Ramush Haradinaj

haradinaj.jpg
G. P.15:18 | 12/09/2019

Kosova ka anuluar pjesëmarrjen e planifikuar në Samitin i Pragës, mes katër shteteve të Vishegradit dhe shteteve të Ballkanit Perëndimor. Shkak për këtë u bënë deklaratat e presidentit çek Zeman kundër njohjes së pavarësisë së vendit.

Kryeministri në detyrë Ramush Haradinaj nuk do të marrë pjesë në samitin e Pragës. Në këtë samit marrin pjesë katër shtete të Vishengradit dhe shtete e Ballkanit Perëndimor. Haradinaj anulimin për pjesëmarrje në këtë samit e ka arsyetuar me procesin zgjedhor në Kosovë.

“Kosova ka hyrë në një cikël të zgjedhjeve të parakohshme dhe angazhimet në këtë kohë të rëndësishme për vendin, kanë pamundësuar pjesëmarrjen time në punimet e Samitit. Përmes kësaj letre i kam shprehur falenderimet e sinqerta Kryeministrit të Çekisë,  Andrej Babis, për ftesën për të marrë pjesë në Samit, dhe çmojmë lart përkushtimin e Çekisë ndaj Ballkanit Perëndimor dhe perspektivës evropiane të rajonit. Si Kosovë do të vazhdojmë të jemi kontribues serioz për paqe dhe stabilitet në rajon dhe ndaj dialogut me Serbinë, i cili do të përfundoj me njohje reciproke, në kufijtë ekzistues”, ka shkruar Haradinaj.

Dje Agjencia Çeke e Lajmeve, duke iu referuar burimeve të saj diplomatike, ka shkruar se refuzimi i Kosovës për të marrë pjesë në takimin e së enjtes, vjen si kundërpërgjigje ndaj deklaratave të presidentit çek, Milosh Zeman.

Zeman javën e kaluar ka deklaruar se dëshiron t’i diskutojë mundësitë kushtetuese që Republika Çeke të tërheqë njohjen e pavarësisë së Kosovës.

Të njëjtën deklaratë Zeman e ka përsëritur edhe dje gjatë qëndrimit në Beograd ku tha se brenda një muaji do ta rishikojnë mundësinë e tërheqjes së njohjes së Pavarësisë së Kosovës./ABC News Albania 24/7

kosova-1.jpg
G. P.14:24 | 11/09/2019

Në orët e hershme të mëngjesit, çdo gjë ishte gati në sheshin “Bill Clinton” për aktivitet e ditës, në nderim të viktimave të sulmit të 11 Shtatorit 2011. Ndërsa në oborrin e Qeverisë së Kosovës është zbuluar pllaka përkujtimore me mbishkrimin “Kosova kujton”.

Kryeministri Haradinaj tha se para 18 vitesh edhe Kosova e përjetoi rëndë sulmin mbi popullin mik të Amerikës. Ndërsa në një konferencë për mediat, Haradinaj tha se SHBA-ja nuk është për ndarje të Kosovës.

“Në kufirin e Kosovës ndahet edhe kufiri mes influencave të Amerikës dhe Rusisë dhe ne jemi vijë e frontit. Jam i bindur se Amerika çdoherë është me Kosovën”.

Ai foli edhe për shkarkimin e Këshilltarit për Siguri Kombëtare të Presidentit amerikan, Donald Trump, John Bolton.

“Unë kam respekt për John Bolton. Ai ka qenë i përfshirë në plot tema globale. Sa i përket çështjes së Ballkanit dhe Kosovës, mendoj se në Ballkan kanë ndodhur gabimet dhe jo në Washington. Sugjerimet i kanë shkuar të gabuara Washingtonit prej Ballkanit. Kuptohet prej Presidentit Vuçiç, sepse ai e ka interes shtetëror copëtimin e Kosovës, por janë bërë gabime edhe prej tjerëve”.

Ditë më parë në Kosovë kanë qëndruar dy senatorë amerikanë të cilët kanë inkurajuar liderët politikë e institucionalë për vazhdimin e dialogut Kosovës-Serbi, për arritjen e një marrëveshjeje finale./ABC News Albania 24/7

ramush-haradinaj.jpg
G. P.18:06 | 04/09/2019

Gjykata Kushtetuese e Kosovës e ka cilësuar të papranueshme për interpretim kërkesën e kryeministrit në largim të Kosovës, Ramush Haradinaj, lidhur me definimin e kompetencave dhe funksionimit të Qeverisë pas dorëheqjes së kryeministrit.

“Gjykata konkludoi se çështjet e ngritura nga parashtruesi i kërkesës nuk hyjnë në fushëveprimin e jurisdiksionit të Gjykatës Kushtetuese, siç përcaktohet me nenin 113 të Kushtetutës. Rrjedhimisht, në pajtim me nenin 113, paragrafi 1, të Kushtetutës, dhe me rregullin 59 (2) të Rregullores së punës, Andaj, Gjykata njëzëri vendosi të deklaroj kërkesën të papranueshme”, thuhet në njoftimin e kësaj Gjykate.

Më 19 korrik, Ramush Haradinaj ka dhënë dorëheqje nga pozita e kryeministrit të Kosovës. Dorëheqja e tij pasoi ftesën që kishte marrë nga Gjykata Speciale e Kosovës me seli në Hagë, ku ishte ftuar për një intervistë në cilësinë e të dyshuarit për krime lufte.

Më pas, Haradinaj i ishte drejtuar Gjykatës Kushtetuese me kërkesën që t’ia definojë përgjegjësitë gjatë kohës sa ai dhe qeveria në largim do të funksiononin në dorëheqje.

Si pasojë e vendimit të Haradinajt për dorëheqje, Kuvendi i Kosovës është shpërndarë dhe presidenti i Kosovës, Hashim Thaçi ka shpallur 6 tetorin si datë për mbajtje të zgjedhjeve parlamentare në Kosovë./REL

parlamenti-i-kosoves-1.jpg
G. P.16:45 | 21/08/2019

Të enjten në Kosovë pritet seanca për shpërbërjen e parlamentit. Ndërkohë partitë politike kanë vazhduar me takime me qytetarë si dhe aderime në parti.

Deputetëve u ka mbetur më pak se 24 orë deri në shpërbërjen e parlamentit. Të gjitha partitë politike deri tash janë shprehur pro zgjedhjeve të jashtëzakonshme pas dorëheqjes së Ramush Haradinajt nga posti i kryeministrit. PDK-ja edhe njëherë ka konfirmuar se do të votojnë pro shpërbërjes së parlamentit.

TV Klan merr vesh se disa orë pas shpërbërjes së parlamentit Presidenti do të shpallë datën e zgjedhjeve të jashtëzakonshme e që sipas të gjitha gjasave do të jetë 6 Tetori.

Ndërkohë partitë politike po vazhdojnë aktivitetet e parafushatës në qytete të ndryshme të Kosovës si dhe duke prezantuar aderime të reja në partitë e tyre. Derisa ende nuk ka asgjë konkrete rreth koalicioneve parazgjedhore pos zyrtarizimit të koalicionit parazgjedhor AAK-PSD.

Një takim tjetër dje AAK-ja ka zhvilluar edhe me Nismën SocialDemokrake, por ende nuk ka finalizim konkret të ndonjë marrëveshje me këtë parti. Derisa negociatat LDK-VV ende janë duke vazhduar.

Për të biseduar për kapacitetet teknike dhe profesionale për zgjedhjet e jashtëzakonshme që do të mbahen në Kosovë  presidenti Hashim Thaçi ka takuar kryetaren e KQZ-së Valdete Datën.

Thaçi ka kërkuar nga KQZ-ja përgatitje për të siguruar një proces “fair” dhe demokratik të zgjedhjeve. Kosova pritet të shkojë në zgjedhje të jashtëzakonshme pas dorëheqjes së Ramush Haradinajt nga posti i Kryeministrit./ABC News Albania 24/7

haradinaj-1280x710.jpg
G. P.14:09 | 19/08/2019

Kur kanë mbetur edhe pak ditë para seancës për shpërbërjen e parlamentit të Kosovës, AAK-ja e Ramush Haradinajt dhe PSD-ja e Shpend Ahmetit kanë arritur një marrëveshje për koalicion parazgjedhor. Ndërkohë, kryetari i LDK-së Isa Mustafa ka zhvilluar një seri takimesh në kërkim të aleancave.

Është nënshkruar marrëveshja e koalicionit parazgjedhor AAK-PSD, ndërmjet dy liderëve Ramush Haradinaj nga AAK-ja dhe Shpend Ahmeti nga PSD-ja. Kësaj marrëveshje i ka paraprirë një mbledhjeve të Këshillave Drejtuese të dy partive gjatë ditës.

“Mendoj se sot jemi më të përgatitur, të marrim përgjegjësitë për këto zgjedhje”.

“Ky është një bashkëpunim politik dhe zgjedhor duke marrë parasysh disa vija të bashkëpunimit që i kemi patur edhe në të kaluarën”.

Ndërsa gjatë ditës së sotme kryetari i LDK-së Isa Mustafa ka takuar ndaras kreun e PSD-së Shpend Ahmetin dhe atë të Nismës Socialdemokrate Fatmir Limajn, por jo edhe kreun e AAK-së Ramush Haradinajn, i cili është arsyetuar se është i zënë.

“LDK është më e interesuar të shkojë vetë në zgjedhje, varësit prej rrethanave që i kanë thënë edhe vetë, nëse krijohet mundësia për diçka e partive të mëdha atëherë edhe këta do t’i shqyrtojnë seriozisht këto çështje”.

“Ne bisedojmë me gjithë partnerët e më pas vendosim. Procesi zgjedhor është vetëm një fazë. Kosovës i duhet një qeveri që kryen punë”.

Mësohet gjithashtu se në këto takime është diskutuar edhe për seancën e 22 Gushtit. Më 22 Gusht pritet seance plenare për shpërbërjen e parlamentit, pas dorëheqjes së Ramush Haradinajt nga posti i kryeministrit./ABC News Albania 24/7

isa-mustafa.jpg
G. P.11:42 | 19/08/2019

Mediat kosovare raportojnë se kryetari i Lidhjes Demokratike të Kosovës, Isa Mustafa, do të takohet me kreun e Partisë Socialdemokrate, Shpend Ahmeti. Burime të Gazetës Express brenda PSD-së, e konfirmojnë se takimi mes dy krerëve të partive do të mbahet në orën 11:00.

Ndërsa mediat e tjera raportojnë se edhe kryetari i Aleancës për Ardhmërinë e Kosovës, Ramush Haradinaj, dhe kryetari i Nismës Socialdemokrate, Fatmir Limaj, do të jenë pjesë e këtij takimi.

Të dielën mediat raportonin se gjatë ditës pritet të nënshkruhet një marrëveshje për koalicion parazgjedhor mes partisë së Ahmetit dhe kryeministrit Haradinaj. Ky koalicion pritet të formalizohet me datën 21 Gusht, një ditë para shpërbërjes së Kuvendit.

Më parë, Mustafa ishte takuar edhe me kryetarin e Lëvizjes Vetëvendosje, Albin Kurti, ku shprehën nevojën për një qeverisje të re./ABC News Albania 24/7

ilir-meta-2.jpg
G. P.16:15 | 16/08/2019

Presidenti i Kosovës Hashim Thaçi dhe kryeministri Ramush Haradinaj kanë pritur kreun e shtetit shqiptar Ilir Meta për të kremtuar ceremoninë e përvitshme “Hardh Fest” në Rahovec. Presidenti Ilir Meta ka kërkuar që Shqipëria të mësojë më shumë nga eksperienca që ka Kosova në fushën e bujqësisë dhe agroturizmit.

Rrushi i Rahovecit ka bërë bashkë presidentin e Kosovës Hashim Thaci dhe kryeministrin Ramush Haradinaj. Kumbar për nisjen e vjeljes së frutit zgjodhën  presidentin Ilir Meta.

Ky është edicioni i 18 i festës së vjeljes së rrushit, Hardh-Fest në Rahovec. Tokën gotat e ngritën dolli. Ky është një mesazh se dy shtetet shqiptarë duhet të bashkëpunojnë edhe në prodhimet e bujqësisë, tha Presidenti i Republikës së Shqipërisë, Ilir Meta.

“Hardh Fest” ka për qëllim të promovojë rajonet vreshtare të Kosovës dhe në veçanti të turizmit në Rahovec./ABC News Albania 24/7

ramush-haradinaj.jpg
nev ila16:15 | 14/08/2019

Ramush Haradinaj e ka përjashtuar opsionin e një aleance me PDK-në dhe LDK-në në zgjedhjet e ardhshme. Haradinaj ka deklaruar se për qeverisjen e ardhshme do të vendosë në radhë të parë sovrani dhe ka shtuar se, nëse rizgjidhet kryeministër nuk do ta heqë taksën me Serbinë.

Kryeministri i dorëhequr i Kosovës, Ramush Haradinaj e ka përjashtuar pjesëmarrjen e AAK-së në një koalicion gjithëpërfshirës në zgjedhjet e ardhshme. Në një intervistë televizive, Haradinaj ka nënvizuar se AAK nuk do të bëjë aleancë me partitë e mëdha si PDK dhe LDK dhe nuk do ta përkrahë idenë për një kryeministër konsensual.

“Nuk jemi për koalicion me PDK-në, LDK-në dhe VV-në, por jemi të hapur për disa parti partnere siç është rasti i PSD-së, AKR-së…”, tha Haradinaj.

Haradinaj ka nënvizuar se AAK do t’u ofrohet fillimisht qytetarëve si parti më vete, pasi sipas tij ajo është rritur si subjekt politik dhe në sondazhe rezulton e para.

“Qytetari ka vlerësuar angazhimin tim në temat kombëtare dhe për këtë Aleanca është rritur. Jemi në situatën e fitores”, tha ai.

Sa i takon kandidaturës së tij për postin e kryeministrit, Haradinaj ka theksuar se ajo do të diskutohet në strukturat e AAK-së.

“Nuk e kemi konfirmuar si parti kandidaturën time, do ta diskutojmë për ta konfirmuar. Ekziston kandidatura ime, por duhet ta zyrtarizojmë. Por e rëndësishme është se kush do të jetë kryetar qeverie nuk e vendosin vetëm partitë, por edhe qytetarët me votë dhe është herët të thuhet se si do të ndodhë”, tha Haradinaj.

Sa i takon taksës për produktet serbe, Haradinaj ka deklaruar se nuk do ta mbështesë heqjen e saj, pasi sipas tij është në interes të shtetësisë së Kosovës.

“Asnjë parti nuk do të marrë mbështetjen tonë për heqjen e taksës. Taksa është shtet. Një shtet që rrezikohet nga tjetri dhe i hap tregun, atëherë nuk është shtet”, deklaroi Haradinaj.

Haradinaj ka shtuar më tej se, për aq kohë sa çështja e shtetësisë së Kosovës nuk është zgjidhur 100 për qind është me rrezik që ajo të udhëhiqet nga liderë të paqëndrueshëm, që bëjnë sipas tij kompromise për hir të familjes dhe rrethit të afërt në kurriz të vendit./ABC News Albania 24/7

ramush-haradinajjj.jpg
G. P.16:30 | 02/08/2019

Presidenti i Kosovës, Hashim Thaçi ka kërkuar që pasuesi i kryeministrit Ramush Haradinaj të vijë nga radhët e koalicionit “PAN”, që fitoi zgjedhjet e fundit të përgjithshme. Ndërkohë, AAK dhe partitë e opozitës si Vetëvendosje apo LDK kanë bërë thirrje për shpërndarjen e Parlamentit.

Presidenti i vendit, Hashim Thaçi, përmes një shkrese zyrtare dërguar bartësit të koalicionit fitues të zgjedhjeve të fundit, Kadri Veselit, i ka kërkuar edhe zyrtarisht koalicionit PAN që të propozojnë kandidatin e ri për ta mandatuar për formimin e qeverisë së Kosovës.

Në këtë letër të presidentit thuhet se si koalicion fitues që kanë fituar shumicën e nevojshme në Kuvend për të formuar Qeverinë, kanë të drejtën e propozimit të kandidatit të ri për të formuar qeverinë.

Nëse ajo përbërje e propozuar e Qeverisë nuk merr shumicën e votave të nevojshme, presidenti brenda dhjetë ditësh emëron kandidatin tjetër sipas së njëjtës procedurë.

Nëse as herën e dytë nuk zgjidhet qeveria, atëherë presidenti i shpall zgjedhjet që duhet të mbahen jo më vonë se 40 ditë nga dita e shpalljes së tyre. Menjëherë ka reaguar lëvizja Vetëvendosje po e kundërshton këtë vendim, ndërsa ka paralajmëruar mbledhjen e nënshkrimeve për shpërbërjen e Kuvendit.

Ndërsa më herët kryeministri në detyrë Ramush Haradinaj tha se edhe AAK-ja është e interesuar të shpërbëj Kuvendin dhe se do t’i bashkohet mocionit për një gjë të tillë.

Edhe LDK-ja gjithmonë është deklaruar se është pro zgjedhjeve të jashtëzakonshme derisa nesër e kanë Kuvendin Zgjedhor ku pritet të zgjedhin liderin e partisë./ABC News Albania 24/7

thumbnail_31.07.2019.2-600x360.jpg
nev ila16:30 | 31/07/2019

Pas dorëheqjes së Ramush Haradinajt nga posti i Kryeministrit, Presidenti i Kosovës, Hashim Thaçi është shprehur i gatshëm të shpallë zgjedhjet e jashtëzakonshme.  Ai u takua me kryetaren e Komisionit Qendror të Zgjedhjeve Valdete Dakën.

Ende asnjë lëvizje nga partitë politike e as nga krerët e institucioneve rreth situatës së krijuar pas dorëheqjes së Ramush Haradinajt nga posti i kryeministrit.

I vetmi takim që është mbajtur sot është ai i kryetares së KQZ-së, Valdete Daka, me presidenti Hashim Thaçi.

Të dy diskutuan për afatet kushtetuese për mbajtjen evententuale të  zgjedhjeve të jashtëzakonshme dhe buxhetin.

“U diskutua për afatet kushtetuese në qoftë se mbahen zgjedhjet. Ato janë çështje që diskutohen pasi të shpallen zgjedhjet. Nëse shpallen KQZ-ja kërkon mjetet e nevojshme nga qeveria dhe vendoset për buxhet sepse ky muaj ka qenë vit zgjedhor dhe nuk e kemi pas buxhetin e nevojshëm”, u shpreh Daka.

Daka tha se nuk është folur për datën e zgjedhjeve, ndërsa pas dorëheqjes së Haradinajt të gjitha partitë janë deklaruar pro mbajtjes së zgjedhjeve të jashtëzakonshme e kundër një qeverie teknike./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono