rrezik

ura-qe-dridhet.jpg
G. P.15:15 | 16/08/2019

Ura e Drinit, ajo që lidh dy anët e Rrugës së Kombit prej dhjetë vitesh po përballon një fluks te madh, tej parashikimeve të fuqisë së saj. Për të shmangur rrezikun deri në ndërtimin e urës së re, po bëhen përforcime në dy anët e saj.

Ndërtuar në mesin e viteve ‘70, kur u përmbyt Kukësi i vjetër e me kapacitet bartës 24 tonë. Më se e mjaftueshme për kohën dhe lëvizjet e asaj periudhe. Por askush s’do ta mendonte një ngarkesë të tillë e fluks pas 45 vitesh.

Ura e Drinit, e vetmja që lidh dy anët e Rrugës se Kombit prej 10 vitesh përballon një fluks të jashtëzakonshëm dhe kapacitet tej parashikimeve e fuqisë bartëse që ka.

Duhej një ndërhyrje urgjente për të rritur sigurinë e saj, jo vetëm për shkak të udhëzimeve që u dhanë pas shembjes së urës në Genova vitin e kaluar, por për shkak se është rritur shkalla e amortizimit të saj.

Kompania sipërmarrëse po merret me përforcimet me hekur e beton arme në dy anët e saj e më pas është menduar ndërhyrje edhe në trupin dhe akset e urës. Mbi urën rreth 250 metra kalojnë njëherësh dhjetë apo pesëmbëdhjetë trailera dhe mjete të transportit të rëndë rreth 60 tonë secila.

Dridhjet që përftohen gjatë trafikut janë të frikshme ndaj po mendohet t’i jepet një zgjidhje provizore deri në ndërtimin e urës së madhe përbri saj, punimet e së cilës nisen pak muaj më parë e do zgjasin deri ne vitin 2021.

Por deri atëherë problemet e sigurisë me këtë fluks e lëvizje, duket se do jenë evidente. Ura e Kukësit ishte ndër veprat e mëdha që u ndërtuan pas hidrocentralit në Kukës me një lartësi deri në 63 metra. /ABC News Albania 24/7

SINKRON-BASHA-PAS-PYETJEVE-ABCM5T1.mpg_snapshot_00.49-1280x720.jpg
nev ila10:19 | 12/08/2019

Kreu i demokratëve Lulzim Basha ka vazhduar akuzat e tij ndaj kryeministrit Rama. Basha shkruan se Edi Rama është kërcënim për jetën e qytetarëve sepse ka uzurpuar, sipas tij, të gjitha pushtetet.

Më tej Basha ka përsëritur akuzat ndaj Valdrin Pjetrit duke thënë se ai duhet të merret urgjentisht i pandehur pasi ka shkelur Ligjin e Dekriminalizimit duke fshehur të dhënat mbi të kaluarën e tij si trafikant droge.

Sipas kreut të PD, për sa kohë që Edi Rama do të jetë në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë.

Edi Rama është kërcënim dhe rrezik për jetën dhe sigurinë e çdo familje shqiptare! Ai ka uzurpuar të gjitha pushtetet me një bandë kriminelësh e hajdutësh që i duhen për të vjedhur Shqipërinë.

Valdrin Pjetri duhet të merret urgjentisht i pandehur sepse ka shkelur Ligjin e Dekriminalizimit duke fshehur të dhënat mbi të kaluarën e tij si trafikant droge. Por Edi Rama i ka dhënë urdhër prokurorisë së korruptuar që ta mbrojë nga ligji i dekriminalizimit.

Por sa kohë Edi Rama është në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë.

Krimi dhe Edi Rama janë të pandashëm. Që të largojmë krimin duhet të largojmë Edi Ramën! Shporrja e Hajdutit Psiqik dhe bandës së tij është jetike për sigurinë dhe jetën e çdo familje shqiptare!“, shkruan Basha./abcnews.al

 

isis.jpg
Sej rie11:00 | 03/08/2019

Evropa dhe mbarë bota rrezikojnë të goditen nga sulme të Shtetit Islamik gjatë pjesës së mbetur të vitit 2019. Alarmi jepet në një raport të OKB-së ku thuhet se pavarësisht goditjeve të marra, grupi terrorist ka në dispozicion 30 mijë luftëtarë.

Brenda fundit të vitit mund të verifikohen sulme të reja terroriste nga ana e Shtetit Islamik. Alarmi jepet në një raport të OKB-së bazuar në të dhënat e shërbimeve sekrete të vendeve anëtare, sipas të cilave janë rreth 30 mijë luftëtarë që mund të jenë ende gjallë dhe gati për t’u hedhur në veprim në të gjithë botën.

Në raportin prej 24 faqesh analizohet rreziku i atentateve për zonë gjeografike, por pa treguar objektiva të saktë. Në Evropë llogaritet të jenë rreth 6 mijë luftëtarët e nisur për në Siri dhe Irak. Një e treta e tyre janë vrarë, ndërsa pjesa tjetër ose ka mbetur e bllokuar në ndonjë rajon të vendit, ose është arratisur tjetërkund. Rreth 2 mijë llogaritet të jenë kthyer në Europë dhe kjo bën që kërcënimi ndaj kontinentit të vjetër të jetë i lartë.

Në raport thuhet më tej se, pavarësisht disfatave të shumta, liderët e rrjetit terrorist vazhdojnë të fshihen në Siri dhe Irak dhe mezi presin ditën kur të mund të urdhërojnë sulme ndaj objektivave në mbarë botën. “Lidershipi i ISIS synon t’u përshtatet ndryshimeve, të mbijetojë dhe të aktivizojë celulat e fjetura në nivel lokal e ndërkombëtar”, vijon më tej raporti. Kërkimi i OKB-së përqendrohet më pas në Afrikën Perëndimore, ku është regjistruar një rritje e ndjeshme e akteve të dhunës të kryera nga militantët islamikë./ABC News Albania 24/7

lufte-1280x861.jpg
Sej rie22:15 | 21/05/2019

Rreziku që bota të përjetojë një luftë bërthamore aktualisht është në nivelet më të larta që prej Luftës së Dytë Botërore. Kështu thotë një studim i Kombeve të Bashkuara, që u bën thirrje fuqive të mëdha që ta marrin seriozisht problemin.

Rreziku i përdorimit të armëve bërthamore aktualisht është në nivelin më të lartë që prej Luftës së Dytë Botërore. Kështu ka deklaruar një eksperte e OKB-së për sigurinë, duke e cilësuar problemin një çështje urgjente që bota duhet ta marrë më shumë seriozisht.

Renata Duejn, drejtoreshë e Institutit të OKB për Kërkimet e Çarmatimit ka deklaruar se të gjitha shtetet e pajisura me armë bërthamore kanë hartuar programe modernizimi dhe korniza e kontrollit të armëve po ndryshon, pjesërisht për shkak të rivalitetit strategjik mes Kinës dhe Shteteve të Bashkuara.

Gjithashtu, marrëveshjet tradicionale për kontrollin e armëve po çrrënjosen për shkak të emergjencës që rrjedh nga lloje të reja luftërash, si ato mes grupeve të armatosura, njësive ushtarake private dhe teknologjisë, që po eliminojnë vijën ndarëse mes sulmit dhe mbrojtjes. “Mendoj se do të ishte e mençur të pranonim se risqet për një luftë bërthamore në këto momente janë jashtëzakonisht të larta, më të larta që prej Luftës së Dytë Botërore”, deklaroi ekspertja e OKB-së për gazetarët në Gjenevë.

Aktualisht, 122 vende të botës kanë nënshkruar traktatin që ndalon armët bërthamore, traktat që ka arritur vetëm 23 nga 50 ratifikimet e nevojshme që ai të hyjë në fuqi. Mes vendeve që kanë bërë ratifikimin janë Afrika e Jugut, Austria, Tajlanda, Vietnami dhe Meksika, ndërsa ato që e kanë kundërshtuar janë Shtetet e Bashkuara, Rusia dhe vende të tjera të pajisura me armë bërthamore./ABC News Albania 24/7

Nevila-Nika-1280x714.jpg
nev ila20:44 | 21/05/2019

E ftuar në Mbrëmje ABC me Mirela Milorin, ka qenë historiania Nevila Nika. Nika ka folur për ngjarjen më të fundit të ndodhur në arkivin e shtetit ku një vulë 400 vjeçare ka humbur ose është vjedhur.

Objekti është cilësuar me rëndësi të veçantë historike dhe i përket një fermani të Manastirit të Kamenës, që ndodhet mes Delvinës dhe fshatit Kakodhiq. Sipas Nikës vula është një singjil i dokumentit e cila i përket shekullit të 17-të.

E pyetur nga gazetarja Mirela Milori se si mund të ndodhë një ngjarje e tillë dhe nëse është vjedhur për tu shitur, historiania Nika u përgjigj:

Përkufizimi i arkivit historik është se aty ruhet kujtesa e kombit pra pjesa më e rëndësishme e një kombi. Ne kemi patur fatin të grumbullojmë në arkivin qendror kujtesën e kombit. Shqipëria ka thesare. Kjo është hera e parë që ndodh një ngjarje e tillë në atë institucion. Asnjë dëm nuk ka pësuar arkivi qendror gjatë viteve të vështira të 90’, 91’, 97’. Kur në Berat digjej zyra afër arkivit të qarkut të Beratit, arkivi atje nuk presoi asgjë sepse punonjësit ishin tepër të kujdesshëm. Arkivisti është një profesion shumë i vecantë, do një kulturë të përgjithshme të jashtëzakonshme. Detyra e arkivistit është mbrojtja deri në limite e kësaj pasurie por vlerësimi për arkivistin është shumë i ulët“.

Mirela Milori: A ka vlerë për ti shitur?

Nevila Nika: Po ka, por jo në Shqipëri. Në 50 vjetorin e arkivit doli për herë të parë, ka vlerë të jashtëzakonshme për ne. Në Shqipëri kishte dy të tilla./abcnews.al

qente-e-rrugeve.jpg
nev ila15:40 | 18/05/2019

Nëpër rrugët dhe parqet e kryeqytetit ndeshim shpesh qen të cilët lëvizin pa maska mbrojtëse, çka përbën një rrezik për fëmijët dhe të moshuarit. Për mikrofonin e ABC News qytetarët shprehen se pronarët e këtyre kafshëve duhet të jenë të përgjegjshëm që mos t’i nxjerrin pa maska mbrojtëse.

Një nga zonat e kryeqytetit ku ndeshet më shpesh kjo problematikë është Parku Rinia ku siç shihet dhe nga pamjet ka dhe shumë fëmijë të cilët luajnë me prindërit apo gjyshërit e tyre.

Qytetarët shprehen se nuk duhet të lejohen këto kafshë të qarkullojnë pa maska, sidomos në zonat publike ku ka fëmijë, pasi rreziku është i madh.

Ndërkohë, ABC neës tentoi të merrte reagime edhe nga të zotët e qenve që lëviznin pa maska, por ata kanë refuzuar të përgjigjen.

Prej janarit të këtij viti përgjegjësia i ka kaluar Bashkisë së Tiranës për të ndërgjegjësuar dhe bërë kontrolle ndaj pronarëve që nuk zbatojnë rregullat kur dalin me qentë e tyre pa maska në ambientet publike, ku nuk kanë munguar as masat administrative./ABC News Albania 24/7

demencc.jpg
G. P.23:11 | 14/05/2019

Organizata Botërore e Shëndetit ka publikuar për herë të parë udhëzimet se çfarë duhet të bëjnë njerëzit që të shmangin demencën. Demenca është sëmundje e trurit, që shkakton humbje graduale të aftësisë për të menduar, gjykuar, mbajtur mend, deri në kufizim të veprimtarisë në jetën e përditshme.

Demenca prek të paktën 50 milionë persona në të gjithë botën dhe po bëhet gjithnjë e më e përhapur. Deri më tani nuk ka asnjë mjekim që ta kurojë, por ka disa gjëra që njerëzit mund të bëjnë që të ulin rrezikun ose të ngadalësojnë demencën.

Moshat e vjetra janë më të prekura. Ekspertët kanë sugjeruar që ndryshimi i mënyrës së jetesës mund të ndalojë një të tretën e rasteve me demencë.

Por çfarë udhëzon Organizata Botërore e Shëndetit?

  1. Të rriturit, duke përfshirë të moshuarit duhet të kryejnë të paktë 150 minuta aktivitet fizik në javë.
  2. Duhet ndaluar duhani për shkak se është i dëmshëm për trurin dhe trupin.
  3. Duhet ngrënë mirë dhe shëndetshëm. BBC sugjeron dietë mesdhetare me perime të freskëta dhe fruta.
  4. Mos merrni mundimin të përdorni pilula me vitamina. Sipas studimeve nuk ka asnjë provë që kjo mund të ulë rrezikun për demencën.
  5. Duhet ndaluar përdorimi i alkoolit. Të pish shumë është e rrezikshme. Disa studime të tjera kanë sugjeruar se konsumimi i vogël i tyre mund t’ju mbrojë nga demenca, por nuk ka prova të forta që ta mbështesin këtë ide.
  6. Stërvitje për trurin. Disa studime sugjerojnë që të përdoren aktivitete që kanë të bëjnë me trurin. Bëhet fjalë për fjalëkryqe ose lojëra të tjera që mund t’ju ndihmojnë.
  7. Mbani peshë të shëndetshme. Kjo lidhet edhe me dietën dhe të stërviturit.
  8. Duhet të jeni socialë. Edhe pse nuk ka prova se mund të ndalojë ose të ngadalësojë demencën, të qëndrosh me miq lidhet me shëndetin e mirë dhe mirëqenien.
  9. Bëni kujdes me tensionin. Ka një lidhje të fortë mes demencës dhe tensionit të lartë të gjakut.
  10. Kujdes edhe me diabetin. Kontrolli i sheqerit në gjak është shumë i rëndësishëm për të ulur rrezikun nga komplikacione të tjera, siç është edhe demenca.
  11. Mbajeni nën kontroll kolesterolin. Edhe ky është një faktor që ndikon për të shkaktuar demencën.

/abcnews.al

49AB429B-CFA1-4857-BF59-947193F78C34_w1023_r1_s.jpg
G. P.08:18 | 03/05/2019

Dita Botërore e Shtypit shënohet çdo vit më 3 maj. Këtë vit vëmendja është tek gazetarët në skaje të ndryshme të botës, të cilët po ndeshin në rrethana gjithnjë e më armiqësore. Raporti i fundit i organizatës Gazetarët Pa Kufi thotë se liria e shtypit në botë ra gjatë në 12 muajt e fundit, pjesërisht si rezultat i politikave agresive ndaj gazetarëve. Bashkëpunëtorja e Zërit të Amerikës Greta Van Susteren bisedoi me gazetarë e aktivistë mbi rëndësinë e lirisë së shtypit:

Gazetarë nga e gjithë bota janë vënë në shenjestër nga qeveri autoritare që përpiqen të forcojnë kontrollin mbi median. Organizata Gazetarët Pa Kufi nxori në prill raportin e saj të fundit ku vëren se cikli i frikës po tkurr liritë e shtypit në botë dhe në Shtetet e Bashkuara:

Disa e quajnë këtë fenomen një sulm ndaj shtyllave të demokracisë:

“Gazetarët janë ata që ndodhen në vijën e frontit, ata që u kërkojnë llogari qeveritarëve dhe i shërbejnë transparencës: çfarë ndodh me të drejtat e qytetarit; si përdoren fondet publike. Pa punën e gazetarëve, qeveria mund të ndjekë politika që kufizojnë të drejtat e qytetarit dhe korrupsioni do të lulëzonte,” thotë Robert Mahoney i Komitetit për Mbrojtjen e Gazetarëve.

Sulmet kibernetike, arrestimet dhe rrëmbimet janë disa nga taktikat që përdoren për të frikësuar punonjësit e shtypit. Ka pasur edhe vrasje në disa raste.

Kina dhe Koreja e Veriut mbeten ndër abuzuesit më të rëndë, në bazë të raportit. Shtetet e Bashkuara renditen tre vende më poshtë, duke reflektuar një klimë problematike, siç vëren raporti, ku raportimi kritik ndaj zyrtarëve të lartë etiketohet si “lajme të rreme”.

Megjithatë, thonë gazetarët, Kushtetuta amerikane ofron mbrojtje dhe i inkurajon gazetarët të vazhdojnë misionin:

“Këtu dallojmë ne (Shteteve të Bashkuara) nga shumë vende të tjera – tek sundimi i ligjit. Shteti ligjor ekziston dhe respektohet në masë të madh; pikërisht këtu qëndron dallimi mes nesh dhe pjesës tjetër të botës. Për shembull, megjithëse Zëri i Amerikës financohet nga qeveria amerikane, ka ligje që na mbrojnë ne si organizatë. Prandaj ne jemi realisht të pavarur,” thotë drejtoresha e Zërit të Amerikës, Amanda Bennett.

Në Filipine, kërcënimet e përsëritura nga Presidenti Rodrigo Duterte kundër medias kanë rezultuar në qëndrime keqdashëse ndaj gazetarëve në një vend që më parë konsiderohej një ndër mbrojtësit më të mëdhenj të lirisë së shtypit në Azi. Organizatat vëzhguese thonë se sulmet e tij më të forta kanë qenë kundër portalit mediatik, Rappler:

“Nëse shohim çfarë ka ndodhur në 14 muajt e fundit, qeveria filipinase na ka hedhur në gjyq 11 herë. Vetëm brenda dy muajsh jam detyruar të paguaj për lirim me kusht nga burgu. Brenda pesë javësh më kanë arrestuar dy herë dhe një herë më mbajtën në paraburgim. Kemi të bëjmë me dobësim ekstrem të lirive të shtypit,” thotë redaktorja e portalit, Maria Ressa.

Në prill, gjykata më e lartë e Mianmarit mbajti në fuqi vendimin për shtatë vjet burgim kundër dy gazetarëve të agjencisë së lajmeve Reuters, të cilët u arrestuan gjatë punës investigative mbi vrasjen e myslimanëve rohinga në 2017.

“Është e qartë se u kishin ngritur kurth. Një nga policët që doli dëshmitar tha se kishte mbajtur shënime gjatë arrestimit, por i kishte djegur shënimet. Një tjetër erdhi me shënime të shkruara në dorë që të mbante mend çfarë do të thoshte. Një i tretë erdhi dhe tha se i kishin udhëzuar si t’i zinin në grackë gazetarët. Nuk ka diskutim që u arrestuan, pasi po raportonin mbi masakrën,” thotë kryeredaktori i agjencisë së lajmeve Reuters.

Në vend të parë në raportin e lirisë së shtypit renditet Norvegjia, ndërkohë që ka rënë numri i vendeve që konsiderohen të sigurta për punën e gazetarëve./VOA

Alexandria_Ocasio-Cortez.jpg
nev ila18:45 | 18/04/2019

Deputetja amerikane 29 vjeçare Alesandria Okasio Kortez, ka hequr dorë nga Facebook, duke e konsideruar si një rrezik për shëndetin publik. Ngritja e saj në skenën politike kishte nisur pikërisht nga rrjetet sociale.

Personi i radhës që kritikon Facebook është deputetja më e re në historinë e Shteteve të Bashkuara të Amerikës, e cila pikërisht duke përdorur këtë rrjet social, nisi me sukses karrierën e saj politike.

Alessandria Okasio Kortez, një nga emrat në ngritje në radhët e demokratëve amerikanë, i cilësoi rrjetet sociale si një rrezik për shëndetin publik me efekte dhe pasoja për të gjithë. Ajo konfirmoi se do të mbyllë faqen e saj në Facebook.

Ajo shpjegoi se personalisht kishte hequr dorë nga Facebook.

Dhe pse e pranon se fushatën elektorale e kishte nisur pikërisht në këtë rrjet social, i cili kishte qenë mjeti i saj organizativ për shumë kohë. 29 vjeçarja shtoi se kishte reduktuar ndjeshëm dhe përdorimin e rrjeteve të tjera sociale si Twitter apo Instagram, platforma në të cilat ndiqej nga miliona persona./abcnews.al

1.jpg
ent ela17:35 | 25/03/2019

Gjendja shëndetësore e vogëlushes së një çifti shqiptar në Itali po përmirësohet ndejshëm. Ajo është vetëm 15-muajsh dhe tani është jashtë rrezikut për jetën.

Ajo u aksidentua rëndë më 8 mars në Marosticë, në një nga sheshet qendrore të qytetit në rrugën “Montegrappa”, pasi drejtuesi i një kamioni humbi kontrollin dhe e përplasi.

Shoferi Thiene Pietro Dal Santo ,58-vjeç rezultoi se ishte nën efektin e alkoolit kur aksidentoi fëmijën shqiptar. Por falë kujdesit intensiv të Poliklinikës së Padovës, ku fëmija është shtruar, ajo ka dalë nga koma farmakologjike. Ndërsa i gjithë stafi mjekësor po e ndjek me vëmendje dhe gjatë fundjavës pritet që mjekët t’i ndalojnë gradualisht medikamentet që përdorin për t’i lehtësuar dhimbjet. Pas aksidentit ajo për 3 javë ka qëndruar në koma. Por më në fund ka ardhur lajmi i mirë që të gjithë e prisnin./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono