rrezik

Alexandria_Ocasio-Cortez.jpg
nev ila18:45 | 18/04/2019

Deputetja amerikane 29 vjeçare Alesandria Okasio Kortez, ka hequr dorë nga Facebook, duke e konsideruar si një rrezik për shëndetin publik. Ngritja e saj në skenën politike kishte nisur pikërisht nga rrjetet sociale.

Personi i radhës që kritikon Facebook është deputetja më e re në historinë e Shteteve të Bashkuara të Amerikës, e cila pikërisht duke përdorur këtë rrjet social, nisi me sukses karrierën e saj politike.

Alessandria Okasio Kortez, një nga emrat në ngritje në radhët e demokratëve amerikanë, i cilësoi rrjetet sociale si një rrezik për shëndetin publik me efekte dhe pasoja për të gjithë. Ajo konfirmoi se do të mbyllë faqen e saj në Facebook.

Ajo shpjegoi se personalisht kishte hequr dorë nga Facebook.

Dhe pse e pranon se fushatën elektorale e kishte nisur pikërisht në këtë rrjet social, i cili kishte qenë mjeti i saj organizativ për shumë kohë. 29 vjeçarja shtoi se kishte reduktuar ndjeshëm dhe përdorimin e rrjeteve të tjera sociale si Twitter apo Instagram, platforma në të cilat ndiqej nga miliona persona./abcnews.al

1.jpg
ent ela17:35 | 25/03/2019

Gjendja shëndetësore e vogëlushes së një çifti shqiptar në Itali po përmirësohet ndejshëm. Ajo është vetëm 15-muajsh dhe tani është jashtë rrezikut për jetën.

Ajo u aksidentua rëndë më 8 mars në Marosticë, në një nga sheshet qendrore të qytetit në rrugën “Montegrappa”, pasi drejtuesi i një kamioni humbi kontrollin dhe e përplasi.

Shoferi Thiene Pietro Dal Santo ,58-vjeç rezultoi se ishte nën efektin e alkoolit kur aksidentoi fëmijën shqiptar. Por falë kujdesit intensiv të Poliklinikës së Padovës, ku fëmija është shtruar, ajo ka dalë nga koma farmakologjike. Ndërsa i gjithë stafi mjekësor po e ndjek me vëmendje dhe gjatë fundjavës pritet që mjekët t’i ndalojnë gradualisht medikamentet që përdorin për t’i lehtësuar dhimbjet. Pas aksidentit ajo për 3 javë ka qëndruar në koma. Por më në fund ka ardhur lajmi i mirë që të gjithë e prisnin./abcnews.al

brexit.jpeg
G. P.16:00 | 10/03/2019

Teksa po afron epilogu, Brexit në Mbretërinë e Bashkuar vazhdon të shoqërohet me një seri opsionesh, që nga ai i daljes pa një marrëveshje nga blloku europian deri tek një referendum i dytë për qëndrimin ose jo në BE.

Brexit mund të kthehet mbrapsht nëse ligjvënësit hedhin poshtë marrëveshjen e daljes nga BE-ja të arritur nga qeveria. Deklarata është bërë nga sekretari britanik i Punëve të Jashtme, Jeremy Hunt, pasi dy nga fraksionet më euro-skeptike në Parlament paralajmëruan se kryeministrja Theresa May rrezikon dështimin.

Kur kanë mbetur 19 ditë nga largimi i Mbretërisë së Bashkuar nga BE-ja, May po përpiqet të sigurojë nga Brukseli disa ndryshime të minutës së fundit në strategjinë e daljes, përpara se Parlamenti të votojë marrëveshjen e saj ditën e martë.

Në rast dështimi, ligjvënësit pritet të detyrojnë May të kërkojë një shtyrje të Brexit, një lëvizje që mund ta kthejë mbrapsht vendimin e vitit 2016 për të lënë bllokun. Ndërkohë, politikanë të tjerë argumentojnë se pa një shtyrje Britania do të përballet me një shok ekonomik.

“Kemi shansin të largohemi më 29 Mars, ose fare pak më pas dhe është e rëndësishme ta kapim këtë mundësi sepse ka njerëz që po përpiqen ta ndalin Brexit. Aktualisht po lundrojmë në ujëra shumë të rrezikshme”, ka deklaruar Hunt për BBC.

Kriza që ka përfshirë Mbretërinë e Bashkuar në lidhje me anëtarësimin në BE po i afrohet epilogut e shoqëruar nga një seri opsionesh, mes të cilave shtyrja, një marrëveshje e minutës së fundit, një dalje pa marrëveshje, zgjedhje të parakohshme, si dhe një referendum të dytë./abcnews.al

wolswagen.jpg
G. P.08:59 | 19/02/2019

Ka kohë që kërcënimi qëndron në ajër: Presidenti Donald Trump mund të vendosë dogana ndëshkuese për importet e automjeteve nga BE. Tani Ministria e Tregtisë së SHBA e dorëzoi raportin për cënimin e sigurisë kombëtare.

BE ashtu si Gjermania do të reagojë ndaj një ashpërsimi të mundshëm të grindjes tregtare me SHBA. “Bashkimi Europian do ta mbajë fjalën, për sa kohë e bën këtë edhe SHBA”, tha një zëdhënës i Komisionit Europian para gazetarëve. BE ka interes të përmirësojë marrëdhëniet tregtare me SHBA, por ajo do të reagojë, nëse presidenti Trump vendos dogana ndëshkuese. Qeveria gjermane u shpreh me të njëjtat tone. Ministria e Tregtisë së SHBA është e mendit, se importet e automjeteve nga Europa rrezikojnë sigurinë amerikane. Mbetet të pritet, se çfarë do të bëjë Trump me këtë, sipas një zëdhënësi të qeverisë amerikane. Nëse Trump vendos dogana të reja, Gjermania dhe do të përgjigjen së bashku.

Ministria Amerikane e Tregtisë i ka dorëzuar presidentit Trump raportin mbi kërcënimin e sigurisë amerikane nga importet e automjeteve. Një zëdhënëse e ministrisë ka thënë, se nuk do të publikohen detaje. Trump ka 90 ditë kohë, që mbi këtë bazë të vendosë, nëse do të ngrejë doganat deri në 25% për importet e automjeteve. Por nuk dihet, nëse do të ndërmerret ky hap nga presidenti amerikan. Realisht bëhet fjalë për shumë para- në vitin 2017 SHBA kanë importuar automjete dhe pjesë këmbimi në vlerë prej 340 miliardë dollarësh.

Kritikat shtohen

Vetë dega amerikane e industrisë së automjeteve është shprehur kundër doganave ndëshkuese, sepse ato do të ulnin në masë investimet në këtë degë. “Asnjë prodhues i kësaj dege në vend nuk e ka kërkuar një raport të tillë.” Automjetet e prodhuara jashtë SHBA do të shtrenjtoheshin me 5000 dollarë amerikanë, sipas informacioneve të konsulentit të informacionit, IHS Markit. Vetë automjetet e prodhuara në SHBA do të shtrenjtoheshin me 1800 dollarë, sepse të gjitha përmbajnë pjesë të importuara. Edhe tek politika amerikane plane të tilla ndeshin në kritika. Senatori republikan nga Ohio, Rob Portman u shpreh se “shpresoj që qeveria të lëvizë një hap mbrapa dhe t’i rimendojë edhe njëherë doganat për automjetet.”

Merkel: Fabrika më e madhe e BMW-së në SHBA

Shoqata e Industrisë së Automobilëvë, VDA u shpreh e shqetësuar dhe përmendi angazhimin e prodhuesve të automjeteve në SHBA. Vetëm dega gjermane e automjeteve ka siguruar rreth 113.000 vende pune në SHBA. Sipas institutit, Ifo doganat ndëshkuese afatgjata do të çonin rënien deri në 50% të eksporteve gjermane të automjeteve. Sipas Institutit humbja do të kompensohej, nëse Gjermania e BE do të reagonin me kundërmasa, pra po me dogana shtesë.

Kancelarja Merkel në Konferencën e Sigurisë në Mynih iu referua edhe njëherë fabrikave të mëdha gjermane në SHBA. Fabrika më e madhe e BMW-së nuk është në Gjermani, por në Karolinën e Jugut, tha Merkel, dhe nga atje automjetet dërgohen në Kinë. “Nëse këto automjete papritur janë një kërcënim për sigurinë kombëtare të SHBA, atëherë kjo na trondit”, tha Merkel. Të hënën (18.02) skadoi një afat i presidentit Trump për importet e automobilëve. Deri këtë ditë duhej që Ministria e Tregtisë të verifikonte, nëse importet e automjeteve cënojnë interesat e sigurisë kombëtare amerikane. Kjo do të ishte baza për vendosjen e doganave ndëshkuese./DW

liqeni-i-pukes.jpg
G. P.11:06 | 20/01/2019

Bashkia e Pukës i ka bërë thirrje qytetarëve sot dhe në veçanti prindërve, të këshillojnë fëmijët e tyre që të mos hipin në sipërfaqen e ngrirë të liqenit, pasi është mjaft e rrezikshme.

Rritja e temperaturave rrezikon çarjen e sipërfaqes të akullit dhe pasoja të rënda për jetën e qytetarëve./abcnews.al

panuci-dhe-duka.jpg
G. P.16:24 | 27/11/2018

Kristian Panuçi nuk e ka aspak të sigurt postin e trajnerit të kombëtares. ABC News mëson se presidenti Duka po kërkon një pasardhës në Itali dhe Kroacia.

Fitoi ndaj Uellsit dhe u duk se e keqja kaloi. Kristian Panuçi u mendua se e siguroi stolin e kombëtares të paktën deri në verë, pasi presidenti Duka deklaroi publikisht mendimin e tij.

“Kjo nuk do të thotë që ne në këtë kohë të marrim vendime të nxituara. Trajneri ka të mirat dhe këqijat e veta këto ndeshje. Ne do vazhdojmë të mbështesim trajnerin dhe stafin në eliminatoret e Europianit”, tha Duka.

Gjithsesi, të mos nxitohemi, pasi kërkimi për një trajner të ri po vazhdon me këmbëngulje. Burime tepër të besueshme në Federatën Shqiptare të Futbollit pohojnë për ABC News se Duka dëshiron ndryshim, dhe se trajneri i ardhshëm do të jetë përsëri i huaj.

Numri 1 i Federatës është në bisedime në Itali dhe në Kroaci, e ndonëse nuk jepen emra konkretë, burimet e mësipërme theksojnë se preferenca është sërish për një italian. Pas De Biazit dhe Panuçit, Duka mesa duket dëshiron të ketë vazhdimësi, për të mos krijuar konfuzion tek futbollistët. Në mediat italiane është përmendur emri i Alberto Malezanit, veçse ai është 64 vjeç dhe presidenti i Federatës dëshiron trajner me moshë më të re.

Gjithsesi, ekziston mundësia që kombëtarja të mund të drejtohet përkohësisht nga një trajner shqiptar, deri në gjetjen e një të huaji. Disa javë më parë, ABC News informoi se Duka ishte kthyer tek pista shqiptare, dhe më pas doli emri i Bledar Kolës, i cili e refuzoi detyrën. Burimet në Federatë bëjnë me dijë se presidenti ka humbur besimin tek Panuçi, dhe arsyet kryesore janë mungesa e një formacioni stabël dhe e mënyrës së duhur të lojës./abcnews.al

alban-hoxha.png
G. P.17:06 | 26/11/2018

Partizani shkon i tronditur në derbin e kësaj jave ndaj Tiranës. Portieri dhe kapiteni Alban Hoxha mbetet ende në qeli, pas ndalimit nga policia.

Nuk dihet nëse do të jetë në këtë autobus të premten. Kapiteni i Partizanit, Alban Hoxha, rrezikon seriozisht derbin e Superligës me Tiranën, pasi u ndalua nga policia, i akuzuar për drejtim të makinës nën efektin e alkoolit. Portieri i të kuqve mbeti në qeli edhe për 24 orë të tjera, pasi seanca gjyqësore ndaj tij u shty. Kjo do të thotë 24 orë më pak regjim dhe më pak mundësi për t’u stërvitur me shokët, aq më shumë që kapiteni vjen nga dëmtimi.

Burime në Policinë e Tiranës pohojnë se ndalimi i tij mund të mos kishte ndodhur, por gjithçka u bë e detyrueshme pas kundërshtimit që portieri i bëri oficerit. Seanca do të zhvillohet paraditen e kësaj të marte dhe Hoxha pritet të lirohet në sallën e gjyqit dhe të bashkohet me skuadrën. Ai besohet se do të gjykohet në gjendje të lirë, por gjithsesi, sipas ligjit ekziston rreziku për t’u dënuar me burg. Edhe nëse kjo nuk ndodh, shqetësimi për trajnerin Skënder Gega është i madh, pasi kjo ngjarje pritet të ndikojë negativisht tek vetë portieri, por edhe tek skuadra.

Momenti nuk duket aspak i mirë për Partizanin, i cili fundjavën e kaluar humbi ndeshjen e Superligës ndaj Flamurtarit në Vlorë, ndërsa acarim. Klubi nuk ka dashur të komentojë, por padyshim pritet që drejtori sportiv, Olsi Rama, të marrë masë ndëshkuese për kapitenin. Partizani kryeson Superligën me 31 pikë pas 14 javësh, dhe ka pasur bilanc pozitiv me Tiranën vitet e fundit, veçse derbi mbetet ndeshje delikate, që bëhet më e vështirë nga rasti i Alban Hoxhës./abcnews.al

pasuri-nenujore.jpg
G. P.22:29 | 19/11/2018

Media e njohur italiane “La Repubblica” në një artikull thotë se thesaret arkeologjike nënujore në Shqipëri janë në rrezik pasi po plaçkiten nga kërkuesit e paligjshëm. Në një artikull nënvizon se Shqipëria nuk ka mjetet e duhura për të mbrojtur zonat arkeologjike nënujore.

Gazeta italiane “La Repubblica” i ka kushtuar një artikull pasurive nënujore të Shqipërisë, apo thënë ndryshe relikeve prehistorike. Shkrimi fokusohet në faktin që këto sende me vlerë të madhe historike janë në rrezik zhdukjeje.

“Dhjetra e qindra anije antike, disa i përkasin epokës përpara Krishtit, kanë pushuar për shekuj e shekuj në 450 kilometrat e bregdetit të Shqipërisë: anije romake, egjiptiane, greke dhe ilire, shpesh të mbushura me thesar. Por edhe anije të luftës modern. Pas përfundimit të regjimit komunist të Enver Hoxhës, erdhi demokracia dhe veçanërisht në kohët e fundit shumë prej këtyre relikeve të çmuara, zbulime arkeologjike unike shpesh të mbushura me flori dhe metale të tjera të çmuara dhe monedha të epokës janë zhdukur. Ose janë plaçkitur”.

Kështu shkruan “La Repubblica” duke nënvizuar se bëhet fjalë për vjedhje nga kërkues të paligjshëm të relikeve arkeologjike me vlerë, të pasuruar ndoshta në të gjithë botën me “peshkimin e tyre” të paligjshëm të relikeve. Artikulli vijon më tej duke zbuluar se këto relike janë shitur nga 100 euro secila. Media italiane thotë se Shqipëria, pavarësisht rritjes ekonomike, është akoma vend i varfër.

“Forcat e armatosura, policia, roja bregdetare nuk posedojnë mjetet e nevojshme për të mbrojtur anijet e ralla antike, ngarkesat e tyre, të gjitha ato objekte dhe vlerat e tyre numizmatike dhe arkeologjike, ndoshta të paçmueshme”, vijon “La Repubblica”.

Ndër të tjera kjo media thotë se trafiku illegal i thesareve arkeologjike, sjell përfitim deri në 3.5 miliardë euro në vit për kërkuesit e paligjshëm./abcnews.al

shbaaa.jpg
G. P.23:15 | 15/11/2018

Ndryshimi i prioriteteve ushtarake nga administrata Trump ka bërë që ushtria amerikane të humbasë primatin dhe të vërë në rrezik rolin dominues të Shteteve të Bashkuara në botë. Konstatimi është bërë nga një grup ekspertësh që kanë analizuar strategjinë e presidentit për sigurinë kombëtare.

Një panel ekspertësh ka dhënë një vlerësim sa të qartë aq edhe të frikshëm mbi strategjinë për mbrojtjen kombëtare të përgatitur nga zyra e presidentit Donald Trump. Në raportin e hartuar, ekspertët paralajmërojnë se marzhi i superioritetit që për gjenerata me radhë ka karakterizuar ushtrinë amerikane, në ditët e sotme ka rënë ndjeshëm duke ndikuar në zonat më strategjike të botës. “Ka sfida urgjente që duhet të adresohen nëse Shtetet e Bashkuara duan të shmangin dëmet që mund t’i shkaktohen sigurisë kombëtare”, thuhet në raport. Paneli ishte ngarkuar nga Kongresi për të dhënë një opinion të pavarur mbi strategjinë mbrojtëse të administratës Trump. Raporti është hartuar nga Erik Edelman, ish-zyrtar i lartë i Pentagonit gjatë administratës Bush dhe admirali Geri Rafhed, ish-shef i operacioneve ushtarake detare.

“Siguria dhe mirëqënia e Shteteve të Bashkuara janë në rrezikun më të madh në dekada. Superioriteti ushtarak i Amerikës ka degraduar në nivele të rrezikshme”, nënvizon raporti. Ardhja në pushtet e presidentit Trump përkon me ndryshimin e prioriteteve ushtarake të Shteteve të Bashkuara, duke u zhvendosur nga operacionet kundër terrorizmit dhe rebelimeve tek konfliktet e mundshme me të ashtuquajturit “konkurrentët e barabartë” si Rusia dhe Kina. Por edhe konkurrentët jo të barabartë, si Irani dhe Korea e Veriut, po kthehen në sfida serioze dhe të rrezikshme, vijon raporti. Konstatimet e ekspertëve janë të shumta.

Kështu, në vitet e fundit, në vende si Iraku dhe Afganistani ushtria amerikane ka operuar nga kryesisht ajri dhe në zona që nuk përbëjnë kërcënim për trupat e saj, taktikë kjo që nuk i ka sjellë asnjë përfitim në aspektin profesional në terren. Ndërkohë, rivalët potencialë si Kina dhe Rusia kanë studiuar ushtrinë e Shteteve të Bashkuara dhe vazhdojnë të modernizojnë forcat e tyre të armatosura si në aspektin tradicional, ashtu edhe duke eksploruar rrugë të reja për t’i bërë kontrast Amerikës në ato zona ku dikur ka patur rol dominues./abcnews.al

TE-FORTET-E-VLORES-NE-ARRATI.mpg_snapshot_00.00-1280x720.jpg
ent ela15:13 | 14/11/2018

Policia e shtetit publikon në Internet fotot dhe të dhënat e 8 personave, që i quan më të rrezikshmit e Vlorës. Ata janë dënuar me burg të përjetshëm apo me 25 vjet burg për krime të ndodhura kryesisht në fillim të viteve ’90 dhe janë ende të lirë.

Policia e Shtetit ka publikuar në faqen e saj zyrtare në internet fotot dhe emrat e 8 personave në kerkim, të cilësuar vrasësit më të rrezikshëm të qytetit bregdetar që janë ende të lirë. Përmes publikimit në internet të fotove të këtyre personave, unirformat blu kërkojnë ndihmë nga kushdo që i njeh apo ka informacion për ta.

Në listë rënditen 3 persona të dënuar me burgim të përjetshëm dhe 5 të tjerë të dënuar me nga 25 vite burg. Ngjarjet e rënda kriminale kanë ndodhur në fillim të viteve në ’90 dhe për një nga të shpallurit në kërkim policia nuk disponon as fotografi. Bëhët fjalë për Pali Gjergji, i cili akuzohet për shumë krime të ndodhura në vitin 1997 në qytetin e Vlorës dhe vijon të jetë ende në kërkim.

Lista e 8 personave të rrezikshem të Vlorës kryesohet nga Sokrat Ruda dhe Gëzim Memeti. Të dy akuzohen për vrasje dhe plagosje, ngjarje këto të ndodhura në vitet 1994 dhe 1996, ndërsa vendimi i gjykatës për ta është i formës së prerë. I treti në listën e publikuar është Apostol Bucaj. 47-vjeçari është dënuar me 25 vite burg për vrasjen e Foto Mërtirit, në janar të vitit 1994.

Për një vrasje të trefishtë, të kryer në bashkëpunim në vitin 1999 vijon të jetë në kërkim Dritan Rexhepi. 38-vjeçari ka vrarë dy efektive të policisë, Arben Keqi dhe Durim Kasmi, në Krujë. Në ngjarje, rastësisht u vra dhe pronari i një lokali, Raim Bakiasi. Dosja e Dritan Rexhepit, i njohur edhe me emrin Gramoz, vijon të ketë shumë mistere. Rexhepi një nga shqiptarët më të kërkuar në botë u prangos nga Interpoli në Amerikën e Jugut në verën e 2014 tre vjet pas arratisjes spektakolare nga një burg i Belgjikës. Ai u ndalua si pjesë e një grupi që u kap me 278 kilogramë kokainë në Ekuador. Në kërkim për Policinë e Shtetit rezulton edhe Gazment Nebiu. 42-vjeçari ka qenë Anëtarë i bandës se “Kakamit”, të cilët akuzohen për shumë vrasje të ndodhura në qytetin e Vlorës gjatë trazirave të vitit 97’./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono