Romelu Lukaku

Lukaku.png
Igli Nikolli16:06 | 23/12/2019

Transferimi tek Interi i ka bërë shumë mirë Romelu Lukakut. Bomberi belg ka shënuar 14 gola deri në këtë fazë të sezonit dhe paraqitjet e tij kanë qenë shumë pozitive.

Sulmuesi ka dhënë një prononcim interesant për New York Times, aty ku flet për cilësitë e tij dhe kalimin tek Interi. Lukaku analizon edhe Serie A, teksa zbulon se çfarë i tha Cristiano Ronaldo në lidhje me këtë kampionat specifik.

CILËSITË – “Kam një driblim të mirë dhe ia dal të lë pas kundërshtarin. Më kujtohet një koment i një gazetari në Angli. U shpreh se United nuk duhet të më kishte blerë, sepse nuk isha një lojtar inteligjent. Emra si Henry, Rashford, Martial dhe Anelka, janë cilësuar si lojtarë teknikë dhe cilësorë. Disa lojtarë shihen gjithmonë me një sy të veçantë”.

INTER – “Erdha tek Interi, sepse doja të nisja gjithçka nga zero dhe të rregulloja reputacionin tim. Nuk mbaj mëri ndaj kampionatit anglez, Britania është treguar e mirë me mua”.

SERIE A – “Ronaldo më ka thënë se është kampionati më mbrojtës dhe i fortë në botë. Më tregoi se ka shënuar kudo, por në Itali ka hasur vështirësitë më të mëdha për të gjetur golin. Kur mendon kështu një lojtar i tillë, i bie të jetë realisht shumë i vështirë. Është kampionat më i komplikuar se Premier League. Në ishull ka shumë intensitet, por këtu luhet një futboll komplet tjetër”.

RACIZMI – “Jam përballur shumë herë me situatat e racizmit, por arrij ta çliroj në fushë zemërimin e krijuar”. /abcnews.al

Lukaku.png
Igli Nikolli18:36 | 21/12/2019

Antonio Conte kërkoi me insistim fitimin e ndeshjes me Genoan dhe mbylljen e vitit në krye të Serie A bashkë me Juventusin. Ashtu po ndodh dhe zikaltrit kanë shënuar dy gola të shpejtë në stadiumin e tyre.

Romelu Lukaku ka zhbllokuar ndeshjen në minutën e 31-të, duek gjetur golin e 11-të në kampionat. Belgu shfrytëzoi një kros të Candrevas dhe shënoi me kokë. Zikaltrit nuk u ndalën dhe shënuan një tjetër gol.

Kësaj radhe ishte Gagliardini autori. Mesfushori dyfishoi dy minuta më vonë. Lukaku dhuroi një asist në zonë dhe 25-vjeçari italian dërgoi topin në rrjetë. Avantazh i dyfishtë për ekipin e Contes dhe ndeshja mund të konsiderohet praktikisht e mbyllur. /abcnews.al

Lukaku.jpg
Klejdi Kaimi12:51 | 11/12/2019

Inter nuk arriti dot të kualifikohej për në raundin tjetër në Champions League, pas humbjes së djeshme në ‘San Siro’ me Barcelonën. Shpresat ishin të mëdha për zikaltrit, duke parë dhe formacionin që trajneri Valverde kishte zgjedhur. Gjithsesi vendasit i zhgënjyen tifozët.

Klubi nga Milano e mbylli grupin në vendin e tretë, çka do të thotë kalimi në fazën tjetër në Europa League. Direkt pas ndeshjes sulmuesi i Interit, Romelu Lukaku, është vënë në lojë nga ish-shokët e tij të Manchester United.

Mbrojtësi i ‘djajve të kuq’, Luke Shaw, në një postim në ‘Twitter’ i uron mirëseardhjen belgut në Europa League. Postimi i anglezit u bë viral në rrjetet sociale, ku tifozët e Manchesterit nuk nguruan për ta shpërndarë. United e ka siguruar kalimin për në fazën tjetër të kompeticionit, ku pritet që nesër të zhvillojnë ndeshjen e fundit me Az Alkmaar në ‘Old Trafford’. /abcnews.al

Lukaku.jpg
Klejdi Kaimi13:15 | 05/12/2019

Romelu Lukaku është më i lumtur se kurrë tek Interi. Që nga transferimi i tij këtë verë nga Manchester United në Milano, sulmuesi është rikthyer të jetë protagonist me lojën dhe golat e tij. Këtë fakt e shpreh dhe trajneri i Belgjikës, Roberto Martinez, i cili tregon se Lukaku ka rilindur tek Interi.

”Duket qartazi marrëdhënia shume e mirë e tij me Conten. Transferimi tek zikaltrit i ka bërë shumë mirë Lukakut. Po flasim për një lojtar të madh. Si kur luan për Belgjikën si për Interin, Romelu jep maksimumin e tij. Është e vërtetë që në muajt e fundit tek United ai nuk ishte më i lumtur. Tashmë ai ndihet i lumtur pasi e konsideron veten të rëndësishëm për ekipin e tij,” deklaron Martinez për ‘Corriere dello Sport’.

26-vjeçari duket se është përshtatur shumë shpejt me kampionatin italian. Në sezonin e tij të parë në Seria A, sulmuesi belg numëron 10 gola në 14 ndeshje. Besimi dhe marrëdhënia shumë e mirë me trajnerin Conte, e ka rikthyer dhe një herë Lukakun në qendër të vëmendjes. /abcnews.al

Lukaku-1.png
Igli Nikolli18:44 | 29/11/2019

“Gjatë ndeshjes pati dy raste kur tifozët kryen kore raciste kundrejt meje. Këta tifozë po sillen keq dhe janë një shembull negativ për fëmijët e vegjël. Shpresoj që UEFA të bëjë diçka, sepse i gjithë stadiumi u soll në atë mënyrë pas golit të parë të Lautaros. Do të reagoj nëse dëgjoj përsëri kore raciste në të ardhmen”, u shpreh Romelu Lukaku pas ndeshjes përballë Slavia Prague.

Interi ia doli të triumfonte 1-3 dhe siguroi tre pikë shumë të rëndësishme për ecurinë në Champions League. UEFA vendosi të mos hapte asnjë hetim dhe vendimin e saj e shpjegoi me faktin që arbitri dhe delegati i ndeshjes nuk kishin dëgjuar asnjë kor.

Tani ka ardhur edhe reagimi i klubit çek. Slavia Prague nuk ka dashur të nxitohet, ka analizuar me detjae pamjet, por nuk ka arritur të gjejë ndonjë gabim të tifozëve të saj. Klubi çek ka postuar një komunikatë në rrjetet sociale dhe pret ndjesën e sulmuesit zikaltër.

Hedhim poshtë çdo akuzë në lidhje me koret raciste në stadiumin tonë. Kemi analizuar imtësisht të gjithë pamjet dhe asgjë nuk konfirmon deklaratën e Lukakut. Do të ishte e përshtatshme që lojtari të na kërkonte falje për deklaratën e bërë“, shkruhet në deklaratën e Slavia Prague. /abcnews.al

Lukaku-1.png
Igli Nikolli22:16 | 28/11/2019

Koret raciste nuk munguan në ndeshjen Slavia Prague-Inter dhe Romelu Lukaku ishte shënjestra e tifozëve çekë. Sulmuesi belg zbuloi gjithçka pas ndeshjes, theksoi se në dy raste mbështetësit e Slavias nuk i kishin kursyer koret e tyre dhe i bëri thirrje UEFA-s të reagojë.

Qeveria europiane e futbollit ka marrë një vendim në lidhje më këtë situatë. Gazzetta dello Sport raporton se UEFA nuk do të hapë asnjë hetim. Shkaku? Arbitri dhe delegati i ndeshjes nuk kanë dëgjuar asgjë, kështu që kjo ngjarja aspak e këndshme kalon pa asnjë “ndëshkim”.

Racizmi është shtuar shumë këtë sezon në futboll dhe në stadiume dhe lojtarët me ngjyrë bien pre e koreve dhe provokimeve të tifozëve të ndryshëm. Një çështje delikate që po i shqetëson të gjithë, teksa palët janë të ndarë nëse lojtarët duhet të largohen nga fusha në situata të tilla apo jo. /abcnews.al

Lukaku-Martinez.png
Igli Nikolli17:30 | 28/11/2019

Lautaro Martinez dhe Romelu Lukaku i dhuruan një fitore shumë të rëndësishme Interit mbrëmjen e kaluar. Ekipi i Antonio Contes mposhti 1-3 Slavia Prague në Çeki dhe tani i mjafton një fitore në “San Siro” përballë Barcelonës për t’u kualifikuar më tej në Champions League.

Argjentinasi shënoi dy gola, ndërsa bomberi belg shënoi golin tjetër dhe i dhuroi kolegut të repartit dy asiste. Racizmi nuk mungoi në këtë përballje dhe Lukaku ishte “objektivi” i tifozëve çekë. Sulmuesi i Interit tregon gjithçka ndodhi në një prononcim për Esporte Interativo dhe i bën thirrje UEFA-s të ndërhyjë.

Gjatë ndeshjes pati dy raste kur tifozët kryen kore raciste kundrejt meje. Kjo nuk është një gjë e mirë, jemi në vitin 2019 dhe ka shumë lojtarë nga kombësi të ndryshme nëpër skuadra. Këta tifozë po sillen keq dhe janë një shembull negativ për fëmijët e vegjël. Shpresoj që UEFA të bëjë diçka, sepse i gjithë stadiumi u soll në atë mënyrë pas golit të parë të Lautaros. Do të reagoj nëse dëgjoj përsëri kore raciste në të ardhmen“, përfundon sulmuesi i ekipit zikaltër. /abcnews.al

Lukaku-2.png
Igli Nikolli16:37 | 24/11/2019

Interi fitoi lehtësisht kundër Torinos të shtunën. Ekipi zikaltër triumfoi në transfertë me rezultatin 0-3 dhe vazhdon të ndjekë këmba-këmbës kryesuesit e Juventusit. Romelu Lukaku shënoi golin e tretë, duke u ngjitur në shifrën e dhjetë realizimeve në 13-të ndeshje të zhvilluara në Serie A.

Ecuri shumë e mirë e sulmuesit belg dhe të gjithë janë të kënaqur me rendimentin e tij. Rekord i 26-vjeçarit, i cili arrin shifrën e dyfishtë të golave për të tetin sezon rresht. Jo vetëm kaq, pasi Lukaku ka bërë më mirë se Mauro Icardi dhe Diego Milito.

I pari nuk arriti shifrën e dhjetë golave në sezonin e parë zikaltër, ndërsa “Princit” iu deshën 16 ndeshje për të arritur diçka të tillë. Conte dhe populli interist janë të lumtur me Lukakun dhe shpresojnë që “gjiganti” i sulmit të vijojë me këtë ecuri fantastike. /abcnews.al

Lukaku.png
Igli Nikolli08:14 | 18/11/2019

Romelu Lukaku vazhdon të shënojë. Në fitoren 1-4 kundër Rusisë, sulmuesi i Interit shënoi golin e katërt dhe është ngjitur në kuotën e 53 golave të shënuar në 84 ndeshje të zhvilluar me Belgjikën.

Rrjetat e tij nuk surprizojnë më askënd, në ndryshim nga gjesti i fundit. Nesër zhvillohet ndeshja e fundit e fazës eliminatore të Euro 2020 dhe Belgjika do ta mbyllë në shtëpi kundër Qipros.

Lukaku ka vendosur t’u paguajë 5 mijë tifozëve biletën e ndeshjes. E kishte premtuar diçka të tillë dhe do e mbajë fjalën. Gjest shumë i bukur që konfirmon zemrën e madhe të sulmuesit 26-vjeçar. /abcnews.al

Inter.png
Igli Nikolli19:41 | 02/11/2019

Vetëm 16 minuta ka zgjatur avantazhi i Bolognës. Interi nuk mund ta pranonte një rezultat të tillë dhe është hedhur në sulm për të gjetur golin. Zikaltrit ia kanë dalë dhe autori i golit është Romelu Lukaku.

Sulmuesi belg dërgoi në rrjetë topin në minutën e 75-të. Insistimi i madh i ekipit të Contes u konkretizua nga Lukaku, i cili barazoi shifrat dhe gjeti golin e tetë në Serie A. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono