Real Madrid

bayern.png
G. P.22:03 | 07/10/2018

Dy prej skuadrave më të mëdha të Europës po kalojnë një moment tepër të vështirë. Reali dhe Bajerni pësuan humbje në kampionat, ndërsa trajnerët rrezikojnë shkarkimin.

Është shumë herët, por nëse nuk reagohet do të jetë tepër vonë.

Dy nga klubet më të mëdhenj të Europës dhe të botës, Reali dhe Bajerni, janë në të njëjtin moment, atë më të keqin e mundshëm.

Madrilenët u mposhtën në fushën e Alaveshit, minimalisht 0-1, me gol të pësuar në sekondat e fundit, ndërsa katastrofa e bavarezëve ishte shumë më e rëndë, 0-3 në Mynih ndaj Borusias së Mynshengladbahut.

Skuadra spanjolle ka më shumë se 4 ndeshje që nuk shënon, diçka krejt e paimagjinueshme, ndërsa ka pësuar 3 humbje në 4 sfidat e fundit.

Mediat natyrshëm nuk e kursyen.

“Marka”: Krizë e Realit! Madridi është ndaluar, 7 orë pa shënuar gol, dhe me 3 humbje në 4 ndeshjet e fundit!

“AS”: Keq e më keq! Një Real pa reagim dhe pa besim, u rrëzua ndaj Alaveshit pikërisht në fund!

Gëzohet  “El Mundo Deportivo” në Barcelonë: Krizë e Realit! Të bardhët, 4 ndeshje pa gol, diçka që nuk ndodhte prej 33 vjetësh!

Çfarë po ndodh në Madrid?

Trajneri Lopetegi deklaroi se “e quaj veten fajtorin numër 1 dhe marr përgjegjësinë, por së pari dëshiroj që të rikuperojmë lojtarët e dëmtuar”.

Garet Bejl, Karim Benzema apo Karvahal janë disa nga të lënduarit, por besohet se standardi ka rënë që pas largimit të Kristiano Ronaldos, që nuk u zëvendësua me një emër të madh.

Në Gjermani, kriza mund të quhet më e madhem, dhe pse Bajerni zakonisht e ka më të lehtë në Bundesligë.

Ndaj Gladbahut ishte një katastrofë, me 3 gola të pësuar dhe asnjë të shënuar, ndërsa Dortmundi pëfitoi dhe nisi shkëputjen në krye.

Mediat informojnë se në Bavari ka lëvizje.

Gazeta “Bild”: Goditje krize tek Bajerni! Takim i vëllezërve Kovaç me drejtorin Salihamixhiç!

Sërish “Bildi”: Çfarë do të bëjnë drejtuesit e Bajernit me trajnerin Kovaç?!

“Zydojçe Cajtung” e Mynihut: Kujtimet e këqija të vjeshtës! Trajneri Kovaç punon me më shumë kujdes sesa paraardhësi Ançeloti, por skuadra e tij është po aq e pasuksesshme sa një vit më parë. Ai ka nevojë urgjente për një plan në sulm!

“Unë e di se koha tek Bajerni ecën ndryshe, – pohoi Kovaç pas humbjes, – u thashë lojtarëve disa fjalë, por ato le të mbeten brenda nesh. Na ndodhi e njëjta gjë si ndaj Augsburgut dhe Hertës, dhe për këtë duhet të reagojmë sa më shpejt. Jam përgjegjës dhe e pranoj sfidën”.

“Ky nuk është Bajerni që njoh”, – tha kapiteni Manuel Nojer, me një shigjetë që ndoshta i drejtohej trajnerit, por ndoshta edhe lojtarëve dhe vetes së tij.

Bajerni është në vend të pestë në renditje, edhe pse diferenca prej 4 pikësh me Dortmundin mund të rikuperohet./abcnews.al

messi.png
G. P.16:26 | 30/09/2018

Barcelona dhe Reali i Madridit po kalojnë krizë rezultatesh në ligën spanjolle. Kritikat janë të shumta, ndonëse dy skuadrat mbeten në krye të kampionatit.

Kur Messi e nis nga stoli, diçka nuk shkon.

Nuk mund të imagjinohet një Barcelonë pa të në fushë, veçse normalisht që mund të ketë ndeshje kur mund të mos luajë.

Ja pra, që katalanasit nuk qenkan të përgatitur për këtë ditë.

Barazuan 1-1 në “Camp Nou” ndaj Atletikut të Bilbaos, duke rrezikuar të humbisnin, ndërsa vazhdojnë krizën e rezultateve dhe të paraqitjeve në La Liga.

Jo më kot, gazeta “Marca” theksonte në një opinion se “jeta është e vështirë pa Xavin dhe Iniestën”, me dy stërtalentet të larguar tashmë nga Barça.

U desh futja e Messi-t në lojë pas pushimit, që të shihnim ekipin që kemi parë gjithnjë.

Karakteri dhe etja gjithnjë e pashuar për fitores e argjentinasit, ndryshoi ndeshjen, edhe pse fati nuk ishte me kampionët.

U goditën dy herë shtyllat, por më në fund goli erdhi.

Realizues ishte El Hadadi, por pas këmbënguljes së dyfishtë të Mesit.

Barça mbeti në krye edhe pas takimit të tretë radhazi që nuk fiton, ndërsa kapiteni u përpoq të qetësonte ambientin.

“Nuk jemi të shqetësuar, sepse sezoni është i gjatë dhe është vetëm fillimi, por jemi të inatosur për rezultatet e fundit. Ne nuk i prisnim këto rezultate. Në ndeshjen e kaluar ne luajtëm mirë në pjesën e parë, por humbëm, ndërsa këtë herë krijuam shumë raste, por nuk fituam. Gjithsesi, duhet të jemi shumë më të fortë në mbrojtje”.

Mediat spanjolle, u morën direkt me katalanasit, por edhe me Realin që barazoi në derbin ndaj Atletikos.

“Marka” titullon për derbin: Dy portierë të mëdhenj, dhe një ligë pa padron!

“AS”: Derbi i portierëve! As Modriç dhe as Griezman nuk ishin në nivelin e Cristianos apo Messit”

“El Mundo Deportivo”: Kryesues! La Liga vazhdon po e njëjta! Barça merr vetëm 2 pikë nga 9, por mban kreun pas ndalesës së Realit!

“Sport”: Kryesues, pavarësisht gjithçkaje! Barça vazhdon ecurinë negative, por shpëton një pikë falë Messit!

Reali nuk mundi të përfitonte nga ndalesa e Barçës, pasi u ndalua për vete.

Atletiko e Madridit mbeti “mace e zezë”, duke i marrë barazimin pa gola në “Bernabeu”, pasi e mundi në finalen e Superkupës së Europës.

Kampionët e Europës ishin më mirë se kundërshtari, por nuk mundën të shënonin, dhe pas pushimit shumë tifozë thirrën në kor emrin e Kristiano Ronaldos.

Pas 7 javëve në La Liga, Barcelona kryeson me 14 pikë, po aq sa Reali, por Sevilja dhe Atletiko janë shumë pranë./abcnews.al

messs.png
G. P.11:55 | 27/09/2018

Lionel Messi dhe Luka Modriç pësuan disfata të rënda në ndeshjet e fundit të ligës spanjolle. Barcelona dhe Reali u mundën papritur, ndërsa rrezikojnë të mos jenë rivalët e vetëm për titull

Nuk kishte ndodhur, besohet, ndonjëherë, që fituesi i Çmimit të FIFA-s dhe ai që quhet lojtari më i mirë i botës, të turpërohen në të njëjtën mbrëmje.

Kjo, madje pak ditë pas ceremonisë së FIFA-s në Londër. Luka Modriç, fituesi i Çmimit, dhe Lionel Mesi, i besuar gjerësisht si numëri 1 i futbollit botëror, pësuan humbje tronditëse në La Liga edhe pse luajnë me dy skuadrat më të mira.

Më herët e pësoi Messi, kur Barcelona në mënyrë të pabesueshme u mposht në stadiumin e Leganjesit modest, që e nisi javën në vendin e fundit. Filip Coutinho kaloi Barçën përpara, por për 68 sekonda në pjesën e dytë, vendasit përmbysën shifrat.

Nabil El Zhar barazoi në 52’, ndërsa goli i dytë u realizua nga Oskar Rodrigez, i huazuar tek Leganjes nga Reali i Madridit. Ky ishte rezultati i dytë radhazi negativ për Barcelonën, diçka që ngre dyshime për aftësinë e skuadrës së trajnerit Valverde për ta mbrojtur titullin e fituar vjet.

Vetë madrilenët ndoshta do të kishin pasur nevojë për të huazuarin Oskar Rodrigez në Sevilje, ku Luka Modriç kaloi një nga mbrëmjet më të këqija të karrierës.

Rezultati përfundimtar ishte një katastrofë 0-3, ndërsa lojtari më i mirë i sezonit në botë nuk arriti të jepte të zakonshmen e tij, mori karton të verdhë për protesta, dhe përfundimisht u zëvendësua nga trajneri Lopetegui.

Reali humbi një mundësi të madhe, ndërsa tre golat e pësuar në 90 minuta ishin një paralajmërim. Andre Silva shënoi dy herë për Seviljen, ndërsa një herë e bëri Ben Jeder.

Barcelona e Reali mbeten në krye të La Ligës me nga 13 pikë, por tashmë Atletiko e Madridit është vetëm 2 pikë larg, pra ndoshta mund të jetë viti I duhur për të besuarit e trajnerit Diego Pablo Simeone./abcnews.al

isco.jpg
G. P.16:14 | 19/09/2018

Reali i Madridit rikthehet në Ligën e Kampionëve pas suksesit të vitit të kaluar. Skuadra e madhe spanjolle pret Romën në orën 21:00, ndërsa këtë vit është pa Ronaldon dhe trajnerin Zidane.

Thuajse kushdo do të ishte ende në eufori të plotë pas këtij momenti.

Fitorja e Champions-it është një nga mrekullitë më të mëdha dhe më të vështira në jetën e një lojtari e të një ekipi, veçse tek Reali, relativiteti ndihet më shumë.

Madrilenët e kuptojnë më së miri teorinë e jashtëzakonshme të Ajnshtajnit, se kjo botë është gjithnjë në lëvizje dhe se për hir të së sotmes, duhet të harrosh të shkuarën.

Do të thotë se përqëndrimi duhet të jetë totalisht tek ndeshja e parë e sezonit, sonte ndaj Romës në orën 21:00.

Në Maj u fitua titulli i 13-të kampion i Europës, një rekord që mund të quhet i paarritshëm dhe trajneri i ri, Lopetegui dëshiron ta nisë aty ku e la Zinedine Zidane, duke mos pasur Cristiano Ronaldon.

“Nuk ka nevojë të sqaroj se çfarë do të thotë kjo garë për ne dhe se çfarë do të thotë Reali i Madridit për Champions-in. Le të flasim për ndeshjen sotme ndaj Romës, një kundërshtar që do të na e bëjë shumë të vështirë fitoren. I bëj thirrje më shumë entuziazmit dhe padyshim ambicies së lojtarëve. Vjet, Roma eleminoi Atletikon në grup dhe Barcelonën në çerekfinale. Ajo është përmirësuar edhe më shumë, ndaj pres që ta kemi shumë të vështirë. Duhet të lodhemi shumë për të fituar”, tha ai.

Roma u përgatit këto ditë, duke e ditur mirë se çfarë detyre e pret.

Për fat, trajneri Di Françesko nuk ka probleme me dëmtimet dhe pezullimet.

Po ashtu, italianët udhëtuan drejt Madridit, me besim pasi vjet mundën Atletikon, Chelsea-n dhe Barcelonën.

“Shqetësimi im më i madh tani për tani është mbrojtja, ku duhet të përmirësohemi shumë. Pa mbrojtje të fortë nuk mund të fitosh, sidomos kur luan në këto nivele dhe në fushën e Realit. Vitin e kaluar në arritëm diçka të jashtëzakonshme, që askush nuk besonte se do ta arrinim, por tani pretendimet janë rritur. Kjo do të thotë se ne duhet të paraqitemi edhe më mirë se vjet. Jemi në Madrid për rezultat, por jam i bindur se Reali është kundërshtari më i fortë i mundshëm dhe se do të vazhdojë të fitojë edhe pa Ronaldon”.

Dy skuadrat janë ndeshur 10 herë në të kaluarën, me Realin që ka 6 fitore dhe Romën tre, ndërsa një përballje është mbyllur në barazim./abcnews.al

Lionel-Messi-664349.jpg
G. P.22:40 | 03/09/2018

FIFA ka përcaktuar tre lojtarët që do të garojnë për çmimin e lojtarit më të mirë në botë. Favorit është Luka Modriç, ndërsa jashtë konkurrimi mbeti Lionel Messi.

Tashmë është zyrtare.

Ashtu si në konkurrimin për lojtarin e vitit në Europë, Lionel Messi mbeti jashtë.

Është hera e parë që nga viti 2007 që superylli i Barcelonës nuk përzgjidhet, ndërsa në garë do të jenë Luka Modriç, Cristiano Ronaldo dhe Mohamed Salah.

Kapiteni i Kroacisë u vlerësua ashtu si nga UEFA, për kontributin e jashtëzakonshëm që dha për ekipin kombëtar, duke e udhëhequr deri në finalen e Kupës së Botës.

Po ashtu, edhe për paraqitjet e tij me Realin e Madridit, duke dalë kampion i Europës.

Cristiano Ronaldo përfshihet po ashtu në këtë garë, duke vazhduar të jetë çdo vit që nga 2007-a, pra duke lënë prapa Messin.

Ai ishte shënuesi kryesor i Realit që doli kampion i Europës, duke shënuar 15 gola, dhe për më tepër realizoi edhe 4 herë në Botërorin rus.

Mohamed Salah, ndërkaq, është një emër që shkëlqeu sidomos sezonin e fundit me Liverpool-in dhe me Egjiptin, duke arritur finalen e Championsit dhe duke qenë në fazën finale të Kupës së Botës.

Ashtu si në garën për çmimin e lojtarit më të mirë në botë, favorit cilësohet Luka Modriç, ndërsa nuk dihet nëse Ronaldo do ta respektojë ceremoninë apo do ta braktisë, siç bëri me atë të UEFA-s.

Përsa i përket lojtares më të mirë femër të botës, FIFA ka përzgjedhur treshen e përbërë nga Ada Hegerberg e Norvegjisë, Xhenifer Maroshan e Gjermanisë, dhe Marta e Brazilit.

Marta është edhe rekordmene me 5 çmime të fituar në karrierë./abcnews.al

juventus.jpg
ent ela19:42 | 02/09/2018

Cristiano Ronaldo vazhdon të jetë në krizë goli në Serinë A. Trajneri i Juventusit, Alegri, tregon se përse portugezi nuk po shkëlqen si në Spanjë.

Të vetmit gola i ka shënuar në stërvitje.

Cristiano Ronaldo nuk e kishte menduar se do të kalonin tri ndeshje të Serisë A, pa e gjetur rrugën e rrjetës.

Për fat të keq, ky është realiteti dhe duket sikur portugezi e ka lënë në Madrid aftësinë për të realizuar.

Pas Chievos e Lazios, ja edhe Parma nuk e lejoi, ndërsa fitorja e tretë radhazi e Juventusit u arrit me golat e të paoksidueshmit, Mario Manxhukiç dhe të francezit kampion të botës, Blaise Matuidi.

Në të kundërt, në të njëjtën mbrëmje, atë të së shtunës, Reali nuk e pati aspak të vështirë të triumfonte 4-1 ndaj Leganjesit në ligën spanjolle, edhe pa CR7-n.

Madrilenët janë me mesataren mbi 3 gola për ndeshje në fillimin e kampionatit, me Karim Benzema që duket se po zëvendëson Cristianon dhe që sipas trajnerit Lopetegui mund të arrijë në 40 gola këtë sezon.

Bashkë me sulmuesin francez, shumë efikas uellsiani Gareth Bale, por edhe kapiteni Sergio Ramos që vazhdon të mos gabojë nga pika e bardhë e penalltisë.

Çfarë po ndodh me Ronaldon?

“Seria A është një kampionat i vështirë, më i vështirë për të shënuar gola sesa La Liga, – thotë trajneri juventin, Allegri, – nuk është e lehtë që të realizosh 40 gola këtu. Gjithsesi, Ronaldo luajti një ndeshje shumë të mirë dhe e ndihmoi ekipin fuqimisht. Tani do të ketë pak më shumë kohë për të pushuar dhe për t’u përshtatur”.

Duket se mënyra e lojës në Itali është problemi kryesor, pasi në 70 vjet, vetëm Gonzalo Higuain ka arritur të shënojë më shumë se 30 rrjeta në edicion, saktësisht 36.

Në Spanjë, në të kundërt, për 20 vjet me radhë, fituesi i Këpucës së Artë ka realizuar mbi 30 rrjeta, me Messi-n që ka arritur edhe 50, dhe me Ronaldon deri në 46.

Cristiano nuk e ka tek Juvja atë ndihmë të ekipit për ta dërguar topin në rrjetë, siç e kishte në Madrid./abcnews.al

ch-l.jpg
G. P.13:17 | 31/08/2018

Ceremonia e hedhjes së shortit të Championsit nuk kaloi pa polemika dhe pa momente të vështira. Cristiano Ronaldo e bojkotoi, ndërsa nuk u shpall lojtari më i mirë i Europës.

Shkëlqimi ishte i madh, por njollat iu vunë më pas.

Një karrige ishte bosh në Sallën e shkëlqyer “Grimaldi” në Montekarlo.

Një nga ata që mund të quhen princa, Cristiano Ronaldo, mungoi në ceremoninë e hedhjes së shortit të Championsit, dhe të dhënies së çmimeve të UEFA-s për sezonin e fundit.

Arsyeja?

Ronaldo nuk shkoi në Principatë pasi, me shumë gjasë, u informua se fituesi nuk ishte ai.

UEFA vlerësoi me çmimin e lojtarit më të mirë të vitit ish-shokun e tij tek Reali, Luka Modriçin.

Mesfushori u veçua për kontributin e madh tek madrilenët për Championsin, por sidomos sepse udhëhoqi Kroacinë deri në finalen e Kupës së Botës.

Kjo gjë nuk i pëlqeu aspak Ronaldos dhe njerëzve të tij.

Vetë Cristiano zgjodhi të qëndronte në Torino, në stërvitje me Juventusin, dhe në shoqërinë e familjes në mbrëmje.

Drejtori i përgjithshëm juventin Bepe Marota, i pranishëm në short, deklaroi se “ky ishte vendim personal i Ronaldos”.

Më i rëndë reagimi i agjentit të portugezit, Jorge Mendes-it.

“Është qesharake që Modriç u shpall lojtari më i mirë, tha superagjenti, Ronaldo shënoi 15 gola në Champions dhe mbajti në krahë ekipin derisa fitoi kupën”.

Përveç mungesës së CR7-s dhe reagimit të njerëzve të tij, ceremonia pati edhe një moment tjetër të vështirë, kur Sergio Ramosi u kthye në vendin e tij, pasi mori çmimin e mbrojtësit të vitit në Europë.

Spanjolli preku në sup Mohamed Salahun, që ishte ulur para tij, dhe të cilin e dëmtoi në finalen e Championsit, duke krijuar polemika të mëdha.

U duk se Salahut nuk Ii erdhi mirë, ndërsa ylli i Liverpulit ishte në garë për çmimin e lojtarit të vitit.

Vetë shorti ishte spektakolar, me grupin C, që mund të quhet “i ferrit”, pasi aty ndodhen Paris SG, Napoli e Liverpool-i, ndërsa me më pak pretendime duket Crvena Zvezda.

Edhe grupi B, aspak i lehtë, me Barcelonën, Tottenham-in, dhe Interin, ndërsa aty është edhe PSV Eind’hoven, ish-kampion i Europës.

Ronaldo dhe Juventusi do të ndeshen me Manchester Unitide e Jose Mourinho-s.

Portugezi do të jetë përballë skuadrës që e bëri yll botëror, dhe po ashtu do të takojë ish-trajnerin e tij tek Reali, me të cilin nuk është se u nda shumë mirë./abcnews.al

zinedine-zidane-man-united.jpg
G. P.17:56 | 24/08/2018

Manchester United mund të ketë një trajner të ri. Jose Mourinho është në pozita shumë të vështira, dhe atë mund ta zëvendësojë një emër i madh.

Nuk dihet edhe sa kohë mund të rezistojë.

Jose Mourinho parashikohet të kalojë një vjeshtë të vështirë tek Manchester United, madje që tani po flitet për një pasardhës. Pretenduesi i ri i stolit nuk është më sekret, mediat kanë zbuluar emrin e Zinedine Zidane.

Ish-trajneri i Realit, jo vetëm është menduar si njeriu më i përshtatshëm për të zënë vendin e Mourinhos, por mediat thonë se ai është dakord. Pozitat e trajnerit portugez janë tronditur ndjeshëm kohët e fundit, për shkak të mossuksesit sportiv, por edhe të konfliktit me zv. Shefin ekzekutiv të klubit, Ed Uduord.

Murinjo është shprehur i zemëruar me mungesën e përforcineve, duke fajësuar drejtuesit, por nga Uduord nuk ka ardhur asnjë lëshim.

Për më tepër, besohet se drejtuesi i lartë vlerësohet lart nga pronarët, pasi ka meritën kryesore që Junajtid sot vlen rreth 3.5 miliardë euro, dhe që të ardhurat vjetore janë afërsisht 700 milionë euro.

Për Mourinhon, ky është sezoni i tretë në “Old Traford” dhe ai nuk ka mundur të fitojë Premier Ligën, as Ligën e Kampionëve, dhe duket e vështirë që ta bëjë edhe këtë vit. Në të kundërt, Zidane, u largua si hero nga Reali i Madridit.

Trajneri francez, ish-futbollist i madh, fitoi tri herë radhazi Championsin, ndërsa papritur dha dorëheqje pak ditë pas triumfit të fundit, në muajin Maj të këtij viti./abcnews.al

real-getafe-1280x854.jpg
G. P.16:36 | 20/08/2018

Real Madrid fitoi me rezultatin 2–0 derbin e vogël me Getafe të dielën në hapjen e kampionatit. Nuk ishte ekipi i finales së Superkupës së Europës e humbur ndaj Atletico duke treguar më karakter në fushë.

Një zotërim i futbollistëve të Julen Lopetegui, të cilët qarkulluan topin në 78% të kohës. Skuadra duhet të funksionojë pa Cristiano Ronaldo dhe duket se liderin po e bën Gareth Bale, madje gazeta “Marca” hapet me titullin; “Bale merr komandën”.

Uellsiani shënoi një nga golat në këtë takim, ndërsa tjteri u realizua nga Dani Carvajal.

Julen Lopetegui, trajner i Real Madrid:Jemi të lumtur që nuk i dhamë mundësinë kundërshtarit dhe patëm shumë shanse shënimi. Duhet të vazhdojmë të punojmë dhe mbi të gjitha është ekipi pastaj talenti individual dhe kjo vlen edhe për Bale”.

Me fitore e nisi edhe Barcelona që me Lionel Messi kapiten triumfoi 3–0 me Alaves të premten. Messi realizoi 2 gola, njëri prej tyre ishte i 6000 për skuadrën katalanase në La Liga./abcnews.al

modricccc-1280x720.jpg
G. P.16:14 | 04/08/2018

Reali nuk do të lejojë largimin e kroatit Luka Modriç për tek Interi. Klubi madrilen e cilëson të pazëvendësueshëm lojtarin më të mirë të Kupës së Botës në Rusi.

Italianët kanë shpresë të shtojnë edhe një kroat tjetër, por duket e vështirë. Luka Modriç, superylli kroat, nuk pritet ta ketë të lehtë të largohet nga Reali edhe pse dëshira e tij duket se është Interi.

Presidenti Florentino Perez dhe trajneri Julen Lopetegui kanë diskutuar mes tyre dhe kanë vendosur se regjisori 32-vjeçar është i pazëvendësueshëm për kampionët e Europës.

Lopetegui kërkon një lojë të shpejtë e vertikale, dhe për këtë janë të domosdoshëm lojtarë të mesfushës si Modriç, Kross apo Casemiro, baza e suksesit të deritanishëm.

Perez ka ritheksuar se do të duhen plot 750 milionë euro për ta lejuar kroatin që të largohet, ndryshe nga lëshimi që bëri për Cristiano Ronaldon, duke pranuar diçka më shumë se 100 milionë.

Serioziteti i Madridit duket nga fakti se Perez apo Lopetegui nuk kanë bërë asnjë përpjekje për të gjetur një zëvendësues për numrin 10. Modriç ka 6 vjet me Realin dhe ka fituar gjithçka, veçse mosha e tij gati 33-vjeçare nuk i ka stepur drejtuesit madrilenë.

Botërori e tregoi qartë se në rruzull, sot për sot, nuk ka asnjë të ngjashëm me të. Jo më kot, kapiteni i Kroacisë u shpall lojtari më i mirë i Kupës së Botës në Rusi, dhe arriti finalen./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono