Serbia

ambsadaroi.jpg
G. P.15:24 | 02/10/2019

Formati i dialogut Kosovë-Serbi nuk ka për ndryshuar: ai do të zhvillohet me ndërmjetësimin e Bashkimit Evropian. Kështu ka deklaruar ambasadori i Gjermanisë në Beograd, Tomas Shib. Megjithatë, në një intervistë për median në Beograd, diplomati gjerman, ka lënë të kuptohet se Brukseli po shqyrton mundësinë e caktimit të një ndërmjetësi të posaçëm.

Tomas Shib, ambasador i Gjermanisë në Beograd, i ka vlerësuar si të mira marrëdhëniet e vendit të tij me Serbinë, por në të njëjtën kohë ka konfirmuar se ka dallime sa i përket çështjes së Kosovës. Duke folur për televizionin proqeveritar “PRVA”, ambasadori Shib tha se Gjermania angazhohet për normalizimin e marrëdhënieve mes Beogradit e Prishtinës.

Sipas tij, zgjidhja e çështjes kosovare është kusht që Serbia të bëhet anëtare e Bashkimit Evropian. Duke shprehur shpresën se dialogu do të zhbllokohet, pas zgjedhjeve të 6 Tetorit në Kosovë, edhe me heqjen e tarifave për mallrat serbe, të vendosura nga qeveria Haradinaj, ambasadori i Gjermanisë, ka folur edhe nëse vendi i tij, por edhe Franca, kanë strategji për të çuar përpara negociatat e ndërprera.

“Gjermania dhe Franca vazhdojnë të  mbështesin, procesin e dialogut, por formati do të jetë i njëjtë: Beogradi dhe Prishtina dialogojnë me ndërmjetësimin e Bashkimit Evropian dhe të përfaqësuesit të ri Borrellit. Po mendohet nëse do të ketë edhe ndonjë të dërguar të posaçëm i cili do të jetë kompetent pikërisht për procesin e dialogut. Nuk do të krijojmë format të ri, por dëshirojmë të mbështesim dialogun me shpresën se do të kemi edhe ndonjë lëvizje përpara”, transmeton TV Klan Macedonia deklaratën e ambasadori gjerman në Beograd.

Ndërkohë, ministri i Jashtëm i Serbisë, Ivica Daçiç, i ka deklaruar të mërkurën televizionit shtetëror se si për shkak të Kosovës në Shtetet e Bashkuara të Amerikës paska shpërthyer një konflikt i madh mes Departamentit të Shtetit dhe Kongresit amerikan me kryeprotagonistë Sekretarin Mike Pompeo dhe kongresistin Eliot Engel./ABC News Albania 24/7

aleksander-vucic-2.jpg
G. P.16:24 | 28/09/2019

Me fokusin në bashkëpunimin rajonal presidenti i Serbisë Aleksandër Vuçiç ka ftuar kryeministrin e Shqipërisë Edi Rama dhe atë të Maqedonisë së Veriut Zoran Zaev të vizitojnë Beogradin.

Presidenti serb, Aleksandër Vuçiç, në fjalimin e tij në Nju Jork vëmendjen gati në tërësi ia kushtoi bashkëpunimit rajonal. Vuçiç, pavarësisht se nuk i ka shkuar mirë me shumicën e fqinjëve, u shfaq duke folur për Ballkanin si një tërësi, ku bashkëpunimi është i domosdoshëm.

Vuçiç, në një pjesë që tingëllonte si mesazh paqeje, rreshtoi investimet e infrastrukturës të cilat, sipas tij, tregojnë angazhimin e Serbisë për fqinjësi të mirë.

“Kam patur një takim të rëndësishëm me kryeministrin e Maqedonisë Veriore dhe Shqipërisë. Ramë dakord që të punojmë për vetën tonë dhe rajonin tonë, për një treg të përbashkët. Ndoshta është diçka revolucionare, por popujt e Ballkanit nuk mund t’i shërbejnë vetëm të tjerëve pasi mund të bëjnë gjëra të mrekullueshme për veten e tyre”.

Ideja për mini Schengenin ballkanik pritet të diskutohet me 9 dhe 10 Tetor në qytetin e Novi Sadit në mes të kryeministrit Rama, Zaev dhe presidentit Vuçiç. Kjo është pritur me entuziazëm në Serbi. Analisti Dushan Janjiç, nuk është shumë optimist. Thotë se tregu ballkanik është i rëndësishëm, por kështu vështirë pasi para këtyre duhen marrëdhënie të mira mes shtetesh.

“E shoh si motiv politik të liderëve, por shihet se disa duan dhe disa nuk duan të jenë pjesë e këtij projekti. Këto shtete nuk janë në gjendje të mbajnë marrëdhëniet bilaterale në nivel të lartë”.

I entuziazmuar duket Marko Cadez, kreu i Dhomës së Tregtisë së Serbisë, një institucion i rëndësishëm. Thotë se ideja ka ekzistuar, por për biznesin është me rëndësi që shkëmbimet tregtare të jenë për të gjithë.

“Kjo do të thotë që do të rrisim tregun dhe nuk do të ketë më barriera mes nesh për qarkullimin e njerëzve dhe mallrave. Kurse në një aspekt që nuk ka lidhje me ekonominë, është që ndihmon për një marrëveshje të re ndërmjet serbëve dhe shqiptarëve”.

Në Serbi, kjo ide shihet edhe si një mesazh për të ndryshuar imazhin e Ballkanit të trazuar. Por, që kur është shfaqur një ide  e ngjashme në një samit në Trieste, ka patur hezitime./ABC News Albania 24/7

G. P.15:43 | 27/09/2019

Bashkësia ndërkombëtare vijon të ushtrojë presion për rinisjen e dialogut Prishtinë-Beograd menjëherë pas zgjedhjeve në Kosovë. Ndërkohë, partitë politike po vazhdojnë fushatën ku po shpalosin edhe qëndrimin e tyre në këtë proces.

Partitë politike me agjenda të ngjeshura po vazhdojnë fushatën zgjedhore në Kosovë. Ato po shpalosin programin e tyre para elektoratit përfshirë edhe 1asjen e partive të tyre ndaj dialogut Prishtinë-Beograd.

Ndërkohë edhe Bashkësia Ndërkombëtare ka nisur presionet e saj që menjëherë pas zgjedhjeve të rinis dialogu i mbetur në gjysmë ndërmjet këtyre dy vendeve. SHBA-ja tashmë ka marrë rol kyç në rinisjen e dialogut derisa mbetet e paqartë se si do të jetë roli i Bashkimit Evropian në këtë dialog.

Megjithatë është raportuar se BE-ja sikurse SHBA-ja do të caktojë një të emëruar të posaçëm për dialogun. Ndërkohë presidenti i Francës Emmanuel Macron ka paralajmëruar se do të ketë rol aktiv në këtë dialog menjëherë pas zgjedhjeve në Kosovë.

Për analistin Milazim Krasniqi, kjo nënkupton që të gjitha palët e kanë marrë seriozisht çështjen e marrëveshjes finale Kosovë Serbi. Madje ai thotë se në këtë mënyrë ka gjasë të organizohet një konferencë ndërkombëtare për këtë çështje.

“Droja ime është që tashmë po krijohen premisat për organizimin e një konference të re ndërkombëtare për Kosovën ku do të jenë të përfshira, SHBA-ja, BE-ja Franca Gjermania dhe sipas të gjitha gjasave edhe Rusia”.

Por ajo që është e sigurtë sipas tij është që Kosovë menjëherë pas zgjedhjeve nuk do të humb kohë në krijimin e qeverisë së re, madje ai thotë se do te ketë një koalicion më të gjerë qeverisës. Dialogu Prishtinë Beograd është ndërprerë pas taksës që qeveria e Kosovës i ka vënë 100% produkteve serbe në nëntor të vitit të kaluar./ABC News Albania 24/7

drashkovicx.jpg
G. P.15:35 | 26/09/2019

Vuk Drashkoviç, lider i një partie të vogël opozitare dhe ish-Ministër i Jashtëm i federates serbo-malazeze, deklaroi se Serbia e ka humbur Kosovën që në vitin 1999 dhe këtë realitet të vrazhdët serbët duhet ta pranojnë. Ai këshilloi presidentin serb Aleksandar Vuçic që të jetë një De Gol serb.

Ish-ministri i JASHTËM i bashkësisë shtetërore të Serbisë dhe Malit të Zi, Vuk Drashkoviç ka deklaruar se Kosova është një realitet i vrazhdët të cilin serbët dhe Serbia duhet ta pranojnë. Duke folur për televizionin e pavarur N1, Drashkoviç ka rikujtuar se ka qenë Këshilli i Sigurimit i Kombeve të Bashkuara ai që, edhe me pëlqimin e Rusisë dhe të Kinës, me rezolutën që miratoi më 1999 ai që dëboi Serbinë nga Kosova.

“Realitet i vrazhdët. Me Rezolutën 12-44 të Këshillit të Sigurimit të Kombeve të Bashkuara, më 10 qershor të vitit 1999, pas kapitullimit të regjimit të Slobodan Milosheviçit në luftën me Aleancën e NATO-s, shteti i Serbisë u përzu njëherë e përgjithmonë nga Kosova. U përzu! Dhe ne këtë fakt duhet të pranojmë dhe ta njohim, patjetër. Për këtë rezolutë votoi Rusia dhe luajti një rol të rëndësishëm në hartimin e saj. Kina nuk ishte kundër. I gjithë Këshilli i Sigurimit ishte për këtë dëbim të shtetit të Serbisë nga Kosova”.

Vuk Drashkoviç lë të kuptohet se është i pakuptueshëm angazhimi i tanishëm i Moskës dhe Pekinit zyrtar për gjoja mbrojtjen e sovranitetit serb mbi Kosovën për shkak se, thotë ai, për heqjen e tij ata dhanë kontribut të rëndësishëm: ‘Cili është qëllimi i kësaj politike që populli serb këtu të mbahet në një hipnozë, në një bindje të rrejshme se Kosova është edhe më tej krahinë autonome e Serbisë? Pra, Kosova është e humbur. Ky është realiteti.’

Politikani dhe shkrimtari Drashkoviç çmon se pavarësisht kësaj, nuk është humbur populli serb në Kosovë, thesari kulturor, kishat, manastiret për ruajtjen dhe mbrojtjen e të cilave duhet të angazhohet shteti serb, por tërheq vërejtjen ai, kjo mund të bëhet vetëm në një bashkëpunim strategjik me Evropën dhe Amerikën, por edhe me një marrëveshje të sinqertë me shqiptarët në Kosovë.

Duke folur për zgjidhjen e kontestit Kosovë-Serbi, ish kryediplomati jugosllav, ka riargumentuar idenë e tij të moçme se Kosova dhe Serbia mund të jetojnë ashtu siç kanë jetuar dy Gjermanitë, pas Luftës së Dytë Botërore.

“Ky është një propozim që ka ardhur nga gjermanët, si përvojë e tyre: nuk është e thënë që Serbia dhe Kosova të shkëmbejnë formalisht ambasadorë dhe që të publikohet njohja zyrtare, por duhet të arrihet pajtjetër një marrëveshje juridikisht e detyrueshme për pranimin e realitetit dhe bashkëpunimit të gjithanshëm. Në këtë bashkëpunim të gjithanshëm mund të arrihet kompromisi”,  thotë Drashkoviq. Sipas tij, në rrethana të këtilla edhe mund të ketë ndonjë korrigjim të vogël të vijës kufitare, por kjo nuk nënkupton shkëmbim të territoreve./ABC News Albania 24/7

aleksander-vucic-papa.jpg
G. P.16:22 | 14/09/2019

Serbia është e lumtur për faktin që Vatikani nuk e njeh pavarësinë e Kosovës. Por analistët serbë shprehen se qëndrimet kanë ndryshuar vitet e fundit. Ekspertët thonë se ndikimi i Papës për Serbinë mund të shtrihet në dy fusha: Kosovë dhe marrëdhëniet me Kroacinë.

Selia e Shenjtë. Ky solemnitet është organizuar për të pritur presidentin serb, Aleksandër Vuçiç, në një takim me Papën. Kur është nisur ka thënë se do ta lusë të mos njohë pavarësinë e Kosovës.

Këtë premtim edhe e ka marrë në takim me krerët e kishës. Mos njohja e Kosovës nga Vatikani është një gjë reputacioni. Por, për presidentin Vuçiç do të ishte shumë e rëndësishme që Papa Françesku ta vizitojë Serbinë.

Stefan Surliç, ligjërues në shkenca politike, thotë se Vatikani nuk e njeh Kosovën, por qëndrimet kanë ndryshuar.

“Vatikani ka ndryshuar politikën ndaj Kosovës bazuar në njerëzit që emëron dhe ata që janë përgjegjës për Kosovën. Por, porositë e Papës kanë qenë për paqe ndërsa njohja nuk ndodh, pasi Vatikani nuk dëshiron të përfshihet pa një marrëveshje mes të Kosovës dhe Serbisë”, tha ai.

Një vizitë është përmendur ndër vite për Papën në Serbi. Por, kisha ortodokse nuk ka qenë shumë e hapur për një gjë të tillë pavarësisht përshëndetjeve që Vuçiç i transmetoi nga patriarku serb Irinej.

Surliç, thotë se ndikimi i Vatikanit është i madh dhe shumë çështje me fqinjët mund të zgjidheshin nëse një dialog do të ndodhte.

“Papa mund të ndihmojë me Kosovën dhe marrëdhëniet me Kroacinë. Por, është edhe një moment politik pasi vizitat e tilla ndiqen nga i gjithë globi dhe kjo është e rëndësishme për Serbinë”, tha ai.

Presidenti Vuçiç ka qenë falënderues për pritjen në selinë e shenjtë, por ka thënë se Vatikani kërkon bisedime mes shqiptarëve dhe serbëve./ABC News Albania 24/7

 

volejboll.jpg
G. P.14:11 | 09/09/2019

Serbia fitoi për të dytën herë radhazi titullin kampion të Europës në volejboll për femra. Skuadra ballkanase triumfoi në një finale të fortë ndaj Turqisë në Ankara.

Kaq lart është ngritur kombëtarja e një vendi të vogël ballkanas. Serbia fitoi për të dytën herë radhazi titullin kampion të Europës në volejboll për femra, pas triumfit ndaj Turqisë në finale.

Suksesi ishte i jashtëzakonshëm, pasi vajzat serbe luajtën në një Arenë të Ankarasë, të mbushur plot me 15 000 tifozë turq, që përkrahën ekipin e tyre nga fillimi deri në fund.

Përfundimi ishte 3-2, me setet 21-25, 25-21, 25-21, 22-25 e 15-13 në favor të ekipit nga Ballkani.

Tashmë, të përzgjedhurat e trajnerit Zoran Terziç kanë tre tituj kontinentalë në 5 edicionet e fundit, duke qenë kombëtarja e dytë më e suksesshme në Europë, për të gjitha kohët, pas Rusisë, që ka edhe titujt e ish-Bashkimit Sovjetik.

Një arritje e jashtëzakonshme i një volejbolli që dikur ishte prapa atij shqiptar, madje edhe kur shteti ishte Jugosllavi, dhe kur kombëtarja shqiptare apo Dinamo e Kreshnik Tartarit, Ela Tases apo Mimoza Ibrahimit, triumfonte në çdo duel në vitet 80-të e fillim vitet 90-të.

E qartë, që nëse ia del Serbia, mund ta provojë edhe Shqipëria, gjithnjë nëse punon si atëherë. Serbia arriti një tjetër sukses të madh pas titullit botëror fituar vitin e kaluar, ndërsa do të jetë ndër favoritët për të fituar medaljen e artë olimpike në 2020 në Tokio.

“Ishte pikërisht ajo që prisnim, – tha kapitenia Maja Ognjenoviç, – një finale që nuk I dihej fundi, me shumë përmbysje. Nuk ishte e lehtë në një ambient të tillë, ndoshta asnjëra prej nesh nuk ka pasur rast të luante përpara një publiku të tillë, por një sportiste ëndërron të luajë në një atmosferë të tillë. Përballuam presionin dhe arritëm fitoren”.

Serbisë i takoi edhe lojtarja më e mirë e turneut, Tijana Boshkoviç, 21-vjeçarja që luan pikërisht në Turqi, me Ekzaxhibashin e Stambollit. Kampionet e Europës e festuan fitoren me një këngë të njohur të viteve të fundit, që i kushtohet sakrificave të ushtarëve në Luftën e Parë Botërore në frontin e Selanikut./ABC News Albania 24/7

volej.jpg
G. P.23:50 | 04/09/2019

Kombëtarja e Serbisë në volejboll për femra fitoi lehtësisht ndaj Bullgarisë. Italia i dha një leksion të mirë Rusisë ndërkohë që Turqia nuk zhgënjeu ndaj Holandës.

Janë zhvilluar edhe ndeshjet gjysmëfinale në kampionatin europian të volejbollit për femra. Serbia bëri detyrën ndaj Bullgarisë. Skuadra e trajnerit Zoran Terziç dominoi në të treja setet duke mos e vendosur për asnjë diskutim triumfin.

Të tre setet ishin fotokopje të njëra-tjetrës. Serbia i imponoi Bullgarisë fitoret 25-19, 25-18 dhe 28-26. Serbia realizoi në total 78 pikë kundrejt 63 të Bullgarisë. Serbia mbetet favorit për të fituar kampionatin europian të volejbollit.

Në sfidën tjetër, Italia fitoi 3-1 me sete ndaj Rusisë. Italianët ia dolën të kthenin gjithçka në favorin e tyre edhe pse në setin e parë humbën me rezultatin 27-25. Kjo ishte epërsia e vetme e Rusisë pasi italianët fituan tre sete radhazi edhe pse diferencat nuk ishin të mëdha. Një sukses historik për skuadrën e trajnerit Davide Maxanti që ka impresionuar në këtë kampionat europian të volejbollit.

Nuk zhgënjen as Turqia që i dha një leksion të mirë holandez duke fituar pastër 3-0. Në setin e parë Turqia fitoi me rezultatin 25-20, në setin e dytë 25-22 ndërsa seti i tretë u mbyll në pesë pike avantazh të Turqisë kundrejt Holandës. Vendasit realizuan në total 75 pikë kundrejt 62 të miqve.  /ABC News Albania 24/7

sebija.jpg
G. P.22:59 | 04/09/2019

Në kampionatin botëror të basketbollit për meshkuj Serbia fitoi lehtësisht ndaj Italisë, Argjentina surprizoi Rusinë ndërkohë që Spanja bëri detyrën ndaj Iranit.

Kampionati botëror i basketbollit për meshkuj që po zhvillohet në Kinë ka nisur edhe fazën e tretë ku janë luajtur ndeshjet e grupeve A, B, C dhe D. Përfaqësuesja e Serbisë i dha një leksion të mirë kombëtares italiane. Ballkanasit fituan me rezultatin e thellë 92-77 duke marrë kryesimin e grupit D. Serbët dominuan në të gjithë takimin duke mos e vendosur për asnjë moment në diskutim fitoren. Pavarësisht kësaj humbje, Italia nuk e rrezikoi për asnjë moment vendin e dyte në grup.

Ndeshje me mjaft ritëm edhe në grupin B mes Argjentinës dhe Rusisë ku në fund buzëqeshën amerikano-latinët. Argjentina fitoi me vetëm 8 pikë epërsi kundrejt Rusisë që luajti si e barabartë deri në fundin e takimit. Amerikano-latinet e interpretuan më mirë ndeshjen dhe në fund morën frytet e një loje dinjitoze dhe me mjaft ritëm. Në minutat e fundit të ndeshjes të dyja skuadrat dhanë gjithçka për të dalë fitues, por në fund Argjentina i imponoi triumfin Rusisë me shifrat 69-61.

Në takimet e tjera, Kina u mposht nga Venezuela, Spanja fitoi jo me pak vështirësi ndaj Iranit, Polonia nuk zhgënjeu ndaj Bregut të Fildishtë ndërkohë që fitore arritën edhe Angola, Nigeria dhe Porto Riko./ABC News Albania 24/7

BASKET-BOTERORI-SERBIA.mpg_snapshot_00.01-1280x720.jpg
ent ela15:55 | 03/09/2019

Trajneri i Serbisë, Aleksandër Gjorgjeviç, u ankua për formatin e kampionatit botëror në basketboll për meshkuj. Skuadra ballkanase fitoi me diferencë të madhe, dhe Gjorgjeviç u shpreh se kjo ndeshje nuk i shërbeu askujt.

Analistët po thonë se, të paktën në këtë Kupë Bote, është ekipi më i fortë, edhe më lart se SHBA-ja.

Flasim për Serbinë, një fuqi tradicionale të basketbollit për meshkuj, që po paraqitet tepër lart në finalet që po luhen në Kinë, deri aty sa ka arritur 105 pikë diferencë në dy ndeshje.

Suksesi i parë ndaj Angolës, 105-59, ja ku erdhi e dyta, edhe më e thellë ndaj Filipineve.

Triumfi ishte 126-67, një nga diferencat më të mëdha në historinë e Botërorëve, madje me ballkanasit që nuk dhanë maksimumin, duke ruajtur forcat për më vonë.

Një gjë e tillë nuk i pëlqeu shumë trajnerit Aleksandar Gjorgjeviç, dhe e theksoi këtë pas fitores.

“Që në fillim në disa prej grupeve dihej se kush do të kualifikohej, – tha ish-lojtari i Partizanit të Beogradit, – grupi ynë është njëri prej tyre, dhe nuk e di nëse kjo është gjë e mirë për Kupën e Botës. Sa mund të na shërbejnë ne, apo filipinasve, ndeshje të tilla? Filipinet treguan talent, por u prishi punë mungesa e forcës fizike.”

Gjorgjeviç vlerësoi seriozitetin me të cilin luajti ekipi i tij, dhe theksoi se dueli i ardhshëm, të mërkurën ndaj Italisë, do të jetë diçka tjetër.

Trajneri i aktivizoi thuajse të gjithë lojtarët e tij, duke mos i lodhur shumë.

U dalluan Jokiç, Marjanoviç, Bogdanoviç, Raduljica, Milutinov apo Simonoviç, por sidomos Bjelica i kthyer nga dëmtimi. /ABC News Albania 24/7

basketboll.jpg
G. P.18:42 | 31/08/2019

Nis me fitore të pretendentëve Botërori i basketbollit për meshkuj. Skuadrat kryesore si Serbia, Spanja apo Rusia nuk patën probleme.

Titulli do të vendoset në 15 Shtator, por duelet nisën pikërisht tani. Basketbolli filloi Kupën e Botës, të 18-ën në histori, dhe skuadrat pretendente nuk zhgënjyen, në parketet e pallateve të sportit të Kinës.

Serbia, e cilësuar si numri 2 i turneut pas Shteteve të Bashkuara të Amerikës, dominoi siç pritej ndaj Angolës me shifrat 105-59. Një diferencë prej 46 pikësh, në prani të rreth 11.000 shikuesve në Arenën e Foshanit, ndërsa ballkanasit u udhëhoqën nga Bogdanoviç me 24 pikë, Marjanoviç që kapi 10 topa në tabela dhe ylli i Denverit, Nikola Jokiç me 9 asiste.

Po në grupin D, Italia gjithashtu e nisi me këmbën e mbarë, duke mundur 108-62 skuadrën e Filipineve. Datome e Dela Vale realizuan nga 17 pikë për italianët, të cilët duhet të bindin veten se mund të jenë pretendentë për sukses.

Skuadra më e lavdishme europiane e viteve të fundit, Spanja, po ashtu shpreson që të lerë gjurmë në Botëror. Iberikët, që luajtën dy herë me dinjitet ndaj amerikanëve në finalet olimpike, patën një nisje të lehtë, duke thyer Tunizinë 101-62.

Riki Rubio e Sergio Jul ishin më të mirët në fushë për ekipin e trajnerit Serxho Skariolo, ndërsa Mark Gasol shpreson të jetë në formën e tij më të mirë në ndeshjet e tjera.

Sukses edhe për Rusinë, një nga ekipet më tradicionalë në historinë e basketbollit, sidomos në kohën e ish-Bashkimit Sovjetik. Në grupin B, rusët kaluan me vështirësi Nigerinë, 82-77, falë 16 pikëve të Mihail Kulaginit, dhe topave të kapur në tabelë të Nikita Kurbanovit./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono