reagimi

meta1.jpg
nev ila09:03 | 25/02/2020

Presidenti i vendit, Ilir Meta vazhdon akuzat dhe thirrjet e forta per shqiptaret, te cileve u kerkon te zgjohen dhe te ngrihen, pasi sipas kreut te shtetit “ketu institucionet kane rene pertoke”.

Me nje shenim ne faqen e tij ne Facebook, Meta sqaron arsyet se përse i drejtohet Popullit qe të protestojnë në 2 mars: “Përse Presidenti i drejtohet popullit?” është pyetja e Metës.

Duke renditur të gjithë arsyetimet e tij dhe shkeljet e bëra nga Kuvendi dhe KED që sipas Presidentit janë bërë për të marrë pushtetet në mënyrë që të  mos hetojnë veten, “mafia nuk heton veten“, shkruan Meta.

“Ndaj të dashur qytetarë, zgjohuni dhe ngrihuni se këtu institucionet kanë rënë përtokë. Ngrihuni për të rivendosur sovranitetin tuaj të nëpërkëmbur përmes rivendosjes së rendit kushtetues, demokratik dhe llogaridhënës.

Mirësevini në Manifestimin historik dhe shembullor të 2 marsit. Koha që sovrani të rimarre sovranitetin në duart e tij! E gjithë bota demokratike ta shohe se jemi komb shqiponjash që s’mund të përdhosemi nga një bandë sorrash”, e përmbyll postimin e tij presidenti.

Postimi i plotë:

“Kur rrëzohen institucionet, ngrihet populli

Përse Presidenti i drejtohet popullit?

Sepse sovraniteti në Republikën e Shqipërisë i përket vetëm popullit shqiptar. Të gjithë ne të tjerët, përfshirë edhe Presidentin e Republikës, jemi vetëm ushtrues të përkohshëm të këtij sovraniteti dhe asgjë më shumë.

Sa shkresa zyrtare i ka drejtuar Presidenti i Republikës, Kuvendit dhe Kryetarit të tij, ku i ka kërkuar bashkëpunim për të parandaluar situatën e rëndë që po krijohej për shkak të bllokimeve të qëllimshme të funksionimit të Këshillit të Emërimeve në Drejtësi dhe zbrazjes së Gjykatës Kushtetuese? Nuk numërohen.

Po përgjigje nga Kuvendi? Zero në mënyrë zyrtare. Po publikisht? E kanë dëgjuar të gjithë shqiptarët: Jemi më mirë pa Gjykatë Kushtetuese. Pse? Se bëjmë çfarë të duam e s’na kontrollon njeri.

Sa shkresa zyrtare i ka dërguar Presidenti, Kuvendit vetëm këtë vit për tejkalimin e situatës së rëndë në Gjykatën Kushtetuese? Nuk numërohen. Të gjitha me etikë dhe frymë pozitive për bashkëpunim në respekt vetëm të Kushtetutës dhe ligjit për Gjykatën Kushtetuese. A mori ndonjë përgjigje bashkëpunuese? Zero.

Sa herë e ka paralajmëruar Presidenti, Kryetarin e KED i cili ka zero kompetencë në Kushtetutë që të respektojë radhën kushtetuese dhe ligjin e Gjykatës Kushtetuese për të evituar përplasjet e mundshme midis institucioneve të Presidentit dhe Kuvendit? Nuk numërohen. Po reagimi i tij? Shkeli me të dyja këmbët edhe vendimin e vetë KED-së, e cila respektoi radhën e vakancave në mënyrë korrekte President, Kuvend, President, Kuvend.

Po ky Dvorani që s’ka asnjë kompetencë tjetër veç të qenit korrier i vendimeve kolegjiale të KED, përse nuk i nisi të katër vendimet njëherazi edhe Presidentit edhe Kuvendit në një ditë siç vendosi KED? Kush i tha këtij t’ia niste Presidentit të dy vakancat njëherazi dhe Kuvendit t’ia çonte me kokën e tij 6 ditë më vonë?

Nëse sipas këtij, radha s’qenka e rëndësishme, edhe pse është detyrim kushtetues, lind pyetja e pafajshme e çdo fëmije: Përse xhaxhi Dvorani nuk ia nisi në fillim dy vakancat Kuvendit e pas 6 ditësh t’ia çonte Presidentit? Se ke degjuar ti xhaxhi Dvorani, xhaxhi Gramozin dhe xhaxhi Ulsiun që thonë çdo ditë që Parlamenti është i pari se jemi Republikë Parlamentare, e jo Presidenciale?

Mjafton çdo fëmijë në këtë vend të lexojë vetëm letrën e fundit zyrtare të Presidentit të Republikës drejtuar Kryetarit të Kuvendit, Kryetarit të KED, Avokatit të Popullit (për dijeni të gjitha ambasadave të vendeve të BE dhe SHBA) dhe po kështu të lexojë letrat që xhaxhi Gramozi me xhaxhi Dvoranin shkëmbejnë në 8 nëntor që të verë duart në kokë për vendin ku po rritet dhe të ardhmen që e pret ketu.

A nuk ndoqi Presidenti rrugën institucionale duke shkuar vetë në Prokurori përpara 100 ditësh për kallëzimin penal ndaj Dvoranit i cili çdo ditë që rri në atë detyrë përbën një rrezik shtetëror dhe shoqëror? Cili ka qenë reagimi nga “Drejtësia e Re”? Heshtje. Ndërkohë që Prokuroria duhet të niste vetë hetimin prej muajsh edhe ndaj celulës mafioze dhe falsifikatore në krye të Ministrisë së Drejtësisë që kishte botuar në mënyrë të paligjshme një vendim të KED për qëllime mashtrimi të opinionit publik e ndërkombetar me objektiv të vetëm rrëmbimin e shumicës në Gjykatën Kushtetuese të vendit.

Përse duhet shtyrë pafund një hetim kaq i thjeshtë (për shkak të flagrancës skandaloze të shumë veprave penale) që ka të bëjë me vetë Gjykatën Kushtetuese? Sepse mafia thonë nuk e heton veten. Ndaj vendosi të ngutet në panik të miratojë në mënyrë të pabesë ligjin anti-kushtetues “Të betimit buzë Lanës” një ditë para mbërritjes së Komisionit të Venecias duke shkelur çdo kod të sjelljes demokratike e institucionale dhe duke iu lutur përfaqësuesve të Komisionit të Venecias që të mos iu përgjigjen pyetjeve që Kuvendi u kishte drejtuar prej tre muajsh, me argumentin se “ne e votuam mbrëmë atë ligj. Po pse ju duhet me patjetër ky ligji anti-kushtetues këtyre? Që Dvoranin, jo vetëm të mos e ndëshkojë drejtësia për shkeljet e rënda penale që ka bërë, por ta dekorojnë duke e futur përmes këtij ligji anti-kushtetues nga oxhaku në Gjykatën Kushtetuese.

Po kështu edhe atë ngelësen e provimit të Magjistraturës, që Dvorani e nxori të parën në të katër vakancat, si mund ta lenë në baltë, kur ajo për hir të Partisë u betua në Lanë. Dhe kuptohet që kur Gjykata Kushtetuese të mbushet me këta, mos kini asnjë dyshim se Etilda do mbajë një fjalim plot “Etikë” e madje do i dalin dhe lot gëzimi nga kontributi i saj për realizimin e kryeperlës së Ramaformës.

Ndaj të dashur qytetarë, zgjohuni dhe ngrihuni se këtu institucionet kanë rënë përtokë. Ngrihuni për të rivendosur sovranitetin tuaj të nëpërkëmbur përmes rivendosjes së rendit kushtetues, demokratik dhe llogaridhënës.

Mirësevini në Manifestimin historik dhe shembullor të 2 marsit. Koha që sovrani të rimarre sovranitetin në duart e tij! E gjithë bota demokratike ta shohe se jemi komb shqiponjash që s’mund të përdhosemi nga një bandë sorrash. #PërKushtetutën #PërShqipërinë #PërKombin 🇦🇱”./abcnews.al

rama-coronavirusi.jpg
nev ila15:40 | 23/02/2020

Menjëherë pas Ministrisë së Shëndetësisë, kryeministri Edi Rama ka reaguar në lidhje me shqetësimin për përhapjen e koronavirusit në Shqipëri.

Sipas kryeministrit virusi vdekjeprurës, nuk e ka prekur Shqipërinë, por sipas tij edhe nëse do të preket, shteti  shqiptar është i përgatitur ta përballojë me profesionalizëm të lartë.

Gjithashtu në postimin e tij në rrejtet sociale Rama thotë se të njëjtat mendje të shthurura që shqetësuan publikun me lajme fallco për tërmetin, janë në veprim edhe tani për Koronavirusin.

Statusi i plotë:

🔴KORONAVIRUSI NUK E KA PREKUR SHQIPËRINË! POR SI PËR GJITHË BOTËN ËSHTË NJË KËRCËNIM POTENCIAL, PËR TË CILIN JANË MARRË TË GJITHA MASAT NË RAST SE DO TË NA DUHET TA PËRBALLIM

🔴TË NJËJTAT MENDJE TË SHTHURRURA, QË JU SHQETËSUAN KEQ ME LAJMET FALLCO DHE ME GOJËLIGËSINË E TYRE GJATË DITËVE E NETËVE TË GJATA PAS TËRMETIT, JANË NË VEPRIM

🔴MOS BINI PRE E TYRE DHE JINI TË SIGURT SE SHTETI SHQIPTAR PO E BËN PREJ KOHËSH DETYRËN PËR TË QENË GATI NË RAST SHFAQJEJE TË KORONAVIRUSIT, TË CILIN JEMI GATI TA PËRBALLIM ME ORGANIZIM E PROFESIONALIZËM TË LARTË”, shkruan Kryeministri./abcnews.al

stolat-e-thyer-ne-air-albania.jpg
Veronik Istrefaj18:28 | 22/02/2020

Kryeministri i Shqipërisë, Edi Rama, ka reaguar për dëmet e shkaktuara në stadiumin kombëtar, Air Albania, nga tifozeritë e Kukësit dhe Tiranës. Pas reagimeve të dy klubeve, si dhe të zv. Kryeministrit, Erion Braçe, ka reaguar dhe kreu i qeverisë, i cili i ka krahasuar këta tifozë me katërkëmbësha, ose e thënë shqiptarçe, me kafshë!

“Uroj që një orë e më parë, këta lloj katërkëmbëshash të mbyllen pas hekurave që zgjaten deri në tavan dhe të ndalohen përgjithnjë të hynë në stadiumet tona, bash ashtu siç e parashikojnë NENET E REJA të Kodit Penal të Republikës së Shqipërisë KUNDËR DHUNËS NË SPORT!, shkroi Rama./abcnews.al

stolat-e-thyer-ne-air-albania.jpg
Vladimir Prenga13:55 | 22/02/2020

Kukësi-Tirana nuk kishte vetëm spektakël. Tifozët gjatë ndeshjes kanë dëmtuar 164 stola dhe kjo nuk është pritur mirë nga FSHF, që ka dalë me një deklaratë ku kërkon nga Policia e Shtetit të ndalojë personat që kanë shkaktuar këto akte vandale. Ndër të tjera thuhet se janë identifikuar të gjithë ata që kanë dëmtuar stolat dhe se fotografitë e tyre do të publikohen në stadium.

REAGIMI I FSHF – “Federata Shqiptare e Futbollit dënon ashpër sjelljet e papranueshme dhe vandale të disa grupeve të tifozëve në ambientet e “Air Albania Stadium” gjatë ndeshjes Kukësi – Tirana, sjellje këto që nuk kanë asnjë lidhje me synimin tonë për t’i kthyer ndeshjet e kampionateve tona në festa futbolli. Këto akte vandale përbëjnë shkelje ligji dhe ne kërkojmë që personat përgjegjës të përballen me ligjin.

Pas verifikimeve të kryera nga administrata e “Air Albania Stadium”, rezulton se janë dëmtuar 164 ulëse, nga të cilat 145 nga ana e tifozëve të Tiranës dhe 19 nga ana e tifozëve të Kukësit. FSHF ka tashmë të dokumentuara me video dhe foto personat konkretë që thyejnë ulëset dhe i flakin ato në fushë, duke dëmtuar sportdashësit e tjerë si dhe duke rrezikuar edhe jetën e zyrtarëve të ndeshjes si dhe futbollistëve.

FSHF, nëpërmjet një kërkese zyrtare, i ka kërkuar policisë së Tiranës ndalimin dhe arrestimit e këtyre personave dhe tashmë ka nisur procedura nga ana e forcave të rendit. Federata e Futbollit, bazuar te ligji, do të publikojë në stadium fotot dhe videot e personave që ushtrojnë dhunë në mjediset sportive.

FSHF u bën thirrje klubeve dhe grupeve të tifozerive të marrin masa dhe të respektojnë rregullin dhe ligjin në cilëndo hapësirë sportive të vendit. Komisionet në FSHF do të veprojnë në bazë të rregulloreve të brendshme, duke marrë masa kundër këtyre shkelësve. Kërkojmë nga Policia e Shtetit që t’i shoqërojë personat përgjegjës në bazë të ligjit në fuqi, në mënyrë që ata të dalin para drejtësisë. Kërkojmë mirëkuptimin e tifozerive dhe u bëjmë thirrje që së bashku t’i kthejmë stadiumet tona në mjedise familjare, ku mbizotëron festa sportive dhe jo dhuna dhe aktet vandale”, shkruhet në reagimin e FSHF. /abcnews.al

Demi i shkaktuar në "Air Albania Stadium" gjatë ndeshjes Kukësi-Tirana

Gepostet von Superliga & Kategoria e Pare am Samstag, 22. Februar 2020

KLOSI-PER-SEZONIN-TURISTIK.mpg_snapshot_00.41-1280x720.jpg
nev ila17:02 | 21/02/2020

Ditën e djeshme policia shqiptare ka sekuestruar një traget një transportonte lëndë të rrezikshme dhe kancerogjene, për të cilën u vunë në pranga 6 persona.

Ditën e sotme në lidhje me këtë çështje ka reaguar Ministri për Turizmin dhe Mjedisit, Blendi Klosi.

Klosi ka folur nga Prespa në lidhje me ngarkesën me mbetje që u bllokua dje në Vlorë:

“Operacioni i djeshëm i organizuar në mënyrë të struktuar nga Ministria e Rendit dhe Ministria e Mjedisit së bashku me autoritet lokale në Vlorë, ishte një aksion i cili shënon një nga pikat kulmore, në kuadër të gjithë përpjekjeve që bëjmë ne, për të vazhduar në mënyrë të fortë moratiriumin e mbetjeve të rrezikshm,e në vendin tonë.

Ishte një operacion i cili u planifikua qartësisht, dhe shënoi sukses, sepse gjithë strukturat u përfshinë gjerësisht, strukturat e mjedisit kryen atë operacion, duke verifikuar tashmë sesa i thellë ështe ky problem.

Është një ngjarje e ditës së parë, apo ka raste të tjera për të cilat do të hetohet, dhe hetimi do të shkojë thellësisht, në gjithë aktivitetin për mua shumë kriminal, që ka zhvilluar ajo kompani, megjithatë do ia lëmë hetimit fjalën e fundit, dhe laboratorëve shkencorë, që të vërtetojnë përbërjen e atij materiali, dhe rrezikshmerinë që ai ofron për njerëzit.

Por ndihem mirë që patëm nje kombinim të jashtëzakonshëm me policinë e shtetit, dhe në kuadër të reformimit të institucioneve që kontrollojnë mjedisin në Shqipëri, pasi mbrojtja e mjedisit është bërë detyrë e gjithë shoqërisë, dhe njerëzit kanë shumë në dorë.

Informacioni erdhi nga qytetarë, dhe u veprua nga institucione shtetërore“, tha Klosi./abcnews.al

Ilda1.jpg
Veronik Istrefaj21:30 | 15/02/2020

Moderatorja sportive, Ilda Bejleri, ka reaguar sërish sa i takon aksidentit të saj. Kjo ngjarje, bëri bujë në mediat sportive por jo vetëm, me moderatoren që ishte në qendër të vëmendjes. Shumë reagime ka pasur gjatë këtyre orëve të fundit, ndërsa Bejleri ka shfrytëzuar Instagramin e saj për të reaguar sërish.

“Paska ende njerëz të ndershëm në këtë vend. E vërteta del gjithmonë në dritë! Kam bërë gjëra të mira në jetë por edhe gabime. Pranoj mllefin e njerëzve, por jo që të shpifini.

E si mundet një vajzë që ka marrë dashuri pafund nga gjyshja të lërë dikë në rrugë të shtrirë e të përplasur? Por ndoshta varfëria i nxjerr njerëzit nga vetja dhe të përfitojnë nga çdo rrethanë, s’ka rëndësi mosha”./abcnews.al

 

sarri-1.jpg
Veronik Istrefaj21:35 | 12/02/2020

“Nëse nuk do të kisha dashur të isha nën presion, do të kisha punuar në Postë”. Sarri shpjegoi kështu momentin që po përjeton pas humbjes së Juventusit të tij kundër Veronës. Një ndeshje që i kushtoi disa kritika, të cilat trajneri i Juventusit nuk i ka pritur mirë.

Një përgjigje që nuk ka kaluar pa u vënë re, veçanërisht për ata që janë drejtpërdrejt të prekur nga këto komente. Poste Italiane, në fakt, përmes një deklarate për shtyp iu përgjigj Sarrit për fjalinë e thënë në konferencë për shtyp: “Poste Italiane fton zotin Sarri të marrë disa minuta nga koha e tij e çmuar për të informuar veten se Kompania e Postës është ndërmarrja më e madhe në vend, e cila është zgjedhur nga të diplomuarit e rinj si ndër kompanitë më tërheqëse për të punuar në të.

Posta Italiane, e cila njihet si ndër 500 kompanitë më të mira në botë për cilësinë e jetës së punës, e cila ka krijuar midis shfaqjet më të mira të tregut të aksioneve në 2019 dhe që renditet e treta në botë midis kompanive italiane për sa i përket imazhit dhe reputacionit.

Provat, në kundërshtim me ato që pretendon Sarri, janë në rregull dhe kompania u përgjigjet qytetarëve, bizneseve dhe administratave publike”.

Dhe për Maurizio Sarrin, Posta Italiane ka një thirrje: “Ne po presim që ju të shihni punën tonë të përditshme personalisht, në një nga 15 mijë zyrat tona operative”, përfundon përgjigja e ashpër nga Posta Italiane./abcnews.al

mentor-rexha-france.jpg
nev ila15:43 | 10/02/2020

Ministria për Europën dhe Punët e Jashtme ka reaguar në lidhje me vdekjen e të riut shqiptar në burgun e qytetit Lorient në Francë, Mentor Rexha.

Pas lajmit në media për vdekjen e të riut, përmes një njoftimi për shtyp, MEPJ sqaron se sipas autoriteteve të policisë franceze, Rexha është vetëvrarë në ambientet e burgut francez gjatë natës së 31 janarit 2020. Ndërkohë familjarët e të riut kanë ngritur akuza se djali është vrarë në burg.

Po ashtu ministria sqaron se Ambasada shqiptare në Francë është njoftuar nga të afërmit e të ndjerit ditën e diel, (2 shkurt), dhe që nga ajo ditë e në vazhdim, shërbimi konsullor i Ambasadës ka qenë në kontakt të vazhdueshëm me familjarët e tij, për të mundësuar vendosjen e kontakteve me qendrën penitenciare të Lorient, si dhe për të lehtësuar udhëtimin e njërit prej familjarëve të tij nga Italia në Francë.

Në lidhje me kërkesën e familjarëve për sjelljen e trupit të Mentor Rexhës në atdhe, Ministria e Jashtme thotë se Ambasada i ka informuar familjarët cfarë duhet të bëjnë sipas legjislacionit në fuqi, gjithashtu ka sugjeruar që paralelisht familja e të ndjerit, të kontaktojë një avokat për ndjekjen e çështjes nga ana ligjore.

Reagimi i Ministrisë së Jashtme:

“Sipas autoriteteve të policisë franceze shtetasi Mentor Rexha është vetëvrarë në ambientet e burgut francez të qytetit Lorient gjatë natës së 31 janarit 2020.

Për këtë ngjarje, Ambasada shqiptare në Francë është njoftuar nga të afërmit e të ndjerit ditën e diel, datë 2 shkurt 2020, dhe që nga ajo ditë e në vazhdim, shërbimi konsullor i Ambasadës ka qenë në kontakt të vazhdueshëm me familjarët e tij, për të mundësuar vendosjen e kontakteve me qendrën penitenciare të Lorient, si dhe për të lehtësuar udhëtimin e njërit prej familjarëve të tij nga Italia në Francë.

Ambasada shqiptare në Francë njofton se, që nga momenti i njohjes me ngjarjen, ka përcjellë nga afër çdo praktikë ligjore dhe ka qëndruar në kontakte të pandërprera me familjarët e shtetasit shqiptar, Mentor Rexha.

Ditën e shtunë, datë 8 shkurt 2020, të afërmit mundën të vizitojnë trupin e të ndjerit. Gjatë kontaktit me Ambasadën shqiptare, ata shprehën dyshime lidhur me shkaqet e vdekjes së tij.

Bazuar në këto pretendime, Ambasada shqiptare në Francë ka kërkuar informacion suplementar nga autoritetet franceze mbi ngjarjen dhe ka sugjeruar që paralelisht familja e të ndjerit të kontaktojë një avokat për ndjekjen e çështjes nga ana ligjore.

Ambasada është në pritje të një informacioni zyrtar më të detajuar nga ana e autoriteteve policore dhe gjyqësore franceze, në lidhje me të gjitha pretendimet dhe dyshimet e ngritura nga të afërmit e shtetasit Mentor Rexha.

Në lidhje me procedurat e kthimit të trupit të shtetasit Mentor Rexha në Shqipëri, Ambasada i ka informuar familjarët sipas legjislacionit në fuqi.

Ministria për Evropën dhe Punët e Jashtme, si dhe Ambasada shqiptare në Francë mbeten të angazhuara për zbardhjen e ngjarjes me autoritetet franceze dhe kthimin e shpejtë të trupit të të ndjerit në atdhe”./abcnews.al

Bylis-1.jpg
Veronik Istrefaj20:27 | 26/01/2020

Bylisi u mposht sot nga Teuta me rezultatin 1-0. Ndeshja e luajtur në “Niko Dovana” nuk kaloi pa kontestime, pasi ekipi ballshiot pretendoi për një penallti dhe për disa raste të tjera të dyshimta. Pas mbylljes së takimit, faqja zyrtare e Bylisit ka kërcënuar me tërheqje nga gara, pasi sipas tyre, arbitrat e kanë bërë baltë.

“E panë të gjithë se çfarë ndodhi në ndeshjen me Tiranën, kur jemi mundur nga dy gola me dorë. Nuk reaguam, duke pritur që të merren masa, ndërkohë që sot në Durrës gjyqtari e bën baltë dhe kush e ka parë ndeshjen nuk na nevojë për shumë komente.

Tërë lojën jemi penalizuar. Një gol që na anulohet, shumë i dyshimtë pasi topi kalon vizën. Kartonë pa kriter kundër lojtarëve tanë, ndërsa nuk ndodh kështu me kundërshtarin dhe i vë “kapakun” një penallti që na anulohet!

Familja Kapllanaj investon prej 15 vitesh dhe si ka mundësi që nuk është marrë 1 pikë në Durrës, por është e njëjta histori në çdo ndeshje?!

Kjo është skandaloze dhe ne si klub, që deri më tani kemi qenë ekipi më simpatik i garës, kërkojmë që sa më shpejt nga organet kompetente të nxirren para përgjegjësisë fajtorët, në mënyrë që mos të na bëjnë edhe neve “pis” e të kalojmë në vetëgjyqësi.

Me sa duket në Shqipëri, ashtu si në çdo fushë tjetër, edhe në futboll u dashka që të funksionojë “Ligji i Xhunglës”. Këtë e bëjmë për transparencë për të gjithë ata që e duan futbollin e bukur dhe për mediat që kanë pasqyruar deri më tani ecurinë e bukur të skuadrës sonë, në mënyrë që nesër mos të jetë vonë!

Prandaj dhe për të mos rënë “pre” e këtij pisllëku, nëse nuk analizohen padrejtësitë që po na bëhen, ne që nga sot nuk do të jemi më pjesë e garës, në Kupën e Shqipërisë apo dhe në kampionat. Është e kotë dhe këtu s’mjafton as të investosh, e as të luash bukur duke i bërë nder garës…”, shkruhet në reagimin e Bylisit/abcnews.al

Gazment-Bardhi-1-1280x853.jpeg
nev ila19:31 | 22/01/2020

Gazetari investigativ Artan hoxha ka publikuar një video ekskluzive për ABC News ditën e sotme, ku shihet kryebashkiaku i Bulqizës Lefter Alla ndërsa thithte kokainë në ambiente publike.

Në lidhje me këtë ka reaguar dhe Partia demokratike përmes sekretarit të sa të përgjithshëm Gazment Bardhi.

Bardhi shkruan se SPAK duhet të veprojë menjëherë dhe se ka një mundësi reale për të zbuluar një grup të strukturuar kriminal që merret me shpërndarjen dhe trafikimin e kokainës në zonën e Bulqizës.

Sipas Bardhit Alla duhet të ndiqet penalisht  për moskallëzim krimi ndaj atyre që i kanë siguruar kokainën.

“SPAK ka një mundësi reale të zbulojë dhe vendosë përpara përgjegjësisë një grup të strukturuar kriminal që merret me shpërndarjen dhe trafikimin e kokainës në zonën e Bulqizës. Edi Rama i Bulqizës duhet të ndiqet penalisht për moskallëzim krimi ndaj atyre që i kanë siguruar kokainën. SPAK duhet të veprojë pa asnjë vonesë!”, shkruan Bardhi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono