shqiperi

LUMENJTE-NE-SHQIPERI.mpg_snapshot_00.10-1280x720.jpg
ent ela16:46 | 23/08/2019

Rrjedhja lirshëm e llojeve të ndryshme të mbetjeve i bën lumenjtë në Shqipëri më të ndoturit në Europe. EUROSTAT ka analizuar situatën dhe ka dalë në këtë konkluzion.

Lumenjte në Shqipëri janë më të ndoturit në Europë. Në këtë përfundim ka dale zyra europiane e statistikave pas analizave të kryera në kuadër të monitorimit të objektivave të zhvillimit të qëndrueshëm.

Matjet gjetën nivelin më të lartë të biokimikateve. Një litër uje përmbante 7 miligram biokimikate. Vlerat që flasin për nivel mesatar të ndotjes varojne nga 2 deri në 8 mg / L, ndërsa në lumenjtë e pastër niveli i biokimikateve duhet të jetë 1 miligram për litër.

Shqipëria paraqitet me diferencë të madhe nga Rumania, një tjetër shtet me lumenj të ndotur.  Niveli i biokimikateve atje rezultoi 3,5 miligram për një litër ujë. Raporti tregon gjithashtu se niveli i fosfateve në lumenjtë e Shqipërisë është gati sa dyfishi i mesatares në lumenjtë europianë.

6.9 miligram për litër u regjistrua në vitin 2015, një rritje e konsiderueshme në raport me vitin 2013 kur niveli i tyre ishte në 5.5 miligram për litër. Përqendrimet e larta të fosfatit dëmtojnë cilësinë e ujit, duke nxitur rritjen e makrofiteve dhe algave.

Ndotja në lumenjtë shqiptar vjen pasi në to rrjedhin lirshëm të gjitha llojet e mbetjeve, duke përfshirë edhe ato industriale. /ABC news Albania 24/7

BLLOKOHET-MISHI-MBULIM.mpg_snapshot_00.10-1280x720.jpg
ent ela11:00 | 23/08/2019

AKU ndalon hyrjen e 387.1 ton mish derri dhe vici të pasigurta në territorin shqiptar. Sipas njoftimit te ketij autoriteti,  234.5 ton mish janë kthyer në vendet e origjinës, ndersa 152.6 ton të tjera janë në proces për kthim.

Tre ngarkesa me sasi totale 74.9 ton “Mish Derri” me origjinë nga Kanadaja, u ndaluan ne Portin e Durresit pasi nuk përmbushin kërkesat ligjore të sigurisë ushqimore dhe kishin mangësi  dokumentacionin shoqërues.

Po ashtu , dy ngarkesa 52.2 ton “Mish Viçi” me origjinë nga Brazili, me destinacion final Kosovën, rezultuan me mangësi dhe mospërputhje thelbësore në dokumentacionin shoqërues të mallit.

Më herët, analizat e kryera për disa nga ngarkesat me mish të importuar rezultuan me ngarkesë mikrobiologjike. Per kete arsye, Autoriteti Kombëtar i Ushqimit vendosi kthimin e tyre në vendin e origjinës.

Keshtu 107.2 ton “Mish derri” me origjinë nga Brazili, janë kthyer në vendin e origjinës. Ndersa per 6 ngarkesa me mish, në total 152.6 ton, po përmbyllen procedurat për kthimin ne vendin e origjinës ose asgjësimin e tij.

Njoftimi i AKU

AKU ndalon hyrjen e 387.1 ton produkteve ushqimore të pasigurta në territorin shqiptar. Autoriteti Kombëtar i Ushqimit njofton se 234.5 ton mish janë kthyer në vendin e origjinës dhe 152.6 ton të tjera janë në proces për kthim.

Në kuadër të mbarëvajtjes të sezonit turistik veror, Autoriteti Kombëtar i Ushqimit vijon monitorimet rigoroze për cilësinë dhe efektivitetin e kontrolleve zyrtare të ushqimit si në terren ashtu dhe në Pikat e Inspektimit Kufitar.

Kontrollet e kryera nga inspektoret e ushqimit të AKU Durrës në Pikën e Inspektimit Kufitar Durrës gjatë ditëve të fundit kanë konkluduar se disa ngarkesa me produkte importi janë të pasigurta për konsum njerëzor dhe si rrjedhojë kanë vendosur për kthimin e tyre në vendin e origjinës. Më konkretisht:

  • Tre ngarkesa me sasi totale 74.946 ton “Mish Derri” me origjinë nga Kanadaja, importuar nga subjekti “FRIGO ALB shpk”, rezultuan se nuk përmbushin kërkesat ligjore të sigurisë ushqimore dhe kishin mangësi në besueshmërinë e dokumentacionit shoqërues (kryesisht të certifikatës veterinare si dokumenti kryesor i sigurisë së produktit si dhe certifikatat e analizave raportonin prezencë Ractopaminë, një produkt mjekësor veterinar i paregjistruar dhe i ndaluar për përdorim në Shqipëri dhe në BE)

 

  • Dy ngarkesa me sasi totale 52.257 ton “Mish Viçi” me origjinë nga Brazili, importuar nga subjekti “Apetit shpk”, në rregjim tranzit në territorin e Shqipërisë me destinacion final Kosovën, rezultuan me mangësi dhe mospërputhje thelbësore në dokumentacionin shoqërues të mallit (çertifikata e origjinës dhe ajo veterinare mbanin të dhëna të ndryshme nga dokumenti i transportit dhe fatura komerciale) çka e bën mallin ushqimor të importuar pa identitet të konfirmuar dhe të pasigurt për konsum.

Më herët, analizat e kryera për disa nga ngarkesat me produkte ushqimore mish të importuar rezultuan me ngarkesë mikrobiologjike (analizat laboratorike raportuan prezencën e Salmonella spp) dhe si rrjedhojë, produkti ushqimor i importuar me këto ngarkesa është i pasigurt dhe i papërshtatshëm për konsum njerëzor. Për ketë arsye dhe referuar bazës ligjore dhe rregullatore në fuqi, Autoriteti Kombëtar i Ushqimit vendosi kthimin e këtyre ngarkesave në vendin e origjinës, më konkretisht:

  • Katër ngarkesa me sasi totale 107.240 ton “Mish derri” me origjinë nga Brazili, importuar nga subjekti “ZICO sh.a.” është finalizuar praktika dhe ngarkesat janë kthyer në vendin e origjinës.
  • Gjashtë ngarkesa (152.631 ton në total) janë në proces përmbyllje praktike për kthimin ne vendin e origjinës ose asgjësim, më konkretisht:

o             51.984 ton “Mish Derri” me origjinë nga Brazili, importuar nga subjekti “AMG shpk”,

o             27 ton “Fileto Pule” nga Brazili, importuar nga subjekti “KING MIT”,

o             25.999 ton “Mish Derri” nga Brazili, importuar nga subjekti “FRIGO ALB shpk”,

o             22.648 ton “Mish Viçi” nga Brazili, importuar nga subjekti “DEKON FRIGO shpk”.

o             25 ton “Mish Derri” me origjinë nga Qipro, importuar nga subjekti “EHW shpk”,

dhe me finalizimin e praktikës për kthimin ne vendin e origjinës ose asgjësim, rezultati do të njoftohet në rrjetin Europian të shkëmbimit të informacionit mbi rreziqet që lidhen me ushqimin (RASFF).

 

abazaj.jpg
G. P.15:47 | 21/08/2019

Kristal Abazaj pritet të nënshkruajë për Kukësin në orët në vijim. Sulmuesi i huazuar nga Anderlehti ka akord me presidentin Gjici, ndërsa kuksianët pritet t’i japin 8 000 euro në muaj.

Një tjetër prezantim e pret shumë shpejt. Kristal Abazaj do të ndërpresë të paktën përkohësisht aventurën jashtë vendit, për të luajtur në Shqipëri, tashmë në radhët e Kukësit.

Sulmuesi që ishte i huazuar tek Osijeku në Kroaci gjysmën e dytë të sezonit të kaluar, ka arritur dakordësi me klubin verior dhe zyrtarizimi pritet të bëhet shumë shpejt, maksimumi deri nesër.

Burime pranë tij bëjnë me dijë se Kukësi do t’i japë 8.000 euro në sezon, ndërsa sulmuesi tropojan do të jetë i huazuar nga Anderlehti. Kartoni i 23-vjeçarit vazhdon të jetë në zotërim të klubit belg, i cili ende ka besim se ai mund të jetë futbollist i vlefshëm sezonet e ardhshme.

Abazaj spikati në Superligë kur luajti për Luftëtarin e Gjirokastrës në sezonet 2016-2018, duke shënuar shumë gola e duke u shpallur talenti i sezonit në kampionat në 2017. Kjo formë me gjirokastritët I siguroi kalimin në Belgjikë tek Anderlehti.

Përpara akordit me Kukësin, për të pati interesim nga Tirana apo Partizani, por veriorët u treguan më bindës. Sulmuesi ka luajtur edhe për Shqipërinë U21 duke shënuar 3 gola në 10 ndeshje, si dhe ka debutuar edhe për ekipin kombëtar./ABC News Albania 24/7

turizmi.jpg
G. P.15:21 | 21/08/2019

Këtë Gusht, Shqipëria ka pritur 16% më shumë turistë se Gushtin e vitit të shkuar. Ministri i Turizmit dhe Mjedisit Blendi Klosi e bëri të ditur, ndërsa foli për një rekord të ri në turizëm në vendin tonë.

Muaji Gusht shënoi rekordin e ri në turizëm, 1 milion turistë të huaj kanë hyrë në Shqipëri, në vetëm 1 muaj. Ministri i Turizmit dhe Mjedisit Blendi Klosi e bëri të ditur nga porti i Sarandës ku priti familjen austriake Forster që shënoi dhe turistin e 1 miliontë.

“Familja Forster u përcaktua si turisti i 1 miliontë në vendin tonë për muajin gusht. Rastisi që turisti i 1 miliontë për këtë muaj të hyjë në Sarandë dhe ne së bashku me kryetarin e bashkisë, drejtoreshën e portit e mirëpritëm me të rinjtë e Smile duke dëshmuar një moment simbolik në këtë ofertë të re turistike që ka Saranda dhe i gjithë bregdeti shqiptar për vitin 2019. Siç e thashë është turisti i 1 miliontë, pra kanë hyrë 1 milionë turistë të huaj vetëm brenda muajit gusht deri në ditën e sotme duke shkuar në rritje me 16% krahasuar me të njëjtën periudhë të gushtit të vitit të kaluar”.

Të surprizuar nga kjo ngjarje turistet vlerësuan mikpritjen shqiptare.

“Është hera e parë që vij në Shqipëri. Miqtë na treguan se Shqipëria është një vend i mrekullueshëm, që duhet ta vizitoni patjetër tani! Na thanë që është një vend i bukur turistik, i qetë, me njerëz të mirë gjithashtu! Ne do të qëndrojmë këtu për 1 javë, me shpresën që do ta shijojmë qëndrimin këtu”.

Për ministrin Klosi kjo është një ngjarje, që flet për sezon të suksesshëm turistik, por që sipas tij, me rritjen e numrit të turistëve, rritet edhe përgjegjësia për të punuar për më shumë standarde./ABC News Albania 24/7

TURIZMI-KULTUROR-NE-WELT.mpg_snapshot_00.05-1280x720.jpg
ent ela15:01 | 21/08/2019

Prestigjiozja gjermane “Die Welt” i ka kushtuar një artrikull të gjatë turizmit kulinar në Shqipëri. Autori i shkrimit vlerëson jo vetëm cilësinë por edhe çmimet ne restorantet e vendit tonë. Në artikull, Shqipëria promovohet si një vend i pazbuluar i Europës, i cili me hyrjen në BE mund të ndryshojë.

 Nuk të kënaqet vetëm në syri në Shqipëri por edhe stomaku. Sugjerimi vjen nga media gjermane Die Welt që promovon në vecanti turizmin kulinar në vendin tonë ku vecon ndikimet osmane, italiane dhe greke.

“Veçanërisht kuzhina dhe gastronomia e vendit pasqyrojnë këtë kombinim të egër. Perandoria Osmane, e cila u tërhoq prej saj në vitin 1912 pas 500 vitesh pushtim, të kujton kulturën e kafesë, e cila është gjerësisht e përhapur në verë në hijen e palmave dhe fiqve”.

Produktet e shumta vendase, të cilat vijnë nga fermat rreth e rrotull të shtojnë dëshirën për të vizituar një vend të cilin shumë pak e njohin.- shkruan Die Welt që në pjesën e parë të udhëtimit kulinar nëpër kuzhinën orientale-mesdhetare të Shqipërisë shkojnë në skajin e Parkut të Madh me liqenin e krijuar nga dora e njeriut, ku gjendet edhe një shatërvan tepër i këndshëm. Një ndërtesë e viteve ’70, fasada me elementë në ngjyrë portokalli.

“Në katin e poshtëm gjendet restoranti i ambasadorit shqiptar të pashpallur të ushqimit, Bledar Kola. Restoranti punon kryesisht me kulturat e lashta si misër, elb dhe tërshërë. Tek “Mullixhiu” dhoma e ngrënies ngjan me një mulli të mbushur me orendi druri dhe thasë prej leshi”.

Në Tiranë gjenden edhe Restorante të klasit të parë me çmime të arsyeshme sugjeron gazeta gjermane e cila më pas nis udhëtimin drejt Beratit aty ku shkojnë të gjithë gjermanët dëgjon gazetari nga vendasit. Dyqanet e vogla ushqimore ofrojnë të njëjtën pamje si në Tiranë: ushqim vendas, birrë shqiptare, ujë nga kompanitë lokale në vend të korporatave ndërkombëtare. Edhe bajamet e pjekura në shtëpi dhe reçeli prej mandarine i përgatitur në kushte shtëpie janë produket në shitje – shumë pronarë po fitojnë të ardhura shtesë falë këtij biznesi. Ndihet aroma e kafesë së sapobluar. Asnjë Starbucks dhe McDonald nuk duket në horizont. Në restorant të shërbejnë specialitete të thjeshta vendase.

“Pispili, një tortë popullore me miell misri dhe lakra të egra. Kukurec – të përbrendshmet e qengjit të pjekur, dhe Iman Bajëlldi, patëllxhanë të mbushur dhe të pjekur, të cilat konsumohen edhe në Turqi, si dhe ëmbëlsira që tregojnë ndikimin otoman në kuzhinën shqiptare”.

“SHQIPËRIA ËSHTË NJË PJESË ENDE E PAZBULUAR E EUROPËS” vlerëson media gjermane sipas të cilës kjo ndoshta do të ndryshojë nëse Shqipëria anëtarësohet në BE – ajo është tashmë një vend kandidat. Shumica dërrmuese dëshiron të anëtarësohet, pasi kjo kupton begati.

“Por njerëzit si kuzhinieri Bledar Kola i frikësohen pak – njerëzit që kujdesen për traditën lokale të ushqimit dhe kanë frikë nga monokultura globale – gjithsesi ata janë të mirëkuptuar.

Por ende turistët drekojnë në restorante të klasit të parë me çmime tepër të ulëta”.

Në një shkrim të gjatë Die Welt jo vetëm sugjeron turizmin kulturor dhe kulinar në Shqipëri, por edhe i orienton turistët gjermanë e jo vetëm ku të ndalen për të marrë shijen më të mirë shqiptare. /ABC News Albania 24/7

turiste.jpg
G. P.19:40 | 20/08/2019

Vetëm në 20 ditët e para të gushtit në Shqipëri kanë hyrë 1 milionë turistë të huaj. Shifrën e ka bërë publike vetë kryeministri Rama, i cili ka publikuar në rrjetet sociale, vajzën nga Austria e cila kur hyri në portin e Sarandës u prit nga Ministri i Turizmit, Blendi Klosi.

“Në njëzetë ditët e para të këtij gushtit, kanë hyrë në Shqipëri plot 1 milionë turistë të huaj ose 16.5 % më shumë, se sa i gjithë gushti i kaluar”, deklaroi kryeministri duke theksuar se rritja që po shënon turizmi vit pas viti, është një arsye e madhe për të besuar gjithnjë e më shumë tek ky vend dhe e ardhmja e tij.

Rama ka bërë apel që patriotizmin të gjithë duhet ta masim me kontributin në pastërtinë e mjedisit, respektimin e rregullave dhe në rrezatimin e traditës shqiptare të mikpritjes./ABC News Albania 24/7

bledi-strakosha1-1280x720.jpg
G. P.19:45 | 19/08/2019

Bledi Strakosha është një nga moderatorët më të njohur në Shqipëri. Ai ishte prezantuesi i cili në vitet 2000 me emisionin e tij Blue bëri që të rrëfesheshin shumë personazhe të njohura.

Bledi është rritur në Dhërmi, aty ku po pushon sëbashku me familjen këtë verë. Për mikrofonin e ABC News, ai rrëfeu disa nga gjërat që bënte sëbashku me familjen kur ishte fëmijë për të shkuar në plazh.

Edhe pse i shijon shumë ditët kur shkon në plazh, Bledi rrëfeu se disa gjëra nuk janë më njësoj siç kanë qenë në vegjëlinë e tij.

“Mbaj mend që me bukë me vete dilnim në plazh bashkë me prindërit dhe me pjesëtarë të tjerë të familjes nga mali që ishte një terren i vështirë për të shkuar në det. Në det nuk kishe asgjë se nuk ka pasur investime si sot. As shezlonge, as çadra. Ka qenë shumë bukur. E vështirë mbetej ngjitja se ishe lodhur nga deti, dielli edhe duhej të ngjiteshe prapë në fshat sepse shtëpia ishte në fshat.

Im gjysh është rritur dhe është edukuar, shkollën 7-vjeçare e ka bërë në Dhërmi dhe pastaj u rrit dhe u shpërngul drejt Tiranës. Është ajo lidhja e pashpjegueshme me vendin tënd të origjinës. Sa herë që vij këtu më shijon gjithçka paçka që më vjen keq që shumë gjëra kanë ndryshuar, nuk janë siç kanë qenë në vegjëlinë time, aq të bukura, aq të paqta”, tha moderatori./abcnews.al

zjarrrr.jpg
G. P.09:07 | 14/08/2019

Një zjarr masiv ka rënë në fshatin Boshanj të Ersekës. Nga të dhënat e para mësohet se janë djegur më shumë se 15 hektarë dushqe dhe pisha.  Janë shtatë vatra zjarri dhe zjarrfikëset e kanë patur të vështirë të hyjnë në këtë terren.

Këto ditë me temperatura të larta janë shfaqur vatra zjarri në të gjithë vendin. Një ditë më parë një zjarr i madh ra në Ersekë në vendin e quajtur Antenat. Aty banorët po pastronin tokat.  Zjarre ka patur ne Gjirokastër, Shkodër, Fier etj./abcnews.al

lindjet-ne-shqiperi-1280x719.jpg
nev ila15:04 | 12/08/2019

Fenomeni i lindjeve në mosha të vogla po njeh një trend zbritës në vendin tonë. Megjithatë Shqipëria renditet e pesta ndër vendet evropiane për numrin e femrave që lindin nën moshën 20 vjeç.

Numri i nënave adoleshente në Shqipëri është ulur lehtë vitin e kaluar krahasuar me një vit më parë. Sipas të dhënave të publikuara nga INSTAT, në vitin 2017, 5.6% e lindjeve në vend u kryen nga adoleshente, ndërsa në 2018 kjo shifër pësoi një rënie të vogël në 5.2%.

Megjithatë kjo shifër mbetet e lartë krahasuar me vendet e tjera evropiane. Në një renditje përsa i takon lindjeve nga nëna me moshë nën 20 vjeç Shqipëria listohet e pesta. Vendin e parë e mban Bullgari, ku 12,5% e lindjeve janë kryer nga nëna adoleshente. Më pas vijnë Rumania, Hungari dhe Sllovakia.

Nga ana tjetër, Danimarka është vendi evropian me numrin më të ulët të lindjeve nga nëna me moshë nën 20 vjeç. Në  këtë vend nordik vetëm 1% e foshnjave të sapolindura vitin e kaluar kishin nëna adoleshente . Në këtë aspekt Danimarka ndiqet nga Holanda , Luksemburgu, Suedia, Italia dhe Sllovenia.

Për tu kthyer në  Shqipëri, pjesa më e madhe e lindjeve në vend,   35.6%, janë ato nga nëna të moshës 25 deri në 29 vjeç.

Ndërsa lindjet te gratë mbi 40- vjeç vijojnë të mbeten të ulta. Ato vitin e kaluar ishin vetëm 1,5% e numrit të gjithë lindjeve në vend./ABC News Albania 24/7

rama3.jpg
Sej rie10:00 | 09/08/2019

Kryeministri Edi Rama ka deklaruar se Shqipëria i ka përmbushur detyrat për hapjen e negociatave të anëtarësimit me BE-në. Në një intervistë për Euronews, Rama ka nënvizuar se tashmë gjithçka është në duart e vendeve anëtare, të cilat sipas tij do të vendosin në bazë të zhvillimeve të brendshme.

Edi Rama, kryeministër: Ne jemi gati, bazuar në çfarë komisioni ka parashtruar dhe rekomanduar. Por në të njëjtën kohë ne duhet të përballemi me faktin se vendimmarrjet në Këshillin Europian nuk varen tek ato që bëjmë ne, por tek dinamika e brendshme politike e vendeve anëtare.

Rama thekson se ndarja e Shqipërisë nga Maqedonia e Veriut në procesin e hapjes se negociatave te anetaresimit nuk do të ishte një lëvizje e drejtë e Brukselit, edhe pse është shprehur i vetëdijshëm se Shkupi ka bërë një hap të madh përpara me Marrëveshjen e Prespës.

Edi Rama, kryeministër: Kjo nuk do të ishte diçka strategjike dhe largpamëse, por do të ishte taktike dhe e rëndë për rajonin. Në të njëjtën kohë mendoj se do të ishte e padrejtë. Është e vërtetë se Maqedonia bëri progres me Marrëveshjen e Prespës dhe meriton të shpërblehet, por çështja është, a duhen konflikte për t’u shpërblyer për atë që bën?.

Në vijim të intervistës, Rama ka theksuar se, integrimi i Ballkanit do t’i sillte BE-së më shumë stabilitet dhe siguri, por për momentin, sipas tij, Unioni ka zgjedhur ta mbajë rajonin si një zonë gri, e rrezikuar nga faktorë të tjerë të huaj.

Edi Rama, kryeministër: Është një plan i vazhdueshëm i BE-së për ta tërhequr këtë organ me trupin e tij, por të mos e integrojë në trupin e tij, të ketë një lloj zone gri brenda vetvetes në një kohë kur faktorë të tjerë mund të avancojnë përballë rrëmujës apo zhgënjimit”.

Më tej kryeministri Rama është shprehur i vetëdijshëm se rruga e anëtarësimit në BE është e gjatë dhe ka shprehur gjithashtu bindjen se nuk do të jetë në postin e kryeministrit kur vendi ynë të anëtarësohet në ketë Union./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono