Real Madrid

skysports-paul-pogba-manchester-united_4625974-1280x720.jpg
G. P.20:38 | 10/07/2019

Trajneri i skuadrës së Manchester United, Solskjaer ka deklaruar se mesfushori Pol Pogba do të respektojë kontratën që ka me klubin anglez. Futbollisti francez ka oferta nga Real Madrid dhe Juventus dhe ka shprehur dëshirën për të nisur një aventurë të re.

Tensionohet situata në radhët e skuadrës së Manchester United. Këtë merkato verore pritet një eksod largimesh që kryesohet nga mesfushori Paul Pogba. Francezi ka oferta nga Juventus dhe Real Madrid ndërkohë që dëshira e 26-vjeçarit është të largohet nga Old Trafford. Nuk është i këtij mendimi trajneri i skuadrës angleze Solskjaer i cili ka bllokuar largimin e Pogba, De Gea dhe Sanchez. Kreu i pankinës së Manchester United i është kundërpërgjigjur agjentit të Pogba, Mino Raiola duke theksuar se politikat e klubit nuk lejojnë largimin e yjeve të skuadrës.

“Në dijeninë time  nuk ka patur oferta për asnjë lojtar. Ne jemi Manchester United dhe nuk duhet të shesim lojtarët tanë më të mirë. Pogba nuk ka qenë kurrë një shqetësim për mua. Ai po punon shumë, është një profesionist i vërtetë dhe një djalë krenar. Nuk mund të rri këtu duke folur për atë që thonë Paul dhe menaxheri i tij. I kanë mbetur edhe disa vite në kontratë. Unë duhet të flas për përgatitjet e sezonit që po vjen. Menaxherët e kanë biznes, flasin gjatë gjithë kohës, por ne nuk kemi patur ndonjë ofertë, kjo është gjithçka që mund të them për këtë çështje.”

Manchester United ka nisur fazën përgatitore në Australi. Me skuadrën është bashkuar edhe Pogba, i cili nuk duket të jetë aspak i lumtur./ABC News Albania 24/7

preview-fiorentina-vs-ac-milan-rossoneri-masih-panas-GEp.jpg
Sej rie18:10 | 21/06/2019

Paolo Maldini dhe Zvonimir Boban udhëtuan drejt Madridit për tu njohur nga afër me lojtarët që Real Madrid ka nxjerrë në shitje. Madrilenët kanë shpenzuar rreth 350 mln euro dhe janë të detyruar të shesin.

Trajneri Zinedine Zidane ka një listë të gjatë me futbollistë të cilët nuk i konsideron të rëndësishëm për skemat e skuadrës. Këtu përfshihet edhe sulmuesi i shumë kërkuar nga skuadra e Milanit Dani Sebajops, i cili kushton plot 40 mln euro. Milan nuk është i gatshëm të paguajë këtë shifër ndërkohë që spanjollet ofrojnë mundësinë e huazimit me detyrim blerje.

Një tjetër objektiv i kuqezinjtë është mesfushori Mateo Kovaçiç, i rikthyer nga huazimi tek skuadra e Chelsea. Nëse kroati do të transferohej tek Milan do të ishte një rikthim në kampionatin Italian pasi më parë ka mbajtur veshur fanellën e Interit. Një tjetër futbollist i Real Madrid është me valixhe ne duar. Bëhet fjalë për mesfushorin Isko i cili nuk shihet si titullar nga trajneri Zidane. Milan kërkon të tentojë por vështirësitë janë maksimale për të veshur kuq e zi mesfushorin spanjoll./ABC News Albania 24/7

realii.jpg
nev ila20:50 | 13/06/2019

Investimet e shfrenuara të presidentit te Real Madrid, Florentino Perez pritet të pasohen nga një seri largimesh. Nuk do të kursehen Bale, Marcelo apo Isco.

Real Madrid është skuadra me aktive në merkato. Gjigandi spanjoll ka shpenzuar mbi 300 mln euro për katër lojtarë si Hazard, Militao, Joviç Mendy dhe Rodrigo. Afrime të cilat priten të pasohen nga disa largime ku nuk do të kursehen lojtarët si Bale apo Marcelo. Real Madrid nuk preferon të shkelë rregulloren e fair play financiar. Në listën e drejtuesve të Real Madrid për tu larguar nga Santiago Bernabeu janë:

James Rodriguez, Gareth Bale, Mateo Kovacic dhe Marcelo Lucas Vasquez, Mariano Diaz , Keylor Navas, Dani Ceballos, Marco Llorente, Nacho Fernandez, Jesus Vallejo, Teo Hernandez, Borja Mayoral, Raul de Tomas, Luca Zidane dhe Luca Silva.

Madrilenet pritet të gjenerojnë shuma të majme nga shitja e disa prej tyre. Gareth Bale pritet të rikthehet në kampionatin anglez  tek ish skuadra e tij Totenham ose Mancheater United që është favorit pasi përmbush kërkesat financiare të uellsianit.

Real ka synimin e qartë, të ul nga froni i la ligas rivalet e përbetuar të Barcelones të cilët kanë dominuar për vite me radhë futbollin iberik. Trajneri Zidane e ka theksuar se prioritet i klubit madrilen për sezonin e ardhshëm është triumfi në kamopionatin spanjoll./ABC News Albania 24/7

jovic.jpg
G. P.23:22 | 12/06/2019

Luca Joviç është përforcimi më i ri i skuadrës së Real Madrid. Sulmuesi serb u transferua te gjigandi spanjoll për shifrën e 60 milionë eurove.

Luka Joviç është përforcimi më i ri i skuadrës së Real Madrid. 21-vjeçari kaloi me sukses vizitat mjekësore e më pas u prezantua para tifozëve në “Santiago Bernabeu”.  Në impiantin e gjigandit spanjoll u mblodhën me mijëra tifozë për t’i dhënë përshëndetjet e para yllit të skuadrës. Joviç u transferua te Real Madrid për shifrën e 60 mln eurove.

Operacioni i nënshkrimit të Joviç me klubin mbretëror rezultoi i suksesshëm falë edhe ndërhyrjes së agjentit të lojtarit i cili është me origjinë shqiptare, Fali Ramadani. Në fjalët e para si madrilen, Joviç nuk bën premtime të kota, por shprehet se do të japë më të mirën e tij.

“Jam shumë i lumtur që firmosa për Real Madrid. Do të përfaqësoj skuadrën më të madhe në botë. Kam fjetur me fanellën e Real Madrid dhe ëndërroja gjithmonë të luaja për këtë skuadër. Nuk dua të jap një shifër konkrete për numrin e golave që mund të shënoj, por do të jap më të mirën time dhe do të tregoj të gjithë potencialin tim. Nuk e shoh Benzemanë si nje rival, por si shok skuadre. Ronaldo është idhulli im. Ëndrra ime tashmë është të fitoj Champions League”, përfundon fjalën e tij talenti 21-vjeçar i Real Madrid, Luka Joviç./ABC News Albania 24/7

hazard1.jpg
G. P.10:41 | 08/06/2019

Eden Hazard është blerja më e shtrenjtë në historinë e Realit të Madridit. Gjithsesi, ende nuk dihet shuma e saktë që klubi spanjoll do të paguajë për talentin nga Belgjika.

Sa është shifra e vërtetë e këtij transferimi?

E sigurt është që Eden Hazard do të veshë fanellën e Realit sezonin e ardhshëm, në bazë të një kontrate 5-vjeçare. Klubi madrilen dha njoftimin zyrtar në faqet e tij në rrjetet sociale, duke i uruar mirëseardhjen yllit të madh të Belgjikës, e po ashtu vetë Hazardi iu drejtua me një letër lamtumire tifozëve të Çelsit, duke i falenderuar e duke deklaruar se vetëm Reali e detyroi të braktiste fanellën blu.

Kontradiktore është shifra që jepet për transferimin më të madh në historinë e Realit. Mediat britanike, në 6 Qershor, flisnin për 130 milionë paundë stërlina, që do të thotë mbi 147 milionë euro, një rekord i madrilenëve, duke lënë pas blerjet shumë të shtrenjta të Garet Bejlit dhe Kristiano Ronaldos.

Së fundmi, tabloidi “Deili Meil” ofroi rekordin e ri të “Santiago Bernabeut”, me 150 milionë paund stërlina, apo plot 170 milionë euro.

Cila është e vërteta?

Fillimisht, për Hazardin do të jepen 100 milionë euro, ndërsa pjesa tjetër do të jetë në formë shpërblimesh të ndryshme, diçka që konsiderohet lehtësisht e arritshme për nivelin e Hazardit.

Transferimi i numrit 10 të Belgjikës do të jetë gjithsesi, blerja e tretë më e shtrenjtë e historisë, pasi rekordin e mban Nejmar për të cilin Paris SG i pagoi Barcelonës 222 milionë euro, ndërsa i dyti është Kilian Mbape, për të cilin Monakos iu dhanë 180 milionë euro, po nga Paris SG./ABC News Albania 24/7

HAZARD-PRANE-KALIMIT-TE-REAL-MADRIDID-1280x720.jpg
ent ela23:30 | 06/06/2019

Kalimi i belgut Eden Hazard tek skuadra e Real Madrid është vetëm çështje kohe. Mediat në Spanjë e bëjnë fakt të kryer nënshkrimin e 28 vjeçarit me 13 herë kampionet e Europës. Eden Hazard i cili mbajti veshur fanellën e Chelseat për plot 7 sezone do të kalojë në Santiago Bernabeu për shifrën e 100 mln eurove plus bonuset. Lojtari në fjalë dhe drejtuesit e skuadrës spanjolle kanë gjetur akordin për një kontratë pesë vjeçare ku do të shndërrohet në një nga lojtarët më të paguar në botë. Marrëveshja mes palëve është arritur të mërkurën ndërkohë që të enjten pritet edhe konfirmimi zyrtar nga vetë gjigandi spanjoll i futbollit. Eden Hazard cilësohet si pasuesi ideal i Cristiano Ronaldos i cili u largua nëdrejtim të Juventusit verën e kaluar. Real Madrid vuajti jo pak nga mungesa e golave të portugezit dhe kjo u pa qartë në sezonin që sapo u mbyll. Eden Hazard ishte një ndër kërkesat kryesore që trajneri Zinedine Zidane i kishte bërë drejtuesve të klubit. Belgu pritet të mbajë mbi shpinë fanellën me numrin 7. /ABC News Albania 24/7

madrid.jpg
G. P.23:45 | 04/06/2019

Reali i Madridit bën blerjen e parë të madhe të verës. Sulmuesi Luka Joviç merret për 65 milionë euro nga Frankfurti i Gjermanisë.

E nisi rrugën nga një qytet i vogël boshnjak, për të mbërritur në kryeqytetin e futbollit. Luka Joviç, një sulmues 21-vjeçar serb, e arriti tepër shpejt kulmin e karrierës, për të luajtur në klubin më të madh të botës, Realin e Madridit. Klubi i tij, Eintracht i Frankfurtit dhe spanjollët arritën një akord mbi bazën e 60 milionë eurove, plus 5 milionë të tjerë në bazë të rezultateve.

“Luka Joviç është një madridist, – njoftoi zyrtarisht Reali në faqen zyrtare në Instagram, – Reali dhe Frankfurti arritën akordin për transferimin e futbollistit, ndërsa pritet vizita mjekësore”.

Historia e tij është ajo që mund të ishte e çdo fëmije shqiptar, që dëshiron të bëhet futbollist profesionist. Lindi në qytetin e Bijeljinës, në Republikën Srpska të Bosnjë-Hercegovinës, por shpejt kaloi në Beograd, ku u formua tek klubi kryesor, Crvena Zvezda.

Sakrificat e babait Milan dhe nënës Svetlana nuk shkuan kot, siç ndodh shpesh në Shqipëri, pasi kultura e akademive të futbollit në Serbi nuk e lejoi një gjë të tillë. Familja Joviç u pagua me 50 euro për çdo ndeshje që fëmija i tyre i vogël do të luante, si dhe iu mbulua shpenzimi i rrugës Bijeljina-Beograd e kthim.

Pas 3 sezonesh me Zvezdën, ai kaloi tek Benfika, ku luajti shumë pak me ekipin e parë, por ku ra në sy për talentin. Frankfurti nuk ngurroi aspak ta merrte hua, dhe basti doli fitues.

Në tre sezone ai erdhi duke e rritur lojën e tij, fitoi Kupën e Gjermanisë vitin e kaluar dhe ndihmoi ekipin të arrinte në gjysmëfinale të Ligës së Europës. Tashmë, golat e tij do të jenë për Realin, klubin e madh që ka nevojë të zëvendësojë rrjetat e munguara të Cristiano Ronaldos. Në Spanjë theksojnë se madrilenët më në fund morën një numër 9 tipik, 10 vjet pasi morën Karim Benzemanë./ABC News Albania 24/7

spanje.jpg
G. P.22:27 | 28/05/2019

Spanja është përfshirë nga një skandal i trukimit të ndeshjeve. Nën pranga kanë përfunduar drejtues klubesh dhe ish-futbollistë. Ndër të arrestuarit është edhe ish-lojtari i Real Madrid, Raul Bravo.

Spanja trondiet nga një skandal trukimesh i përmasave të mëdha. Autoritetet spanjolle kanë arrestuar shumë persona madje edhe figura të njohura të futbollit europian. Nën pranga kanë përfunduar disa drejtues klubesh, por edhe futbollistë.

Lajmi i bujshëm është arrestimi i ish-mbrojtësit të Real Madrid, Raul Bravo, i cili ka mbajtur veshur fanellën madrilene për plot 6 sezone. Ish-futbollisti i Realit konsiderohet përgjegjësi kryesor i grupit. Është arrestuar edhe Borja Fernandez, i cili është tërhequr nga futbolli vetëm pak kohë më parë.

Sezonin e kaluar u aktivizua me skuadrën e Valladolid president i së cilës është braziliani Ronaldo. Nën pranga ka përfunduar një ish-lojtar i formuar në akademinë e Real Madrid, Karlos Aranda ashtu sikurse Samu Ruiz dhe Inigo Lopez, i cili ka luajtur më parë me Atletiko Madrid.

Gjatë operacionit, policia ka bastisur zyrat e Hueskas ku është arrestuar presidenti Agustin Lasaosa dhe mjeku i skuadres Lanuza.  Të arrestuarit akuzohen për trukime ndeshjesh, korrupsion dhe pastrim parash./ABC News Albania 24/7

ramos.jpg
G. P.22:04 | 27/05/2019

Sergio Ramos kriset me presidentit Perez dhe nuk përjashtohet mundësia e largimit nga Real Madrid. Juventus ka gati planin për rikthimin e Pogba në Torino.

Shtohen zërat e një krisje të mundshme mes kapitenit të Real Madrid, Sergio Ramos dhe presidentit Florentino Perez. Mediat spanjolle raportojnë se qendër mbrojtësi iberik është drejt lamtumirës me skuadrën që ka luajtur për plot 14 sezone me radhë, që nga viti 2005, kur u largua nga skuadra e Sevillas.

Pak ditë më parë u fol për një kalim tek skuada e Juventusit në kampionatin italian ku do të bashkohet me ish-shokun e tij Cristiano Ronaldon, por tashmë dalin detaje të reja në lidhje me të ardhmen e 33-vjeçarit. Ramos ka marrë një ofertë të majme nga kampionati kinez dhe nuk përjashtohet opsioni i transferimit në Kinë.

Juventus ka në përbërje një nga talentet e së ardhmes. Bëhet fjalë për sulmuesin Moise Kean dhe lëvdatat në drejtim të 19-vjeçarit nuk kanë munguar për asnjë moment. Sulmuesit bardhezi i skadon kontrata në sezonin e ardhshëm dhe drejtuesit e zonjës së vjetër kërkojnë që futbollisti të rinovojë deri në vitin 2024. Natyrisht me një rritje të pagës deri në tre milionë euro në sezon, palët janë shumë pranë marrëveshjes.

Paul Pogba është një dëshirë e madhe në shtëpinë bardhezi për ta parë sërish kampionin e botës me Francën me ngjyrat bardhezi. Drejtuesit e klubit torinez po mendojnë për një shkëmbim të bujshëm. Juventus propozon dyshen Dybala-Sandro për të arritur te mesfushori i Manchester United. Një propozim që pritet të tundojë jo pak drejtuesit e skuadrës angleze pasi të dy lojtarët e Juventusit janë në listën e dëshirave të klubit.

Mbappe dhe Neymar më shumë mundësi nuk do të largohen nga PSG në merkaton e verës. Paralajmërimet për një përjashtim të mundshëm të klubit francez për shkak të mosrespektimit të Fair Play Financiar ka ndryshuar strategjinë e skuadrës. Për të ofruar lojtarë të rinj në skuadër më parë duhen shitur, por presidenti Al Khelaifi i cilëson si të paprekshëm dy sulmuesit e skuadrës ndaj të sakrifikuesit mund të jenë futbollistët e tjerë./ABC News Albania 24/7

rb.jpg
G. P.18:02 | 19/05/2019

Reali mbylli me humbje sezonin më negativ të shekullit të 21-të. Skuadra e Zidanit u mposht nga Betisi në Madrid, ndërsa ka dyshime të mëdha për edicionin e ardhshëm

Më në fund, përfundoi. Një vit i tmerrshëm, “anus horribilis”, u mbyll për klubin më të madh të botës në futboll, Realin e Madridit, dhe përfundoi ashtu siç e meritonte. Me humbje, madje brenda në “Santiago Bernabeu”, i mposhtur nga Betisi, 0-2.

Me Championsin të siguruar prej kohësh, por pa asnjë trofe të rëndësishëm për të luftuar, Reali thjesht nuk ishte vetvetja, edhe pse prej muajsh drejtohet nga një emër I madh si Zinedine Zidane.

Nuk është se nuk pati emra të shquar në fushë. Kejlor Navas, Marcelo, Carvajal, Modriç, Benzema apo Vinicius mund të mjaftonin për të shmangur turpin e radhës, veçse, siç tha Zidane më pas, problem ishte motivimi.

Loren Moron dhe Jese shënuan pas pushimit për Betisin, me trajnerin Kike Setien që arriti të fitonte edhe në “Bernabeu”, pasi ia doli në “Kamp Nou”.

Me 68 pikë në 38 ndeshje, me vetëm 63 gola të shënuara dhe plot 46 të pësuar, skuadra madrilene i dha fund sezonit më të keq të shekullit të 21-të, dhe njërit nga negativët në gjithë historinë e tij.

“Nuk është se nuk deshëm ta fitonim ndeshjen, – tha trajneri pas humbjes, – nuk ishim në gjendje që të fitonim, është çështje motivimi. Gjëja më e mirë që ndodhi është që sezoni përfundoi dhe mund të mendojmë për të ardhmen. Duhet ta pranojmë këtë edicion kështu siç ndodhi, madje do të na ndihmojë në vazhdim. Gjithsesi, jam i bindur se do të ndryshojmë dhe do të ngrihemi”.

Pyetja është e thjeshtë, e drejtpërdrejtë dhe që të tremb: A do të ketë reagim të shpejtë, sepse vetëm kështu e do tradita e klubit, dhe tifozët e tij të paduruar? E sigurt është që do të ketë ndryshime të mëdha, me mjaft lojtarë të larguar dhe me përforcime të rëndësishme, por kjo nuk garanton sukses që sezonin e ardhshëm./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono