refugjate

turqia.jpg
G. P.13:56 | 11/09/2019

Trefishohet numri i refugjatëve të cilët largohen nga bregu lindor i Turqisë për në Greqi. Refugjatët shprehen se e kanë të pamundur të jetojnë në Turqi, ndërsa presidenti Erdogan deklaron se nëse nuk merr buxhetin e premtuar nga Bashkimi Europian, atëherë do të hapë rrugën e refugjatëve drejt Europës.

Jelekë shpëtimi, këpucë dhe pantallona të braktisura; janë këto të dhënat nisjeve drejt Europës që nga bregu lindor i Turqisë. Lundrimet me varka, të cilat në vitin 2015 shkaktuan me dhjetëra viktima në ujërat e Egjeut, po rikthehen sërish nga refugjatë të cilët nuk duan të rikthehen në shtëpitë e tyre, por as nuk mund të jetojnë më në Turqi.

Sipas shoqatave jofitimprurëse që nga muaji Korrik është dyfishuar numri i atyre që duan të lundrojnë drejt Greqisë. Shumë preh refugjatëve vijnë nga Stambolli, pasi gjatë verës qeveria turke deklaroi se ata që nuk ishin të regjistruar në qytet duhej të largoheshin.

Presidenti turk Erdogan këmbëngul për një mbështetje ndërkombëtare për sa i përket projektit të tij për krijimin e një zone sigurie në Siri. Në këtë mënyrë ai mendon se do të jetë e mundur rikthimi në atdhe i 1 milion sirianëve. Por në rast të kundërt, ai kërcënon se do hapë rrugën në mënyrë që emigrantët të mbërrijnë në Bashkimin Europian.

Presidenti turk këmbëngul se është ende në pritje të buxhetit që i është premtuar nga Bashkimi Europian për t’u përballur me flukset e emigrantëve. Ai u shpreh se Turqia ka bërë pjesën e saj të marrëveshjes, por nuk ka marrë ende asgjë./ABC News Albania 24/7

hasan.jpg
Sej rie18:15 | 13/07/2019

Atletja Sifan Hasan vendos një rekord të ri botëror në garën e miljes, në garën e zhvilluar në Montekarlo. Refugjatja nga Etiopia po shkëlqen me fanellën e Holandës. Ajo sot është 26 vjeç, në kulmin e formës.

Nuk ka qenë gjithnjë kaq bukur për Sifan Hasanin, atleten që përfaqëson Holandën dhe që theu rekordin e miljes ditën e djeshme në mitingun e Ligës së Diamantit në Montekarlo.

Lindur në Etiopi në 1993, ajo e braktisi atdheun si refugjate në 2008-ën, si 15-vjeçare, kuptohet në kërkim të një jete më të mirë.

Iu deshën 5 vjet për të marrë nënshtetësinë holandeze, diçka që iu lehtësua ndoshta edhe nga fakti se ajo ishte atlete e nivelit të lartë.

Që nga ajo kohë, ka fituar 13 medalje ndërkombëtare për Holandën, nga të cilat 7 të arta, 3 të argjendta e 3 bronzi.

Në Montekarlo, Sifan Hasani vendosi rekordin e ri botëror në milje (afërsisht 1 600 metra) me kohën 4’12”33, duke thyer rekordin e famshëm të ruses Svetlana Masterkova, kampione olimpike në vitin 1996 me 4’12”56.

Fillimi I garës nga ana e saj nuk ishte edhe aq i shpejtë, dhe Sifani nuk besoi se mund ta thyente rekordin, por në gjysmën e dytë ishte me më shumë ritëm.

Ajo krijoi pak nga pak diferencë nga rivalja Gudaf Cegai, duke u shkëputur e duke luftuar më pas me veten dhe me rekordin.

Prej vitesh askush nuk I ishte afruar kohës së Masterkovës, por tashmë gjithçka ndryshoi.

Vajza me origjinë nga Etiopia ka thyer edhe rekordin evropian të 3 000 metrave si dhe rekordin evropian të gjysmë maratonës./ABC News Albania 24/7

refugjate.jpg
G. P.08:13 | 20/06/2019

Ish-Presidenti Christian Wulff i ka paralajmëruar gjermanët të mos i zbavisin qarqet e ekstremit të djathtë. Ai tha se mbërritja e refugjatëve në kulmin e krizës së migrimit mund të jetë e rëndësishme sa ribashkimi.

Ish-presidenti Christian Wulff tha se kriza e refugjatëve e vitit 2015 mund të rezultojë e rëndësishme dhe e dobishme për vendin, bëri të ditur të mërkurën agjensia e lajmeve DPA.

“Shanset janë të mëdha që vërshimi i refugjatëve të kthehet në një moment fati në historinë gjermane”, tha Wulffi në një fjalim të martën në mbrëmje. Ai e përshkroi bashkimin e Gjermanisë në vitet 1990 si një moment të ngjashëm të fatit të mirë.

Ai tha se Gjermania është në një gjendje shumë më të mirë se sa e kuptojnë shumë vetë. Ish-Presidenti paralajmëroi që të mos zbavitet ekstremizmi i krahut të djathtë. Ai tha se vija që ndan patriotizmin dhe nacionalizmin nuk duhet të bëhet e paqartë. Christian Wulffi e ka mbështetur vendimin e Kancelares Angela Merkel për të hapur kufijtë e Gjermanisë ndaj refugjatëve që iknin prej luftës.

 Christian Wulff
Moment vendimtar

Në kulmin e krizës së refugjatëve, Wulffi u kërkoi shteteve anëtare të BE të strehonin ata që iknin nga lufta dhe varfëria e skajshme: “Nuk duhet të jetë problem për 500 milionë europianë që të pranojnë 3 milionë refugjatë”, deklaroi Christian Wulff.

Në vitin 2015, Gjermania lejoi gati 900.000 emigrantë të hyjnë në Gjermani me politikën e dyerve të hapura të kancelares Angela Merkel. Shumë prej tyre iknin nga lufta dhe nga varfëria ekstreme në Lindjen e Mesme, Azi dhe Afrikë.

Partitë euroskeptike, partitë e krahut të djathtë dhe ato ultra të djathta fituan mbështetje gjatë krizës. Ata që përfituan qenë edhe presidenti hungarez Viktor Orban dhe kancelari austriak Sebastian Kurz, që pretenduan se kjo minon strukturën shoqërore të kontinentit. Georg Pazderski i partisë ultra të djathtë Alterrnativa për Gjermaninë (AfD), i kritikoi komentet e Wulffit. Në rrjetin e twitterit ai shkroi se ish-Presidenti kishte humbur kontaktin me realitetin./DW

refugees.jpg
G. P.08:19 | 16/04/2019

Për refugjatët, që duan të shkojnë në Evropën Qendrore nga Greqia, po bëhet gjithnjë e më vështirë. Ata flasin për dhunë policore e arrestime arbitrare. Megjithatë janë mijëra vetë ata që e provojnë rrugën e rrezikshme.

Në fillim të prillit, policia greke përdori në afërsi të Selanikut, në Greqinë Veriore gaz lotsjellës, për t’i penguar migrantët që të merrnin rrugën për në Maqedoninë e Veriut. Objektivi i migrantëve: Evropa Qendrore dhe Perëndimore. Motivimi i tyre: një sërë lajmesh false në mediet sociale, sipas të cilave qenë hapur kalimet kufitare për në Maqedoninë e Veriut dhe për në Shqipëri. Rreth 2000 vetë i besuan kësaj thashethemeje dhe u nisën në drejtim të Veriut të Greqisë. Pas tri ditësh, edhe migrantët e fundit hoqën dorë dhe u kthyen në strehimet e tyre.

Një pjesë e madhe e rreth 70.000 migrantëve, që qëndrojnë në Greqi dhe në Ballkanin Perëndimor, duan të vazhdojnë rrugën në drejtim të Veriut – dhe ndodhen para një sërë pengesash. Maqedonia e Veriut dhe Hungaria ngritën para pak vitesh gardhe me tela me gjemba në kufijtë jugorë të vendit. Bullgaria njihet për mënyrën e ashpër të veprimit ndaj migrantëve. Kjo bëri që të krijohej një itinerar alternativ ballkanik.

Pikënisja e këtij itinerari është edhe më tej Greqia. Sipas Organizatës Ndërkombëtare për Migrimin të Kombeve të Bashkuara (IOM) atje qëndrojnë rreth 60.000 migrantë. Ata rrinë të strehuar në banesa ose në kampe refugjatësh. Organizatat e ndihmës kritikojnë se refugjatët në ishujt grekë pranë bregdetit turk nuk kanë akses në WC të pastra ose u mungon uji.

34.000 migrantë arritën sipas organizatës së mbrojtjes së kufirit të BE Frontex në Greqi në 2018-ën, përmes Mesdheut Lindor. 5.600 janë sipas IOM këtë vit. Në vitin 2018 në rrugë e sipër vdiqën 174 vetë. Edhe këtë vit ka pasur të paktën një dyzinë të vdekur.

Bosnjë-Hercegovina

Migrantët pa leje hyrjeje nuk mund t’i kalojnë më kufijtë e hyrjes nga Greqia në Maqedoninë e Veriut dhe nga Serbia në Hungari. Prandaj u krijua një itinerar alternativ përmes Shqipërisë dhe Bosnjë-Hercegovinës për në Kroaci. Në shtetet e Ballkanit Perëndimor ndodhen rreth 10.000 migrantë, më pak se 4000 ndodhen në Bosnjë, sipas një raporti të IOM. Kjo konfirmon që itinerari i refugjatëve ka ndryshuar në drejtim të Veriut. Qeveria e Bosnjës pret një rritje të mëtejshme të numrit të refugjatëve. Vitin e kaluar BE i vuri në dispozicion Bosnjës rreth nëntë milionë euro për strehimin e refugjatëve.

Bosnjën i ndan nga Kroacia një kufi i gjatë, pjesërisht malor. Organizata e të Drejtave të Njeriut Amnesty International kritikon mënyrën si i trajton policia kroate migrantët. Ata i kthejnë pas në Bosnjë, pa u dhënë mundësi që të paraqesin kërkesë për azil. “Shumë përshkruajnë si i godasin dhe i frikësojnë dhe si u vjedhin dokumentat e udhëtimit dhe celularët ose ua shkatërrojnë”, thuhet në një raport të publikuar në mars. Kroacia i kishte kundërshtuar më parë gjithmonë kritika të ngjashme.

Shqipëria

Në rrugën nga Greqia për në Bosnjë ndodhet Shqipëria, një nga vendet më të varfra të Evropës. Çdo vit janë më shumë se 20.000 shqiptarë që paraqesin kërkesa për azil në BE. Që kur është ngritur itinerari alternativ, policia shqiptare kap shumë më tepër migrantë pa dokumente. Në vitin 2018, sipas IOM ishin 3.400 vetë, në krahasim me rreth 750 vetë në vitin 2017.

Raporte të mediave, sipas të cilave në Shqipëri do të ngrihet një kamp për pranimin e migrantëve të shpëtuar në Mesdhe, nuk u konfirmuan. Në vend të kësaj, Shqipëria ratifikoi në fillim të vitit një marrëveshje me Organizatën e Mbrojtjes së Kufirit të BE, Frontex, e cila do të ndihmojë që të ndalohen në kufirin shqiptaro-grek migrantë pa leje hyrjeje. Një vendim i ngjashëm është marrë edhe midis Frontexit dhe Malit të Zi.

Maqedonia e Veriut dhe Bullgaria

Sipas raportit të IOM, në Maqedoninë e Veriut ndodhen aktualisht 35 migrantë. Kjo që kur ky vend e mbylli kufirin me Greqinë për migrantët. Për shkak të përplasjeve midis migrantëve dhe policisë në Greqi, Bullgaria e ka forcuar mbrojtjen e kufirit, bën të ditur ministri i Brendshëm bullgar. Mënyra e ashpër e veprimit të Bullgarisë kundër migrantëve ka efekt frikësues: në vitet 2015 dhe 2016 kërkesë për azil në Bullgari paraqitën, në secilin vit, nga 20.000 vetë. Në vitin 2018 ishin vetëm 2.500 vetë, kjo është statistika e agjencisë shtetërore për refugjatët./DW

mv-refugjatet.jpg
G. P.20:01 | 06/04/2019

Autoritetet e Maqedonisë së Veriut sigurojnë u shprehën të gatshëm për të përballuar një valë të re emigrantësh. Ditët e fundit mediat greke raportuan se një numër i madh emigrantësh nga qendra të ndryshme të Greqisë janë nisur drejt kufirit me Maqedoninë e Veriut.

Mediat greke sërish transmetojnë pamje të përplasjeve midis policisë dhe refugjatëve që kërkojnë rrugën për Evropë. Koordinatori grek për migrim Nikos Rangos siç njoftojnë mediat greke sërish është dashur t`ua sqarojë emigrantëve se informacionet për kufirin e hapur janë të rreme.

Ministrja e Mbrojtjes e Maqedonisë, Radmila Sheqerinska, thotë se presionet e papritura në kufirin jugor janë një realitet i ri e që duhet të mësohemi, jo vetëm për vendin, por edhe për fqinjtë.

Radmila Sheqerinska: “Kuvendi disa herë vazhdoi vendimin që në kufijtë të kemi edhe përkrahje ushtarake madje edhe në periudha kur dukej se rreziku ka kaluar. Megjithatë, unë dhe Ministri i Brendshëm kemi thënë se lidhur me krizën e emigrantëve duhet të mësohemi me realitetin e ri, e kjo do të thotë se rreziku mund të shfaqet brenda natës dhe se kjo do të jetë një nga rreziqet standarde edhe për ne, por edhe për vendet e rajonit”.

Disa prej mediave greke, përmes rrjeteve sociale, i bëjnë thirrje qeverisë që të zbulojë se nga vijnë lajmet e rrejshme për hapjen e kufirit në Evzoni, duke sugjeruar edhe përpjekje të qëllimshme për përkeqësimin e marrëdhënieve mes Greqisë dhe Maqedonisë së Veriut./abcnews.al

kapshtice.jpg
G. P.16:31 | 06/12/2018

18 refugjatë të paligjshëm, të cilët tentuan të kalojnë kufirin shqiptar janë ndaluar në pikën doganore të kalimit në Kapshticës. Refugjatët e ndaluar ishin shtetas sirianë, marokenë dhe afganë.

Sipas policisë ishin të ndarë në grupe të ndryshme dhe janë kapur në pika të ndryshme, pranë kufirit të gjelbër, në disa fshatra dhe në Bilisht. Sipas të dhënave nga Drejtoria e Kufirit të Kapshticës në Korçë janë marrë deklaratat e tyre dhe më pas u dërguan në qendrën e azilkërkuesve në Tiranë./abcnews.al

merkelii.jpg
G. P.09:40 | 17/11/2018

Para gati tre muajve, vrasja e një gjermani në Chemnitz do të shkaktonte një valë protestash kundër të huajve. Tani, kancelarja ishte aty për herë parë, për një vizitë që shumë e quajnë të vonuar.

Përse keni ardhur?

Kancelares gjermane Angela Merkel nuk i lanë shumë kohë të zinte vend në aktivitetin dyorësh të organizuar nga një gazetë lokale (Freie Presse), të premten në Chemnitz. Kur kishte hyrë në sallën e ish-fabrikës së rinovuar, nga 120 pjesëmarrësit, disa e kishin pritur me duartrokitje, të tjerë të ulur me duart të mbledhura.

Që para se të mbërrinte në Chemnitz, kancelarja kishte qenë në shënjestër të kritikave që e quanin tepër të vonuar vizitën e saj. Tre muaj më parë, qyteti ishte përfshirë nga valët e dhunës, demonstratave ekstremiste të djathta dhe kundër-demontrata kundër të djathtëve. Ngjarje që do ta bënin Chemnitzin të famshëm në mbarë botën.

“Tani të shohim se ç ‘mund të bëjmë në nivel federal që qytetit të mos i mbetet përgjithmonë nami i keq,” tha ajo. Duke mbrojtur vendimin e vet për të mos e vizituar qytetin ish-gjermanolindor menjëherë pas ngjarjeve të dhunshme të gushtit, Merkel tha se donte të shmangte polarizimin e mëtejshëm për shkak të pranisë së saj.

Zemërimi në rrugë

Gusht 2018: Vrasja me thikë e një gjermani 35-vjeçar, me gjasë nga dy azilkërkues, u bë shkak për demonstrata që shpejt u përshkallëzuan në trazira. Ndër protestuesit ishin ekstremistë të krahut të djathtë. Në regjistrimet e videove shiheshin protestues duke sulmuar njerëz që dukeshin si të huaj për nga pamja. Që nga gushti janë sulmuar një restorant hebre, një persian dhe një turk, si edhe është zbuluar një grup i djathtë ekstremist që e quan veten “Revolucioni Chemnitz”.

“Ka njerëz që shqetësohen se ndoshta këtu ka shumë refugjatë”, tha kancelarja Merkel. “Ka edhe njerëz që kanë paragjykime të hapura ndaj njerëzve që thjesht duken ndryshe. Mes këtyre dy llojeve duhen bërë dallime”. Me qindra qytetarë të Chemnitzit e kanë refuzuar dhunën dhe janë aktivizuar në iniciativa kundër dhunës. “Kjo është një shenjë e mirë,” tha Merkel. “Këta njerëz duhet të dëgjojnë zërin e tyre – sepse janë shumica,” shtoi ajo

Trashëgimia e Gjermanisë Lindore

Duke u mbështetur në përvojën e saj në rritje në RDGJ-në e mëparshme, Merkel u bëri thirrje ish-gjermano lindorëve që të jenë më të sigurt. “Ju keni çdo arsye të jeni krenarë për atë që keni bërë”, tha Merkel, duke iu referuar revolucionit paqësor të vitit 1989 që pati si pasojë rënien e Perdes së Hekurt.

Por shumë gjermano-lindorë e ndiejnë tani veten të lënë pas dore. “Unë kam qenë një nga humbëset e ribashkimit”, tha njëra nga pjesëmarrëset e aktivitetit për DW. “Shumë nga diskutimet e kësaj mbrëmjeje kanë të bëjnë me migracionin. Dhimbjet dhe ndjenja e të lënit pas dore ka ekzistuar shumë kohë para 2015-ës.” “Por kjo ende nuk është arsye për të marshuar së bashku me këta demonstrues të djathtë”, shtoi ajo.

Protesta jashtë

Jashtë fabrikës ishin mbledhur afro 500 demonstrues të organizuar nga grupi djathtist “Pro Chemnitz”. Rrethuar nga një prani e madhe policore, kënga e tyre “Merkel muss weg!” (Merkel ik!) kondensohej në ajrin dimëror dhe nuk arrinte deri te veshët e kancelares, që ishte brenda.

Por ajo e dëgjon atë vazhdimisht, sidomos prej vitit 2015, kur mori vendimin për t’u hapur dyert rreth 1 milionë azilkërkuesve. Njoftimi i saj në fillim të nëntorit se nuk do të kandidonte më përsëri për kancelare në zgjedhjet e 2021-shit, nuk u mjafton kritikëve më të zëshëm të saj. Ata duan që Merkel të japë menjëherë dorëheqjen..

Ndërkohë, gjatë diskutimit, një anëtar i audiencës që iu dha mikrofoni për një pyetje, shfrytëzoi momentin që ishte në qendër të vëmendjes, për t’u bërë thirrje të tjerëve të bashkoheshin me demonstruesit jashtë. Kancelarja priti me qetësi sa të mbaronte, duke rregulluar bllokun e shënimeve dhe stilolapsin që kishte përpara në podium, ku ishte vetëm.

‘Ne do t’ia dalim’

Migracioni e mbizotëroi gjithë debatin. Merkel e pranoi se ishin bërë gabime në politikat e refugjatëve në Gjermani. Por gabimi nuk është ndihma për azilkërkuesit në një moment të caktuar, tha ajo. Por që ishte bërë shumë pak për të shmangur shkaqet që i bëjnë njerëzit të largohen nga vendet e tyre,

Merkel u pyet edhe njëherë për fjalinë e saj të famshme në kulmin e krizës së migrantëve 2015: “Wir schaffen das” (Do t’ia dalim). “E çfarë kancelare do të isha nëse nuk do ta thosha këtë?” ia ktheu Merkel pyetëses.

“Das Schaffen (puna),” vazhdoi ajo më tej, “ende nuk ka përfunduar”./DW

wu.png
G. P.09:23 | 01/11/2018

Bosnje Hercegovina është prekur këtë vit nga valë e madhe e emigracionit të shtetasve nga vendet e Llindjes së Mesme dhe Afrika. Për të shmangur kthimin e fenomenit në krizë humanitare, autoritetet e Sarajevës kanë marrë masa duke dërguar refugjatët në qendra strehimore.

Bosnja është kthyer këtë vit në territorin kryesor të rrugëtimit të migrantëve në synimin e tyre për të arritur BE-në, kryesisht nga Lindja e Mesme, Azia dhe Afrika. Shteti ballkanik për këtë ka nisur marrjen e masave për të parandaluar atë që Kombet e Bashkuara kanë palajmëruar se mund të kthehet në “krizë humanitare” për mijëra migrantë, të cilët pavarësisht uljes së temperaturave kanë vazhduar të jetojnë në ambiente të jashtme duke shpresuar se do të mund të depërtojnë në vendet e Bashkimit Evropian. Policia boshnjake ka dërguar me autobusë dhjetëra emigrantë që kanë jetuar në kufi me Kroacinë, në një qendër të migrantëve në veriperëndim të Bosnjës.

Autoritetet njoftuan se rreth 20,000 persona nga Iraku, Irani, Siria, Pakistani, Afganistani dhe vende të tjera kanë udhëtuar në territorin e Bosnjës këtë vit. Mirëpo Bosnja, shtet që përballet me probleme ekonomike dhe politike nuk ka pasur shumë interesim për të mirëpritur këta vizitorë. Bashkimi Evropian i ka ofruar ndihmë këtij shteti për t’u përballur me fluksin e migrantëve, megjithatë, Bosnja ka qenë e ngadalshme në hapjen e qendrave të pranimit. Ndërkohë, fenomeni gjithnjë e në rritje i emigracionit ka rritur zemërimin mes banorëve lokalë. Policia e Bosnjës ka njoftuar javën e kaluar se nuk do të lejojë më shumë persona në veriperëndim të vendit, duke dërguar të paktën 700 persona në Sarajevë./abcnews.al

macron1.jpg
G. P.13:43 | 21/09/2018

Presidenti i Francës ka paralajmëruar Italinë se mund të mbetet jashtë zonës Shengen nëse nuk pranon reformimin e misionit Frontex për emigrantët. Gjithashtu Macron ripërsëriti se ajo që kalon Italia nuk është krizë emigrantësh, por krizë politike.

“Ata që na thonë se Evropa nuk është në gjendje të dakordohet, janë të njëjtit që krijojnë kriza dhe tensione”.

Samiti i Salzburgut i dedikuar Brexit dhe emigracionit përfundoi dhe Emmanuel Macron vendos disa fishekë në karikatorin e tij. Pastaj merr shënjestër: së pari drejt vendeve të Vishegradit, pastaj drejt Italisë.

“Vendet që nuk duan të forcojnë Frontex do të dalin nga Shengen”, u shpreh ai.

Sot Italia është një nga vendet më skeptike me propozimin për të forcuar Gardën Kufitare të BE-së, nisur nga Jean-Claude Juncker dhe mbështetur nga të gjitha shtetet kryesore evropiane.

Paralajmërimi i Macron mund të jetë bërë në sajë të fushatës elektorale, për shkak të zgjedhje për Parlamentin Evropian. Dhe në fakt, kështu është lexuar edhe nga kryeministri Italian, Giuseppe Conte, i cili komenton sulmet që nisen nga Parisi, shpesh në adresë të Matteo Salvinit.

Por presidenti francez, me kërcënimin e izolimit të Italisë nga Shengen, prek një aspekt shumë të rëndësishëm. Një çështje thelbësore, e cila qëndron në qendër të projektit për të krijuar nga polici kufitare të BE-së.

Shefi i Pallatit Elize ripërsërit se ajo në zhvillim në Mesdheun Qendror nuk është një krizë migratore, por një “krizë politike” e lidhur me “ndjeshmërinë italiane”. Edhe numrat tregojnë se fluksi migrator është drejtuar nga brigjet e Greqisë dhe Spanjës.

“Tensionet,- vijon presidenti francez,- janë krijuar nga ata që nuk respektojnë të drejtën humanitare dhe të drejtën ndërkombëtare të detit, duke refuzuar anijet që arrijnë edhe pse portet e tyre të sigurtë janë më të afërt”.

Macron është i bindur që në një farë pike çështjet do të prekin fundin dhe do të zhvillohet një lloj llogaridhënie, siç po ndodh me ata që kanë synuar për Breksit.

“Kjo tregon se të largohesh nga BE nuk është kaq e lehtë, dhe mbi të gjitha ka disa pasoja”.

Ashtu si mungesa e qasjes në tregun e BE-së për Londrën. Ose, në perspektivë, dëbimi nga Shengen për Italinë dhe shkurtimi i fondeve strukturore për Hungarinë që refuzon të mirëpresë refugjatët./abcnews.al

b.jpg
G. P.09:33 | 12/09/2018
Agjencia e OKB-së për refugjatët thotë se çdo ditë mijëra venezuelianë braktisin vendin e tyre. Mbi 2 milionë janë larguar dy vitet e fundit, për shkak të trazirave ekonomike dhe politike në Venezuela. Ata shkojnë në vende fqinjë si Kolumbia, Brazili dhe Ekuadori në kërkim të një jete më të mirë. Korrespondentja e Zërit të Amerikës, Celia Mendoza ishte në Brazil për të folur me disa prej tyre.Kampet e refugjatëve po mbushin Brazilin. Mijëra venezuelianë po kërkojnë ndihmë për shkak të mungesës së barnave, ushqimeve dhe shërbimeve të tjera, shkaktuar nga kriza ekonomike në vendin e tyre.

Me katër nga gjashtë fëmijët e saj, Natalie Silva, një nënë venezuelianë, po kërkon strehim në Pacaraima, një komunë në veri-perëndim të shtetit Roraima në Brazil.

“Më kanë dhënë ndihmë me shërbime sociale, personeli ushtarak ka qenë shumë i sjellshëm me mua, më kanë dhënë pelena, ushqim, veshje dhe ujë për fëmijët. Tani po pres që të na caktojnë një banesë. Nesër shkojmë në spital sepse kemi malarjen”,thotë ajo.

Sipas autoriteteve lokale, mesatarisht 600 venezuelianë mbërrijnë çdo ditë në kufi. Ushtria braziliane menaxhon qendrën e regjistrimit dhe merr masat e sigurisë.

“150 anëtarë të ushtrisë janë pjesë e operacionit së bashku me personelin civil. Operacioni i Pacaraimas ka 250 vetë”, thotë koloneli Hilel Zanatta.

Operacioni ka tre faza: kontrolli i kufirit, strehimi në Boa Vista dhe integrimi. Përfaqësuesi i agjencisë së OKB-së për refugjatët në Brazil, thotë se është rritur numri i venezuelianë që kërkojnë ndihmë.

“127 mijë venezuelianë kanë hyrë në Brazil që nga viti 2017, rreth 58 mijë vazhdojnë të jenë këtu. Rreth 33 mijë kanë kërkuar zyrtarisht azil nga policia federale. 12 mijë të tjerë kanë kërkuar viza për qëndrim të përkohshëm”, thotë Luis Fernando.

Megjithatë ka pasur edhe shprehje pakënaqësie nga vendasit. Ata shohin një lidhje direkte mes rritjes së numrit të venezuelianëve dhe problemeve të sigurisë.

“Ka mungesë sigurie. Shumë njerëz vijnë për të shkarkuar probleme, bëjnë gjëra të çuditshme”.

Brazili është një nga vendet e Amerikës së Jugut që ka zbatuar një përgjigje humanitare ndaj krizës venezueliane. Por për shkak të barrës ekonomike, presidenti brazilian, Michel Temer po konsideron mundësinë e kufizimeve.

Organizata e Shteteve Amerikane në një takim të posaçëm, analizoi krizën e imigracionit, të shkaktuar nga ikjet nga Venezuela. María Claudia Pulido, ndihmës sekretare ekzekutive e Komisionit Ndër-Amerikan për të Drejtat e Njeriut tha se kriza shtrihet në disa vende dhe kërkon një përgjigje rajonale, duke respektuar të drejtat e njeriut./VOA


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono