ronaldo

cristiano-ronaldo-1.jpg
ent ela21:10 | 01/12/2018

Akuza të reja për Kristiano Ronaldon. Revista gjermane “Der Shpigel” boton dokumenta sipas të cilave, ylli I Juventusit përdori dhunë ndaj Ketrin Majorgës, në përdhunimin e dyshuar në Las Vegas

Pozicioni në të cilin ndodhet është vërtet i vështirë.

Edhe pse në fushë, Kristiano Ronaldo po vazhdon të shkëlqejë, nuk mund të thuhet kështu për skandalin me Ketrin Majorgën.

Dokumente të reja kanë dalë lidhur me superyllin e Juventusit, të cilat e rëndojnë gjendjen e tij në skandalin e dyshuar të përdhunimit të Ketrin Majorgës.

Revista gjermane “Der Shpigel” boton dokumente të avokatëve të Ronaldos, në të cilët ai pohon se marrëdhënia e tij intime me vajzën amerikane nuk ka qenë edhe aq me mirëkuptim.

Sipas dokumentave, Majorga ka kundërshtuar, madje vetë futbollisti thotë se ka mundësi t’i ketë lënë shenja nga dhuna.

Ngjarja dyshohet të ketë ndodhur në vitin 2009 në “Palm Hotel” në Las Vegas, ndërsa biseda e Ronaldos me avokatët e tij u zhvillua në gusht të po atij viti.

Avokati I CR7-ës, Piter Kristiansen, deklaroi se dokumentet e pretenduara nga “Der Shpigeli” janë të falsifikuara, por revista u përgjigj duke thënë se zotëron qindra faqe, të cilëve nuk u vihet në dyshim autenticiteti.

Është e pranuar që më parë se Ronaldo dhe avokatët e tij i dhanë Majorgës 350 000 USD që ajo të mbyllte gojën, por avokatët thonë se kjo nuk provon se klienti i tyre është fajtor.

Gjithsesi, drejtësia amerikane besohet se do ta vazhdojë hetimin dhe, në rast se provohet që Ronaldo e detyroi Ketrinën, atëherë portugezi rrezikon jo pak. /abcnews.al

roni.jpg
G. P.18:05 | 23/10/2018

Kristiano Ronaldo do të ketë sot një nga ndeshjet më emocionuese në karrierë. Ylli portugez luan në fushën e Mançester Junajtidit në Champions, duke qenë përballë ish-ekipit me të cilin u bë i famshëm.

Nuk është shtëpia, por thuajse e tillë.

Kristiano Ronaldo kthehet në “Old Traford”, për herë të dytë si kundërshtar, sërish në Champions, ndërsa aty fillimisht njohur lavdinë si futbollist.

Nën drejtimin e Sër Aleks Fergusonit fitoi thuajse gjithçka me Mançester Junajtidin, ndërsa tani do të duhet ta mundë ish-ekipin e tij, siç bëri kur ishte tek Reali i Madridit.

“Është një emocion i madh për mua që rikthehem këtu. E njoh mirë historinë e këtij klubi, po ashtu i mbaj mend mirë tifozët. Fitova shumë trofe në këtë stadium, kam kujtime të mëdha, dhe një dashuri të madhe, sidomos për Sër Aleks Fergusonit, të cilit i uroj shëndet të plotë. Ai më ndihmoi jashtëzakonisht shumë”.

Përveç ngacmimeve për historinë e dyshuar të përdhunimit, Ronaldos iu kujtuan fjalët e yllit të Realit, Isko, që tha se “madrilenët nuk duhet të qajnë për një lojtar që nuk deshi të qëndronte në skuadër”.

“Epo mirë, jam dakord. Nuk duhet të qajmë”.

Në sfidën e Championsit, Ronaldo do të jetë përballë edhe një tjetër njohjeje të vjetër, ish-trajnerit të tij tek Reali, Zhoze Murinjos.

Dy portugezët nuk është se patën marrëdhënie shumë të mira, por tekniku i Junajtidit, nuk flet për konflikt.

“Kristiano është një nga lojtarët më të mirë të të gjitha kohëve, dhe askush nuk mund të thotë ndryshe. Gjithsesi, nuk do të jetë një ndeshje mes meje dhe atij, por mes dy skuadrave. Do të jemi përballë një skuadre të madhe si Juventusi, njërit prej kandidatëve më të fortë për të fituar Championsin, dhe që është favorite ndaj nesh. Kjo është më e rëndësishmja, jo nëse unë do të kthehem tek Reali apo jo”.

Rivali i tij në stol, trajneri juventin, Masimiliano Alegri, ka gjithashtu fjalë të mëdha për Mançester Junajtidin.

“Është një skuadër shumë e fortë fizikisht, dhe shumë e shpejtë, ndaj duhet t’i përgjigjemi me nivel teknik dhe inteligjencë, ndryshe do ta kemi pisk. Ndeshja është tepër e rëndësishme, pasi nëse fitojmë, kualifikohemi për në turin tjetër. Skuadra angleze ka lojtarë të mëdhenj si Pogba, por edhe të rinj shumë të talentuar”.

Junajtid do të ketë mungesa të rëndësishme si Aleksis Sançez, Felaini, Xhons, Lingard, Mektominej apo Dialo. Juventus është pa sulmuesin Mario Manxhukiç, ndërsa mungojnë edhe Emre Xhan e Sami Kedira.

Sfida është një klasike europiane, filluar që në 1978 dhe me duelin e fundit në 2003. Të dyja skuadrat kanë arritur fitore të mëdha, ndërsa bilanci është disi më pozitiv për italianët./abcnews.al

ronadlo.png
G. P.17:03 | 07/10/2018

Cristiano Ronaldo vërtet shënoi për Juventusin në Serinë A, veçse pozicioni i tij është tepër i rrezikuar për shkak të akuzave për përdhunim që vijnë nga Amerika.

Një gol për të larguar të keqen.

Cristiano Ronaldo do të kishte dashur shumë të kishte qenë kështu, veçse rrjeta në portën e Udinezes, thjesht e ndihmoi për lavdinë sportive dhe po ashtu i dha një dorë Juves për të arritur fitoren e tetë radhazi në Serinë A.

Portugezi nuk mund të shpëtojë dot lehtë nga akuzat e rënda për përdhunim që vijnë nga Amerika, pavarësisht nëse ai është apo jo me të vërtetë fajtor. Goditja ka qenë e rëndë për një nga dy superyjet e futbollit edhe pse flitet për një ngjarje të mundshme të para 9 viteve.

Ketrin Majorga, një ish-modele dhe sot mësuese, e akuzon Kristianon për përdhunim, diçka për të cilën ai rrezikon burgun, nëse gjykata e shpall fajtor. Avokati i Majorgës, Lesli Stovël, ka deklaruar se është kontaktuar nga një tjetër femër që deklaron se është përdhunuar nga futbollisti, pra skandali mund të zgjerohet edhe më shumë.

Një rrethanë lehtësuese për CR7-n sigurohet nga deklaratat e shoferit të taksisë me të cilën Majorga udhëtoi për në takimin me Ronaldon. Vins Hamfri shprehet se Katrina dukej e lumtur për mbrëmjen që do të kalonte me lojtarin, dhe mburrej me trupin e saj të shkëlqyer.

Me shumë gjasë, portugezi do të pyetet nga policia amerikane për ngjarjen, ndërsa ai ka pajtuar një avokat tepër të njohur, Dejvid Çesnof, një njeri që ka mbrojtur në gjyq emra të mëdhenj të sportit apo të artit si Shakill O’Nill, Andre Agasi, Majk Tajson, Leonardo Di Kaprio apo Paris Hilton.

Skandali i supozuar i Ronaldos ka goditur edhe Juventusin. Aksionet e klubit në bursë ranë me 18 për qind brenda ditëve të fundit, ndonëse ndikimi i portugezit mbetet pozitiv, sepse i rriti aksionet me 180 për qind kur mbërriti në Torino.

Edhe Ronaldo mund të ketë pasoja financiare dhe të imazhit, pasi sponsorët e tij si Nike apo EA Sports janë shprehur tepër të shqetësuar për këtë që po ndodh./abcnews.al

piatek.png
G. P.21:35 | 01/10/2018

Kampionati italian ka një protagonist të ri të golit. Nuk është ai që pritej, Cristiano Ronaldo, por një sulmues i ri polak, i quajtur Piatek.

Kombëtarja krenare ka pasur shumë ikona. Polonia mund të mburret me sulmuesit e saj të mëdhenj, që nga Vilimovski, e pastaj Lato, Bonjek apo Lewandowski. Tradita nuk mund të prishej dhe ja ku del në skenë pasardhësi.

Krzistof Piatek, 23 vjeç, ylli i ri i Genoas në Serinë A. Dy golat ndaj Frozinones bënë që ai të arrinte në kuotën 8 të rrjetave në kampionatin italian, të bëhej shënuesi më I mirë dhe të linte në hije Kristiano Ronaldon.

Piatek vjen, pra, nga Polonia, ku shkëlqeu me Zaglebien e Krakovian. Ai firmosi në 8 Qershor të këtij viti, duke i kushtuar klubi gjenovez 4 milionë euro. Shifra u duk okazion në atë kohë, ndërsa tani cilësohet falas.

Presidenti i Genoas, Preciozi, nxitoi dje të deklaronte se Piatekun pranoj ta humbas vetëm për 100 milionë euro, dhe vetëm për një klub të madh europian jashtë Italisë. Kur shënoi 4 gola në Kupën e Italisë ndaj Leçes në 11 Gusht, publiku italian dhe komentatorët televizivë kuptuan potencialin e këtij djaloshi 1.83 metra shtatlartë.

Në atë kohë, legjenda e Polonisë dhe e Juventusit, Zbignjev Bonjek, nxitoi të bënte një saktësim.

“Të nderuar telekronistë italianë, – tha ai në një video të postuar në Twiter, – emri i tij nuk shqiptohet Piatek, por Piontek, është tepër e lehtë, dhe ju lutem thuajeni saktë”.

Piatek apo Piontek, për sulmuesin kjo nuk ka asnjë rëndësi. Për të vlen ajo që bën në fushë, dhe ai e bëri që në debutimin në Serinë A, duke shënuar ndaj Empolit në 26 Gusht. Ai ka arritur në 8 gola në 6 ndeshje të kampionatit, diçka që e ka arritur për herë të fundit Karl Aage Hansen, sulmuesi danez i Atalantës në sezonin 1949-1950.

Historia me emrin Piatek apo Piontek duket se do të jetë e gjatë. Tifozët e Xhenoas duan të shijojnë çdo moment pasi e dinë mirë se një yll i tillë nuk mund të mbajë gjatë veshur fanelën e skuadrës së tyre të zemrës.

Klubi i parë i madh europian që e kërkon është Juventusi./abcnews.al

jjjj.jpg
G. P.17:41 | 20/09/2018

Juventusi luajti mbrëmë shumicën e kohës pa Ronaldon, i cili doli me karton të kuq në pjesën e parë të ndeshjes. Portugezi pritet të përballet tashmë me dënimin. Ndërsa Lioni bëri surprizën në Champions, duke mundur në shtëpi Manchester City-n.

Surpriza më e madhe e së mërkurës në Ligën e Kampionëve ishte humbja e Manchester City në shtëpi. Lyon e mundi me rezultatin  2–1 ekipin e Guardiolas që zhvilloi lojën, por nuk arriti të merrte të paktën një barazim.

Sukses 2 – 0 për Juventus në fushën e Valencia. Golat u realizuan me penallti nga Pjaniç, ndërsa Cristiano Ronaldo la fushën me karton të kuq pas gjysmë ore lojë për sjellje jo sportive.

Real Madrid fitoi 3–0 në shtëpi me Roma, ndërsa Bayern Munchen mundi me rezultatin 2–0 Benfica në Lisbonë. Sukses 3–0 i Manchester United ndaj Young Boys në Bernë.

Skuadra e Mourinho pas rezultateve në kampionat po tregon karakter edhe në Europë. Ajax mundi 3–0 AEK Athens. Tagliafico ishte më i miri në fushë duke realizuar 2 gola, njëri prej tyre spektakolar.

Shakhtar Donetsk–Hoffenheim përfundoi në barazim 2–2. Ukrainasit shmangën humbjen në fund të takimit. Me të njëjtin rezultat u mbyll përballja Viktoria Plzen 2–2 CSKA Moskva. Këto ndeshje mbyllën javën e parë të Ligën së Kampionëve./abcnews.al

juventus.jpg
ent ela19:42 | 02/09/2018

Cristiano Ronaldo vazhdon të jetë në krizë goli në Serinë A. Trajneri i Juventusit, Alegri, tregon se përse portugezi nuk po shkëlqen si në Spanjë.

Të vetmit gola i ka shënuar në stërvitje.

Cristiano Ronaldo nuk e kishte menduar se do të kalonin tri ndeshje të Serisë A, pa e gjetur rrugën e rrjetës.

Për fat të keq, ky është realiteti dhe duket sikur portugezi e ka lënë në Madrid aftësinë për të realizuar.

Pas Chievos e Lazios, ja edhe Parma nuk e lejoi, ndërsa fitorja e tretë radhazi e Juventusit u arrit me golat e të paoksidueshmit, Mario Manxhukiç dhe të francezit kampion të botës, Blaise Matuidi.

Në të kundërt, në të njëjtën mbrëmje, atë të së shtunës, Reali nuk e pati aspak të vështirë të triumfonte 4-1 ndaj Leganjesit në ligën spanjolle, edhe pa CR7-n.

Madrilenët janë me mesataren mbi 3 gola për ndeshje në fillimin e kampionatit, me Karim Benzema që duket se po zëvendëson Cristianon dhe që sipas trajnerit Lopetegui mund të arrijë në 40 gola këtë sezon.

Bashkë me sulmuesin francez, shumë efikas uellsiani Gareth Bale, por edhe kapiteni Sergio Ramos që vazhdon të mos gabojë nga pika e bardhë e penalltisë.

Çfarë po ndodh me Ronaldon?

“Seria A është një kampionat i vështirë, më i vështirë për të shënuar gola sesa La Liga, – thotë trajneri juventin, Allegri, – nuk është e lehtë që të realizosh 40 gola këtu. Gjithsesi, Ronaldo luajti një ndeshje shumë të mirë dhe e ndihmoi ekipin fuqimisht. Tani do të ketë pak më shumë kohë për të pushuar dhe për t’u përshtatur”.

Duket se mënyra e lojës në Itali është problemi kryesor, pasi në 70 vjet, vetëm Gonzalo Higuain ka arritur të shënojë më shumë se 30 rrjeta në edicion, saktësisht 36.

Në Spanjë, në të kundërt, për 20 vjet me radhë, fituesi i Këpucës së Artë ka realizuar mbi 30 rrjeta, me Messi-n që ka arritur edhe 50, dhe me Ronaldon deri në 46.

Cristiano nuk e ka tek Juvja atë ndihmë të ekipit për ta dërguar topin në rrjetë, siç e kishte në Madrid./abcnews.al

Tomas-Strakosha-1280x720.jpg
ent ela12:37 | 26/08/2018

Tomas Strakosha është në formën më të mirë të mundshme në prag të dy ndeshjeve të kombëtares në Ligën e Kombeve. Numri 1 i Lacios nuk lejoi Kristiano Ronaldon që të shënonte gol.

Portieri që ndaloi penalltinë e Paulo Dibalës vitin e kaluar, u bë barrikadë për Kristiano Ronaldon këtë herë.

Tomas Strakosha tregoi vlerat e tij duke mos lejuar portugezin “e artë” që të shënonte golin e parë në Serinë A, edhe pse luajti ndeshjen e dytë në të.

Gardiani i ri i portës, për fat, po shkon në formën e duhur, në dy ndeshjet e ekipit tonë përfaqësues në Ligën e Kombeve në shtator.

Gjithsesi, numri 2 i kombëtares shqiptare nuk mundi të ndalonte Juventusin, dhe të shpëtonte Lacion në stadiumin “Alianc Arena” të Torinos.

Ishin Miralem Pjaniç e Mario Manxhukiç që realizuan golat e suksesit 2-0 të kampionëve, që me 6 pikë në dy takime, janë në rrugë të mbarë për të ruajtur titullin e fituar 7 herë radhazi.

Strakosha ndaloi gjuajtjet e rrezikshme të Bernardeskit, dhe dy herë të Ronaldos, duke merituar lavdërime.

Lacio e nisi më mirë ndeshjen, duke krijuar dy raste për të shënuar, por nuk ia doli deri në fund, ashtu siç i ka ndodhur shpesh në fushën e një skuadre superiore në aspektin teknik dhe në përvojë.

Me siguri, kryeqytetasit kanë ndjerë edhe përkeqësimin e raportit mes trajnerit Simone Inzagi dhe presidentit Lotito, të cilët u përplasën ashpër pak ditë më parë.

Ronaldo, ndërkaq, të kërkojë tani të shënojë në ndeshjen e tretë të tij në Serinë A, ndërsa Juventusi i Masimiliano Alegrit shkon të luajë në fushën e Parmës, ekipit të sapongjitur nga kategoria. /abcnews.al

ronaldo-1.jpg
G. P.21:47 | 25/08/2018

Ndeshja Juventus-Lazio ka pasur një tifoz special këtë të enjte. Kryeministri i vendit, Edi Rama, ishte në Torino për të ndjekur ndeshjen.

Por ai nuk është mjaftuar vetëm me kaq. Në rrjetin social Facebook, Rama ka shpërndarë një foto sëbashku me yllin e bardhezinjve, Cristiano Ronaldo.

Edhe pse Juventus arriti të fitonte ndaj skuadrës së Lazios me rezultatin e ndeshjes, Cristiano Ronaldo nuk arriti të shënonte golin e parë në Serie A.

Më herët, para ndeshjes, kryeministri Edi Rama u takua me presidentin e “Zonjës së Vjetër”, Andrea Agnelli./abcnews.al

FITON-JUVENTUSI-PA-GOL-TE-RONALDOS-1280x720.jpg
ent ela22:32 | 18/08/2018

Kristiano Ronaldo nuk e bëri dot debutimin që ëndërronte në Serinë A. Ylli portugez u përpoq shumë, por nuk doli nga fusha i lumtur, edhe pse Juventusi fitoi.

Pritej shkëlqimi i tij , por heroi i Juves ishte Bernardeski.

Debutimi i Topit të Artë, Kristiano Ronaldo, ishte me fitore, por ata që prisnin shkëlqimin e tij që në start, mund të quhen të zhgënjyer.

Nuk ishte CR7-ta heroi i madh i Juventusit në suksesin tepër të vështirë në fushën e Kievos.

Kampionët e Italisë triumfuan 3-2, pasi u ndodhën në humbje 1-2, dhe dy golat vendimtarë kishin vulën e Federiko Bernardeskit.

Ronaldo, jo vetëm që nuk arriti të shënonte, por i prishi punë ekipit kur ndeshja ishte në 2-2, duke prekur me dorë një top dhe duke e bërë të pavlefshëm golin e shënuar nga Mario Manxhukiç.

Vendimi i arbitrit u mor pas përdorimit të VAR-it.

Formacioni i trajnerit Masimiliano Alegri kaloi në epërsi me golin e Kedirës, por pastaj polaku Stepinski barazoi rezultatin për Kievon.

Në pjesën e dytë Xhakerini kaloi veronezët në epërsi me penallti, dhe u duk se debutimi i Ronaldos në Serinë A do të ishte i hidhur.

Mendoi Bernardeski për ta bërë të lumtur, edhe pse goli i tij i parë jepet më shumë si autogol i Banit.

Gjithsesi, ish-ylli i Fiorentinës vendosi fatin e fitores në minutën e tretë shtesë.

Juventusi e nisi Serinë A, ashtu siç e mbylli sezonin e kaluar dhe shpreson të fitojë titullin e 8-të radhazi.

Ëndrra më e madhe, gjithsesi, mbetet fitorja e Championsit. /abcnews.al

RONALDO-INTERVISTA.mpg_snapshot_00.29-1280x720.jpg
ent ela16:19 | 11/08/2018

Kristiano Ronaldo thumbon Realin e Madridit, pak javë pas largimit nga klubi spanjoll. Ylli portugez deklaron se Juventusi është i veçantë, pasi është si një familje.

Kur ishte tek Reali, jo rrallë e keqtrajtonte ekipin ku shkoi tani.

Kristiano Ronaldo ishte bërë makthi i Juventusit, por ylli i ri i piemontezëve tashmë ka hapur një epokë të re të karrierës, dhe nuk ngurron të thumbojë të djeshmen.

Në një intervistë, që inauguroi televizionin e ri të klubit, CR7-ta shigjetoi Realin, duke lënë të nënkuptohej se Madrid nuk e kishin dashur me gjithë zemër.

“Vendimi për të ardhur këtu ishte sepse Juventusi është një klub i madh, dhe sidomos sepse këtu të gjithë janë si një familje, – u shpreh numri 7, – ishte një vendim shumë i lehtë për t’u marrë”.

Një deklaratë që nuk mbeti pa u interpretuar nga mediat spanjolle, të cilat me të drejtë e cilësuan si një kritikë ndaj ish-klubit të tij, ndaj presidentit Florentino Perez, një pjese të tifozëve dhe disa shokëve të skuadrës, përfshi kapitenin Sergio Ramos.

Ronaldo luajti për 9 vjet në Madrid duke thyer thuajse çdo rekord të klubit për numrin e golave të shënuar në total, në kampionat apo në Champions, por vazhdimisht ishte në diskutim, dhe në konflikte të brendshme.

Në intervistën për televizionin e Juventusit, Kristiano po ashtu, nuk iu shmang dot stereotipeve, me shprehje të tilla si “që kur isha i vogël ëndërroja të luaja për këtë ekip”.

Besohet se mbi 90 për qind e lojtarëve i thonë këto fjalë kur shkojnë në një skuadër të re, sidomos nëse bëhet fjalë për një klub të madh.

Kristiano Ronaldo u bë këtë verë lojtar i Juventusit, për shifrën e 100 milionë eurove, plus 12 milionë të tjera si shpërblime, ndërsa shpreson të fitojë trofe të tjera në karrierën e tij të lavdishme. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono