ronaldo

jjjj.jpg
G. P.17:41 | 20/09/2018

Juventusi luajti mbrëmë shumicën e kohës pa Ronaldon, i cili doli me karton të kuq në pjesën e parë të ndeshjes. Portugezi pritet të përballet tashmë me dënimin. Ndërsa Lioni bëri surprizën në Champions, duke mundur në shtëpi Manchester City-n.

Surpriza më e madhe e së mërkurës në Ligën e Kampionëve ishte humbja e Manchester City në shtëpi. Lyon e mundi me rezultatin  2–1 ekipin e Guardiolas që zhvilloi lojën, por nuk arriti të merrte të paktën një barazim.

Sukses 2 – 0 për Juventus në fushën e Valencia. Golat u realizuan me penallti nga Pjaniç, ndërsa Cristiano Ronaldo la fushën me karton të kuq pas gjysmë ore lojë për sjellje jo sportive.

Real Madrid fitoi 3–0 në shtëpi me Roma, ndërsa Bayern Munchen mundi me rezultatin 2–0 Benfica në Lisbonë. Sukses 3–0 i Manchester United ndaj Young Boys në Bernë.

Skuadra e Mourinho pas rezultateve në kampionat po tregon karakter edhe në Europë. Ajax mundi 3–0 AEK Athens. Tagliafico ishte më i miri në fushë duke realizuar 2 gola, njëri prej tyre spektakolar.

Shakhtar Donetsk–Hoffenheim përfundoi në barazim 2–2. Ukrainasit shmangën humbjen në fund të takimit. Me të njëjtin rezultat u mbyll përballja Viktoria Plzen 2–2 CSKA Moskva. Këto ndeshje mbyllën javën e parë të Ligën së Kampionëve./abcnews.al

juventus.jpg
ent ela19:42 | 02/09/2018

Cristiano Ronaldo vazhdon të jetë në krizë goli në Serinë A. Trajneri i Juventusit, Alegri, tregon se përse portugezi nuk po shkëlqen si në Spanjë.

Të vetmit gola i ka shënuar në stërvitje.

Cristiano Ronaldo nuk e kishte menduar se do të kalonin tri ndeshje të Serisë A, pa e gjetur rrugën e rrjetës.

Për fat të keq, ky është realiteti dhe duket sikur portugezi e ka lënë në Madrid aftësinë për të realizuar.

Pas Chievos e Lazios, ja edhe Parma nuk e lejoi, ndërsa fitorja e tretë radhazi e Juventusit u arrit me golat e të paoksidueshmit, Mario Manxhukiç dhe të francezit kampion të botës, Blaise Matuidi.

Në të kundërt, në të njëjtën mbrëmje, atë të së shtunës, Reali nuk e pati aspak të vështirë të triumfonte 4-1 ndaj Leganjesit në ligën spanjolle, edhe pa CR7-n.

Madrilenët janë me mesataren mbi 3 gola për ndeshje në fillimin e kampionatit, me Karim Benzema që duket se po zëvendëson Cristianon dhe që sipas trajnerit Lopetegui mund të arrijë në 40 gola këtë sezon.

Bashkë me sulmuesin francez, shumë efikas uellsiani Gareth Bale, por edhe kapiteni Sergio Ramos që vazhdon të mos gabojë nga pika e bardhë e penalltisë.

Çfarë po ndodh me Ronaldon?

“Seria A është një kampionat i vështirë, më i vështirë për të shënuar gola sesa La Liga, – thotë trajneri juventin, Allegri, – nuk është e lehtë që të realizosh 40 gola këtu. Gjithsesi, Ronaldo luajti një ndeshje shumë të mirë dhe e ndihmoi ekipin fuqimisht. Tani do të ketë pak më shumë kohë për të pushuar dhe për t’u përshtatur”.

Duket se mënyra e lojës në Itali është problemi kryesor, pasi në 70 vjet, vetëm Gonzalo Higuain ka arritur të shënojë më shumë se 30 rrjeta në edicion, saktësisht 36.

Në Spanjë, në të kundërt, për 20 vjet me radhë, fituesi i Këpucës së Artë ka realizuar mbi 30 rrjeta, me Messi-n që ka arritur edhe 50, dhe me Ronaldon deri në 46.

Cristiano nuk e ka tek Juvja atë ndihmë të ekipit për ta dërguar topin në rrjetë, siç e kishte në Madrid./abcnews.al

Tomas-Strakosha-1280x720.jpg
ent ela12:37 | 26/08/2018

Tomas Strakosha është në formën më të mirë të mundshme në prag të dy ndeshjeve të kombëtares në Ligën e Kombeve. Numri 1 i Lacios nuk lejoi Kristiano Ronaldon që të shënonte gol.

Portieri që ndaloi penalltinë e Paulo Dibalës vitin e kaluar, u bë barrikadë për Kristiano Ronaldon këtë herë.

Tomas Strakosha tregoi vlerat e tij duke mos lejuar portugezin “e artë” që të shënonte golin e parë në Serinë A, edhe pse luajti ndeshjen e dytë në të.

Gardiani i ri i portës, për fat, po shkon në formën e duhur, në dy ndeshjet e ekipit tonë përfaqësues në Ligën e Kombeve në shtator.

Gjithsesi, numri 2 i kombëtares shqiptare nuk mundi të ndalonte Juventusin, dhe të shpëtonte Lacion në stadiumin “Alianc Arena” të Torinos.

Ishin Miralem Pjaniç e Mario Manxhukiç që realizuan golat e suksesit 2-0 të kampionëve, që me 6 pikë në dy takime, janë në rrugë të mbarë për të ruajtur titullin e fituar 7 herë radhazi.

Strakosha ndaloi gjuajtjet e rrezikshme të Bernardeskit, dhe dy herë të Ronaldos, duke merituar lavdërime.

Lacio e nisi më mirë ndeshjen, duke krijuar dy raste për të shënuar, por nuk ia doli deri në fund, ashtu siç i ka ndodhur shpesh në fushën e një skuadre superiore në aspektin teknik dhe në përvojë.

Me siguri, kryeqytetasit kanë ndjerë edhe përkeqësimin e raportit mes trajnerit Simone Inzagi dhe presidentit Lotito, të cilët u përplasën ashpër pak ditë më parë.

Ronaldo, ndërkaq, të kërkojë tani të shënojë në ndeshjen e tretë të tij në Serinë A, ndërsa Juventusi i Masimiliano Alegrit shkon të luajë në fushën e Parmës, ekipit të sapongjitur nga kategoria. /abcnews.al

ronaldo-1.jpg
G. P.21:47 | 25/08/2018

Ndeshja Juventus-Lazio ka pasur një tifoz special këtë të enjte. Kryeministri i vendit, Edi Rama, ishte në Torino për të ndjekur ndeshjen.

Por ai nuk është mjaftuar vetëm me kaq. Në rrjetin social Facebook, Rama ka shpërndarë një foto sëbashku me yllin e bardhezinjve, Cristiano Ronaldo.

Edhe pse Juventus arriti të fitonte ndaj skuadrës së Lazios me rezultatin e ndeshjes, Cristiano Ronaldo nuk arriti të shënonte golin e parë në Serie A.

Më herët, para ndeshjes, kryeministri Edi Rama u takua me presidentin e “Zonjës së Vjetër”, Andrea Agnelli./abcnews.al

FITON-JUVENTUSI-PA-GOL-TE-RONALDOS-1280x720.jpg
ent ela22:32 | 18/08/2018

Kristiano Ronaldo nuk e bëri dot debutimin që ëndërronte në Serinë A. Ylli portugez u përpoq shumë, por nuk doli nga fusha i lumtur, edhe pse Juventusi fitoi.

Pritej shkëlqimi i tij , por heroi i Juves ishte Bernardeski.

Debutimi i Topit të Artë, Kristiano Ronaldo, ishte me fitore, por ata që prisnin shkëlqimin e tij që në start, mund të quhen të zhgënjyer.

Nuk ishte CR7-ta heroi i madh i Juventusit në suksesin tepër të vështirë në fushën e Kievos.

Kampionët e Italisë triumfuan 3-2, pasi u ndodhën në humbje 1-2, dhe dy golat vendimtarë kishin vulën e Federiko Bernardeskit.

Ronaldo, jo vetëm që nuk arriti të shënonte, por i prishi punë ekipit kur ndeshja ishte në 2-2, duke prekur me dorë një top dhe duke e bërë të pavlefshëm golin e shënuar nga Mario Manxhukiç.

Vendimi i arbitrit u mor pas përdorimit të VAR-it.

Formacioni i trajnerit Masimiliano Alegri kaloi në epërsi me golin e Kedirës, por pastaj polaku Stepinski barazoi rezultatin për Kievon.

Në pjesën e dytë Xhakerini kaloi veronezët në epërsi me penallti, dhe u duk se debutimi i Ronaldos në Serinë A do të ishte i hidhur.

Mendoi Bernardeski për ta bërë të lumtur, edhe pse goli i tij i parë jepet më shumë si autogol i Banit.

Gjithsesi, ish-ylli i Fiorentinës vendosi fatin e fitores në minutën e tretë shtesë.

Juventusi e nisi Serinë A, ashtu siç e mbylli sezonin e kaluar dhe shpreson të fitojë titullin e 8-të radhazi.

Ëndrra më e madhe, gjithsesi, mbetet fitorja e Championsit. /abcnews.al

RONALDO-INTERVISTA.mpg_snapshot_00.29-1280x720.jpg
ent ela16:19 | 11/08/2018

Kristiano Ronaldo thumbon Realin e Madridit, pak javë pas largimit nga klubi spanjoll. Ylli portugez deklaron se Juventusi është i veçantë, pasi është si një familje.

Kur ishte tek Reali, jo rrallë e keqtrajtonte ekipin ku shkoi tani.

Kristiano Ronaldo ishte bërë makthi i Juventusit, por ylli i ri i piemontezëve tashmë ka hapur një epokë të re të karrierës, dhe nuk ngurron të thumbojë të djeshmen.

Në një intervistë, që inauguroi televizionin e ri të klubit, CR7-ta shigjetoi Realin, duke lënë të nënkuptohej se Madrid nuk e kishin dashur me gjithë zemër.

“Vendimi për të ardhur këtu ishte sepse Juventusi është një klub i madh, dhe sidomos sepse këtu të gjithë janë si një familje, – u shpreh numri 7, – ishte një vendim shumë i lehtë për t’u marrë”.

Një deklaratë që nuk mbeti pa u interpretuar nga mediat spanjolle, të cilat me të drejtë e cilësuan si një kritikë ndaj ish-klubit të tij, ndaj presidentit Florentino Perez, një pjese të tifozëve dhe disa shokëve të skuadrës, përfshi kapitenin Sergio Ramos.

Ronaldo luajti për 9 vjet në Madrid duke thyer thuajse çdo rekord të klubit për numrin e golave të shënuar në total, në kampionat apo në Champions, por vazhdimisht ishte në diskutim, dhe në konflikte të brendshme.

Në intervistën për televizionin e Juventusit, Kristiano po ashtu, nuk iu shmang dot stereotipeve, me shprehje të tilla si “që kur isha i vogël ëndërroja të luaja për këtë ekip”.

Besohet se mbi 90 për qind e lojtarëve i thonë këto fjalë kur shkojnë në një skuadër të re, sidomos nëse bëhet fjalë për një klub të madh.

Kristiano Ronaldo u bë këtë verë lojtar i Juventusit, për shifrën e 100 milionë eurove, plus 12 milionë të tjera si shpërblime, ndërsa shpreson të fitojë trofe të tjera në karrierën e tij të lavdishme. /abcnews.al

cr77-1280x720.jpg
ent ela18:51 | 10/07/2018

Kristiano Ronaldo nis një epokë tjetër të madhe në karrierën e tij. Transferimi i tij tek Juventusi pritet të jetë një sukses i madh sportiv dhe financia.

Nëntë vjet më parë ishte ylli i rruzullit.

Plot 85 000 tifozë mbushën plot e përplot “Santiago Bernabeun” për të parë Kristiano Ronaldon me fanelën e Realit.

U vendos rekordi botëror prej 94 milionë eurosh, dhe nisi një epokë e jashtëzakonshme, që sot mbërriti në fund, pasi Ronaldo kaloi zyrtarisht tek Juventusi.

Reali i Madridit pranoi 105 milionë euro dhe ra dakord që të mbetej pa yllin ndoshta më të madh të historisë së tij, i cili nuk dëshironte më të qendronte.

CR7-ta, pas 4 golave për Portugalinë në Kupën e Botës në Rusi, vendosi për etapën e madhe të radhës, dhe besohet të fundit në karrierë, ndërsa do të fitojë 120 milionë euro në 4 sezone.

Kur të përfundojë kjo kontratë, ylli portugez do të jetë 37 vjeç, por me ambicien që ka, është krejt normale që të luajë në nivele të larta deri në atë moshë.

Për momentin, Kristiano ndodhet me pushime në Greqi, për t’u shlodhur pas një sezoni tepër të gjatë dhe tepër të lodhshëm, në të cilin fitoi Championsin, por dështoi në ligën spanjolle dhe në Botëror.

Juventusi e ka nisur ndërkaq stërvitjen nën drejtimin e trajnerit Alegri, por Ronaldo do të mbetet me pushime deri të dielën.

Në Greqi udhëtoi vetë presidenti i Juventusit, Andrea Anjeli, që mesa duket i dha fund marrëveshjes me portugezin.

Superylli me numrin 7 nuk harroi të botonte një letër të hapur për tifozët madrilenë, ku I falenderoi për mbështetjen, dhe i siguroi se vitet në Madrid kishin qenë ndoshta më të lumturat në jetën e tij.

Me Realin shënoi 450 gola në 438 ndeshje, si dhe fitoi 16 trofe të mëdhenj, përfshi 4 Champions.

Po ashtu, fitoi 4 Topa të Artë me fanelën “merenges” nga 5 gjithsej në karrierë.

Juventusi është i bindur se biznesi me Ronaldon do të jetë me fitim, pavarësisht shpenzimit të 225 milionë eurove në 4 vjet.

Pritet që Kristiano të jetë imazhi i Ferrarit, ndërsa të rriten të ardhurat e klubit nga e drejta televizive, biletat, sponsorët dhe shitja e fanelave në të gjithë botën. /abcnews.al

messi-ronaldo.jpg
ent ela15:17 | 01/07/2018

Jehonë e madhe mediatike pas eleminimit të Argjentinës dhe Portugalisë. Kristiano Ronaldo, ndërkaq, e lë të paqartë të ardhmen e tij në kombëtare.

Dy superfuqi më pak. Argjentina nënkampione e botës, dhe Portugalia kampione e Europës, ishin viktimat e tjera, pak ditë pas Gjermanisë kampione të botës.

Lionel Mesi nuk preferoi të fliste për mediat pas disfatës. Kristiano Ronaldo, ndërkaq, pranoi me shumë sportivitet.

Ronaldo: “Dua të përgëzoj Uruguajin për fitoren. Ia doli sepse shënoi më shumë gola se ne. Sipas mendimit tim, luajtëm më mirë sesa Uruguaji, krijuam më shumë raste, por ky është futbolli. Kush shënon më shumë gola, fiton. Në tërësi, bëmë një Botëror të mirë dhe unë si kapiten jam krenar për këtë ekip. Nuk është momenti për të folur për të ardhmen time, do të vijë koha, por unë jam I sigurt që Portugalia do të vazhdojë të jetë ndër më të mirat në botë”.

E ardhmja e Mesit dhe e Ronaldos në ekipet kombëtare, është mister, ndërsa nuk dihet as se çfarë do të ndodhë me trajnerin argjentinas.

Sampaoli: “Është një humbje e hidhur, edhe pse nuk është paraqitja më e keqe e Argjentinës në kupat e botës. Ne bëmë gjithçka, por nuk ia dolëm. Jam i tronditur dhe i turbulluar pas kësaj që ndodhi, por sot nuk është dita për të folur për të ardhmen time tek Argjentina”.

Nuk mund të mungonte jehona mediatike.

Në Spanjë, “El Mundo Deportivo: Lamtumirë kampionë!

“Marka”: Mesi dhe CR7, nokaut! Mbape është superylli!

Në Portugali, “A Bola”: Ëndërr e shuar, dygolëshi i Kavanit kthen seleksionin në shtëpi!

“Rekord”: Rënia e kampionit! Dy gola të Kavanit shuajnë ëndrrën portugeze! Mbape rrëzon Mesin!

“O Zhogo”: Fundi i ëndrrës, shoqëruar me një foto të Ronaldo, me kokën ulur pas eleminimit

“Publiko” po në Portugali: Lamtumirë Portugali! Ronaldo dhe Mesi jashtë Botërorit të Rusisë në të njëjtën ditë!

“Los Andes” në Argjentinë: Argjentina e eleminuar dhe e detyruar që të ngrihet sërish në këmbë, me foton e Mesit të gjunjëzuar, në kopertinë

“Una” po në Argjentinë: E ardhmja është një mister! Mesi nuk luajti mirë, ndërsa humbja mund të jetë fundi i ciklit për disa yje! /abcnews.al

mesi-e-ronaldo.jpg
ent ela12:47 | 01/07/2018

Mesi dhe Ronaldo pësuan një tjetër dështim në kupat e botës. Dy lojtarët më të mirë në botë kanë pasur fat të ngjashëm në karrierë, dhe mesa duket nuk do ta fitojnë kurrë një titull botëror.

U mundën në të njëjtën ditë, si të ishin vëllezër siamezë. Lionel Mesi e Kristiano Ronaldo dolën nga Botërori këtë të shtunë, dhe nuk dihet nëse do ta fitojnë ndonjë herë kupën e artë të FIFA-s.

Njëri 31 vjeç e tjetri 33 po i afrohen fundit të dy prej karrierave më të lavdishme në histori, me vetëm një njollë, pa titull botëror. Franca e Uruguaj sikur thanë se turneu rus është kaq i mirë, sa nuk ka nevojë as për më të mirët në rruzull.

Të dy superyjet që kanë dominuar dekadën, kanë pasur po ashtu fat të njëjtë, në botërorët e kaluar, gjithnjë të keq. Në 2006, Argjentina dhe Mesi u eleminuan me penallti nga Gjermania vendase, në çerekfinale.

Në 2010, ishte sërish Gjermania që mposhti kombëtaren e drejtuar nga Maradona, me Mesin yllin kryesor, këtë herë plot 4-0. Katër vjet më vonë, fatale për Mesin u bë edhe një herë Gjermania.

Gjithsesi, argjentinasit arritën deri në finale dhe ishin më pranë se kurrë me titullin, veçse gjermanët superiorë fituan në fund. Ronaldo po ashtu ka luajtur në 4 botërorë, ashtu si Mesi.

Në 2006, Portugalia shumë e mirë e Dekos, Luis Figos e Ronaldos, u mund 1-0 nga Franca e Zidanit. Në Botërorin e Afrikës së Jugut në 2010, rruga e Ronaldos u pre nga Spanja e madhe, që fitoi edhe titullin. David Vija përcaktoi ndeshjen e turit të dytë.

Së fundi, në 2014, portugezët ishin më të dobët, duke u eleminuar në grup, pas humbjes me Gjermaninë 0-4, barazimit 2-2 me SHBA-në, e pavarësisht fitores 2-1 ndaj Ganës. /abcnews.al

NDESHJA-URUGUAJ-PORTUGALI-1280x720.jpg
ent ela09:07 | 01/07/2018

Është Uruguaji çerekfinalisti i dytë i Botërorit. Mundi 2-1 Portugalinë e Kristiano Ronaldos, falë dy golave të sulmuesit Edinson Kavani

Botërori nuk do t’i ketë më, dy më të mirët e Botës.

Pas Lionel Mesit, i erdhi radha Kristiano Ronaldos të dorëzohej e të largohej para kohe.

Superylli i Realit të Madridit, u eleminua bashkë me Portugalinë e tij, dhe në çerekfinale kaloi Uruguaji.

Në një sfidë shumë të fortë në stadiumin e Soçit, më të fortë sesa ajo Francë-Argjentinë, të dyja skuadrat ishin pranë e parë, dhe u ndalë vetëm nga një gol.

Fitoi Uruguaji 2-1, falë dy goditjeve të Edinson Kavanit, njërit prej sulmuesve më të mirë të botës, që luan për Paris SG.

Uruguaji e nisi ndeshjen ashtu siç donte duke shënuar shpejt, dhe më pas u mbështet tek mbrojtja, një nga armët e tij më të forta në këtë Botëror.

Falë bashkëpunimit të mesfushorëve me mbrojtësit, arriti të bllokonte kampionët e Europës në pjesën më të madhe të kohës.

Portugalia luftoi shumë dhe arriti të barazonte me anë të mbrojtësit Pepe, në një sfidë ku Ronaldo u mbulua shumë mirë dhe nuk arriti të bënte diferencën.

Mbrojtja uruguajane e udhëhequr nga kapiteni Godin, fitoi thuajse çdo duel me të.

Turi I dytë ka nisur me shumë gola. Uruguaji e Portugalia nuk arritën deri në 7, si takimi I mëparshëm Francë-Argjentinë, por edhe 3 nuk ishin pak. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono