Saimir Tahiri

saimir-tahiri.png
G. P.11:20 | 07/11/2018

Prokuroria e Krimeve të Rënda administron si provë, vendimin e Gjykatës së Katanias për pushimin e hetimeve ndaj ish ministrit të Brendshëm Saimir Tahiri. Vendimi u depozitua më 29 tetor nga vetë Tahiri dhe avokati i tij në Prokurorinë e Krimeve të Rënda. Në atë vendim thuhet se Prokuroria e Katanias nuk gjeti prova që të mbështesnin pretendimet e anëtarëve të grupit Habilaj gjatë përgjimeve policore, për blerje dhuratash për Tahirin.

Ish-ministri e konsideroi atë vendim një provë vendimtare për hetimin e nisur ndaj tij në Shqipëri. Saimir Tahiri po hetohet në Shqipëri si garantues i grupit të Habilajve me akuzat pjesë e grupit të strukturuar të trafikut të drogës dhe për korrupsion. Më 15 tetor Prokuroria e Krimeve të Rënda shtyu për herë të katërt, deri më 17 janar të vitit të ardhshëm afatin e hetimit ndaj ish ministrit të Brendshëm, me argumentin se mbeteshin në pritje të letër porosive të reja nga Mali i Zi dhe Italia./abcnews.al

XHAFAJ-E-TAHIRI-1280x720.jpg
ent ela18:43 | 03/11/2018

Dy ish-Ministrat e Brendshëm Fatmir Xhafaj e Saimir Tahiri, spikatën secili në mënyrën e vet javën politike që lamë pas. Mes denoncimeve të shtuara të opozitës e pafuqisë së prokurorisë për të vepruar, kjo ishte panorama anormale e vendit, të cilën e sjell këtë javë Mimoza Koçiu, në Politika në ABC News.

Dy ish-ministrat e brendshëm të Edi Ramës tërhoqën vëmendjen publike javën politike që lamë pas. Fatmir Xhafaj u largua pa dhënë një arsye, pas një megaoperacioni policor, ku u zbulua i dyti laborator droge në qeverisjen socialiste, e Saimir Tahiri që foli për një vendim të gjykatës së Katanias se aludimet ndaj tij në dosjen italiane ishin të pabaza. Opozita vijoi denoncimin e lidhjeve të qeverisë me krimin e korrupsionin, ndërsa organi i akuzës vazhdon të heshtë, e nuk po hedh ende dritë në asnjë prej çështjeve që ushqejnë përplasjet politike, të paktën prej 8 muajsh, e në të cilat lakohen emra politikanësh.

Po çfarë ndodhi javën politike që lamë pas?

Largimi i ministrit të brendshëm Fatmir Xhafaj mbeti kokëfortësisht pa arsye publike, edhe pse bëhej fjalë për të njëjtin ministër që u mbrojt fort, kur historia e vëllait, që ia kishte dalë të shmangte një dënim për trafik droge në Itali 16 vite më herët, u rishfaq në publik gjatë një audiopërgjimi. Një aludim për largimin e Xhafajt, u lexua tek shpjegimi i filozofisë së partisë nga Kryeministri, pak orë pasi kishte njoftuar pranimin e dorëheqjes së Ministrit të Brendshëm.

U përforcua disa orë më pas, kur ministri i dorëhequr shkruante se ka edhe njerëz në politike, që mund të jenë të lirë e vetvetja, në çfarë mendojnë e bëjnë.

Çka spikati ishte një deja vu e hasur edhe me paraardhësin e tij Tahiri: shfaqja e parë pas largimit, në një aktivitet të PS, e përkrah atij që lakohet si pasardhësi i Edi Ramës, Erion Veliaj.

Tahiri kishte bërë të njëjtën gjë, 5 ditë pasi ishte shkarkuar nga Edi Rama, e fliste për bashkim.

Eksperienca e gjatë politike e institucionale, nuk mjaftoi, e Xhafaj njëlloj si Kryeministri nuk i dha publikut një arsye për largimin.

A kishte lidhje largimi me përgjimet e dosjes që solli 27 arrestime, e mes të cilave edhe komunikime të një prej njerëzve më të afërt të Kryeministrit, Vangjush Dako? Kështu së paku mendon opozita.

Denoncimet e Bashës i vijoi Ervin Salianji, përmes pyetjeve me emra konkretë.

Të dy u njoftuan për padi në gjykatë nga kryebashkiaku i Durrësit, për deklaratat e bëra. Vetëm një lajm i ri mund të zbehte vemendjen nga Xhafaj e Dako, e nuk vonoi. Të hënën e javës politike që lamë pas, dy ditë pasi kishte anulluar një dalje për mediat, të planifikuar ditën kur u shpall dorëheqja e Fatmir Xhafajt, Saimir Tahiri iu drejtua prokurorisë së krimeve të rënda, e cila prej një viti e heton për trafik narkotikësh, si grup i strukturuar kriminal dhe korrupsion. Pak minuta më vonë u tha gazetarëve se kishte depozituar një provë, por kërkoi kohë për ta njoftuar publikisht.

Në media u shpërnda ky fragment i materialit, ku lexohej kërkesa e prokuorisë së Katanias, e miratuar nga gjykata, për mbylljen e hetimeve për Tahirin, pasi nuk kishte elementë të nevojshëm për të mbështetur akuzën e dalë gjatë përgjimeve të dosjes Habilaj, se ministrit të brendshëm të kohës, i bliheshin dhurata të shtrenjta, bizhuteri e veshje.

Për demokratët, është e gjitha pjesë e një skenari me qëllim final mbylljen e çështjes ndaj ish-ministrit Saimir Tahiri.

Duhet thënë se prej kohësh selia blu flet me emra konkretë e Basha këmbëngul se prokuroria ka dosje për ata emra.

Kryeministri që i ndjek denoncimet, njoftoi nga tëitteri për 23 padi të reja për shpifje. Këtu përfshihet edhe denoncimi për fitues të paracaktuar të tenderit për sistemin e ri të monitorimit të transaksioneve të biznesit, i paralajmëruar 5 javë më herët nga Tabaku.  

Por orientimi dukej se mbetej Saimir Tahiri. Ishte përzgjedhur e enjtja e mbrëmjeve kryesore të debateve politike televizive, për një deklaratë para mediave, me një dokument në dorë. Tahiri tha se ishte vendimi i prokurorisë e gjykatës së Katanias, që e clironte nga akuzat e ngritura në përgjimet e bandës së Habilajve në dosjen italiane.

Njëlloj si në deklaratën e 5 muajve më herët, kur shpalli dorëzimin e mandatit të deputetit, ish ministri i brendshëm renditi një listë të gjatë të atyre që ka kundër, e foli për një dorë zë zezë, pa e identifikuar.

Por shënjestra kryesore dukej prokuroria, e cila e heton prej një viti, e nuk e ka thirrur asnjëherë për ta pyetur.

Atë dokument me të cilin po mbrohej, nuk ua vuri në dispozicion mediave. E kishte siguruar TV Klan, që e publikoi një ditë para daljes së Tahirit. Në të thuhej se pas 5 muaj hetimi edhe në pikat e shitjes, nuk u gjet asnjë provë që të mbështeste pretendimet në përgjimet e grupit Habilaj, se kishin blerë bizhuteri e veshje për Saimir Tahirin.

Për selinë blu, ai vendim nuk ka vlerë për hetimin shqiptar, edhe dosja italiane ishte pikënisja për hetimin ndaj Saimir Tahirit në Shqipëri.

Të enjten në mbrëmje në studion e Blendi Fevziut, u tha se pretendimet për blerje veshjesh e bizhuterish, ishin përjashtuar nga gjykata e Krimeve të Rënda që në muajin maj.

Por për herë të parë Saimir Tahiri pranon se kanabizimi i vendit në kohën e tij pati shkak korruptimin e strukturave të shtetit, ndërsa fakt mbetet se 3 drejtues të policisë të kohës së tij janë në kërkim prej një viti për trafik droge.

Interesant është sintonia e reflektimit të Tahirit me Kryeministrin, edhe pse prej muajsh i përjashtuar nga një vit nga PS. Njëlloj si Rama, Tahiri pranon se ka bërë gabime por jo faj.

Po aq në sintoni duket edhe konkludimi, se vendi nuk ka banda apo nivel shqetësues kriminaliteti.

Përse vallë kjo sintoni, dukshëm e munguar mes Ramës e pasardhësit të Tahirit Xhafaj? Në fakt ishte Edi Rama ai që e paralajmëroi i pari vendimin e mbylljes së hetimit për Tahirin, nga gjykata e Katanias

Misteri u zbardh vetëm të enjten e kaluar nga vetë Saimir Tahiri

Përse vallë Tahiri priti të paktën dy javë që ta conte në prokurori, e ta bënte të ditur publikisht? Padyshim që momenti i zgjedhur për ta shpallur, ishte i duhuri, për të sfumuar dy cështjet e nxehta të radhës: akuzat për Vangjush Dakon, dhe largimin pa arsye publike të Fatmir Xhafajt.

Por në këtë panoramë aspak të thjeshtë, spikat vullneti mbresues i Kryeministrit për të finalizuar objektivin e zgjedhjeve vendore, të paktën 8 muaj larg. Një synim e shpalosi javën politike që lamë pas, Bashkinë e Kukësit. Shkonte për herë të parë në qytetin që voton rregullisht të djathtët, e që e tronditi fort kur iu kundërvu tarifës prej 5 euro për kalimin në rrugën e kombit. Pas rishikimit të saj, Kryeministri iu qas me ndjesë kuksianëve.

Mes investimeve të premtuara, edhe transformimi i aeroportit e stadiumi, artikuloi hapur edhe ambicjen finale.

Duket gati edhe në KQZ ku tashmë ka vendimmarrjen e 5 nga 7 anëtarët e organit që administron e mbikëqyr zgjedhjet. Zëvendësoi dy anëtarët që i takonin tashmë si mazhorancë, pas përfundimit të mandatit të dy anëtarëve që ishin propozuar nga demokratët në pushtet në 2012.

Duhet thënë se Lulzim Basha ende nuk e ka qartësuar këtë pjesë. Përfaqësuesi i tij në tryezën konsultative të presidentit, për datën e zgjedhjeve vendore, në njërën nga dy të dielat e fundit të muajit qershor, ishte i vetmi nga tre kreret politike që shmangu komunikimin me mediat. (efekt) Cka nuk thuhet, është se bashkëkryezari i PD në komisionin për reformën zgjedhore Oerd Bylykbashi po vazhdon punën me homologun socialist Bledi Çuçi për t’u dakordësuar mbi ndryshimet në kodin zgjedhor për vendoret e vitit të ardhshëm. E konfirmoi i pari Taulant Balla, në zemër të akuzave ndaj tij.

Vetë Kryeministri ka komoditetin të besojë se historia do përsëritet me rivalin e tij.

Lulzim Basha nuk i përgjigjet insinuatave të tilla, por duket i vendosur të vijojë me strategjinë e denoncimeve nga selia blu. Padyshim që paraqitja e fakteve ka impakt të fortë publik e mediatik. E duket se kështu do vijohet edhe javën e ardhshme

Përse vallë Lulzim Basha duket kaq i qetë, para mobilizimit dukshëm me tiparet e një fushate zgjedhore të rivalit Edi Rama? Pikëpyetja mbetet e fortë, sidomos në kushtet kur Km po ia del që të zbehë, edhe akuzat më të forta. Ia doli ta kalojë në heshtje e pa shpjegim largimin e Fatmir Xhafajt. Ish ministrin që lakohej si i mbështetur nga amerikanët, e pasoi me një emër jashtë politikës, këshilltarin e tij për sigurinë Sandër Lleshi, të cilit po i evidenton formimin në Gjermani, vendi më influent i BE. Nga ky vend, një deputet i kancelares vlerësoi largimin e Fatmir Xhafajt.

Në këtë panoramë akuzash publike e përgatitjesh zgjedhore, shkëlqen fort mungesa e veprimit të prokurorisë. Saimir Tahiri është rasti më i fundit i një hetimi që shtyhet prej një viti, pas një kërkese të parë për arrest me burg, e 16 ditëve arrest shtëpie, ndërsa nuk është thirrur ende për t’u marrë në pyetje. Nga ana tjetër, denoncimet nga selia blu, bazuar në dokumente, veçse evidentojnë pafuqinë e organit të akuzës përballë çështjeve ku përfshihen politikanët, çështje të cilat të paktën prej shkurtit të këtij viti, vazhdojnë të ndezin sistematikisht debatin politik e publik në vend. /abcnews.al

 

IMG_9377-1280x853.jpg
G. P.14:39 | 01/11/2018

Këshilltari ligjor i Partisë Demokratike, Gazment Bardhi, në një deklaratë për media ka theksuar se dokumenti i gjykatës italiane që pushon hetimin e prokurorisë së Katanias për Saimir Tahirin, nuk ka asnjë vlerë për hetimin ndaj ish minsitrit që po zhvillon prokuroria shqiptare. 

Kërcënim, përveçse të parëndësishëm e konsideron këshilltari ligjor i demokratëve Gazment Bardhi dokumentin që nxorri në deklaratë për media ish-ministrin Saimir Tahiri, të dorëzuar tre ditë më parë në Prokurorinë e Krimeve të Rënda.

“Saimir Tahiri, njësoj si Edi Rama paracaktoi vendimin e prokurorisë për të mbyllur dosjen e përfshirjes së tij në trafik droge. Shqiptarët duhet ta dinë se Saimir Tahiri është hetuar nga autoritetet italiane vetëm për veprimtari kriminale në territorin italian. Dokumenti që ai valëvit për pafajësinë e tij, është i pavlerë për veprimtarinë e tij kriminale në Shqipëri. Saimir Tahiri kërcënoi sot çdo polic, prokuror dhe gjyqtar që mund të guxojë të mos u bindet urdhrave dhe të vazhdojnë hetimin ndaj tij”.

Kjo pasi Tahiri, thekson selia blu, akuzohet për lehtësimin dhe mbështetjen shtetërore për trafikun e drogës nga organizata kriminale e Habilavje në Shqipëri.

“Kjo veprimtari kriminale është zhvilluar në territorin shqiptar dhe si e tillë nuk mund të hetohet dhe as procedohet nga drejtësia italiane. Italia nuk ka juridiksion për vepra penale të ndodhura në territorin e një vendi të huaj nga një shtetas i huaj. Prokuroria shqiptare ka sot të gjitha provat që vërtetojnë përtej çdo dyshimi përfshirjen aktive të Saimir Tahirit në mbrojtjen e Habiljave dhe të trafikut të drogës.

Për shkatërrimin e këtyre provave dhe këtij procesi është angazhuar vetë kreu i ekzekutivit Edi Rama prej një viti, deklaron Partia Demokratike, sipas së cilës prokuroria duhet të ndryshojë masën e sigurisë për Tahirin nga detyrim paraqitje në arrest me burg, kjo pasi me deklaratën e tij ish-ministri vërtetoi ehe njëherë se nëse mbetet i lirë, ai përbën rrezik për pavarësinë e hetimeve./abcnews.al

saimirii-1280x715.png
G. P.11:23 | 01/11/2018

Pas një viti heshtjeje dhe një jave nga lajmërimi për thyerjen e saj, ish-ministri i Brendshëm, Saimir Tahiri, doli para kamerave. Në dorë mbante një vendim gjyqësor italian, që depozitoi të hënën tek Krimet e Rënda, si provë deçizive në hetimin ndaj tij në Shqipëri. Por jo gjithcka ishte në favor të tij.

“Ndjesë për zërin tim dhe për kohën, s’është në dorën time”.

Tahiri tha se heshti një vit për të pritur përfundimin e hetimit të prokurorisë.

“Nuk e kam pasur të lehtë të hesht, kam pasur e kam shumë për të thënë. Unë bëra atë që nuk ka bërë asnjë politikan shqiptar në 30 vjet.  Prokuroria e Antimamfias italiane regjistroi një hetim ndaj meje. Në heshtje me shumë punë hetuan dhe pretendimet e prokurorisë shqiptare në atë që u quajt banda e trafikut të drogës. Prokurori i kërkoi pushimin e hetimeve për Saimir Tahirin. Gjykata pranoi kërkesën dhe unë sot kam vendimin e gjykatës, ku thuhet: Pushohen hetimet pasi nuk ka lidhje me asnjë aktivitet të paligjshëm”.

 Tahiri tha se ishte i vemti i hetuar dy herë dhe se kishte zgjedhur të përballej, ndonëse përmendej në bisedat e dy trafikantëe që ishin kushërintë e tij të tetë.

“Kur ua do interesi politikanë, gazetarë, analistë, çirren studiove se nuk mund të mbahet përgjegjësi për vëllain, për motrën, për … baxhanakun”.

Ish-ministri tha se gjatë hetimit nuk kishte bërë politikanin por qytetarin, por nga nga podiumi që i ngjante foltores së kuvendit nuk e kurseu përmendjen e tyre.

“Lulëzim Basha kërkonte arrestimin tim. Opozita bërtiste gjithandej se Sajmir Tahiri është i përfshirë në trafik droge. Monika Kryemamdhi dhe gjithë kryemëdhenjtë e tjerë që ka nga pas bënte të njëjtën gjë. Jo vetëm këta, por edhe një orkestër e tërë që ndanin interesa politike e jo vetë, u bënë bashkë, bilbila e kopila, që Tahiri të futet në burg”.

Sipas Tahirit, prokuroria italiane ka verifikuar të gjitha pretendimet se Habilajt kanë blerë dhurata për të dhe të gjitha hyrje-daljet e tij në zonën Shengen me ndokënd nga të hetuarit, por gjithçka ka rezultuar negative.

“Unë nuk e di a do të ketë njeri kurajo, por me siguri do të ketë, që të thotë se e kam blerë këtë vendim të antimafias në Itali, apo më keq do thonë që e ka blerë Edi Rama që ruajna Zot të kontrollojë gjykata dhe prokurori edhe në Europë”.

 Ish-ministri tha se ky hetim ndaj tij e ka bërë më të fortë dhe i ka dhënë mundësinë të njohë më mirë njerëzit, veten dhe drejtësinë. Duke shprehur habi për zgjatjen e hetimeve ndaj tij në Shqipëri, Tahiri sfidoi prokurorinë për të mbërritur në fjalën e saj të fundit.

“Nuk mbaj mend të angazhohen 7 prokurorë prej një viti. Nëse nuk mjaftojnë 7 prokurorë, bëjini 70 vetëm më tregoni të vërtetën mua dhe shqiptarëve siç bëri anti-mafia në Itali. U bë mbi një vit që heton prokuroria unë nuk jam thirrur edhe një herë të vetme”.

Tahiri tha se nuk i kishte humbur durimi, po rikujtoi kallëzimet e bëra ndaj kundërshtarëve të tij politikë. Ish-ministri theksoi se do të luftonte deri fund dhe u largua pa i dhënë mundësinë për pyetje gazetarëve.

 “Beteja ime do të vazhdojë deri në ditën e fundit. Pas kësaj unë jam i lirë.  E vërteta na ndan e na bashkon”./abcnews.al

saimir-tahiri.png
G. P.09:16 | 01/11/2018

Saimir Tahiri do të mbajë një konferencë për mediat këtë të enjte. Në një postim në rrjetin social Facebook, ish-ministri i Brendshëm shkruan se sot do të thotë disa gjëra pas 1 vit heshtjeje.

“1 vit heshtje, sot kam disa gjëra për të thënë! Shihemi në 11.oo, live këtu”, shkruan ai. 

Ish-ministri i Brendshëm, Saimir Tahiri, ishte të hënën në Prokurorinë për Krimet e Rënda. Ai depozitoi një provë, të cilën e konsideroi si vendimtare për hetimin e nisur ndaj tij. Mësohet se bëhet fjalë për një akt të drejtësisë italiane që shuan dyshimet e ngritura ndaj tij. Tahiri e paralajmëroi që atë ditë një dalje para mediave./abcnews.al

download-3-1-933x445.jpg
G. P.16:03 | 29/10/2018

“Nuk ka prova të vlefshme për të mbështetur akuzat”

Prokuroria e Katanias mbyll hetimet për ish – ministrin e Brendshëm, Saimir Tahiri. Televizioni Klan disponon dosjen e plotë me hetimin e kryer nga Prokuroria e Antimafias në Itali dhe vendimin e marrë nga Gjykata e Katanias.

Në dokumentin e siguruar ekskluzivisht nga Tv Klan, rezulton se Tahiri është vënë nën hetim nga Prokuroria e Antimafias Italiane në dt. 27.10.2017, vetëm 3 ditë pasi doli në konferencën për shtyp ku nxorri dokumentin zyrtar, sipas të cilit nuk ishte në hetim në Itali e ku njëkohësisht deklaroi se ai vetë do të kërkonte përmes avokatëve të tij që krahas hetimit të hapur ndaj tij në Shqipëri, të hetohej edhe në Itali.

Në dt 15.03.2018, në përfundim të hetimeve që zgjatën thuajse 5 muaj, Prokuroria e Antimafies në Itali i ka kërkuar Gjykatës Italiane të mbyllë hetimet me arsyetimin se “nuk ka prova dhe fakte” që implikojnë ish – ministrin Tahiri.

“Për sa më sipër, megjithëse nuk ka dyshim për citimet e bëra nga Moisi Habilaj gjatë bisedave të përgjuara, veçanërisht ku përmend se ka për t’i dhënë 30.000 Euro SAIMIR –it, ose në pjesët ku flet për blerjen e bizhuterive për bashkëshorten dhe nënë e Saimir Tahirit, në vlerësimin e prokurorisë, në mungesë të provave të vlefshme nuk rezulton të ketë elementë të përshtatshëm për të mbështetur akuzën në fjalë.  Në bazë nenit 408 të Kodit të Procedurës Penale -125 të dekretit legjislativ 217/1989, kërkon që gjyqtari i hetimeve paraprake në këtë rast të vendosë për arkivimin e këtij procedimi dhe për rrjedhojë të urdhërojë kthimin e akteve të kësaj zyre”.

Në 19.03.2018, vetë Prokurori i Republikës Carmelo Petralia konfirmon kërkesën e Prokurorit të Antimafias Andrea Bonomo për mbylljen e hetimeve ndaj Tahirit duke i hapur rrugë kështu vendimit të Gjykatës.

Në dt. 5.10.2018, Gjykata Italiane e Catanias, me gjyqtare Loredana Pezzino, bazuar në kërkesën e Prokurorëve të Antimafias, ka marrë vendim për mbylljen e hetimit ku theksohet se:

“Gjyqtari, mbi bazën e kërkesës së mësipërme të pushimit, e cila pranohet, duke iu përmbajtur në mënyrë të plotë arsyetimit:

PËR KËTO ARSYE

Në bazë të neneve 409-411 të Kodit të Procedurës Penale, vendosi pushimin e procedimit objekt shqyrtimi dhe kthimin e akteve Prokurorit, duke autorizuar që nga ky moment lëshimin e kopjes së këtij urdhri si dhe të akteve të fashikullit për të hetuarit, personat e dëmtuar si dhe mbrojtësve të emëruar apo të pajisur me prokurë”.

Në dosjen që disponon Tv Klan, rezulton se Prokuroria Antimafia e Catanias ka verifikuar gjithçka dilnin si të dhëna nga përgjimet e Habilajve, veçanërisht pjesët që dukej se implikonin Saimir Tahirin, si blerja e bizhuterive për familjarët e Tahirit, blerja e një kostumi për vetë Tahirin dhe verifikimin përmes Interpolit të të gjitha hyrje – daljeve të Tahirit në zonën Shengen dhe mundësinë që në ndonjë prej udhëtimeve të ishte i shoqëruar me Habilajt.

Në përfundim të shqyrtimit të provave, rezulton se Hetimet e Prokurorisë Antimafia të Catania për çështjet që përmendeshin në përgjimet e Habilajve, kanë dhënë rezultat negativ.

Si në rastin e bizhuterive ashtu dhe të kostumit, siç përmendej në përgjimet e Habilajve, Prokuroria Antimafia e Katanias ka sekuestruar veç faturave fiskale edhe librin ditor të shitjeve, si dhe kamerat e sigurisë në dyqanet e përmendura dhe tabulatet telefonike të pronarëve të dyqaneve përkatëse.

Gjithashtu veç pronarëve, janë pyetur edhe shitësit në këto dyqane, ndërkohë që për hyrje daljet e Tahirit në zonën Shengen, verifikimet i ka bërë Guardia di Finanza nëpërmjet Interpolit.

Në dosje, të gjitha verifikimet kanë dhënë rezultat negativ, çka ka detyruar Prokurorinë e Antimafias e më pas Gjykatën që t’i mbyllë hetimet për ish – ministrin e Brendshëm, Saimir Tahiri, i cili po hetohet edhe në Shqipëri, për implikim të tij në trafik narkotikësh me grupin e Habilajve.

Tv Klan

IMG_8971-1280x853.jpg
G. P.15:33 | 29/10/2018

Për demokratët, është e gjitha pjesë e një skenari me qëllim final mbylljen e çështjes ndaj ish-ministrit Saimir Tahiri. “Provën e re” depozituar në Prokurorinë e Krimeve të Rënda, selia blu e sheh të paralajmëruar nga shefi i ekzekutivit Edi Rama.

“E ashtuquajtura provë e re që paraqiti sot si lajm Saimir Tahiri është fakti se në Itali ai nuk është nën hetim. Kjo është alibia që Edi Rama i dha Saimir Tahirit dhe pas së cilës fshihet presioni që po i bëhët prokurorisë për të mbyllur çështjen. Është fakt se Saimir Tahiri po hetohet nga Prokuroria shqiptare për krime të kryera në territorin shqiptar. Është fakt së shteti Italian nuk mund të hetojë një shtetas shqiptar që kryen krim në territorin shqiptar”.

Për demokratët fakt është gjithashtu se habilajt në 4 vjet që Tahiri drejtoi ministrinë e Rendit organizuan trafik ndërkombëtar droge me makinën e titullarit të ministrisë së Brendshme dhe se pavarësisht denoncimeve të vazhdueshme të Partisë Demokratike Tahiri dhe Rama mohuan të vërtetën dhe sulmuan denoncuesit duke marrë në mbrojtje trafikantët e drogës./abcnews.al

saimir-tahiri.png
G. P.13:29 | 29/10/2018

Ish-ministri i Brendshëm, Saimir Tahiri, ishte të hënën në Prokurorinë për Krimet e Rënda. Ai depozitoi një provë, të cilën e konsideroi si vendimtare për hetimin e nisur ndaj tij. Tahiri tha se do të tregojë përmbajen e saj pas dy ditësh, por jozyrtarisht mësohet se bëhet fjalë për një akt të drejtësisë italiane që shuan dyshimet e ngritura ndaj tij.

Katër ditë anuloi një një dalje para mediave të njoftuar prej tij, ish-ministri i brendshëm, Saimir Tahiri, mbërriti  në Prokurorinë për Krimet e Rënda për të depozituar një provë të re. Ish-ministri nën hetim për “trafik narkotikësh” si grup i strukturuar kriminal dhe “korrupsion” kaloi pragun e godinës së qeltë në orën 13:00 në shoqërinë e avokatit të tij, Maksim Haxhia, ku qëndroi vetëm pak minuta. Në dalje Tahiri theksoi rëndësinë e provës që depozitoi, por kërkoi kohë shtesë për të publikuar përmbajtjen e saj.

Saimir Tahiri: “Unë paraqita diçka që ka rëndësi për procesi. Do kërkoj mirëkuptimin tuaj unë do flas pas 2-3 ditësh për çfarë është, më vjen keq që keni ardhur këtu. Dorëzova një provë që e quaj decizive për procesin”.

Pyetje: “A keni frikë se do të merreni i pandehur”?

Saimir Tahiri: “Unë nuk kam frikë gjë”.

Ky është dokument i palës italiane, që Tahiri ka depozituar në Prokurorinë e Krimeve të Rënda. Bëhet fjalë për një kërkesë të Prokurorisë së Katanias për arkivimin e hetimit ndaj ish ministrit Tahiri pasi nuk ka elementë të nevojshëm për të mbështetur akuzën mbi bisedën e përgjuar ku përmendet emri “Saimir”, si personi të cilit po i bliheshin dhurata të shtrenjta. Në fund të dokumentit është edhe vendimi aprovues i gjykatësit për mbylljen e hetimit për Tahirin. Ky akt pritet të vendosë jo pak në vështirësi prokurorët e Krimeve të Rënda për shkak se procedimi ndaj ish-ministrit nga Krimet e Rënda ka nisur bazuar në akte të përcjella nga autoritetet italiane.

Aktualisht Tahiri po hetohet nga Krimet e Rënda si garantor i grupit kriminal të “Habilajve” në trafikun e drogës. Në 15 tetor Prokuroria për Krimet e Rënda shtyu me tre muaj afatin e hetimit për të. Prokurorët kërkuan zgjatjen e afatit pasi ende janë në pritje të përgjigjes së një letër-porosie të dërguar në Itali, mes të cilës kërkohej marrja në pyetje e italianit Frederico Silvestri, që dyshohet se u ka shitur një skaf grupit të “Habilajve”. Afati shtesë u nevojitej prokurorëve edhe për kryerjen e disa verifikimeve mbi letërporosinë e ardhur nga Mali i Zi, si edhe për kryerjen e verifikimeve pasurore./abcnews.al

SHTYHET-TAHIRI-MBULIM.mpg_snapshot_00.55-1280x720.jpg
G. P.11:43 | 15/10/2018

Për të tretën herë radhazi, Prokuroria për Krimet e Rënda vendosi të shtyjë me tre muaj afatin e hetimit për ish-ministrin e Brendshëm, Saimir Tahiri. Gjatë kësaj kohe shtesë, prokuroria do të presë një letërporosi nga Italia, do të kryejë verifikime për letërporosinë e ardhur nga Mali i Zi dhe verifikime pasurore.

Prokuroria për Krimet e Rënda shtyu deri në 17 janar 2019 afatin e hetimit për ish-ministrine Brendshëm, Saimir Tahiri. Ish-anëtari i kabinetit qeveritar po hetohet për akuzën e “trafikut të narkotikëve”, në formën e grupit të strukturuar krimiuan dhe “korrupsion pasiv i funksionarëve të lartë shtetërore”, si garantor i grupit të “Habilajve” në trafikun e drogës.
Zgjatja me tre muaj e hetimit dhe momentit kur do vendoset mbi “fatin” e ish-ministrit nën hetim është konsideruar e nevojshme për prokurorët për administrimin e disa provave dhe kryerjen e disa veprimeve të nevojshme hetimore.

Sipas vendimit për zgjatjen e afatit, i siguruar nga “ABC News”, prokurorët kërkojnë kohë pasi ende janë në pritje të përgjigjes së një letër-porosie të dërguar në Itali. Bëhet fjalë për marrjen në pyetje të italian Frederico Silvestri, që dyshohet se u ka shitur një skaf grupit të “Habilajve”, mjet i përdorur në trafikun e drogës. Afati shtesë u nevojitej prokurorëve edhe për kryerjen e disa verifikimeve mbi letërporosinë e ardhur nga Mali i Zi, si edhe për kryerjen e verifikimeve pasurore.

Vendimi që shtyu për tretën herë me nga tre muaj afatin e hetimit për Tahirin u firmos nga katër prokurorët e çështjes Gentian Osmani, Dritan Prençi, Vladimir Mara dhe Arens Çela.
Hetimi ndaj ish-ministri Tahiri nisi një vit më parë, kur ai u dyshuar si një nga bashkëpunëtorët e grupit kriminal të trafikut të drogës të drejtuar nga Moisi Habilaj. Sipas prokurorisë, duke përfituar nga lidhjet fisnore me ish-ministrin dhe kundrejt shpërblimeve financiare Habilaj dhe bashkëpunëtorët e tij kanë kultivuar bimë narkotike dhe transportuar ato jashtë vendit. Prokurorët e Krimeve prentedojnë se e gjithë veprimtaria e këtij grupi kriminal është garantuar dhe mbështetur nga strukturat e policisë së shtetit, ku një pjesë e përfitimeve monetare kanë shkuar tek Tahiri. Ish-ministri, që po hetohet në gjendje të lirë, në vijimësi ka mohuar çdo akuzë në emër të tij./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono