reforma ne drejtesi

arben-rakipii.jpg
G. P.21:20 | 17/05/2019

Ish-kryeprokurori Arben Rakipi ishte i ftuar këtë të premte në emisionin “Provokacija”. Ai u pyet nga moderatori Mustafa Nano se sa do zgjasë Reforma në Drejtësi në mënyrë që të përfundojë procesi i gjithë.

Rakipi, si një ndër autorët e kësaj reforme, tregoi se kandidatët e Gjykatës Kushtetuese duhet të fillojnë konkurrimin në parlament në Korrik, ndërsa krijimi i Strukturës së Posaçme Anti-Korrupsion do zgjasë sepse procesi i zgjedhjes së anëtarëve që do të bëjnë pjesë aty është delikat.

Mustafa Nano: Sa mund të zgjasë reforma në drejtësi, për t’u mbyllur procesi i gjithi?

Arben Rakipi: Gjykata Kushtetuese me ç’shihet duhet të fillojë konkurrimin në parlament të kandidatëve brenda muajit Korrik me gjasa. SPAK-u pastaj mund të zgjasë sepse kriteret e përzgjedhjes së tyre janë pak delikate sepse duhet kujdes i madh dhe më pas komprometohet e gjitha.

Pikërisht, SPAK përdoret edhe nga palët politike si struktura që do godasë edhe rastet e korrupsionit të deputetëve dhe jo vetëm. Ish-Prokurori i Përgjithshëm u shpreh se Prokuroria e Posaçme Anti-Korrupsion do të ketë mbështetje të madhe si brenda vendit, ashtu edhe jashtë saj.

“Më mirë se ç’është do të jetë. Nuk mund të kërkohet mrekullia nga një grup njerëzish që në numër mund të jenë 10,15 ose 20 vetë. Ky është një proces që do shkojë paralel me pastrimin ose përsosjen tërë sistemit shqiptar dhe kjo do jetë e besueshme, gjithë të tjerat pastaj mund të jenë pak të ekzagjeruara. Struktura do ketë mbështetje të madhe, si jashtë vendit, si brenda vendit si forcë ekzekutive sepse do ketë policinë e saj”, tha Rakipi.

Për sa i përket pyetjes së Nanos, nëse SPAK dhe Byroja Kombëtare e Hetimeve do jenë nën kontrollin e amerikanëve, Rakipi u shpreh se “Do jenë këshilltarë të afërt dhe të përditshëm, kjo është e sigurtë që do jenë. Kjo mund të marrë trajtën e kontrollit ose të trajtimit, por zemrën këta prokurorë duhet ta kenë. Nëse nuk e kanë nuk i shpëton kontrolli. Duhet të jenë trima, sepse krimi i organizuar nuk luftohet me short. Përveçse aplikimit, përzgjedhësit mund të kenë disa kritere shtesë, të cilat këto janë ndër cilësitë dhe kriteret bazë të një prokurori që të merret me të tilla gjëra sepse janë gjëra serioze dhe që duan trimëri”./abcnews.al

GJONAJ-TAKOHET-ME-MOSES-_ABC_M3-T2.mpg_snapshot_00.17-1280x720.jpg
ent ela15:45 | 26/04/2019

Lufta kundër korrupsioni dhe krimit të organizuar si edhe situata e rënduar politke në vend ishin në fokus të zyrtarit të lartë Austriak gjatë takimit të zhvilluar në Tiranë me ministren e Drejtësisë, Etilda Gjonaj. Sipas Josef Moser Shqipëria ka bëra hapa konkretë në Reformën në Drejtësi, ndërsa bëri apel që politika të jetë më e fokusuar në të mirë të vendit.

Për situatën politike në vend në një kohë kur opozita ka braktisur parlamentin ka folur edhe ministri Federal i Çështjeve Kushtetuese në Austri, Josef Moser.

Gjatë takimit me ministren e Drejtësisë, Etilda Gjonaj, Moser i bëri apel politikës Shqiptare, që të kenë në vemëndje të saj shtatasit e tyre dhe të fokusohen në të mirë të vendit.

“Pikëpamjet e ndryshme të politikanëve duhet të fokusohen në të mirën e vendit dhe të mos jenë thjesht mendime të diferencuara politike të cilat vështirësojnë situaten e vendit. Prandaj unë do bëj apel që përpjekjet e përbashkëta që janë bërë deri më tani për ta çuar vendin përpara dhe që  janë të parashikuara në një vend demokratik të vazhdojnë  dhe të jenë në qëndër të bisedimeve diplomatike dhe parlamentare. Në këtë mënyrë të funksionojnë në të mirë të vendit dhe të shtetasve të tij”.

Zyrtarin i lartë Austriak theksoi se, Shqipëria ka bërë hapa përpara sidomos në refomën në Drejtësi.

“Shqipëria i ka tejkaluar pritshmëritë për sa i përket fushës së drejtësisë. Ajo ka ndërmarrë hapa të besueshme dhe konkrete në luftën kundër korrupsionit dhe në Reformimin e Sistemit të Drejtësisë, duke krijuar një sistem drejtësie më të pavarur dhe duke minimizuar ndikimin që ka politika mbi të. Janë ndërmarrë hapa të cilat janë shumë të rëndësishme për integrimin, hapa të cilat duhet të njihen pavarësisht se kush i ka ndërmarrë, qeveria apo opozita. Unë do të mbeten mbështetës i fortë i këtyre hapave dhe masave të ndërmarra për faktin sepse janë hapa të domosdoshme për forcimin e të drejtës ligjore”.

Sfidë për qeverinë mbetet lufta kundër krimit dhe korrupsionit, pohoi ministrja e Drejtësisë Gjonaj.

“Jemi të vetëdijshëm që korrupsioni nuk luftohet në një ditë, por jemi duke ndërmarr cdo ditë masat e duhura për forcimin e politikave parandaluese ndaj fenomenit të korrupsionit, kemi ngritur mekanizmat e duhura për adresimin dhe masat ndëshkuese ndaj tij dhe kemi rezultate konkrete të cilat do të vijnë duke u thelluar.Unë jam besimplotë se nëpërmjet forcimit të shtetit të së drejtës, me reformën në drejtësi, luftën kundër korrupsionit dhe krimit të organizuar do t’ju japim qytetarëve tanë mundësinë jo vetëm për të patur një qeverisje edhe më të mirë, por njëherësh edhe një perspektivë të qëndrueshme evropiane”.

Në fund Gjonaj shtoi se qeveria ka vizionin e duhur për t’u përballur me fenomet si krimi dhe korrupsioni dhe sipas saj në ndihmë do të vijë shumë shpejt edhe ngrtija e SPAK-ut. /abcnews.al

 

LAJMET-DT-2-PRILL-GJONAJ.mpg_snapshot_04.17-1280x720.jpg
ent ela20:32 | 02/04/2019

“Brenda qershorit 2019 zgjidhen anëtarët e Gjykatës Kushtetuese dhe të Inspektoriatit të lartë të Drejtësisë”. Këtë premtoi ministrja e Drejtësisë Etilda Gjonaj në studion e Mbrëmje ABC News të Mirela Milorit.

“Jemi në procesin e emërimeve kushtetuese, Këshilli i Emërimeve në dreJtësi ka ngritur gjithë strukturën e akteve të brendshme dhe rregullatore për ndërtimin e skemës sesi do vlerësohen anëtarët e Gjykatës Kushtetuese dhe kandidatët për Inspektoriatin e Lartë të Drejtësië, dhe me këtë proces do kemi të zgjedhur brenda qershorit 2019 anëtarët e Gjykatës kushtetuese Inspektoriatit të Lartë të Drejtësisë për gjyqtarë dhe prokurorë”.

Sipas saj ngritja e SPAK dhe BKH do i japin impuls reformës në drejtësi në drejtësi, ndërsa priten vendimmarrjet e para.

“Ngritja e SPAK dhe BKH do i japin impuls reformës në drejtësi. Ne presim që kanditët qëk anë aplikuar pranë KLP të kalojnë në proces vetingu dhe presim vendimmarrjet e para dhe sapo numri minimal do të jetë gati atëherë SPAK do të jetë menjëherë i ngritur”.

Ajo apeloi që politika të qëndrojë jashtë këtij procesi që është jetik për vendin

“Politika duhet të qëndrojë jashtë këtij procesi që është jetik për Shqipërinë për shtetin së drejtës dhe për ekonomi të qëndrueshme”. /abcnews.al

leyla-mose-ones.jpg
G. P.13:57 | 02/04/2019

Sa herë që i jepet mundësia diplomatët më të lartë të ambasadës së shteteve të Bashkuara të Amerikës në vendin tonë shprehin qëndrimet e tyre mbi situatën politike në vend. Kështu bëri edhe zyrtarja amerikane, Leyla Moses-Ones, në aktivitetin e Ministrisë së Brendshme për menaxhimin e çështjes.

KLP do të sjellë së shpejti prokurorët në SPAK, Prokurorisë së Posaçme Anti-Korrupsion dhe më pas Byronë Kombëtare të Hetimit. Ndihma jonë për KLP së shpejti do të shkojë në Gjykatën kundër korrupsionit dhe krimit të organizuar. Gjyqtarët e Departamentit të Drejtësisë në SHBA po këshillojnë prokurorët shqiptarë, të cilët tashmë po sjellin ndjekje penale të dukshme dhe ne presim më shumë”, tha ajo.

Por ajo që e nënvizon më shumë është ecuria e reformës në drejtësi.

“SHBA-të mbështesin të gjitha institucionet e reja të Shqipërisë si Këshillat dhe si SPAK-u si dhe institucionet ekzistuese që janë të gatshme të luftojnë kundër korrupsionit ose kundër krimit të organizuar. Shkurtazi reforma në drejtësi po ecën përpara dhe nuk do të ndalet”, theksoi Moses-Ones.

Nga pas i shkon edhe ministri i Brendshëm duke treguar mbështetjen e institucionit që ai drejton.

“Reforma në drejtësi e shumëpritur nga qytetarët shqiptarë dhe partnerët ndërkombëtarë është tashmë në fazën përfundimtare të saj. Në fazën e finalizimit të një procesi të madh, një përpjekje të madhe kombëtare. Ajo që pritet dhe kërkohet nga të gjithë është që të gjitha institucionet të japin kontributin e vet dhe ky sistem i vjen saktësisht në mënyrë të sinkronizuar në ndihmë këtij procesi për arsye se për një reformë në drejtësi pa një polici funksionale, moderne dhe eficente dhe po ashtu edhe pa një prokurori moderne dhe funksionale nuk mund të bëhet”, tha Lleshaj.

Deklaratat mbi rëndësinë e reformës në drejtësi u bënë në aktivitetin ku u promovua një tjetër bashkëpunim me Shtetet e Bashkuara të Amerikës, ai i ngritjes së një sistemi modern që krijon tablonë e plotë për gjithçka raportohet në polici. Modernizimi është edhe motoja e vetë ministrit Lleshaj pasi i jep epërsi forcave policore ndaj krimit./abcnews.al

alibeaj.jpg
G. P.12:19 | 05/02/2019

Demokratët nuk kishin dyshime.

“Vendimi për mbajtjen në sistemin e drejtësisë të Donika Prelës është konfirmimi se reforma në drejtësi ka dështuar dhe se për të mbrojtur Edi Ramën nga drejtësia e vërtetë përbuzet dhe poshtërohet edhe Operacioni Ndërkombëtar i Monitorimit”.

Janë këta të fundit, deklaron Alibeaj, ata që theksuan se Prela ka shitur prona me çmim 4 herë më të lartë se i ka blerë dhe se me të ardhurat e deklaruara nuk justifikohet as blerja lirë e disa apartamenteve. E jo vetëm kaq.

“Vëzhguesit Ndërkombëtarë gjetën se bashkëshorti i Donika Prelës ka fshehur të ardhurat, ka punuar në të zezë, duke mos paguar taksat për shumë vjet, duke mashtruar shtetin shqiptar, me dyshimin e fortë të pastrimit të parave nga korrupsioni”.    

Por komisioni i Vettingut nuk i hetoi këto fakte, sipas ish-ministrit të Drejtësisë.

“Por mbajti në sistemin e drejtësisë një prokurore shërbëtore të Edi Ramës, me pasuri te pajustifikuara dhe qe i ka shërbyer krimit, nga Emiljano Shullazi tek banda e Avdylajve dhe deri tek shkatërrimi i dosjes se Saimir Tahirit”. 

Vendim ky i marrë në konflikt interesi, sipas demokratëve.

“Nga verifikimi i kamerave të sigurisë të Prokurorisë së Krimeve të Rënda, Komisioni i Vettingut do të kishte zbuluar se Donika Prela është takuar rregullisht me anëtaren e trupit të saj gjykues, Valbona Sanxhaktari në periudhën Nëntor-Dhjetor”.  

Partia Demokratike ka denoncuar faktin se me firmën e Donika Prelës, si drejtuese e prokurorisë së Durrësit, është liruar nga burgu drejtuesi i bandës së Avdyljave, Astrit Avdyli, në makinë e të cilit u gjet një armë pa leje janarin e vitit që shkoi.

Të gjitha informacione që gjendjen në dosjen 339, sipas Alibeajt, ndaj 16 Shkurti është rasti që të mos pranojmë më një drejtësi që i shërben atij që ka më shumë para dhe më shumë pushtet, përfundoi ai./abcnews.al

KRONIKE-KOMISIONI-I-PAVARUR-RAPORTI-PER-SHESHIN-ABC-M-4-T-2-HD.mpg_snapshot_00.48-1280x720.jpg
ent ela19:51 | 28/01/2019

Komisioni i Pavarur pranë Kuvendit, për monitorimin e zbatimit të Reformës në Drejtësi, është shprehur se, bazuar në dokumentacionin e Autoritetit të Dosjeve, prokurori Bujar Sheshi nuk mund të zgjidhej anëtar i Këshillit të Lartë të  Prokurorisë. Ky komision i rekomandon Komisionit të Ligjeve dhe KLP hetimin e këtij rasti.

Komisioni i Pavarur për koordinimin, monitorimin dhe ndjekjen e zbatimit të Ligjit për organet e qeverisjes së sistemit të drejtësisë, ka përpiluar një raport të mbledhjes së zhvilluar ditën e hënë ku kërkon sqarimin e situatës së krijuar me anëtarin e Këshillit të Lartë të Prokurorisë, Bujar Sheshi, i akuzuar si bashkëpunëtor i ish-sigurimit të shtetit, kriter ndalues ky për postin që mbledhja e përgjithshme e prokurorëve i dha.

Ky Komision është vënë në dijeni të një vendimi të Autoritetit për Informimin mbi dokumentat e ish-sigurimit të shtetit të datës 22 janar, ku përcaktohet se zoti Bujar Sheshi figuron në dokumente të ish-sigurimit të shtetit si bashkëpunëtor, por nga verifikimet e deritanishme nuk disponon dokumente që ta vërtetojnë aktivitetin e tij. Gjithashtu Autoriteti njoftoi komisionin se për zotin Sheshi, figurojnë material në emër të tij në dokumente të ish sigurimit të shtetit, si anëtar me detyrë hetues në sektorin e hetuesisë së degës së punëve të brendshmë në fier që nga viti 1979.

Bazuar në këtë vendim të Autoritetit, Komisioni i Pavarur vlerëson rastin Sheshi si në kushtet e pazgjedhshmërisë në ushtrimin e funksionit dhe kandidatit për KLP.

Komisioni miratoi me 5 vota raportin e së hënës: “Ku i kërkojmë Komisionit të Ligjeve hetimin e fenomenit dhe të rastit, KLP-së të shqyrtojë rastin me precedent dhe prokurorisë çfarë masash ka marrë”.

Raporti i rekomandon Komisionit të Ligjeve thirrjen në seancë të posaçme të antarëve të Autoritetit të Dosjeve për t’i kërkuar shpjegime lidhur me shkaqet e vonesës në shqyrtimin dhe verifikimin e rastit të Bujar Sheshit, kjo pasi sipas gjetjeve të komisionit duke krahasuar referencat kohore të rasteve të tjera, Autoriteti rezulton se në rastin e zotit Sheshi ka marrë më tepër kohë për marrjen e vendimit.

Kjo pasi Prokuroria ka përcjellë tek Autoriteti, formularin për verifikimin e Sheshit si kandidat për anëtar në KLP që në datë 26 tetor 2018, ndërsa përgjigjia nga Autoriteti i ka ardhur tre muaj më vonë, më 23 janar 2019.

Në raport theksohet gjithashtu se mbledhja e Përgjithshme e Prokurorëve zgjodhi Sheshin anëtar të Këshillit të Lartë të Prokurorisë në datë 11 dhjetor 2018, mbi një muaj përpara marrjes së Informacionit nga Autoriteti i Dosjeve. /abcnews.al

DEKLARATAT-PER-KLGJ.mpg_snapshot_00.38-1280x720.jpg
G. P.15:45 | 12/12/2018

BE dhe SHBA mbështesin fort ngritjen e Këshillit të Lartë Gjyqësor, si nga organet e reja të sistemit të drejtësisë në vendin tonë. Gjatë mbledhjes së sotme të gjyqtarëve folën ndër të tjera edhe ambasadori i BE në Tiranë dhe zv/ambasadorja e SHBA.

Hapat që po hidhen në reformimin e sistemit të drejtësisë duhet të nxjerrin në pah që gabimet e së shkuarës të shërbejnë si mësim për të ardhmen. Është ky sugjerimi i Ministres së Drejtësisë Etilda Gjonaj e pranishme në punimet e Konferencën e Gjyqtarëve.

Etilda Gjonaj, ministre e Drejtësisë: “Duke reflektuar për problematikat dhe mangësitë e vërejtura të deritanishme të Këshillit të Lartë të Drejtësisë me ndryshimet kushtetuese dhe legjislacionin e ri të reformës në drejtësi, kemi ndërtuar kuadrin e nevojshëm ligjor, që Këshilli i Lartë Gjyqësor të garantojë atë pavarësi reale të gjyqësorit, mbrojtjen e të drejtave të gjyqtarëve.”

Zbatimi i reformës në drejtësi do të rikthejë vlerat dhe parimet mbi të cilat duhet të zbatohet një sistem drejtësise i pavarur nënvizoi ministrja Gjonaj.

Duke sjellë në vëmendje mbështetjen logjistike dhe financiare të qeverisë, ministrja Etilda Gjonaj u kujtoi se një godinë e re i pret anëtarët e Këshillit të Lartë të Prokurorisë dhe Këshillit të Lartë Gjyqësor, por edhe paga të dyfishuara.

“Duke filluar nga muaji tjetër hyn në fuqi sistemi i ri i pagave dhe trajtimi i ri financiar për gjyqtarët dhe prokurorët duke sjellë të paktën dyfishimin e pagave tuaja si edhe duke rritur garancitë dhe përfitimet e tjera financiare.”

Këto janë mbështetje për punën e gjyqtarëve por akoma më e rëndësishme është miratimi në mënyrë demokratike i ligjeve, tha kryetari i Gjykatës së Lartë Xhevahir Zaganjori.

Xhevahir Zaganjori, kryetar i Gjykatës së Lartë: “Ekziston gjithnjë rreziku që shumica demokratike, të shpërfillë e ndoshta të nëpërkëmbë përmes formave dhe mënyrave të ndryshme, të drejtat e pakisës apo funksionimin normal të pushteteve të tjera, veçanërisht të atij gjyqësor.”

E kjo është e rrezikshme në të ashtëquajturat demokraci të reja tha kreu i Gjykatës së Lartë.

“Ekziston gjithnjë rreziku i devijimit të dukshëm demokratik, sidomos në rastet kur ekzëkutivi i fuqishëm kontrollon praktikisht e tërësisht gjithçka, edhe vetë legjilativin. Pasi shumica parlamentare që formalisht e ka zgjedhur atë është njëkohësisht në varësinë e tij në nivel partiak.”

Koha e ndryshimit në sistemin e drejtësisë ka ardhur e sot merr të gjithë mbështetjen e Bashkimit Evropian tha Ambasadori i Bashkimit Evropian në Tiranë, Luigi Soreca.

Luigi Soreca, ambasador i BE në Tiranë: “BE dhe vendet anëtare mbështeten në ndjenjën tuaj të përgjegjësisë dhe në ndjenjën tuaj të historisë në këtë moment shumë të rëndësishëm. Votat tuaja sot dhe veprimet tuaja në ditët që vijojnë do të jenë vendimtare për të ardhmen e këtij vendi.”

Gjyqtarët morën edhe mbështetjen e Shteteve të Bashkuara të Amerikës nëpërmjet zëvendës ambasadores Leyla Moses-Ones.

Leyla Moses-Ones, zv/ambasadore e SHBA: “Këshili i Lartë Gjyqësor i ri do të sjellë transparencë e llogaridhënie, por më e rëndësishmja do t’ju ndihmojë të rifitoni besimin e publikut. Ju duhet ta përqfoni këtë mundësi, mund të largoheni nga kjo sallë si një gjykatës që ka marrë vendimin për ta ndryshuar të ardhmen e Shqipërisë.”/abcnews.al

elisa-spiropali.jpg
G. P.18:04 | 11/09/2018

Socialistët janë të gatshëm të hyjnë në bisedime me demokratët për Vettingun në politikë, por vetëm nëse përfshihet edhe hetimi i familjarëve dhe të afërmve të politikanëve. Deklaratën e bëri nënkryetarja e grupit parlamentar të Partisë Socialiste, Elisa Spiropali, sipas të cilës propozimi i deritanishëm i opozitës është grisje e reformës në drejtësi.

“Prisnim nga PD sesi do të bënim Vettingun e politikanëve, por edhe të vëllezërve, motrave, kunetërve, fëmijëve, baxhanakëve të politikanëve. Por ata thonë jo. Ne presim që politikanët jo vetëm të shkëputen nga lidhjet me krimin, por edhe të kalojnë në sitë për të ardhurat dhe pasuritë. Lulzim Basha thotë jo. Ne duam që ata që se kalojnë Vettingun të përballen me drejtësinë. Lulzim Basha thotë jo. Shqiptarët duan që Vettingun e politikanëve ta bëjë drejtësia e pavarur. Lulzim Basha thotë jo. Lulëzimi do që kontrollin t’ia bëjë Salianji me Klevisin. Kjo nuk është drejtësia që duam. Ne duam Vetting dhe jemi të hapur për të biseduar për një Vetting të plotë. Ata thonë hajde votojmë diçka që edhe sot vetë thonë që nuk janë gati dhe që për më tepër është hap pas. Propozimi i tyre është ta marrësh reformën në drejtësi dhe ta grisësh. Lulzim Basha mund të ketë frikë nga SPAK-u dhe BKH-ja, por kjo nuk është arsye që ne t’i vemë shkelmin Vettingut që njësoj siç po pastron drejtësinë nga të korruptuarit dhe të paaftët do të pastrojë edhe politikanët”.

KRONIKE-BURGJET-KORRIK-18.mpg_snapshot_01.14-1280x720.jpg
G. P.15:24 | 05/09/2018

Nisja e zbatimit të Reformës në Drejtësi nuk është reflektuar në politikat penale. Shifrat zyrtare flasin për të njëjtin numër të burgosurish dhe paraburgosurish gjatë korrikut 2018 me atë të një vitit me parë. Veprat penale me e shpeshtë që ka çuar persona pas hekurave mbeten ato në lidhje me narkotikë.

“Prokuroria duhet të mendohet dy herë kur kërkon një masë sigurie “arrest në burg”, ishte sugjerimi i vëzhguesit Teo Jacobs ndërkombëtar në seancën dëgjimore për kryeprokuroren Arta Marku, pasi konstatoi me shqetësim numrin e lartë të burgosurve në Shqipëri në krahasim me vendet e rajonit. Por me gjithë këtë evidentim, apo raportin e Organizatës Botërore të Burgjeve pranverën e vitit 2018, që listoi Shqipërinë si vendin me numër më të lartë të të izoluarve në qeli në Ballkan, shifrat mbeten të pandryshueshme.

Sipas të dhënave zyrtare nga Drejtoria e Përgjithshme e Burgjeve, gjatë muajit korrik 2018 në burgjet dhe paraburgimet e vendit numëroheshin 5294 persona në total, nga të cilët 100 janë femra. Me gjithë ndryshimet dinamike të totalit për shkak të lirimeve, apo arrestimeve, në krahasim me korrikun e vitit të kaluar këtë verë, në burg kanq qenë 41 persona më shumë. Referuar statistikave zyrtare, numri më i madh i të dënuarve i përket grupmoshës 25-30 vjeç, ndërsa vepra penale për të cilën vuajnë dënim më shumë persona, plot 978 persona është përfshirja në çështjet e drogës.

Institucioni ku vuajnë dënimin më shumë persona në rang vendi gjatë korrikut është burgi i Fierit me 715 të dënuar. Çështjet e narkotikëve janë “mëkati” më i ndeshur edhe tek personat e paraburgosur. Në gjuhën e shifrave, 738 vetë vuajnë masën “arrest në burg” për këto vepra penale. Në rang zbritës, këto vepra ndiqen nga “vjedhjet” dhe më tej nga të akuzuarit për “vrasje”, plot 185 të tilla. Pesha e shifrave duket se rëndohet nëse llogaritet edhe kostoja financiare në buxhetin e shtetit për çdo të burgosur apo paraburgosur. Duke llogaritur të gjitha shpenzimet e kërkuara, përfshi ushqimin, transportin, pagesat e punonjësve të policisë apo shërbimet të tjera kostoja ditore e një personi të izoluar shkon nga 2 mijë lekë në ditë për meshkujt dhe nga 5 deri në 5.7 mijë lekë në ditë për femrat.

Korrik 2018

Të dënuar 3162
Të paraburgosur 2132/abcnews.al

etilda-gjonajj.jpg
G. P.12:40 | 28/08/2018

Ministrja e Drejtësisë, Etilda Gjonaj pati një takim me homologun e saj austriak Josef Moser, në Alpbach të Austrisë. Në qendër të diskutimeve ishte forcimi i mëtejshëm i bashkëpunimit midis dy vendeve, ecuria e reformës në drejtësi, bashkëpunimi në forcimin e luftës kundër korrupsionit si dhe organizimi për herë të parë në Shqipëri i Forumit Ministror BE – Ballkani Perendimor për çështjet e drejtësisë dhe punëve të brendshme në Tetor 2018.

Ministri Moser vlerësoi nismat e Shqipërisë për reformimin e sistemit të drejtësisë dhe luftën kundër korrupsionit. Ai u shpreh që Austria do të jetë gjithmonë një partnere në krah të Shqipërisë për mbështetjen në zbatimin e reformave të ndërmarra nga Shqipëria. Në fund të takimit, ministri Moser shprehu gatishmërinë e tij dhe të ministrisë që ai drejton për të bashkëpunuar dhe asistuar Ministrinë e Drejtësisë në Shqipëri me çdo program mbështetje teknike për forcimin e kapaciteteve të ministrisë në reformat e ndërmarra./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono