raportim

arta-marku.jpg
G. P.13:41 | 20/06/2019

Prokurorja e Përgjithshme e Përkohshme Arta Marku u është përgjigjur pyetjeve të deputetëve në Parlament mbi dosjet 339 e 184 për zgjedhjet, pjesë e të cilave janë përgjimet e publikuara në media. Marku tha se tashmë është koha që prokurorët të dalin në konkluzione.

“Çështjet 339 dhe 184 mund të thuhet me siguri se kanë hyrë në historinë qoftë të drejtësisë shqiptare, qoftë të politikës shqiptare. Kjo mund të thuhet pa asnjë lloj dyshimi. Janë dy çështje që janë regjistruar të dyja në vitin 2016. Nga viti 2016 deri në fund të shtatorit 2018 të vetmet veprime të kryera kanë qenë përgjimet. Ka pasur vetëm transkripto bisedash dhe numrash sporadikë.

Në fund të shtatorit 2018 për të dyja çështjet janë caktuar prokurorë të tjerë. U është kushtuar e gjithë rëndësia e duhur dhe për 339 është caktuar një grup prej 3 prokurorësh dhe 11 oficerësh policisë gjyqësore. 339 në momentin që është marrë nga prokurorët e tjerë ka pasur 7074 CD dhe DVD të patranskriptuara. Aktualisht pas 9 muajsh janë transkriptuar pothuajse të gjitha CD-të. Janë regjistruar 74 emra personash si persona nën hetim, janë dërguar për gjykim shumë prej tyre dhe 12 janë dërguar sëfundmi.

Jam dakord me të gjithë ata që mendojnë se këto çështje duhen zgjidhur, ka ardhur momenti që të zgjidhen. Prokurori që i ka marrë në Shtator të vitit 2017  e kanë marrë të gjithë kohën e nevojshme për të bërë hetimin dhe tashmë duhet të dalin në konkluzione. Unë iu kam kujtuar vazhdimisht në çdo takim për aq sa më lejoni brenda kompetencave që kam që t’u japin zgjidhje këtyre çështjeve. Janë prokurorët e çështjeve që duhet të marrin këtë vendim. Për nxjerrjen e sekretit po hetohet aktualisht nga Prokuroria e Krimeve të rënda.

Në të njëjtën çështje me 339-n. Nisja e çështjes nuk është bërë pse dolën sekretet dhe përbënte problem nxjerrja e atyre të dhënave. Nisja e çështjes është bërë pasi nxjerrja e sekretit nga oficerët e policisë gjyqësore përbën vepër penale dhe kjo nuk mund të anashkalohet. Përgjimet nuk janë as indicie, por janë një mjet për kërkimin e provës”, tha Arta Marku.

arta.jpg
G. P.11:28 | 20/06/2019

Kryeprokurorja e përkohshme, Arta Marku, deklaroi këtë të enjte se qarqet Fier dhe Durrës kanë rritjen më të lartë për vitin 2018 sa i përket tendencës së kriminalitetit. Marku paraqiti në seancën plenare raportin vjetor të Prokurorisë së Përgjithshme për vitin e kaluar.

Prokurorja e Përgjithshme e Përkohshme theksoi se numrin më të lartë të procedimeve në vend e ka pasur Prokuroria e Shkallës së Parë Tiranë. Ndërkohë vepra penale me numrin më të lartë të procedimeve është ajo e vjedhjes.

“I janë dërguar gjykatës 570 kërkesa për miratimin e marrëveshjes së fajësisë. Edhe kjo shifër është në rritje të ndjeshme krahasuar një vit më parë. Janë dërguar në gjykatë për pushim 2605 çështje. Numrin më të lartë të procedimeve në shkallë vendi e ka regjistruar Prokuroria e Shkallës së Parë Tiranë. Sa i përket tendencës së kriminalitetit vërehet se rritjen më të lartë për vitin 2018 e ka qarku Durrës dhe Fier. Vepra penale me numrin më të lartë të procedimeve të regjistruara është ajo e vjedhjes së pasurisë, por duhet thënë që ka një ulje të lehtë krahasuar me vitin 2017. Gjatë gjithë aktivitetit të saj prokuroria shqiptare ka patur si qëllim të përmbushë rekomandimet e dhëna nga Kuvendi i Shqipërisë për vitin 2018 dhe po kështu rekomandimet e Këshillit të Ministrave për luftën ndaj kriminalitetit. Rekomandimet e dhënë nga Kuvendi janë përkthyer në një plan të mirëfilltë veprimi dhe i janë dërguar çdo prokurorie për ta mbajtur parasysh gjatë aktivitetit”, tha Arta Marku.

Për sa i përket këtij plani, Marku theksoi se janë kryer më shumë se në vitin 2017 hetime proaktive. Për sa i përket veprës penale të korrupsionit, në vitin 2018 numrin më të lartë të procedimeve e zë vepra penale e korrupsionit pasiv të personave që ushtrojnë funksione publike. Edhe për këtë rast procedimet janë rritur krahasuar me 2017-n sipas Markut.

“Është rekomanduar rritja e numrit të hetimeve në tërësi dhe në veçanti e hetimeve joaktive kundër krimit të organizuar dhe korrupsionit. Rezulton se gjatë vitit 2018 janë kryer hetime proaktive dhe me përdorim të teknikave të posaçme të hetimeve në kuadër të 93 procedimeve penale. Krahasuar me vitin 2017 shifra është në rritje. Kjo veprimtari ka shërbyer në ndalimin e 73 personave si të dyshuar në kryerjen e veprave penale të korrupsionit dhe shpërdorimit të detyrës. Numrin më të lartë të procedimeve të regjistruara për veprat penale të korrupsionit në vitin 2018 e zë vepra penale e korrupsionit pasiv të personave që ushtrojnë funksione publike. Procedimet për këtë vepër janë rritur nga 61 për vitin 2017 në 74 procedime për vitin 2018”, tha Arta Marku./abcnews.al

myslim-murrizi-1.jpg
G. P.11:06 | 17/06/2019

Deputeti i opozitës Myslim Murrizi deklaroi këtë të hënë se Inspektoratit i Lartë i Deklarimit të Kontrollit të Pasurive dhe Konfliktit të lnteresave duhet të jetë paradhomë e SPAK dhe Byrosë Kombëtare të Hetimit për të hetuar pasuritë e deputetëve në parlamentin e Shqipërisë. Sipas deputetit, ILDKPKI duhet të hetojë edhe zv.ministrat dhe zyrtarët e institucioneve që kanë në dorë tenderat publike.

“Thoni që është arritje e madhe që janë gjobitur disa nga subjektet private pse kanë kërcënuar ose nuk kanë pasur numrin e bilbilfytësve aq sa duhet nga një deri në pesë milionë lekë. Unë besoj që shqiptarët janë të tejngopur me spiunë dhe bilbilfryrës. Nuk besoi se është detyrë në 29 vjet postkomunizëm të një inpektoriati që duhej të merrej me  banorët e kësaj salle, me këta që janë këtu mbrapa, me këta që kanë qenë këtu mbrapa, 60 kryetarët e bashkive, me drejtorët e drejtorive, zv/ministrat dhe ata që kanë në dorë të firmosin tendera nga paratë publike.

Numri i pakët i punonjësve tuaj prej 70 vetash nuk besoj se zgjidh përfundimisht atë që kanë detyrim ligjor për të deklaruar pasurinë pranë institucionit tuaj. Shoh që ka shumë subjekte që janë objekt i ligjit tuaj. Unë do doja që ka ardhur koha për të përgatitur më konkret dhe më konciz për atë objekt pune që duhet të ketë ky institucion. Nëse ka 15 mijë e 600 subjekte që deklarojnë, me 70 punëtorë i bie që në 10 nuk i kontrollon dot ato. Unë institucionin tuaj do doja ta konsideroja si paradhomë e SPAK-ut ose kuzhinë të BKH-së.

Miliona euro pasuri marramendëse kanë banorë të kësaj salle që kanë ardhur në 31 Mars të 91-shit me pantallona doku, çorapë 55 lekëshe dhe brekë thesi dhe sot të grijnë në “Armani”, “Versaçe”, “Guçi”, kanë hale dhe për macen. Kanë pasur shtëpi me qerpiç, hale te fiku. Ky inspektoriat duhet të merret me këta subjekte që duhet të jenë objekt i drejtpërdrejtë i ligjit tuaj. Ata që kanë marrë në qafë këtë vend nuk i kalojnë 500 veta nga 91 deri sot. Shihni kush i ka ato saraje matanë. Deputetë, ministra, hiqni pjesën e biznesit, kam respekt për ta dhe ishalla i shtojnë, drejtorë drejtorish, burgjet, hipotekat, ALUIZNI, rrugë, dogana, tatime. Këta që kanë qenë non stop ndër vite, këta që janë këtu, ca që kanë lënë vendet dhe janë ulur këtu, janë strehuar atje. Ai justifikojnë ata? Me 70 punëtorë nuk besoj se ti ke mundësi që të bësh një lloj investigimi”, tha deputeti Murrizi, në seancën e sotme plenare, ku ishte parashikuar raportimi vjetor i ILDKPKI.

Po gjatë seancës së të hënës pritet që të diskutohen disa shtesa dhe ndryshime ne ligjin për regjistrimin e biznesit, disa shtesa në ligjin për procedurat tatimore, disa ndryshime dhe shtesa në ligjin për masat kundër financimit të terrorizmit si dhe në atë për parandalimin e pastrimit të parave dhe financimit të terrorizmit. Gjithashtu ishte parashikuar raportimi vjetor edhe për Prokuroren e Përgjithshme Arta Marku, por vetëm pak orë para se të niste seanca ajo anuloi pjesëmarrjen e saj duke dërguar një raport shëndetësor. /abcnews.al

papa-380x233.jpg
G. P.18:38 | 09/05/2019

Papa Françesku e ka bërë të detyrueshme për klerikët raportimin e abuzimeve seksuale. Bëhet fjalë për një lëvizje të pritur prej kohësh, nga ati i shenjtë për t’i dhënë zgjidhje një prej problemeve më akute me të cilat përballet sot Kisha Katolike.

Papa Françesku e ka bërë të detyrueshme për klerin katolik të Romës të raportojë abuzimet seksuale dhe madje rastet kur akte të tilla janë mbuluar. Në një letër apostolike, që pritet të kthehet në ligj për kishën, Ati i Shenjtë e bën të qartë se çdo mbulim ose favorizim i akteve seksuale do të konsiderohet abuzim.

Lëvizja e Papa Françeskut shihet si një mesazh dërguar hierarkive të kishës, se askush nuk do të tolerohet. Ajo vjen pak kohë pasi në shkurt, Papa premtoi marrjen e masave konkrete për të frenuar abuzimin.

Letra apostolike ua bën të qartë klerikëve se duhet të ndjekin ligjet e shtetit dhe të përmbushin detyrimet e tyre për të raportuar çdo abuzim tek autoritetet përkatëse civile. Udhëzimi i ri është mirëpritur nga disa përfaqësues të Vatikanit, që kanë deklaruar se në këtë mënyrë gjejnë terren për t’i dhënë fund abuzimeve seksuale të kishës.

Papa Françesku ndodhet nën një presion të fortë për të treguar lidership dhe për t’i dhënë zgjidhje një prej problemeve më akute me të cilat përballet sot kisha moderne, e cila akuzohet se ka humbur moralin e saj.

Kur u zgjodh në vitin 2013 ai bëri thirrje për aksion ndaj abuzimeve, por kritikët thonë se nuk ka bërë sa duhet për të mbajtur përgjegjës peshkopët që kanë mbuluar rastet në fjalë./ABC News Albania 24/7

mustafa-nano-1.jpg
G. P.20:45 | 09/04/2019

Moderatori i emisionit “Provokacija”, Mustafa Nano, në monologun e kësaj puntate foli për filmin më “2 Gisht Mjaltë”. Ai kishte shkuar për të parë komedinë në kinema pasi disa të njohur i kishin treguar radhët e njerëzve për të marrë bileta. Edhe pse iu duk e pabesueshme gjithçka iu vërtetua mbrëmjen e kaluar.

Nano tha se radhë të tilla kishte parë vetëm kur njerëzit qëndronin nëpër ambasada për të marrë një vizë. Mirëpo e çuditshme për Nanon është se pse ky event nuk është raportuar në edicionet e lajmeve dhe gazeta. Ai shtoi se nuk është bërë asnjë program televiziv ku të flitet për suksesin e kësaj komedie në historinë e kinemasë shqiptare.

Për moderatorin e “Provokacijas”, raportimi i “2 Gisht Mjaltë” ka qenë detyrim për të gjithë gazetarët, sepse është detyrë të raportohet një sukses.

“Dje, nga ora nëntë deri më njëmbëdhjetë të natës, shkova te TEG-u. Jo për të bërë shopping. Shkova për të parë një komedi të Ermal Mamaqit. Disa të njohur të mi që e kishin parë më kishin dërguar foto e video, ku dukeshin njerëz që mbanin radhën për të marrë një biletë. Mu duk e pabesueshme ajo që shihja në ato imazhe. Mirëpo ishte e vërtetë. Mbrëmë pashë me sytë e mi radhë të gjata njerëzish, kryesisht të rinj, por edhe familje të tëra.

Nuk kisha parë ndonjëherë në Shqipëri radhë të tilla njerëzish, që prej kohës së radhëve kilometrike nëpër ambasada për të marrë një vizë. Më thanë se vetëm në sallat e kinemave te TEG-u jepeshin 36 shfaqje në ditë. Dhe mos t’ju duket se është një lapsus i imi. Është tamam kështu: 36 shfaqje në ditë. Më thanë gjithashtu që deri më sot janë shitur 100 mijë bileta. Një sukses i jashtëzakonshëm. Dhe unë çuditem se si në edicionet televizive të lajmeve, apo edhe nëpër gazeta nuk është thënë asgjë mbi këtë event. Nuk është bërë asnjë program televiziv, ku të flitet mbi këtë sukses që nuk ka të dytë në historinë e kinemasë e të komedisë shqiptare.

Dhe prandaj, raportimi mbi këtë komedi ka qenë një detyrim për të gjithë gazetarët, pavarësisht se ç’kanë menduar lidhur me vlerat artistike apo me mesazhet e komedisë. Edhe sikur gazetarët e kulturës, apo edhe të tjerët, të kenë mendimin më të keq për këtë komedi, ata do duhej ta raportonin prapëseprapë. Ata kanë detyrën për të raportuar një sukses, për të raportuar atë që njerëzit pëlqejnë. Unë mendoj se nuk ka mënyrë më të mirë për ta përkufizuar një masë të madhe njerëzish sesa mbi bazën e asaj që ata pëlqejnë. Dhe kjo ka përbërë një arsye për të bërë një raportim, për të dhënë një lajm. Mund ta raportonin në mënyrë kritike, nëse donin, por duhet ta raportonin ama. Ashtu siç duhet të raportojnë edhe aftësinë e artistit, të Ermalit në këtë rast, për të hyrë në rezonancë me këtë masë të madhe njerëzish. Për ata që kanë shije të rafinuara, ky interes popullor mund të jetë një arsye për t’i dhënë munxët artistit, apo shfaqjes, apo komedisë, apo filmit, por kjo nuk ka lidhje me lajmin që është lajm. Sepse nëse nuk është lajm fakti që 100 mijë shqiptarë kanë ndjekur një shfaqje të caktuar, atëherë pse dreqin është lajm që tre mijë vetë mblidhen për një protestë, apo në një kongres partie, apo në një ndeshje futbolli?”, tha Nano. /abcnews.al

arta-marku.jpg
G. P.15:17 | 11/07/2018

Kryeprokurorja e Përgjithshme e Përkohshme, Arta Marku, po raporton në Komisionin e Ligjeve për veprimtarinë e institucionit për vitin 2017. Në fillim të mbledhjes kishte një debat, pasi opozita kërkoi shtyrjen e raportimit me arsyetimin se ishte shkelur rregullorja, por në fund u arrit konsensusi që raportimi i Markut të realizohej sot.

Deputeti demokrat, Edi Paloka, tha Arta Marku nuk përfaqëson një institucion kushtetues, pasi është zgjedhur vetëm me 69 vota, duke mos marrë dot as gjithë votat e mazhorancës .

Duke raportuar per veprimtarine e institucionit që drejton, kryeprokurorja Arta Marku deklaroi se në vitin 2017 prokuroria ka hetuar vetëm për 17 banda dhe 12 zyrtarë të lartë.

“Numri i vogël i çështjeve nën hetim për korrupsion është i vogël dhe nuk përputhet me gjendjen reale apo raportet e ndryshme për gjendjen e korrupsionit në vend, ç’ka tregon se nuk ka pasur vullnet nga prokurorët për ta luftuar korrupsionin”, tha Marku./abcnews.al

raportuesi.jpg
G. P.12:09 | 28/05/2018

Në një intervistë eskluzive për ABC News, raportuesi për Kosovën në Parlamentin Europian, Igor Soltes, deklaron, se samiti i Sofjes përcolli mesazhin, se nuk duhet të presim edhe dhjetë vjet të tjera për të folur për Ballkanin, por mund të bëjmë vlerësimin e progresit çdo vit. Nuk mjafton vetëm progres-raporti i Komisionit Europian, por duhet edhe një mbështetje politike e procesit të zgjerimit. Soltes tëheq vëmendjen, se vitin e ardhshëm do ketë  zgjedhjet parlamentare europiane dhe fokusi te vendet e Ballkanit nuk do jetë i njëjti. Ndaj sipas tij, Bashkimi Europian duhet të realizojë liberalizimin e vizave për qytetarët e Kosovës dhe të vijojë dialogu midis Prishtinës dhe Beogradit.

Igos Soltes, raportues për Kosovën: “Samiti i Sofjes është i rëndësishëm pasi përçoi mesazhin, se Bashkimi Europian është i hapur ndaj Ballkanit dhe se proçesi i integrimit është një proces me dy kahe. Ne mund të ofrojmë asistencën financiare, mbështetje për zhvillimin ekonomik dhe social, praktikat më të mira, fonde për projekte konkrete në rajon. Por nga ana tjetër vendet duhet të përgatiten për ta adaptuar rregullat e Bashkimit Europian dhe kryesisht ato lidhur me forcimin e shtetit ligjor, si kusht thelbësor për forcimin e demokracisë në vendet e Ballkkanit. Përveç kësaj, mesazhi tjetër që përcolli samiti është, që nuk duhet të presim edhe dhjetë vjet të tjera për të folur për Ballkanin, por mund të bëjmë vlerësimin e progresit çdo vit. Nuk mjafton vetëm vlerësimi teknik i progres-raportit të Komisionit Europian. Duhet edhe një mbështetje politike e proçesit të zgjerimit”.

Pyetje: “Liderët e Bashkimit Europian ishin në Sofje dhe pati një fokus të veçantë te polemika e kryeministrit spanjoll Mariano Rahoy për Kosovën. Ç’mendoni për këtë”?

Igos Soltes: “Duhet kuptuar që kryeministri Rahoy është në një pozitë specifike për shkak të Katalunjës. Nuk ishte i papritur qëndrimi i kryeministrit Rahoy. Por ajo që ka vlerë të theksohet këtu është që pati një deklaratë të përbashkët në përfundim. Ka shumë takime që përfundojnë pa deklaratë, duke qenë se nuk arrihet të gjendet gjuha e përbashkët”.

Pyetje: “Për dialogun e Kosovës, pala kosovare shprehet se Beogradi nuk zbaton marrëveshjen e Brukselit, ndërkohë që pala serbe nënvizon, se Prishtina nuk është përpjekur për krijimin e bashkësisë të komunave serbe në veri. Si mund të pajtohen të dyja palët”?

Igos Soltes: “Kjo është si libri: “Asgjë e re në Ballkan”. Eshtë shumë e rëndësishme që dialogu të vazhdojë dhe shpresoj që raundi i ri të zhvillohet në filliim të muajit të ardhshëm. Duhet që të dyja palët të ulen në tryezë dhe të gjejnë një zgjidhje të pranueshme. Duhet të kuptoni në gjë: Vitin e ardhshëm, këtu në Parlamentin Europian ne kemi zgjedhjet parlamentare europiane. Kjo do të thotë që ne nuk do kemi të njëjtin fokus te vendet e Ballkanit. Ndaj është shumë e rëndësishme që para kësaj etape të realizohen dy gjëra. Së pari, të bëhet liberalizimi i vizave, që është shumë shumë i rëndësishëm për qytetarët e Kosovës dhe së dyti të vazhdojë dialogu me Beogradin për të gjetur një konsensus minimal. Politikanë të të dyja palëve kanë bërë të qartë, se nuk do ketë fitues të vërtetë nga ky dialog, pasi të dyja palët do të humbasin diçka. Kjo është mençuria e kompromisit. Por edhe pse nga një anë humb diçka, fiton nga ana tjetër. Eshtë e rëndësishme që të mos ketë tensione dhe të evitohet përshkallëzimi i situatës. Kjo është një përgjegjësi e të dyja palëve. Eshtë e rëndësishme po ashtu, që të respektohet Kushtetuta e Kosovës dhe ajo e Serbisë”.

Pyetje: “Lidhur me liberalizimin e vizave, qytetarët e Kosovës nuk mund të presin më. Ju kanë premtuar disa herë që do liberalizohen vizat nëse plotësohen dy kushte dhe kjo nuk ka ndodhur ende. A do të ndodhë përfundimisht këtë vit”?

Igos Soltes: “Kam biseduar me përfaqësuesit e Komisionit Europan dhe këtu në Parlamentin Europian. Jam përpjekur vërtet që t’i bind ata që të jenë më të fokusuar në këtë çështje dhe t’a marrin seriozisht detyrimin e Bashkimit Europian në këtë drejtim. Ne i kemi artikuluar këto dy kushte vitin e kaluar dhe kemi nënnvizuar kryesisht marrëveshjen e demarkacionit të kufirit me Malin e Zi, por edhe luftën kundër krimit të organizuar dhe korrupsionit. Pala kosovare ka bërë vërtet shumë duke arritur mbështetjen e kësaj marrëveshje me dy të tretat e Kuvendit. Kjo nuk është e lehtë në asnjë vend. Tani është radha e Komisionit dhe Parlamentit Europian të hedhin një hap përpara. Unë kam folur edhe me zëvendëskryeministrin Hoxhaj dhe jemi dakort që kjo çështje nuk duhet neglizhuar, pasi pasojat mund të jenë vërtet problematike nëse tradhëtojmë besimin e qytetarëve të Kosovës duke shtyrë vendimin”./abcnews.al

 

MAY-KERCENIMI-1280x720.jpg
G. P.12:53 | 16/04/2018

Kryeministrja britanike, Theresa May, do të raportojë në Parlamentin e vendit për sa i përket bombardimeve ajrore në Siri, nga SHBA dhe Franca e Britani, për të cilat Parlamenti britanik nuk kishte dhënë më herët miratim.
Britania, Shtetet e Bashkuara dhe Franca të shtunën sulmuan objektiva të ndryshme në Siri, si kundërpërgjigje ndaj një sulmi të dyshuar kimik në Duma, ku mbetën të vrarë mbi 70 persona. Parlamenti britanik rifillon punën, pas pushimeve pranverore për këtë arsye deputetët nuk janë konsultuar para sulmit në Siri.
Gjithsesi qeveria britanike nuk është e detyruar me ligj që të marrë miratimin e Parlamentit për perfshirjen në sulme ajrore në situata të tilla, sipas asaj që raporton Associated Press./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono