sarajeve

BOSNJE-KOMANDANTI-1280x907.jpg
ent ela19:38 | 11/10/2018

Autoritetet në Sarajevë kanë ngritur akuzë për krime lufte ndaj ish-komandantit të myslimanëve-boshnjakë. Atif Dudakoviç akuzohet për vrasjen e 300 serbëve, mes të cilëve civilë dhe ushtarë të dorëzuar.

Komandanti i boshnjakëve myslimanë gjatë luftës së viteve 1992-95 dhe 16 anëtarë të njësisë së tij janë akuzuar të enjten për kryerjen e masakrave ndaj serbëve në perëndim të Bosnjës. Atif Dudakoviç është akuzuar gjithashtu për krime kundër boshnjakëve që ishin anëtarësuar ose kishin mbështetur një fraksion rival në zonë gjatë konfliktit. Nga ana e tij, 65-vjeçari i ka hedhur poshtë akuzat duke i cilësuar të motivuara politikisht.

Bosnja qeverisej nga partitë nacionaliste serbe, kroate dhe boshnjake gjatë luftës që mori mbi 100 mijë jetë njerëzish. Dudakoviç ishte gjeneral i ushtrisë myslimano-boshnjake që udhëhoqi trupat që vepronin në enklavën Bihaç, e rrethuar dhe e sulmuar nga forcat serbe në vitet 1991-95.

Pas luftës, ai shërbeu si komandant i përgjithshëm i federatës autonome kroato-boshnjake, që më vonë u bashkua me forcat e armatosura të vendit. Sipas prokurorëve të çështjes, të pandehurit akuzohen për vrasjen e 300 serbëve, shumica e të cilëve civilë dhe të moshuar, por edhe ushtarë të dorëzuar. Trupat e një pjese të viktimave u gjetën në varre të shumta masive dhe individuale të zbuluara pas luftës, ndërkohë që për të tjerët kërkimet vazhdojnë.

Dudakoviç dhe 11 anëtarë të njësisë së tij u arrestuan në prill nën akuzën për krime lufte, por më vonë u lanë në liri të mbikëqyrur. Prokurorët kanë deklaruar se do të thërrasin 447 dëshmitarë në proces dhe do të publikojnë 1 mij e 100 dokumente si prova. Tashmë i takon gjykatës shtetërore të Bosnjës për të konfirmuar padinë. /abcnews.al

ERDOGAN-SFIDA-1280x720.jpg
ent ela15:31 | 21/05/2018

Në takimin e fundit elektoral jashtë vendit, në kuadër të zgjedhjeve të përgjithshme të 24 Qershorit, presidenti turk Erdogan në Sarajevë, u bëri apel turqve të pushtojnë parlamentet europiane, në një sfidë të hapur ndaj Bashkimit Europian.

“Tregoni forcën tuaj para gjithë botës”, urdhëroi presidenti turk Erdogan 15 mijë mbështetësit e mbledhur në Sarajevë për një takim shumë të përfolur në zemër të Ballkanit dhe Europës.

Përgjigja ishte një numër i madh flamujsh turq dhe fotografi të mëdha të tij në emër të mbrojtësit të myslimanëve në botë. Erdogan u prit në Sarajevë si një sulltan, i cili tashmë sfidon hapur Bashkimin Europian.

Recep Tayyip Erdogan: “Vende europiane që mendojnë se janë djepi i demokracisë kanë dështuar”.

Presidenti turk ashpërsoi dhe më shumë tonin duke thënë se forca me të cilën Europa sulmon vendin e tij është treguesi më i rëndësishëm i madhështisë së Turqisë.

Recep Tayyip Erdogan: “Jeni ju që duhet të hyni në parlamentet e tyre në vend të atyre që kanë tradhtuar kombin tonë”.

Shtoi ai duke iu referuar deputetëve turq në Bashkimin Europian që nuk e duan Erdogan. Dhe në fund, ai kërkoi mbështetje të gjerë për realizimin e ëndrrave të përbashkëta.

Recep Tayyip Erdogan:“Ka nga ata që duan të ndalojnë Turqinë, por ne në zgjedhjet e ardhshme do e çojmë atë dhe më përpara. Dhe për këtë arsye kërkojmë votën tuaj. Ka ardhur koha të bashkohemi.”

Turqit e diasporës erdhën të shumtë nga vende të ndryshme europiane për të qenë të pranishëm në takimin e vetëm jashtë vendit të Erdoan. Njeriu i fortë i Ankarasë zgjodhi zemrën e Ballkanit për të bërë për vete 3 milionë bashkëkombasit e tij që jetojnë në Europë. Një numër i konsiderueshëm votash për Turqinë e cila në 24 Qershor do të votojë për të rinovuar parlamentin. Objektivi i Erdogan është një fitore e padiskutueshme që do e lejojë të ketë dhe më shumë pushtet.

Shërbimet sekrete turke, një ditë para mbërritjes së Erdogan në Sarajevë, kishin sinjalizuar për rrezikun e një atentati ndaj tij. Erdogan takoi para mitingut Izetbegovië, përfaqësuesin mysliman të presidencës tre-palëshe boshnjake. Vetë Izetbegoviç, mik personal i Erdogan, iu përgjigj kritikave në vend kundër organizimit të takimit elektoral, duke thënë se nuk kishte asnjë problem pasi në vend do të vinte një lider i fuqishëm islamik, i cili mungonte prej kohësh. Erdogan premtoi se do të financonte një shumë të konsiderueshme në ndërtimin e autostradës Sarajevë – Beograd, e cila do të kushtojë 3.5 miliardë dollarë.

Serbë, kroatë dhe një pjesë e mirë e myslimanëve të Bosnjes e shohin propagandën e presidentit turk si shprehje të një strategjie neo-otomane. Partia e Erdogan, Drejtësi dhe Zhvillim, do të hapë shumë shpejt një seli në Sarajevë. Lideri i serbëve të Bosnjes, Mlorad Dodik, akuzoi Erdoan se po ndërhynte në çështjet e brendshme boshnjake. Por presidenti turk organizoi mitingun në Sarajevë, si vazhdimin e atij në Gjermani, Austri dhe Belgjikë, vende të cilat kishin ndaluar takime të tilla elektorale. /abcnews.al

ushtria-serbe-1280x657.jpg
G. P.20:41 | 12/03/2018

Autoritetet e sigurisë në Bosnje e Hercegovinë kanë shprehur shqetësimin për lëvizjet e fundit të Republikës Serbe, që ka angazhuar njësitë nacionaliste paraushtarake. Për Sarajevën, kjo është një përpjekje e pastër për cënimin e zgjedhjeve të Tetorit.

Autoritetet në Sarajevë kanë ngritur shqetësimin se Republika Serbe e Bosnjes po planifikon destabilizimin e vendit, përmes angazhimit të njësive paraushtarake dhe armatosjes së policisë së entitetit të saj. Ministri për Sigurinë Kombëtare, Dragan Mektiç, në një intervistë për agjencinë e lajmeve “Reuters” ka akuzuar lidershipin serb se po rrit retorikën nacionaliste, në përpjekje për të cënuar votuesit dhe kundërshtarët politikë të zgjedhjeve të tetorit të ardhshëm.

“Politikat e tyre janë shumë shqetësuese. Ka një ndjesi në rritje pasigurie dhe e gjitha kjo e bën situatën e rendit më komplekse”, ka thënë Mektiç. Mektiç, anëtar i bllokut të serbëve të moderuar, ka deklaruar gjithashtu se grupe të rinjsh serbë po i nënshtrohen stërvitjeve ushtarake në Rusi, pikërisht për të destabilizuar vendin.

“Këto janë përpjekje për të manipuluar zgjedhjet, përmes organizimit të grupeve speciale që ushtrojnë presion fizik ndaj qytetarëve, në mënyrë që ata të ndihen të frikësuar dhe të mos dalin për të votuar”, ka thënë Mektiç. Ministri i bazon shqetësimet e tij tek ngjarjet e janarit të kaluar, kur një anëtarët e një grupi serb të së djathtës ekstreme parakaluan të armatosur deri në dhëmbë në kryeqendrën serbe Banja Llukë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono