Skënder Gjinushi

skender-gjinushi-komisioni-rindertimit.jpg
ger ta17:24 | 09/12/2019

Kreu i Akademisë së Shkencave Skënder Gjinushi ishte i pranishëm në mbledhjen e dytë të Komitetit të Rindërtimit.

Gjinushi theksoi se ASH është e gatshme të bëjë rolin e organizatorit në këtë rast.

Mendoj se gjërat janë kapur siç duhet. Por unë doja të marr një çështje, studimet që bëhen për sizmologjinë etj. Në të ardhmen të zbatohen kodet europiane. Studimet për këtë ekzistojnë dhe vlerësoj se këtë detyrë mund ta marrë Akademia e Shkencave. Ne jemi gati të jemi organizatori, madje të ngremë edhe një strukturë të përkohshme. Jemi konsultuar edhe me qendrat dhe akademitë rajonale, për të bërë qoftë akademi rajonale për këtë çështje. Por kryesorja është që të ndërtohen harta për situatën. Tirana, Durrësi, Shkodra, Vlora etj janë disa vatra që kanë rrezikshmëri. Ndërtimet në Shqipëri duhet të jenë të garantuara”, u shpreh Gjinushi./abcnews.al

 

 

skender-gjinushii.jpg
ad min20:13 | 18/10/2019

Asambleja e Akademisë së Shkencave nuk pranon mosdekretimin e Skënder Gjinushit nga Presidenti Ilir Meta. Me votën e sotme, 43 akademikë i japin të drejtën Gjinushit që të ushtrojë detyrën si kryetar i këtij institucioni.

Por, akademiku Artan Fuga e cilëson vendimin e Asamblesë antikushtetues, duke paralajmëruar dërgimin e çështjes në Gjykatën Kushtetuese.

Presidenti Ilir Meta nuk e dekretoi Skënder Gjinushin në krye të Akademisë së Shkencave. Asambleja anashkalon institucionin e Presidentit, 5 muaj pas zgjedhjeve  43 akademikët bazuar në ligjin e ri i japin të drejtën për të ushtruar detyrën Skënder Gjinushit, mosdekretimin nga Presidenti i Republikës e cilësoi politik.

Akademiku Artan Fuga vendimin e asamblesë e cilëson antikushtetues, pasi Gjinushi u zgjodh me ligjin e vjetër dhe u miratua me ligjin e ri e cila i dobëson fuqinë Presidentit.

Fuga thotë se odiseja e Akademisë vazhdon në Gjykatë Kushtetuese. Artan Fuga si zgjidhje sheh mbajtjen e zgjedhjeve të reja  me ligjin e ri edhe pse e ka kundërshtuar. Në mbledhjen e asamblesë u hapen edhe vendet e reja për kandidim për anëtarë të Asamblesë me titull Akademik dhe akademik i asociuar./ABC News Albania

IMG_0792-1280x853.jpg
ad min15:23 | 18/10/2019

Partia Demokratike akuzon kryeministrin Rama se me vendimin për të emëruar me forcë në krye të Akademisë së Shkencave, Skënder Gjinushin uzurpoi edhe institucionin kryesor të shkencës në Shqipëri. Ish-deputeti Luçiano Boçi e cilësoi regres shkencor, moral dhe politik rikthimin e Gjinushit në Akademi.

Deklarata e plotë:

Edi Rama vazhdon të uzurpojë e të pushtojë institucionet e pavarura kushtetuese me kamikazët e tij politikë, duke ricikluar figura si Skënder Gjoinushi, që i shërbyen regjimin komunist edhe gjatë rënies së tij.

Pasi i imponoi Akademisë së Shkencave një ligj krejtësisht sovjetik dhe antikushtetues, ai sot vuri në krye Akademisë ministrin e fundit të diktaturës komuniste, duke shkelur plotësisht Kushtetutën dhe Ligjin për Akademinë e Shkencave.

Emërimi me dhunë i Skënder Gjinushit është realizuar sot nën presion politik. Ai është një regres shkencor, moral dhe politik, një uzurpim në grup i një posti publik.

Skënder Gjinushi është rrëzuar me dekret nga Presidenti i Republikës, por Edi Rama, në vend që të ikë bashkë me të, për dështimin e tij personal me negociatat, kthen Akademinë e Shkencave në një organizatë tjetër politike.

Në krye të Akademisë së Shkencave nuk mund të emërohet një person me angazhim të qartë politik, një person pa asnjë kontribut shkencor, një person i cili, përveç mendësisë komuniste, nënshtrimit ndaj Edi Ramës dhe Tom Doshit, nuk nuk mund prodhojë  asgjë shkencore e bashkëkohore.

Kryesia e Akademisë ka bashkëpunuar dhe pranuar të përdoret për të kryer këtë emërim tërësisht antiligjor, duke marrë mbi vete të gjitha përgjegjësite ligjore dhe morale përpara opinionit shoqëror dhe kombit.

Për të zbatuar porosinë politike të Edi Ramës, kryesia emëroi Gjinushin duke i dhënë fuqi prapavepruese ligjit të ri të Akademisë së Shkencave për një proces të përfunduar me ligjin e vjetër.

Emërimi i paligjshëm i Skënder Gjinushit në krye të Akademisë së Shkencave shkallmon shtetin ligjor pikërisht atje ku duhej të ishte shtëpia e së drejtës, shtëpia e dijes dhe e elitës së kombit.

Partia Demokratike kundërshton me forcë këtë uzurpim të Akademisë së Shkencave nga Edi Rama dhe Skënder Gjinushi, si dhe dënojmë çdo ndërhyrje politike në Akademi.

Emërimin e turpshëm dhe të paligjshëm të ushtarit të Edi Ramës dhe Tom Doshit në Akademinë e Shkencave, ne do ta ankimojmë në Gjykatën Kushtetuese, sapo kjo gjykatë të jetë funksionale. /abcnews.al

download-1.jpg
ad min12:58 | 18/10/2019

Asambleja e Akademisë së Shkencave i jep të drejtën që të ushtrojë detyrën kryetarit Skënder Gjinushi. Vendimi u mor sot në një mbledhje me dyer të mbyllura të Asamblesë së Akademisë së Shkencave.

“E papranueshme që tentuan të rrëzojnë mandatet e fituara, pasi ligji nuk e cenon. Presidenti ka për detyrë vetëm të emërojë. Ligji i ri nuk ndryshon kriteret e zgjedhjes, vetëm është më i qartë. Kjo është përpjekja e dëshpëruar e Presidentit për të gjetur ndonjë lajthitje. Dorëheqja është shumë e qartë. Pa lindur ju unë kam qenë anëtar në Akademinë e Shkencave. Dorëheqja është 15.5.2019. Dorëheqja është vendim personal. Vetëm këtu në Shqipëri ndodh që dorëheqja hyn në fuqi kur një tjetër do”, tha Skënder Gjinushi në përfundim të mbledhjes së Asamblesë.

Në mbledhjen e asamblesë ishte i pranishëm dhe akademiku Artan Fuga, i cili ka kundërshtuar zgjedhjet në ASH dhe ligjin e saj. Ai ka kundërshtuar edhe vendimin e Asamblesë që u mor sot.

Të drejtën e Gjinushit për të ushtruar detyrën e kryetarit të ASH-së, Artan Fuga e konsideron si uzurpim.

“Çështja do të shkojë deri në Gjykatën Kushtetuese”, mësohet të jetë shprehur Fuga.

Skënder Gjinushi, u shpall kreu i Akademisë së Shkencave të Shqipërisë më 24 Maj të këtij viti. Ai nuk kishte përballë askënd në garë, por mori 35 vota pro 6 kundër.

Për herë të parë pas ndryshimeve ligjore të 2008 votoi edhe shkrimtari i njohur Ismail Kadare përmes postës elektronike. Ndërsa akademiku Artan Fuga nuk ishte i pranishëm, pasi sipas tij këto zgjedhje janë në kundërshtim të plotë me rregulloren që parashikon Akademia.

Zgjedhjet u mbajtën me ligjin që ishte në fuqi, pasi projektligji ishte duke u shqyrtuar në komision. Më herët presidenti Meta nuk dekretoi Skënder Gjinushin në krye të e Akademisë së Shkencave./abcnews.al

akademia-e-shkencave.jpg
ad min16:00 | 19/07/2019

Akademia e Shkencave i kërkon institucionalisht Presidentit Ilir Meta  që të rishikojë dekretin për Skënder Gjinushin. Nënkryetari i Akademisë së Shkencave, Vaso Tole, në përfundim të mbledhjes së jashtëzakonshme të asamblesë deklaroi se në kohën kur Gjinushi u zgjodh kryetar nuk ka qenë në papajtueshmëri ligjore. 

Akademia e Shkencave të Shqipërisë pas mbledhjes së jashtëzakonshme të asamblesë, e cila zgjati 2 orë  ka marrë vendimin  që t’i drejtohet institucionalisht Presidentit Ilir Meta që të rishqyrtojë edhe një herë dekretin që refuzon akademikun Skënder Gjinushi si kryetar i Akademisë së Shkencave i zgjedhur më 24 Maj me 36 votat e akademikëve nga 44. Edhe në këtë mbledhje, ky vendim është kundërshtuar nga Akademiku Artan Fuga.

Nënkryetari i Akademisë së Shkencave, Vasil Tole, tha se kohën kur Gjinushi u zgjidh kryetar nuk ka qenë në papajtueshmëri ligjore, ai e argumenton me rishqyrtim të dosjes dhe dokumentacionit te paraqitur nga Gjinushi. Ndërkohë që edhe në rast se presidenti Meta e rrezon kërkesën e Akademisë, Tole thotë se vendimin përfundimtar e merr asambleja.

Asambleja e Akademisë vlerësoi edhe vendimin e Kuvendit të Shqipërisë, i cili miratoi ligjit të ri të Akademisë së Shkencave me  82 vota pro, 25 kundër dhe 0 abstenim./ABC News Albania 24/7

alfred-cako.jpg
ad min21:46 | 25/06/2019

Alfred Cako është një personazh i njohur i jetës publike shqiptare. Ai është botues, publicist, bashkëthemelues i “Ballit Kombëtar” dhe ish-student i Dhjetorit. Si i tillë ai kujtoi një bisedë që bashkë me studentët e tjerë bënë me Skënder Gjinushin, asokohe ministër i Arsimit.

Cako rrëfeu se teksa studentët kërkonin gjëra themelore për jetesën si drita, ujë, mensa dhe kushte, Gjinushi iu është drejtuar duke u thënë se kujtonte se kishin dalë për pluralizmin.

Ka qenë pikërisht ky moment, që e ka bërë të kuptojë Cakon se çfarë kërkonte Lëvizja e Dhjetorit.

“Do t’ju them një fakt interesant që shumë njerëzve të krahut tim, kur kam qenë unë në krahun e djathtë mund të mos u pëlqejë, por e vërteta është e vërtetë. Natën e 8 Dhjetorit aty na ka ardhur në fillim, Pirro Kondi dhe pas tij Skënder Gjinushi. Ne i thamë sepse kishim një farë simpatie për Skënderin, si i ri që ishte, ndryshonte nga këta bllokmenët e vjetër me gushë të varur. Dukej më liberal, kishte studiuar në Francë dhe kishim një farë simpatie sepse jete dhe mësim, e quanim më shumë pedagog sesa njeri të kastës. Ai tha një shprehje kur ne i thamë, s’mund të kujtohet në këto kushte, s’kemi drita, s’kemi mensa, s’kemi kushte. “Akoma për drita për ujë keni dalë”, tha ai. “Unë kujtova se kishit dalë për të kërkuar pluralizmin”, tha. Ne në atë kohë hapëm sytë dhe thamë ça po thotë ky. Ky të paktën na futi si në hulli për herë të parë. Të paktën flas për veten time”, u shpreh Cako.

Cako deklaroi se Lëvizja e Dhjetorit ishte e drejtuar pasi nëse nuk ndërrohej sistemi për disa muaj shoqëria do të përfundonte në përplasje civile.

“E pilotuar ishte. Në qoftë se edhe për disa muaj sistemi nuk ndërrohej dhe merrej për dore shoqëria shqiptare nga perëndimi në Shqipëri do kishte ndodhur katastrofë se gjithçka ishte bllokuar dhe vendi po shkonte drejt një përplasje të madhe civile. Ramiz Alia e dëshironte me ngulm ndryshimin. Ishte ai që e lejoi, hapi portat dhe kërkoi ta kontrollonte dhe e kontrolloi procesin, krijimin e partive, për të mos lejuar përplasjen civile dhe për të mos lejuar që politikanët e ardhshëm që ai po i promovonte të lejonin që kapitali i huaj ose imperializmi financiar i huaj të hynte në Shqipëri dhe të kontrollonte vendin tonë”, tha Cako.  /abcnews.al

GJINUSHIII-1280x712.jpg
ad min17:45 | 24/05/2019

Vota e 35 akademikëve ka vendosur në krye të Akademisë së Shkencave Skënder Gjinushin, i vetmi që kishte shpallur kandidaturën. Gjashtë akademikë të tjerë kanë votuar kundër tij, ndërsa nuk ka marrë pjesë në zgjedhje Artan Fuga, i cili ka deklaruar se po shkelet rregullorja e Akademisë.

Skënder Gjinushi, u shpall  zyrtarisht kreu i Akademisë së Shkencave të  Shqipërisë. Ai nuk kishte përballë askënd në garë, por mori 35 vota pro 6 kundër . Për herë të parë pas ndryshimeve ligjore të 2008 votoi edhe shkrimtari i njohur Ismail Kadare  për mes postës elektronike. Ndërsa akademiku Atan Fuga nuk ishte i pranishëm, pasi sipas tij këto zgjedhje janë në kundërshtim të plotë me rregulloren që parashikon Akademia. Zgjedhjet u mbajtën me ligjin që është në fuqi, pasi projektligji është duke u shqyrtuar në komision.

Menjëherë pas procesit  kreu i ri i Akademisë  dhe udhëheqësi i reformës Skënder Gjinushi e cilësoi një ditë të rëndësishme për të vazhduar procesin reformues  të këtij institucioni

Lidhur me procesin zgjedhor të kundërshtuar 2 vite më parë nga Kryeministri Rama, ai tha se zgjedhjet e 24 Majit janë demokratike dhe aso kohe nuk janë kundërshtuar se nuk kishte garë në postet drejtuese ashtu si në këto zgjedhje.

Edhe kandidatet për pozicionin të tjera ishin të vetëm në garë  dhe u shpallen fitues me nga 35 vota secili . Nënkryetar i Akademisë Vaso Tole. Salvator Bushati në pozicionin e sekretarit shkencor të ASH-së,  dhe akademiku për pozicionin e kryetarit të seksionit të Shkencave të Natyrës, u konfirmua  Neki Frashëri./ABC News Albania 24/7

1547103616_skendergjinushi.jpg
ent ela12:08 | 24/05/2019

Skënder Gjinushi është shpallur kryetar i Akademisë së Shkencave pas zgjedhjeve që u kryen paraditen e së premtes. Gjinushi mori 35 vota pro dhe 6 kundër.

Ish-kryetari i Partisë Socialdemokrate, Skënder Gjinushi ishte kandidati i vetëm për kryetar në zgjedhjet pë Akademinë e Shkencave. Ai është gjithashtu drejtues i grupit të punës për reformimin e Akademisë. Projektligji i dalë prej tij është në proces diskutimi në komisionin parlamentar të edukimit dhe mjeteve të informimit publik.

Për herë të parë pas ndryshimeve ligjore të 2008-s votoi edhe shkrimtari i njohur Ismail Kadare, përmes postës elektronike. Ndërsa akademiku Artan Fuga nuk ishte i pranishëm, pasi sipas tij këto zgjedhje janë në kundërshtim të plotë me rregulloren që parashikon akademia.

Kreu i ri i Akademisë së Shkencav, në platformën e tij i ka mëshuar reformimit të institucionit në të gjitha drejtimet, veçanërisht në fushën e kërkimit shkencor. Dy ditë më parë, Fatjona Dhimitri, kryetare e këtij komisioni, i bëri thirrje të tërhiqet nga gara pasi sipas saj, zgjedhjet në Akademinë e Shkencave janë të jashtëligjshme.

Gjithashtu Dhimitri, u bëri thirrje akademikëve që t’i bojkotojnë ato. Zgjedhjet në Akademinë e Shkencave vijnë dy vjet pas vendimit të kryeministrit Edi Rama për ta reformuar këtë institucion. Të drejtë vote për të zgjedhur strukturat drejtues të saj patën 44 akademikë./abcnews.al

 

aa-1280x720.jpg
ad min16:10 | 22/05/2019

Dy ditë nga zgjedhjet në Akademinë e Shkencave, kryetarja e komisionit parlamentar të medias dhe mjeteve të informimit publik i bën thirrje kandidatit të vetëm për kryetar, Skënder Gjinushit të tërhiqet nga gara. Sipas Fatjona Dhimitrit, zgjedhjet janë të jashtëligjshme dhe akademikët duhet ‘ti bojkotojnë.

Në prag të zgjedhjeve për kryesinë e Akademisë së Shkencave, kryetarja e komisionit parlamentar të edukimit dhe mjeteve të informimit publik i bën thirrje akademikëve t’i bojkotojnë ato.

“Ju bëj thirrje të gjithë akademikëve për të mos hyrë në aventurën e zgjedhjeve të 24 Majit sa kohë ligjërisht duhet të presin përpilimin dhe hyrjen në fuqi të kuadrit të ri ligjor, të mospërfshihen në procese të parregullta ligjore, të cilat kompromentojnë të ardhmen e Akademisë, pengojnë marrëdhënien e bashkëpunimit me Kuvendin, e vendosin ligjvënësin përpara faktit të kryer, duke i hequr kështu kompetencat e sovranit”, tha Fatjona Dhimitri.

Më 24 Maj, Akademia e Shkencave shkon në zgjedhje me një kandidat të vetëm për kryetar. Ish-kryetarin e Partisë Socialdemokrate, Skënder Gjinushi, gjithashtu drejtues i grupit të punës për reformimin e Akademisë. Projektligji i dalë prej tij është në proces diskutimi në komisionin parlamentar të edukimit dhe mjeteve të informimit publik. Kryetarja e këtij komisioni i bën thirrje të tërhiqet.

“Mendimi shkencor nuk mund të jetë pjesë e skemës politike. Edhe kandidati për kryetar i akademisë së shkencave është pikërisht një ish-kryetar partie në koalicionin qeveritar, i cili ka dhënë dorëheqjen katër ditë më parë. Është një ish-kryetar i Kuvendit të Republikës së Shqipërisë dhe më parë akoma, ish-ministër në periudhën e komunizmit dhe diktaturës. Edhe shkencën, ne politikanët e partive politike do ta drejtomë zoti Skënder Gjinushi? Zoti Gjinushi, tëhiquni nga zgjedhjet në Akademië e Shkencave! Mos censuroni kornizën e mendimit shkencor në Shqipëri”, tha ajo.

Sipas Dhimitrit, zgjedhjet në Akademinë e Shkencave nuk duhet të mbahen pasi janë të jashtëligjshme.

“Zgjedhjet e pretenduara janë të pagjetura me boshllëqe në legjitimitetin e tyre ligjor, të nxituara, vënë komisionin dhe Kuvendin përpara faktit të kryer, të padobishme për reformimin e Akademisë së Shkencave, paradoksale pasi zgjedhin drejtues me ligjin që vetë Akademia do të ndryshohet. Jo serioze dhe të paprecedenta në historinë e kësaj Akademie qysh prej krijimit të saj”, tha Dhimitri.

Zgjedhjet në Akademinë e Shkencave vijnë dy vjet pas vendimit të kryeministrit Edi Rama për ta reformuar këtë institucion. Të drejte vote për të zgjedhur strukturat drejtues të saj kanë 44 akademikë./ABC News Albania 24/7

TAULANT-BALLA-1280x731.jpg
ad min13:27 | 30/04/2019

Partia Socialiste ka firmosur marrëveshjen me 23 parti aleate për të shkuar në zgjedhjet e 30 Qershorit së bashku nën një sigël të vetme, “Aleanca për Shqipërinë Evropiane”. Sa i përket propozimit të opozitës së bashkuar për t’u ulur në një tryezë, kryetari i grupit parlamentar socialist ka përsëritur se nuk do të pranojnë dialog me kushte.

Janë rikthyer pas në kohë socialistët për të garuar se bashku me aleatët nën të njëjtën sigël Aleanca për Shqipërinë Evropiane. 23 partitë dolën nga selia e Partisë Socialistë këtë të martë me një marrëveshje në duar.

Tashmë që aleatët dihen, socialistëve u ka mbetur të mësojnë se kë do të kenë kundërshtarë në zgjedhjet e 30 Qershorit për të cilat këmbëngulin se do të zhvillohen.

Në listat e partive të regjistruara në Komisioni Qendror të Zgjedhjeve opozitarët që do ti vihen përballë Partisë Socialiste janë Bindja Demokratike e Astrit Patozit, Partia Zgjidhja e Koço Kokëdhimës, Bashkimi Liberal Demokrat e drejtuar nga Arian Starova, Partia për Liri, Demokraci dhe Etikë e Arian Galdinit, Bashkimi Demokrat Shqiptar me kryetar Ylber Valteri, Partia Ora e Shqipërisë e drejtuar nga Zef Shtjefni, si dhe Partia Kombëtare Konservatore e drejtuar nga Kujtim Gjuzi. Asnjë prej këtyre emrave duket se nuk është fiksuar në memorien e socialistëve.

Ndërkohë fushata e partisë më të madhe në vend është përqendruar në mesazhet për forcat politike që nuk janë regjistruar në Komisionin Qendror të Zgjedhjeve.

Nuk flet me të njëjtën siguri Taulant Balla për propozimin e aleatëve të Partisë Demokratike për tu ulur në një tryezë të thirrur nga presidenti I republikës.

Socialistët kanë hedhur hapin e radhës drejt zgjedhjeve të 30 Qershorit me firmosjen e koalicionit të ri me 23 partitë i cili do të regjistrohet në dy Maj në Komisionin Qendror të Zgjedhjeve./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono