sulme

kosove-1280x761.jpg
in a13:55 | 09/01/2020

Shqiptarët nga Kosova që punojnë në bazën ushtarake amerikane Al Asad në Irak, një nga dy bazat që u godit nga raketat iraniane, konfirmuan se janë shëndoshë e mirë. F.G 41- vjeç, nga Ferizaj, punëtor i kompanisë amerikane – KBR inc tha për mediat në Kosovë se rreth 200 punëtorë nga Kosova, Maqedonia Veriore, Bosnja e Hercegovina punojnë në këtë bazë dhe që nga ora 21:30 e mbrëmjes së të martës kanë qenë të strehuar në bunkere. Ai ka thënë se janë në gjendje gadishmërie, të veshur me jelekë anti-plumb.

Baza ku punojnë ata është disa kilometra larg Bagdatit. Irani sulmoi dy baza amerikane në Irak në shenjë hakmarrjeje për vrasjen e komandantit të forcave Al Qus, gjeneralit, Qasem Soleimani. Kryeministri në detyrë i Kosovës, Ramush Haradinaj tha se institucionet e Kosovës po i përcjellin më me vëmendje këto zhvillime që prekin edhe jetën e qytetarëve të Kosovës të cilët punojnë përkrah trupave amerikane në këto baza. Qeveria qëndron përkrah SHBA-së, në ofrimin e paqes dhe sigurisë ne botë, tha Haradinaj duke e konsideruar sulmin akt të rëndë agresioni ndaj SHBA-së.

Presidenti i Kosovës, Hashim Thaçi dënoi sulmet raketore iraniane kundër forcave amerikane dhe aleatëve të vendosura në Irak që janë të fokusuara në mposhtjen e ISIS. Ai nënvizoi se Kosova është anëtar zyrtar i Koalicionit dhe i bëri thirrje Iranit që të dekurajojë dhunën. Presidenti i Kosovës theksoi se Kosova mbetet në mbështetje të SHBA-së dhe familjes atlantike në këtë kohë trazirash.

Ndërkohë Maqedonia e Veriut ka thënë se për momentin nuk ka asnjë arsye për t’u shqetësuar për praninë e organizatave joqeveritare në vendet që lidhen me Iranin, pasi Maqedonia Veriore nuk është në interes të tyre. Ministrja e Mbrojtjes, Radmilla Shekerinska tha se marrëdhëniet diplomatike të Maqedonisë me Iranin janë shumë modeste dhe se vendi nuk ka çështje të hapur me Iranin. Ministrja maqedonase e Mbrojtjes theksoi gjithashtu se nuk duhet të përjashtohet rreziku i radikalizimit nga strukturat islamike që kthehen nga frontet e ndryshme./abcnews.al

a007a219-ad9a-4eff-8a36-af61f5d7258c-1280x720.jpg
in a09:57 | 09/01/2020

I ftuar në ABC e mëngjesit” me Enkel Demin, ish – kreu i Shërbimit Informativ Shtetëror, Fatos Klosi ka folur për përplasjen mes SHBA-së dhe Iranit.

“Shqipëria është më e gatshme për të dëgjuar këshillat e SHBA-së. Jemi aleatë të mirë të amerikës, te ne amerikanët kanë gjetur një zgjidhje për çështjen e muxhahedinëve. Duhet theksuar se nuk janë terroristë. Kur kemi marrë përsipër pranimin e tyre kemi marrë përsipër edhe përgjegjësitë. Edhe ata vetë janë të përgatitur, kanë një sistem mbrojtës”, u shpreh Klosi.

Më tej ai theksoi se Iranianët treguan që i kanë mundësitë për të sulmuar.

“Iranianët e bënë detyrën, treguan se i kanë mundësitë për të sulmuar. Të dy palët treguan që nuk është kollaj të përplasesh, ky ishte qëllimi i të dyja deklaratave që u bënë nga ana e SHBA-ve dhe Iranit”, u shpreh Klosi.

Çfarë ndodhi

Në fjalimin e tij pas sulmit me raketa ndaj dy bazave ushtarake amerikane në Irak, lideri suprem i Iranit Ali Khamenei, krahas akuzave ndaj SHBA-ve, duket t’i jetë referuar edhe Shqipëria duke e “nxirë” vendin tonë në sytë e iranianëve.

Ajatollah Khamenei foli për “një vend shumë te vogël, por shumë i keq europian, ku amerikanët bashkepunojne me tradhtarët e Iranit kundër Republikës Islamike”, raporton abcnews.al.

Me termin tradhtar, Khamenei i referohet muxhahedinëve të MEK, ndërsa Shqipëria është vendi i vetëm europian, në të cilin ata janë strehuar.

Përplasjet SHBA – Iran, shtohen masat e sigurisë në kampin e muxhahedinëve në Manzë

Nga fjalimi duket se Khamenei i referohet pikërisht Shqipërisë edhe pse nuk e përmend me emër. /abcnews.al

irannn.jpg
So Nila15:40 | 08/01/2020

Ndoshta është sulmi më i egër që Irani ka nisur kundër Shteteve të Bashkuara në katër dekada të konfliktit të fshehtë .

Irani do ta ketë ditur që trupat normalisht janë në gjumë në orët e para të mëngjesit.

Irani gjithashtu do të ketë ditur që SH.B.A. ka një sistem të fortë të mbrojtjes ajrore që do të kishte qenë në gatishmëri të lartë dhe se raketat  e tij mbase do të “tkurreshin” kundër një teknologjie të tillë.

Sulmet e raketave nuk kanë kuptim nëse qëllimi i Teheranit ishte të dëmtonte vërtet trupat amerikane në një mase të madhe – siç disa premtuan se do t’a bënin.

Sulmet e së mërkurës dërguan një mesazh se Irani do të shkelë vijat e kuqe të SHBA dhe do të angazhohej në luftë të drejtpërdrejtë, por ata nuk vranë askënd.

E vetmja gjë e plagosur mund të jetë krenaria ushtarake iraniane që në momentin që ata kishin shpresuar aq shumë nuk morën dot gjak nga kundërshtari i tyre.

Tre shpjegime të mundshme

Gjendja akoma po qetësohet, dhe madje në kohën më të mirë motivet e Iranit mund të jenë të errëta, por ekzistojnë tre shpjegime të mundshme për këtë veprim.

Së pari, Khamenei, Udhëheqësi Suprem i Iranit, nuk është në nivel me atë që ushtria e tij mund të arrijë dhe mbivlerësoi efektivitetin e sulmeve, të cilat më pas dështuan.

Një llogaritje e tillë e gabuar do të ishte befasuese, duke pasur parasysh njohuritë e çështjeve ushtarake iraniane.

Së dyti, goditja e bazave ushtarake gjatë natës me një numër të vogël raketash – do të siguronte devijimin që të dy palët mund të kërkonin përfundimisht.

Kjo do të ishte logjike, duke pasur parasysh që as Teherani dhe as Uashingtoni nuk kanë shumë për të fituar nga një luftë e zgjatur.

Së treti, mund të jetë një taktikë nga Irani për të zhytur SHBA në një siguri të rrëmë.

Kjo do të kërkonte shumë mendjemprehtësi strategjike nga një ndarje e qeverisë në mes të vijave të ashpra dhe krahëve të moderuar, dhe do të nënkuptonte që Teherani ishte relativisht i sigurt se asnjë amerikan nuk do të lëndohej në këtë sulm raketor.

Zyra e Kryeministrit Irakian tha se atij iu dha njoftimi gojor nga Teherani pak para se të ndodhte sulmi.

Rreziku i një veprimi të menjëhershëm

Nëse sulmet në Irak janë me të vërtetë sfera e plotë e reagimit të Iranit, ato mbartin një rrezik tjetër: që administrata Trump mendon se çdo gjë përfundoi me vrasjen e gjeneralit dhe se Irani është zhdukur.

Kjo do të çonte në veprime të mëtejshme joracionale nga Uashingtoni, mbase jo vetëm kundër Iranit por edhe armiqve të tjerë. Do të bëjë që Irani të duket i dobët, gjë që mund të forcojë kundërshtarët e tjerë rajonalë të Teheranit.

Ministri i Jashtëm i Iranit, Javad Zarif, ka dërguar një mesazh të qartë se Irani nuk dëshiron luftë.

Teherani dhe Uashingtoni kanë një gjë të përbashkët: Mungesa e oreksit të tyre për një konflikt të zgjatur dhe të hapur me njeri-tjetrin. Irani ka një ekonomi të dobët dhe kundërshtime të brendshme ndërsa Trump dëshiron rizgjedhjen.

Irani ka bërë reagimin e tij me zë të lartë, publik dhe të zjarrtë ndaj vrasjes befasuese të komandantit të lartë të vendit.

Kjo mund të jetë, ose – ka më shumë të ngjarë – të paralajmërojë një hakmarrje të ngadaltë kundër bazave të tjera, më të buta, nga proxies ose tek forcat e fshehta – hakmarrja që shumica e analistëve e prisnin.

Të dy palët mund të jenë larguar qëllimisht nga një konflikt i gjatë dhe i çrregullt. Megjithatë, ata të dy kanë mësuar se mund të sulmojnë njëri-tjetrin në mënyrë direkte.

Të dy kanë bërë gjëra që ishin ndoshta të paimagjinueshme një javë më parë. Por SHBA dhe Irani duhej të arrinin në një vend shumë më të errët nga sa kishin parë në dekada për të zgjedhur qetësinë./abcnews.al

110430848_raabmarr5.jpg
So Nila08:38 | 08/01/2020

Shefi i diplomacisë britanike, Dominic Raab dënon ashpër  sulmin me raketa balistike nga Irani në bazat ajrore në Irak që strehojnë forcat e koalicionit, përfshirë këtu edhe personelin britanik.

Sekretari i jashtëm i kërkoi Iranit që të mos përsëriste “sulmet e pamatura dhe të rrezikshme” mbi bazat në Irbil dhe al Asad, në perëndim të Bagdadit.

Ministria e Mbrojtjes tha që nuk kishte viktima.

Garda Revolucionare e Iranit tha që sulmi ishte si hakmarrje për vdekjen e gjeneralit Qasem Soleimani të premten.

Ai u vra jashtë aeroportit të Bagdadit në një sulm  të urdhëruar nga Presidenti amerikan Donald Trump.

Raab tha që ai ishte i shqetësuar nga raportet për viktima të mundshme dhe theksoi se nga një luftë në Lindjen e Mesme do të përfitonin vetëm grupet terroriste./abcnews.al

sulme.jpg
in a07:26 | 08/01/2020

Departamenti i Mbrojtjes së SHBA – së ka njoftuar se dy baza ajrore që strehojnë trupat amerikane në Irak janë goditur nga më shumë se një duzinë raketash balistike.

Televizioni shtetëror iranian thotë se sulmi është si një hakmarrje, pasi komandanti i lartë i vendit Qasem Soleimani u vra në një sulm me dron në Bagdad, me urdhër të presidentit amerikan Donald Trump.

Ndërkohë Pentagoni thotë se dy bazat e sumuara ishin në Irbil dhe në Al-Asad, ndërsa menjëherë zëdhënësi i Shtëpisë së Bardhë reagoi për situatën në Irak.

“Ne jemi të vetëdijshëm për raportet e sulmeve ndaj objekteve amerikane në Irak. Presidenti është informuar dhe po monitoron nga afër situatën dhe po këshillohet me ekipin e tij të sigurisë kombëtare,” tha zëdhënësi i Shtëpisë së Bardhë Stephanie Grisham në një deklaratë.

Gjithashtu, për ngjarjen reagoi dhe  Garda Revolucionare e Iranit duke thënë se sulmi ishte si një hakmarrje për vdekjen e Soleimani të premten e kaluar.

“Ne po paralajmërojmë të gjithë aleatët amerikanë, të cilët i dhanë bazat e tyre ushtrisë së saj terroriste, se çdo territor që është pika fillestare e veprimeve agresive kundër Iranit do të jetë në shënjestër,” tha ajo përmes një deklarate të mbartur nga agjensia shtetërore e Iranit.

99-1.jpg
in a09:56 | 29/12/2019

Festa e cila ishte organizuar në shtëpinë e një rabini në New York është kthyer në tragjedi. Autoritetet policore njoftojnë se shtëpia në Monsey, në veri të New York City, ishte duke kremtuar një festë fetare kur sulmuesi hyri brenda. Të paktën pesë persona janë qëlluar me thikë.

I dyshuari është larguar nga vendngjarje, por më vonë u mor në paraburgim, tha policia. Shkaqet e sulmit ende nuk janë bërë të ditura.

Njëri nga viktimat u plagos me thikë të paktën gjashtë herë.

“Shtëpia kishte dhjetëra njerëz”, tha për New York Times, bashkëthemeluesi i OJPAC në rajonin e Hudson Valley, Yossi Gestetner.

Aron Kohn, 65 vjeç, i cili në atë kohë ishte në shtëpinë e rabinit, ka treguar momente nga ngjarja.“Po lutesha për jetën time. Ai filloi të sulmonte njerëzit menjëherë sapo hyri në derë. Ne nuk kishim kohë të reagonim fare”, tregon ai për mediat e huaja.

Sulmi ka ndodhur një ditë pasi policia e qytetit në New York tha se oficerët po rrisnin patrullimet në rrethet hebraike pas kërcënimeve dhe sulmeve antisemitike./abcnews.al

pesa.jpg
in a15:12 | 08/12/2019

Qeveria nisi sulmet ndaj Institutit  të  Kërkimeve dhe Pasojave të Komunizmit, pasi ky institut kërkoi informacione për praninë e ish- sigurimsave të shtetit, në administratën aktuale. Kështu shprehet drejtoresha e botimeve, Luljeta Lleshanaku, për ABC News. 

“Filloi në formën e një sulmi ndaj institutit për një libër mbi Luftën e dytë Botërore të Çelo Hoxhës që është zv/drejtor i institutit. Janë disa hapa provokues, e para qe kërkesa drejtuar institucioneve për transparencën lidhur me eksponentët e sigurimit të shtetit në administratën shtetërore. Një pjesë e institucioneve u përgjigjen, një pjesë jo”, shprehet Lleshanaku.

Situata, sipas Lleshanakut u përkeqësua, pas informacionit të dhënë për ish-drejtorin e burgut famëkeq të Qafë Barit.

“Instituti iu përgjigj kërkesës së zonjës Mira Dine për infrormacion lidhur me drejtorin  e burgut të Qafë Qarit, Edmond Caja. Ne e kemi detyrim ligjor që ti japim informacion gjithkujt. Këto kërkesa sollën sulmin e hapur në media ndaj institucionit. Kemi të bjëmë me sulmin e një individi që është edhe deputet në Parlament, z. Spartak Braho”, shpjegoi ajo.

Luljeta Lleshanaku thotë se puna në institut është bërë e rrezikshme.

“Puna në institut është bërë e rrezikshme, Tufa është kërcënuar disa herë në forma të ndryshme të cilat do ti zbuloj kur ti vijë koha. Sulmet ndaj këtij institucioni e kanë veshtirësuar punen me dëshmitarët”.

“Gjithë kjo fushatë e ka dëmtuar goxha aktivitetin e institutit. Një pjesë e instituti është e lidhur më dëshmitë, pothuajse asnjë prej tyre deri më tani nuk hezitonte të tregonte të vërtetën, por tashmë ka ndryshuar, bashkëpunimi është dobësuar”.

Lleshanaku thotë se Agron Tufa  ka patur mbështetje  nga intitucionet  nderkombetare, por jo vendase.

“Reagimin më të fortë institucional nuk e gjetëm nga autoritetet shqiptare, por nga platforma Eurpiane e Kujtesës, një rrjet organizatash europiane që merren me memorien”.

Ndërkohë  që përgjegjësia e botimeve , thotë se në ligjin  në  kërkimet mbi të shkuarën, studiuesit zbatojnë ligjin, pasi misioni i këtij institucioni është, kujto për të mos harruar.

“Aktiviteti i instituti i përgjigjet misionit ligjor, e kemi të përcaktuar me ligje se me çfarë duhet të merremi, nuk mund të shmangim informimin e publikut”, u shpreh ajo.

Luljeta  Lleshanaku  thotë se amendimi ligjor që bëri parlamenti për ndryshimin e harkut kohor të studimit dhe  përjashtimi si fushë studimi e periudhës së Luftës së Dytë Botërore, ështe anti -shkencore .

“Nuk është shkecore sepse së pari duhet të njohësh rrënjët e fenomenit apo të një dëshmie”, tha ndër të tjera Lleshanaku.

Edhe pas dorehëqjes  dhe largimit  të Agron Tufës, për strehim politik  në një vend të Europës pas kërcënimeve me jetë, instituti do të vazhdojë me strategjinë 5-vjeçare hartuar së bashku me punonjësit.

“Është një strategji e përgatitur në grup, Tufa ishte një dëgjues shumë i mirë në gjithë punën e tij si drejtues. Kemi projekt 5-vjeçar të muzeve virtualë. Do të vazhdojë puna  e dëshmive të të mbijetuarëve”, tha ajo.

Dokumenta të periudhës së komunizmit janë të pakta në numër, por rrëfimi i kësaj periudhe bëhet më shumë përmes dëshmive të gjalla./abcnews.al

turqia-2.jpg
ad min15:53 | 23/10/2019

Ankaraja konfirmoi tërheqjen e plotë të militantëve kurdë nga verilindja e Sirisë duke shtuar se tashmë nuk do të ketë më sulme të tjera ushtarake në zonë. Përgjatë lumit Eufrat është krijuar një zonë sigurie prej 440 kilometrash e gjatë.

Ministri i Brendshëm turk bëri të ditur se ka marrë konfirmimin nga Uashingtoni për tërheqjen e plotë të militantëve kurdë në përfundim të një armëpushimi i cili zgjati 120 orë. Forcat ushtarake ruse kanë kaluar nëpër lumin Eufrat për tu vendosur në kufirin mes Sirisë dhe Turqisë.

Kjo ishte parashikuar në marrëveshjen e arritur një ditë më parë mes presidentit rus Putin dhe atij turk Erdogan, gjë që u konfirmua dhe nga ministria ruse e mbrojtjes. Njësitë ruse të policisë ushtarake do të ndihmojnë në garantimin e sigurisë së popullsisë civile si dhe të ruajnë rendin dhe respektimin e ligjit.

Moska shtoi se ushtarët rusë do të patrullojnë zonat e caktuara dhe do të monitorojnë tërheqjen e militantëve kurdë dhe armatimeve të tyre deri në 30 kilometra larg kufirit mes Turqisë dhe Sirisë.

Në deklaratën e tij ministri turk i Mbrojtjes shtoi se nuk do të ketë sulme ushtarake kundër luftëtarëve kurdë në Siri, pasi tërheqja e tyre nga zonat kufitare konsiderohet i kompletuar, si dhe kishin konfirmuar Shtetet e Bashkuara të Amerikës. Tërheqja e militantëve kurdë, sipas Ankarasë, ka bërë të mundur krijimin e një zone sigurie në lindje të lumit Eufrat për një gjatësi prej 440 kilometrash përgjatë kufirit me Turqinë.

Regjimi i Damaskut nga ana e tij do të marrë kontrollin e veriut të vendit me bekimin e Moskës e cila qëndron në rolin e garantuesit për Ankaranë, për sa i përket lëvizjeve të presidentit sirian Bashar Al Asad.

Presidenti turk Erdogan deklaroi se do të marrë masat e duhura nëse nuk do të respektohen dy marrëveshjet e arritura me Uashingtonin dhe Moskën të cilat parashikojnë tërheqjen e militantëve kurdë nga verilindja e Sirisë.

Zëdhënësi i Kremlinit Dimitri Peskov theksoi se Shtetet e Bashkuara të Amerikës tradhtuan kurdët, të cilët tashmë duhet të qëndrojnë larg kufirit turko-sirian sipas marrëveshjeve të arritura, në të kundërt do të shtypen nga makineria ushtarake turke. Peskov madje akuzoi SHBA se braktisën kurdët në kufi, gati për t’i detyruar që të luftonin me turqit.

Presidenti i Sirisë, Asad, i cili mbështet plotësisht marrëveshjen mes Putin dhe Erdogan u shpreh i gatshëm të dërgojë roje kufitare siriane për të patrulluar së bashku me rusët kufirin mes Sirisë dhe Turqisë./ABC News Albania

Boris-Xhonson.jpg
ad min11:41 | 23/09/2019

Kryeministri britanik Boris Johnson akuzoi Iranin si përgjegjës të sulmeve ndaj rafinerive të naftës në Riad. Ai shtoi se vendi i tij është i gatshëm të mbështesë sauditët dhe amerikanët duke dërguar trupa ushtarakë shtesë në rajon.

Britania e Madhe e konsideron Iranin përgjegjës për sulmin në rafineritë saudite të naftës. Kryeministri britanik Boris Johnson u shpreh për gazetarët se mendonte që Irani ishte përgjegjës për sulmin e 14 Shtatorit duke shtuar se britanikët mund të kontribuojnë ushtarakisht në përpjekjet ushtarake në gji ku do të dërgohen përforcime.

Ai theksoi se nëse do kërkohej një gjë e tillë Londra do të vlerësonte se në çfarë mënyre mund të ishte e dobishme. Qeveria britanike deri tani kishte qëndruar neutral duke mos akuzuar askënd për sulmet në Riad.

Tashmë Londra, e vetmja kancelari europiane, është rreshtuar në krah të sauditëve dhe Shteteve të Bashkuara të Amerikës duke akuzuar Teheranin për sulmet. Johnson pohoi se vendi i tij do të bashkëpunonte me miqtë amerikanë dhe ata europianë për një reagim që do të reduktonte tensionet në rajon duke shtuar se do të takohej me presidentin Iranian Hasan Rouhani në asamblenë e përgjithshme të Kombeve të Bashkuara në Nju Jork.

Kryeministri britanik pritet të takohet dhe me presidentin amerikan Donald Trump, kancelaren gjermane Angela Merkel dhe presidentin francez Emmanuel Macron. Për Johnson, Britania e Madhe duhet të jetë një urë mes miqve amerikanë dhe atyre europianë kur flitet për krizën në rajon./ABC News Albania 24/7

firefighter.jpg
ad min16:55 | 22/09/2019

Drejtuesi i një automjeti ka sulmuar një xhami në Kolmar të Francës, duke u përplasur me hyrjen e objektit të kultit. Sipas raportimeve të mediave franceze, nga agresioni nuk ka patur persona të lënduar përveç drejtuesit të mjetit, i cili ka marrë një plagë të thellë në qafë.

Sipas burimeve, pasi ka marrë mjekimet e para në spital agresori është marrë në pyetje nga prokurorët dhe policia. Këto të fundit nuk kanë dhënë detaje mbi motivet e veprimit të tij, por mediat kanë shkruar se bëhet fjalë për një person të çekuilibruar.

Pavarësisht kësaj, burimet mediatike aludojnë se sulmi ndaj xhamisë mund të ketë në sfond motive raciste./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono