rumani

51190314_303.jpg
ent ela10:39 | 11/11/2019

Do të jetë balotazhi i 24 nëntorit ai që do të vendmosë emrin e presidentit të ri të Rumanisë. Kandidatët janë presidenti në largim Johanis dhe ish kryeministrja Viorika Dansila.

Do të jetë një balotazh mes presidentit në largim Klaus Johanis dhe ish kryeministres Viorika Dansila, sipas të dhënave të para pas mbylljes së votimeve për zgjedhjet presidenciale në Rumani.

Johanis në raundin e parë ka marrë 38.7% të votave kundrejt 22 % të Dansila. Asnjeri prej të dyve nuk ka arritur të marrë 50 për qind për të fituar pa qenë nevoja për një raund të dytë. Në krahasim me sondazhet ky është nëj rezultat larg parashikimeve për Johanis.

Pjesëmarrja në votime ka qenë 48%, duke llogaritur dhe 660 mijë votues që jetojnë jashtë Rumanisë.

Raundi i dytë do të mbahet në 24 nëntor, ndërsa të dhënat tregojnë një rritje domethënëse të mumrit të votuesve nga diaspora rumune.

Rumania është një republikë gjysëm presoidenciale ku Kreu i Shtetit zgjidhet në mënyrë të drejtpërdrejtë nga qytetarët, pro mund të drejtojë qeverinë vetëm nëse ka mazhorancën në parlament. Kreu i Shtetit mund të vendosë veton ndaj ligjeve në parlament duke i rikthyer për votim ose duke i dërguar në gjykatën kushtetuese.

Johanis u zgjodh president në vitin 2014, dhe kundërshtoi rishikimin e sistemit gjyqësor që synonte kufizimin e pavarësisë së gjykatësve dhe që u kritikua si nga Brukseli ashtu dhe nga Shtetet e Bashkuara të Amerikës. Ai drejtoi dhe një referendum kombëtar ku pjesa më e madhe e rumunëve vendosi t’i ndalojë qeverisë që të modifikojë kushtetutën me dekrete emergjente. Gjithashtu mbështeti ndalimin e dhënies së amnistisë për krimet që lidhen me korrupsionin. /abcnews.al

 

109180780_hi057200920.jpg
ent ela18:53 | 10/10/2019

Qeveria rumune nuk i mbijetoi të enjten një votëbesimi në Parlament, duke bërë që vendi të hyjë në një krizë afatgjatë. Kjo, pasi opozita që pritet të marrë pushtetin është e fragmentarizuar dhe për momentin vendi e ka të pamundur të mbajë zgjedhje të parakohshme.

Qeveria e majtë e kryeministres Viorika Dancila në Rumani u rrëzua ditën e enjte pasi doli e humbur përballë një mocioni mosbesimi në Parlament, duke ngritur perspektivën për një krizë të gjatë politike për shkak të opozitës së fragmentarizuar.

Mbajtja e zgjedhjeve parlamentare nuk është një opsion për momentin, për shkak se Rumania pritet të mbajë zgjedhjet presidenciale muajin e ardhshëm. Dhe sipas ligjit, vendi nuk mund të mbajë zgjedhje parlamentare nëse ndodhet më pak se 6 muaj përpara atyre presidenciale.

Opozita tani ka 10 ditë kohë për të nominuar një kryeministër të ri që do të duhet të ketë aprovimin e presidentit të qendrës, Klaus Johanis.

Gjithashtu, kryeministri i emëruar, së bashku me kabinetin e ri që duhet të formohet, do t’i duhet t’i nënshtrohen një mocioni përpara se të nisin nga puna. “Ju keni folur shumë, por tani dua të dëgjoj dhe të shoh se si do ta formoni ju qeverinë dhe me kë”, u tha kryeministrja Dancila ligjvënësve të opozitës.

Qeveria e re do të përballet me detyrën e vështirë të hartimit të një projekt/buxheti për vitin 2020, që të mundësojë një rritje prej 40 për qind të pensioneve, pa cënuar ndërkohë objektivat e defiçitit.

Qeveria Dancila ka qenë në rrezik rrëzimi që kur Social-demokratët humbën partnerin e ri të koalicionit të tyre në muajin gusht.

Analistët presin që qeveria e re të formohet përmes partisë kryesore të opozitës, Asaj Liberale, por duke parë fragmentarizimin e saj, nuk është çudi që më vonë të shkojë drejt zgjedhjeve të parakohshme. /ABC News Albania 24/7

ultras-dinamo.jpg
Vladimir Prenga11:51 | 25/09/2019

Plas në Rumani mes tifozëve. Tifozët e Poli Timisoara dhe ata të Dinamo Bucuresti janë përplasur mes tyre një ditë më parë. Gjithçka ndodhi para ndeshjes së Kupës së Rumanisë, mes UTA Arad-Dinamo Bucurest (përfundoi 1-3).

Timisoara është rreth 60 kilometra larg Arad dhe tifozët e Dinamos menduan të ndalojnë aty në një lokal, ku më pas u sulmuan dhe pati një sherr ku u përdorën sende të forta nga më të ndryshmet. Më pas mjaftuan dy policë për të shpërndarë turmën. /abcnews.al

laura-kovesi-1280x720.jpg
ad min23:01 | 19/09/2019

Ish-shefja e Drejtorisë së Anti-Korrupsionit në Rumani, Laura Kovesi ka shanse të bëhet kryeprokurore e BE-së. Kovesi ka marrë mbështetjen në parim të vendeve anëtare të Unionit, ndërsa votimi pritet të bëhet në javët e ardhshme.

Ish-shefja e Prokurorisë së Anti-Korrupsionit në Rumani, Laura Kovesi ka gjasa të jetë kryeprokurorja e re e Bashkimit Europian, pavarësisht kundërshtimeve që vijnë nga vetë qeveria rumune.

Të enjten, përfaqësuesit e vendeve anëtare të Unionit dhanë mbështetjen që ajo të marrë drejtimin e Zyrës së Prokurorisë Publike Europiane. Tani mbetet vetëm që emërimi i saj të konfirmohet me votë nga Këshilli Europian, që pritet të mblidhet posaçërisht në javët e ardhshme.

Kovesi, aktualisht 46 vjeç, u kthye në “dhimbje koke” për klasën politike rumune teksa ishte në krye të Drejtorisë Anti-Korrupsion të vendit. Ajo u vendos në këtë detyrë në 2013-n dhe në vitet që pasuan në Rumani pati një rritje të ndjeshme të dënimeve për korrupsion.

Ndërkohë, në Korrik të vitit të kaluar, ajo u shkarkua nga detyra me nismë të qeverisë rumune. Duke folur për mediat ditën e enjte, Kovesi deklaroi se mbështetja e marrë nga vendet anëtare ishte një hap i rëndësishëm, por shtoi se duhet pritur për vendimin përfundimtar.

Një basketbolliste e talentuar në rini, gjatë drejtimit 5-vjeçar të Drejtorisë Anti-Korrupsion zonja Kovesi çoi në gjyq 68 funksionarë shtetërorë, përfshirë 14 ministra dhe ish-ministra, si dhe 53 deputetë nga të dyja dhomat e parlamentit rumun.

Nga këta, 37 politikanë janë dënuar, ndërsa ndaj të tjerëve proceset gjyqësore vazhdojnë./ABC News Albania 24/7

veteranet-shqiptare-1280x699.jpg
nev ila16:44 | 15/09/2019

Veteranët e atletikës do të marrin pjesë në kampionatin ballkanik që zhvillohet në Rumani. Do të jenë pesë sportistë që do të synojnë të marrin medalje, siç kanë bërë edhe më parë.

Sporti shqiptar ka një disiplinë që thuajse gjithnjë i jep medalje.

Kjo është atletika, në kategorinë e veteranëve, e cila do të synojë të nderojë sërish veten dhe shtetin në turneun e ardhshëm, kampionatin ballkanik.

Do të jenë 5 veteranë që do të marrin pjesë në Ballkaniadën që zhvillohet në kryeqytetin e Rumanisë, Bukuresht, nga data 19 deri në 22 shtator.

Këta janë Nexhat Xhemalçe në moshën mbi 80 vjeç, në garat e 5 000 metrave dhe gjysmë maratonës.

Gilman Drishti e Dahamir Cali në 5 000 metra e gjysmë maratonë.

Po ashtu, Ilir Karanxha në garën e 1 500 metrave dhe Rudin Bektashi në 110 metra me pengesa dhe kërcim së gjati.

Thuajse të gjithë atletët veteranë kanë fituar medalje në të kaluarën dhe synojna të bëjnë sërish një gjë të tillë.

Shpresa është që vitin e ardhshëm kampionatin ballkanik i veteranëve në atletikë të zhvillohet në Shqipëri, pasi vendi ynë ka vendosur kandidaturën.

Pistat e mundshme, nëse kandidatura pranohet, janë ato të Elbasanit dhe të Shkodrës./ABC News Albania 24/7

48022930_303.jpg
ad min10:00 | 28/08/2019

Në Rumani dështoi koalicioni qeverisës i socialdemokratëvde (PSD) dhe liberalëve të majtë ALDE. PSD-ja postkomuniste sërish po humbet peshën politike si parti, mendon Robert Schwartz.

Një Déja-vu à la rumune: Pak para zgjedhjeve presidenciale sërish shpërbëhet një koalicion qeverisës gjithësesi i brishtë. Tradhëti, humbje besimi, sharje dhe akuza reciproke dhe një mocion votëbesimi: Kështu bëhet politika në Rumani e jo vetëm kësaj here.

Socialdemokratët të mbetur në dorën e kryeministres Viorica Dancila nuk duan më të kapen pas pushtetit me një qeveri të pakicës, partia pseudio-liberale ALDE po farkëton aleanca me të larguarit prej radhëve të PSD-së të ish-kryeministrit Victor Ponta, konservatorët nacional-liberalë (PNL) në opozitë po zgjohen, por megjithatë nuk kanë guxim që të marrin qeverinë. Vendi pavarësisht rritjes ekonomike është keqmenaxhuar, rritja e motivuar politikisht e pagave dhe pensioneve nuk është e mbuluar financiarisht, projektet e shpallura me të madhe para tre vjetësh në sistemin e shëndetësisë dhe në infrastrukturën e dobët ende nuk janë vënë në jetë.  Kush merr përsipër tani drejtimin e qeverisë, ka një pikënisje të vështirë.

Schwartz Robert Kommentarbild AppRobert Schwartz

Pa reputacion ndërkombëtar – e madje të pavlerësuar edhe prej vet socialistëve europianë

PSD, që ende po qeveris, ndodhet përballë një pirgu problemesh. Që prej fitores bindëse të tyre në fund të vitit 2016 socialdemokratët sipas anketimeve kanë humbur gati gjysmën e votave, dhe janë distancuar prej tre kryeministrave dhe gati 100 ministrave. Udhëheqësi i tyre i madh “Maximo Líder” Liviu Dragnea ndodhet në burg për korrupsion dhe shpërdorim detyre, kryetarja komisare e partisë Dancila, është një kukull e Dragneas, përmes karuzelit të posteve ajo përpiqet të shpëtojë pozicionin e vet dhe po e çon partinë e qeverinë në një udhë pa krye. Në opinionin ndërkombëtar PSD nuk gëzon reputacion për shkak të sulmeve të vazhdueshme të saj  ndaj shtetit ligjor dhe drejtësisë – madje atë nuk e vlerësojnë as brenda radhëve të partive socialiste europiane.

Dancilas i është hapur oreksi dhe pa marrë parasysh humbjet ajo do të vazhdojë edhe më tej. Qëllimi i saj është posti presidencial. Kjo është arsyeja kryesore për krizën e re qeveritare. Kryetari i ALDE-s dhe njëkohësisht president i senatit Calin Popescu-Tariceanu kishte llogaritur shanse të mira që të paraqitej si kandidati kryesor i koalicionit qeveritar. Por kryeministrja, një ekzekutuese e zellshme e idolit të saj Dragnea dhe e panjohur deri më sot, e pengoi atë. Ajo synon vet të kandidojë për presidente në shtator duke e inskenuar synimin e saj me pompozitet të madh. Që si rrjedhojë qeveria mund të dështonte, këtë ajo e ka marrë fort mirë parasysh.

Sondazhet negative për Dancilan

Dancila prej kohësh e konsideron veten si nëna e kombit, që është e predestinuar për detyra të mëdha. Por ajo harron, që aktualisht sondazhet për të janë katastrofike: Me 7,5 përqind ajo nuk kalon dot as në shortlist të kandidatëve. Mbajtësi aktualisht i postit të presidentit Klaus Iohannis, që do të rikandidojë dhe mbështetet nga PNL, sipas sondazheve kryeson i vetëm me 40 përqind.

S’ka dyshim, që PSD prej disa kohësh është në rënie të vazhdueshme. Me këtë dështim tani partia shumë shpejt mund të humbasë tërësisht peshën politike./DW

 

large960_blur-7068952f24dd0c88bc43892b8eb9dc63.jpg
ent ela21:25 | 26/08/2019

Mazhoranca qeverisëse në Rumani ndodhet në buzë të humnerës për shkak se liberalët kanë braktisur koalicionin. Sipas mediave vendase, vendi ndodhet i ndarë mes një aleance të re që mund të formohet dhe opsionit të zgjedhjeve të parakohshme.

Partia Social Demokrate në Rumani humbi të hënën mazhorancën e ngushtë parlamentare, pasi një anëtar i ri i koalicionit braktisi qeverinë. Partia Liberale u tërhoq nga aleanca dy ditë pasi lideri i saj, Tariçeanu dështoi të bëhej i vetmi kandidat i mazhorancës për zgjedhjet presidenciale të planifikuara për në nëntor. Në vend të tij, social-demokratët zgjodhën liderin e tyre, kryeministren Viorika Dancila për të sfiduar presidentin në detyrë Klaus Iohanis. Lëvizja e liberalëve, një vit përpara zgjedhjeve parlamentare, normalisht do t’i jepte jetë perspektivës për zgjedhje të parakohshme, por një fragment i opozitës mund të zëvendësojë boshllëkun e krijuar prej tyre. Kryetari i tyre, ish-kryeministri Tariçeanu deklaroi se PSD kishte patur një performancë të dobët në qeveri dhe kishte dështuar të merrte hapat e duhur për të reformuar kabinetin. Sidoqoftë, vendimi për t’u tërhequr nga koalicioni nuk ishte i lehtë – shtoi ai. Nga ana tjetër, kryeministrja në detyrë Dancila tha se PSD do të vazhdojë të qeverisë. “E rëndësishme është që ne të mos zhgënjejmë votuesit që na besuan në zgjedhjet kombëtare të vitit 2016”, tha ajo në profilin e saj në Facebook. Aleanca mes social-demokratëve dhe liberalëve ishte kritikuar ashpër nga BE dhe Shtetet e Bashkuara për shkak të rishikimit të statusit të gjyqësorit, që sipas tyre do të cënonte sundimin e rendit dhe ligjit në vend. /ABC News Albania 24/7

8888888-1280x718.jpg
ad min12:45 | 11/08/2019

Dhjetëra mijëra njerëz, të nxitur nga diaspora, kanë protestuar në Bukuresht kundër nivelit të lartë të korrupsionit. Manifestuesit kanë kërkuar dorëheqjen e qeverisë social-demokrate, e cila sipas tyre po dobëson gjyqësorin për të mbuluar aferat e veta korruptive.

Disa dhjetëra mijëra protestues u grumbulluan në mënyrë paqësore në Bukuresht për të protestuar kundër qeverisë social-demokrate. Protesta u mbajt një vit pas manifestimeve te dhunshme, kur policia përdori forcë të shfrenuar.

Tubimi këtë herë ishte organizuar dhe promovuar nga shtetas rumunë që punojnë jashtë vendit, të irrituar nga korrupsioni i rrënjosur, administrata e dobët publike dhe përpjekjet e mazhorancës qeverisëse për të dobësuar gjyqësorin në një nga vendet më të korruptuara të BE-së.

Gjithashtu, vrasja e një vajze 15-vjeçare në jug të Rumanisë, kontribuoi në acarimin e mëtejshëm të manifestuesve ndaj autoriteteve për shkak të reagimit të vonuar. Mbi 20 mijë persona, si nga diaspora ashtu edhe nga brenda Rumanisë, u mblodhën jashtë selisë së qeverisë duke ngritur flamurin rumun dhe atë të Bashkimit Evropian dhe duke kërkuar dorëheqjen e ekzekutivit.

Protestat paqësore kanë qenë të shpeshta në vitet e fundit në Rumani, që kur social-demokratët erdhën në pushtet dhe ndërmorën një sërë nismash që shihen si kërcënime për pavarësinë e gjyqësorit. E vetmja protestë e dhunshme ndodhi më 10 gusht të 2018-s, kur policia qëlloi gaz lotsjellës ndaj turmës dhe përdori dhunë ndaj protestuesve paqësorë që po qëndronin me duart lartë. Asokohe, mbi 400 persona kërkuan asistencë mjekësore./ABC News Albania 24/7

uragani-1280x655.jpg
ent ela19:29 | 01/05/2019

Rumania për herë të parë është përfshirë nga një tornado i fortë, që ka përmbysur automjetet dhe ka shkulur çatitë e shtëpive, duke lënë edhe shumë persona të plagosur.

Persona të shumtë kanë mbetur të plagosur në Rumani, ku një tornado përfshiu jugun e vendit, duke detyruar një autobus të dalë jashtë rruge dhe të përmbyset në një fushë aty pranë. 12 personat që ndodheshin në autobus kanë mbetur të plagosur, një prej të cilëve është shtruar në spital për trauma serioze. Në lokalitetin Kalarasi, drejtuesit braktisën automjetet e tyre dhe u vendosën në një vend të sigurtë për të parë tornadon e rrallë që përshkonte fushat, duke ngritur një kullë prej pluhuri. Për fat të mirë furtuna kaloi pa prekur një fshat, por çatitë e 10 ndërtesave u shkulën nga vendi. Moti i keq në Rumani nisi pasditen e së martës, si pasojë e një fronti të ftohtë që erdhi nga Bullgaria, që u përplas me ajrin e ngrohtë në jug të vendit. Shpejtësia e tornados u llogarit të arrinte deri në 90 km / orë. “Bëhet fjalë për një tornado të vërtetë, të madh e të fuqishëm, që krijoi një vorbull nga koka tek këmbët”, deklaroi meteorologia Mariana Fratila. Gjatë së mërkurës, erëra të forta u regjistruan në disa zona të Rumanisë dhe zyra kombëtare meteorologjike lëshoi një alarm për zonat që rrezikojnë të preken prej tyre, pasi ka gjasa që tornadoja të përsëritet. /ABC News Albania 24/7

iliescu.jpg
ad min23:59 | 08/04/2019

Ish-presidenti i Rumanisë, Ion Iliesku është akuzuar për krime kundër njerëzimit në lidhje me trazirat e viteve ‘80, kur ra regjimi komunist. Prokurorët e ngritën akuzën pas një hetimi të gjatë mbi vrasjen e 860 personave.

Ish-presidenti i Rumanisë, Ion Iliesku është akuzuar për krime kundër njerëzimit, në lidhje me rolin e tij pas revoltës së dhunshme që çoi në rrëzimin e regjimit komunist në vitin 1989.

Iliesku dhe dy ish-zyrtarë të tjerë akuzohen se i dhanë jetë një fushate dezinformimi në shfaqjet e tyre televizive, duke rritur rrezikun për gjakderdhje. Dhe në fakt, pasi mori pushtetin, në Rumani u ekzekutuan 862 persona. Vetë ish-presidenti, aktualisht 89 vjeç, mohon gjithçka.

Ndërkohë, dy personat e tjerë të akuzuar bashkë me të janë ish-zëvendës kryeministri Voikan Voikulesku dhe ish-komandanti i forcave ajrore Iosif Rus. Akuzat ndaj tyre vijnë në përfundim të një hetimi të gjatë, por për momentin ende nuk është caktuar një datë për procesin gjyqësor.

“Është një moment i veçantë dhe i rëndësishëm në historinë e sistemit rumun të drejtësisë, që po shlyen detyrimin e nderit ndaj historisë”, ka deklaruar për gazetarët kryeprokurori Augustin Lazar.

Prokurorët pretendojnë se deklaratat televizive të ish-presidentit dhe bashkëpunëtorëve të tij rritën rrezikun për përshkallëzimin e akteve të dhunës. Gjithashtu, ato ndikuan në procesin qesharak që u mbyll me ekzekutimin e diktatorit komunist Nikolae Çaushesku./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono