samiti

angela-merkel-samiti-berlin-1280x740.jpg
nev ila21:48 | 19/01/2020

Ka përfunduar pas katër orësh e me një marrëveshje për armëpushim në Libi dhe monitorim të tij, konferenca e nivelit të lartë e thirrur në Berlin nga kancelarja gjermane Angela Merkel, nën kujdesin e OKB, e përfaqësuar nga sekretari i përgjithshëm Antonio Guterrez.

11 udhëheqës të vendeve kryesore të përfshira në konfliktin në Libi u mblodhën  në Berlin, për të vendosur paqen në këtë vend. Synimi ishte që të bindeshin

Rusia, Turqia, Emiratet e Bashkuara Arabe dhe Egjipti, që të nxisin palët ndërluftuese të pranonin një armëpushim të qëndrueshëm në Tripoli, ku qeveria e mirëkuptimit, e njohur nga komuniteti ndërkombëtar, e që drejtohet nga Fayez al-Sarraj, prej muajit prill sulmohet nga forcat e marshallit Kalifa Haftar, që njihet si njeriu i fortë i Libisë Lindore.

Të dy udhëheqësit libianë ishin të pranishëm në konferencë por qëndruan në ambiente të ndara në kancelarinë gjermane, aty ku u mbajt takimi i nivelit të lartë.

Kancelarja Merkel ka diskutuar veçmas me të dy protagonistët libianë.

“Sarraj dhe Haftar kanë rënë dakord për krijimin e një komiteti ushtarak, që do jetë baza për të garantuar një armëpushim të përhershëm në Libi”, tha kancelarja Merkel në mbyllje të konferencës për Libinë në Berlin.

“Të gjithë janë dakord: kemi nevojë për një zgjidhje politike e nuk ka asnjë mundësi për një zgjidhje ushtarake”, ka shtuar ajo, duke saktësuar se “dëshirojmë të respektojmë embargon e armëve me më shumë kontrolle”.

Në dokumentin e dakordësuar thuhet se të gjithë aktorët, përfshi komunitetin ndërkombëtar, u impenjuan për të shmangur pazarllëqet.

Një ditë të mrekullueshme, e vlerësoi i dërguari special i OKB në Libi, Gasem Salamè, me urimin që zbatimi i marrëveshjes të nisë që të nesërmen.

Dokumenti i miratuar synon që t’i jepet fund ndërhyrjeve të shumta të huaja në Libi, ku përplasjet ushqehen nga oreksi për rezervat e mëdha të naftës që ka vendi, nga rivalitetet politike në rajon, dhe lojrat për influencë.

Ministri i jashtëm gjerman Heiko Maas tha se të dy palët, Sarraj dhe Haftar u impenjuan për të arritur një marrëveshje mbi puset e naftës, më i madhi, ai i Sharara, është bllokuar nga një grup i armatosur i  gjeneralit Kalifa Haftar./abcnews.al

samiti-berlin-1280x853.jpg
nev ila18:33 | 19/01/2020

11 udhëheqës të vendeve kryesore të përfshira në konfliktin në Libi janë mbledhur në Berlin në përpjekje për të vendosur paqen në këtë vend.

Gjermania, mikpritëse e këtij takimi në nivel të lartë dhe OKB, shpresojnë të bindin Rusinë, Turqinë, Emiratet e Bashkuara Arabe dhe Egjiptin, që të nxisin palët ndërluftuese të pranojnë një armëpushim të qëndrueshëm në Tripoli, ku qeveria e mirëkuptimit kombëtar e njohur nga komuniteti ndërkombëtar, e që drejtohet nga Fayez al-Sarraj, prej muajit prill sulmohet nga forcat e marshallit Kalifa Haftar, që njihet si njeriu i fortë i Libisë Lindore.

Synimi është që t’i jepet fund ndërhyrjeve të shumta të huaja në këtë vend, ku përplasjet ushqehen nga oreksi për rezervat e mëdha të naftës që ka vendi, nga rivalitetet politike në rajon dhe lojrat për influencë.

Mësohet se dy liderët libianë Sarraj dhe Haftar nuk kanë patur kontakt me njëri tjetrin gjatë konferencës, megjithatë pjesëmarrësit kanë miratuar një deklaratë finale, që pritet të shpallet në mbrëmje vonë.

11 udhëheqës të vendeve kryesore të përfshira në konfliktin në Libi u mblodhën të dielën në Berlin në përpjekje për të vendosur paqen në këtë vend.

Gjermania, mikpritëse e këtij takimi në nivel të lartë dhe OKB, shpresojnë të bindin Rusinë, Turqinë, Emiratet e Bashkuara Arabe dhe Egjiptin, që të nxisin palët ndërluftuese të pranojnë një armëpushim të qëndrueshëm në Tripoli, ku qeveria e mirëkuptimit kombëtar e njohur nga komuniteti ndërkombëtar e që drejtohet nga Fayez al-Sarraj, prej muajit prill sulmohet nga forcat e marshallit Kalifa Haftar, që njihet si njeriu i fortë i Libisë Lindore.

Emanuel Makron u bëri thirrje Kombeve të Bashkuara që të negociojnë për një ndalim zjarri të vërtetë në Libi, pa kushte paraprake nga palët ndërluftuese, në një fjalim gjatë konferencës ndërkombëtare të Berlinit për Libinë.

Presidenti francez u shpreh i shqetësuar nga mbërritja e luftëtarëve sirianë e të huaj në Tripoli, një aludim për luftëtarët pro turq të ardhur për të mbështetur qeverinë e mirëkuprimit kombëtar, me seli në kryeqytet.

11 udhëheqësit e vendeve kryesore të përfshira në konfliktin në Libi po përpiqen të dakordësohen për rikthimin e paqes, duke shmangur që lufta ta rikthejë këtë vend në një Siri të dytë.

Synimi kryesor i kësaj përpjekjeje të iniciuar nga Gjermania është që t’i jepet fund ndërhyrjeve të shumta të huaja në këtë vend, ku përplasjet ushqehen nga oreksi për rezervat e mëdha të naftës që ka vendi, nga rivalitetet politike në rajon dhe lojrat për influencë.

Mësohet se dy liderët libianë Sarraj dhe Haftar nuk kanë patur kontakt me njëri tjetrin gjatë konferencës, megjithatë pjesëmarrësit kanë miratuar deklaratën finale, pa ndryshime nga drafti i diskutuar, por ende pa miratimin e dy udhëheqësve libianë./abcnews.al

 

 

 

ramavucicic.jpg
R D08:24 | 22/12/2019

Samiti i Tiranës ishte i treti drejt konkretizmit të Mini-Schengenit rajonal. Kjo nismë shihet si strategji që jo vetëm do të përshpejtojë zhvillimin ekonomik e shoqëror të rajonit, por edhe kohën e anëtarësimit në BE.

Një rajon me treg pune dhe sisteme të unifikuara, kufij të hapur, lehtësira transporti dhe tregtie, joshës për investitorët e huaj! Një rajon që synon përmes bashkëpunimit mes vendeve të përshpejtojë afrimin me standartet e jetesës dhe vlerat e e BE që të shkurtojë kohën e anëtarësimt tek ky bashkim. Një Ballkan Perëndimor, (BP) që synon të garantojë 4 liri themelore: lëvizjen e lirë të njerëzve, mallrave, shërbimeve dhe kapitaleve.

Këto synime i shprehën qartë liderët e katër vendeve të BP, pjesëmarrës në Samitin e Tiranës që përfundoi punimet e tij të shtunën, (21.12.2019).Presidenti i Malit të Zi, Milo Đukanović, Presidenti i Serbisë, Aleksander Vučić, Kryeministri i Shqipërisë, vendit mikpritës të samitit, Edi Rama dhe Kryeministri i Maqedonisë së Veriut, Zoran Zaev janë në një mendje për domosdoshmërinë e funksionimit efikas të Mini-Schengenit Ballkanik. Ata e përfytyrojnë realizimin e tij në praktikë si një strategji që do të përshpejtojë zhvillimin ekonomik dhe shoqëror të rajonit dhe kohën e anëtarësimit në BE, që mbetet aspiratë e pandryshuar për të 6 vendet e tij.

Origjina e Mini-Schengenit Ballkanik

Në fakt nisma për krijimin ‘de jure’ dhe ‘de facto’ të Mini-Schengenit Ballkanik në thelbin e saj nuk është e re. Forcimin e bashkëpunimit rajonal si një instrument efikas për impulse të reja në procesin e integrimit të BP në BE, e artikuloi për herë të parë Kancelarja gjermane Merkel, në gusht 2014, kur lanҫoi nismën diplomatike të njohur si Procesi i Berlinit. Baza e nismës së tanishme janë marrëveshjet e arritura në kuadër të këtij procesi, por të parealizuara, gjatë 5 viteve të këtij procesi. Liderët e 4 vendeve të Balkanit Perendimor thanë njëzëri në samitin e Tiranës se Mini- Schengeni është një ‘Berlin plus’.

A zëvendëson Mini-Schengeni ballkanik integrimin në BE?

Qartë dhe pa ekuivoke katër liderët e BP deklaruan që kjo nuk ka asnjë gjasë të ndodhë. “Ky process është në koherencë të plotë me ambicien e të gjitha vendeve të BP dhe angazhimin e tyre për t’u bërë pjesë e familjes europiane. Duke bashkuar forcat përshpejtojmë” procesin e integrimit në BE dhe krijojmë” në hapësirën tonë standardet që i përgjigjen 4 lirive të BE: lirisë së lëvizjes së njerëzve, mallrave, kapitaleve dhe shërbimeve”, theksoi kryeministri Rama.

Rama vuri në dukje në konferencën e përbashkët për shtyp se „vendet e BP i kanë të gjitha forcat për të zbatuar marrëveshje të arritura më parë në kuadër të procesit të Berlinit, të CEFTA apo nismave dhe tryezave të tjera”.

Kurse Presidenti i Malit të Zi, Milo Đukanović e vlerësoi nismën e Mini-Schengenit Ballkanik si “një mundësi të shkëlqyer për të përmirësuar besimin mes vendeve të rajonit dhe forcuar kapacitetet për bashkëpunim në kuadër të nismave më të gjera me BE, ku duan të integrohemi. ”

Presidenti i Serbisë, Aleksandër Vučić e sheh me rëndësi të jashtëzakonshme nismën dhe bashkëpunimin intensiv e efikas rajonal. Kryeministri i Maqedonisë së Veriut, Zoran Zaev u ndal në lehtësirat kufitare në qarkullimin e njerëzve dhe mallrave. Ai tha, se tanimë është nënshkruar marrëveshja ”one stop shop” në kalimet kufitare, ku do të përdoren sisteme elektronike dhe qytetarët në gjjithë rajonin do të kalojnë pikat kufitare me kartat e identitetit. „Do të këtë një procedurë të unifikuar, të vetme për dhënien e lejeve për punës. Maqedonia e Veriut dhe Shqipëria presin mesazhe pozitive në pranverën e 2020-s,” tha Zaev duke lënë të nënkuptohet mundësia e hapjes së negociatave të anëtarësimit në samitin e pranverës BE & BP në Zagreb.

Vučić : Nuk ndryshohen rregullat e lojës

Shpresat e Maqedonisë së Veriut dhe Shqipërisë në pranverën e ardhshme përforcojnë përqasjen se Mini-Schengeni Ballkanik nuk zëvendëson integrimin në BE. “Ne dëshërojmë të jemi anëtarë të BE. Për këtë kemi kohë që punojmë. Nuk jemi të gatshëm të ndryshojmë drejtimin strategjik. Nuk kemi marrë ndonjë informacion të ri që do të na bënte të ngurronim dhe të thonim që nuk duam të shkojmë në BE. Përkundrazi kohët e fundit kemi deklaruar se jemi kundër ҫdo ideje për të ndryshuar rregullat e lojës tani. Rregullat e lojës janë përcaktuar dhe vendosur në Selanik në vitin 2003. Ne bëjmë atë që kemi në dorë: organizojmë rajonin dhe kjo nuk varet nga fuqitë e mëdha”, tha Vučić

Në samitin e Tiranës u theksua, se nisma e Mini-Schengenit Ballkanik mbështetet nga SHBA dhe Komisioni Europian, i cili do t’i japë rajonit vitin që vjen1,2 miliardë euro grante për progresin në realizimin e bashkëpunimit rajonal.

Nismë për të ardhmen

Rama e cilësoi nismën e Mini-Schengenit ballkanik – nismë për të ardhmen e rajonit. Ai e quajti të gabuar refuzimin e autoriteterve të Kosovës për të mos marrë pjesë në samitin e Tiranës. „Kjo nismë është gjithëpëfshirëse,nuk përjashton askënd, nuk ka asnjë kusht. Katër vendet e rajonit kanë hapur derën edhe për Kosovën dhe Bosnjë-Hercegovinën që kanë nevojë për zhvillim. Refuzimi është vetëvrasje në planin ekonomik dhe politik. Kjo nismë është urë mes së shkuarës dhe të ardhmes. E shkuara na ndan, e ardhmja na bashkon. Vetëm duke bashkëpunuar shërojmë plagët e të shkuarës”, tha Rama.

Në samitin e Tiranës morën pjesë përfaqëquses të Komisionit Europian, Departamentit Amerikan të Shtetit, Bankës Botërore, Bankës Europiane për Zhvillim dhe Rindërtim, Bankës Europiane të Investimeve që po mbështesin nismën e Mini-Schengenit Ballkanik. Samiti vijues do të zhvillohet në Beograd në fillim të shkurtit 2020. /DW

minishengeni-serbi.jpg
nev ila21:28 | 21/12/2019

Analistët në Serbi parashikojnë se nisma e Shëngenit Ballkanik do të funksionojë, pasi kjo i levërdisë shumicës së vendeve të rajonit. Por, ata thonë se është e nevojshme që bashkë me këtë nismë, të ndërtohen edhe marrëdhënie të reja bilaterale.

Minischengeni shihet në Serbi si një nismë e dobishme dhe qasje e re e Serbisë ndaj rajonit. Por, reagimet janë të vogla dhe gati sa nuk ka patur komente nga opozita dhe mediat.

Serbia do të ndajë një shumë të madhe parash për ta ndihmuar Shqipërinë dhe këtë qeveria do ta bëj të hënën. Disa televizione kanë transmetuar gjithçka që ka ndodhur nga Shqipëria.

Analistët vlerësojnë se kjo nismë mund të funksionojë pasi kjo i leverdis shumicës së vendeve të rajonit. Por, thonë se është e nevojshme që bashkë me të të ndërtohen edhe marrëdhënie të reja bilaterale.

“Duket si një reagim  ndaj stopimit të integrimeve nga Macron. Kjo nismë rajonale, si shumica e tyre që janë nisma befasuese, mund të funksionoj për shkak të situatës. Por, nuk më duket si një dëshirë e sinqërt për të ndryshuar marrëdhëniet, por si një rast që politika e ka parë dhe mundohet ta shet si ide”, tha Dushan Spasojevic nga Fakulteti i Shkencave Politike.

Dyshimet e shumta nuk mungojnë as në Serbi për shkak se marrëdhëniet mes shtetesh dhe politika është udhëhequr gjithnjë përmes tensioneve dhe kushtëzimeve.

“Politikanët e rajonit ende më të rëndësishmen e kanë të krijojnë konflikte dhe jo tolerancë në mesin e popujve dhe ata këtu e gjejnë vetën ende më së miri. Ekziston këtu një hapësirë për të tejkaluar problemet, por kanë frikë nga votues. Gjithësesi, këtu ende vlenë ajo ideja që ata që i kanë krijuar problemet edhe mund ti zgjidhin dhe mbase vërtetë mund të jenë ata që bëjnë hapin e parë”, deklaroi Spasojevic.

Ajo që ka bërë përshtypje në Serbi dhe është cituar si kryelajm është deklarata e kryeministrit, Edi Rama, se nuk mund të fryejë më era e së shkuarës./abcnews.al

Haradinaj-Rama.png
nev ila21:16 | 21/12/2019

Samiti i Mini-shengenit ka përplasur sërish kreun e qeverisë Edi Rama me kryeministrin në detyrë të Kosovës, Ramush Haradinaj. Rama tha se Kosova u vetëpërjashtua nga takimi në Tiranë.

Ndërsa  Haradinaj në një reagim u  shpreh se Kosova nuk ka nevojë për Mini-shengen me kryeqytet Serbinë. Rama e quajti gënjeshtar Haradinajn lidhur me taksën që ka vendosur Kosova për mallrat serbe.

Përplasjet e forta mes kreut të qeverisë shqiptare Edi Rama dhe kryeministrit në detyrë të Kosovës, Ramush Haradinaj nuk po shuhen, përkundrazi.

Sot në takimin me liderët pjesë e samitit  për Mini-Shengenin ballkanik, kryeministri Rama tha se Kosova u vetëpërjashtua dhe kjo është në dëm të saj.

Zhvillimet në Tiranë janë ndjekur nga kryeministri në detyrë të Kosovës, Ramush Haradinaj që u përgjigj në këtë mënyrë për Mini-shengenin ballkanik.

Haradinaj u përgjigj edhe për një deklaratë të Ramës që nëse ai do të dëgjonte presidentin francez Emmanuel Makron për të hequr taksën, tani Kosova do të kishte liberalizimin e vizave. Sipas mendimit të Haradinajt, Rama mund të ndihmoj ndryshe bashkëkombasit e Kosovës.

“Nëse Ramës po i dhimbsen kosovarët t’ua heq atë taksën e Kukësit dhe atëherë i kishim besuar edhe të tjerat”.

Në komunikimin e Ramës me gazetarët pas konferencës së zhvilluar mes Vuçiçit e Zaev, kryeministri nuk u kursye ndaj Haradindajt, duke përdorur për të epitet të rëndë.

“Haradinaj është një gënjeshtar që ka gënjyer përsëri. Gënjen nga padija apo me qëllim nuk kam arritur ta zbuloj. Por është një gënjeshtar. Nuk pati kusht për Kosovën”.

Përplasja e nisur që nga samiti i Berlinit në maj të këtij viti mes kryeministri Edi Rama dhe Ramush Haradinajt nuk po shuhet.

Kujtojmë që kryeministri Rama as një falënderim nuk adresoi ndaj Haradinajt për ndihmën e madhe që dha Kosova për Shqipërinë pas goditjes së vendit nga tërmeti i 26 nëntorit. Rama falënderoi vetëm Presidentin Thaçi./abcnews.al

 

 

 

 

 

 

samiti-i-3-minishengeni.jpg
nev ila16:00 | 21/12/2019

Takimi i tretë i Minishengenit Ballkanik që u mbajt në Tiranë, u mbizotërua nga kundër deklarata për mungesën e Kosovës dhe Bosnjë Hercegovinës.

Edi Rama e quajti mungesën e Kosovës të dëmshme, ndërsa 4 liderët u zotuan ta cojnë nismën përpara. Zaev njoftoi se në shkurt do të nënshkruhet marrëveshja e lëvizjes së qytetarëve me karta identiteti dhe do të unifikohen lejet e punë.

Në takimin e tretë të Minishengenit ballkanik nuk u firmos ndonjë marrëveshje, por vëmendja u fokusua tek mungesa e Kosovës dhe Bosnjë Hercegovinës.

Rama: Refuzimi i Kosovës i pakuptueshëm, i dëmshëm. Po ndërtojmë urën mes të shkuarës dhe së tashmes. Plagët nuk kurohen me helm dhe acid. Nisma nuk ndalet, do të vazhdojë.

Vuçiç:  Kjo nuk mund të shihet vetëm nga ata që nuk duan ta shohim. Jemi kaq të vegjël, kaq të parëndësishëm, nëse nuk bashkojmë tregjet tona, nëse nuk punojmë së bashku. Më thoni një vend nga ku nuk janë larguar të rinjtë dhe nuk po largohen ende? Si do ti kthejmë këta njerëz ne? Si do t’i mbajmë njerëzit tanë që ende nuk kanë ikur? Duke krijuar një atmosferë lufte dhe konflikti sepse kjo na ndihmon politikisht? U zemërova pak me mikun tonë Edi, sepse gjithë kohën duket sikur po mbrohet.  Për cfarë duhet të  mbrohemi? Sepse përpiqemi të bëjmë gjëra të mira për vendet tona? Të mbrohemi nga ata që duan të na shohin duke luftuar me njëri-tjetrin? A mund të na thoni të keqen që vjen nga kjo gjë që bëjmë këtu? C’të keqe ka për popujt tanë kjo gjë?

Rama: Nuk ka asnjë kusht të vendosur nga Serbia për Kosovën. Cfarë fiton Kosova duke mos ardhur? Ne nuk themi që marrëveshjet nuk vlejnë për Kosovën. Rrugë qorre për politikë të brendshme janë deklarimet.

Kryeministri Maqedonas tregoi se kur do të ketë produkt konkret samiti.

“Kemi vendosur që në shkurt të nënshkruajmë një memorandum për lëvizjen e lirë të njerëzve vetëm me karta identiteti dhe të unifikojmë dhënien e  lejeve të punës për qytetarët e vendeve të rajonit..”, tha Zaev.

Katër liderët vizituan zonat e prekura në Durrës, dhe Presidenti Serb njoftoi vendimin e qeverisë së tij.

 Vuçiç: Qeveria e Serbisë do të marrë një vendim të hënën për të ndihmuar me një ndihmë domethënëse parash, dhe besoj që do të jemi një nga dy apo 4 donatorët më të mëdhej një të ndihmuar njerëzit në Durrës e Thumanë.

Presidenti i Malit të Zi, qartësoi se Ballkani nuk heq dorë nga integrimi në BE.

Gjukanoviç: Nuk mendoj që pjesëmarrja e të gjithëve në këtë dialog në vetëvete përmban idenë e krijimit të  ndonjë bashkimi ballkanik, që mund të zëvendësojë bashkimin tonë me BE. Jo. Ne duam të jemi anëtarë të BE-së. Nuk jemi të gatshëm ta  ndryshojmë drejtimin strategjik tani.

Në distancë, kryeministri kosovar Haradinaj, tha se samiti ka si qëllim heqjen e taksws nga mallrat serbe.

Përgjigjen kryeministri Rama ja dha pas konferencës zyrtare. /abcnews.al

vucic-kon.jpg
ger ta13:50 | 21/12/2019

Presidenti Aleksandër Vuçiç u shpreh se qeveria e Serbisë do të marrë vendimin për të ndihmuar financiarisht Shipërinë për pasojat e tërmetit tragjik, ndërkohë që foli gjatë për të ashtuquajturin mini-shengeni Ballkanik.

“Njësitë tona të emergjëncës të bahashkëpunojnë më ngushtë në të ardhmen, dhe në të njëjtën kohë të gjitha forcat e vendeve të tjera do të jenë në dispozicin të vendit përkatës. Diskutuam edhe se si të zhvillojmë më tej Serbinë. Kemi marrë vendime të rëndësishme. Do të nshkruajmë marrëveshjet që kamionët të kalojnë në mënyrëmë të lehtë. Do të përpiqemi që të krijojmë një treg të përbashkët pune që nënkuptn një nivel më të lartë tërheqje për vendet e huaja. Do të kemi të njëjtin sistem. Është me një rëndësi kryesore për vendet tona. Ne duhet të përpiqemi që edhe me tregtinë të ecim”, u shpreh ai.

Ndërsa gjatë fjalës së tij në samit, kryeministri i Maqedonisë së Veriut u shpreh se kjo marrëveshje ka shumë përfitime dhe të gjithë duhet të bashkojmë forcat.

“Kjo gjë ka shumë përfitime dhe të gjithë duhet të bashkojmë forcat. Ne do të nënshkruajmë marrëveshje vitin e ardhshëm, që pikat kufitare në të ardhmen të mos kenë asnjë ndalesë.  Në shkurt do të nënshkruajmë një memorandum për lëvizjen e njerëzve vetëm me karta identiteti dhe të unifikojmë lejet e punës”, tha ai.

Ndër të tjera, Presidenti serb deklaroi se vendet tona janë shumë të vogla dhe duhet të bashkëunojnë.

“Pa këtë marrëveshje nuk mund të mbijetojmë. Kjo nuk mund të shihet vetëm nga ata që nuk duan ta shohim.

Jemi kaq të vegjël, kaq të parëndësishëm, nëse nuk bashkojmë tregjet tona, nëse nuk i zmadhojmë ato duke bashkëpunuar.

Si do t’i mbajmë njerëzit tanë që ende nuk kanë ikur? Duke krijuar një atmosferë lufte? U zemërova pak me Edin, duket sikur po mbrohet. Nga kush do të mbrohemi? Sepse përpiqemi të ecim përpara, se si po duam ta ndihmojmë njëri-tjetrin?

Të mbrohemi nga ata që na ftojnë të kthehemi pas në luftë? A mund të na thoni të keqen që vjen nga kjo gjë që bëjmë këtu? C’të keqe ka për popujt tanë kjo gjë?, tha ai. /abcnews.al

 

SAMITI-KRONIKE.mpg_snapshot_00.07-1280x720.jpg
nev ila08:55 | 20/12/2019

Liderët e vendeve të Ballkanit Perëndimor sot dhe nesër do të zbarkojnë në Tiranë në takimin e tretë rajonal mes këtyre vendeve.

Por, në këtë takim nuk do të jetë e pranishme Kosova.

Presidenti i vendit Hashim Thaçi e ka refuzuar ftesën e nikoqirit të këtij takimi, kryeministrit shqiptar Edi Ramës.

Ai në një postim në Facebook ka treguar disa nga arsyet pse Kosova nuk duhet të jetë e pranishme në këtë takim, njofton Klan Kosova.

“Serbia ka kryer gjenocid kundër qytetarëve të Republikës së Kosovës dhe sot jo vetëm që mohon krimet e kryera, por vazhdon të mos e pranojë ekzistencën e shtetit tonë. Në një situatë të tillë, thirrjet dhe iniciativat për bashkëpunim rajonal janë krejtësisht të pakuptimta. Serbia dhe Bosnje Hercegovina nuk e njohin shtetin e Kosovës”.

Ky takim vjen pas dy takimeve të mëparshme të këtij niveli të zhvilluara në Novi Sad të Serbisë dhe në Ohër të Maqedonisë së Veriut ku morën pjesë liderë dhe përfaqësues të lartë shtetërorë të vendeve të Ballkanit Perëndimor, si dhe përfaqësues të lartë të institucioneve europiane.

Për shkak të rrethanave të njëjta, Kosova e kishte refuzuar pjesëmarrjen edhe në dy takimet paraprake./abcnews.al

samiti-1.jpg
in a16:12 | 19/12/2019

Kosova ka konfirmuar tashmë refuzimin për të marrë pjesë në samitin e mini-Shengenit këtë fundjavë ndërkohë që pjesëmarrja e Malit të Zi dhe Bosnjës mbetet e diskutueshme.

Mediat serbe shkruajnë për mundësinë e pjesëmarrjes së presidentit malazez Gjukanoviç, por nuk ka konfirmim zyrtar. Presidenti i Kosovës Hashim Thaçi ka refuzuar pjesëmarrjen duke thënë se Serbia është një pengesë serioze për shtetësinë e Kosovës dhe se minon në mënyrë të vazhdueshme përpjekjet për konsolidimin e shtetësisë së saj.

Presidenti i Kosovës theksoi gjithashtu se Serbia ka kryer gjenocid kundër qytetarëve të Republikës së Kosovës dhe sot jo vetëm që mohon krimet e kryera, por vazhdon të mos e pranojë ekzistencën e shtetit të Kosovës. Edhe pjesëmarrja e përfaqësuesve të Malit të Zi dhe Bosnje-Hercegovinës është e diskutueshme.

E përditshmja serbe Danas raportoi duke cituar informacione jozyrtare se ekziston mundësia që Vuçiçit, Zaevit dhe Ramës t’i bashkohet në takim edhe presidenti malazez Milo Djukanovic, i cili nuk mori pjesë në takimet e mëparshme të “mini-Schengenit”. Ndërsa lidhur me pjesëmarrjen e zyrtarëve të Bosnjë Hercegovinës, një zyrtar në Sarajevë i tha gazetës së “ende nuk ka informacion nëse dikush do të marrë pjesë”.

Pjesëmarrësit e konfirmuar presidenti i Serbisë Aleksandar Vuçiç dhe kryeministri i Maqedonisë Veriore, Zoran Zaev. Ky është takimi i tretë i mini-Shengenit ballkanik pas atij të Novi Sadit dhe Ohrit dhe ishte parashikuar të mbahej në Durrës. Planet ndryshuar pas tërmetit të 26 nëntorit./abcnews.al

vetevendosje-protesta.jpeg
nev ila13:00 | 19/12/2019

Lëvizja Vetëvendosje me qendër në Shqipëri ka protestuar kundër mbërritjes së presidentit serb Aleksandër Vuçiç në Tiranë në Minishengenin Ballkanik.

Protestuesit mbanin një banderolë ku shkruhej: “Një kriminel lufte po vjen të pozojë si bamirës”.

Ndërsa shoqërohej me një foto të Vuçiç me mbishkrimin “non grata”.

Përfaqësuesit e LVV u shprehën se ai është kriminel lufte, i cili gjatë vizitës në Shqipëri do të bëjë aktivitet në formë bamirësie.

“Bamirësia është një formë shpëlarje që i bëhet figurës së tij si kriminel lufte. Vuçiç ka qene Ministër në qeverinë e Milloshevic në 1999 ku janë bërë krime të hatashme ndaj shqiptarëve. Serbia nuk ka kërkuar asnjëherë falje për krimet që ka bërë. Janë mbi 20.000 gra të përdhunuara, mbi 10.000 civilë të vrarë nga këta 1000 fëmijë. Do udhëtojë në Shqipëri duke u hequr si bamirës në këtë periudhë të vështirë për kombin shqiptar.”

LVV paralajmëroi se nesër në orën 17:30 do mbajnë një protestë paqësore për të thënë se Vuçiç është “non grata” në Shqipëri.

Vuçiç do marrë pjesë në Samitin e Minishegenit me ftesë të kryeministrit Edi Rama në datat 20 dhe 21 dhjetor 2019, ku do jenë edhe liderë të tjerë të Ballkanit Perëndimor.

Ndërsa Kosova refuzoi ftesën e Ramës, dërguar presidentit Hashim Thaçi për pjesëmarrje në këtë Samit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono