Saimir Tahiri

vlcsnap-error797-1-1280x720.jpg
gra moz18:27 | 12/01/2018

Prokurorë federalë amerikanë do asistojnë organin e akuzës për hetimin e çështjeve që i konsiderojnë sensitive, si atë të ish-ministrit të Brendshëm, por edhe të disa gjyqtarëve e emrave të njohur të krimit në vend. Synimi është një hetim i plotë, që të zbardhë të vërtetën. Këtë ka konfirmuar ambasada amerikane në Tiranë për ABC News pas takimit që ambasadori Lu dhe ambasadorja Vlahutin patën sot me ministrin e brendshëm.

SHBA-ja i ka ofruar Prokurorisë mbështetje me prokurorë federalë amerikanë dhe agjenci të zbatimit të ligjit të Shteteve të Bashkuara për të kryer një hetim të plotë për ish-ministrin e Brendshëm Saimir Tahirin dhe çështje të tjera sensitive për SHBA-në, si ato të Emiljano Shullazit, Lul Berishës dhe tre gjykatësve të Apelit në Durrës. Këtë lëvizje e ka konfirmuar për ABC News ambasada amrikane në Tiranë sipas të cilës, synimi është një hetim i plotë me synim zbulimin e të vërtetës për të gjitha rastet.

“Ashtu si vetë Z. Tahiri dhe shumë udhëheqës të tjerë shqiptarë e kanë thënë, kjo çështje duhet zgjidhur në gjykatë, duke shqyrtuar të gjitha faktet.Bota, përfshirë edhe Shtetet e Bashkuara, po e ndjek nga shumë afër këtë çështje dhe çështje të tjera sensitive, si ato të Emiljano Shullazit, Lul Berishës dhe tre gjykatësve të apelit në Durrës. Ne kemi ofruar mbështetjen e prokurorëve federalë amerikanë dhe agjenci të zbatimit të ligjit të Shteteve të Bashkuara për t’i ofruar ndihmë teknike Prokurorisë në kryerjen e një hetimi të plotë, i cili ka për qëllim zbulimin e të vërtetës.”

Ky qëndrim i ambasadës amerikane erdhi për ABC News pas takimit që ambasadorët Donald Lu e Romana Vlahutin zhvilluan sot ne mesditë një takim me ministrin e Brendshëm, Fatmir Xhafaj, në zyrën e këtij të fundit. Ambasada zbardh për ABC news edhe mesazhet që ka përcjellë në institucionet shqiptare.

“Ne do donim të shihnim një hetim më aktiv nga prokurorët dhe policia gjyqësore, dhe e kemi përcjellë këtë mesazh. Në një demokraci të vërtetë, askush nuk është mbi ligjin.”

Edhe ministria e Brendshme ka konfirmuar se ‘Forca e Ligjit’ dhe Vetingu në Policinë e Shtetit, kanë qenë dy temat e nxehta që janë diskutuar mes diplomateve te huaj dhe ministrit Xhafaj. Ne operacionin ‘Forca e Ligjit’ për goditjen e grupeve kriminale dhe aseteve të tyre janë angazhuar ekspertët më të mirë në vend, por edhe europiane dhe të FBI-së./abcnews.al

vlcsnap-error531-2-1280x720.jpg
us er15:09 | 27/12/2017

Pas vendimit të Gjykatës së Apelit të Krimeve të Rënda një ditë më parë për shfuqizimin e masës së sigurise ndalim i daljes jashte vendit, ish-ministri i Brendshëm, Saimir Tahiri u paraqit sot në Prokurorinë e Krimeve për të tërhequr pasaportën e tij dhe karten e tij.

Tahiri ka mbërritur në ambientet e sekretarisë së organit të akuzës, i shoqëruar edhe nga avokati i tij Maksim Haxhia.

Vendimi i djeshëm i Apelit zhbllokoi këto dokumenta të Tahirit, duke i lejuar tashmë edhe lëvizjen jashtë shtetit.

Gjykata e shkallës së parë për krime të rënda kishte miratuar në 9 dhjetor kërkesën e Prokurorisë për caktimin e kësaj masë sigurimi për ish-ministrin nën hetim. Masa e ndalimit të lëvizjes jashtë vendit u rikonfirmua në një seancë në datë 13 dhjetor, ku ishte i pranishëm edhe zoti Tahiri.

Ndërsa dje ky vendim u rrëzua nga Apeli i Krimeve të Rënda./abcnews.al

vlcsnap-error037-1.jpg
us er15:58 | 26/12/2017

Apeli i Krimeve të Rënda i kthen pasaportën e bllokuar ish-ministrit të Brendshëm, Saimir Tahiri. Përmes një vendimarrje të së martës, Apeli vendosi të shfuqizojë vendimin e Shkallës së Parë të datës 9 dhe 13 dhjetor 2017 për caktimin e masës së sigurisë “ndalim i daljes jashtë shtetit” ndaj tij. Ish-ministri nuk dha asnjë koment mbi vendimin.

Ish-ministri i Brendshëm Saimir Tahiri fitoi një betejë në luftën e tij me drejtësinë. Të martën ai mundi të lirohet nga “ngujimi” disa ditor brenda territorit shqiptar, urdhëruar nga një vendim i Gjykatës për Krimet e Rënda. Ishte Apeli i kësaj gjykate që pranoi kërkesën e ish-ministrit për shfuqizim e masës së sigurisë “ndalim i daljes jashtë shtetit”. I njëjti vendim rrëzoi edhe urdhrin për sekuestrimin e pasaportës dhe kartës së tij të identitetit. Në përfundim të seancës ish-ministri nuk e fshehu buzëqeshjen. Ai nuk komentoi vendimin, ndërsa interesit të gazetarëve iu përgjigj me një urim.

Avokati Maks Haxhia theksoi se paraqiti argumente të reja në gjykatë.

“Nuk ka më nevojë të zbatimit dhe qëndrimit të kësaj mase”.

Në seancën e zhvilluar me dyer të mbyllura, përfaqsuesi i prokurorisë ka kërkuar vazhdimin e masës shtërnguese. Kundër këtij pretendimi është shfaqur ish-ministrit dhe avokatit, të cilët kanë bindur treshen gjykuese se nuk ishte e nevojshme zbatimi i kësaj mase sigurie.
Ish-ministri Tahiri po hetohet nga Krimet e Rënda për akuzën e “trafikut të narkotikëve në kuadrin e grupit të strukturuar kriminal” dhe për “korrupsion i zyrtarëve të lartë”. Bazuar në disa akte të përcjella përmes letërporosive nga autoritetet italiane, prokuroria pretendon se Tahiri ka favorizuar anëtarë të grupit kriminal të Habilajve në trafikun e kanabisit./abcnews.al

Gazetar i ABC News: Armand Bajrami

vlcsnap-error283.jpg
us er16:01 | 18/12/2017

Ish-ministri i Brendshëm, Saimir Tahiri, i kërkon Apelit të Krimeve të Rënda të shfuqizojë vendimin e Shkallës së Parë për ndalimin e lëvizjes së tij jashtë vendit. Ankimi për masën e sigurisë u depozitua këtë të hënë tek Krimet nga avokati i tij Maksim Haxhia. Në materialin e ankimit, avokati Haxhia pretendon se prokuroria nuk ka pasur asnjë provë të re për të kërkuar bllokimin e pasaportës së Tahirit dhe se ish-ministri nuk paraqet asnjë rrezik për t’iu fshehur hetimit. Gjykata e Krimeve të Rënda konfirmoi të premten masën e dhënë për ish-ministrin në 9 dhjetor. Gjatë seancës Tahiri tha se ishte i interesuar në hetimin e plotë të çështjes. Prokuroria po heton ish-ministrin për dy vepra penale, bazuar në disa akte të përcjella nga Prokuroria e Katanias, Itali./abcnews.al

saimir-tahiri-1-1200x630.jpg
us er10:36 | 12/12/2017

Gjykata e Krimeve të Rënda ka pranuar kërkesën e Prokurorisë, duke caktuar masën e sigurise “Ndalim i daljes jashtë vendit” për ish-ministrin e Brendshëm Saimir Tahiri. Mësohet se gjykata ka vendosur bllokimin e pasaportës së Tahirit për të mos lejuar kalimin e kufirit të territorit shqiptar nga ana e tij. Prokuroria e krimeve të rënda ka nisur një hetim për ish ministrin e Brendshëm. Mbi të rëndojnë dy akuza; trafik i narkotikëve tëe kryer në formën e posaçme të grupit të strukturuar kriminal dhe korrupsion pasiv i zyrtarëve të lartë shtetërorë. Tahiri është marrë në pyetje nga prokurorët e çështjes në datë 27 tetor në lidhje me këtë hetim. Por ai mësohet të ketë deklaruar se nuk kishte asnjë lidhje me Habilajt, pavarësisht se ata ishin kushërinj të tij të largët. Ish-ministri ka theksuar se do të vijojë betejën ligjore për drejtësi./abcnews.al

 

vlcsnap-error894-1280x720.jpg
us er19:07 | 01/12/2017

Gjykata e Apelit për Krimet e Rënda la të pandryshuar masën e sigurisë “arrest në burg” për Orest Sotën. Biznesmeni 25 vjeçar po hetohet për dy vepra penale, hetim i nisur pasi iu gjetën në makinë 863 mijë euro dhe dy patenta lundrimi të ish-ministrit të Brendshëm, Saimir Tahiri.

Gjykata e Apelit për Krimet e Rënda refuzoi kërkesën e Orest Sotës për lirim nga qelitë e paraburgimit. Biznesmeni 25 vjeçar u arrestua në 1 nëntor 2017 në Elbasan, pasi iu gjetën në mjetin që drejtonte 863 mijë euro dhe dy patenta lundrimi të ish-ministrit, Saimir Tahiri. Ai po hetohet për “pastrim parash” dhe “fshehje të të ardhurave”, pas dyshimeve të organit të akuzës së paratë në fjalë i përkasin ish-ministrit. Të premten një Kolegj Penal i Apelit të Krimeve la të pandryshuar masën e sigurisë “arrest me burg” dhënë për biznesmenin nga Shkalla e Parë në 20 nëntor.
Gjykata nuk u bind nga pretendimet e avokatëve të cilët kërkuan lirimin tij. Në seancën e zhvilluar me dyer të mbyllura mbrojtësit ligjorë pretenduan se paratë e gjetura në mjetin e 25 vjeçarit i përkasin familjes Sota dhe se ato ishin garanci për blerjen e një sasie të madhe hekuri në KURUM. Sipas tyre, paratë ishin siguruar nga biznesi i babait të Sotës ndër vite, si edhe nga shitja e aksioneve në një bankë të nivelit të dytë në vitin 2007 në vlerën e 1.2 milionë eurove.
Kundër këtij qëndrimi ka qenë përfaqësuesi i akuzës, sipas të cilit ekziston një dyshim i arsyeshëm që Sota ka konsumuar elementë të veprave penalë për të cilat po hetohet.
Masa e Apelit është e treta masë sigurie e dhënë ndaj Orest Sotës. Fillimisht ai u la në burg nga Gjykata e Elbasanit. Pas kalimit të dosjes së tij tek Krimet e Rënda kjo masë u rivlerësua, duke u lënë e pandryshuar edhe në këtë gjykatë./abcnews.al

 

 

 

vlcsnap-error441.jpg
us er17:02 | 08/11/2017

Prokuroria e Krimeve të Rënda u dërgon shkresë për herë të dytë Tatimeve, Doganave, Hipotekave si edhe Drejtorisë së Portit Detar të Durrësit, për verifikimin e pasurisë së vëllezërve Habilaj. Për herë të parë, në kërkesën e verifikimin të pasurisë u përfshi edhe emri i Saimir Tahirit.

Pavarësisht së tashmë dosja “Habilaj”, vijon të jetë në proces hetimi si në shtetin Italian ashtu edhe në Shqipëri, Prokuroria Krimeve të Rënda ka kaluar tashmë në një etapë tjetër.
Pas sekuestrimit të disa bizneseve dhe shtëpive të banimit në qytetin e Vlorës pak ditë më parë, organi i akuzës iu është drejtuar me nga një shkresë të dytë Drejtorisë së Tatimeve, Doganave, Hipotekave si edhe
Drejtorisë së Portit Detar të Durrësit.
Këto infromacione shtesë nga akuza, bëhen për të vërtetuar dyshimet e hetuesve Italianë, se grupi kriminal i “Habilajve” ka gjeneruar të ardhura të shumta nëpërmjet trafikut të narkotikëve drejt brigjeve Italiane. Po kështu, prokuroria dyshon se janë rregjistuar mjete lundruese që përdoreshin për transport droge, në emër të të afërmeve të Habilajve, dosje e cila po hetohet tashmë në mënyrë të imtësishme.

Burime nga prokuroria bëjnë të ditur për ABC News se, në kërkesën e dytë ishtë përfshirë edhe emri i ish-ministrit të Brendshëm Saimir Tahiri.
Hetimi pasuror, ka nisur në bazë të ligjit “antimafia”. Në sitë janë edhe familjarët e Tahirit, për të cilët pritet të verifikohen pasuritë e paluajtshme e llogaritë bankare, për të mësuar nëse ata i justifikojnë apo jo këto pasuri.
Në shkresën e prokurorisë që iu dërgua institucioneve të tjera për verifikim, thuhet që përgjigja të jepet sa më shpejt të jetë e mundur, por pa sakëtsuar një datë përfundimtare.
Nuk dihet nëse dosjes “Habilaj” do ti shtohet edhe Orest Sota, i prangosur pak ditë më parë në qytetin e Elbasanit, me dy patenta të Saimir Tahirit dhe me 863 mijë euro në bagazhdin e automjetit tip “Land Rover”. Aktulisht, procesi ndaj vëllezëve “Habilaj”, zhvillohet në gjykatën e Katanias, ndërsa pjesa tjetër e grupit, si Nezar Seiti dhe Armando Kaçorri po gjykohen tek Krimet e Rënda./abcnews

 

vlcsnap-error960.jpg
us er20:08 | 03/11/2017

Policia ka hedhur poshtë pretendimin e kreut të PD-së Lulzim Basha, se ka fshehur një ngjarje ku një i ri u ndalua pasi u kap me 800 mijë euro dhe me dy patenta mjetesh motorike të ish-ministrit të Brendshëm Saimir Tahiri. ABC News ka siguruar foto teë patentave të gjetura në makinën e Orest Sotës.

Kreu i Partisë Demokratike, Lulzim Basha, ka bërë publike në një deklaratë të shpërndarë për mediat, se sipas burimeve të sigurta, më 1 nëntor është arrestuar nga Policia e Elbasanit shtetasi Orest Lefter Sota.

Sipas Basheës, atij i janë gjetur në makinë 800 mijë euro si dhe dy patenta drejtimi mjetesh motorike në emër të Saimir Tahirit.
Menjëherë pas deklaratës së Bashës, ABC News ka siguruar foto të të dy patentave në emër të ish-ministrit Tahiri. Siç shikohet nga foto, të dy dëshmitë janë dhënë për drejtimin e mjeteve lundruese.

ABC News u interesua për ngjarjen edhe në polici. Në një njoftim zyrtar të Policisë së Shtetit, konfirmohet që Orest Sota, 25 vjeç, banues në Tiranë, administrator i një subjekti privat, u kap në rrugën nacionale, në fshatin Balldren, duke drejtuar pa leje drejtimi mjetin “Land Rover”.
Nga kontrolli në makine atij iu gjetën një sasi e madhe eurosh. I riu ka deklaruar se paratë do t’i përdorte për likuidimin e disa faturave, por ai nuk kishte me vete asnjë dokument origjine të këtyre parave. Materialet në ngarkim të këtij shtetasi u referuan në Prokurorinë e Rrethit Gjyqësor Elbasan.

Drejtori i policisë se qarkut Elbasan, Altin Qato, ka thënë për ABC News se shuma e sekuestruar është 800 mijë euro dhe biznesmeni ka deklaruar se do ti çonte tek kompania “Kurum” për të bërë disa pagesa. Kreu i policisë deklaroi se po vazhdojnë hetimet për të zbardhur të vërtetën, origjinën dhe destinacionin e parave dhe se çështja i ka kaluar Krimit Ekonomik për verifikime të mëtejshme. Megjithatë, në njoftimin e policisë nuk thuhet asgjë nëse janë gjetur në makinë dy patentat e ish-ministrit Saimir Tahiri.

Basha, në deklaratën e tij dënoi ashpërsisht fshehjen e keësaj ngjarje kriminale nga Haki Çako dhe Fatmir Xhafa me urdhër të Edi Ramës.
Kreu i selisë blu, i kërkon prokurorisë të hetojë e të mos shmangë nga përgjegjësia autorët dhe urdhëruesit e këtij akti mafioz./abcnews.al

 

 

 

dfjkghdfjk.jpg
us er18:39 | 03/11/2017

Trajtimi i çështjes së akuzave ndaj ish-ministrit të Brendshëm Saimir Tahiri, për implikimin në trafikun e drogës, e njohur si banda e “Habilajve”.
Të ftuarit e mbrëmjes në emisionin “Byro Politike”: Bledi Çuçi deputet i PS-së, anëtar i Këshillit të Rregullores së Mandateve dhe Imuniteteve; Çlirim Gjata jurist i njohur, Ylli Manjani ish-ministër i Drejtësisë dhe Ferdinand Dervishi gazetar i ABC News, realizues i “ABC Story”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono