siguri

ogerta.jpg
G. P.16:55 | 16/11/2018

Pas Shtëpive të Fëmijëve, çdo institucion përkujdesi për të moshuarit dhe personat me aftësi të kufizuar do të pajiset me sistemin e kamerave, me qëllim monitorimin e të gjitha veprimeve që mund të cënojnë sigurinë fizike dhe psikologjike të atyre që janë më të pambrojturit.
Lajmin e ka dhënë nga Durrësi, Ministrja e Shëndetësisë dhe Mbrojtjes Sociale, Ogerta Manastirliu.

Ajo ndodhej në shtëpinë e fëmijëve në Shkozet, ku u aplikua për herë të parë sistemi i kamerave. Në Shtëpinë e Fëmijëve Durrës marrin shërbim 20 fëmijë, ku 8 prej tyre jetojnë në një ambient familjar, si në çdo shtëpi.

Ndërkohë për të rritur përkujdesin është  kryer inspektimi i plotë i 9 institucioneve sociale për fëmijët dhe është bërë i mundur një vlerësim paraprak i kushteve fizike dhe sigurisë së tyre, për t’u përshtatur dhe organizuar me modelin shtëpi–familje./abcnews.al

GRUEVSKI-AZILI-MBULIM.mpg_snapshot_00.07-1280x720.jpg
ent ela18:27 | 14/11/2018

Budapesti zyrtar ka pranuar kërkesën për azil të Nikolla Gruevskit. Duke konfirmuar lajmin, zyra e kryeministrit Orban ka deklaruar se pranimi është bërë për arsye sigurie. Ndërkohë, gjatë ditës policia maqedonase ka arrestuar dy ish-zyrtarë të lartë, që si ish-kryeministri, po përgatisnin arratinë nga frika e proceseve gjyqësore.

Autoritetet në Hungari kanë pranuar kërkesën e ish-kryeministrit maqedonas Nikolla Gruevski, i cili pak ditë më parë u arratis nga vendi i tij për t’i shpëtuar dënimit me 2 vjet burg. Lajmin e bëjnë të ditur mediat maqedonase, që citojnë burime pranë kabinetit të kryeministrit hungarez Viktor Orban. Sipas burimeve, Budapesti zyrtar ka pranuar përkesën e Gruevskit për arsye sigurie dhe do ta shqyrtojë atë në bazë të ligjeve hungareze dhe atyre ndërkombëtare.

“Duke pasur parasysh se Gruevski ka qenë për 10 vjet kryeministër dhe duke marrë në konsideratë rrethanat e sigurisë, autoritetet tona i kanë lejuar atij të dorëzojë zyrtarisht kërkesën për azil”, kanë deklaruar burimet e cituara nga mediat maqedonase.

Qeveria hungareze ka nënvizuar se nuk dëshiron të përzihet në punët e brendshme të shteteve sovrane, ndaj dhe kërkesa e ish-kryeministrit do të shqyrtohet vetëm në aspektin juridik. Ndërkohë, më herët gjatë ditës autoritetet në Maqedoni ndaluan dy ish-zyrtarë të qeverisë, që sikurse Gruevski po bënin gati arratisjen nga vendi. Me kërkesë të Prokurorisë Speciale policia arrestoi ish-ministrin e Transporteve, Mile Janakievski dhe ish-sekretarin e qeverisë, Kirill Bozhinovski, të cilët më pas u dërguan në burgun e Shutkës.

Më pas, Gjykata Themelore në Shkup vendosi ndaj tyre masën e arrestit me 30 ditë paraburgim. Janakievski po hetohet për 5 çështje të ndryshme nga Prokuroria Speciale, ndërsa Bozhinovski është subjekt hetimi në çështjen “Titanik”, që ka të bëjë me parregullësitë zgjedhore./abcnews.al

nato.png
G. P.08:09 | 01/11/2018

Në muajin Nëntor Këshilli i Sigurisë së Kombeve të Bashkuara do të mblidhet për të diskutuar për Kosovën. Në këtë konferencë pritet të raportojë i dërguari special dhe shefi i UNMIK, Zahir Tanin.

Këshilli i Sigurisë së Kombeve të Bashkuara do të mbajë një konferencë për situatën në Kosovë në muajin nëntor. I dërguari special dhe shefi i UNMIK-ut, Zahir Tanin do të raportojë për zhvillimet aktuale dhe raportin e fundit të Sekretarit të Përgjithshëm.

Serbia do të marrë pjesë në takim me përfaqësues të nivelit të lartë, ndërkohë që Kosova do të prezantohet nga ambasadorja në Shtetet e Bashkuara të AMerikës Vlora Çitaku. Këshilli i Sigurimit e ka bërë praktikë, mbajtjen e takimeve informuese një here në tre muaj. Në muajin Gusht, kur presidenën e Këshillit e kishte Mbretëria e Bashkuar, u vendos të mos mbahej takimi për Kosovën sepse ambasadorja Karen Pierce tha se Kosova nuk kishte kërkuar takime të tilla

Një nga temat kryesore, me të cilën Këshilli i Sigurimit përballet në Kosovë është ruajtja e stabilitetit dhe ulja e tensionit midis Prishtinës dhe Beogradit. Një çështje tjetër është roli që mund të luajë UNMIK për zbatimin e marrëveshjeve ekzistuese midis Beogradit dhe Prishtinës./abcnews.al

russ.png
G. P.10:26 | 31/10/2018

Një shpërthim i fuqishëm është regjistruar mëngjesin e sotëm në selinë rajonale të Shërbimit të Sigurisë Federale në veri të qytetit Arkhangelsk të Rusisë. Mësohet se nga kjo ngjarje një person ka humbur jetën dhe 3 të tjerë mbetën të plagosur. Komiteti rus i antiterroti ka konfirmuar incidentin, por thotë se arsyet e këtij sulmi janë ende të panjohura.

Ky komitet sqaroi se personi që mbeti i vdekur ishte ai që shpërtheu eksplozivin në godinën e Shërbimit të Sigurisë Federale. Ndërsa të plagosurit janë 3 punonjës të këtij institucioni rajonal. Ndërkohë, autoritetet ruse kanë hapur një hetim për këtë sulm për të kuptuar natyrën e tij dhe arsyet..abcnews.al

shkodra.jpg
G. P.15:03 | 06/09/2018

Arrestimet e bëra gjatë operacionit të policisë nuk i kanë bindur banorët e Shkodrës se situata do të jetë normale. Ata kërkojnë që shteti të marrë në dorë qytetin sepse krimi i ka terrorizuar.

RENEA u tërheq nga Shkodra.

Me vendosjen e katër vetëve në pranga midis tyre një të fisit Bajri, duket se policia ka përfunduar njëherë për njëherë punë me këtë qytet. Në pamje të parë çdo gjë duket e qetë. Për policët është një ditë normale pune dhe jo aksion.

“Një ditë pas aksionit “Forca e Ligjit” në Shkodër, ku në kryeqendrën e veriut kanë zbarkuar forca të ndrsyhme speciale si forcat RENEA apo Forcat e Ndërhyrjes së Shpejtë sot pranë drejtorisë vendore të qarkut të policisë Shkodër situata duket krejtësisht normale”, raporton nga Shkodra gazetari Simon Shkreli.

Por situata normale nuk është për qytetarët. Janë të shqetësuar dhe nuk besojnë se lufta midis grupeve kriminale ka përfunduar. Secili ka fabulën e tij pse Shkodra është e terrorizuar.

Madje dinë edhe emrat e të fortëve. Por këto i pëshpërisin vetëm brenda mureve të shtëpisë. Kurse në publik i kërkojnë shtetit llogari.

“Në Shkodër është vetë populli duke mbajtur sigurinë, shteti jo”, tha një qytetar.

“Kanë qenë me kohë”, tha një tjetër.

“S’jemi për këto punë. Jemi ushtarakë mos na ngatërro me këto punë”, u shpreh një qytetar tjetër.

“Sot për sot nuk ka fort siguri”, u shpreh një tjetër.

“Po nuk u ndëshkua krimi ai merr superxhiro”, tregoi një tjetër qytetar.

“Si në Shkodër, si në Shqipëri siguri nuk kemi pas sot e 20 e ca vjet”, u shpreh qytetari shkodran.

“Ka siguri nëse je i drejtë, je i saktë”, tha një qytetare.

Në rrugët e Shkodrës postoblloqet me blinda janë hequr. E nuk dihet nëse do ketë operacione të tjera. Por ajo që dihet është fakti se pas atentateve të fundit, me 5 jetë të marra, armët do të përdoren përsëri.

Më i fundit ekzekutim ishte ai i biznesmenit Arian Ferracaku, për të cilin thuhet se nuk kishte asnjë konflikt dhe as ishte i implikuar në rrjetin kriminal./abcnews.al

1.1.jpg
G. P.12:17 | 29/08/2018

Autoriteti Kombëtar i Ushqimit mbyll dy restorante po ushtronin aktivitet në kundërshtim me standardet e sigurisë ushqimore si dhe në kushte të rënda higjeno-sanitare. Sipas AKU-së gjatë kontrollit në restorantin “Veli Krosi” në Klos u konstatuan ambiente me myk, lagështi si dhe mjetet e punës në kuzhinë ishin totalisht të amortizuara.

Ndërsa nga trupa inspektuese Vlorë u konstatua një tjetër restorant në Palasë me kushte të renda higjeno-sanitare si dhe i paregjistruar në QKB. Ndaj subjekteve u mor masë administrative gjobë 1 milion e 300 mijë lekë, si dhe u  bllokimi i menjëhershëm i aktiviteteve.

jacob-abdellak-bomb-hoax-0.jpg
G. P.10:37 | 17/08/2018

Një pasagjer ajror, bëri një rreng anonim për një alarm për bombë drejt fluturimit të tij, për shkak se nuk e arrinte dot në kohë.

Librashitësi Jacob Meir Abdellak, telefonoi policinë tetë minuta para se avioni i tij të nisej nga aeroporti i Londrës për në Los Anxhelos. Autoritetet u detyruan që të shtynin fluturimin me 90 minuta, për të rinisur kontrollet e tyre të sigurisë. Abdellak arriti në aeroport shumë më vonë se ç’lejohej dhe filloi të bëhej agresiv me stafin e agjencisë ajrore kur e ndaluan që të kalonte nëpër filtrat e tyre.

Investiguesit zbuluan numrin e telefonit nga i cili u bë telefonata për alarmin e rremë dhe gjurmuan librashitësin. Ai pranoi se numri ishte tij, por me pretendimin se kishte humbur kartën SIM disa ditë para se të ndodhte ngjarja. Ai u akuzua me përhapje paniku për shkak të shpërndarjes së informacioneve të pa vërteta duke vënë në rrezik jetët e njerëzve. Abdellak u dënua me 10 muaj burg dhe një gjobë rreth 169 euro kundrejt personave që “dëmtoi” me veprimet e tij.

Personat përgjegjës për sigurinë e fluturimeve u shprehën se ata i trajtojnë shumë seriozisht kërcënimeve ndaj fluturimeve të tyre dhe se punojnë gjithmonë me policinë për të mbajtur një stabilitet sigurimi në çdo kohë./abcnews.al

arben-ahmetajj.jpg
G. P.14:46 | 26/07/2018

Projekti “IDEA”, i cili zbatohet për të dytin vit në vendin tonë është një mundësi për sipërmarrësit e rinj që të punësohen. Kështu është shprehur ministri i Financave dhe Ekonomisë, Arben Ahmetaj, gjatë  prezantimit të këtij projekti ku nënvizoi rëndësinë që ka fuqizimi i bizneseve të vogla e të mesme.

Një ide sot është e barabartë me punësim. Vlerësimi është bërë nga program me të njëjtin emër IDEA që është lançuar edhe nga ministri i Financave dhe Ekonomisë, Arben Ahmetaj.

“Projek “IDEA” është një projekt që u mundësohet të rinjve nga mosha 19 vjeç deri në moshën 34 vjeç. Ky program shkon në thelb të objektivit të qeverisë për të promovuar këta të rinj”.

Mbështetje do të thote fonde dhe dije, tha kreu i ministrisë së Financave dhe Ekonomisë, duke vlerësuar së duhen fuqizuar ndërmarrjet e vogla e të mesme.

“Për statistikë dhe jo vetëm, ndërmarrjet e vogla dhe të mesme, zenë 99% të ndërmarrjeve aktive në Shqipëri”.

Por qeveria gjermane nuk e ka kursyer ndihmën financiare gjatë gjithë këtyre vite, sipas ministrit Ahmetaj.

“Për gjatë këtyre 30 viteve Gjermania e ka mbështetur Shqipërinë me më shumë se 1 milardë euro në mënyrë direkte dhe po kaq në mënyrë indirekte”.

Projekti IDEA është iniciativë e “GIZ”, ku janë bërë trajnime në 4 qarqet kryesore të vendit Tiranë, Shkodër, Gjirokastër, Korçë.Në të morën pjesë rreth 100 biznese start-up, mbi mënyrën si të hartojnë dhe realizojnë një plan biznesi.

Në fazën finale të projektit, finalistët prezantuan planet e tyre të biznesit para një jurie eksperte të fushës të cilët shpallën edhe 5 fituesit e ideve më të mira./abcnews.al

durresss.jpg
G. P.15:39 | 21/07/2018

Në plazhin më të madh në vend rojet bregdetare mungojnë. Bashkia kishte lënë afat datën 20 Korrik për të gjithë bizneset, por asnjë prej tyre nuk e ka plotësuar këtë kusht. Ata vazhdojnë aktivitetin.

Pushuese e rregullt në plazhin publik në jo pak raste ka ndërhyrë për të shpëtuar jetë njerëzish. Në mungesë të rojeve bregdetar dhe elementeve të tjera të sigurisë janë këta njerëz të vetmit që futen në det për t’i dhënë ndihmë njëri-tjetrin.

“Vit për vit edhe fëmijët e humbur mundohemi t;i gjemë vetë. Kemi blerë dhe altoparlant edhe fëmijë që desh u mbytën”.

Siguria e pushuesve mbetet parësore për një turizëm të shëndetshëm, por në Durrës asgjë nuk po ndryshon. Pavarësisht paralajmërimeve të shumta institucionale rojet bregdetare ende mungojnë. Të vetmit që ata shohin janë patrulla të efektivave të policisë që lëvizin në tokë, kurse siguria në det mungon.

Zyrtarë të Bashkisë së Durrësit deklaruan se 20 Korriku do t’i gjente në terren për të larguar të gjithë plazhet private që nuk zbatuan ligjin. Por, pavarësisht se afati ka kaluar bizneset jo vetëm që nuk janë mbylluar por vazhdojnë të ushtrojnë aktivitetin e tyre pa u shqetësuar nga askush./abcnews.al

flamuri.jpg
G. P.14:42 | 13/07/2018

Në Shëngjin për herë të parë po vendosen standardet e sigurisë. Bizneset në bashkëpunim me Ministrinë e Shtetit për Mbrojtjen e Sipërmarrjes kanë vendosur sinjalistikën dhe logjistikën e duhur për sigurinë e pushuesve. Ministrja Qato u bëri apel të gjitha bizneseve në bregdetin e vendit të veprojnë si në atë të Shëngjinit.

Pushuesit në Shëngjin do të jenë më të sigurtë. Ky flamur jeshil i vendosur për herë të parë në plazh të njofton për not të qetë.

Në zonën ujore ka dhe bova kufizuese. Kurse vrojtuesit tashmë janë ngjitur në kullat e shpëtimit. Ata mbulojnë 2 km vijë bregdetare.

Bizneset që operojnë në këtë bregdet po bashkëpunojnë me Ministrinë e Shtetit për Mbrojtjen e Sipërmarrjes për një sezon të mirë turistik.

“Të gjithë bizneset që operojnë në vijën bregdetare të kontribuojnë në rritjen e sigurisë së plazheve”, tha Sonila Qato.

“Më vjen mirë që edhe Shëngjini po kthehet në modën e të rinjve dhe të rejave”, tha ministrja Nikolla.

Prej ditësh Bashkia e Lezhës ka ngritur grupe pune vetëm për çështjet e sigurisë dhe duket që situata po ndryshon për mirë.

Deri pak kohë më parë, ky bregdet pavarësisht numrit të larte të turisteve, nuk ofronte standarde në shërbim./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono