rama

ramaaa.png
R D14:50 | 20/01/2020

Kryeministri shqiptar Edi Rama zhvilloi vizitën e parë zyrtare si kryesues i OSBE-së. Ai ishte në Ukrainë, ku konfliti i Krimesë ka prodhuar mijëra viktima. Rama u shpreh se synimi i presidencës shqiptare të OSBE-së, është të ndalë konfliktin e dhunshëm. Një armëpushim i nënshkruar mes palëve në vitin 2015, nuk u respektua asnjëherë nga palët.

Qysh kur Rusia aneksoi Krimenë në vitin 2014, Ukraina ka qenë stacioni i parë i çdo kryesuesi të OSBE-së. Edi Rama nuk bëri përjashtim. Ai po zhvillon një vizitë dy ditore në Kiev, ku u takua me të gjithë palët në vend.

Në një konferencë shtypi me ministrin e Jashtëm të Ukrainës, Rama tha se synimi i OSBE-së dhe Presidencës shqiptare, është vendosja e një armëpushimi të vërtetë në terren.

“Nuk jemi këtu për të premtuar ndonjë mrekulli, e dimë shumë mirë që kjo është një krizë shumë e ndërlikuar dhe jemi këtu sepse e dimë edhe që ka diçka që mund ta bëjmë më mirë se të tjerët për të ndihmuar të lehtësojmë sa më shumë të jetë e mundur jetët e atyre që janë në terren dhe janë plotësisht të pafajshëm e nuk e meritojnë të vuajnë pasojat dhe brutalitetin e këtij konflikti. Ky është prioriteti ynë kryesor, të ndryshojmë sa mundemi gjendjen në terren, ndërkohë që formulat dhe kontaktet dhe fjalët e mëdha sillen rrotull dhe mundësisht arrijnë rezultate më të mëdha”, tha Rama.

Konflikti në Krime është ndër më të përgjashmit që pas shpërbërjes së Bashkimmti Sovjetik. Sipas Kombeve të bashkuara, qysh prej vitit 2014, e deri më tani, rreth 9,500 persona kanë vdekur, ndërsa 22 mijë të tjerë janë plagosur. Fuqitë e mëdha nuk e njohin aneksimin e Krimesë nga Rusia, por kjo e fundit është anëtare e OSBE-së, ndaj Rama, asaj që për shumëkënd është luftë, i referohet si krizë. /abcnews.al

0202be50-925b-4b46-8fda-c76bd90071d8.jpg
R D11:50 | 20/01/2020

Kryeministri Rama nuk do jetë i pranishëm në seancën e parë plenare për vitin 2020, për shkak të axhendës si kryesues i radhës i OSBE. Shefi i qeverise shqiptare është sot ne nje vizite zyrtare në Ukrainë.

Me anë të një video të shpërndarë në rrjetet sociale, Rama njofton se është takuar me Kryeministrin e Ukrainës, Oleksiy Honcharuk. Në video Rama përshëndetet me homologun dhe më pas largohet për të vijuar axhendën e mëtejshme.

Me herët kryeministri Rama kishte zhvilluar nje takim me ministrin e punëve të Jashtme, Vadym Prystaiko. Temë e takimit, mësohet se ka qenë situata e sigurisë në Ukrainë dhe përreth saj. Gjithashtu, në axhendë parashikohen bisedime me presidentin e Ukrainës Volodimir Zelenski dhe kryetarin e parlamentit.

Kjo është vizita e parë e Ramës si kryesues i OSBE, në vendin që përbën sfidë për anëtarët e organizatës, e cila ka një mision të posacëm monitorimi aty. Në ditën e dytë, axhenda e kryeministrit Rama do vijojë me një vizitë në Ukrainën Lindore për të patur një panoramë më të qartë të situatës në zonat e prekura nga konflikti, e ku armëpushimi ende nuk është zbatuar. Situata e Ukrainës konsiderohet si sfida më e ngutshme për sigurinë dhe stabilitetin në Europë. /abcnews.al

Screenshot_8-1.png
R D14:31 | 16/01/2020

Komisioneri për Zgjerimin e BE-së, Oliver Varhelyi, kërkoi nga  qeveria shqiptare të adresojë sa më shpejt shqetësimet e shprehura nga Franca dhe Holanda, që bllokuan negociatat në tetor. Në konferencën me Kryeministrin Rama në Tiranë, eurokomisioneri tha se krimi dhe korrupsioni janë dy sfidat kryesore për Shqipërinë. Ndërsa Kryeministri Rama, duke kujtuar iniciativën e tij kundër prokurorëve e gjyqtarëve të korruptuar, tha se vendimi për lirimin e anëtarit të bandës së “Durrësit”, Endrit Dokle u dha nga anëtarë të KÇK.

Brukseli vijion të ketë të njëtat shqetësime në raport me ecurinë e Shqipërisë drejt hapjes së negociatave për amëtarësim. Ky proces solli në Tiranë Komisionerin e Zgjerimit të BE-së, Oliver Varhelyi, i cili në një konferencë së bashku me kryeministrin Edi Rama, i cili konfirmoi qëndrimin pozitiv të Komisionit Europian për integrimin dhe përshëndeti marrëveshjen e artritur për reformën zgjedhore.

“Mirëpres përparimin që është bërë në reformën në drejtësi. Mirëpres marrëveshjen e djeshme për reformën zgjedhore. Të gjitha këto janë lajme të mira por kemi ende sfida përpara. Duhet të bëjmë shumë për të luftuar krimin e organizuar, korrupsionin”, tha ai.

Sfida më krimin dhe korrupsionin nuk e pengoi eurokomisionerin që të shpreh pritshmëri pozitive, ndërsa tha se po punohet fortë me Francën dhe Holandën që shqiptarët këtë vit të marrin vendimin pozitiv.

“Ne e konsiderojmë Shqipërinë si një shtet që është gati të hapë negociatat me BE dhe ne do të punojmë fort që kjo të ndodhë para Samitit të Zagrebit. Fakti që nuk u hapën negociatat në tetor ka pasur të bëjë me shqetësimet e disa shteteve anëtare dhe duhet ti shikojmë me vëmendje. Po punojmë që të gjejmë një zgjidhje në mënyrë që të ecim përpara me procesin e zgjerimit. Të krijojmë një qasje të re që bazohet në katër parime bazë”, vijoi Oliver Varhelyi.

Për të treguar vëmendjen tek reforma në drejtësi, kryeministri Edi Rama reagoi për herë të parë për lirimin e Endrit Dokles, i dënuar me burgim të përjetshëm, i cili u lirua pak ditë më parë nga Gjykata e Krujës.

“E kam informuar për procesin e Reformës në Drjetësi si dhe iniciativën e re dhe jemi duke përfunduar diskutimet me ndërkombëtarët për të hapur një ofensive kundër krimit të organizuar. Edhe kundër gjykatëseve e prokurorëve, si në rastin e para dy ditëve që i përkasin KCK. Po e përdorin autoritetin e tyre mes sistemit të vjetër që po shembet dhe sistemin e ri , për të bashkëpunuar hapur me krimin”, u shpreh Rama.

Në fund të Konferencës, kryeministri Rama siguroi eurokomisionerin që si do që të jetë vendimi i këtij viti i Këshillit Europian qeveria shqiptare do të vijojë me reformat. /abcnews.al

e7ef2413-6f2f-4b86-a870-18e14b9e28c2.jpg
R D13:59 | 16/01/2020

Kryetari i PD, Lulzim Basha ka reaguar një ditë pasi media në Kosovë publikoi padinë e depozituar nga Edi Rama në Gjykatën e Prishtinës kundër Kryeministrit në detyrë, Ramush Haradinaj. Rama pretendon se Haradinaj ka shpifur kur i ka adresuar atij akuzat për shkëmbim territoresh.

” Pseudo-padia e Edi Ramës ndaj kryeministrit të Kosovës Ramush Haradinaj është akt i ulët që na turpëron të gjithëve. Meriton refuzimin dhe revoltën legjitime”, shkruan Basha në reagimin e tij.

Statusi i plotë i Bashës në facebook:

‪Pseudo-padia e Edi Ramës ndaj kryeministrit të Kosovës është një perversitet i shëmtuar anti-kombëtar. Është turp i pakapërdishëm që Ramush Haradinaj, pas gjakut të tij dhe familjes së tij për çlirimin e Kosovës, pas betejave me akuzat e montuara të Beogradit, të përballet me pasojat e degjenerimit dhe vasalitetit të Edi Ramës.

Ky akt i ulët që na turpëron të gjithëve meriton refuzimin dhe revoltën legjitime ndaj një kryeministri të dështuar fund e krye dhe ndaj falimentimit të tij politik dhe moral para Shqipërisë dhe mbarë kombit shqiptar./abcnews.al

Lexo edhe:Zbardhet padia, Rama: Haradinaj ka shpifur, nuk jam shprehur pro shkëmbimit të territoreve

Screenshot_2-6.png
R D12:46 | 16/01/2020

Kryetarja e LSI-së, Monika Kryemadhi gjatë bashkëbisedimit me gazetarët u pyet edhe për Damian Gjiknurin, me të cilin opozita është ulur në tryezën e reformës edhe pse kishte lëshuar akuza të ashpra ndaj tij.

Ajo tha se Gjiknuri është këlysh i Ramës dhe ajo nuk e ka në plan të merret me këlyshët por me vetë bishën.

“O zotëri unë do luftoj me bishën ti më thua lufto me këlyshët. Të gjithë janë këlyshët e tij, çfarë i ka kërkuar Rama kanë bërë. Dënimi i tij është një test për Edi Ramën se është kusht nga Bundestagu”, tha ndër të tjera Kryemadhi, referuar kërkesave të parlamentit gjerman për të hetuar krimet zgjedhore, ku dyshohet se Gjiknuri është perfshirë (dosja 184).

Po kështu ajo u pyet nga gazetarët edhe për Kryetarin e Bashkisë së Tiranës. “Ka një hezitim nga LSI kur vjen puna për të folur apo akuzuar Veliajn”, i tha gazetari, ndërsa Kryemadhi u përgjigj: “Erion Veliaj është një zgjatim, një nga 10 gishtat e duarve të Edi Ramës. S’kam pse merrem me gishtat e dorës…”. /abcnews.al

6855e4ff-f0a8-4205-b7ef-10031d1fc2d7.jpg
R D11:19 | 16/01/2020

Kryeministri Edi Rama zhvilloi një konferencë për mediat bashkë me Komisionerin e ri të Zgjerimit, Varhelyi. Rama pasi e falenderoi për angazhimin për të mbledhur fonde për termetin, ndërsa theksoi se kemi diskutuar me komisionerin për çështjen e negociatave. Po kështu ai foli edhe për vendimin e Gjykatës së Krujës për të liruar ish-anëtarin e bandës së Durrës, Indrit Dokle. “Janë anëtarë të KÇK ata gjyqtarë e prokurorë që dhanë vendimin”, deklaroi Rama në sytë e komisionerit.

“E kam informuar komisionerin se në ditët në vijim do ndërmarrim një nisme të re për të hapur një ofensivë shembullore kundër krimit të organizuar ndaj atyre gjykatësve e prokurorëve që si në rastin e para dy ditësh (Endrit Dokle) i përkasin organizatës KCK dhe po e përdorin autoritetin e tyre në këtë fazë të ndërmjetme për të bashkëpunuar hapur dhe paturpësisht me krimin”, tha Rama. /abcnews.al

404994-CrxHCBo8cK.jpg
R D23:05 | 15/01/2020

Kryeministri Edi Rama ka paditur në Gjykatën Themelore të Prishtinës, Kryeministrin në detyrë të Kosovës Ramush Haradinaj. Rama pretendon se Haradinaj ka shpifur ndaj tij sa i përket tezës së shkëmbimit të territoreve. Në këtë padi, që është publikuar nga media në Kosovë, Rama kërkon konpensim të dëmit moral si dhe detyrimin e Haradinajt të përgënjeshtrojë deklaratat në lidhje me shkëmbimin e territoreve. (Reagon Haradinaj: Kombi ynë dhe Kosova ka njerëz që i dalin zot)

Në këtë padi, përmenden dy emisione të transmetuara gjatë muajit tetor të vitit të kaluar, në të cilat Haradinaj ka folur për këtë temë, e ku e ka akuzuar Ramën, që së bashku me Hashim Thaçin dhe Aleksandër Vuciçin, kanë nisur idenë e shkëmbimit të territoreve ndërmjet Kosovës dhe Serbisë.

“Në datën 17.10.2019 e 29.10.2019, i Padituri Ramush Haradinaj, në kohën e kryerjes së deklaratës Kryeministër në detyrë i Republikës së Kosovës (më poshtë referuar edhe si “i Padituri”gjatë një interviste të dhënë gazetarit Artur Zheji e të publikuar në emisionin 360.gradë në datën 17.10.2019 si dhe gjatë intervistës së kryer në datën 29.10.2019 në emisionin televiziv Pressing/Zona Pressing të publikuar në televizionin “T7” të Republikës së Kosovës, ka kryer deklarim publik të fakteve shpifëse e mashtruese në adresë të Paditësit me pasojë cenimin e nderit, personalitetit, reputacionit dhe dinjitetit të Paditësit me pasojat e parashikuara në legjislacionin e zbatueshëm”, thuhet në padi.

Në padi thuhet se deklaratat shpifëse shkak padie kanë pasur për kontekst përgatitjet për procesin e dialogut mes Republikës së Kosovës dhe Republikës së Serbisë e që, në parim, sic thuhet në padi, do të duhet të rezultojë në një marrëveshje reciprokisht të detyrueshme për të dyja palët dhe njohje reciproke në mes këtyre dy shteteve.

“Kjo çështje ka dominuar debatin publik që nga fundi i vitit 2018 dhe përgjatë vitit 2019, duke rezultuar në akuza deri për “tradhëti”, çdo herë e përkundrejt personave të pretenduar se gjatë këtij procesi dialogu kanë mbështetur idenë e të ashtuquajturit “shkëmbim të territoreve në mes Kosovës dhe Serbisë””, thuhet tutje në këtë padi, të cilën e ka siguruar “Betimi për Drejtësi”.

Sipas padisë, kryeministri i Kosovës, është autori e përhapësi në publik i akuzave për fakte konkrete të cilat në mënyrë të përsëritur e në mënyrë direkte e indirekte, kanë krijuar në publik idenë e rreme sipas së cilës “Kryeministri i Republikës së Shqipërisë në personin e Paditësit është në shërbim të një ideje në dëm të interesit të kombit shqiptar në përgjithësi dhe të interesit të Republikës së Kosovës në veçanti”.

Aty përmenden një numër i madh të deklaratave që Haradinaj vazhdimisht i ka dhënë, e në të cilat e ka apostrofuar kryeministrin shqiptar, Edi Rama.
Pjesë e këtyre deklaratave është edhe ajo ku Haradinaj, sipas padisë, i referohet edhe aferave korruptive, për ta jetësuar idenë e shkëmbimit të territoreve.

Në padi thuhet se ky qëndrim në vazhdimësi i Haradinajt është mbajtur përkundër fakteve që sipas padisë, Rama asnjëherë nuk ka diskutuar për tema të tilla.

“Kryeministri i Republikës së Shqipërisë nuk ka asnjë rol formal e juridiko-politik në marrëveshjen eventuale në mes Republikës së Kosovës dhe Serbisë. E kjo për faktin se kjo lloj marrëveshje bazuar në Kushtetutën e Republikës së Kosovës, përbën një akt që mund të miratohet vetëm dhe ekskluzivisht nga Kuvendi i Republikës së Kosovës e, për më tepër, kërkon ekskluzivisht miratimin e 2/3 të të gjithë deputetëve të Kuvendit të Kosovës[1], dhe rrjedhimisht 80 vota pro, përfshirë deputetët e koalicionit qeverisës dhe të opozitës, në secilën rrethanë. Kryeministri i Republikës së Shqipërisë asnjëherë nuk ka mbështetur dhe nuk është deklaruar në mbështetje të një ideje të tillë. Qëndrimi i Paditësit në Qeverisë së Republikës së Shqipërisë ka qenë një dhe i vetëm: ai i mbështetjes së pozicionit të qëndrimeve të Republikës së Kosovës drejt një marrëveshje ndërkombëtarisht të detyrueshme për Republikën e Kosovës dhe Serbisë dhe e cila do të rezultonte në njohje reciproke në mes dy vendeve dhe do të hapte rrugëtimin efektiv drejt integrimeve euro-atlantike”, thuhet ndër të tjerash në këtë padi.

Në këtë padi, Rama nuk e ka cekur shumën e dëmit që pretendon se i është shkaktuar.

Por, me padi, ai ka kërkuar që përveç kompensimit të dëmit, të detyrohet Haradinaj që t’i dal deklaratat që sipas padisë, janë shpifje, si dhe t’i përgënjeshtroje ato.

efdffe24-3e94-43fc-b1a2-96db42db9f69-1.jpg
R D17:29 | 15/01/2020

Gazetarët e njohur Blendi Fevziu dhe Armand Shkullaku kanë komentuar marrëveshjen e mazhorancës dhe opozitës për të bërë së bashku reformën zgjedhore. Një kthesë e fortë kjo dhe e papritur në diskursin politik të vendit. Në intervistën për Abc News, Blendi Fevziu thotë se nuk ka palë humbëse, ndërsa Shkullaku mendon ndryshe. Ai thekson se opozita duhet të kërkonte me këmbëngulje ndryshimin e sistemit zgjedhor.


Sipas Fevziut, opozita që prej qershorit të vitit të shkuar kur u zhvilluan zjedhjet lokale, nuk kishte rrugë tjetër veçse të ulej në tyrezë me maxhorancën.

Blendi Fevziu: Zgjidhje tjetër përveç kësaj marrëveshje nuk kishte. A mund të arrihej më shpejt apo më vonë është gjë tjeter. Por natyrisht që është arritur me ndërmjetësimin e ndërkombëtareve edhe pse këtu po thuhet se ‘është bërë vetë’. Kjo marrëveshje u arrit me ndërmjetësimin e ndërkombëtareve.

Ndërsa Armand Shkullaku thotë se opozita dështoi me rrugën e protestave, por shpreh rezerva për kërkesat që ka artikuluar në raport me ligjin zgjedhor.

Shkullaku: Kjo (marrëveshja) është rruga e dytë meqenëse rruga e parë dështoi, të cilën nuk e shoh me shenja pozitive që mund të ndodhi, duke u nisur nga ajo që pamë dje, pra tryeza për reformën zgjedhore. Opozita duhet të kishte këmbëngulur fort në ndryshimin e sistemit zgjedhor.

Kush del i fituar?

Për Fevziun të dyja palët momentalisht janë të fituara.

“Ka një inkoherence të opozitës ka edhe lehtësim të mazhorancës se ka dalë nga impasi ky ishte. Opozita luftoi jashtë sistemit, por nuk arriti, ndërsa mazhoranca s’kishte qeverisje normale me opozitën jashtë sistemit”, theksoi ai.

Thelbi i tyrezës mes PD e PS është dakordësia për të eleminuar shit-blerjen e votës. Por për Shkullakun me kërkesat e artikuluara deri më tani nga opozita mposhtja e pushtetit të Ramës do të jetë e vështirë të ndodhë.

“Kushtet ku jemi, me garën që dimë të zhvillohet e shoh të vështirë që opozita të mposhtë një pushtet që kontrollon gjithçka. Me një marrëveshje për bashkëqeverisje, që do ta çojë vendin drejt zgjedhjeve të reja opozita do të jetë e humbur”.

Në kushtet e reja politike ku ndodhet opozita, analisti Shkullaku thotë se Basha duhet të veprojë duke ringritur PD-në.

“Lidershipi i PD-së duhet të japë prova. Premtimin për ndryshim duhet ta bëjë me akte dhe jo me fjalë”, tha Shkullaku duke kujtuar se në 2005 PD i fitoi zgjedhjet, pasi Berisha ftoi themeluesit ti bashkëngjiten partisë. /abcnews.al

 

c12fd892-63f1-4a61-9d54-a1a73fab21d9-1280x720.jpg
R D14:13 | 09/01/2020

“Na duhen disa përgjigje të qarta mbi arsyet e dëbimit të detyruar të Harun Çelik”, kështu shkruan eurodeputetja rumune, Ramona Strugariu. Ajo i ka nisur një letër zyrtare autoriteteve më lartë të shtetit shqiptar, Preisdentit Meta, Kryeministrit Rama, etj.

Reagimi i saj vjen pasi më 1 janar u deportua nga Shqipëria pa asnjë shpjegim zyrtar mësuesi turk, Harun Celik, që i përket lëvizjes Gylen.

Në letër, Strugariu shprehet se e ka ndjekur këtë çështje me shumë shqetësim dhe se kërkon të marrë përgjigje të qarta lidhur me procedurat që janë ndjekur nga shteti shqiptar për të dëbuar Harun Çelik drejt Turqisë.

Ajo po kështu kërkon të dijë nëse është respektuar ligji ndërkombëtar për të drejtat e njeriut.

Ndër të tjera, eurodeputetja thekson se shkelja e ligjit ndërkombëtar me dëbimin e Harun Ccelik rrezikon integrimin e Shqipërisë duke shtuar se respektimi i të drejtave të njeriut është një klauzolë e rendësishme për integrimin e vendit në BE.

Harun Çelik, u dërgua në Turqi jashtë vullnetit të tij pasi kishte vuajtur dënimin në vendin tonë me 5 muaj burg për kalim të paligjshëm të kufirit. Ndaj tij nuk kishte asnjë urdhër-arresti ndërkombëtar, ndaj vjen reagimi i fortë i deputetes së parlamentit europian.

LETRA E PLOTË

Shkëlqesisë së tij, Presidentit të Republikës së Shqipërisë, llir Rexhep Meta

Shkëlqesia juaj, ne kemi ndjekur me shqetësim të thellë çështjen e shtetasit turk Harun Çelik, i cili u dëbua nga Shqipëria në 1 janar dhe u deportua në Turqi, ku ai akuzohet për gjoja mbështetje të klerikut turk Fethullah Gulen, i cili është larguar nga Turqia.

Ne do donim t’ju bënim disa pyetje për t’u sqaruar në lidhje me situatën aktuale ligjore të zotit Çelik, veçanërisht në lidhje me parimet e së Drejtës Sociale Evropiane dhe Ndërkombëtare në lidhje me ekstradimin, kthimin e shtetasve të huaj dhe mbrojtjen e azilkërkuesve.

Ju lutemi ndani me ne rrethanat precize dhe bazën ligjore në bazë të së cilës u krye ky operacion, veçanërisht pasi autoritetet shqiptare këmbëngulin se gjithçka është bërë në përputhje me procedurat normale për dëbimin e një shtetasi të huaj.

Ne gjithashtu duam të kërkojmë sqarime të mëtejshme në lidhje me procedurën e azilit që Z. Çelik kishte kërkuar, si është vepruar nga autoritetet shqiptare më këtë kërkesë në kohën e dëbimit të tij dhe hapat e ndjekur në këtë procedurë.

Legjislacioni shqiptar për kërkesën për azil dhe të huajt, përkatësisht Ligji Nr. 121/2014 dhe Ligji Nr. 108/2013 njeh të drejtën e azilit ndaj një të huaji që është jashtë vendit të tij dhe ka frikë nga përndjekja për shkaqe politike.

Ligji në fjalë njeh gjithashtu edhe parimin e mos-refuzimit dhe ofron mundësinë për të apeluar çdo vendim të dëbimit , urdhra për largim ose ekstradim, në përputhje me ligjet evropiane dhe ndërkombëtare të huazuara nga Republika e Shqipërisë.

Për më tepër, legjislacioni shqiptar ndalon dëbimin e azilkërkuesve para se të vlerësohen aplikimet e tyre. Në këto rrethana, ne do të dëshironim të dinim nëse këto procedura janë përmbushur dhe nëse Z. Çeliku iu dha mundësia të shfrytëzonte të drejtën e tij për të apeluar çdo vendim dëbimi kundër tij.

Së dyti, ne do të dëshironim të dinim nëse autoritetet turke kishin filluar formalitetet për një procedurë ekstradimi, nëse një gjykatë shqiptare kishte vlerësuar këtë kërkesë dhe në lidhje me përfshirjen e përgjithshme e autoriteteve turke në procesin e riatdhesimit të Z. Çelik.

Këtu rikujtojmë gjithashtu se Shqipëria ka nënshkruar dhe ratifikuar Konventën e Këshillit të Evropës për Ekstradimin, e cila sipas nenit 3, ndalon çdo formë ekstradimi me bazë politike.
Më në fund, Shqipërisë iu dha statusi i vendit kandidat për në BE në vitin 2014.

Gjatë viteve të kaluara, Shqipëria ka arritur të zhvillojë reforma ambicioze në fushat e gjyqësorit, administratës dhe ekonomisë së saj, në përpjekjet e vendit për të përparuar drejt anëtarësimit në Union. Vetë Parlamenti Evropian ka qenë një mbështetës i fortë i perspektivës evropiane të Shqipërisë.

Neni 19, pika 2 të Kartës Europiane për të Drejtat Themelore deklaron prerë se: “Askush nuk mund të largohet, dëbohet ose ekstradohet drejt një Shteti ku ka rrezik serioz që ai apo ajo t’i nënshtrohet dënimit me vdekje, torturës apo trajtimeve të tjera ç’njerëzore apo degraduese.”.

Respektimi i të drejtave themelore të përcaktuara në Kartë dhe Konventa, si dhe respektimi i normave të së drejtës evropiane dhe ndërkombëtare janë kushte të domosdoshme për të vazhduar në rrugën drejt anëtarësimit në BE.

Nëse kjo është mënyra se si Shqipëria e kupton respektimin e të drejtave themelore të njeriut, kjo gjë mund të ndikojë në perspektivën e saj evropiane. Ne mezi presim përgjigjen tuaj dhe dëshirojmë të theksojmë se zhvillime të tilla do të diskutohen në kuadrin e Delegacionit të PE në Komitetin Parlamentar të Stabilizim-Asociimit BE-Shqipëri dhe përpara Samitit të Zagrebit 2020. Realiteti i respektimit të të drejtave themelore është një parakusht i çdo bisedimi të ardhshëm.

Sinqerisht juaja, Zonja Ramona Strugariu, eurodeputete, Anëtare e Komisionit për Liritë Civile. /abcnews.al

ramaaaa.png
R D13:47 | 09/01/2020

Kryeministri Edi Rama ka folur qartësisht nga Vjena për sulmin që mund ti kanoset Shqipërisë për shkak se ka strehuar muxhahedinët irakenë. Ky sqarim i kryeministrit vjen, pasi lideri suprem i Iranit, atakoi drejpërdrejt vendin tonë duke e quajtur “vend i vogël, djallëzor”.

“Kemi marrë përsipër një risk me muxhahedinët. Çdo sulm mbi vendin tonë është sulm mbi NATO-n. Ta keni të qartë se Aleanca përballet me risqe, por jemi krenar që jemi të dobishëm, në mbështetje të Aleancës që lufton për një botë më të mirë”, u shpreh Kryeministri.

Deklarata e plotë e Ramës për Teheranin gjatë konferencës për shtyp me Sekretarin e Përgjithshëm të OSBE-së, Thomas Greminger:

“Ne nuk jemi posaçërisht të rrezikuar pas ngjarjes në Iran, por e dimë shumë mirë që duke ndërmarrë hapin e humanitar të shpëtimit të jetëve të kërcënuara nga regjimi diktatorial i Teheranit, kemi marrë përsipër një risk. Jam shumë krenar që ky risk është ndërmarrë në mënyrë bipartizave, pra me konsens politik në Shqipëri dhe me bindjen që është një nga detyrimet që kemi ndaj SHBA-ve.

Nga ana tjetër dua ta kujtoj ne jemi vend anëtar i NATO-s dhe çdo sulm mbi vendin tonë është sulm mbi NATO-n.

Për ata që e kanë menduar përfshirjen e vendit tonë në NATO si një momente celebrimi, duhet të kujtoj se kanë gabim, ne jemi të angazhuar në aleancë. Një aleancë që përballet me risqe. Jetojmë në një botë ku përballemi me rreziqe dhe me armiq të lirisë dhe demokracë dhe jemi krenar që jemi të dobishëm në mbështejte të një aleance që lufton për një botë më të mirë”. /abcnews.al

 

Lexo edhe:

“Një vend i vogël, djallëzor”, Rama komenton deklaratën kërcënuese të Iranit

Anti-terrori në gatishmëri, agjentët vënë nën vëzhgim iranianët që ndodhen në Shqipëri

Khamenei na u referua si “vend djallëzor”, Shqipëria në rrezen e raketave të Iranit

Meta dënon sulmin iranian mbi bazat amerikane: Provokues! Shqipëria nuk është vend djallëzor

Khamenei i Iranit kërcënoi Shqipërinë? Klosi: Treguan se i kanë mundësitë për të sulmuar


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono