QSUT

MANASTIRLIU-PER-SHEFAT-E-SHERBIMEVE-QSUT.mpg_snapshot_01.46-1280x720.jpg
ent ela16:09 | 13/02/2019

Shërbimet spitalore në QSUT vijojnë të drejtohen nga shefa të paligjshëm. Ministrja e Shëndetësisë Ogerta Manastirliu thotë se e ka firmosur listën e fituesve, ndërkohë zyrtarizimi i emrave ka mbetur në tryezën e ministres së Arsimit Besa Shahini.

Ministrja e Arsimit Besa Shahini po mban peng 41 drejtuesit e shërbimeve në spitalin më të madh në vend. Shefat e rinj të shërbimeve në Qendrën Spitalore “Nënë Tereza” në Tiranë janë përzgjedhur që në muajin nëntor të vitit të shkuar, por duhet të zyrtarizohen nga ministrja e Arsimit Besa Shahini dhe ministrja e Shëndetësisë Ogerta Mansatirliu.

Manastirliut thotë se ajo e ka firmosur listën e fituesve e tashmë ajo është mbi tryezën e koleges së Arsimit.

Ministrja e Shëndetësisë sqaroi këtë çështje pasi inauguroi urgjencën e re të shërbimit infektiv në Qendrën Spitalore Universitare “Nënë Tereza” ku  bëri të ditur gjithashtu praktikën e re që do të ndiqet në këto shërbime.

 “Nuk do të lejohen familjarët në urgjenca, përvec rasteve kur kërkohet nga mjeku. Gjej rastin të bëj një apel, një lutje për qytetarët, të mirëkuptojnë personelin mjekësor”.

Kjo masë e Ministrisë së Shëndetësisë vjen pak ditë pasi një mjek infeksionist u godit nga i afërmi i një pacienti, ndërsa po i shërbente një tjetër të sëmuri. Kolegët e tij kërkuan përmirësim të kushteve të punës dhe shtim të stafit për t’ju përgjigjur fluksit të shtuar të pacienteve. Sa i përket kësaj çështjeje ministrja Manastirliu deklaroi:

 “Mungesa për katër vite e specializimeve patjetër që ka sjellë probleme sa i takon mjekëve të specializuar, por pas më pak se 1 muaji, diplomohen 300 mjekët e parë specialistë, ku mes tyre ka edhe infeksionistë që kanë kontratë me Ministrinë dhe do të shërbejnë në disa spitale rajonale, si dhe janë 4 mjekë që mund të rekrutohen, sipas procedurave, menjëherë nga drejtoria e QSUT-së. Sa i takon personelit infermieror, fituesit e shpallur nga konkursi transparent, po ashtu mund të punësohen sipas pikëve, edhe në këtë shërbim”.

Ndërkohë urgjenca e re e shërbimit infektiv është planifikuar për t’i shërbyer 40 mijë pacientëve ne vit.

Numri i shtretërve nga 6 ka shkuar në 15, janë krijuar dy bokëse izolimi për sëmundjet ngjitëse ndërsa qendra e imazherisë për ekzaminimet e skanerit, grafisë  apo ekove është përfshirë brenda godinës. /abcnews.al

MJEKU-1280x725.jpg
ent ela10:54 | 11/02/2019

Mjeku infeksionist me inicialet G.S po i shërbente një të sëmuri në urgjencën e shërbimit infektiv në Qendrën Spitalore “Nënë Tereza” në Tiranë ndërkohë që i afërmi i një tjetër pacienti ka ushtruar dhunë ndaj tij. Detajet e ngjarjes së ndodhur mesditën e të dielës na  i tregon doktor Arjan Harxhi.

Kundër dhunës ndaj bluzave të bardha mjekët e shërbimit infektiv në QSUT dolën në protestë.

Ata kërkojnë prej institucioneve shtetërore vënien e agresorit para përgjegjësisë ligjore, kushte më të mira pune dhe garanci gjatë ushtrimit të detyrës.

Ndërkohë policia thotë se ka identifikuar autorin. Bëhet fjalë për një 45-vjeçar me inicalet A.M  banues në Tiranë, i cili pasi ka goditur mjekun është larguar me shpejtësi. Pas denoncimit policia ka nisur hetimet për ngjarjen dhe ka shpallur në kërkim agresorin.  Dhunën ndaj mjekut e ka dënuar dhe ministria e Shëndetësisë Ogerta Manastirliu e cila thotë se ka propozuar ndryshim të Kodit Penal.

Ndërkohë Drejtoria e Qendrës Spitalore Universitare “Nënë Tereza” në Tiranë thotë se ky nuk është një rast i izoluar dhe i bën thirrje opinionit publik të mirëkuptojnë bluzat e bardha gjatë punës së tyre./abcnews.al

PD-DHE-MINISTRIA-PER-URGJENCEN.mpg_snapshot_00.53-1-1280x690.jpg
ent ela17:43 | 28/01/2019

Partia Demokratike denoncoi përmes një videoje të shpërndarë për mediat, kushtet në të cilat punohet në Urgjencën e Tiranës. Ka reaguar drejtori i Urgjencës Kombëtare, i cili tha se godina do rikonstruktohet, kurse rastet urgjente trajtohen nëpër familje.

Deputeti i PD, Bardh Spahia me anë të filmimeve tregon gjendjen skandaloze sipas tij në Urgjencën e Tiranës ku mungojnë medikamentet dhe kushtet më

Në videon e shpërndarë nga PD, shihet edhe një infermier i cili pohon kushtet në të cilën ndodhet kjo urgjencë.

“Ky dysheku këtu ka pleshta dhe dalin pleshta natën. Në QSUT nuk ka ilaçe, mungojnë shumë prej tyre. Autoambulanca nuk funksionon. Mungon oksigjeni, ilaçet e ndihmës së parë“.

Pas këtyre pamjeve të shpërndara nga Partia Demokratike ka reaguar edhe drejtori i Urgjencës Kombëtare, Skënder Brataj i cili tha se urgjenca ndodhet në këto kushte pas riorganizimit nga Ministria e Shëndetësisë

Skënder Brataj, drejtori i Urgjencës Kombëtare: “Godina në të cilën jemi, Ish Urgjenca e Tiranës nuk është e përshtatshme dhe nuk specifikon atë shërbim që bëhej dikur këtu, nuk është shërbim ambulator, por është një shërbim i urgjencës që bëhet në banesë. Në këtë urgjencë DIKUR bëheshin 20-25 vizita në ditë, ndërsa sot bëhen 112 pranë qyetarëve. Nëse ishte një pikë sot është e shpërndarë në 9 pika të Tiranës, për të garantuar kohën e mbërritjes në banesë dhe shërbimin e qytetarit”. /abcnews.al

 

 

 

 

QSUT-Lentet-1280x853.jpg
G. P.16:29 | 20/01/2019

Qendra spitalore universitare “Nënë Tereza” do të ketë së shpejti një depo të re farmaceutike, investim i qeverisë shqiptare prej 18 milionë Euro. Në kantierin e punimeve ishte Kryeministri Edi Rama i shoqëruar nga ministrja e Shëndetësisë, Ogerta Manastirliu.

Çdo vit blihen 18 milionë Euro barna prandaj pasja e një depoje farmaceutike me standarde është domosdoshmëri.

“Do ketë 7 dhoma frigoriferike, me të gjitha kushtet optimale që duhan për barnat që vijnë. Ka një magazinë të madhe për të gjithë pjesën e serumeve dhe të gjithë elementëve të tjerë. Çdo bar që futet në QSUT është i skanuar me një barkod dhe gjithashtu kur del, deri sa shkon tek pacienti, gjithashtu me barkodin e vet. Është një investim, i cili siguron dhe garanton cilësi”, tha ministrja Manastirliu.  

Për kryemiistrin Rama investimi i qeverisë së tij prej 18 milionë Euro është siguri për standardet dhe cilësinë e barnave. Sipas njoftimit të zyrës të shtypit të kryeministrisë një tjetër shërbim falas i shtohet listës së shërbimeve falas që garanton qeveria shqiptare në Qendrën Spitalore Universitare “Nënë Tereza”, vendosja e lentes ose e kataraktit, e cila deri dje i kushtonte çdo qytetari që kishte nevojë për këtë shërbim, 700 dollarë.

“QSUT prej këtij viti fillon ofrimin e një shërbimi shumë të rëndësishëm, falas për çdo qytetar që ka nevojë për ndërhyrjen e kataraktit, ose vendosjen e lentes. Do të ofrohet për më shumë se 2000 pacientë në vit, gjithashtu dhe në spitalet rajonale. Spitali Rajonal i Vlorës e ka filluar, gjithashtu pritet të fillojë dhe spitali i Elbasanit”, tha Manastirliu.

Pavarësisht atyre që e turpërojnë vendin nuk duhet harruar se Shqipëria ka mjekë për t’u lavdëruar tha kryeministri Rama.

“Këtu dhe në spitalet në tërësi ka mjekë fantastikë dhe infermierë shumë të devotshëm, kuptohet, ka edhe nga ata që na turpërojnë, por e vërteta është që unë e kam parë me shumë njerëz që kalojnë nga spitali, që ndryshojnë mendim kur bëjnë shërbimin, se presin keq dhe ju del mirë”, u shpreh Rama./abcnews.al

RAMA-NE-SHERBIMIN-E-NEUROLOGJISE-1280x720.jpg
ent ela16:33 | 17/01/2019

Është instaluar rezonanca e re magnetike në shërbimin e neokirurgjisë. Sipas mjekëve me anë të kësaj pajisje, mund të diagnostikohen sëmundjet e rralla, të cilat kanë një shkallë më të vështirë ekzaminimi.

Nuk është e rastësishme kjo vizitë e kryeministrit Edi Rama në shërbimin e neurokirurgjisë në Qendrën Spitalore Universitare “Nënë Tereza”. Investimi më i ri është Rezonanca magnetike që sjell pranë qytetarëve teknologjinë më të fundit të ekzaminimit.

Mjeku neurokirurg Arben Seferi shpjegon se me anë të saj mund të disgnostifikohen sëmundjet e rralla, të cilat kanë një shkallë më të vështirë ekzaminimi.

“Është aparati i vetëm në territorin shqiptar me këtë fuqi, që do të thotë fuqia e aparatit përkthehet edhe në cilësinë e ekzaminimit. Në cilësinë e ekzaminimit janë aplikuar edhe softëare të reja, që bëjnë të mundur që të diagnostikojmë sëmundje, të cilat janë më të rralla, që nuk janë të rutinës. Kemi futur spektroskopinë, traktografinë, të cilat mund t’i realizojmë këtu”.

Për mjekët me përvojë në fushën e neurokirurgjisë, teknologjia e avancuar është një ndihmë e madhe për analizimin e nevojshëm të sëmundjeve neurologjike.

Ata janë optimistë se standardet e shërbimit në qendrën më të madhe spitalore në vend po përafrohen me ato të qendrave spitalore më të njohura europiane.

 “Ne jemi kapur nivelin në prag të researchit. Në spitalet universitare të Europës, kjo është e sotmja dhe e ardhmja. Kjo është realizuar me një kërkese që i kam bërë Kryeministrit para dy vitesh”.

Ministrja e Shëndetësisë dhe Mbrojtjes Sociale Ogerta Manastirliu tha se gama e përdorimit të pajisjes është më e gjerë sesa vetëm në shërbimin ku ajo është instaluar.

“Rezonanca u buxhetua me buxhetin e vitit 2018. U instalua, është kolauduar, tani është futur në funksion. Në Shqipëri kemi tashmë një normë që klasifikohen me vende si Rumania, Hungaria, 7 rezonanca, 24 skanera, 5 angiografe, 3 akseleratorë, që do të thotë se plotësojnë  në 80 % të nevojave për këto  diagnostika,  të cilat janë shumë të rëndësishme, qoftë për diagnostifikimin e patologjive të ndryshme, qoftë për ndjekjen e mëtejshme. E më e rëndësishme, kjo rezonancë nuk i shërben vetëm një shërbimi, pra, jo vetëm neurokirurgjisë. E ndërkohë jemi duke investuar jo vetëm për disgnostifikimin dhe trajtimin, por edhe për research-in, që është një ndër elementët kryesor në QSUT.”

Por ky investim nuk është i vetmi. Një rezonancë e re i është shtuar edhe Spitalit Rajonal të Elbasanit. Sa i përket listës së pritjes u nënvizua se për rezonancën është  deri në 5 javë, kurse për një skaner deri në tre javë. /abcnews.al

 

 

dervishaj.jpg
ent ela17:41 | 04/12/2018

Në Shqipëri është hapur qendra e parë shëndetësore kundër dhunës ndaj grave. Specialistja për barazinë gjinore Brunilda Dervishi ishte e ftuar në “Mbrëmje Ide” nga Mirela Milori ku tregoi dhe si mund të drejtohen viktimat e dhunës seksuale aty. Sipas saj ato mund t’i drejtohen vetë ambienteve të qendrës, ndërkohë mund të referojnë edhe institucione në nivel vendor.

“Sipas standardeve mund të them që jo vetëm policia. Në fakt ai është organi i parë ku drejtohen viktimat e dhunës, si institucion që siguron mbrojtje, por jo vetëm policia, por edhe viktima mund të drejtohet pranë këtyre ambienteve, por edhe mekanizmit të referimit në nivel vendor, si organet e shëndetësisë, të punës, bashkitë. Aty ku konstatohet dhunë”, u shpreh Dervishaj.

Qendra “Lilium” ndodhet pranë Qendrës Spitalore Universitare “Nënë Tereza” dhe parësor ka shërbimin shëndetësor ndaj dhunës seksuale.

“Kjo është qendra e parë që hapet dhe do shërbejë pastaj si një qendër për t’u përfshirë në të gjithë vendit. Ndodhet pranë QSUT dhe në radhë të parë ka shërbimin shëndetësor ndaj viktimave të dhunës seksuale”, u shpreh Dervishaj.

Më tej, Dervishaj tha se gratë nuk kanë më frikë të flasin për dhunën. Megjithatë në disa zona të thella mentaliteti i frikës për të denoncuar këto raste, sidomos të dhunë seksuale, është akoma i pranishëm./abcnews.al

BUXHETI-I-SHENDETESISE.mpg_snapshot_00.30-1280x720.jpg
G. P.14:44 | 07/11/2018

Spitali i ri i sëmundjeve të brendshme në Qendrën Spitalore “Nënë Tereza” në Tiranë do të përfundojë vitin që vjen. Ministrja e Shëndetësisë dhe Mbrojtjes Sociale Ogerta Manastirliu, e bëri të ditur ndërsa detajoi para deputeteve në komisionin parlamentar të shëndetësisë buxhetin për vitin që vjen. Një pjesë e fondeve deklaroi ministjra do të shkojnë për rritje pagash dhe çekun e bebeve.

30 mijë familje që do të bëhen me fëmijë vitin që vjen do të përfitojnë çekun e bebes, ndërsa 18 mijë e 416 mjekë dhe infermierë në shërbimin publik rritje pagash me 7%.
Për të parët Ministria e Shëndetësise dhe Mbrotjes Sociale ka planifikuar një buxhet prej 2 miliardë lekësh, ndërsa për të dytët do të shkojnë 1 miliard lekë.

Ogerta Manastirliu, ministre e Shëndetësisë dhe Mbrojtjes Sociale: “Duke filluar nga Janari 2019, garantojmë shpërblimin për çdo të porsalindur, 40 mijë lekë për fëmijën e parë, 80 mijë lekë për fëmijën e dytë dhe 120 mijë lekë për fëmijën e tretë. Kjo politikë e re sociale mbështet drejtpërdrejt fëmijët, familjen dhe zhvillimin e shoqërisë”, tha Manastirliu.

Për Shëndetësinë dhe Mbrojtjen Sociale vitin që vjen do të lëvrohen rreth 74 miliardë e 594 milionë lekë. Ministrja Manstriliu deklaroi se buxheti ka pësuar një rritje me 5% krahasuar me vitin 2018. 20% e fondeve do të mbështesin investimet.

“Përfundon spitali i ri i kirurgjisë në QSUT me vlerë investimi 8 milionë euro, ndërsa vijojnë investimet në spitalin e sëmundje të brendshme dhe pediatrine modern. Rehabilitojmë 100 qendra shëndetësore dhe ambulanca në vitin 2019 me vlerë investimi rreth 300 milionë lekë, në kuadër të programit tonë për rindërtimin e 300 qendrave shëndetësore brenda këtij mandati, 80 prej të cilave po përfundojnë këtë vit”.

Me buxhetin e këtij viti minstrja tha se do të sigurohet vijimi i investimeve në spitalet rajonale si reindërtimi i pediatrisë në spitalin e Durrësit, zgjerimi i spitalit të Kukësit apo ndërtimi i urgjencës në spitalin e Elbasanit./abcnews.al

MANASTIRLIU-TERHEQ-VEMENDJEN-E-MJEKVE-1280x720.jpg
ent ela14:44 | 26/10/2018

Ministrja e Shëndetësisë Ogerta Manastirliu  ka nxitur mjekët në Tiranë të përfitojnë nga bonusi dhe patronazhimi për të dhënë ndihmesën e tyre në spitalet rajonale. Ndërkohe mjekëve në spitalet e rretheve i ka tërhequr vëmendjen që i dërgojnë të sëmurët në QSUT edhe për problemin më të vogël.

Ministrja e Shëndetësisë dhe Mbrojtjes Sociale Ogerta Manastirliu i tërheq vëmendjen mjekëve të spitaleve rajonale, të cilët i dërgojnë pacientët në Tiranë edhe për ndërhyrjen kirurgjikale më të vogël. Rreth gjysma e operacioneve që kryhen në Qendren Spitalore “Nënë Tereza” janë të një kompleksiteti të ulët dhe të mesëm tha ministrja e Manastirliu përpara mjekëve kirurgë.

“Për çfarë arsye duhet të vijë një qytetar nga Elbasani apo nga Vlora për të kryer këto ndërhyrje të kompleksitetit në QSUT. Ne kemi mundësi dhe kemi investuar gjatë gjithë këtyre viteve në infrastrukturë, instrumenta, pajisje të teknologjisë së lartë e ekipe mjekësore”.

Ndërkohë ministrja e Shëndetësisë nxiti mjekët në Tiranë të përfitojnë nga praktikat e bonusit dhe të patronazhimit e të japin kontributin e tyre edhe në spitalet rajonalë.

“Për çfarë arsye mund të mos i përdorin programet e patronazhit dhe bonusit për të vajtur mjekë edhe kur ka mungesë që do ketë përmirësim. Pse në QSUT duhet të ketë kirurgë që nuk plotësojnë as normën 100 ndërhyrje në vit që të mos dekualifikohet”.

Me zhvillimin e spitaleve rajonalë ministrja e Shëndetësisë deklaroi se Qendra Spitalore “Nënë Tereza” do të marrë statusin që i takon duke u përsosur drejt realizmit të ndërhyrjeve më të vështira. /abcnews.al

RAMA_ABC-1280x720.jpg
ent ela13:09 | 23/10/2018

Hapja e kantierit për nisjen e punimeve për spitalin e ri pranë QSUT, sipas kryeministrit Rama dhe ministres Manastirliu do të ofrojë shërbime më cilësore dhe më moderne për qytetarët. Kryeministri gjithashtu theksoi se qeveria ka në synim që brenda këtij mandati të hape 300 qendra të reja shëndetësore në të gjithë vendin.

Hapet kantieri për ndërtimin e spitalit të ri të sëmundjeve të brendshme dhe spitalit të kirurgjisë pranë QSUT. Të pranishëm për hapjen e kantierit të ri ishin kryeministri Rama dhe ministrja Manastirliu. Kryeministri Rama deklaroi se nisja e punimeve do të ofrojë dhe garantojë shërbime më cilësore për të gjithë qytetarët.

Edi Rama: “U jam shumë i vetëdijshëm sesa shumë akoma duhet bërë, në mënyrë që të kemi një spital qendror të standardeve të mira europiane në të gjithë metrat katrorë të territorit. Së shpejti, pasi të kemi ecur me këtë kantier të ri, do të mund të nisim edhe ndërtimin e një parkimi modern.  Me këtë investim të ri dhe me çka ky investim i konsiderueshëm do të sjellë për Qendrën garantojmë një hop të madh cilësor dhe një shërbim shumë më efikas e shumë më të integruar”.

Rama theksoi se qeveria ka në synimin e saj që deri në fund të këtij mandati të hape edhe 300 qëndra të reja shëndetësore.

Edi Rama: Po ecim me rindërtimin e qendrave shëndetësore. Ambicia është për të pasur 300 qendra të reja shëndetësore, të pajisura të gjitha sipas një standardi të paracaktuar me vëmendje nga Ministria e Shëndetësisë dhe me staf të kualifikuar. Në fund të këtij viti mbarojnë 80 qendrat e para, vitin e ardhshëm janë financuar në buxhetin e ri 100 të tjera dhe besoj që do t’ia dalim që deri në fund të këtij mandati të kemi 300 qendra të reja shëndetësore, që do të lehtësojnë ende më shumë flukset e mëdha që përballon padrejtësisht dhe rëndon me mbingarkesë QSUT, paralelisht me shërbimet e reja që po krijohen në spitale të tjera rajonalë dhe falë edhe një kontributi shumë të rëndësishëm dhe dua t’i falenderoj sinqerisht të gjithë ata që janë përfshirë në programin e patronazhit të spitaleve të tjera nga ekipi i Qendrës Spitalore Universitare”.

Nga ana tjetër edhe minsitrja Ogerta Manastirliu theksoi se ky investim pranë QSUT do të çojë përpara modernizimin e shërbimeve për qytetarët. Sipas kryeministrit Rama dhe ministres Manastirliu reforma në shëndetësi dhe investimet në infrastrukture do të ofrojnë rritje të cilësisë së shërbimeve si dhe do të rikthejnë besimin e qytetarëve tek bluzat e bardha./abcnews.al

KRONIKE-PAMPURI-PER-HOMOFILINE-ABCM5T1.mpg_snapshot_00.28-1280x720.jpg
G. P.13:04 | 09/09/2018

Jeta e të sëmurëve me hemofili varet nga faktorët e mpiksjes së gjakut. Por 300 pacientët në Shqipëri nuk mund ta marrin dot sipas deputetes të Partisë Demokratike Oriola Pampuri.

Oriola Pampuri, deputete: “Faktorët për pacientët me hemofili mungon në Qendrën Spitalore Universitare Nënë Tereza, ose vjen në sasi fare të vogël, të cilat nuk arrijnë të përmbushin nevojat e pacientëve, ashtu siç ndodh me herceptinën për pacientët me kancer, e me shumë medikamente të tjera. Në këtë situatë ku luhet me jetën e të paktën 300 të sëmurëve me hemofili, Ministria e Shëndetësisë hesht dhe nuk shpjegon pse QSUT nuk blen faktorë të mjaftueshëm për trajtimin normal të të sëmurëve”.

Sipas deputetes Pampuri pacientët me hemofili nuk mund ta blejnë dot vetë gjithmonë faktorin për jetën e tyre, sepse një i tillë kushton nga 1 milion e 200 mijë lekë në 2 milion lekë të vjetra. Përgjegjës bën edhe qeverinë.

“Vetëm në 8 muaj qeveria e Edi Ramës ka harxhuar mbi 6 milionë euro për të bërë zyrat veta të rehatshme dhe luksoze, ndërsa qindra të sëmurë me hemofili rrezikojnë të invalidizohen nga mungesa e Faktorit. Keto para dhe ato që abuzohen me tendera të tjerë korruptivë nga Ministria e Shëndetësisë, mjaftojnë për të blerë faktorët për pacientët hemofilikë dhe për t’u krijuar atyre kushtet të kurohen në qytetet ku banojnë, pa qenë nevoja të torturohen disa herë në muaj nga ardhja në Tiranë”.

Për Partinë Demokratike është prioritet kryesor anullimi i koncesioneve që paguhen 75 milionë euro çdo vit nga taksat e shqiptarëve dhe përdorimi tyre për shëndetin e qytetarëve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono