam ditur t’i menaxhoj mirë. Të shohim në të ardhmen. Nuk kam asnjë lloj presioni, futbolli i tillë është”.

RIVALËT – “Partizani apo Tirana? Nuk dua të bëj diferencime. Patjetër që klasifikimi nuk ma lejon të bëj diferencime. Duhet respektuar Partizani si skuadër kampione në fuqi dhe të gjitha skuadrat që kanë të drejtën të luftojnë për titullin kampion. Nuk ia heqim dot të drejtën as Bylisit, as Tiranës, as Laçit”.

LUFTËTARI – “E përshëndes zotin Artur dhe besoj do të takohemi pasnesër në ndeshje. Absolutisht që nuk ka asnjë lloj nënvlerësimi, përkundrazi, skuadra është karikuar që në Antalya. Është një ndeshje shumë e rëndësishme për ne dhe duhet respektuar në maksimum Luftëtarin. Të mos harrojmë që para ca javësh, fituam edhe me Skënderbeun. Pavarësisht pozicionit, Skënderbeu ka futbollistë shumë cilësorë. Ndeshjen me Luftëtarin e vlerësojmë në maksimum”./abcnews.al

canaj-1.png
Vladimir Prenga23:00 | 20/01/2020

Agim Canaj dhe Ledio Pano janë dy nga të ftuarit në emisionin “Pressing” në ABC News. Ata folën për konkurrencën në kampionat dhe u ndalën më pas te skuadra e Flamurtarit. “Mendoj që konkurrenca do jetë e njëjtë. Lëvizjet kanë qenë të pakta. Gjysma e ekipeve kanë ndryshuar trajnerët dhe mënyra e të luajturit. Sigurisht edhe aftësia e trajnerëve. Shpresoj të ketë ndonjë goditje në këtë javë. Skuadrat kanë nevojë për ndonjë prurje cilësore”, tha fillimisht Canaj.

Më pas foli edhe për klubin e Flamurtarit: “Unë jam vlonjat dhe më vjen keq. E cekëm që është një emër i madh, por krenohet vetëm me të shkuarën. Është menaxhuar nga bashkia dhe i është afruar titullit me Shpëtim Gjikën. Kalimi te privati tregoi tjetër gjë. Jam dakord që e ka nisur i dështuar Flamurtari. Duhet buxhet dhe trajner dhe shumë elementë të një skuadër futbolli.

Nuk mendoj se po tallen. Isha atje dhe fola me futbollistë. Ka indiferentizëm total. Kjo është më e keqja. Zërat janë shuar, besimi ka rënë. Deri para pak muajsh besohej se do ndryshonte gjendja, por jo. Marrëdhënia mes kryetarit të Bashkisë dhe administratorit është zero, nuk duan para. Është e vështirë që Flamurtari të bëjë një skuadër për të shpëtuar”.

PANO – Ledio Pano, në lidhje me garën tha: “Ndryshe nga herët e tjera, kur fitonte Skënderbeu apo Partizani vjet, sivjet janë pesë ekipe që po rivalizojnë me njëri-tjetrin”. Më pas ai shprehu keqardhjen e tij për gjendjen e Flamurtarit. “Mënyra më e keqe që mund të bjerë Flamurtari është kjo. E turpshme. Flamurtari i madh na ka bërë krenar. I gjithë ai qytet me atë histori futbolli nuk ngrihet dhe të gjejë pse është kjo gjendje dhe si mund të rregullohet. Mua më vjen keq për atë klub”, tha Pano. /abcnews.al

Luftetari-Tirana-Superiore.jpg
Vladimir Prenga22:46 | 20/01/2020

Artur Dada, zëvendëspresident i Luftëtarit dhe drejtor sportiv i bluzinjve, i ftuar në emisionin “Pressing” në ABC News, është i bindur se gjirokastritët do të qëndrojnë mes 10 skuadrave të mira në vendin tonë.

“Luftëtari edhe sezonet e tjera ka qenë e shkëputur pas dy fazave të para, por ka treguar se di ta marrë veten në fazën e tretë dhe të katërt. Nuk jemi të dorëzuar. Jemi të bindur që do të qëndrojmë në Superiore”, u shpreh Dada fillimisht në emision.

Luftëtari renditet në vendin e parafundit në klasifikim dhe Skënderbeu ka dhjetë pikë më shumë. Një diferencë e madhe me korçarët, por në Gjirokastër besojnë. /abcnews.al

jonuz.jpg
Veronik Istrefaj21:40 | 20/01/2020

Trajneri i Vllaznisë, Mirsad Jonuz, ka folur për mediet para ndeshjes kundër Flamurtarit. Numri një i stoli shkodran preku shumë tema në lidhje me këtë ndeshje dhe me ekipin e tij.

LËVIZJET – “Stërvitjet në Ohër ishin shumë të rëndësishme për ne, zhvilluam tri ndeshje, kemi larguar disa futbollistë dhe kanë ardhur tre të tjerë. Adili e Jonuz janë në formën e duhur, ndërsa Sidorenco vazhdon të punojë dhe pas 10-15 ditësh do të jetë aty ku duhet. Jam i kënaqur me pjesën tjetër të ekipit. Po punojmë fort për ndeshjen me Flamurtarin, që është shumë e rëndësishme për ne”.

AFRIME – “Me ndryshimet e ndodhura në skuadër, gjendja është më e mirë, por kam folur me drejtorin teknik e administratorin dhe po shohim mundësinë për të marrë edhe një apo dy lojtarë të tjerë, prandaj do të presim deri në fund të janarit kur mbyllet merkato. Megjithatë, kjo tani është edhe në varësi të asaj që mund të gjejmë në këto momente.

MERKATO – “Nuk mund të themi që merkato është e mbyllur. Ne po kërkojmë sërish, që të bëjmë edhe një apo dy afrime të tjera”.

KALENDARI – “Tri ndeshjet e para që luajmë në shtëpi, janë shumë të rëndësishme për ne dhe do të tentojmë t’i kalojmë me sukses. Megjithatë, vëmendja kryesore është e përqendruar te sfida me Flamurtarin, që duhet ta fitojmë patjetër. Ne jemi të bindur për të arritur te një gjë e tillë dhe për ta mbyllur mirë xhiron e dytë të sezonit”.

FORCA E SUPERIORES – “Po, shumë e fortë. Me përjashtim të dy ekipeve, që patën edhe probleme për sa i përket mos-bërjes së merkatos dhe për këtë e thashë që duhet ta fillojmë mbarë me Flamurtarin. Me shortin që kemi në këtë start të këtij viti mund të kemi mundësi të mira për të qenë në luftë për një vend në Kupat e Europës”./abcnews.al

Bylis.jpg
Veronik Istrefaj16:39 | 20/01/2020

Skuadra e Bylisit ka zyrtarizuar pak çaste më parë afrimin e dy futbollistëve të huaj. Ekipi ballshiot ka zyrtarizuar firmat me Visente de Paula Mercedez dhe Marselo Gonzales. Braziliani luan si mbrojtës i djathtë dhe është 23 vjeç, ndërsa Marselo Gonzales ka pasur eksperiencë të mëparshme në Shqipëri, ku ka luajtur me skuadrën e Orikut.

Zyrtarizimi i Bylisit:

“Presidenca bën zyrtare dy afrimet e para!

Braziliani me eksperiencë në dy sezonet e fundit, në Superligën ukrainase, Visente de Paula Mercedes, pjesë e Lviv në Ukrainë prej një sezoni e gjysmë. Luan si mbrojtës i linjës së djathtë, 23 vjeç.

Argjentinasi Marselo Gonzales, që ka qenë pjesë e skuadrës së Orikut, dhe një nga lojtarët më të spikatur, është afrimi i dytë në merkato. Një lojtar me perspektivë që ka bindur trajnerin Dovedan por edhe projektin e klubit. Merkato vazhdon…”/abcnews.al

Flamurtari.jpg
Vladimir Prenga12:06 | 20/01/2020

Flamurtari, edhe pse i është bllokuar merkato, vijon të punojë për të përforcuar skuadrën. Në klubin vlonjat janë të bindur që do e heqin bllokimin e bërë nga FIFA dhe diçka të tillë e kanë njoftuar prej ditësh.

Sinan Idrizi, në deklaratën e dhënë për emisionin “Zona Gol” në Supersport u shpreh se do sjellë dy lojtarë që kanë luajtur me Milanin. ABC News mëson se njëri është Taye Taiwo. Mbrojtësi 34-vjecar ka luajtur së fundmi në Finlandë me Rops, ku numëron 59 ndeshje si titullar.

Për 6 vite ka luajtur me Marseille në Ligue 1, ndërkohë që në vitin 2011 iu bashkua Milanit. Gjithashtu ka provuar edhe Premier League me fanellën e QPR. Një lojtar me karrierë të pasur, i cili mësohet nga burime të Abc News se tani ndodhet në Tiranë.

Ekipet e Taiwo

 

Taiwo dhe Ibrahimovic
vllaznia-partizani-1280x720.jpg
Vladimir Prenga09:26 | 20/01/2020

Vllaznia nxjerr në shitje biletat e ndeshjes me Flamurtarin, që zhvillohet nesër prej orës 14:00 në stadiumin “Loro Boriçi”. Klubi shkodran zbulon çmimet e biletave sipas sektorëve, ndërkohë që edhe u bën thirrje tifozëve të jenë në mbeshtetje të ekipit.

“KF Vllaznia bën të ditur se duke nisur nga sot në ora 10.00 do të fillojë shitja e biletave për ndeshjen e kampionatit, atë me Flamurtarin që luhet të martën në orën 14.00 në stadiumin “Loro Boriçi”.

Oraret e hapjes së sporteleve janë si më poshtë: E hënë 10:00- 14:00, 16.30- 19.00; E martë, 10:00 deri në përfundimin e ndeshjes.

Ndarja e tribunave në stadiumin “Loro Boriçi”

Ju bëjmë me dije se çmimet e biletave për këtë ndeshje janë si më poshtë: Tribunat C dhe E 200 lekë, Tribuna D 300 lekë, Tribuna A- B 500 lekë, Tribuna VIP 1000 lekë.

KF Vllaznia fton gjithë tifozët e saj të jenë të pranishëm në këtë ndeshje për të mbështetur skuadrën tonë në këtë ndeshje të parë të këtij viti, duke shpresuar që të bëjmë edhe një start të mbarë me fitore”, thuhet në njoftimin e klubit shkodran. /abcnews.al

LUFTETARI-KA-ME-SHUME-BESIM.mpg_snapshot_00.17-1280x720.jpg
Vladimir Prenga09:03 | 20/01/2020

Luftëtari ende nuk ka gjetur një zgjidhje për të shlyer brazilianin Marco Aurelio, të cilit bluzinjtë i detyrohen rreth 60 mijë euro. Nëse nuk shlyhet borxhi, ose nuk arrihet një marrëveshje për ta paguar me këste, atëherë Luftëtari nuk mund të bëjë merkato.

Gjasat janë që të ndodhë kështu dhe kjo kuptohet nga ajo që lojtari ka thënë në të përditshmen sportive, “Panorama Sport”. Braziliani thekson se Luftëtari nuk dëshiron ta paguajë, edhe pse vetë ai ua ka bërë një propozim.

“Për fat të keq, ata nuk duan të më paguajnë. Ata janë borxhlinj ndaj meje dhe vazhdojnë të më japin urdhra. Unë po dal më i keqi në këtë histori. Nuk e di kush është i pari në klub në këtë periudhë.

Nëse ata nuk më paguajnë, unë do t’ua mbyll të gjitha dyert. Unë akoma jam duke u përpjekur që t’i ndihmoj ata me një marrëveshje të re, duke u falur diçka nga shuma që më detyrohen”, tregon Aurelio. /abcnews.al

Idrizi-Rama-Flamurtari.jpg
Veronik Istrefaj23:54 | 19/01/2020

Administratori i Flamurtarit, Sinan Idrizi, ka folur sot për Supersport, ku ka prekur disa tema rreth klubit të tij. Më shumë, Idrizi ndaloi te Ligji i Sportit, si dhe i bëri thirrje Edvin Libohovës që të bëjë të hapur takimin për të diskutuar rreth paketës. Gjithashtu, administratori i Flamurtarit foli edhe për merkaton, ku tha se dy lojtarë nga Milani janë duke ardhur.

“Falimenti, të paktën sa jam unë, nuk është pikë zgjidhje. Dikush më pyeti a mos është më mirë nëse shpallim falimentin. Absolutisht jo! Flamurtari nuk do të shpallë falimentin. Për ligjin e sportit, jam i sigurt që tani është i pakthyeshëm, të dyja palët nuk dinë të dialogojnë.

Dhe meqë ra fjala, me datë 24, shoku Edvin Libohova ka bërë një thirrje për aktorët e Ligës që të mblidhen bashkë të flasin për ligjin e sportit, Nuk e kuptoj se pse nuk e lënë të hapur. I bëjë një ftesë mikut tim Libohova ta bëjmë të hapur këtë, ta kuptojmë se ku kemi ngelur.

Në këto momente, nga ana tjetër e aeroportit janë duke ardhur dy lojtarë nga Milani. Po bëjmë atë që duhet të bëjmë në këto momente, jemi shumë të vonuar por po bëjmë atë që duhet të bëjmë”, përfundoi Idrizi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono