shqiperi

Policia-e-Shtetit-e-re_0.png
nev ila14:58 | 17/01/2020

Gjatë paradites së sotme një operacion antidroge krye falë bashkëpunimit të policive ndërkombëtare të shtetit italian, shqiptar dhe Gjerman. Mediat italiane raportuan se nga ky operacion ishin arrestuar 22 persona mes tyre dhe shqiptarë.

Ndërkohë detajet e para për këtë operacion ka dhënë edhe policia shqiptare. Sipas policisë, operacioni i quajtur “Brokers” ka një shtrirje kohore prej 4 vitesh.

Po ashtu policia thotë se nga ky operacion u godit një organizatë kriminale italo-shqiptare që merrej me trafikimin ndërkombëtar të drogës dhe armëve në Itali.

Si koka e kësaj organizate kriminale që kontrollonte dhe organizonte trafikun e drogës ishte një shtetas shqiptar.

Nga ky operacion mëngjesin e sotëm u arrestuan edhe 3 shqiptarë:

Emrat e shqiptarëve të arrestuar nga operacioni i sotëm:

-Denis Bimi, 30 vjeç.

-Besmir Sylja, 26 vjeç.

-Luan Delaj, 50 vjeç.

Organizata furnizonte grupet  italiane me kokainë, heroinë, hashash dhe marijuanë.

Njoftimi i policisë së shtetit:

“Policia e Shtetit

Tjetër operacion ndërkombëtar antidrogë, zhvilluar mes Policisë italiane dhe Policisë shqiptare.

Operacioni “BROKERS” u zhvillua për goditjen e një organizate kriminale në fushën e trafikimit ndërkombëtar të lëndëve narkotike, marijuanë, heroinë e kokainë, si dhe të armëve e municioneve luftarake.

Operacion me shtrirje kohore prej 4 vitesh dhe u finalizua mëngjesin e sotëm në Itali dhe Shqipëri.

Më datë 17.01.2020 u zhvillua operacioni i përbashkët policor “BROKERS” midis Policisë italiane dhe Policisë shqiptare, si rezultat i të cilit u arrestua në qytetin e Shkodrës shtetasi L. D., 50 vjeç, banues në Shkodër.

Operacioni në Shqipëri u zhvillua në bashkëpunim të ngushtë me Departamentin e Policisë Kriminale, ZQK Interpol Tirana dhe UCI Albania.

Ndërsa në Itali u drejtua nga Skuadra Operacionale e Seksionit kundër Drogës, në bashkëpunim me Komisariatin e Policisë së qytetit të Tranit.

Si rezultat i këtij operacioni u godit një organizatë kriminale italo-shqiptare që merrej me trafikun ndërkombëtar të drogës dhe armëve, në zonën e qyteteve të Andrias dhe Cerignolas.

Hetimet për këtë operacion kishin filluar pas vrasjes së shtetasit italian F. F.,  në qytetin Trani, në janar të vitit 2015.

Personi që kontrollonte dhe organizonte trafikun e drogës nga Holanda, Gjermania dhe Shqipëria ishte një shtetas shqiptar, i cili nëpërmjet njohjeve të tij i siguronte organizatës kokainë, heroinë dhe hashash. Sasia e drogës vinte me anë të korrierëve që zakonisht e fshihnin në ndarjet e dyfishta në makina.

Kjo organizatë e kishte qendrën në qytetin e Foggias. Si rezultat i hetimeve të përbashkëta mes Policisë italiane dhe Policisë se Shtetit u arrit që të arrestoheshin 20 persona dhe të sekuestroheshin 440 kg droga të ndryshme si kokainë, heroinë dhe hashash, si dhe disa armë zjarri.

Policia e Shtetit, si në të gjitha operacionet e zhvilluara më parë, edhe kësaj here tregoi profesionalizëm dhe besueshmëri të lartë te Policia italiane gjatë gjithë fazave të operacionit.

Policia e Shtetit është e angazhuar dhe e vendosur për të bashkëpunuar me profesionalizëm  me Policitë partnere dhe gjithë organizatat ligjzbatuese brenda dhe jashtë vendit, për të luftuar krimin e organizuar dhe terrorizmin”./abcnews.al

bb53c281-d5dd-4ad9-a40b-253a2d236b0e.jpg
R D11:51 | 16/01/2020

Edhe ose shqiptarët ishin mësuar të dëgjonin Johannes Hahn, tani për çështjen e negociatave do të duhet të mësohemi me emrin e Komisionerit të ri të për Zgjerim në Komisionin Europian, Oliver Varhelyi.

Në vizitën e parë të tij në Shqipëri, Komisioneri tha shpresë se marrëveshja për të hapur negociatat e anëtarësimit do të arrihet para Samitit të Zagrebit.  Po kështu dha një tjetër lajm të mirë: “do të japim 28 milionë euro si shpërblim për performacën”.

Gjatë konferencës për mediat, me Kryeministrin Rama, komisioneri Varhelyi deklaroi:

“Ballkani Perëndimor është prioritet, ne si komision duan të rrisim prezencën dhe influencën tonë në këtë rajonin. Raporti i mëparshëm i Komisonit Europin është i vlefshëm. Shqipëria është gati për të çelur negocatat dhe po punojmë të bëhet realitet përpara Samitit të Zagrebit.

Gjithashtu dua të them se duhet ti shohim shqetësimet që kanë shprehur shtetet anëtare, si Franca apo Holanda. Po punojmë me miqtë tanë për të gjetur zgjidhje që të ketë shans të ri për zgjerimin. Do të hartohet një metodologji e re me 4 parime bazë: 1. proces më i besueshëm, më politik, më i parashikueshëm, më dinamik.

Ne synojmë që të hapen negociatat e anëtarësimit përpara samitit të Zabregit. Duam që në samit të tregojmë një plan të zhvillimit ekonomik të gjithë rajonit. Nga ana tjetër do vazhdojmë të kërkojmë që Shqipëria dhe Maqedonia e Veriut të avancojnë me reformat.

Sa i përket Shqipërisë, të gjtha partitë politke duhet të ndihmojnë për ta bërë realitet hapjen e negociatave, pa mbështetjen e të gjitha partive nuk është e mundur të ketë përparim. Do flas sot me opozitën që kjo çështjte te ketë sukses. Unë kam mirëpritur edhe përparimin e reformës në drejtësi. Mirëpres marrëveshjen e reformes zgjedhore, që është gur i rëndësishëm kilometrik.

Sfidat që mbeten janë lufta ndaj krimit dhe korrupsionit që të funksionojë shteti i së drejtës.

Kam dhe një lajm të mirë, ka të bëjë me punën e mirë që është bërë dhe nga fondet e paraaderimit do të japim 28 milionë euro si shpërblim për performacën e mirë të Shqipërisë. /abcnews.al

ambasada-amerikane-1-1280x714.jpg
nev ila11:29 | 13/01/2020

Ambasada amerikane në Shqipëri përmes një postimi në rrjetet sociale, ka ripublikuar thirrjen e bërë nga sekretari i shtetit Mike Pompeo, në lidhje me zhvillimet e dhunshme që po zhvillohen në lindjen e mesme, konkretisht në Iran.

SHBA u ka bërë thirrje të gjithë kombeve, që të kundërshtojnë regjimin e Iranit, dhe të mbajnë Iranin si përgjegjës për dhunën gjatë këtyre ditëve.

Postimi i Ambasadës Amerikane:

“Shtetet e Bashkuara i bëjnë thirrje të gjithë kombeve që të kundërshtojnë ideologjinë e terrorit të regjimit iranian dhe të mbajnë Iranin përgjegjës për dhunën e tij”. Sekretari i Shtetit Michael R. Pompeo”, shkruan ambasada amerikane./abcnews.al

 

shqiperi-itali-ndeshja.jpg
Vladimir Prenga18:59 | 10/01/2020

Italia shkon në finale, pasi me penallti u tregua më e saktë se lojtarët veteranë të Shqipërisë. Ndeshja përfundoi në barazim 1-1, kurse më pas “Axurrët” i shënuan të tria penalltitë. Për kuqezinjtë Duro u ndal nga portieri Chimenti.

Italia e ndëshkoi Shqipërinë në minutën e nëntë me Esposito, i cili fitoi një duel shpejtësie dhe më pas me një parabolë spektakolare mposhti Foto Strakoshën. Në minutën e 22-të Alban Bushi u ndal nga tranversa.

Goli i barazimit erdhi në minutën e 33-të nga Erjon Bogdani, i cili brenda zone u tregua i saktë. Italianët protestuan, pasi ndeshja duhet të ishte mbyllur pas gjysmë ore lojë. Më pas gjithçka u vendos nga penalltitë, ku Italia nuk fali.

SHQIPËRI-ITALI 1-1 (Bogdani 33′ / Esposito 9′)
Penalltitë: Skela (Gol), Duro (Jo Gol), Aliaj (Gol) /Carbone (Gol), Bonanni (Gol), Marcolin (Gol)

SHQIPËRIA: Strakosha, Dallku, Curri, Hasi, Lala, Dede, Skela, Rraklli, Murati, Shaqiri, Tare. (Të gatshëm: Beqaj, Nexhipi, Jupi, Bushi, Bulku, Duro, Bogdani, Aliaj). Trajner: Ilir Shulku

ITALIA: Chimenti, Zaçardo, Tonetto, Colonnese, Marcolin, Tomassi, Esposito, Perotta, Paganin, Di Biagio, Carbone. (Të gatshëm: Grossi, Maini, Agostini, Bonanni) . Trajner: Giani De Biasi

ARBITRA: Mario Shabanaj, Ani Kociaj, Egin Morina, Saet Kazani

italia-gol.jpg
Vladimir Prenga18:28 | 10/01/2020

Italia ka ndëshkuar Shqipërinë në minutën e nëntë me Esposito, i cili mposht një nga mbrojtësit tanë në duel shpejtësie dhe më pas me një parabolë spektakolare mposhti Foto Strakoshën.

SHQIPËRI-ITALI 0-1 (Esposito 9′)

SHQIPËRIA: Strakosha, Dallku, Curri, Hasi, Lala, Dede, Skela, Rraklli, Murati, Shaqiri, Tare. (Të gatshëm: Beqaj, Nexhipi, Jupi, Bushi, Bulku, Duro, Bogdani, Aliaj). Trajner: Ilir Shulku

ITALIA: Chimenti, Zaccardo, Tonetto, Colonnese, Marcolin, Tomassi, Esposito, Perotta, Paganin, Di Biagio, Carbone. (Të gatshëm: Grossi, Maini, Agostini, Bonanni) . Trajner: Giani De Biasi

ARBITRA: Mario Shabanaj, Ani Kociaj, Egin Morina, Saet Kazani /abcnews.al

ni-terrori.jpg
nev ila19:30 | 07/01/2020

Agjentët e anti-terrorit kanë rritur masat e sigurisë gjatë ditëve të fundit, duke monitoruar objektet e rëndësisë së vecantë, gjithashtu  ata kanë rritur shkëmbimin e informacionit me agjencitë vendase dhe të huaja.

Burime për ABC News njoftojnë se vazhdojnë të mbahen nën vëzhgim shtetasit iranianë që qëndrojnë në vendin tonë dhe objektet ku ata janë dislokuar.

Këto masa sigurie vijnë në kuadër të kërcënimeve të vazhdueshme që kanë ardhur nga shteti i Iranit si kundërpërgjigje për vrasjen e Qassem Soleimani komandant i forcave revolucionare Quds të Iranit.

Në tetor të 2019 policia shqiptare deklaroi se zbuloi një celulë që drejtohej nga forcat Quds e cila do të organizonte sulm terrorist në kryegjyshatën botërore bektashiane në Tiranë ditën e sulltan nevruzit.

Në atë kohë u ndaluan 3 iraninë nga anti-terrori që deklaruan se ishin gazetarë dhe kishin ardhur në Shqipëri me ftesë të Kryegjyshatës Botërore Bektashiane.

Hetimet për celulën terroriste nisën në mars të 2018-ës nën drejtimin e prokurorit të Krimeve të Rënda, Eugen Beçi dhe njësisë së antiterorit në Policinë e Shtetit.

Si rrjedhojë e këtij hetimi pati dhe lëvizje diplomatike në Tiranë, ku ambasadori i Iranit dhe një diplomat i ambasadës iraniane u dëbuan nga shteti shqiptar për cënim të sigurisë kombëtare./abcnews.al

tritani.jpg
in a14:53 | 07/01/2020

Kryesimi i Organizatës për Siguri dhe Bashkëpunim në Evropë (OSBE) prej Shqipërisë ka një ironi fati brenda saj. Shkak sipas ish-ministrave të Jashtëm të Shqipërisë është gjendja ku ndodhet vendi dhe vlerat që promovon kjo organizatë.

“Në qendër të misionit qëndron promovimi i lirisë së shprehjes dhe organizimi i zgjedhjeve të lira”, u shpreh Edmond Panariti.

Prej gati një viti vendi është mbërthyer nga kriza jo vetem politike, ndërsa si kryesuese e OSBE-së Shqipëria duhet të zgjidhë krizat.

“Kjo përbën një shans të humbur për Shqipërinë, roli i OSBE është një rol që duhet të nxjërrë nga kriza vendet që janë në krizë”, theksoi Tritan Shehu.

Në momentin e marrjes së detyrës, në zyrat e OSBE-së në Vjenë ishte kryeministri Edi Rama e po ashtu ministri që i janë deleguar detyrat e kryediplomatit shqiptar,Gent Cakaj. Ky pozicion sipas ish-ministrit Panarti nuk do të jetë aspak komod.

“Ai që do të drejtojë mbledhjet do të jetë në një pozicion jo të rehatshëm”, theksoi më tej Edmon Panariti.

Edhe Shehu identifikon problematikë në këtë drejtim.

Ish-ministrat e Jashtëm e përjashtojnë mundësinë që kjo detyrë t’i ndërpritet Shqipërisë nga OSBE-ja.

“Kryesimi prej Shqipërisë i ka mbetur si patate të nxehtë OSBE-së”, u shpreh më tej Shehu.

Edhe pse detyra mbetet për një kohë jo shumë të gjatë, Panariti mendon se qeveria mund të jap një mesazh pozitiv kundrejt OSBE-së.

“Qeveria duhet të shikojë pozicionin e saj në raport me situatën duke i dhënë udhë proceseve demokratike, në radhë të parë zgjedhjeve të parakohshme”, deklaroi Panariti.

Shqipëria mori zyrtarisht detyrën e kryesues së s Organizatës për Siguri dhe Bashkëpunim në Evropë në datën 1 janar dhe e dorëzon në të njëtën datë të vitit tjetër. Ministri në detyrë Genc Cakaj ka deklaruar më parë se Shqipëria është e vendosur që të japë kontributin e vet për stabilitetin dhe sigurinë e kontinentit, e po ashtu luftën kundër korruopsionit, krimi dhe luftën për të drejtat e njeriut./abcnews.al

varferia-1280x720.jpeg
R D09:17 | 07/01/2020

Për familjet, të ardhurat e të cilave janë të pakta është e kuptueshme që shpërndarja e tyre do të shkojë tek gjërat më bazike, sikurse është ushqimi. Klasa më e varfër e familjeve në Shqipëri përllogarit se shpenzon mesatarisht 53.3% të totalit për ushqime dhe pije jo alkoolike.

Në thuajse 10 vite pesha e shpenzimeve është ulur me gati 8 pikë përqindje, por sërish më shumë se gjysma e shpenzimeve të familjeve me të ardhura të ulëta shkojnë për shpenzime bazike.

Por për çfarë po shpenzojmë më shumë familjet e varfra? Ndonëse kanë ulur shpenzimet për ushqime, të dhënat e INSTAT tregojnë se janë rritur ndjeshëm shpenzimet për të siguruar një çati mbi kokë dhe shpenzimet që lidhen me banesën në përgjithësi.

Në këtë kategori shpenzimesh përfshihen: Qiraja e paguar (si shpenzim i kryer për marrjen e ambienteve të banimit me qira nga ana e familjeve), mirëmbajtja dhe riparimi i banesës, materiale për riparim, pagesa për energji elektrike: ujë, gaz, heqje plehrash, dhe të gjitha pagesat që kanë lidhje me banesën e familjes etj. në një familje të varfër shpenzimet për këtë zë zinin rreth 16.6% të totalit, me një rritje prej 5.3 pikë përqindje në raport me një vit më parë.

Të dyja këto zëra shpenzimesh (ushqimet dhe banesa) përbëjnë thuajse 70% të totalit të shpenzimeve të familjeve më të ardhura të pakta.


Për çfarë shkon pjesa e mbetur? Rreth 6.1% e shpenzimeve shkojnë për shpenzimet që kanë këto familje për mobilimin, pajisjet shtëpiake dhe mirëmbajtjet.

5.1% të tjera të totalit të shpenzimeve, familjet e varfra përllogarisin shpenzimet e komunikimit. Edhe për këtë grup shpenzimeve, INSTAT përllogarit se pesha për familjet e varfra është rritur ndjeshëm në raport me rreth 10 vite më parë, ku një familje me të ardhura të ulëta shpenzonte thuajse dy herë më pak. Në këtë zë sipas shpjegimit të INSTAT përfshihen shërbimet postare, të gjitha llojet e shërbimeve për komunikim, telefona, celularë, faks, internet etj.

Shpenzimet më të ulëta të familjeve të varfra mbeten për arsimin, ku sipas të dhënave të INSTAT vetëm 0.2% e totalit të shpenzimeve të tyre shkojnë për këtë zë, në raport me 10 vite më parë pesha e shpenzimeve për arsim është rritur me vetëm 0.1 pikë përqindje për familjet me pak të ardhura.

Po ashtu shpenzimet për argëtim dhe kulturë nuk kanë vend për familjet që shpërndajnë burimet e tyre të pakta financiare në sigurimin e gjerave bazike, sikurse është ushqimi dhe çatia mbi kokë. /Monitor

1da94eb7-e185-4c32-86b5-18daaeb5ef25-1280x720.jpg
R D18:48 | 02/01/2020

41-vjeçari turk Harun Çelik, i dëbuar të mërkurën nga autoritetet shqiptare drejt Turqisë me “Air Albania” është dënuar nga Gjykata e Tiranës me 13 muaj burg për falsifikim vize me qëllimin kalimin nga Shqipëria drejt Kanadasë. Vendimi është marrë nga Gjykata e Tiranës më datën 19 dhjetor 2019, vetëm pak ditë para lirimit të tij nga qelia.

Vetëm pak ditë para lirimit nga qelia, 41-vjeçari turk Harun Çelik, i dëbuar të mërkurën nga autoritetet shqiptare drejt Turqisë është dënuar nga Gjykata e Tiranës me 13 muaj burg për falsifikim vize me qëllimin kalimin nga Shqipëria drejt Kanadasë. Abc News zbardh vendimin e Gjykatës së Tiranës për dënimin e Çelik, i cili u arrestua në datën 8 korrik 2019 nga autoritetet policore shqiptare në Aeroportin e Rinasit.

Pas arrestimit ai është mbajtur në paraburgim, ndërsa vijonin hetimet dhe gjykimi i çështjes u bë me procedurë të shkurtuar. Më 19 dhjetor 2019, Gjykata e Tiranës e ka shpallur atë fajtor për veprën e “falsifikimit të letërnjoftimeve, pasaportave ose i vizave” duke e dënuar me 13 muaj burg. Si pasojë e aplikimit të gjykimit të shkurtuar, dënimi i tij është ulur me 1/3, duke arritur në 8 muaj e 20 ditë.

Debimi i mësuesit turk Harun Çelik, baba i 4 fëmijëve, është pasqyruar gjerësisht në disa portale turke, të cilat kanë publikuar edhe pamje nga momenti i dërgimit të tij në aeroportin e Rinasit, për t’u nisur më pas drejt Turqisë. Ndërkohë, mësohet se 41-vjecari e ka refuzur me forcë deportimin drejt Turqisë, ku ka deklaruar se ndihej i kërcënuar.

Mediat turke thonë se 41-vjecari është sjellë në Turqi pas një operacioni të shërbimeve sekrete turke të kryer në Shqipëri. Mediat turke, shkruajne se Çelik është dërguar direkt për në Turqi pas lirimit nga burgu dhe nuk i janë marrë parasysh as kërkesat që ka bërë për mbrojtje.

Presidenti turk Rexhep Taip Erdogan u ka kërkuar disa shteteve që të dërgojnë në Turqi për përndjekje penale çdo person të lidhur me lëvizjen globale Gulen, të cilën ai e akuzon si organizatore të grushtit të dështuar të shtetit të vitit 2016.

Në shkurt 2015, Kosova dëboi 5 shtetas të kërkuar nga Turqia duke shkaktuar zemërim ndërkombëtar dhe kritika të ashpra nga BE dhe SHBA për shkelje të procesit të rregullt ligjor dhe dhunim të të drejtave themelore të njeriut. Kryeministri Ramush Haradinaj shkarkoi për këtë vendim kreun e Shërbimeve Sekrete të vendit si dhe ministrin e Brendshëm duke pretenduar se nuk kishte pasur dijeni për dëbimin. /abcnews.al

gylenist.jpg
in a20:21 | 01/01/2020

42-vjeçari turk, Harun Çelik është  dëbuar me urgjencë nga Shqipëria mbrëmjen e sotme. Abc News ka arritur të mësojë përmes burimeve të besuara, se 42-vjeçari është ndaluar në aeroportin e Rinasit në korrik 2019, teksa hynte tranzit me vizë kanadeze false. Ai kishte arritur ti shëptonte përndjekjes së regjimit turk, por u arrestua në Shqipëri për “dokumente false”.

Harun Çelik vuajti dënimin prej 5 muaj e gjysmë në burgun 302 tek rruga “Mine Peza” në Tiranë. Sot (1 janar 2020) ai është njoftuar se i ka përfunduar dënimi. Por as sot, 42 vjeçari nuk është lënë i lirë….

Menjëherë është transportuar nga qelia e burgut, në Drejtorinë e Migracionit që ndodhet në Laprakë. Pasi është mbajtur disa orë aty në mënyrë të paligjshme, Harun Celik është shoqëruar me makina policie në aeroportin e Rinasit, siç shihet në pamjet e siguruara nga Abc News.

Miqtë e tij kanë reaguar në rrjetet sociale duke e cilësuar të padrejtë vendimin e autoriteteve shqiptare për të dëbuar mësuesin turk. Ata apelojnë për lirimin e 42-vjeçarit që përndiqet në Turqi, vetem se është mbështetës i Lëvizjes Gylen.

“Harun Çelik u dërgua në zyrën e Migracionit dhe prej andej u rrëmbye dhe u fut me forcë në një automjet. Miqtë e tij ndërhynë në aeroport. A ka ndonjë ligj në Shqipëri?”, shkruan Barbarossa Kaya, e cila bën tag në twitter Kryeministrin Rama.

“Turp për qeverinë shqiptare! Kryeministri Edi Rama shpërfilli dinjitetin e vendit të tij dhe zbatoi urdhrin e Erdoganit.

Të drejtat e njeriut të Harun Çelik janë shkelur, ai dëbohet në mënyrë të paligjshme në një operacion policor të rreptë”, shkruhet në një tjetër status.

Harun Çelik, 42 vjeç, është mësues me profesion dhe i shpëtoi përndjekjes në Turqi, pasi vuajti dënimin në Shqipëri po dërgohet jashtë vullnetit të tij sërish në Turqi. Nuk dihet akoma saktësisht nëse iu dha mundësia të bëjë kërkesë për azil ose te apelojë vendimin e deportimit apo jo pasi as avokati i tij nuk është njoftuar për vendimin për deportim, që është bërë më 1 janar, një ditë pushimi. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono