sulme

shtepia-e-bardhe.jpg
G. P.11:24 | 17/01/2019

Pas një viti hetimesh agjentët e FBI-së në Shtetet e Bashkuara të Amerikës arrestuan një 21-vjevcar të radikalizuar, i cili planifikonte të sulmonte Shtëpinë e Bardhë dhe Statujën e Lirisë.

Kishte si objektiv të sulmonte Shtëpinë e Bardhë, Statujën e Lirisë dhe ndërtesa të tjera federale në Uashington. Hasher Jalal Taheb, 21 vjeç, u arrestua nga agjentët e FBI-së në shtetin e Xhorxhias, në përfundim të një hetimi që zgjati një vit. Lajmi është konfirmuar nga mediat amerikane. I riu i cili ishte i radikalizuar, synonte të përdorte bomba artizanale  të përgatitura nga ai vetë, dhe raketa anti-tank për të kryer sulmet e tij.

Sinjalizimi i parë për rrezikshmërinë e tij u bë në Mars të vitit 2018, ku autoriteteve amerikane iu tha se Taheb ishte radikalizuar, kishte ndryshuar emrin dhe po planifikonte të udhëtonte jashtë vendit. Në muajt në vijim autoritetet arritën të vendosnin një raport komunikimi me Taheb, i cili dëshironte të shiste automjetin e tij për të mbledhur fonde në mënyrë që të shkonte në territoret e kontrolluara nga ISIS. Në 7 Dhjetor një agjent i FBI-së e takoi dhe Taheb i tregoi një hartë të krahut perëndimor të Shtëpisë së Bardhë./abcnews.al

trump-1.jpg
G. P.08:52 | 20/12/2018

Dy zyrtarë të lartë iranianë, njëri prej të cilëve ambasador, u shpallën si persona të padëshiruar në vendin tonë. Shkak janë bërë dyshimet se ata fshihen pas tre komploteve terroriste që janë parandaluar në vendin tonë. Ky qëndrim i qeverisë shqiptare u përshëndet nga presidenti amerikan Trump, sekretari amerikan i shtetit Pompeo e zyrtarë të tjerë të lartë. 

Qeveria shqiptare ka shpallur si persona të padeshiruar dy diplomatë të Republikës Islamike të Iranit të akredituar në Tiranë. Vendimi u bë i ditur nga zëdhënësja e Ministrisë për Evropën dhe Punët e Jashtme, vendim i cili bazohet në dyshimet se dy diplomatët iranianë janë të përfshirë në aktivitete që cënojnë sigurinë në vend. “Vendimi për shpalljen e diplomatëve iranianë si të padëshiruar është marrë në konsultim me vendet aleate, për shkak të aktivitetit të tyre në Shqipëri në kundërshtim me statusin e tyre diplomatik”, thuhet ne reagimin e zëdhënëses së ministrisë. Ky vendim i marrë nga Shqipëria u vlerësua nga presidenti i Shteteve të Bashkuara të Amerikës Donald trump, i cili përgëzoi Qeverinë e Shqipërisë për arsye se ndërmori veprime kundër regjimit Iranian për komplotin e tij terrorist në tokën shqiptare, duke kërcënuar sigurinë evropiane. Sipas Trump qeveria e Shqipërisë ka treguar udhëheqësi të vërtetë në përpjekjet e përbashkëta për t’i dërguar një mesazh të qartë Iranit se kryerja e veprimeve terroriste në Evropë, apo kudo tjetër, është e papranueshme dhe nuk do të tolerohet. Presidenti Trump garanton se SHBA do të qëndrojë krah për krah me Shqipërinë, si aleat në NATO dhe partner strategjik.”

Në letren e presidentit Trump shkruhet:
“I dashur Z. Kryeministër: Faleminderit për përpjekjet tuaja të palëkundura duke iu kundërvënë Iranit dhe duke iu kundërpërgjigjur veprimeve e përpjekjeve të tij destabilizuese për t’u mbyllur gojën disidentëve anembanë globit. Udhëheqësia e treguar nga ju me dëbimin e Ambasadorit të Iranit nga vendi juaj është shembull i përpjekjeve tona të përbashkëta për t’i treguar qeverisë iraniane se veprimet e saj terroriste në Evropë dhe përreth botës do të kenë pasoja të rënda. Shqipëria ka qenë gjithmonë një mike e madhe e Shteteve të Bashkura dhe unë mirëpres rritjen e partneritetit tonë, ndërsa ballafaqohemi me çështjet e shumta të rëndësishme që të dy vendet tona hasin. Sinqerisht, Donald Trump”.

Ky vendim i marrë nga Shqipëria u vlerësua edhe nga Këshilltari i presidentit Trump për sigurinë kombëtare, Xhon Bolton. “Kryeministri i Shqipërisë Edi Rama sapo dëboi nga Tirana ambasadorin iranian, duke u dhënë një sinjal të qartë liderëve të Iranit se mbështetja e tyre për terrorizmin nuk do të tolerohet”, ka thënë Bolton në profilin e tij në Twitter. Zyrtari i lartë i administratës amerikane ka shprehur mbështetjen e tij për kryeministrin Rama dhe popullin shqiptar, që, siç thotë ai, kanë vendosur t’i bëjnë ballë sjelljes agresive të regjimit iranian në Europë e më gjerë. Një reagim ka ardhur edhe nga sekretari amerikan i Shtetit, Majk Pompeo, i cili vlerëson se diplomatët e dëbuar ishin agjentë që kishin planifikuar sulme terroriste në Shqipëri. “Vetëm këtë vit shtetet europiane kanë shmangur tre sulme terroriste. Bota duhet të qëndrojë e bashkuar për të sanksionuar regjimin iranian deri në ndryshimin e sjelljes së tij destruktive”, ka deklaruar Pompeo./abcnews.al

ZHDUKJA-E-NJEREZVE-HETIMET_ABC-M2-T1.mpg_snapshot_00.13-1280x667.jpg
G. P.15:04 | 11/11/2018

Informacione të rezervuara të policisë së Shtetit flasin për një numër të lartë të personave të zhdukur pa gjurmë. Por ndërsa ka midis tyre që janë larguar me deshirë, është i lartë numri i atyre që janë zhdukur nga krimi. Ekspertët flasin për një luftë të egër midis kriminelëve që kanë nisur të pastrojnë dëshmitarët dhe bashkëpunëtorët.

Zhdukja e personave pa lënë gjurmë po konsiderohet nga krimet më të frikeshme, prej shërbimeve të posaçme. Nuk dihet saktësisht numri i njerëzve të dyshuar të zhdukur, por një burim i besueshëm i tha ABC News, se vetëm në Vlorë diskutohet mbi 25 persona që nuk dihen ku ndodhen. Dhe për ta dyshohet se janë viktimë e pengmarrjes dhe më pas e vrasjes. Të njëjta burime i thanë ABC News që bëhet fjalë për persona në borxh me pagesat e drogës, ose të përfshirë në krime.

Spastrim i territorit ose zhdukja e dëshmitarëve që kanë dijeni ose kanë kryer vrasje me porosi. Ky është përkufizimi që eskpertët po i japin situatës së krijuar në vend. Më të prekur nga ky krim i egër janë Vlora, Durrësi, Shkodra dhe Tirana. Flitet për krime të tilla që, pasi personi rrëmbehet pa lënë gjurmë, vritet dhe groposet ose hidhet në det. Megjithatë duket se policia nuk është shumë e orientuar në këtë drejtim. Mungojnë bashkëpunëtorët dhe zbulimi i provave.

Rastet më të bujshme janë zhdukja e Albasano Xhaferri 34 vjeç nga Vlora dhe ajo e Elvis Troqe. Xhaferri është zhdukur që në muajin qershor dhe bashkë me Troqin ishin persona që vinin nga vendet e Evropës. Më herët referuar denoncimet të familjarëve ishte zhdukur biznesmeni Adriano Jaho, 52 vjeç dhe ndihmësi i tij, Ariseld Maze, 28 vjeç. Jaho dhe Maze kanë dalë më 3 korrik të 2017-s në mëngjes nga Porti i Vlorës për të provuar një skaf dhe nuk u kthyen. Ksandro Imeraj, 32 vjeç, është një tjetër i ri I zhdukur në Vlorë. Me bujë është përcjellë në publik edhe zhdukja e dajë e nipi në Shkodër. Gëzim Hysaj, 56 vjeç dhe nipi i tij Agron Molla, 47 vjeç janë larguar më 23 gusht nga banesat e tyre ne Dobrac dhe nuk janë kthyer më./abcnews.al

70853Bashkimi.jpg
G. P.23:59 | 18/10/2018

Bashkimin Europian e kanë përfshirë ethet nga ndërhyrjet kibernetike që kërcënojnë zgjedhjet euro-parlamentare të vitit të ardhshëm. Për të shmangur deformimin e vullnetit zgjedhor, liderët e vendeve anëtare kanë vendosur të ashpërsojnë masat e ndëshkimit, duke përfshirë edhe sanksione për aktorët e jashtëm.

Liderët e vendeve të BE-së ranë dakord të enjten të përforcojnë reagimin ndaj sulmeve kibernetike dhe fushatave të dezinformimit online, me qëllim mbrojtjen e zgjedhjeve të ardhshme europiane nga ndërhyrjet e jashtme.

Nisma e fundit e bllokut 28-anëtarësh parashikon vendosjen e sanksioneve ndaj qeverive armike dhe individëve, si dhe gjoba të rënda ndaj partive politike që përpiqen të keqpërdorin mediat online për të manipuluar vullnetin e zgjedhjeve.

Kancelarja gjermane Angela Merkel më herët gjatë javës ngriti shqetësimin për rrezikun që i kanoset zgjedhjeve për legjislaturën e re europiane, që mbahen në maj të vitit të ardhshëm. Në përfundim të takimit të liderëve të BE-së ditën e enjte, presidenti i Këshillit Europian, Donald Tusk ka deklaruar se, kërcënimi me sanksione dhe gjoba ka funksion parandalues.

“Një reagim i tillë duhet të mbrojë qytetarët, bizneset dhe institucionet tona nga të gjitha llojet e kërcënimeve kibernetike”, ka thënë Tusk.

Për zyrtarët e Perëndimit, Rusia e ka bërë luftën kibernetike dhe elektronike pjesë funksionale të operacioneve të saj ushtarake. Por zyrtarët europianë janë të shqetësuar edhe nga keqpërdorimi që mund t’u bëhet të dhënave personale të përdoruesve të rrjeteve sociale nga aktorë të brendshëm.

Muajin e kaluar, organi ekzekutiv i BE-së propozoi rregulla të reja për të shmangur përsëritjen e skandaleve si ai i rrjetit social Facebook për të favorizuar Donald Trump në zgjedhjet presidenciale të 2016-s. Të dhënat e miliona qytetarëve europianë u përdorën nga kompania e lobimit politik “British Analitika”, për të krijuar profile të votuesve dhe për të influencuar në zgjedhje./abcnews.al

shqiptariii.jpg
G. P.14:28 | 10/07/2018

Policia italiane ka arrestuar një shtetas shqiptar të Maqedonisë në Potenca. 29-vjeçari Agim Miftarov akuzohet se është stërvitur për aktivitete që kanë lidhje me terrorizmin ndërkombëtar.

Gjatë kontrollit të kryer në banesën e tij, janë zbuluar disa dronë. Ndërsa në celular, ai mbante 900 video të propagandës xhihadiste. Gjithashtu është zbuluar se 29-vjeçari ka bërë kërkime lidhur me përdorimin e dronëve të armatosur dhe për ndërtimin e pistoletave.

Ndërkohë, hetimet e agjentëve italianë kundër tij kishin nisur që në vitin 2009. Hetuesit kanë zbuluar ndër të tjera se Agim Miftarov ka dashur të blejë armë në internet./abcnews.al

rus.jpg
G. P.15:22 | 16/06/2018

Departamenti Amerikan i Shtetit udhëzon shtetasit amerikanë të mos udhëtojnë drejt Rusisë. Sipas DASH, aktivitete si botërori i futbollit zgjon interesin e terroristëve, të cilët mund të ndërmarrin sulme në stadiume apo qendra turistike.  

Departamenti Amerikan i Shtetit ka paralajmëruar shtetasit amerikanë të shmangin planet për turizëm në Rusi, për shkak të rrezikut të terrorizmit apo ngacmimeve.

Përmes një udhëzimi të publikuar në faqen zyrtare në internet DASH i kërkon qytetarëve amerikanë të rikonsiderojnë udhëtimin drejt Rusisë, ku po zhvillohet aktualisht kampionati Botëror i futbollit.

DASH thotë se ngjarjet e mëdha ndërkombëtare si Botërori i futbollit paraqesin objektiv tërheqës për terroristët.

Megjithëse siguria për Kupën Botërore do të jetë gjithëpërfshirës, paralajmëron DASH, terroristët mund të kërkojnë të sulmojnë vende të tilla si stadiumet dhe fushat e shikimit të Fan Fest, vendet turistike, shpërndarjet e transportit dhe vende të tjera publike.

Departamenti i Shtetit saktëson të paktën dy destinacione, ku nuk duhet shkuar, Kaukazi e Veriut, përfshirë Çeçeninë dhe Malin Elbrus për shkak të trazirave dhe terrorizmit, si dhe Krimenë për shkak të shkak të pushtimit të huaj dhe abuzimeve nga autoritetet.

Sipas udhëzimit, qytetarët e SHBA-së shpesh janë viktima të ngacmimit, keqtrajtimit dhe zhvatjes nga ana e zbatimit të ligjit dhe zyrtarëve të tjerë. Kjo edhe për faktin se, asistenca konsullore e SHBA-ve për personat e ndaluar zakonisht vonohet në mënyrë të paarsyeshme nga zyrtarët rusë.

Në përfundim DASH theksonte se Rusia zbaton kufizime të veçanta ndaj shtetasve të dyfishtë amerikanë. Për shkak të reduktimit të personalitetit diplomatik amerikan prej imponimeve të qeverisë Ruse, qeveria e SHBA ka aftësi më të pakët për të ofruar shërbime për qytetarët e saj. /abcnews.al

masaker.jpg
G. P.10:38 | 15/06/2018

ISIS ka kërcënuar përsëri me sulme në kampionatin botëror “Rusi 2018”. Organizata terroriste thotë se do të godasë si asnjëherë më parë.

E gjithë vëmendja është përqëndruar tek kampionati botëror i futbollit, Rusi 2018. Duke qenë kështu, rritet dhe përgjegjësia për autoritetet që të garantojnë sigurinë dhe mbarëvajtjen e ndeshjeve mes përfaqësuesve të ndryshme. Megjithatë, një rrezik tjetër që i shtohet agjentëve të angazhuar në kupën e botës është ai i ISIS.

Organizata terroriste ka kërcënuar me një video, në të cilën premton se do të kryejë “një masakër ashtu siç nuk është parë ndodnjëherë”. Në pamjet filmike të shpërndara nga tabloidi anglez Daily Star, ISIS tregon imazhe të ndryshme sulmesh, duke njoftuar se dëshjiron hakmarrje ndaj Vladimir Putin dhe Rusisë.

Videoja përmbyllet me një panoramë të stadiumit “Soçi” i mbikëqyrur nga një xhihadist i armatosur. Ndërkohë, kjo nuk është hera e parë që ISIS kërcënon me sulme terroriste Botërorin “Rusi 2018”. Edhe më herët, kërcënimet ishin më konkrete, pikërisht për dy lojtarët më të mirë të kësaj dekade, Lionel Messi dhe Cristiano Ronaldo. Megjithë kërcënimet e mundshme, Kremlini thotë se do të garantojë me çdo kusht siguri dhe mbarëvajtjen e kampionatit botëror./abcnews.al

isis-1280x713.png
G. P.11:57 | 15/05/2018

Objektivat e reja të sulmeve teroriste nga ISIS, janë Botërori i futbollit që nis në Rusi në muajin Qershor si dhe Papa Françesku. Kreu i shërbimit inteligjent britanik deklaroi se vetëm në territorin britanik gjatë vitit janë parandaluar 17 atentate terroriste.

ISIS synon të kryejë sulme shkatërruese dhe komplekse në Europë pasi ka humbur territore në Lindjen e Mesme. Është ky alarmi që ka dhënë kreu i shërbimit britanik të inteligjencës Endrju Parker. Këto deklarata ai i ka bërë gjatë mbledhjes me përgjegjësit e sigurisë europiane në Berlin. Vetëm në Mbretërinë e Bashkuar, që nga sulmi në Uesminster në 2017-n janë parandaluar 12 sulme. Por sipas mediave britanike rreziku i sulmeve prek dhe Botërorin e futbollit Rusi 2018.

Numri një i inteligjencës së brendshme britanike akuzoi Kremlinin për shkelje flagrante të rregullave ndërkombëtare pas helmimit të ish-spiunit rus Sergei Skripal dhe vajzës së tij në Salisburi në Mars të këtij viti. Parker përshkruan përpjekjen për vrasje si një veprim të qëllimshëm që rrezikon të transformojë Rusinë në një vend dhe më të izoluar.

Ditën e sulmit në Paris, të dielën e kaluar, nga terroristi çeçen Azimov, propaganda e shtetit islamik ka hedhur në rrjet një kërcënim të ri për Papa Françeskun: një fotomontazh të Atit të Shenjtë të ulur me një thikë në plan të parë që është gati ta godasë. Ndër të tjera sipas Sajt, që monitoron në rrjet mesazhete propagandës xhihadiste, në rrjet janë hedhur kërcënime të reja për sulme gjatë Botërorit 2018 në Rusi. Kremlini ka urdhëruar të gjitha fabrikat që përdorin material radioaktiv apo eksploziv, në vend, që të mbyllen për të shmangur që të kthehen në një objektiv të ndjeshëm./abcnews.al

incidente-1280x842.jpg
G. P.13:39 | 13/05/2018

Të paktën 10 viktima dhe dhjetëra të plagosur është bilanci i tre sulmeve kamikaze në 3 kisha të ndryshme në Indonezi. Sulmet vijnë pak ditë pasi policia shtypi me dhunë një revoltë në burgun pranë Xhakartës, e cila u mor përsipër nga ISIS.

Një seri shpërthimesh ndodhën në tre kisha të ndryshme në qytetin indonezian të Surabaia, duke shkaktuar të paktën 10 viktima e dhjetëra të plagosur. Informacionet e para flasin për sulm kamikaz, një lajm ky i raportuar nga mediat vendase. Në pamjet e transmetuara në televizion shihen pasojat e shpërthimit në kishën Santa Maria, në qytetin e dytë me popullsinë më të madhe në vend.

Vendi ka një mazhorancë të fortë muslimane, ndërsa atentatet ndodhën disa ditë pasi policia shtypi me dhunë një revoltë në një burg pranë Xhakartës, duke vrarë të paktën pesë të burgosur. Revolta në burg u mor përsipër nga ISIS./abcnews.al

vlcsnap-error896-1280x720.jpg
G. P.12:52 | 04/02/2018

Ushtria turke ka pësuar disfatën më të rëndë, që prej nisjes së ofensivës kundër milicive kurde në Siri. Mësohet se 7 pjesëtarë të forcave të sigurisë së Turqisë janë vrarë.

Ushtria e Turqisë ka pësuar ditën më vdekjeprurëse në ofensivën kundër milicive Kurde brenda veriut të Sirisë. Mësohet se 7 pjesëtarë të forcave të sigurisë janë vrarë. 5 prej tyre humbën jetën pasi tanku i tyre u sulmua në rajonin Afrin. Kryeministri Binali Jëlldërëm u zotua se militantët do të paguajnë dyfishin e asaj që kanë bërë ndërsa avionët e Ankarasë kanë goditur vendndodhje të kurdëve në verilindje të qytetit Afrin.

Operacioni i ushtrisë turke, i quajtuar “Dega e Ullirit”, ka nisur me 20 Janar dhe qëllimi i tij është largimi i milicisë kurde YPG nga provinca Afrin. Ankaraja i shikon militantët YPG si një grupim terrorist dhe si zgjatim i Partisë Punëtore të Kurdistanit “PKK”. Kjo lëvizje ka luftuar prej 3 dekadash për autonomi në juglindje të Turqisë.

Sipas konfirmimeve zyrtare, 14 ushtarë të forcave të sigurisë së Ankarasë kanë humbur jetën në ofensivë. Ndërsa nga ana tjetër, sipas agjencisë shtetërore të lajmeve Anadollu, janë neutralizuar mbi 900 militantë kurdë, të cilët konsiderohen si terroristë.

Në këtë ofensivë, forcat turke shoqërohen dhe nga rebelët e Ushtrisë së Lirë Siriane. Ndërkohë, fuqitë perëndimore, përfshirë SHBA-në dhe Francë, prej kohësh bëjnë thirrje për vetëpërmbajtje në mënyrë që të shmangen viktimat në civilë. Pikërisht për këtë ka ardhur dhe një bilanc provizor. Sipas një zyrtari siriano-kurd, 150 civilë janë vrarë dhe 300 të tjerë janë plagosur që prej nisjes së ofensivës së ushtrisë turke./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono