shqiptar

droge-ne-fuci.jpg
G. P.18:06 | 20/10/2019

Një adoleshent shqiptar, sëbashku me një italian janë arrestuar në Itali. Ata u kapën me drogë.

Ngjarja ndodhi në Marano pas një aksioni blic të karabinierëve. Gjithsej u sekuestruan 112 kilogramë marijuanë. Lënda narkotike ishte e fshehur në disa fuçi plastike.

18-vjeçari shqiptar dhe italiani fshihnin edhe 50 gramë hashash, ndërsa iu gjetën materiale për mbështjelljen e drogës, si dhe rreth 50 mijë euro në total.

Deri më tani policia nuk ka bërë publik emrin e dy të arrestuarve. Ndaj tyre rëndon akuza e mbajtjes me qëllim shpërndarjen e lëndëve narkotike./abcnews.al

metalurgjiku-elbasan-1280x715.jpg
nev ila13:50 | 20/10/2019

Tani në territorin e Metalurgjikut në Elbasan hidhen inerte e mbetje të tjera toksike por askush nuk i pengon. Kjo gërmadhë e së kaluarës në qendër të vendit do të vazhdojë dhe për shumë kohë të helmojnë shqiptarët. 

Duket sikur nuk ka për të gjetur kurrë zgjidhje rehabilitimi i territorit të ish-Kombinatit Metalurgjik në Elbasan. Për më shumë se tre dekada me radhë në diktaturë, ai ishte ndotësi më i madh në vend.

Fatkeqësisht ka vazhduar edhe pas viteve 90′ kur u pushuan shumica e uzinave dhe fabrikave në përbërje të tij. Është dashur shumë përpjekje që operatorët e mëdhenj industrialë të vendosin filtrat e ajrit të cilat për hir të së vërtetës shpeshherë nuk vihen në punë.

Ndërkohë dhjetëra ndërmarrje të vogla e të mesme kanë gëluar atje dhe që nuk respektojnë  ligjin për mbrojtjen e mjedisit. Banorë të zonës përreth, të mbështetur edhe nga pushteti lokal kanë protestuar, por duket se biznese të tilla i kanë lidhjet e forta.

Sikur të mos mjaftonin këto, gjatë viteve të fundit në territorin prej 16 milion metra katrorë të ish metalurgjikut janë hedhur dhe vazhdojnë të hidhen inerte e mbetje të tjera toksike.

Dalëngadalë po ngrihen male me skorje të cilat po varrosin disa metra nën tokë helmet e dikurshme. Kurse ujërat industriale hidhen pa asnjë përpunim në Shkumbin.

Në maj të vitin 2016, me një vendim të posaçëm të qeverisë u duk se kjo situatë do të merrte zgjidhje për mirë.

Sipas këtij vendimi, objektet në përbërje të disa uzinave siç janë Uzina e Prodhimit të Çeliqeve, Uzina 12, Uzina e Nikel Kobaltit, Kombinati Energjitik etj, do të nënshtroheshin më parë ankandit e më pas shembjes.

Por duket se pati pak interes për këto objekte dhe ato vazhdojnë të mbeten si gërmadha në këmbë.

Edhe Bypass-i i Elbasanit që është projektuar të kalojë në këtë territor do ta pastronte zonën, por edhe ky projekt ka mbetur në letër, të paktën deri këtë vit. Kështu, ai që është etiketuar si “Çernobyli shqiptar” vazhdon të mbetet një fantazmë në qendër të Shqipërisë dhe duket se do të ekzistojë edhe për shumë vite akoma./abcnews.al

aksidenti-1.jpg
G. P.15:36 | 13/10/2019

Një aksident rrugor i mori jetën një shqiptari në Itali. Sipas asaj që shkruajnë mediat italiane, 65-vjeçari, identiteti i të cilit nuk bëhet i ditur, ishte duke u kthyer nga dasma e vajzës të tij.

Në momentin e aksidentit ndodhej në makinë sëbashku me gruan dhe vajzën tjetër. Mjeti me të cilin po udhëtonte, u përplas me një veturë tjetër, duke lënë të plagosur drejtuesen e saj. Plagë nga aksidenti mori edhe vajza e shqiptarit.

Ngjarja e rëndë ndodhi në komunën Gioia Tauro në Kalabria. Sipas informacioneve të para, për shkak të impaktit të fortë, një prej makinave doli nga rruga, ndërsa tjetra u bllokua në mes të saj.

Deri më tani shkaqet e aksidentit mbeten të paqarta, ndërsa autoritetet kanë nisur punën për të zbuluar rrethanat e plota të ngjarjes./abcnews.al

mirko-shqiptari.jpg
G. P.20:01 | 10/10/2019

“Gati për të vënë në qeli vrasësin e shqiptarit”. Kështu shprehen mediat italiane për Mirko Franzoni-n, italianin që vrau një të ri shqiptar në vitin 2013.

Franzoni ishte dënuar më parë, por Gjykata e Lartë e Kasacionit i vuri vulën duke i dhënë 9 vjet e katër muaj burg. Siç shkruajnë mediat, që nga kjo e enjte, ai duhet të dërgohet në burg.

Ngjarja për të cilën u dënua Mirko Franzoni ndodhi në Dhjetor të vitit 2013. Ai vrau me armë zjarri Eduard Ndojin, 26 vjeç pasi kishte hyrë për të vjedhur në banesën e të vëllait.

Franzoni i ka qëndruar gjithmonë idesë se nuk kishte për qëllim ta vriste të riun shqiptar. Mediat flasin edhe për një hipotezë se, Ndoji kishte hyrë në banesë aksidentalisht, diçka që gjyqtarët nuk e besuan kurrë.

Familjarët e Eduard Ndojit kërkuan 125 mijë euro dëmshpërblim nga familja e autorit. Edhe pse shifra u miratua nga gjykata, asgjë nuk ia dha familjes shqiptare.

Avokatja e familjes Ndoj shpjegoi për mediat italiane se autori i vrasjes nuk ka kërkuar falje dhe nuk ka bërë asnjë gjest ndaj familjes Ndoj që të tregojë shenjë pendimi./abcnews.al

dogana-1.jpg
Autor E08:59 | 09/10/2019

Mediat greke raportojne se shqiptari 49-vjecar ishte cilesuar i rrezikshem, pasi ishte dënuar për përdhunim dhe joshje te fëmijëve, por ishte ende i lirë.

Ne kufi ai eshte zbuluar nga kontrolli i të dhënave të tij dhe policia verifikoi se behej fjale pikerisht per personin qe ishte arratisur.

Mesohet se ai prisje gjykimin nga Apelit, pasi ishte dënuar me nëntë vite e një muaj burg për përdhunim dhe joshje të fëmijëve.

Nderkohe qe me heret, Gjykata Penale e Thebës e kishte denuar me burg për armëmbajtje pa leje.

aksidenti.jpg
G. P.18:38 | 08/10/2019

Familjarët e 35-vjeçarit shqiptar, Redian Abllanica, i cili humbi jetën në një aksident në Itali kërkojnë që të zbardhet e vërteta. Bashkëshortja e tij, Serena Luicietto ka thënë për mediat se duhet të kryhet autopsia.

“Na thanë se hetimet janë mbyllur, por ne duam që të kryhet autopsia. Duket gjithçka e çuditshme. Në asfalt janë akoma shenjat e frenimit. Duam të kuptojmë se çfarë ndodhi. Nuk do ta varrosim tim shoq deri sa ta kuptojmë se çfarë ndodhi”, tha ajo.

Aksidenti që i mori jetën Redian Abllanicës ndodhi në mëngjesin e 4 Tetorit në zonën e Bessica-s. Sipas asaj që shkruajnë mediat, i riu humbi kontrollin e skuterit tip “Yamaha Majesty 400” me të cilin udhëtonte dhe përfundoi në një rrethrrotullim.

Redian Abllanica

Shqiptari kishte qenë tek e ëma, e cila banonte në One di Fonte, ku edhe duhet të kishte kaluar natën në fakt, por zgjodhi të kthehej në banesën e tij. Kjo për shkak se ai donte të shoqëronte dy fëmijët, 3 dhe 6 vjeç, për në shkollë mëngjesin tjetër. Por fatkeqësisht nuk mbërriti kurrë në shtëpi.

“Fëmijët nuk e dinë akoma se babai nuk jeton më. Janë mësuar sepse shpesh ishte larg për punë dhe nuk dyshojnë asgjë. Unë jam takuar me një psikologe. Sëbashku vendosëm që ër të mirën e tyre, t’ia japim lajmin me qes, kur edhe unë ta kem marrë disi vetën”, ka thënë ajo për mediat./abcnews.al

 

berdellima.jpg
G. P.19:28 | 07/10/2019

Të shumta janë rastet që mediat britanike raportojnë për shqiptarët, të cilët shkojnë në ishull me kamion, por përfundojnë pas qelive të burgut.

Fati i njëjtë ka ndjekur edhe Ibrahim Berdellimën, i cili u dënua me 22 muaj burg për kultivim droge. Ai u kap në banesën ku jetonte gjatë një mandati kontrolli të ushtruar nga autoritetet më 11 Shtator të këtij viti.

Aty u gjetën 382 rrënjë kanabis, të cilat ishin ndarë në 5 dhoma të ndryshme. Berdellima nuk komentoi asnjë nga akuzat e prokurorisë, por mësohet se pranoi fajësinë gjatë seancës dëgjimore që u zhvillua disa ditë më parë.

Avokatja mbrojtëse e shqiptarit, Vanessa Saxton, tha se Berdellima kishte arritur në Britaninë e Madhe më shumë se katër vjet më parë i fshehur në pjesën mbrapa të një kamioni.

“Kur arriti në Britani filloi të punonte në industrinë e ndërtimit në Londër, pasi kishte punuar në të njëjtën fushe edhe në Shqipëri. Ka katër vëllezër që jetojnë në atdhe, ndërsa e ëma është e sëmurë. Për shkak të krizës ekonomike dhe operacionit të shtrenjtë  që duhet të paguante për të ëmën, pa si mundësi të vetme të vinte në Britani”, tha ajo.

Sipas avokates, disa persona që nuk e treguan identitetin e çuan në një fabrikë kanabisi dhe i premtuan një rrogë 1000 Paund në muaj.

“Personat që e futën në këtë lloj pune shkonin tek ai çdo tre-katër javë. Në fakt ata e paguan vetëm 200 Paund, para që shërbyen për ushqimin”, tha avokatja.

Ndërkohë gjykatësi i çështjes e dënoi Berdellimën me 22 muaj burg dhe urdhëroi që të shkatërrohej e gjithë sasia e kanabisit që u sekuestrua në banesë.

“Ishte operacion i sofistikuar për rritjen e kanabisit”, tha ai. /abcnews.al

kanabis.jpg
G. P.19:59 | 03/10/2019

“Jo një, as dy… por 1056 rrënjë kanabis”. Kështu e nis lajmin një media greke, e cila bën të ditur se një shqiptar është vënë në pranga në “pyllin” e hashashit pas një operacioni të policisë.

Autoritetet sekuestruan 13 pako me kanabis, pesha e të cilave arrinte deri në 118 kilogramë. Ndërkohë gjatësia e bimëve të drogës arrinte nga 2.5 deri në 4 metra.

Sipas përllogaritjeve, nëse do të dilte në treg droga do të sillte një përfitim prej 800.000 Eurosh. Sasia e kanabisit u sekuestrua në zonën malore të Serres.

Për sa i përket shqiptarit të vënë në pranga, mediat shkruajnë se ai është 35-vjeç, por nuk e kanë bërë publik identitetin e tij.

Ndërkohë policia është duke vazhduar hetimet për të zbuluar personat e tjerë që mund të kenë lidhje me rritjen dhe kultivimin e kanabisit.


/abcnews.al

i-riu-ne-pranga.jpg
G. P.12:48 | 01/10/2019

Një adoleshent shqiptar është dënuar në Britaninë e Madhe pasi mashtroi në lidhje me identitetin e tij.  Namik Hysa, 18 vjeç, u ndalua më 1 Korrik nga një patrullë në rrugën “Old Maidstone”. Kur u pyet, Hysa tregoi një patentë rumune. I riu u përpoq që të largohej përpara se autoritetet t’i gjenin 20 qese me kokainë.

Mirëpo 18-vjeçari u vu në pranga dhe kur shkoi në komisariat këmbëngulte që ishte rumun dhe patenta ishte e rregullt. I gjithë mashtrimi u kuptua, kur policia solli një përkthyes.

Hysa u shpall fajtor për posedim kokaine me qëllim shpërndarjen e saj dhe përdorim të dokumenteve false. Gjykata i dha atij 18 muaj burg, ndërsa dënimin do ta vuajë në një institucion për të rinjtë./abcnews.al

itali.jpg
G. P.18:41 | 28/09/2019

Një i ri shqiptar, identiteti i të cilit nuk bëhet i ditur, ka humbur jetën në Genoa të Italisë. Mediat shprehen se trupin e 20-vjeçarit e gjeti një kalimtare në rrugën “Europa”. Në vendin e ngjarjes shkoi menjëherë ambulanca, por ishte tepër vonë, pasi i riu kishte ndërruar jetë.

Ndërkohë hetuesit po punojnë për të sqaruar rrethanat e plota të ngjarjes. Paraprakisht mendohet se shqiptari ka rënë aksidentalisht nga një mur rreth katër metra. Kjo pasi bluzja që kishte veshur ishte grisur, çka sugjeron se mund të ketë ngecur përpara se të binte.

Megjithatë nga ana tjetër nuk përjashtohet mundësia që i riu të jetë hedhur për t’i dhënë fund jetës. 20-vjeçari ishte student dhe banonte në Teglia. Gjithashtu kishte marrë nënshtetësinë italiane./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono