shqiptar

aksidenti-itali.jpg
Sej rie12:08 | 24/04/2019

Një tjetër aksident tragjik i ka marrë jetën një shqiptari në Itali, ndërsa dy të tjerë mbetën të plagosur rëndë. Ngjarja e rëndë ndodhi orët e para të së mërkurës në rrugën Kennedy, në Pianvallico të Firences.

Viktimë nga kjo ngjarje e rëndë mbeti një 26-vjeçar, të cilin mediat fqinje momentalisht e identifikojnë vetëm me iniciale, K.E. Ndërsa i plagosur mbeti vëllai i tij 19-vjeçar, si dhe një tjetër i ri, 26 vjeç. Këta të fundit u dërguan me urgjencë në spital Borgo San Lorenzo dhe mësohet se janë në gjendje të rëndë.

Në vendin e ngjarjes shkuan 4 ambulanca, karabinierët, si dhe zjarrfikësit, të cilët bënë të mundur nxjerrjen nga automjeti të të plagosurve.

Shkaqet e këtij aksidenti tragjik nuk dihen ende, megjithatë mediat italiane shkruajnë se dyshimet janë që të rinjtë po lëviznin me shpejtësi tej normave të lejuara. Të tre shqiptarët mësohet se jetonin në zonën e Scarperia.

Ky është aksidenti i dytë që i merr jetën të rinjve shqiptarë në rrugët e Italisë në vetëm pak ditë. Të dielën, një 16-vjeçare shqiptare humbi tragjikisht jetën sëbashku me mikun e saj 19-vjeçar, pasi automjeti i tyre doli nga rruga dhe përfundoi në një kanal në Pordenone./tvklan.al

l_-fermati-alla-dogana-con-19-chili-di-cocaina-gwue.jpg
Sej rie09:25 | 24/04/2019

Një ngarkesë e madhe e kokaine u kap dje në mëngjes, pak para agimit, nga Rojet e Kufirit në San Pietro di Stabio.  Droga është gjetur nga agjentë në një makinë gjermane teksa kalonte në San Pietro di Stabio. Në bordin e makinës, siç raportohet nga autoritetet ishte një grua dhe një burrë me origjinë shqiptare. Kokaina ishte e fshehur në makinë dhe u zbulua falë njësisë së qenve dhe grupit të specializuar. Çifti është ndaluar nga policia. Ndërsa lënda narkotike nëse do shitej në treg të zi do të arrinte vlerën e dy milionë eurove./abcnews.al

shqiptari-olsion.jpg
Sej rie09:00 | 24/04/2019

Një peticion ka mbledhur 568 nënshkrime të martën, të cilat i janë dorëzuar kryetarit të bashkisë së Allenjoie në nën-prefekturën e Montbéliard. Banorët kërkojnë nga autoritetet që të shohin me vëmendjen rastin e një refugjati shqiptar të kërcënuar me dëbimin.

Dhëndri shqiptar pritet të dëbohet (Video)

Peticioni ka për qëllim t’i dalë në mbrojte shqiptarit  Olsion, i cili është i martuar më francezen Valerie dhe çifti jeton në Allenjoie. 35 vjeçari është e kërcënuar me dëbim dhe duhej të kishte ikur nga Franca që dje, raporton media franceze francebleu.fr.

“Ai hyri në mënyrë të parregullt në territorin francez, është problemi”, thotë avokati Maître François Elsaesser. “Nëse ai do kishte hyrë rregullisht, çështja do të rregullohej pa asnjë problem. Pastaj ai nuk ka një lidhje të qëndrueshme familjare. Martesa e tij me  francezen është autorizuar pasi kryebashkiaku i Allenjoie ishte autorizuar nga prokurori publik për të siguruar nëse ata ishin ose jo një marrëdhënie reale”, tha më tej avokati.

Çifti shpreh keqardhje dhe këtë e shikon si justifikim. “Ky është një reagim i pashpirt. Le të trajtohet çështja jonë sipas bazave ligjore.  Unë mendoj se çështja nuk është hetuar siç duhet”, tha e zemëruar gruaja e shqiptarit./abcnews.al

19_allenjoie_contre_explusion_albanais-00_00_04_07-4200604.jpg
Sej rie10:03 | 23/04/2019

Çifti Valérie dhe Olsion, të martuar një vit më parë, janë habitur nga vendimi i prefekturës Doubs, Francë. Prefektura ka paraqitur një kërkesë për dëbim të Olsionit nga territori francez, pasi ai është refugjat shqiptar. Çifti dëshiron të veprojë në mënyrë që Olsioni të mund të qëndrojë në Allenjoie, Doubs.

Ajo është franceze. Ai është shqiptar, i cili arriti në Francë ilegalisht tre vjet më parë. Ky çift, i martuar prej një vit, jeton në Allenjoie.

“Për mua, kjo është një rilindje nëse mund të them kështu, dhe këtë ndjenjë nuk e kam përjetuar ndonjë herë”, kujton Olsion, raporton france3-regions.francetvinfo.fr.

Ndërsa autoritetet nuk e kanë kundërshtuar kurrë martesën, prefektura e Doubs i kërkon shqiptarit  të largohet nga territori francez këtë të martë. Olsion, një ish-ushtar i cili arriti ilegalisht në Francë për të ikur nga korrupsioni në vendin e tij, bëri disa kërkesa për qëndrim. Por ende nuk ka marrë një përgjigje zyrtare.

“Autoritetet kishin rënë dakord të martoheshin dhe mendova se gjërat do të përmirësoheshin dhe burri im nuk do të dëbohej më,” thotë Valérie.

Por një muaj më parë, çifti merr një letër nga prefektura dhe përmbajtja ishte mjaft e qartë. “Është detyrim që Z. Olsion të largohet nga territori francez”, shkruhej në të.

“Gjithmonë kemi dashur t’i bëjmë gjëra sipas ligjit, ne kemi qenë gjithmonë subjekt i procedurave franceze dhe qëllimi ynë nuk është që burri im të dëbohet me forcë. Ai mund të largohet vullnetarisht dhe ne do të blejmë një biletë avioni”, thotë Valérie.

Në komunë, dikush i mbështet ata dhe ai është Jean Fried, kryetari i bashkisë. Çifti tani do të paraqesë një kërkesë në Gjykatën Administrative për një apel, që prefekti të tregohet i mëshirshëm./abcnews.al

nesho-1280x723.jpg
Sej rie21:52 | 22/04/2019

Diplomati Agim Nesho në studion e “Byro Politike” ka komentuar zgjedhjet e mbajtura një ditë më parë në Maqedoninë e Veriut. Ai është shprehu se faktori shqiptar ka një rol vendimmarrës në raundin e dytë të zgjedhjeve për President që do të mbahen më  5 Maj.  

“Ajo që mendon se është e nevojshme për elementin shqiptar, është se duhet të tregojë se është pro perëndimor, pro NATO-s,  pro BE, nuk është deklarata e dhënë nga ish-kandidati Reka që ne nuk bëjmë shitje ose trafikim të votave, por që shqiptarë duhet të votojë sepse ky është një moment politik dhe historik për ta që të kenë një orientim të qartë sepse nuk mund ta lënë si në të shkuarën që të jetë Maqedonia e dyzuar. Faktori shqiptar është vendimmarrës por ende nuk ka arritur që të jetë i koordinuar mirë që të mbrojë interesat. Sa më i bashkuar të jetë dhe i qartë për perspektivat e tij dhe të shqiptarëve në Maqedoni aq më shumë fiton terren, fiton pozitë ashtu sikundër e përmendët edhe ju, sepse arritën deri tek kryetari i Parlamentit, për arsye se është një element shtet-formues”, u shpreh Nesho.

Asnjë nga tre kandidatët për president në Maqedoninë e Veriut nuk ka marrë numrin e duhur të votave, ndoshta dhe për shkak të pjesëmarrjes së ulët në votime. Në balotazhin e 5 majit përballë njëri-tjetrit do të jenë kandidati i LSDM-së dhe koalicionit qeveritar Pendarovski si dhe kandidatja e opozitës Davkoka. Ndërsa kandidati i pavarur, shqiptari Blerim Reka ka mundur të fitojë shumicën e votave vetëm në komunat shqiptare.

“Të tre kandidaturat ishin kandidatura të zgjedhura. Të tre profesorë më një situatë akademike të dallueshme dhe po të mos ishte lufta politike e brendshme e ndarë në dy grupime të fuqishme, ngjarjet që kanë prodhuar dhe realizomi i marrëveshjes me Greqinë, kjo do ishte një zgjegdje e zakonshme. Zgjedhja e presidenti në republikat parlamentare nuk ka atë vëmëndjen që kanë zgjedhjet parlamentare. Por ne kishin edhe kandidatin shqiptar që ne na u bë qejfi që mori rreth 80 mijë vota”, tha Nesho./abcnews.al

57611752_2152415354835053_5262112966630703104_n.png
Sej rie17:55 | 22/04/2019

Një shqiptar ka dalë  sot përpara autoriteteve të drejtësi britanike. Ai akuzohet për “trafikim qeniesh njerëzore” si dhe “skllavërim” të tyre në një servis makinash në Rugby, raporton rugbyadvertiser.co.uk. 

Bëhet fjalë për shqiptarin Ermal Lushaj, i cili u deklarua fajtor nga një gjykatë në Warwick. Veprimtaritë e tij të jashtëligjshme ai thuhet i kenë ushtruar midis 16 Tetorit dhe 28 Nëntorit të vitit të kaluar.

33-vjeçari shqiptar qëndronte në Rugby, i cili u deklarua fajtor për marrjen e 4 personave dhe shfrytëzimin e tyre. Përveç kësaj Lushaj, është lutur që t’i vijë një ndihmë një përkthyes shqiptar, pasi mohon të ketë dhunuar një person, i cili e ka akuzuar për dhunë.

Sipas ligjit, policia do të bastisë në shtëpinë dhe në biznesin e Lushajt në Rugby, aty ku thuhet se viktimat e pretenduara ishin shfrytëzuar në punë. Gjykatësi Andrew Lockhart QC e shtyu çështjen për gjykim në fund të Korrikut, dhe Lushaj deri atëherë ka kohë për të hedhur poshtë akuzat e ngritura ndaj tij./abcnews.al

Georges-Simenon.jpg
nev ila09:09 | 20/04/2019

Një trafikant droge shqiptar, i mbërritur nga Shtetet e Bashkuara të Amerikës, arrestohet në Francën e vitit 1940… Shkrimtari i madh belg, Zhorzh Simenon (Georges Simenon), njohur më së shumti si babai i “Komisarit Megre”, një ndërkohë të jetës së vet ja ka kushtuar shkrimit të një novele që ka në qendër shqiptarët. Shkrimtari që njihet për subjektet policeske, vendos në qytetin bregdetar francez Sherburg (Cherbourg)., para gati 80 vjetësh, një histori të habitshme; dy pleq të vetmuar shqiptarë, që presin në port shfaqjen e djalit të vetëm, që jetonte në Shtetet e Bashkuara. Por kur djali mbërrin, policia e arreston si trafikant heroine…

(Më poshtë përkthimi i plotë i shkrimit nga frëngjishtja)

Dy pleqtë, ai si skërfyell dhe ajo, e shkurtër dhe e shëndoshë, mbërritën në Sherburg me tren, sigurisht me bileta të klasit të tretë. U vendosën në hotelin “Dy kontinentet”. Kishin më shumë bagazhe, sesa dhjetë udhëtarë të marrë së bashku. Bagazhe të varfra, trasta, valixhe të vjetra me lëkurë cjapi, pa harruar edhe një copë të madhe proshutë derri, që e varën menjëherë diku në dhomë.

Të gjitha përpjekjet për të kuptuar gjuhën e tyre rezultuan boshe. Madje, edhe pasaportat e tyre të lerosura lexoheshin me mjaft vështirësi. Më në fund, u arrit të zbulohej se ata ishin shqiptarë. Jarko, një jugosllav i punësuar si zhytës, bisedoi gjatë me ta. Por, a mori vesh ndonjë fjalë që dilte nga goja e tyre? E gjitha që mund të thoshte ai dhe kuptohej lehtësisht se ia mbyste kot, ishte fakti se ata prisnin dikë. Djalin e tyre? Do të mbërrinte nga Nju Jorku me tragetin “Ile-de-France”.

Për momentin, ata ishin të vetmuar dhe nuk kishin ndonjë njeri që të përkujdesej për ta. Dhe kështu, për tri javë rresht, sapo zbardhte drita, ata shkonin në port për të pritur një traget, herë gjerman, herë italian. Më pas ktheheshin në hotel duke njoftuar, sigurisht me shenja të dëshpëruara mohuese, se personi që prisnin, edhe atë radhë nuk mbërriti. Pjesën tjetër të ditës, gruaja e kalonte e zhytur në kolltukun e hollit të hotelit, ndërsa burri digjte një duhan me aromë të çuditshme në llullën e tij të gjatë e të skalitur.

Meqë çifti i pleqve nuk kishte paguar ende asnjë nga faturat e fjetjes dhe të ushqimit, pronarët e hotelit i kërkuan ndihmë policisë. Komisarit iu desh t’i shfletonte pasaportat kushedi sesa herë, por në fund nuk kuptoi asgjë. Dhe meqë në Sherburg nuk ka konsullatë të Shqipërisë, të gjithëve u vajti mendja t’i kërkonin ndihmë kapitenit Rej, një marinari tashmë në pension, por që e hiqte veten se merrte vesh nga të gjitha gjuhët e Ballkanit.

Kur erdhi ky, plaku hapi një portofol të lashtë me kënde prej bakri dhe nxori një copë letër. Ishte një çek dhjetë mijë dollarësh, shoqëruar edhe me një letër të djalit të tyre, Gjon Fulki. U kishte shkruar prindërve të tij që nga Nju Jorku, ku jetonte dhe ku kishte bërë para të madhe. Çekun ua kishte dërguar prindërve të tij, për t’u mundësuar udhëtimin dhe qëndrimin në Sherburg. Aty, ai do të vinte për t’i takuar dhe për t’i marrë në Amerikë, ku u kishte blerë një shtëpi në mal, që ata të kalonin pensionin si zotërinj. Por në bankë, drejtori i tha troç shqiptarit plak, se nuk mund ta pranonte çekun e Nju Jorkut. Djali i tij kishte harruar të kryente një formalitet të vogël. Mungonte një hollësi. Jarko i shoqëroi dy pleqtë në hotel.

Për të mos rrezikuar humbjen e gjithçkaje, pronarët pranuan që t’i mbanin edhe një natë tjetër. Fundja, nesër do të mbërrinte trageti “Paris”. Dhe nëse djali i tyre nuk do të ishte edhe aty, çiftit plak do t’u jepnin duart.

Të nesërmen, të dy pleqtë vrapuan për në mol. Në bordin e “Paris-it”, personeli i shërbimit ndodhej në lëvizje të pandërprerë dhe disa zotërinj vendosnin vula, që u jepnin udhëtarëve të drejtën për të zbritur në tokë. Papritmas u dëgjuan britma gëzimi nga të dy palët. Hamalli i hotelit “Dy kontinentet” fërkoi sytë nga habia. Të dy pleqtë, fare pranë urëzës së tragetit, kërcenin pupthi në një delir të vërtetë.

Makthi mori fund! Gjoni mbërriti! Një Gjon me pamje të jashtëzakonshme: fytyrëzbehtë, qimezi dhe i veshur “shik”. Ua la në dorë pasaportën dy burrave që shkëmbyen aty për aty shikimet dhe i kërkuan që të priste një çast. Më pas, e ftuan që të shkonte në barin e tragetit, ku e prisnin dy burra të tjerë, të cilët i bënë të ditur se ishte i arrestuar.

Tek zbriste nga trageti, Gjoni ishte me pranga në duar. Të shoqëruar nga dy burrat e drejtuan te një veturë. U dëgjua zhurma e derës që mbyllej dhe vetura u nis. Të dy pleqtë u kthyen në hotel, ku pak më vonë mbërriti numri i ri i “Farit të Sherburit”. Në faqe të parë, fotografia e Gjonit dhe një titull i madh anonçues: “Një gjah i bollshëm”.

Në artikull saktësohej se policia kishte mundur të arrestonte një ndër trafikantët kryesorë të heroinës në Shtetet e Bashkuara të Amerikës. Pronarja e “Dy kontinenteve” urdhëroi hamallin që t’i nxirrte në rrugë bagazhet e dy pleqve. Por burrit të saj filloi t’i punojë mendja. “Një trafikant heroine… Këta tipa kanë mbrojtje dhe mbështetje lart… Edhe çeku dhjetë mijë dollarë ishte sigurisht i saktë… Xhanëm shpenzimet e këtyre dy pleqve nuk janë dhe aq të mëdha…”. Një buzëqeshje u përvijua në buzët e tij.

Ndërkohë dy pleqtë ndodheshin tashmë në trotuar dhe nuk po e kuptonin se ç’lajm tjetër të hidhur po vinte t’u kumtonte pronari. Ky i fundit u kërkoi ndjesë dhe i luti që të riktheheshin në hotel. “Ishte thjesht një keqkuptim”. E shoqëroi çiftin e pleqve në sallën e ngrënies, e cila po bëhej gati të mbyllej. Që nga aty i briti gruas së tij:

-Zhermenë! Shtro tryezën për Zotin dhe Zonjën Fulki!…

Botuar më 16 maj 1940, në faqen 8, të numrit 601 të së përjavshmes pariziene “Gringoire”./abcnews.al

 

 

syria.jpg
nev ila13:03 | 18/04/2019

Balkan Insight ka identifikuar të paktën 85 fëmijë të lindur nga gratë me kombësi shqiptare që janë nga Shqipëria, Kosova dhe Maqedonia e Veriut të cilët, ndodhen në një kamp, të drejtuar nga kurdët në Siri, nën kontrollin e shtetit islamik.

Lavdrim Muhaxheri, një luftëtar i njohur i Shtetit Islamik nga Kosova, i cili e deklaroi veten si komandant i shqiptarëve që luftonin për grupin militant në Siri dhe Irak, u shpall i vdekur në mes të vitit 2017.

Sipas investigimit të Balkan Insight, fëmijët e tij të lindur në Siri nga martesa me një grua shqiptare nga Tirana, po jetojnë në një kamp të drejtuar nga kurdët, në Veri-lindje të Sirisë.

Të dy fëmijët e Muhaxherit, gjenden në mesin e gjithsej 85 fëmijëve, në kampin ‘Al Hol’ të grave me etni shqiptare të cilat janë nga Shqipëria, Kosova dhe Maqedonia Veriore. Ato janë identifikuar nga Balkan Insight.

Sipas listave emërore që ka siguruar Balkan Insight, të paktën 27 prej këtyre fëmijëve kanë lindur në Siri. Shumë prej tyre kanë humbur të paktën një prind. Ndërsa tre fëmijë të lindur nga një grua kosovare raportohet se kanë vdekur bashkë me nënën e tyre.

Aktualisht, një grup prej 108 gra dhe fëmijë nga Shqipëria, Kosova dhe Maqedonia e Veriut, duan të kthehen në Ballkan nga kampi “Al Hol”. Ndërkohë ekzistojnë edhe një numër tjetër më i vogël, i familjeve me etni shqiptare, në dy kampe të tjera në Siri.

Sipas një studimi të vitit 2017 nga Qendra Soufan me seli në Nju Jork, (një organizëm hulumtues i përqendruar në sigurinë globale), rreth 90 persona që ishin nga Shqipëria, 138 nga Kosova dhe rreth 140 nga Maqedonia Veriore, ndodheshin ende në Shtetin Islamik.

Kalifati mund të jetë rrëzuar, por rruga e shtëpisë për këto gra dhe fëmijë duket më e ndërlikuar sesa mund ta kishin imagjinuar. Autoritetet në të tre vendet e Ballkanit, nuk kanë ende një plan, se si këta persona të mund të riatdhesohen.

Kampi “Al Hol” ndodhet në provincën siriane të el-Hasakah. Sipas Kombeve të Bashkuara, aktualisht ka rreth 73,000 njerëz të strehuar aty.

Sipas Zyrës së OKB-së për Koordinimin e Çështjeve Humanitare, rreth 65 % e njerëzve në kamp, janë fëmijë nën moshën 18 vjeç. Rreth 27 % e totalit janë gra.

Refugjatët e zhvendosur brenda vendit dhe refugjatët irakianë përbëjnë shumicën e madhe, por 15 % e tyre janë nga të ashtuquajturat shtetas të vendeve të treta.

Kosova – Gjithsej 48 – 38 fëmijë dhe 10 gra (Të paktën 14 fëmijë kanë lindur në Siri)

Shqipëria – Gjithsej 52 – 41 fëmijë dhe 11 gra (Trembëdhjetë fëmijë kanë lindur në Siri)

Maqedonia Veriore – Gjithsej 8 – gjashtë fëmijë dhe dy gra

Gjithsej – 108 njerëz nga të 3 vendet

Shumë nga gratë shqiptare dhe fëmijët e tyre janë të dëshpëruar për t’u kthyer në shtëpi.

Ata na kanë nën mbikëqyrje dhe jemi të rrethuar nga tela dhe ushtarë. Nuk mund të flas shpesh, por ju lutemi flisni me shtetin tonë që të vijnë dhe të na marrin “, dëgjohet një fëmijë duke qarë, në një incizim audio të dëgjuar nga Balkan Insight ndërsa i tregon një të afërmi në Shqipëri.

Elodie Schindler, një zëdhënëse për Evropën dhe Azinë Qendrore në Komitetin Ndërkombëtar të Kryqit të Kuq, ICRC, tha se gratë dhe fëmijët në kampe kërkonin mbrojtje të veçantë.

Shindler tha se shumë fëmijë ishin pa shtetësi zyrtare, nuk kishin qasje në shkollim dhe ishin të prekshëm nga abuzimet dhe sëmundjet.

Fëmijët në këtë histori meritojnë humanizmin tonë, jo urrejtjen tonë. Këta fëmijë janë viktima që nuk duhet të ndëshkohen për mëkatet e prindërve të tyre … Shumë prej tyre nuk kanë ushqim të mjaftueshëm. Ata duhet të trajtohen më mirë “, tha Schindler për Balkan Insight.

Balkan Insight i kërkoi Ministrive të Brendshme të Shqipërisë, Kosovës dhe Maqedonisë Veriore nëse ata kishin identifikuar dhe kontaktuar qytetarët e tyre në këto kampe, por Ministria e Brendshme shqiptare nuk u përgjigj. Kosova nuk pranoi të komentojë, ndërsa Ministria e Brendshme e Maqedonisë Veriore tha se kishte identifikuar 4 gra maqedonase dhe shtatë fëmijët e tyre.

“Ata kanë vendosur kontakte me qëllim të marrjes së dokumenteve dhe lehtësimin e transportit nga Siria në Maqedoninë Veriore“, tha një zëdhënës i ministrisë.

Kjo ministri tha se nuk kishte juridiksion për të lehtësuar kthimin e tyre nga Siria dhe nuk specifikoi nëse ndonjë institucion tjetër shtetëror po merrej me çështjen.

Ai tha se që nga fillimi i konfliktit, në vitin 2011, rreth 80 shtetas maqedonas që ishin pjesë e shtetit islamik ishin kthyer në shtëpi, duke përfshirë një grua dhe një fëmijë.

Në Kosovë, Bedri Elezi, Drejtor i Studimeve të Sigurisë në Institutin e Kosovës për Studime Ndërkombëtare, tha se vendi e kishte lënë pas dore këtë çështje.

Elezi tha për Balkan Insight, se në shtator 2017, Instituti i tij kontaktoi me gjashtë gra dhe 21 fëmijë në Siri, të cilët dëshironin të ktheheshin në Kosovë, por se nuk ishte në gjendje të lehtësonte një marrëveshje me autoritetet e Kosovës për t’i kthyer ata.

Grupi qëndroi për një muaj pranë kufirit turk, duke pritur miratimin e autoriteteve të Kosovës për t’u kthyer, ne kontaktuam me ministrin e jashtëm, zyrën e kryeministrit, presidentin, kryetarin e parlamentit, por ata nuk arritën një zgjidhje,” tha ai.

KNKK, tha Schindler, inkurajon shtetet për të balancuar çështjet e sigurisë dhe llogaridhënies me nevojën për t’i trajtuar njerëzit në mënyrë humane.

Vendet e origjinës nuk mund të kthejnë shpinën“, tha ajo. Përktheu nga Balkan Insight, Abc News.

sherr-shqiptari.jpg
G. P.09:11 | 18/04/2019

Një emigrant shqiptar në Itali u përfshi në një sherr me thika me dy nigerianë ditën e mërkurë. Ngjarja ndodhi në një vend të populluar, në lagjen “Gad” të qytetit të Ferrara-s.

Mediat italiane shkruajnë se gjatë përleshjes, ata shkaktuan panik mes banorëve që gjendeshin aty. Për pasojë, dy prej tyre mbetën të plagosur dhe të shtrirë në tokë siç duket nga pamjet. Ata u dërguan menjëherë në spital për të marrë ndihmën e menjëhershme mjekësore.

Por ky rast tërhoqi edhe vëmendjen e ministrit të Brendshëm italian, Matteo Salvini. Në një postim në rrjetet sociale, ai bëri publike foto nga vendi i ngjarjes, që prej disa kohësh është kthyer në një bazë për kriminelët.

“Përleshje e madhe me thikë mes një shqiptari dhe 2 nigerianëve në lagjen Gad të Ferrara-s. Më 3 Maj do të jem në qytet dhe në orët në vijim do t’u kërkoj të gjithë prefektëve që të nxjerrin një plan për të larguar banditët në qytet. Atë që nuk e bëjnë dot kryebashkiakët, e bëjmë ne“”, shkruante ai në Twitter.


Lagja “Gad”, edhe pse një zonë shumë e populluar në zemër të provincës Ferrara, është një nga zonat më të degraduara të qytetit. Prej shumë vitesh aty kanë ardhur emigrantë, shumica e të cilëve nigerianë, të cilët merren me shpërndarje të lëndëve narkotike./abcnews.al

zhakline-legatar.jpg
nev ila22:30 | 12/04/2019

E ftuara e tretë në emisionin “Provokacija” nga Mustafa Nano, në ABC News ka zhvilluar një bisedë të quajtur “tabu” sipas saj për shoqërinë shqiptare. Ajo ka folur për seksin dhe shoqërinë shqiptare.

Aktiviste për të Drejtat e Njeriut dhe të Drejtat e Grave, blogere e gazetare, Zhaklin Lekatari ka treguar se sipas një studimi të fundit të zhvilluar nga INSTAT, meshkujt dhe femrat shqiptare, kryejnë marrëdhënien e parë seksuale në moshën 24 vjeç për meshkujt dhe 26 vjeç për femrat.

Një studim i fundit nga INSTAT, për të cilën është folur shumë muajt e fundit, ka treguar që mosha e marrëdhënies seksuale te shqiptarët përkon me moshën e martesës, 24 vjeç te burrat dhe 26 vjeç te gratë, pra marrëdhënia e parë seksuale për ta përkon me martesën dhe kjo është shqetësuese”, tha ajo.

Pyetjes së gazetarit Mustafa Nano se sipas saj, cilët nga dy gjinitë, janë më të ndrojtur në marrëdhëniet seksuale në shoqërinë shqiptare, blogerja u përgjigj:

“Të dyja gjinitë janë të ndrojtura për arsye të ndryshme, por meshkujt më shumë. Ata kanë probleme me seksualitetin e tyre. Janë shumë të ndrojtur dhe të friksuar. Kjo vjen për shkak të roleve të tyre gjatë rritjes. Ata rriten duke u mësuar të mos qajnë, të mos tregojnë emocione, që duhet të zotërojnë gruan, duhet të jenë të fortë etj., kjo gjë ata i ndrydh.

Nga ana tjetër kemi femrën, e cila mesazhet që merr në lidhje me këtë çështje janë se duhet të jenë seksi, të bukura, mikluese, por nga ana tjetër seksualiteti i tyre dënohet dhe duhet ta mbajnë të fshehur. Si rezultat kemi çiftet shqiptare që kanë probleme të mëdha komunikimi me njëri-tjetrin. Ata më pas nuk kanë marrëdhënie seksuale cilësore, por të deformuar e kaotike, janë të painformuar, qoftë në marrëdhënie seksuale qoftë në atë emocionale. Janë të obsesionuar ndaj dhe kemi divorce në rritje”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono