Real Madrid

juventusio.jpg
gra moz13:40 | 03/04/2018

Juventus-Real Madrid është sfida më e madhe e çerekfinaleve të Ligës së Kampionëve. Dy emrat e mëdhenj ndeshen sonte në Torino, dhe spanjollët cilësohen si favoritë për kualifikimin.

Kështu duan të jenë kurdo, përmbi re. Futbollistët e Realit jo më kot janë kampionë të Europës, dhe veten e mendojnë mbi gjithë të tjerët. Të vënë në dyshim të fortë në ligën spanjolle, madrilenët duan të tregojnë epërsinë e tyre në Champions, ndërsa luajnë ndeshjen e parë çerekfinale në fushën e Juventusit.

Përqëndrimi i ekipit spanjoll u duk i plotë, në udhëtimin drejt stadiumit “Alianc Arena”, ku u përgatitën për herë të fundit për sfidën që i pret. Trajneri Zinedin Zidane e pa të arsyeshme t’u fliste kampionëve të tij. Francezi dha këtë mesazh motivues.

Zinedine Zidane: “Ju e dini që ky është futboll, e kemi bërë gjithnjë. Të jemi të gjithë të bashkuar, shumë të fortë. Na duhet të jemi të përqëndruar, sikur po luajmë një finale. Ne na kënaq vetëm të fitojmë tituj dhe të tregojmë se jemi më të mirët”.

Trajneri francez, ish-lojtar i Juventusit për 5 vjet, vlerëson kundërshtarin si shumë të fortë, dhe tregon se çfarë duhet të bëjë ekipi i tij për t’ia dalë.

Zinedine Zidane: “Duhet të zhvillojmë një ndeshje të mirë, kjo është e vetmja porosi e imja për lojtarët. Kështu kemi bërë gjithnjë dhe mendoj se jemi të përgatitur për ta bërë. Gjithsesi, këto ndeshje nuk kanë të bëjnë aspak me atë që ndodhi disa muaj më parë. Ajo që shkoi, shkoi, ndaj duhet të mendojmë vetëm për ndeshjen e radhës. Nuk mund të spjegoj se përse Reali ka fituar 2 finalet ndaj Juventusit, ndërsa është eleminuar kur ka luajtur dy ndeshje. E them sërish se mendoj vetëm për ndeshjen e radhës”.

Harmonia në ekip mendohet të jetë vendimtare në nivele të tilla, por tek Reali ka një çështje “Isko”, me lojtarin që ankohet se luan pak.

Zinedine Zidane: “Isko është një lojtar shumë i rëndësishëm për mua. Ndoshta, është më ndryshe në kombëtare sepse në një vit atje luhen 8 ndeshje, ndërsa tek Reali luhen 60 takime, shpesh herë një herë në tri ditë. Koncepti im është që nuk ka titullarë dhe rezerva, kam 25 lojtarë që për mua janë të gjithë njësoj, dhe uroj që edhe futbollistët të mendojnë kështu”.
S

fida e dyfishtë është padyshim një klasike europiane. Rivalët janë ndeshur shpesh që nga fillimi I viteve 60-të, dhe bilanci i tyre është thuajse i barabartë, në gjithçka.

Ka një dallim, sidoqoftë. Reali i ka fituar të dyja finalet mes tyre, në 1998 dhe në 2017. Nga ana tjetër, Juventusi është kualifikuar katër herë kur duelet kanë qenë me dy ndeshje. Kampionët e Italisë mund të thuhet se vijnë në përballje në momentin më të mirë. Të rikthyer në krye të Serisë A, madje me diferencë me Napolin, dhe finalistë të Kupës së Italisë. Shqetësimi i vetëm është loja jo edhe aq bindëse, siç ndodhi ndaj Totenhemit apo Milanit. Trajneri Alegri, sidoqoftë, kërkon vetëm një gjë nga lojtarët e tij.

Massimiliano Allegri: “Kemi përballë skuadrën që luan pa ndërprerje në Champions që nga viti 1996, që arrin të paktën në gjysmëfinale që nga viti 2011, dhe që është më e forta dhe favorite në Champions. Duhet të kemi ambicien që të luajmë si të barabartë dhe që ta mundim. E kemi studiuar finalen e humbur në Kardif, dhe duhet të jemi më të fortë psikologjikisht. Tani është ndryshe, pasi luhet me dy ndeshje, ndaj dhe duhet të mbetemi në lojë deri në fund, pasi kualifikimin duhet ta marrim në Madrid”.

Një nga shtyllat juventine, Xhorxho Kielini, ka besim pavarësisht nga ajo që ndodhi në Kardif.

Giorgio Chiellini: “Nuk mund të flasim për hakmarrje, pasi gjithë këta vjet kemi fituar dhe jemi mundur me gjithë ekipet e forta. Duam të fitojmë sepse duam të fitojmë Championsin, dhe që ta bësh këtë, do të duhet të përballesh me Barcelonën, Realin apo Bajernin. Kemi përballë një nga dy ekipet më të fortë të botës, kemi respekt për Realin që ka në ekip mbrojtësin më të fortë të botës, Sergio Ramosin, dhe sulmuesin më të mirë të botës për momentin, Kristiano Ronaldon. Gjithsesi, ne duam të fitojmë dhe besojmë se mund të fitojmë”.

Dyshimet e vetme të Juventusit për formacionin janë për aktivizmin e Markizios ose Betankurit në vend të Pjaniçit, ashtu si zgjedhja mes Ruganit e Barxalit./abcnews.al

isko.jpg
gra moz18:55 | 28/03/2018

Isko është padyshim ylli më i madh i Spanjës në prag të Botërorit. Gjithsesi, talenti i Realit nuk ishte aspak i kënaqur, edhe pasi shënoi 3 gola ndaj Argjentinës.

Vetëm gjigandë si Pele, Sushiç, Rivaldo apo Ronaldo i kishin shënuar 3 gola kësaj skuadre. Në gati 120 vjet histori, Argjentina duhej të njihte edhe turpërimin me emrin Isko.

Ylli më i shkëlqyer i momentit në kombëtaren e Spanjës dha paraqitjen më të madhe të karrierës në stadiumin “Uanda Metropolitano”, në suksesin e padëgjuar, 6-1.

25-vjeçari është padyshim shpresa kryesore e tifozëve spanjollë, që kombëtarja e tyre ta fitojë sërish titullin botëror. Gjithsesi, Isko po kalon një moment, që nuk do të donte t’ia uronte askujt, madje as armiqve të tij. Menjëherë pas ndeshjes, ai nuk mundi të mos bënte një kritikë të ashpër.

“Trajneri i kombëtares ma tregon besimin që ka tek unë, duke më dhënë minuta për të luajtur, – u shpreh ai, – në Madrid nuk kam besimin, për të cilin ka nevojë një futbollist, por ndoshta problemi jam unë që nuk ia kam dalë për ta fituar. Duhet, pra, që të vazhdoj të punoj, për të bindur Zidanin”.

“Kur nuk ke vazhdimësi në klub, atëherë janë ndeshjet e kombëtares që të mbajnë në jetë, – vazhdoi Isko, – kam shumë dëshirë të tregoj edhe tek Reali se jam një futbollist i mirë”.

Me gjasë, një krizë mund të shpërthejë tek Reali dhe pikërisht atëherë kur nuk duhet, në prag të dueleve në Champions ndaj Juventusit.

Mediat spanjolle nuk e lanë rastin t’i shpëtonte.

Gazeta “Marka”: Isko, një vepër arti! Kur nuk ke vazhdimësi në ekipin tënd, kombëtarja të mban gjallë!

Gazeta “AS”: Isko dhe Ole! Në Madrid nuk kam vazhdimësinë që i duhet një futbollisti!

“Skaj Sports” shkruan se Isko fshikulloi Zidanin pas tregolëshit shënuar për Spanjën.

Flitet se Zidane ka vendosur ta largojë Iskon, i cili në të vërtetë është një talent i madh. Ai nisi të luante futboll që kur ishte fëmijë me ekipe pa emër si Benalmadena e Atletiko Benamiel.

Më pas, nisi të bëhej i shquar tek Valencia e Malaga, duke nxitur presidentin e Realit, Florentino Perez, që të paguante 30 milionë euro për kartonin e tij.

Që nga viti 2013 ndodhet në Madrid, ku ka fituar 12 trofe, përfshi edhe 3 Champions, por në një ekip plot me kampionë, e ka pasur të vështirë.

Pakënaqësia e Iskos është e dukshme. Pak javë më parë, e tregoi hapur kur u vonua 32 sekonda për të dalë nga fusha, kur Zidane e zëvendësoi në ndeshjen ndaj Espanjolit./abcnews.al

eden-hazard.jpg
gra moz10:26 | 18/02/2018

Real Madrid po përgatitet të bëjë një ofertë të majme për të marrë Eden Hazard në skuadër.

Belgu është lidhur me një kalim të mundshëm te “Galaktikët” që vitin e kaluar, mirëpo “Blutë” e Londrës i zgjatën kontratën duke pasur parasysh rrezikun nga Spanja.

Ndërkohë, sipas Daily Express, Reali e ka kthyer 27-vjeçarin Hazard në objektivin kryesor të merkatos verore. Ata janë të gatshëm të ofrojnë 100 milionë paund plus

Gareth Bale që të sjellin përfundimisht belgun në Bernabeu.

Reali i Madridit këtë vit po kalon një sezon shumë të vështirë në La Liga, pasi ndodhet në vendin e katërt, 20 pikë larg Barcelonës.

Kjo situatë ka nxitur thashethemet se skuadra nga Madridi do të bëjë disa ndryshime të rëndëssishme verën që vjen.

Një numër i madh lojtarësh të rëndësishëm në kampionatet europiane shikohen si objektiva të Realit. Gjithashtu edhe e ardhmja e Zidane është në pikëpyetje, pasi trajneri aktual i Tottenham, Mauricio Pochettino shikohet si zëvendësuesi ideal i tij./abcnews.al

vlcsnap-error143-1280x720.jpg
gra moz16:31 | 14/02/2018

Sonte luhet dueli më i madh i raundit të dytë, të Ligës së Kampionëve. Reali pret në Madrid, Paris Sen Zhermenin, skuadrën që dëshiron të bëhet më e forta në kontinent.

Është e mërkurë Championsi, por është edhe ditë feste.

Gjithsesi edhe në kryeqytetin e kulturës, në Paris, Shën Valentinin nuk e mendojnë dot të ndarë nga supersfida e Madridit.

Paris SG ndaj Realit është kulmi që mund të jepte shorti i turit të dytë, me skuadrën franceze tepër ambicioze edhe pse shumë larg lavdisë së madhe të kundërshtarëve.

Yjet Nejmar, Kavani, Mbape, Verrati apo Tiago Silva thonë se janë gati.

Formacioni i dytë më i shtrenjtë në botë, dhe që ka bërë dy blerjet më të mëdha në histori, u nis në dukje i qetë drejt kryeqytetit të Spanjës.

Futbollistët, stafi teknik, dhe gjithë delegacioni parizien, u vendos në aeroplanin luksoz, që është personalizuar me fotot e mëdha të lojtarëve që dallohen edhe gjatë fluturimit.

Pritja në Madrid ishte e denjë për yjet e mëdhenj.

Emocionet ishin të mëdha në stadiumin mitik “Santiago Bernabeu”, aty ku PSG do të përpiqët të dalë mbi kampionët e Europës në fuqi.

Trajneri Unai Emeri, iuditërisht shkoi vonë në konferencën për shtyp dhe nuk u duk shumë i qetë.

Unai Emeri: “Ne do të luajmë ndaj ekipit që është fitues në fuqi i këtij kompeticioni, dhe po ashtu do të luajmë ndaj ekipit që e ka fituar Championsin më shumë se kushdo tjetër, 12 herë. E respektojmë Realin, por kemi besim tek mundësitë tona. Është një shans për ne që të tregojmë veten, por është edhe një detyrim përpara tifozëve dhe para klubit që ka bërë shpenzime të mëdha. Jemi më të përgatitur këtë herë, sesa ishim sezonin e kaluar ndaj Barcelonës. Mendoj se përgatitja për këtë ndeshje filloi pikërisht pas atij takimi”.

Edhe Reali shfaqet i sigurt në prag të sfidës së madhe, pavarësisht sezonit tepër të vështirë, sidomos në Spanjë.

Trajneri Zinedin Zidan, që për fat nuk ka shqetësime me dëmtimet, ndërsa i pezulluar është vetëm Dani Karvahal, ndërsa është nën presion të madh.

Nëse dështon edhe në Champions mund të shkarkohet.

Zinedine Zidan: “Ne sonte duhet të mendojmë vetëm për të luajtur futboll dhe për të luajtur mirë. Nëse luajmë mirë, me ekipin që kemi në dispozicion, mund t’ia dalim mbanë që të kualifikohemi. Natyrisht, ne do të kemi skemat tona ndaj Paris Sen Zhermenit, por vendimtarë do të jenë lojtarët, pasi ata do të jenë në fushë. Nuk kam aspak presion dhe nuk mendoj se kjo ndeshje vendos fatin tim. Unë shqetësohem vetëm për punën dhe për ekipin. Po ashtu, ne nuk jemi nën presion, pasi jemi mësuar me ndeshje të tilla, dhe na pëlqen që t’i “luajmë”.

 

Tradita është thellësisht në favor të Realit, që është skuadra më e mirë e kupave të Europës, me 12 Champions dhe shumë trofe të tjerë.
Në të kundërt, PSG gjashtë herë kampion i Francës, ka fituar vetëm një Kupë të Kupave./abcnews.al

ronaldo.jpg
gra moz16:47 | 04/02/2018

Reali i Madridit duket në krizë të plotë në Spanjë, po ashtu si Kristiano Ronaldo. Ylli portugez pati një reagim nervoz pasi u zëvendësua nga trajneri Zidan në ndeshjen ndaj Levantes.

Mungojnë shumë pak ditë nga momenti vendimtar dhe shenjat nuk janë të mira.
Reali nuk po shkon aspak me formën e duhur në duelet ndaj Paris SG në Ligën e Kampionëve, duele që do të vendosin fatin e këtij sezoni.

Barazimi 2-2 në fushën e Levantes në ligën spanjolle nuk ndihmoi aspak, përkundrazi, prishi edhe më shumë punë.
Madrilenët humbën më shumë terren në luftën për t’u kualifikuar për në Champions sezonin e ardhshëm, dhe po ashtu i hoqën vetes edhe më shumë shpresat për titullin kampion.
Kurrë ndonjëherë Reali nuk ka qenë kaq prapa Barcelonës në renditjen e kampionatit spanjoll, ndërsa I ka ndodhur vetëm një rast i tillë ndaj Atletikos së Madridit.

Trajneri Zidan shprehet se vazhdon të ketë besim tek ekipi i tij dhe se çështja e titullit nuk mund të quhet e mbyllur, por me shumë mundësi as ai vetë nuk i beson fjalët që thotë.
Kriza duket e plotë, bashkë me eleminimin nga Kupa e Mbretit, ndërsa ai që ishte ekipi më i mirë në botë, po kthehet në Realin më të dobët të historisë.
Sesa të tensionuara janë nervat e kampionëve e tregon fare qartë sjellja e Kristiano Ronaldos pas zëvendësimit.

Topi i Artë dhe lojtari më i mirë i vitit nuk duroi dot një kamera të drejtuar nga ai, ndërsa ishte i ulur në stol, ndaj edhe sulmoi kameramanin.
Portugezi kërkoi që të mos filmohej dhe që kamera të kthehej nga ndeshja, veçse thjesht tregoi nervozizmin që e ka përfshirë.
Me vetëm 8 gola deri tani, ai po luan sezonin më të dobët në La Liga, dhe po ashtu Reali nuk duket më mirë sesa ylli kryesor i tij./abcnews.al

zidane.jpg
ent ela16:12 | 25/01/2018

Reali i Madridit në krizë të plotë pas turpërimit në Kupën e Spanjës. Trajneri Zidane rrezikon seriozisht postin, dhe vetëm Championsi mund të shpëtojë këtë sezon të dështuar.

Përfundimi në “Bernabeu” ishte kështu.

Vërshëllima për madrilenët, dhe lumturi e jashtëzakonshme për Leganjesin modest.

Edhe kjo i mungonte një sezoni thuajse të dështuar për Realin, pra eleminimi që në çerekfinale nga Kupa e Mbretit.
Fitorja 1-0 në ndeshjen e parë nuk ndihmoi ndërsa trajneri Zidane rrezikoi shumë duke lënë jashtë shumë nga titullarët.

Eksperimenti i detyruar edhe nga ngarkesa e madhe e sezonit, iu kthye në një dështim që mund të quhet katastrofë.
Vetë francezi nuk u shmang pas ndeshjes.

Zinedine Zidane: “Jam unë përgjegjësi për këtë që ndodhi. Për mua është një dështim i qartë dhe jam shumë i dëshpëruar e i zhgënjyer. Do ta marr përsipër përgjegjësinë, por duhet të nisim të punojmë që nesër për të menduar për ndeshjen e së shtunës. Menduam se mund t’ia dilnim pas fitores së ndeshjes së parë, por gabuam. Kundërshtari bëri një ndeshje të vërtetë, ndërsa ne jo. Është një goditje shumë e fortë për ne dhe për mua”.

Turpërimi ishte i plotë pasi Leganjes ishte për herë të parë në histori në çerekfinale të Kupës, dhe për herë të parë u kualifikua për në gjysmëfinale.
Kritikat nga mediat spanjolle erdhën si rrebesh për skuadrën kampione të Spanjës, të Europës dhe të Botës.

“Marka”: “Tronditje dhe turpërim! Të bardhët largohen edhe nga Kupa, në katastrofën e parë të madhe të epokës Zidan. Vërshëllima për trajnerin dhe ekipin, por Leganjes e meritoi”.

“AS”: “1-2, Kataklizmë! Zidan: Ishte një katastrofë shumë e qartë për mua”! Emri i Leganjesit do të ushtojë në të gjithë botën”!

“El Mundo Deportivo”: “As kampionat, as kupë! Shpërthim i madh i Leganjesit në “Bernabeu”. Mbetet vetëm Championsi për të shpëtuar Realin e Zidanit”!

“Sport”: “Mallkim i plotë! Pa kampionat dhe pa kupë, dhe turpërim me Leganjesin për Madridin. “Bernabeu” kundër lojtarëve, kërkon largimin e Zidanit”!
Eleminimi nga Kupa ishte thjesht një tjetër goditje në një sezon shumë të keq.

Reali është në vend të katërt në ligën spanjolle, plot 19 pikë prapa Barcelonës kryesuese, pra praktikisht nuk e mbron dot titullin.
Edicioni mund të shpëtohet dhe Zidan të mbajë postin vetëm nëse fitohet Liga e Kampionëve, veçse përballë Paris SG pritet të jetë shumë e vështirë./abcnews.al

vlcsnap-error696-1280x719.jpg
gra moz22:39 | 12/01/2018

Kriza e Real Madrid duket se do të prekë trajnerin Zidane. Mediat spanjolle shkruajnë për një zëvendësim të mundshëm të tij, 2 vjet pasi mori drejtimin dhe fitoi çdo trofe.
Në dy vite si trajner i Realit, Zinedine Zidane fitoi thuajse gjithçka, por tashmë duket se epoka e tij në drejtimin e Los Blancos duket se ka ardhur në fund.

Real po dështon jo vetëm në rezultate por edhe në lojë, gjë që është e papranueshme jo vetëm nga tifozët por edhe e pajustifikueshme për drejtuesit e klubit.
Nën shënjestrën e shigjetimit është pikërisht trajneri sepse dihet se kur gjerat nuk shkojnë sipas parashikimeve, përgjegjësia bie mbi të.

Ka zëra se presidenti Perez është duke vlerësuar zëvendësimin e tij, saktësisht 2 vjet pasi e promovoi në postin e trajnerit. Në momente kritike duhet të ruhet qetësia, ka thënë ish-kapiteni Fernando Hierro, por nëse Zidane nuk shkarkohet këto ditë, atij i duhet ofruar një zgjatje e kontratës, që aktualisht është e vlefshme deri në fund të këtij sezoni.

Me të marrë vesh lajmin, në media u raportua një lëvizje e Juventusit në drejtim të francezit. Zizou është një nga lojtarët që ka lënë gjurmë në klubin torinez dhe rikthimi si trajner do të ishte arsye motivimi për lojtarët dhe drejtuesit e bardhezinjve./abcnews.al

celta-de-vigo-v-real-madrid-liga-20172018-foto-4-maxw-1280.jpg
us er10:50 | 08/01/2018

Reali i Madridit hodhi një tjetër hap të gabuar në ligën spanjolle. Barazimi në fushën e Seltës bëri që të mbetej plot 16 pikë prapa Barcelonës kryesuese

Fitorja ishte detyrim, por asnjëherë nuk merret me zor.

Nuk ia doli dot Reali kampion I Spanjës, që pas barazimit në fushën e Seltës, mbeti 16 pikë prapa Barcelonës në La Liga.

Në stadiumin e Vigos, skuadra e trajnerit Zidan vuajti shumë, edhe pse u ndihmua nga uellsiani, Garet Bejl.

Pasi vendasit kaluan në epërsi me golin e shënuar nga Vas, Bejl tregoi aftësitë e tij duke realizuar dy herë e duke përmbysur rezultatin.

Ka qenë një fatkeqësi për Realin, që ky futbollist ka qenë I dëmtuar për kaq shumë kohë.

Sidoqoftë, vetëm një yll nuk mund të mjaftonte ndaj Seltës, aq më tepër që madrilenët kishin disa mungesa, më kryesoren atë të kapitenit Sergio Ramos.

Mbrojtja ishte më e dobët pa kapitenin dhe Selta e pati më të lehtë të krijonte raste, madje të fitonte edhe një 11-metërsh

Reali ishte sërish me fat që pati në fushë portierin Kejlor Navas, I cili e priti penalltinë, por gjithsesi nuk mundi ta ruante fitoren deri në fund.

Formacioni I Zidanit tregoi edhe një herë se nuk po kalon një formë të mirë, ndërsa Kristiano Ronaldo sërish nuk shënoi dot gol, diçka e pazakonshme për standardet e tij.

Tashmë, kryeqytetasit janë jo vetëm shumë larg Barcelonës kryesuese, por kanë zbritur në vendin e katërt në kampionat, prapa Atletikos dhe Valencias.

Kjo paraqitje është shumë e papritur për skuadrën që është kampione e Spanjës, kampione e Europës dhe kampione e Botës./abcnews.al

vlcsnap-error402-1280x720.jpg
us er18:37 | 13/12/2017

Kristiano Ronaldo është edhe një herë tjetër pranë largimit nga Reali. Mediat spanjolle raportojnë për krisje të marrëdhënieve të tij me presidentin e klubit, Florentino Perez.

Fitorja e Topit të Artë ndodhi vetëm pak ditë më parë.

Zyrtarisht, Kristiano Ronaldo quhet lojtari më i mirë i botës, por duket se as kjo nuk e ka bërë të lumtur dhe se po mendon për t’u transferuar.
Lajmet nga Madridi bëjnë me dije se ylli portugez ka mbetur i pakënaqur nga komentet e presidentit të Realit, Florentino Perez, i cili ka ftuar në skuadër yllin brazilian, Nejmar, duke i thënë se në këtë mënyrë mund të fitonte Topin e Artë.

Ronaldo e ka quajtur ofendim, përderisa është ai fituesi i Topit të Artë dhe është aktualisht lojtar i Realit, ndërsa thuhet se ka autorizuar agjentin e tij për të realizuar largimin nga Spanja.

Cila mund të jetë skuadra e tij e re?

Sipas të gjitha gjasave, flitet për Paris SG.

Edhe muajin e kaluar pati zëra se Kristiano kishte biseduar me parizienët, ndërsa është e njohur dëshira e presidentit Naser Al Helaifi për ta pasur atë në ekip.
Besohet se PSG ka gati një oferte prej mbi 100 milionë eurosh për kartonin e yllin madrilen, plus lojtarin gjerman, Julian Draksler.

Klauzola e transferimit në kontratën e portugezit është 1 miliard euro, por kjo shifër cilësohet si e ekzagjeruar nga specialistët.
Ronaldo është 32 vjeç dhe këtë sezon nuk ka qenë në formën e tij më të mirë, pavarësisht shënimit të shumë golave në Champions./abcnews.al

3642-1280x768.jpg
us er12:51 | 11/12/2017

Dy sfida të mëdha do të luhen në turin e dytë të Championsit. Shorti i hedhur në Zvicër ishte shumë i fortë për dy gjigandët e Spanjës, Realin dhe Barcelonën.

Dëshirohej të kishte të paktën një përballje-bombë.

Shorti i Ligës së Kampionëve hedhur në Nion të Zvicrës ua plotësoi dyfish shpresat tifozëve të futbollit, pasi goglat nxorrën jo një, por dy çifte të nivelit më të lartë.

I pari, Real Madrid-Paris SG, është një klasike e re, dueli më shumë i pritshëm mes superfuqisë historike të Championsit, dhe superfuqisë së re që kërkon t’i zerë vendin.

Francezët kanë favorin e ndeshjes së dytë në shtëpi, pasi dolën në vend të parë në grup.

Sfida e dytë, Çelsi-Barcelona.

Dy klubet mbahen mend për të paktën tri përballje të 12 viteve të fundit dhe për polemika të mëdha.

Dy herë është kualifikuar Barcelona, dhe një herë Çelsi, me të dyja skuadrat që arritën të fitonin Ligën e Kampionëve, përkatësisht në 2006, 2009 e 2012.

Të tetat e finaleve, gjithsesi, kanë edhe duele të tjerë të fortë.

Nënkampionia e Europës, Juventus, do të duhet të ndeshet me Totenhemin anglez, një nga ekipet më në formë të kompeticionit deri tani.

Më e lehtë për fuqinë tjetër të madhe, Bajernin që ka përballë turqit e Beshiktashit.

Anglia që ka 5 përfaqësues në Ligën e Kampionëve, pati short të pranueshëm për ekipet e veta.

Mançester Siti shkon në fushën e Bazelit, Liverpuli luan ndaj Portos, ndërsa Mançester Junajtid e ka pak më të vështirë ndaj Seviljes spanjolle.

Së fundi, por jo e fundit për nga rëndësia, Roma e Serisë A do të duhet të matet me kampionen e Ukrainës, Shahtarin me përvojë.

Ndeshjet e para do të luhen në 13-14 shkurt e në 20-21 shkurt, dhe ndeshjet e kthimit në 6-7 mars si dhe në 13-14 mars./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono