Shqipëria

suedezi.jpg
Autor E13:30 | 18/10/2019

Tashmë është e konfirmuar edhe nga Komisioneri për Zgjerimin: BE nuk do të hapë negociatat për Shqipërinë.

kjo ka shkaktuar reagime të ndryshme në vendet e BE-së.

Së fundmi, zërave qortues i është bashkuar edhe ish kryeministri suedez, Carl Bildt.

“Kjo nuk është një gjë e vogël! Duke bllokuar fillimin e bisedimeve për Ballkanin, Franca, Holanda dhe Danimarka jo vetëm që kanë shkelur angazhimet e mëparshme, por edhe e kanë privuar BE-në nga çdo qasje e besueshme strategjike për këtë rajon të rëndësishëm. Kush do ta zgjidhë këtë lëmsh?”, – ka shkruar ai në Twitter.

Hahn konfirmon lajmin e keq: Nuk ka negociata për Shqipërinë

Presidenti i Parlamentit Evropian David Sassoli ka shprehur sakaq mbështetjen e tij për hapjen e negociatave të BE me Shqipërinë dhe Maqedoninë e Veriut.

Siç raporton “EuObserver”, pasditen e te enjtes, teksa foli ne hapjen e samitit te Këshillit Europian në Bruksel, ai tha: “Ne mbështesim hapjen e menjëhershme të negociatave të pranimit me Maqedoninë e Veriut dhe Shqipërinë.

Komisioni Europian është në favor të kësaj dhe ne do ta kemi të vështirë t’i shpjegojmë njerëzve të atyre vendeve pse po i vonojmë ata. Kur ne u bëjmë thirrje vendeve fqinje të bëjnë një përpjekje shtesë për të ndryshuar dhe ata e bëjnë këtë, është detyra jonë që t’i bashkohemi kësaj përpjekje”.

hahn.jpg
G. P.13:07 | 18/10/2019

Me anë të një postimi në rrjetet sociale, komisionari për zgjerimin Johannes Hahn ka thënë se liderët e Europës dështuan që të realizuar premtimin e tyre për të hapur negociatat me Maqedoninë e Veriut dhe Shqipërinë në BE.

“Liderët e Bashkimit Europian dështuan që të realizojnë premtimin e tyre për të çelur procesin e negociatave me Maqedoninë e Veriut dhe Shqipërinë. Kjo është shumë zhgënjyese. Shtetet anëtare të BE-së tashmë duhet të qartësojnë se sa seriozë janë me angazhimin e tyre për integrimin europian të Ballkanit Perëndimor. Falenderoj të gjithë ata që u investuan plotësisht mbrëmjen e djeshme për të arritur një vendim të një rëndësie strategjike për Bashkimin e Europian. Ata luftuan për të dhënë një sinjal shprese për qytetarët e Ballkanit Perëndimor”, shkruan Hahn në Twitter.

Hahn thekson se vendimi negativ mund të sjellë pasoja negative në lidhje me destabilizmin e Ballkanit Perëndimor.

“Siç u shpreha edhe në Luksemburg: Ky nuk është një moment lavdie për Bashkimin Europian. Refuzimi për të pranuar progresin e vërtetuar do të ketë pasoja negative, përfshi këtu edhe rrezikun e destabilizimit të Ballkanit Perëndimor me ndikim të madh edhe në Bashkimin Europian. Është përgjegjësia jonë që të qëndrojmë pranë vendeve, qytetarët e të cilëve janë me të drejtë shumë të zhgënjyer. Do të vazhdoj të bëj gjithçka që t’i mbështes. Integrimi i Ballkanit perëndimor në BE është dhe do të mbetet një politikë e rëndësishme strategjike, në interesin tonë të përbashkët”, thotë Hahn.

Reagon ashpër ish-kryeministri suedez: Bllokimi i negociatave, nuk është gjë e vogël

/abcnews.al

seferi1.jpg
Vladimir Prenga11:14 | 18/10/2019

Taulant Seferit iu plotësua një ëndërr kur mori ftesën nga Shqipëria për ndeshjet me Turqinë dhe Moldavinë. Sulmuesi nuk mori asnjë minutë, por pavarësisht kësaj shprehet se ka përjetuar një javë të veçantë me kombëtaren kuqezi.

“Ka qenë një kënaqësi të takoj lojtarët e kombëtares, ishte një eksperiencë e bukur për mua. Shpresoja të luaja, por varet nga trajneri. Grumbullimi për herë të parë në kombëtare do të mbetet një kujtim shumë i bukur për mua. Shpresoj të më ftojnë sërish në të ardhmen”, është shprehur sulmuesi.

Në intervistën e dhënë për faqen e klubit të tij, Xamax, Seferi thekson se zgjedhja e Shqipërisë para Maqedonisë së Veriut ishte çështje zemra. “Kam luajtur me moshat e Maqedonisë së Veriut, por dëgjova zemrën time dhe pranova ftesën e Shqipërisë”, shtoi djaloshi nga Kumanova.

Në fund flet edhe për përballjen me kampionët e Zvicrës, Young Boys, që kanë edhe kartonin e Seferit. Ai është në huazim te Xamax dhe do të japë maksimumin që ekipi i tij të marrë më të mirën nga kjo sfidë.

“E respektoj Young Boys, por jam pjesë e Xamax dhe jam i përqendruar këtu. Ky është futbolli: jam profesionist dhe më duhet të jap maksimumin për klubin ku luaj”, ka përfunduar Seferi. /abcnews.al

Taulant Seferi, gjatë intervistës për faqen e Xamax
rutt.jpg
G. P.10:44 | 18/10/2019

Kryeministri holandez, Mark Rutte ka folur për mediat pas përfundimit të samitit të ditës së parë të liderëve europianë. Ai shprehet se akoma s’ka përfunduar asgjë në letër.

Ai theksoi se Holanda ka shprehur shqetësim për Shqipërinë, e cila ka shumë hapa për të ndërmarrë përpara. Ai tha se çështja për çeljen ose jo të negociatave është shtyrë për një takim tjetër.

“S’ka përfunduar asgjë në letër dhe çështja është shtyrë për një takim tjetër. Holanda kishte shqetësim të madh për Shqipërinë dhe s’është marrë vendimi për të hapur negociatat. Për Maqedoninë kemi më pak shqetësim, por ka shumë vende të tjera që konsiderojnë që duhet t’i trajtojmë të dy vendet bashkë.

Për Shqipërinë ka shumë shqetësim pavarësisht se vendi ka bërë hapa përpara. Është e arsyeshme të mos hapen negociatat  me Shqipërinë tani, por ndoshta në të ardhmen. Nuk jam takuar me Zaev dhe Ramën. Rama ka bërë hapa përpara, por ka shumë hapa për të ndërmarrë”, tha Rutte.

lulzim-basha.jpg
G. P.09:46 | 18/10/2019

Kryetari i Partisë Demokratike, Lulzim Basha, ka folur për “Euroactiv” ku është shprehur se vendimi i Këshillit Europian nuk është ai që dëshironte dhe shpresonte opozita.

Kreu i selisë blu, shprehet se energjia duhet përqendruar te plotësimi i kushteve. “Kemi nevojë për lidershipin që ta realizojë potencialin e plotë të Shqipërisë”, thotë Basha.

“Vendimi i Këshillit Europian nuk është ai që dëshironim dhe shpresonim. Tani e gjithë energjia dhe fokusi ynë duhet të jetë tek kryerja e detyrave të shtëpisë. Gjermania ka shtruar 9 kushte që përbëjnë udhërrëfyesin për hapjen e negociatave të anëtarësimit. Ne duhet gjithashtu të luftojmë me efektivitet krimin dhe korrupsionin dhe të krijojmë mundësi për qytetarët tanë, që do të ndihmojë për të reduktuar emigracionin. Unë kam besim se vendi im e ka potencialin për të përmbushur këto kritere. Tani kemi nevojë për lidershipin që do ta realizojë potencialin e plotë të Shqipërisë”, u shpreh Basha./abcnews.al

bashkimi-eurpian.jpg
G. P.09:39 | 18/10/2019

Këshilli Europian do të japë sot vendimin përfundimtar për hapjen ose jo të bisedimeve për anëtarësim të Shqipërisë dhe Maqedonisë së Veriut. Krerët e 28 shteteve anëtare janë mbledhur dje në Bruksel për të diskutuar mes të tjerave dhe për këtë çështje.

Duket se nuk ka shpresë për një vendim pozitiv për vendim tonë, për shkak të qëndrimit të prerë të Francës, e cila kërkon së pari rishikim të procesit të zgjerimit. Presidenti Macron, përveç insistimit mbi nevojën e reformimit të procesit të zgjerimit, ka theksuar se një tjetër motiv për refuzimin, qe është numri i lartë i azilkërkuesve nga Shqipëria, të cilët përfitojnë nga lëvizja e lirë.

Pas darkës së mbrëmshme të liderëve të mbledhur në samitin e Brukselit, një burim i sigurt i tha gazetares së ABC News Erisa Zykaj se Presidenti francez Emmanuel Macron nuk do të ndryshojë qëndrim në lidhje me Shqipërinë dhe Maqedoninë e Veriut.

Edhe Presidentja e re e Komisionit Europian, Ursula von der Leyen ka deklaruar dje se nuk ka asnjë shpresë që Shqipëria dhe Maqedonia e Veriut të marrin dritën jeshile për hapjen e negociatave.

“Për fat të keq, shenjat nuk janë pozitive që të merret një vendim”, ka thënë Von der Leyen. Megjithatë, ajo ka njohur dhe vlerësuar reformat e ndërmarra nga dy vendet dhe ka pranuar se si Tirana edhe Shkupi kanë nevojë për inkurajim.

“Unë për vete jam fort e bindur që të dyja vendet kanë bërë përpjekje të mëdha që t’i afrohen standardit europian, ndaj dhe e mbështes shumë dhënien e një sinjali pozitiv”, ka shtuar Von der Leyen./abcnews.al

Kumbulla-Marash.jpg
Vladimir Prenga08:19 | 18/10/2019

Marash Kumbulla mund të bëhet shpejt një nga lojtarët më të shtrenjtë të kombëtares. Mediat italiane raportojnë se klubi i Veronës shpreson të fitojë më shumë se 10 milionë euro nga kartoni i shqiptarit.

Pakkush u kujtua për të mbrëmjen e 25 gushtit. Luhej Verona-Bolonja dhe gjithë vëmendja ishte përqendruar te gjesti heroik i trajnerit mik, Sinisha Mihajloviç, i cili kishte shkuar në stadium edhe pse ishte i sëmurë me leuçemi.

Sidoqoftë, dueli i javës së parë të Serisë A do të ishte edhe debutimi i një djaloshi 19-vjeçar të quajtur Marash Kumbulla. Mbrojtësi i qendrës do të kthehej në një personazh tërheqës në njërin nga 5 kampionatet më të fortë të botës, për standardin e lartë teknik e fizik, por sidomos me personalitetin e fortë edhe pse tepër i ri.

Pak javë më vonë, Kumbulla do të shënonte golin e tij të parë në Serinë A, duke u bërë i pari nga lojtarët e lindur në vitin 2000 apo më vonë. Një rekord edhe në 5 ligat kryesore, Seria A, La Liga spanjolle, Premier Liga, Bundesliga dhe Liga e Parë Franceze.

Sot, ai jo vetëm po nis të kërkohet nga klube më të rëndësishëm sesa Verona, siç është Fiorentina, por edhe kartoni i tij ka njohur një rritje që mund ta quajmë eksponenciale. Mediat italiane, pranë Veronës, njoftojnë se për mbrojtësin shqiptar mund të paguhen deri në 10 milionë euro, madje edhe më shumë, ndonëse është vetëm 19 vjeç.

E ardhmja duket e garantuar për një futbollist të tillë, që shkëlqeu që në skuadrat kombëtare të moshave të Shqipërisë, ndërsa në Moldavi debutoi edhe për ekipin përfaqësues të të rriturve. /ABC NEWS 24/7

pjimage-5.jpg
Veronik Istrefaj23:32 | 17/10/2019

Alban Bushi, në studion e ABC News, emisionin Pressing, ka bërë një parashikim shumë ambicioz. Sipas trajnerit të Shpresave, Shqipëria për 5-6 vite do të kualifikohet pa asnjë problem në Europian, si dhe sulmuesit e e talentuar, Broja, Vrioni dhe Bullari do të jenë e ardhmja e kuqezinjve. Mes të tjerash, Bushi u shpreh:

SHPRESAT – “Ne funksionojmë si drejtori, që merret me kë lojtarë do të marrim. Kemi një drejtor që merret me të gjithë lojtarët e moshave. Patjetër që ne japim një rekomandim, pasi jemi afër me lojtarët. Mendoj se shumë lojtarë kanë ikur lart, na kanë ardhur dhe poshtë. Me rastin e Panuçit kishim Albion Ademin, Ramadanin. Mendoj se trajneri Reja këto lojtarë që ka marrë lart, do t’i bëjnë punë. Kumbulla dhe Selahi edhe debutuan, mendoj se janë në planet e Rejës. Kombëtarja po rinovohet dhe Reja po ndërton diçka”.

GRUMBULLIMET – “Patjetër që përqindja më e madhe do të jetë këtu brenda Shqipërisë, por ne do t’i japim mundësinë çdo lojtari, kudo që është, të luajë për Shqipërinë. Po të shikojmë te Shpresat, kemi luajtur kundër ekipeve tre vite më të mëdhenj”.

BROJA – “Rasti i Brojës: Datëlindje 2001 dhe luante kundër mbrojtësve 1998. Është një diferencë e madhe, edhe pse nuk duket e tillë. Kemi lojtarë shumë të mirë, do të kemi një Shqipëri shumë të fortë pas 5-6 vitesh. Ndonjëherë edhe ëndërrojmë, por unë them se Shqipëria jo vetëm që do futet në Europian, por do të kualifikohet pa asnjë problem nga grupet. Normalisht, duhet punë e madhe.

LOJTARËT – “Ne kemi kontrolluar çdo futbollist nga 15 vjeç, deri në 21 vjeç. Jemi munduar të marrim lojtarët më të mirë. Unë kam Bullarin, Brojën, Vrionin. Janë sulmues me shumë perspektivë. Këta tre janë më të mirët. Rezultatet kanë qenë të ndryshme, ne jemi një vend i vogël”./abcnews.al

lila.jpg
Vladimir Prenga22:52 | 17/10/2019

Andi Lila është pro rinovimit të kontratës me Edi Rejën. Futbollisti i Tiranës, i ftuar në emisionin Pressing në ABC News, vlerëson trajnerin italian. Gjithashtu ai shpreh edhe një dëshirë për pankinën. “Normalisht, me trajnerin De Biasi, skuadra e tregoi me vepra sa ishte rritur.

Pasardhësi, Panuçi, duhet të vazhdonte me të njëjtën ecuri. Kjo gjë nuk ndodhi dhe erdhi Reja. Tha se është ekipi i De Biasit. Shumë mirë, shpresoj të shkojmë dhe me Rejën në Europian. Trajneri Reja më dukët shumë trajner i mirë, pozitiv, trajner që bën grupin. Nëse e bën këtë, gjithmonë do ketë sukses.

Ne nuk do kemi kurrë, do doja, një lojtar që të marrë topin dhe ta zgjidhë i vetëm. Ylli ynë është grupi. Do të thotë që ky trajner ka mend në kokë. Kuzhe thoshte gjithmonë: ‘nuk ka lojtarë të rinj apo të vjetër, ka të mirë dhe të këqij’. Disa lojtarë i ka ndryshuar, nuk mund të ndodhë direkt ndryshimi i brezave”

“Reja më duket pozitiv dhe jam pro të vazhdojë. Nuk ka problem mosha. Do doja Donadonin, por nuk kemi mundësi financiare. Kombëtarja tani më duket si një ishull i bukur brenda një oqeani, është si një oaz. Është diçka e bukur në mes të shumë gjerave të tjera. Po të fitonim me Turqinë, atëherë do të flisnim ndryshe. Mos të harrojmë edhe fitoren me Islandën”. /abcnews.al

Hoxha.png
Veronik Istrefaj22:39 | 17/10/2019

Gazetari i njohur, Artan Hoxha, është i ftuar në studiot e ABC News, në emisionin “Pressing”. Hoxha foli për trajnerët e Shqipërisë dhe kombëtaren tonë kuqezi, ku mes të tjerash tha:

REPLIKË NDAJ LILËS – “Nuk është e vërtetë që vetëm kombëtarja është gjëja më e bukur në Shqipëri. Ke soprano kudo në botë, ke Ismail Kadaren, nuk është vetëm futbolli që përfaqëson Shqipërinë. Futbolli ka forcën për të pasqyruar mentalitetin e popullit. Ne si Shqipëri, bëmë një kombëtare, por për mua, më përpara kemi pasur lojtarë më të mirë, por nuk kishim drejtues. Trajnerët janë ata që pasi ikin nga Shqipëria, çfarë pune bëjnë? Aty vlerësohen.

DE BIASI – “De Biasi iku në Europian me një grup shumë të fortë. Nuk e mendoja se do ta kalonim Serbinë dhe Danimarkën, por ia dolëm. Futbolli sot është bërë: Ai që menaxhon mirë burimet dhe resurset, merr rezultatet. Mos harroni, Finlanda kualifikueset e shkuara ishte në vend të fundit, ndërsa këtë radhë, po shkojnë në Europian. Skuadra e De Biasit, me rezultatet që arriti, duhet ta vazhdonte më shpejt rinovimin. Shqipëria është një vend aq i vogël, sa nuk ka kohë për të humbur, duke ndërruar trajnerët”.

MURIQI – “Muriqi kushton sot 50 milionë euro, ai e tha se ëndrra e tij ishte të luante me Shqipërinë. Ata që punonin te kombëtarja, ta shikonin Vedatin e të mos bënin qorrin. Ta shikonin çfarë talenti ishte dhe është! Shqipëria nuk është Holanda e ka talente të shumtë, ata që kemi, le t’i marrim!

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono