Real Madrid

lionel-messi-barcelona_48fpe72bfm4m179j5rtchzp47-1280x720.jpg
ent ela19:46 | 05/02/2019

Trajneri i skuadrës së Real Madrid, Santiago Solari tha në prag te ndeshjes ndaj Barcelones se aktivizimi ose jo i Messit nuk do të ndikojë tek skuadra e tij. Reali dhe Barcelona do të luajne këtë të mërkurë ndeshjen e parë gjysmëfinale të Kupës së Mbretit

Skuadra e Real Madrid do të luajë ndeshjen e  parë të gjyasmëfinales së Kupës se Mbretit në transfertën e Barcelonës. Një përballje që duket se e ka humbur pak shkëlqimin pas largimit të Cristiano Ronaldos por gjithsesi rivaliteti është tepër i madh. Në prag të këtij dueli, trajneri i Real Madrid Santiago Solari doli në konferencën për shtyp dhe tha se skuadra e tij i ka idetë e qarta dhe është i bindur tek fitorja. Në lidhje me aktivizimin ose jo të Messit, Solari tha se kjo pak rëndësi pasi skuadra është e përgatitur për neshjen.

“Është një përballje mes dy skuadrave shumë të medha. Qëllimi jonë është të fitojmë këtë takim dhe të jemi më të qetë në ndeshjen e kthimit. Nuk mund të them nëse do të ketë surpriza në formacionin startues por shpresoj të zhvillohjet një ndeshje e bukur për tifozët dhe të fitojmë. Është bukur kur më të mirët luajnë por tek ne nuk ndikon aspak nëse Messi luan ose jo pasi ne jemi shumë të pergatitur”, tha Solari.

Në lidhje me lojtarët që mund të hedhë në fushë nga minuta e parë, trajneri i Realit nuk pranoi të publikonte emra.

“E kam shumë të vështirë të zgjedhe formacionin bazë. Vallejo është rikuperuar dhe meëduhet të lë shumë lojtarë pushim në këtë ndeshje. Mund te them me bindje se kjo është pjesa e vështirë e kësaj pune. Nuk e di nëse Bale do të startojë si titullar por ekpserienca e e tij do të na ndihmojë shumë.  Vinicius është paraqitur mjaft mirë në ndeshjet e fundit po nuk është i paprekshëm. Jemi të gjithë të përqëndruar për El Clasikon dhe nuk du të flas për  çeshtjen e Iskos”,  tha trajner i Real Madrid i pyetur rreth të ardhmes së mesfushorit spanjoll Isko. Real Madrid dhe Barcelona do të matin forcat të mërkurën në orën 21 00 ne Kamp Nou. Ndërkohë që ndeshja e kthimit do të zhvuillohet në datën 27 Shkurt./abcnews.al

benzema.jpg
G. P.14:17 | 01/02/2019

Real Madrid kaloi në gjysmefinale të Kupës së Spanjës pas fitores 3-1 ndaj Gironas. Benzema ishte heroi i takimit për madrilenet me dy golat e shënuar.

Real Madrid kalon pa problem në gjysmëfinalet e Kupës së Spanjës. Madrilenët fituan në transfertën e Gironas me rezultatin 3-1 duke i dërguar shifrat e përgjithshme në 7-3.

Benzema hapi serinë e golave në minutën e 27. Francezi realizon një gol mjaft të bukur dhe tregon se po kalon një formë mjaft të mirë. Pak minuta më vonë, Marcelo pati mundësinë për të dyfishuar rezultatin, por gabon përballë portierit Moreno. Gjithsesi gabimin e tij e shlyn Benzema në fundin e pjesës së parë që realizon golin e dytë personal me një goditje të bukur brenda zonës.

Në fraksionin e dytë të lojës, Reali pati mundësinë për të dërguar shifrat në 3-0, por Vasquez godet shtyllën me portën e boshatisur. Vendasit nisen në kundërsulm dhe ngushtojnë diferencën me Pedro, i cili u tregua i saktë përballë portierit Kejlor Navas.

Gjithsesi fitoren e Realit e vulos Marcos Llorente me një goditje të fuqishme jashtë zonës. Real Madrid regjistron fitoren e radhës dhe lojtarët po tregojnë një formë të shkelqyer. Kupa është një nga objektivat e Realit të Madridit në këtë sezon në Spanjë pasi kampionati është thuajse i pamundur për shkak të diferencës së madhe të pikëve me Barcelonën kryesuese./abcnews.al

hazard.jpg
G. P.09:11 | 23/01/2019

Eden Hazard ka si qëllim kalimin tek skuadra e Real Madrid dhe pritet të firmosë një kontratë për 5 vitet e ardhshme me një pagë prej 13 milionë Euro në sezon. Pogba drejt rinovimit me Manchester United.

Eden Hazard ka vetëm një dëshirë, të firmosë me skuadrën e Real Madrid. Futbollisti belg ka theksuar sërish gjatë një interviste se nuk e përjashton mundësinë e kalimit tek Real Madrid, klubi që ka shfaqur më shumë interes. Sipas mediave spanjolle, Hazard ka një marrëveshje me Realin për një kontrate 5-vjeçare me 13 milionë Euro në sezon plus bonuset. Hazard pritet të jetë lideri i ri i madrilenëve për sezonet e ardhshme. Në merkaton e verës, madrilenët duan të nënshkruajnë edhe me mesfushorin danez të Tottenham, Christian Eriksen. Ylli i londinezëve është një ndër objektivat primare për kampionët në fuqi të Europës, të cilët janë të gatshëm të përfshijnë në tratativa edhe mesfushorin James Rodriguez që është huazuar tek Bayern Mynih për të ulur sado pak klazuolën e kripur që danezu ka tek Tottenham.

Paul Pogba ndryshon dhe vendos të qëndrojë te skaudra e Manchester United. 25-vjeçari ishte shumë pranë largimit nga Manchester United pasi nuk bënte pjesë në planet e trajnerit Jose Mourinho. Por me largimin e trajnerit luzitan, Pogba po shkëlqen duke qenë vendimtar në shumë takime pa harruar që është lojtari kyç i skemave të trajnerit Solskjaer. Kontrata e francezit skadon në vitin 2021 dhe drejtuesit e skuadrës kanë në plan për t’i ofruar rinovimin së paku deri në vitin 2023.

Interi ndryshon strategji në merkato. Zikaltërit e kishin në qendër të vëmendjes mesfushorin e Real Madrid, Luka Modriç, por së fundmi është sfumuar ideja e transferimit të nënkampionit të botës. Drejtuesit e zikaltërve kanë hedhur vështrimin te mesfushori i Realit, Isco, i cili nuk gëzon një rol titullari madje ka pasur mosmarrëeshje edhe me trajnerin Solari sa i përket rolit të spanjollit në skuadër. Nga kjo situatë kërkon të përfitojë Inter, por në këtë mes është edhe Juventus që është në avantazh pasi është më e fuqishme financiarisht dhe mund ta përballojë lehtësisht një transferim të tillë. Zhvillime edhe sa i përket trajnerit të Atletico Madrid, Diego Pablo Simeone. Argjentinasi është pranë zgjatjes së kontratës me “Los Kolçoneros” edhe me një vit tjetër, duke i mbyllur dyert Interit që shpresonte shumë në një rikthim të tijin në San Siro, e natyrisht jo si lojtar, por si trajner./abcnews.al

marcelo.jpg
G. P.22:34 | 22/01/2019

Mediat në Spanjë raportojnë se mbrojtësi brazilian i Real Madrid, Marcelo, i ka kërkuar drejtuesve të klubit ta lënë të lirë, për të kaluar tek Juventus në Itali. Bardhezinjtë duan të nënshkruajnë edhe me Isco-n.

Marcelo ka vetëm një objektiv, kalimin te skuadra e Juventusit. Zërat për një transferim të tillë i përforcojnë akoma më tej mediat spanjolle “Sport” dhe “Marca”. Sipas tyre, mësohet se anësori i Real Madrid i ka thënë drejtuesve të klubit se nëse skuadra e Juventusit bën një ofertë konkrete në drejtim të tij, atëherë klubi nuk duhet të nxjerrë asnjë pengesë, por duhet ta lërë të lirë futbollistin të ndërrojë ambient.

Një kërkesë, e cila mund të realizohet për mbrojtesin brazilian, i cili nuk ka qenë një titullar i padiskutueshëm për madrilenët gjatë këtij sezoni. Trajneri Solari është justifikuar duke thënë se futbollisti ka vuajtur nga disa probleme shëndetësore, por nuk dihet se sa të vërteta janë këto fjalë.

Pas kalimit të Ronaldos në Torino, u përforcuan edhe zërat për nënshkrimin e Marcelos, por në fund braziliani qëndroi në Madrid. Ronaldo dhe Marcelo janë shumë shokë dhe portugezi ka patur një ndikim jo të vogël në nisjen e këtyre tratativave. Nuk përfundon me kaq pasi Juventus kërkon të nënshkruajë edhe me yllin tjetër të Real Madrid, Isco.

Mesfushori spanjoll nuk është i lumtur në Madrid pasi e ka huimbur vendin e titullarit ndërkohë që Juventus ka shprehur interesim dhe mund të jenë pikërisht kampionët në fuqi të italisë destinacioni i radhës për futbollistin e kombëtares së furisë së kuqe./abcnews.al

modric-and-casemiro.jpg
G. P.13:56 | 20/01/2019

Reali po nis të bindë tifozët dhe kritikët se e ka lënë pas krizën. Vlerësimet ishin pozitive pas fitores ndaj Sevilla-s në kampionat, ku shkëlqeu sidomos kroati Luka Modriç.

Ata që ndoqën ndeshjen në “Bernabeu” padyshim thuajse e fshinë nga mendja katastrofën 0-3 të fazës së parë ndaj kësaj skuadre. Reali që u shfaq para tifozëve të vet ndaj Sevilla-s ishte diçka tjetër dhe jo thjesht sepse fitoi 2-0.

Djemtë e trajnerit Solari sikur kishin rifituar atë magjinë e ndeshjeve të mëdha, edhe pse mjaft nga yjet nuk ishin në fushë. Pa Cristianon prej kohësh, pa Bale dhe me Isco e Marcelo në stol, Solari ndjeu kënaqësi sepse vendimet e tij dolën të drejta.

Benzema bëri mirë që nuk u operua dhe kjo u pa në fushë, ndërsa të rinjtë si Ceballos, Vinicius dhe Regihon ishin të shkëlqyer. Publiku, gjithsesi, u lumturua më shumë nga “ringjallja” e të adhuruarit Luka Modriç.

Mesfushori kroat luajti ndeshjen më të mirë të sezonit dhe duket se pushimi i dimrit (edhe pse me stërvitje) i ka bërë mirë.  Me një Modriç të tillë, Reali mund të ketë shpresë për trofe, pse jo edhe për më të rëndësishmit, ndonëse Barcelona duket vështirë që të arrihet në La Liga.Mediat e lavdëruan menjëherë kroatin.

“Marca” ka një foto të Modriçit në kopertinë dhe titullin: Ngrihet në fluturim!

Edhe gazeta “AS” e ka kopertinën me foton e Modriçit, ndërsa titulli është: Madridi më i mirë!

Golat ndaj Sevilla-s u shënuan nga Casemiro dhe nga Modriç, ndërsa skuadra kundërshtare u duk shumë e dobët përballë kampionëve të Europës dhe të botës në fuqi.

“Ishte një paraqitje brilante, – u shpreh trajneri Solari, – duhet të falenderoj gjithë skuadrën dhe nuk mund të veçoj një lojtar nga të tjerët. Tani jemi në rrugën e duhur, duke fituar ndeshjet. Një ndeshje që vlente më shumë se tri pikë, pasi kishim përballë një rival direkt”.

Reali u ngjit në vend të tretë, por përpara tij mbeten dy skuadra. Këtë sezon në La Liga do të ketë punë jo vetëm me Barçën, por edhe me rivalin brenda qytetit, Atletico-n, që e fitoi ndeshjen e saj këtë javë. Skuadra e trajnerit Simeone triumfoi 3-0 në fushën e Huesca-s./abcnews.al

spanja.jpg
G. P.11:36 | 17/01/2019

Dy skuadrat e Madridit e patën shumë të vështirë në Kupën e Mbretit në Spanjë. Kritikat janë të shumta pas humbjes së Realit dhe eleminimit të Atletikos.

Ishte një mesjavë e vërtetë futbolli. Jo rrallë ndeshjet e kupës fshijnë çdo lloj hierarkie dhe kështu ndodhi në Spanjë, me dy festa të skuadrave të vogla, që i shkaktuan disfatë klubeve të mëdhenj të Madridit. Reali ia doli që të kualifikohej për në çerekfinale, por pësoi një humbje aspak dinjitoze në fushën e Leganjesit, me shifrat 0-1.

Mungesa e Karim Benzemasë u ndje, pasi francezi nuk luajti për shkak dëmtimi, ndërsa Isco është shumë larg nivelit të mëparshëm, pavarësisht talentit të madh. Nëse i shtohet këtyre, dëmtimi i Bale dhe largimi i Cristiano Ronaldos, atëherë kuptohet më mirë gjendja e madrilenëve.

“Ishim të dobët në Leganes, – pranoi Solari, – sidomos në pjesën e parë. E vërteta është se nuk kemi lojtarë sa duhet, dhe sidomos kemi problem në sulm”.

Pavarësisht problemeve, pakkush priste një nivel të tillë ndaj Leganesit.

“Marka”: Katastrofë! Atletiko eleminohet në të tetat e finaleve nga Girona! Madridi kalon, por sërish jep një imazh të keq!

“AS”: Bomba e madhe plasi në “Uanda”! Simeone: Preferoj të luaj keq dhe të fitoj! Reali, Kejlori dhe askush tjetër!

Siç lexohet edhe në gazeta, Atletiko e pësoi më keq se Reali, pasi u eleminua.

Në një ndeshje thuajse të çmendur, tipike prej Kupe, bardhekuqtë barazuan 3-3 me Gironën, dhe nuk arritën dot në çerekfinale pas rezultatit të përgjithshëm, 4-4. Edhe pse Atletiko nuk quhet ende një superfuqi si Reali apo Barça, sërish prej saj pritej më shumë. Aq më tepër, me shpenzimet e shumta që I kanë dhënë mundësi trajnerit Diego Pablo Simeone që të luajë futboll më të bukur.

“Ka raste, – tha trajneri, – kur luan mirë dhe eleminohesh. Unë preferoj të luaj keq, por që të fitoj gjithnjë. Ishte ndeshje e vërtetë e kupës, e bukur. Përgëzime Gironës që nuk u dorëzua kurrë, ndërsa ne dhamë gjithçka, ndaj nuk mund t’i kritikoj lojtarët”.

Pas kësaj që hoqën dy ekipet madrilene, edhe Barcelona nuk është e qetë.

“Barça, me të gjitha forcat për të përmbysur në Kupë”, shkruan gazeta “Sport”.

Katalanasit luajnë në “Camp Nou” ndaj Levantes, ndërsa e kanë humbur 1-2 ndeshjen e parë./abcnews.al

loss.jpg
G. P.13:45 | 13/12/2018

Reali po pëson humbje të rënda këtë sezon. Në Champions dhe në kampionatin spanjoll, madrilenët po turpërohen, ndërsa e ardhmja është e paqartë.

Një mbrëmje historike, por në versionin negativ. Reali pësoi humbjen më të rëndë europiane në “Bernabeu” në historinë e tij mbi 60-vjeçare kontinentale, dhe kjo, jo nga ndonjë rival i madh, por nga CSKA-ja e Moskës.

Gjithsesi, nuk ishte katastrofa e parë këtë sezon. Madrilenët e nisën me një 2-4 ndaj Atletikos, në derbin e luajtur për finalen e Superkupës së Europës në Gusht. Tronditja u bë më e rëndë me humbjen 0-3 në fushën e Seviljes për ligën spanjolle, dhe pozitat e trajnerit të asaj kohe, Julen Lopetegui, u lëkundën.

Ish-tekniku i Spanjës u shkarkua menjëherë pas turpërimit 1-5 në “Camp Nou” ndaj Barcelonës, dhe u mendua se diçka do të ndryshonte. Trajneri i ekipit B, ish-ylli argjentinas, Santiago Solari, mori drejtimin, por shpresa ishte që në fillim e paktë.

Pas 4 fitoreve relativisht të lehta, erdhi rrëzimi i madh i radhës, 0-3 në fushën e Eibarit, edhe ky krejt i pamenduar më parë. Diçka e panatyrshme po ndodh me klubin më të famshëm të botës, ajo që askush nuk po habitet që ekipi po mundet thellë.

Normalitet i hidhur edhe 0-3 me CSKA-në në Champions, që e goditi shumë Solarin.

“Jam shumë i mërzitur dhe i shqetësuar, – tha trajneri, – e di se po rrezikojmë shumë, e kam shumë të qartë. Duhet të marr përgjegjësinë time për këtë që ndodhi, pasi nuk ishim të mirë në asnjë sektor të fushës. Sidomos, pjesa e dytë ishte shumë e keqe. E vetmja gjë që vlen është se disa lojtarë pushuan, dhe disa të rinj morën përvojë duke luajtur titullarë”.

Edhe vetë gazetat sikur nuk u skandalizuan aq shumë.

“Marca”: Një natë për t’u harruar! Të bardhët pësuan humbjen më të rëndë europiane në “Bernabeu”. Isko u vërshëllye nga tifozët dhe u përplas me ta!

“AS”: Rezervat nuk vlejnë! Humbja më e rëndë europiane në “Bernabeu”! Marselo: Nuk mund të japim këtë imazh!

“Sport” e Barcelonës: Qesharake dhe vërshëllima në “Bernabeu”! Real Madrid-CSKA 0-3!

Tifozët ishin ndoshta të vetmit që u tërbuan plotësisht, aq sa vërshëllyen skuadrën, e sidomos Iscon.

Reali mbetet brenda çdo objektivi këtë edicion, por kush beson më se një ekip që turpërohet kështu, ka forcë të fitojë Championsin apo La Ligën?/abcnews.al

duranti.jpg
G. P.21:26 | 30/11/2018

Një basketboll i nivelit të lartë u luajt në Shtetet e Bashkuara të Amerikës dhe në Europë. Kevin Durant dhe Lebron James ishin të shkëlqyer, ndonëse patën fat të kundërt.

Tri histori të mëdha i ndanë vetëm pak orë. Amerika dhe Europa provuan thuajse njëkohësisht emocionet e rralla të basketbollit, me protagonist dy yje në NBA dhe dy formacione fitues në Euroligë. Ata ishin Kevin Durant e Lebron James në bregun e majtë të Atlantikut, dhe CSKA e Moskës e Reali i Madridit në atë të djathtin. Durant ishte sërish lider i Golden State, ndonëse shkëlqimi i tij prej 51 pikësh nuk i siguroi dot fitoren ekipit të tij. Supertalenti pati ndeshjen e tretë radhazi me të paktën 44 pikë të realizuara, një nga të paktët në historinë e lavdishme të NBA-së. Ai shtoi edhe 11 topa në tabela dhe 6 pasime për kosh, ndërsa Golden Stejti u mund në fushën e Torontos, 128-131, pas kohës shtesë.

Pavarësisht humbjes, kampionët luajtën me dy mungesa të mëdha, si Stephen Curry e Drejmond Green, ndaj kur ata të kthehen, besohet se ata do të jenë sërish favoritë për të mbrojtur titullin. Lebron James, ndërkaq, shkëlqeu në fitore. Basketbollisti numër 1 i botës shënoi 38 pikë në 38 minuta, duke qenë ai faktori kryesor i suksesit të Los Angelos Lakes ndaj Indianës në triumfin, 104-96. James kapi 9 topa në tabela, shërbeu 7 pasime për kosh dhe vodhi dy topa, në një sfidë tepër të vështirë, duke i dhënë fund serisë prej 3 humbjesh radhazi të skuadrës së tij.

Edhe Europa pati kulmin e saj të lojës së koshit. Në Madrid u luajt një finale e parakohëshme e Euroligës, mes Realit dhe CSKA-së së Moskës. Kampionët në fuqi të kontinentit u mundën në shtëpi nga formacioni rus, 88-93. Miqtë kryesuan në pjesën më të madhe të kohës, nën lidershipin e amerikanëve Higin e Klajbërn, si dhe të francezit De Kolo. Madrilenët kaluan në epërsi në pjesën e dytë, por nuk mundën të përballonin forcën fizike të rivalëve, pavarësisht lojës së mirë të argjentinasit Kampaso, dhe spanjollëve Rudi Fernandez e Felipe Rejes. CSKA u ngjit e vetme në krye të Euroligës me 9 fitore e 1 humbje, ndërsa Reali është i treti./abcnews.al

rives.jpg
G. P.15:43 | 30/11/2018

Do të zhvillohet në stadiumin e Realit të Madridit, finalja e Kupës Libertadores. River Plate dhe Boca Juniors përcaktojnë titullin në datën 9 Dhjetor.

Nuk mund të kishte vend më të mirë për ta luajtur. Një stadium kampionësh për të përcaktuar titullin kampion të Amerikës së Jugut, pra në finalen e kupës “Libertadores”. River Plate dhe Boca Juniors do të ndeshen në “Santiago Bernabeu”, në 9 Dhjetor, për sfidën fundore që do të vendosë fituesin e trofeut më të madh amerikanolatin. Kështu bëri me dijë përfaqësuesi i Federatës së Futbollit të Amerikës së Jugut, CONMEBOL, pas marrëveshjes që u arrit me Realin e Madridit.

“Madridi është një nga qytetet më të sigurt në botë dhe ka komunitetin më të madh argjentinas në Europë, – tha presidenti Alehandro Domingez, – Kupa Libertadores nuk e humb identitetin e saj po u luajt në Spanjë”.

Finalja e dytë ishte parashikuar të luhej në stadiumin “Monumental” të River Plate në Buenos Aires, por u shty e pastaj u anulua, pas sulmit që tifozët vendas i bënë autobusit me lojtarët e Boca-s, ku u lënduan disa futbollistë. Boca kërkoi ta fitonte trofeun në tavolinë, por kjo u hodh poshtë, ndërsa Riveri mori gjobë me vlerë 400/000 USD.

U diskutua që finalja të luhej në Paraguaj ose në Katar, por përfundimisht u vendos në Madrid. Ndeshja e parë, Boca-River përfundoi 2-2, ndërsa fituesi i kupës “Libertadores” do të marrë pjesë në Kupën e Botës për klubet, që do të zhvillohet në Emiratet e Bashkuara Arabe, nga 12 deri në 22 Dhjetor./abcnews.al

realii.jpg
G. P.22:01 | 24/11/2018

Katastrofë e vërtetë e Realit në ligën spanjolle. Humbje e rëndë në fushën e Eibarit, me skuadrën nga Madridi që vazhdon krizën e lojës dhe të rezultateve.

Nuk mund të quhet një mundësi e humbur. Aspak, kjo që i ndodhi Realit në stadiumin e Eibarit e ka emrin “kapitullim”. Vetëm pak ditë pasi klubi konfirmoi Santiago Solarin si trajner me fuqi të plota, skuadra madrilene pësoi një katastrofë të vërtetë në La Liga, duke humbur 0-3 përballë një rivali tepër modest.

Në prani të jo më shumë se 7 000 spektatorëve, ekipi i yjeve si Kurtua, Marselo, Ramos, Modriç, Kros, Bejl apo Benzema, mori një leksion nga lojtarë të vlerësuar fare pak. Eskalante shënoi golin e parë që në minutën e 16-të, ndërsa pas pushimit kur pritej reagimi madrilen, erdhën edhe dy rrjeta të tjera, me autorë Sergi Enrikun dhe Kiken.

Çfarë ndodhi me kampionët e Europës?

Ndoshta akuzat për doping ndaj kapitenit Ramos kanë ndikuar tek vetë lojtari dhe tek skuadra, por kur humbet kështu, shkaqet janë më të thella. Reali i këtij sezoni vazhdon të mos bindë, ndërsa gjithnjë mendohet largimi i Kristiano Ronaldos, njeriut që shënonte nga 40 apo 50 gola çdo sezon.

“E shtuna e zezë” ishte emri që i vunë mediat disfatës në stadiumin “Ipurua”, ku më të dobëtit u cilësuan Marselo dhe Bejl. Pavarësisht nga gabimet e Barcelonës apo të Atletikos së Madridit, nuk duket se ky Real është në gjendje të përfitojë dhe të synojë titullin kampion./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono