shqiptaret

polizia-recupera-giorielli.jpg
Sej rie18:00 | 23/05/2019

Policia e Shtetit në Pordenone në Italisë vazhdon hetimet kundër një bande hajdutësh nga Shqipëria. Në vazhdim të aktiviteti hetimor, janë zbuluar vendet ku grupi fshihte sendet e grabitura në Veri-Lindje të Italisë. Nga Nëntori i vitit 2018 deri në Shkurt të vitit 2019, banda e shqiptarëve akuzohet për 66 vjedhje të kryera nëpër shtëpi dhe vila, ku ata grabisnin bizhuteri, para dhe armë zjarri.

Policia ka arritur të konfiskojë  1.3 kilogramë stoli me vlerë rreth 1 milion euro dhe një pistoletë dhe një kasafortë me municione. Të gjitha këto sende janë gjetur në një shtëpi të braktisur në një pyll midis Sacile dhe Conegliano.

Banesa u zbulua falë analizës së të dhënave të marra nga celularët e tre shqiptarëve dhe lëvizjeve të tyre. Policët kontrolluan zonën e pyllëzuar dhe gjetën shtëpinë e braktisu ku pranë saj ishte edhe një rrjedhë lumi. Aty ata arritën të zbulonin një kasafortë brenda së cilës kishte municione dhe bizhuteri. Policët gërmuan në disa vende dhe arritën të identifikonin disa gropa ku vjedhësit kishin groposur disa xhevahirë dhe një pistoletë.

Grupi i shqiptarëve është arrestuar në Shkurt të këtij viti dhe pjesë e tij ishin: Darjel Prushi, 27 vjeç nga Kruja, me precedent të mëparshëm, me banim në Conegliano.  Edmod Ethemaj, i njohur si “Mondi”, 35 vjeç nga Peqini, jetonte në Conegliano, dhe Nikoll “Niku” Dobrozi, 27 vjeç, nga Mamurrasi pa një vendbanim fiks në Itali.

Grupi akuzohet për 66 vjedhje, por hetuesit besojnë se numri i vjedhjeve mund të arrijnë në rreth njëqind. Deri tani policia ka verifikuar se rreth 2 milionë euro janë të ardhura të paligjshme të përfituara nga vjedhjet e argjendit, orëve, shufrave të arit, si dhe pistoletave dhe municioneve në disponueshmërinë e të arrestuarve, të gatshëm për t’i përdorur ato edhe gjatë sulmit në mbrëmje dhe natë në shtëpi./abcnews.al

shqiptaret-danimarke.jpg
Sej rie18:30 | 20/05/2019

Shqiptarët tentojnë të ikin ilegalisht drejt Britanisë, duket “thyer sigurinë” e portit Esbjerg të Danimarkës. Media “Dr.dk” ka bërë një shkrim për shqiptarët që tentojnë të hyjnë ilegalisht në port. Madje ka publikuar edhe një video (këtu mund të ndiqni videon) ku shikohen të rinjtë shqiptarë që tentojnë të futen nga ana e pasme e kamionëve, të cilët vendosen në anije dhe destinacion kanë “tokën e premtuar”, Anglinë.

Që nga vera, në portin e Esbjergut është rritur numri i shqiptarëve që fshihen nëpër kamionë dhe tentojnë të shkojnë ilegalisht drejt Britanisë të Madhe.

Në tre muajt e parë të vitit, 54 shqiptarë janë ndaluar në portin e Esbjerg, pasi kanë tentuar të hyjnë në mënyrë të paligjshme në Angli.

Për transportuesit “Henrik Skov Christensen”, që shpesh eksporton ushqim me kamionë, ka pasoja të mëdha financiare kur njerëzit fshehin në ngarkesë.

“Kur ata fshihen dhe ulen midis ushqimit për tre deri në pesë ditë, ushqimet prishen”, thotë një zyrtar i “Henrik Skov Christensen”.

Udhëtimi nëpër Kanalin Anglez zgjat 18.5 orë. Nëse shqiptarët gjenden në kamion kur zbarkojnë në bregdetin anglez, gjoba të mëdha i vendosen edhe kompanisë së kamionëve ku fshihen shqiptarët.

Për median e Danimarkës ka folur një shqiptar, i cili ka tentuar disa herë të iki drejt Britanisë. Pranë portit ndodhet një shtëpi e braktisur ku shqiptarët gjoja janë duke qëndruar para se të tentojnë të udhëtojnë ilegalisht drejt Anglisë.

Pas dy tre trokitjesh në derën e shtëpisë së braktisur, ajo hapet nga një i ri me flokë të errët dhe mjekër. Shqiptari i cili dëshiron të mbetet anonim flet për tentativat që ka bërë për të kaluar ilegalisht drejt Britanisë.

“Me thënë të drejtën edhe unë kur kam ardhur thjesht e kam provuar dy ose tri herë me ik. Një burrë këtu më ndihmoi. Ai më dha një vend për të fjetur dhe më ofroi punë”, tha i riu shqiptar.

Para se shqiptari të shkonte në Danimarkë, ai kishte ndjekur shkollën e mesme në vendin tonë. Por sipas tij, ai nuk kishte qenë nxënës i mirë në mësime dhe kishte vendosur të emigronte.

“Doja me ik në Angli ngaqë më pëlqen vendi. E kam provuar edhe herë të tjera. Nuk është se e kam pas ëndërr, por mendoj se është një mënyrë jetese më e mirë atje”, tha ai.

Problemi me shqiptarët  ka bërë që porti i Esbjerg të rrisë sigurinë me kamera, gardhe më të larta me tela me gjemba dhe më shumë patrulla.Për këtë situatë ka folur edhe Michael Fries, i cili është përgjegjës për sigurinë e portit në Portin e Esbjerg.

“Janë prerë telat dhe janë krijuar vrima ku ata zvarriten poshtë gardhit me gjemba. Pasi hyjnë ata shikojnë situatën dhe presin mbulesën e kamionëve duke u fshehur brenda tyre”, thotë Michael Fries.

Shqiptarët mund të udhëtojnë lirisht në Danimarkë, sepse shtetasit shqiptar mund të udhëtojnë pa viza në vendet e BE. Por shqiptarët nuk kanë të drejtë të hynë në Britani pa u pajisur me viza./abcnews.al

kronika.jpg
nev ila16:35 | 16/05/2019

Gjakmarrja, një fenomen i lashtë në veri të vendit dhe jo vetëm, vijon të ngujojë shqiptare dhe të marrë jetë të pafajshme. Sipas një raporti të komitetit të Pajtimit Mbarëkombëtar, Tirana është qyteti me numrin më të madh të personave të vrarë sipas “Kanunit”.

Gjakmarrja vijon të ngujojë shqiptarë. Tirana, qyteti me numrin më të madh të personave të vrarë me “kanun”.

Fenomeni i gjakmarrjes ka qenë pjesë e pandashme e shoqërisë shqiptare, kryesisht në trevat veriore të vendit. Por sipas sociologëve ai vijon të jetë një fenomen mjaft i ndeshur dhe shqetësues, edhe pse vendi ynë aspiron të bëhet pjesë e BE-së.

Sociologët evidentojnë edhe disa nga faktorët që ndikojnë në këtë fenomen, duke veçuar mungesën e ndëshkueshmërisë. Prej vitesh Komiteti i Pajtimit Mbarëkombëtar punon për shuarjen e hasmërive mes familjeve dhe faljen e gjakut.

Kreu i këtij komiteti, Gjin Marku thekson janë të ngujuar qindra fëmijë që mbeten të paarsimuar apo qindra kryefamiljarë që nuk kanë mundësi të punojnë.

Sipas Markut, moszbatimi i urdhrave të mbrojtjes të lëshuar nga gjykatat për persona të ndryshëm në konflikt, është bërë shkak për ngujimin e tyre.

Sipas raportit të Komitetit të Pajtimit Mbarëkombëtar gjatë viteve të fundit për shkak të gjakmarrjes dhe hasmërive janë vrarë 69 persona në vitin 2017, 74 të tjerë gjatë 2018 dhe gjatë muajve të parë të këtij viti, 34 persona.

Qytetet  me numrin më të madh të personave të vrarë për gjakmarrje janë Tirana dhe Shkodra, e pas tyre, me një numër të vogël, renditen Fieri, Vlora, Berati, Durrësi dhe Elbasani.

Disa nga Bashkitë me problematike për numrin e të vrarëve në rang vendi janë Tirana me 26% dhe Shkodra me 20%, ndërsa të tjerat me 4 %./ ABC News Albania 24/7

 

mentor-Nazarko-1280x719.jpg
Sej rie21:30 | 03/05/2019

Mentor Nazarko i ftuar në studion e emisionit “Provokacija” ka folur mbi zhvillimet kryesore të samitit të Berlinit. Ai supozoi se arsyeja se pse liderët shqiptarë simuluan zhgënjim pas kthimit nga Gjermania, lidhej me mosçeljen e negociatave nga Shqipëria dhe mosmarrjen e liberalizimit të vizave nga Kosova në qershor.

 

“Udhëheqësia jonë, opozita, media nuk janë shkëputur ende nga sindromi i të përdorurit të forumeve të mëdha botërore, apo evropiane për konsum të brendshëm. Disa prej tyre janë përpjekur që të krijojnë idenë se në atë samit mund të merrej liberalizimi i vizave dhe çelja e negociatave,ose se ato nuk do merreshin. Por objektivi kryesor i fuqive organizatore me këtë samit ishin zhbllokimi i negociatave Kosovë-Serbi.  Në samit u bë e qartë  nga Franca posaçërisht se pa u zhvilluar zgjedhjet evropiane, këto çështje nuk do të trajtohen, sepse do të ushqenin me karburant elektoral të djathtën e Le Penit. Në këtë kuptim përgjigjia ishte negative para së të shkohej aty. Nga pikëpamja teknike elementi që përcakton çeljen e negociatave është raporti i Komisionit Evropian. Ky raport nuk ka dalë dhe madje thuhet se Franca e ka shtyrë qëllimisht daljen e tij për në fund të këtij muaji. Në momentin kur del ky raport në fund të muajit, shtetet e marrin në shqyrtim një nga një dhe pastaj Këshilli Europian- mbledhja e udhëheqësve të gjithë shteteve të Evropës mund të vendoste po ose jo për çeljen e negociatave. Për dy vendet që janë në radhë Shqipëria dhe Maqedonia për çeljen e negociatave do të flitet vetëm në vjeshtë”.

 

Me tej ai ka folur mbi dy rezultatet pozitive që u arritën sipas tij në samit.

“Nëse do të flasim për rezultate reale pozitive, më së pari është rikthimi i vëmendjes së Francës në Ballkan. Përkundër shfaqjes së aktorëve të tretë Kina, Rusia, Turqia në Ballkan, Franca e cila ngjante pak e tërhequr sot po shfaqet fuqishëm nëpërmjet një strategjie të quajtur “Strategjia e Francës për Ballkanin” dhe me marrjen e stafetës prej Gjermanisë. Zakonisht ka qenë Gjermania ajo e cila ka qenë protektore, mbikqyrëse e Ballkanit. Kjo është risia e parë,  shumë e rëndësishme. E dyta është fakti që u zhbllokuan negociata Kosovë-Serbi. Vuçiç tha disa muaj rresht se ne nuk ulemi pa zhbllokuar taksën ndërkohë që e vërteta është se bisedimet do të zhvillohen në fund të qershorit me moderimin e Presidentit Macron edhe pa e hequr taksën Kosova. Vuçiç u detyrua ta gëlltisë turpin duke thënëse pa heqjen e taksës suksesi i bisedimeve në Francë me Presidentin Macron është i pasigurt. Një shprehje relativizuese për të justifikuar në njëfarë mënyrë dështimin”- tha ai. Megjithatë ende nuk dihet se çfarë impakti ka refuzimi i kërkesës franceze për heqjen e taksës.

Duke folur gjithnjë për samitin e Berlinit, Nazarko u shpreh se atje nuk u mor qëndrim kategorik kundër shkëmbimit të territorit, i cili në fakt është një konvencion që në gojën e bashkëbiseduesve merr forma të ndryshme foljore: korrigjim kufijsh, shkëmbim territori, apo demarkacion. Tema kryesore e samitit ishin bisedimet Kosovë-Serbi, ndaj për suksesin e samitit, (zhbllokimin e këtyre bisedimeve) ishin ftuar edhe  udhëheqësit e shteteve fqinje, ambienti përreth këtyre shteteve, aq i domosdoshëm për suksesin e tyre. Gjermani e ka mbajtur qëndrimin e saj të palëkundur për çdo lloj hipoteze të prekjes së kufijve ekzistues, por ama në asnjë qëndrim publik të Kancelares, apo dhe të zëdhënësit të saj Siebert, nuk kemi pozicionim në këtë drejtim, përveç shprehjes  se “presimnjë marrëveshje që të mos lëndojë të tjerët”. Pozicionii Francës, publik dhe jo publik mbetet searritja e marrëveshjes është kryesorja, pavarësisht formës së saj. Me angazhimin e ri francez të nivelit të lartë, Çështja e Kosovës po trajtohet në nivelin më të lartë global dhe është diçka e pazakontë kjo në këto vite. Nuk duhet harruar dhe angazhimi unik i Presidentit Trump ndonëse kur ai erdhi në pushtet, filloi një politikē të tërheqjes nga vatra krize botërore”- tha Nazarko./abcnews.al

aleksander-vulin.jpg
G. P.15:20 | 02/05/2019

Ministri serb i Mbrojtjes Aleksandër Vulin, duke përdorur një term me konotacion negativ për shqiptarët, u shpreh se mbështet idenë e një kufiri të fortë me Kosovën.

Ideja për përkufizimin apo ndarjen e Kosovës duket se nuk ka vdekur. Në Serbi, pas takimeve të Berlinit, komentet nuk kanë qenë të shumta për këtë ngjarje, përveç atyre të vet presidenti.

Ministri i Mbrojtjes së Serbisë, Aleksandër Vulin, në një tubim partiak dhe qëndrim personal ka thënë se është e nevojshme të ketë një përkufizim pasi bashkësia ndërkombëtare duhet të vendos është apo jo për një zgjidhje. Vulin ka përdorur publikisht shprehjen “shiptari”, një term pezhorativ sidomos për shqiptarët e Kosovës.

Aleksandër Vulin: Unë jam që sa më parë të përkufizohemi me shqiptarët.

Vulin ka thënë se dikur mbase ka dyshuar në këtë ide të ndarjes, por tani është gati I sigurt se kjo është zgjidhja më e mirë për problemin e Kosovës dhe ka dhënë arsyet.

Aleksandër Vulin: Sa më parë që të kemi një kufi të forte mes nesh dhe atyre, aq me pare do të mund të merremi me veten dhe jo me atë që duan kriminelët e pagjykuar të luftës. Nëse dikur kam dyshuar që nuk kam të drejtë, tani kur e shoh që Gjermania, Kroacia, Shqipëria, shqiptarët në Kosovë, një pjesë e Bosnjës dhe Hercegovinës, Mali i zi dhe Maqedonia veriore janë kundër, kjo domethënë që është gjë e mirë për Serbinë.

Marko Millosavljeviç, nga nisma e të rinjve për të drejtat e njeriut e sheh këtë si gjuhë urrejtjeje të përzier me ide politike për zgjidhjen. Një gjuhë e tillë nuk konsiderohet e drejtë.

Marko Millosavljeviç: Kjo tregon se shqiptarët ende konsiderohen si armiq në Serbi dhe këtë e dëgjojmë nga zyrtarët, pavarësisht se për shprehje të tilla ka vendime gjyqësore që konsiderohen të ndaluara. Kjo është në kontradiktë me atë që flasin se janë për stabilitet dhe pajtim./ABC News Albania 24/7

bime-medicinale.jpg
nev ila11:35 | 02/05/2019

E perditshmja greke, Protothema, bën me dije se, janë arrestuar ditën e sotme, dy shqiptarë të moshës 20 dhe 24 vjeç, në kufirin shqiptaro-grek të rajonin e Kosturit. Dy të rinjtë, ishin duke mbledhur bimë medicinale në shpatin e malit të Gramozit, në pjesën e kufirit grek.

Të rinjtë kishin arritur të mblidhnin, rreth 27 kg të kësaj bime, me qëllim shitjen e saj në tregun shqiptar, por janë pikasur nga policia kufitare greke, e cila ka bërë sekuestrimin e bimës dhe arrestimin e dy të rinjve shqiptarë.

Media greke bën me dije se kjo është hera e dytë, brenda pak ditëve, që kapen shqiptarë, të cilët tentojnë të kalojnë kufirin në mënyrë të paligjshme./abcnews.al

droge-dhe-kokaine.jpg
nev ila15:26 | 30/04/2019

Mbante të fshehur në shtëpi, kokainë, hashash, marihuanë dhe një pistoletë të vjedhur të kalibrit 7,65. Arrestohet 36 vjeçari shqiptar bashkë me shokun e tij.

Mbrëmjen e djeshme një patrullë policore e angazhuar në lagjen “Tore Angela” në Romë, gjatë kontrollit rutinë, ndaloi dy persona të cilët të nervozuar u përpoqën të evitonin autoritetet. 36 vjeçari me iniciale L.E, nuk ka dashur të tregojë se ku banonte, gjë e cila thelloi dyshimin e policisë.

Megjithatë, autoritetet kanë arritur të gjejnë banesën e shqiptarëve dhe të kryejnë kontrollin e banesës. Gjatë këtij kontrolli u gjetën rreth 200 doza kokainë, hashash dhe marihuanë, gjithashtu dhe një pistoletë e tipit Beretta, e kalibrit 7,65. Pistoleta ishte e fshehur në pjesën e pasme të lavamanit të tualetit, në shtëpinë e dy shqiptarëve, e cila rezultoi e vjedhur në Siena në vitin 2014.

Gjatë hetimit paraprak rezultoi se 36 vjeçari, është me precedent kriminal ku është arrestuar edhe më parë, për “mbajtje të armëve dhe municioneve luftarake”./abcnews.al

iStock-905933176-1280x853.jpg
nev ila12:07 | 29/04/2019

Amerikanët janë ndër njerëzit më negativë në Tokë, është rezultati i sondazhit më të ri.

Gallup ka dalë në përfundimin se, më shumë se gjysma e amerikanëve kanë deklaruar se ishin ndier të stresuar, ndërsa 45 % të tjerë  ishin të shqetësuar, dhe 1 në 5 amerikanë është ndjerë i nervozuar.

Të pyetur për ndjenjat e tyre të një dite më parë, më shumë se gjysma e amerikanëve të anketuar thanë se ishin ndier të stresuar. Shifër kjo shumë më lart se mesatarja globale prej 35 %.

Renditja e Gallup vendosi Shtetet e Bashkuara në vendet e para, ndër popullsitë më të stresuara për vitin 2018, bashkë me Iranin, Shqiperinë dhe Sri Lanka.

Greqia ishte ajo që kryesonte tabelën me 59 për qind të popullsisë, e ndjekur nga Filipinet në 58 për qind, Tanzania në 57 për qind dhe më pas Shqipëria me 55%.

Greqia, vendi evropian i goditur nga kriza financiare e vitit 2008, e ka lënë atë në krye të popullsive më të stresuara përgjatë këtyre 7 viteve të fundit.

Por sipas Gallup, ekonomia nuk duket të jetë problem për nivelet e stresit amerikan.

Në fakt, studimi tregon se nivelet e emocioneve negative janë edhe më të larta se ato që ishin gjatë Recesionit të Madh.

Jon Clifton, Drejtues global i Gallup, tha në raport se: “Përgjigja, nëse paraja me të vërtetë blen lumturinë është ende larg, por ky raport u jep mendimtarëve global një ide se, kush ka jetesën më të mirë dhe më të keqe në gjithë botën”./abcnews.al

erisa-ballkani.jpg
nev ila18:43 | 28/04/2019

Emigrimi i të rinjve nga Shqipëria drejt Perëndimit, peripecitë dhe vështirësitë e tyre kanë qenë temë e festivalit “Ballkan Trafik 2019”, i mbajtur në Belgjikë.

Shqiptarët midis tingujve të gëzuar dhe vështirësive në emigrim. Kështu janë futur historitë e shpirtrave poetikë të trazuar dhe hareja e muzikës popullore shqiptare në Festivalin “Balkan Trafik” 2019. Performancat shqiptare kanë filluar si një dasmë e madhe për të shkundur prej supeve lodhjen dhe mendimet gri, rimbushjen e energjive nga historitë e forcës që përcjellin malet shqiptare e mbylljes në mënyrë filozofike në mesnatë: të bashkekzistencës shqiptare me atë evropiane :

Nicolas Wieërs, organizator i festivalit “Balkan Trafik” shprehet se:

Të arrish diversitetin e kulturave nuk është e lehtë. Në Bruksel, shqiptarët rrinë me njëri tjetrin, serbët me njëri tjetrin, rumunët me njëri tjetrin. Është e vështirë të arrish komunikimin midis komuniteteve. Ndërkohë kur sjell një grup si “Rinia”, kapërcehet dimensioni i komunitetit dhe magjia e festivalit vepron mbi të gjithë”.

Femra shqiptare ka qenë në qendër të vëmendjes. Një shkëmbim historish femrash që kanë emigruar nga Ballkani në Belgjikë. Historitë e atyre që kanë kapërcyer vështirësitë e emigrimit 20-30 vite më parë përballë sfidave që kalojnë të tjera sot në emigrim. Një projekt i ideuar dhe koordinuar nga Shqipe Kaçiu, venë në skenë nga Ana Romano e shoqëruar nga “Melosi Kuq e Zi”: Një dalje nga hija e mundimit  të pazë në shkëlqimin e një festivali ….

“Nëpërmjet këtyre atelieve, kanë kaluar mbi 30 gra dhe vajza që vijnë  nga të gjitha trevat e Ballkanit por kryesisht gra shqiptare nga Maqedonia, Kosova dhe Shqipëria. Ky projekt nxjerr në pah, se kush janë këto gra, si i kanë kaluar këto vështirësi, si i kanë përcjellë ato”, u shpreh Shqipe Kaçiu, koordinatore e këtij festivali.

Dhe gërshetimi i historive të emigrimit shqiptar ndërthuret me historinë e Zenel Laçit, i cili  ka korrur sukses të merituar sipas kritikës belge me pjesën e tij të teatrit “Fritland”. Një  shqiptar që jetonte në mendjen e tij me poetin francez Arthur Rimbaud,  që u bë një institucion i patateve të skuqura në Bruksel dhe sot performon në skenat e Brukselit.

Në këtë mënyrë,  kur belgët do provojnë patatet tona, do harrojnë që jemi të huaj, sepse në gojën e tyre do të mbetet  vetëm shija e patates së skuqur të freskët”, thekson aktori Zenel Laçi.

Sipas organizatorit të festivalit, Nicolas Wieërs , një nga risitë e festivalit është dhënia e hapësirës së duhur së rrymave të të rinjve në Ballkan, që u pëlqye në Bruksel:

Nicolas Wieërs, organizator i festivalit “Balkan Trafik” tha se:

“Atë që kam dëgjuar nga artistët e Ballkanit, është që etnosi është i rëndësishëm , por duan të tregojnë gjithashtu që artistë nga Ballkani mund të bëjnë edhe xhaz apo rap ndërkombëtar. Kur dëgjon grupin e Vasil Hadzimanov nga Serbia është një xhaz ndërkombëtar. Kur dëgjon raperin Elinel nga Kosova, rapi i tij është po ashtu ndërkombëtar. Elinel ishte shumë i kënaqur me pritjen e publikut, Franky i Bosnjê-Hercegovinës po ashtu. Raperët rumunë erdhën  edhe pse ishin Pashkët Ortodokse. Shkurt, ishte një gërshetim i ri i performancave nga Ballkani”.

Përveç kulturës së Ballkanit, iu la vend edhe politikës përmes arritjes domethënëse të marrëveshjes që solli përfundimisht emrin “Maqedoni e Veriut”. Festivali Balkan Trafik zhvillohet çdo vit në Bruksel me muzikën, vallet, kinematografinë, letërsinë dhe artet pamore të vendeve të Ballkanit./abcnews.al

maqedoni-5.jpg
G. P.18:50 | 26/04/2019

Debati politik mes kandidatëve presidencialë në Maqedoni ka patur në fokus shqiptarët. Gjatë replikave, kandidatja Gordana Siljanovska ka akuzuar LSDM-në për episodet e verifikuara në Gostivar e Tetovë. Ndërsa Stevo Pendarovski është përgjigjur duke ia faturuar përgjegjësinë VMRO-së.

Ashtu siç pritej, pjesa më e nxehtë e debatit të parë të rrethit të dytë mes dy kandidatëve për President ishte për shqiptarët. Të dy kandidatët i numëronin të bërat e qeverive të kaluara ndaj shqiptarëve dhe tentonin që fajin t’ia hedhin njëri-tjetrit.

Gordana Siljanovska Davkova, kandidate për presidente: “Kam frikë se keni qenë të shpërblyer për aksionet e “suksesshme” në Gostivar dhe Tetovë. Episodi më turpshëm i politikës maqedonase ndaj shqiptarëve. Rastet si Ladorishta, Bit Pazari, Tetova, nuk harrohen”.

Stevo Pendarovski, kandidat për president: “Gjatë rastit të Ladorishtës, unë nuk kam qenë i punësuar në Ministrinë e Punëve të Brendshme. Gjatë kohës së ngjarjeve për Universitetin e Tetovës, unë kam qenë bashkëpunëtor i ri profesional. Ky tip i amnezisë selektive harron se nuk mund ta krahasoni dikë që në vitet ‘90 ka qenë nëpunës civil, me dikë që ka qenë pjesë e qeverisë së Cërvenkovskit dhe LSDM-së në atë periudhë të errët gjatë fazës së tranzicionit tonë”.

Gordana Siljanovska Davkova: “Kam qenë pjesë e qeverisë si përfaqësuese e Liberalëve dhe është mirë që disa nga ministrat shqiptarë të asaj qeverie janë gjallë dhe shëndoshë i dinë mirë qëndrimet e mia për disa nga ngjarjet”.

Por, sipas ish-Ministrit Xhevdet Hajredini, qëndrimet e Siljanovskës aspak nuk kanë qenë ndryshe nga politika e atëhërshme maqedonase karshi shqiptarëve.

Xhevdet Harjedini, ish-ministër: “Në qoftë se punon gjatë kohë bashkë me dikë, marrëdhëniet personale mund të jenë edhe të mira, por kur është fjala për interesat e shqiptarëve, për kërkesat e shqiptarëve të atëhershme, që kishin të bëjnë me arsimin në gjuhën shqipe, ajo aspak nuk ka pasur një rol ndryshe nga partitë tjera”.

Ish-ministri Hajredini kohën e VMRO-DPMNE-së e quan si kohën më të errët në historinë e shtetit, periudhë, që siç thotë ai, kur edhe Siljanovska ka qenë pjesë e ekzekutivit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono