skenderbeu

ardian-takaj.jpg
nev ila16:05 | 17/07/2019

Pritet të vendoset shpejt e ardhmja e Skënderbeut. Mundësitë për presidentin Takaj janë që të vazhdojë me klubin aktual për të pritur 7 vjet, ose të krijojë një klub të ri sërish në Korçë.

Epoka e lavdishme është mbyllur, por nuk është e sigurt nëse do të ketë jetë pas saj.

Skënderbeu i madh, 7 herë kampion i vendit në vitet 2011-2018, dhe dy herë pjesëmarrës në fazën e grupeve të Ligës së Evropës, i përket së kaluarës, dhe frika është se mos do t’i përkasë vetëm historisë.

Dënimi përfundimtar i gjykatave sportive, nga Komisioni i Disiplinës i UEFA-s, deri në KAS-in e Lozanës, e kanë vënë në pikëpyetje vazhdimësinë e klubit me këtë emër, dhe besohet se presidenti Ardian Takaj ka dy alternativa.

E para, tepër e vështirë për t’u realizuar, që të vazhdojë me klubin Klubi Futbollistik Skënderbeu, dhe e dyta që të krijojë një klub tjetër me emër fare pak të ndryshuar, duke mbajtur bazën gjithnjë në Korçë.

Për momentin, Takaj ka pasur takim me kryetarin e Bashkisë, Filon, dhe burimet nga Korça bëjnë me dijë se nga presidenti është kërkuar buxhet më i madh financiar. Për momentin, pushteti vendor jep 300 milionë lekë të vjetër në vit për Skënderbeun, duke pasur edhe 25 për qind të aksioneve.

Hamendësimi është se mes dy drejtuesve mund të jetë diskutuar edhe për krijimin e një klubi tjetër. Për Takajn, avantazhet janë të mëdha nëse vazhdon në Korçë.

Edhe me ndonjë ndryshim emri, skuadra do të jetë po ajo, mund të quhet AFC Skënderbeu, po ashtu stadiumi është gati, madje do të ketë një të ri e modern, ndërsa është ndërtuar edhe kompleksi stërvitor për ekipin e parë dhe për Akademinë.

Vërtet, që do të nisej nga Kategoria e Dytë, por në 3 vjet në rast suksesi, do të jetë në Superligë, ndërsa nga dënimi aktual i UEFA-s kanë mbetur edhe 7 vjet. Aspak e lehtë, por gjithsesi duket si rruga më e lehtë, siç e pohojnë edhe burime nga Korça.

Një rast i tillë ndodhi në Rumani me Steauan e Bukureshtit, skuadrën më të shquar rumune, edhe cila shpalli falimentimin në 2007 dhe presidenti Xhixhi Bekali krijoi klub tjetër, me emrin Football Klub FCSB.

Në këtë mënyrë ai shpëtoi nga 11 milionë euro detyrime ndaj shtetit. Problem për Takajn është gjoba prej 1 milionë eurosh vendosur nga UEFA, e cila duhet shlyer brenda afateve, ndryshe ka rritje në vlerë.

Po ashtu, besohet se ka pagesa të prapambetura për futbollistët, diçka që nuk është vetëm çështje në Korçë, por në shumë klube shqip./ABC News Albania 24/7

66635264_2304949322876109_4518873012111409152_n.jpg
Sej rie19:15 | 13/07/2019

Skuadra e Skënderbeut akuzon Gjykatën e Arbitrazhit Sportiv se procesi ishte i manipuluar dhe nuk u morën në konsideratë raportet shkencore të ekspertëve të basteve sportive. Klubi korçar zbulon se do ta ndjek çështjen në Gjykatën Federale Zvicerane.

Skuadra e Skënderbeut ka reaguar zyrtarisht pas vendimit te KAS për të lënë në fuqi dënimin e UEFA-s me 10 vite jashtë kupave të Evropës dhe gjobë prej 1 mln euro. Klubi i Skënderbeut akuzon gjykatën e arbitrazhit sportive se procesi ishte i manipuluar dhe nuk u morën në konsideratë raportet shkencore të ekspertëve të basteve sportive dhe të ekspertëve sportiv të KF Skënderbeut.

“Procesi ndaj klubit tonë ka qenë i paragjykuar, i njëanshëm dhe i paracaktuar që prej vitit 2016.  Është e papranueshme që CAS të mos marrë në konsideratë raportet shkencore të ekspertëve të basteve sportive dhe të ekspertëve sportiv të KF Skënderbeut, të cilët në mënyrë metodike dhe shkencore kane hedhur poshtë çdo argument të ngritur nga UEFA.

Mbi të gjitha, është e papranueshme që të mos merren në konsiderate mbi 50 kundër-prova të paraqitura nga pala jonë, kur nga ana tjetër, e gjithë strategjia e inspektorëve të UEFA’s mbështetej mbi dëshmi personash anonim (as identiteti i tyre nuk na është bërë i ditur) ose personash të cilët kanë konflikt të hapur interesi në lidhje me procesin.

Brenda muajit Korrik 2019, KF Skënderbeu do të paraqesë rekurs pranë Gjykatës Federale Zvicerane kundër vendimit të CAS datë. 12.07.2019. Duke qenë të bindur mbi pafajësinë tonë, ruajmë besimin se e drejta do të vihet në vend. Skënderbeu do të vazhdojë aktivitetin e tij më të njëjtin përkushtim, vizion dhe ambicie për të arritur rezultate edhe më të mira se ato të sezoneve të shkuara. Me Respekt, KF Skënderbeu”.

Gjykata federale e Zvicrës është e vetmja mundësi e mbetur për Skënderbeun që të kërkojë pafajësinë. Në gjykatën në fjalë nuk ka seancë dëgjimore por vetëm shqyrtim ligjor pa i gjykuar çështjet në themel por vetëm anën procedurale nëse është zbatuar ose jo ligji për palët e përfshira./ABC News Albania 24/7

skenderbeu.jpg
G. P.23:05 | 12/07/2019

Dënimi i Skënderbeut ishte një goditje e madhe edhe për futbollin shqiptar ku juglindorët kanë dominuar në dekadën e fundit. Korçarët u dënuan duke u bazuar mbi luhatjet e koeficienteve të basteve, një rast i paprecedentë, por që i kushtoi shumë shtrenjtë skuadrës shqiptare.

Goditja e Skënderbeut nuk ishte thjesht dhe vetëm rikonfirmimi për të dëmtuar dhe asgjesuar një klub, por edhe një goditje karshi futbollit shqiptar dhe imazhit të tij në Europë, që vitet e fundit kishte fituar kuota edhe nëpërmjet ecurisë së Skënderbeut në Kupat e Europës.

Një vendim i tillë që rikonfirmon 10-vjeçarin e frikshëm mbi korçarët e futbollit, nuk është thjesht dhe vetëm shembull karshi një skuadre të një vendi të vogël, por edhe një prishje e plotë e proporcionit mes veprës së kryer dhe dënimit të dhënë.

Tashmë është fakt, përpos hapit të fundit që mund të herë klubi. 10 vjet janë shumë dhe kjo është një goditje morali akoma më e fortë për skuadrën dhe qytetin.

Mund të ketë tek-tuk ndonjë entuziazëm, por në tërësi kauza e rritjes së imazhit të futbollit shqiptar mori sot një goditje të rëndë. Skënderbeu ra, jo në Krujë, por në Lozanë.

Sidoqoftë gjurma që ka lënë deri më tani në futbollin shqiptar është një etalon i fortë se si mund të jesh fitues edhe në Europë. Dy herë në Europa League, në grupet e saj, nga një skuadër shqiptare, dhe kjo është Korça e president Takajt.

Që gjithsesi sërish nuk çedon dhe nuk e braktis qytetin. Por Skënderbeu ka qenë dominant kryesor i meritueshmërisë në fushë dhe në administrimin e një klubi me parametra europiane.

Jo thjesht në rezultate dhe të bërit ekip cilësor, por edhe në strategji, politika mbi funksionimin real dhe jo fiktiv të një klubi. Arbitrazhi i Lozanës e la 10 vjet në tribunë skuadrën korçare, as në stol jo e jo, megjithatë skuadrat e tjera shqiptare janë ende larg gjurmës së saj për të qenë një skuadër krenare që prodhon lojë të bukur, dhe ecën gjatë në kompeticionet e UEFA-s.

U ndëshkua një skuadër, e cila futbollin shqiptar e kreditoi jo pak në vitrinën ndërkombëtare. Keqardhje e madhe për një ekip që prodhoi një pjesë të historisë shqiptare të futbollit në arenën europiane./ABC News Albania 24/7

cas.jpg
G. P.22:45 | 12/07/2019

Vendimi i CAS për dënimin e Skënderbeut ka bërë jehonë në mediat e huaja.

Vendimi i  CAS në Lozanë ka bërë jehonë jo vetëm në Shqipëri, por edhe në mediat e europiane dhe botërore. Dënimi i Skënderbeut ka bërë bujë nga Amerika e largët e deri në Arabi.

Media dhe portale të ndryshme kanë raportuar për ngjarjen e paprecedentë kur një skuader dënohet pa prova konkrete po vetëm mbi bazën e luhatjeve të koeficentëve të basteve.

Amerikania Fox Sport shkruan: Gjykata përkrah dënimin 10-vjeçar të UEFA-s për klubin shqiptar për fiksim rezultatesh.

I njejti titull edhe për Arab News që i kushton një shkrim të detajuar dënimit të Skënderbeut. Për të vazhduar me radhë me media të njohura në Europë, si “O’Zhogo” e Portugalisë ku ne titullin e artikullit shkruan: Përjashtuar për 10 vite nga sfidat europiane.

La Gazeta dello Sport: Cas konfirmon vendimin e UEFA, Skënderbeu jashtë.

Diajho rekord: Skënderbeu përjashtohet 10 vite nga kompeticionet evropiane.

Dënimi i Skënderbeut është pasqyruar edhe nga agjencia e lajmeve AFP për të vazhduar më pas me “Fanatik” në Turqi, në tëgjitha mediat theksohet se ky është vendimi me i ashpër që UEFA ka dhënë për një skuadër për trukime ndeshjesh./ABC News Albania 24/7

ardian-takaj.jpg
G. P.20:56 | 12/07/2019

Presidenti i Skënderbeut Ardjan Takaj deklaroi pas vendimit të CAS se do t’i drejtohet Gjykatës Federale në Zvicër për të kërkuar drejtësi. Numri një i klubit korçar zbulon se do të vazhdojë të qëndrojë në krye të Skënderbeut.

Gjykata e Arbitrazhit Sportivë në Lozanë la në fuqi dënimin e UEFA me 10 vite pezullim dhe një gjobë prej 1 milionë euro për skuadrën e Skënderbeut. Një dënim mjaft i rëndë për korçarët të cilët kanë edhe një shans të fundit për të apeluar.

Ajo është Gjykata Federale në Zvicër. Klubi korçar do të kërkojë pafajësinë në Gjykatën Federale. Të paktën kështu shprehet presidenti i skuadrës së Skënderbeut Ardian Takaj për Panorama Sport. Takaj hedh poshtë mundësinë e largimit nga juglindorët dhe beson ende tek drejtësia.

“Jam i shokuar, jo vetëm unë si president, por studio ligjore dhe të gjithë ata që janë marrë me këtë çështje. Unë Skënderbeun nuk e braktis, do vazhdoj luftën. Do e çojmë çështjen në Gjykatën Federale të Zvicrës dhe aty do të marrim drejtësi. Kjo çështje ka kaluar të gjitha limitet, edhe avokatët që na përfaqësojnë e kanë tashmë personale, pasi janë befasuar nga vendimi i padrejtë”, ka deklaruar presidenti i Skënderbeut, Ardjan Takaj.

Takaj hedh poshtë mundësinë e shitjes së klubit dhe merr jetë varianti që mund të arrihet shumë lehtë. Akademia Skënderbeu i mjafton tre vite për t’u ngjitur në kategorinë superiore e më pas të projektohet skuadra drejt kompeticioneve europiane e natyrisht ku president do të jetë pikërisht Ardian Takaj.

Në planin e merkatos, Skënderbeu nuk ka financat e duhura për të nënshkruar me futbollistë të mëdhenj dhe fillimisht priten rinovimet e më pas disa transferime pa shumë kosto./ABC News Albania 24/7

skenderbeu.jpg
G. P.19:26 | 12/07/2019

Pas vendimit përfundimtar të CAS duke hedhur poshtë apelimin e Skënderbeut ka reaguar edhe UEFA që mirëpret vendimin e Gjykatës së Arbitrazhit Sportiv.

“UEFA mirëpret refuzimin e apelimit të Skënderbeut në Gjykatën e Arbitrazhit Sportiv ndaj Komisionit të Apelit në UEFA. Ky është një konfirmim i mëtejshëm i besueshmërisë së sistemit të zbulimit të mashtrimit të basteve që përdor UEFA në identifikimin e modeleve të basteve në ndeshjet që zhvillohen në Europë”, është reagimi i UEFA-s, për dënimin e Skënderbeut me 10 vite jashtë kupeve të Europës dhe 1 milionë euro gjobë./ABC News Albania 24/7

SKENDERBEU-BARAZON-ME-TEUTEN.mpg_snapshot_00.02-1280x720.jpg
nev ila23:12 | 28/06/2019

Skuadra e Skënderbeut ende nuk ka zyrtarizuar blerjen e parë për këtë merkato verore pasi pret vendimin e gjykatës së arbitrazhit sportiv në Lozane. Gjithsesi kjo nuk e ka penguar skuadrën korçare të mendojë për rinovime pasi është maksimalja që drejtuesit mund të bëjnë në një situatë të tillë.

Përtej lojtarëve si Radas apo Vangjeli, edhe portierë Aldo Teqja është një futbollist i lirë pasi i ka përfunduar kontrata me juglindorët. Nga kjo situatë pritet të përfitojë skuadra e Luftëtarit por Skënderbeu ende nuk e ka thënë fjalën e fundit.

Kujtojmë që portieri Teqja kishte besimin e trajnerin Orges Shehi pasi ka luajtur jo pak herë si titullar.  24 vjeçari pritet të vendosë pas datës 12 korrik për të ardhmen e tij pasi fillimisht në skuadër do të njihen me vendimin e KAS  pasi strategjia e merkatos për korçarët është e varuar nga verdikti final i gjykatës së arbitrazhit sportiv./ABC News Albania 24/7

skenderbeu.jpg
G. P.22:00 | 27/06/2019

Në pritje të vendimit të KAS, skuadra e Skënderbeut po harton strategjinë për merkaton e transferimeve. Fillimisht juglindoret do të tentojnë rinovimin me lojtarët kyç në skuadër.

Skënderbeu është një nga skuadrat më pasive sa i përket merkatos së transferimeve në krahasim me ekipet si Partizani, Tirana apo Kukësi. Natyrisht strategjia e merkatos së juglindoreve nuk është hartuar pasi pritet vendimi përfundimtar i KAS që pritet të jepet në fillim të muajit Korrik.

Gjithsesi klubi korçar ka filluar të lëvizë dhe të bëjë disa hapa konkrete në merkato. Juglindorët mësohet se kanë gjetur akordin me mbrojtësin Leonit Abazi. Futbollisti me origjinë nga Kosova kërkohej nga disa klube të tjera si brenda ashtu edhe jashtë Shqipërisë.

Futbollisti ka rënë dakord për një zgjatje të kontratës me Skënderbeun deri në vitin 2021. Firma pritet të hidhet pas vendimit të Gjykatës së Arbitrazhit Sportiv. Një tjetër futbollist në organikën e Skënderbeut ka gjetur akordin për rinovimin e kontratë.

Bëhet fjalë për Oto Xhon, i cili konsiderohet në kampin korçar si një pikë e rëndësishme dhe një garanci më vete. Në udhëkryq janë edhe Marko Radas dhe Gjergji Muzaka.

Të dy futbollistët janë pa kontratë aktive dhe kanë shprehur dëshirën për të përfaqësuar ende ngjyrat e Skënderbeut. Hapat konkrete pritet të ndërmerren pas vendimit të KAS që ka ndikuar plotësisht në ndërtimin e skuadrës për sezonin e ardhshëm./ABC News Albania 24/7

skn.jpg
G. P.13:32 | 18/06/2019

Skënderbeu hedh poshtë çdo koment për vendimin e pritshëm të Gjykatës Sportive në Lozanë të Zvicrës. Klubi korçar thekson se nuk dihet se çfarë vendimi do të merret në 21 Qershor.

Besimi është i madh tek suksesi, por ftesa vjen për përmbajtje. Skënderbeu konfirmon datën 21 Qershor si përfundimtare në betejën e tij kundër dënimit të UEFA-s, veçse klubi korçar nuk dëshiron të ngrihen shumë hipoteza e të bëhen shumë komente.

Në një reagim zyrtare në rrjetet sociale, ish-kampionët e Shqipërisë deklaruan se çdo koment apo shkrim në media duhet të quhet i pavërtetë dhe i pasaktë.

“Në korrespondencën mes palëve është njoftuar se klubi do të njihet me vendimin në datë 21 qershor, – shkruhet në deklaratë, – lutemi, prisni me qetësi datën dhe njoftimin zyrtar”.

Duket se Skënderbeu mori shkas nga një artikull në mediat e shkruara, saktësisht në “Panorama Sport”, ku flitej për një akord mes palëve që klubi shqiptar të marrë pafajësinë, por të përfitojë 5 milionë euro dëmshpërblim, jo 25 milionë.

Në klubin e Korçës, optimizmi është theksuar disa herë nga burime pranë presidentit Takaj, duke theksuar se ka tërheqje nga personat që kanë dëshmuar në UEFA.

Po ashtu, presidenti beson tek studioja ligjore që ka pajtuar, dhe që është ndër më të mirat në Zvicër dhe në Europë, për të cilën thuhet se ka shpenzuar 500 000 euro.

Skënderbeu u dënua nga UEFA i akuzuar për trukim ndeshjesh në Champions dhe në Ligën e Europës, vendim që u mbajt në fuqi edhe nga komisionet e apelit./ABC News Albania 24/7

SKENDERBEU-HUMBJET-RADHAZI.mpg_snapshot_01.04-1280x720.jpg
nev ila23:31 | 17/06/2019

Orges Shehi lajmëroi largimin nga skuadra e Skënderbeut por klubi korçar ka reaguar menjëherë për çështjen në fjalë. Korçarët kërkojnë ta mbajnë në ekip të paktën deri në vendimin përfundimtar të KAS.

Ikona e skuadrës së Skënderbeut, Orges Shehi deklaroi se do të largohej nga klubi korçar pas plot 9 sezonesh të suksesshme. Fillimisht si futbollist e tashmë si trajner. I menjëhershëm ka qenë edhe reagimi i klubit korçar që ben të ditur se Shehi nuk mund të largohet nëpërmjet një deklarate pasi është pjesë e rëndësishme në ndërtimin e themeleve të kësaj skuadre.

“Një ikonë, legjendë…
2 pjesëmarrje në grupet e Europa League, një play-off në Champions League, dhe 1 play-off në Europa League. 7 tituj kampion, 3 superkupa dhe një Kupë Shqipërie.
9 vite bardhekuq, lider brënda dhe jashtë fushë.
Fjalët janë të tepërta, nuk ka arsye për të reaguar, Orges Shehin nuk e lidh kontrata me Skënderbeun por 9 vite plot suksese, emocione dhe dashuri.
Orges Shehi nuk mund të largohet me një intervistë nga Korça dhe padiskutim mbetet një aset dhe pjesë e pandarë e klubit”.

Është reagimi i klubit të Skënderbeut. Korçarët do të njihen brenda kësaj jave me vendimin e KASIT ku nëse shpallen të pafajshëm planet mund të ndryshonin./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono