qeveria
Lojtarët e River Plate festojnë kualifikimin në finale | Foto: AP / NATACHA PISARENKO

stadiumi-i-librazhdit.jpg
Vladimir Prenga08:11 | 22/10/2019

Federata Shqiptare e Futbollit i ka bërë kërkesë zyrtare qeverisë për të bashkëpunuar në ndërtimin e 100 fushave të përmasave të plota. Shqetësimi është I madh sidomos për gjendjen e infrastrukturës në kryeqytet.

Vëmendja ka qenë te kombëtarja apo tek Superiorja, por është edhe diçka tjetër e rëndësishme, madje më shumë. Flitet për infrastrukturën, diçka për të cilën futbolli ynë është në krizë, ndërsa Federata Shqiptare e Futbollit po përpiqet të zyrtarizojë një projekt të madh.

Bëhet fjalë për 100 fusha me përmasa të rregullta e të plota, që janë në plan për t’u ndërtuar në të gjithë vendin, projekt që i është dërguar zyrtarisht qeverisë shqiptare. Burime në Federatë bëjnë me dijë se në kryeministri është përcjellë projekti dhe kërkesa për bashkëpunim.

Propozimi është për të ndarë kostot financiare në mënyrë të barabartë, ndërsa fatura në total mund të shkojë në 30 milionë euro. Natyrisht, do të duhet bashkëpunimi edhe me pushtetin vendor, konkretisht me bashkitë, për të ndërtuar infrastrukturë në Tiranë dhe në rrethe.

Shqetësimi është i madh sidomos në kryeqytet, ku hapësirat e lira janë pakësuar ndjeshëm. Burimet në Federatë tregojnë se synohet të bëhen funksionale fushat tek Aneksi i stadiumit “Selman Stërmasi”, si dhe ato tek Qyteti Studenti, por deri tani nuk ka përgjigje pozitive nga autoritetet vendore.

Ekziston rreziku që të ketë projekte për ndërtime edhe në fushat e mbetura brenda kryeqytetit. Tendenca e këtyre viteve është që të ndërtohen komplekse jashtë Tiranës, por ato mbërrihen me vështirësi nga fëmijët për shkak të trafikut të rënduar. /ABC NEWS 24/7

kyriakos.jpg
G. P.18:35 | 20/10/2019

Greqia do të vazhdojë të mbështesë Shqipërinë dhe Maqedoninë për anëtarësim në familjen europiane dhe në të njëjtën kohë fton vendet anëtare të bashkëpunojnë për të konkretizuar këtë perspektivë. Ministri i jashtëm grek Mitsotakis tha se mos-hapja e negociatave nuk është mirë as për stabilitetin e Ballkanit, por as për vetë Greqinë.

Ministria e Jashtme greke, thekson në një deklaratë për shtyp se mbështetja e vendeve të Ballkanit perëndimor është një nga akset e patjetërsueshme të politikës së jashtme të Athinës.

“Greqia do të vazhdojë të mbështesë përpjekjet e vendeve të rajonit për të realizuar reformat e kërkuara… Në të njëjtën kohë i fton vendet anëtare të Bashkimit Europian të bashkëpunojnë për konkretizimin e perspektivës europiane të Ballkanit Perëndimor në dobi të rajonit, por edhe të vetë Europës”, thuhet në deklaratën e Ministrisë së Jashtme greke.

Deklarata e Ministrisë së Jashtme greke vjen si një reagim ndaj mungesës së vendimit për Shqipërinë dhe Maqedoninë e Veriut, në samitin europian të së premtes. Vetë kryeministri grek, Kyriakos Mitsotakis, ka komentuar se ky nuk është një zhvillim i mirë për rajonin, por edhe për vetë Greqinë. Sipas zotit Mitsotakis, arma kryesore që ka Greqia për trajtimin e problemeve me të dy vendet, është perspektiva europiane e tyre.

“Konsideroj se nuk është një zhvillim i mirë, as në përgjithësi për stabilitetin e Ballkanit, por as për vetë Greqinë. Sepse arma kryesore që ka Greqia me qëllim që të trajtojë probleme që ka me këto dy vende, ka të bëjë me perspektivën europiane të tyre. Sa më afër një kursi europian të ndodhen këto dy vende, aq më shumë na jepet mundësia në kuadër të ndryshimeve që po bëjnë këto vende për të ardhur më pranë familjes europiane, të trajtojmë edhe probleme që ne kemi në planin dypalësh”, tha Mitsotakis./ABC News Albania

taksa.jpg
G. P.11:55 | 19/10/2019

Libani është përfshirë nga protestat pas lajmit për vendosjen e një takse për përdorimin e WhatsAap. Me mijëra protestues qëndrojnë 24 orë në shesh duke bllokuar rrugët kryesore dhe duke i vënë flakën automjeteve.

Ishte pika që derdhi gotën, ideja për vendosjen e një takse për WhatsAap. Mijëra persona u mblodhën në rrugët e Libanit për të kërkuar rrëzimin e regjimit. Në shumë qytete të vendit manifestuesit kanë shkaktuar dhe dëme materiale, përfshirë kryeqytetin Bejrut.

Kryeministri Sad Hariri gjatë një deklarate drejtuar popullit nëpërmjet televizionit kërkoi tri ditë kohë për të kuptuar se çfarë duhej të bënte me kolegët e tij, ministrat e një qeverie të unitetit kombëtar.

Protestat në qytetet e ndryshme të vendit u zhvilluan njëkohësisht për të kërkuar fundin e sistemit aktual politik. Shkaku i parë ishte publikimi i lajmit për një taksë së re, këtë herë për përdorimin e WhatsAap. Me mijëra persona kryesisht nga zonat e varfra të Bejrutit u mblodhën në qendër të kryeqytetit me parullën: Populli kërkon rrëzimin e regjimit.

Qeveria aktuale përfshin pothuajse të gjitha partitë në vend, por manifestuesit janë treguar të prerë duke kërkuar dorëheqjen e të gjithëve në mënyrë absolute. Ata premtojnë se do të ketë protesta deri sa një gjë e tillë të ndodhë.

Në Bejrut protestuesit qëndrojnë 24 orë në rrugë duke bllokuar një pjesë të madhe të hyrje daljeve të qytetit, si dhe duke i vënë flakën automjeteve dhe kazanëve të mbeturinave./ABC News Albania

mbreteresha-elisabet-1280x826.jpg
nev ila15:51 | 14/10/2019

Britania e Madhe do të dalë nga Bashkimi Europian në 31 tetorin e ardhshëm. Vendimi i qeverisë Johnson është ritheksuar dhe njëherë nga Mbretëresha Elizabet gjatë fjalës së saj në parlamentin britanik.

Brexit, është mbretëresha Elizabetë ajo që ka lexuar programin e qeverisë, në parlamentin britanik, për kohën e daljes së Britanisë së madhe nga Bashkimi eruropian. Ndër të tjera ajo u shpreh se qeveria dëshiron daljen nga BE në 31 tetor të këtij viti. Qeveria britanike e Boris Johnson, në këtë mënyrë rithekson fort vendimin që Brexit të hyjë në fuqi në 31 tetor.

Ndërkohë një pikë tjetër e rëndësishme e programit të qeverisë britanike është ajo e një marrëveshjeje të re bashkëpunimi me Brukselin, por dhe për ndalimin e lëvizjes së lirë.

Mes ligjeve të programit të muajve të ardhshëm, konfirmohet gjithashtu dhe objektivi për hyrjen në fuqi që nga 2021, të lejimit të hyrjes së emigrantëve në Mbretërinë e Bashkuar, duke u bazuar tek aftësitë e tyre./abcnews.al

9c1b36d0be1d068388aa577a3910434e.jpg
G. P.21:06 | 13/10/2019

Qytetarët në Hong Kong kanë protestuar sërish të dielën duke u përleshur si zakonisht me policinë. Gjatë demonstratës janë dëmtuar dyqane dhe qendra tregtare, si dhe është bllokuar stacioni i metrosë.

Aktivistët pro-demokracisë dhe policia u përleshën sërish të dielën në Hong Kong, me forcat e rendit që u janë vënë pas manifestuesve. Tubimet pranë qendrave tregtare të rajonit autonom të Kinës dhe në afërsi të portit në zonën Koulun nisën në mënyrë paqësore, me disa qindra qytetarë që bërtisnin “çlironi Hong Kongun” dhe ngrinin parulla të tjera.

Por pak më vonë aktivistët e veshur me kapuçët e zinj mbushën rrugët dhe filluan të bllokonin hyrjet në dyqane dhe stacione metrosh, si dhe duke ngritur barrikada. Policia nga ana e saj deklaroi se manifestuesit gjuajtën tulla dhe bomba me benzinë ndaj forcave të rendit dhe madje njëri prej tyre i vuri flakën një furgoni të policisë.

Kjo e fundit kreu arrestime të shumta dhe përdori gaz lotsjellës për të shpërndarë protestuesit. Krerët e policisë deklaruan se forca e përdorur ishte minimale. Gjatë përleshjeve mes protestuesve dhe policisë, dyqane të shumta u dëmtuan, por në disa raste protestuesit e maskuar u mbështetën nga tregtarët.

Në një qendër tregtare, një grup agjentësh që kishin nxjerrë para mburojat dhe mbanin në dorë spraj djegës u detyruan të tërhiqeshin nga rezistenca e pronarëve të dyqaneve dhe shitësve, derisa dolën jashtë qendrës./ABC News Albania

vjosa-osmani-1.jpg
G. P.23:02 | 11/10/2019

Partia Lidhja Demokratike e Kosovës ka mohuar zërat se ka ngrirë marrëdhëniet me lëvizjen Vetëvendosje, por ka deklaruar se marrëveshja me të për krijimin e qeverisë do të bëhet vetëm pas certifikimit të rezultatit të zgjedhjeve të së dielës.

Vetëm pak kohë pasi zëdhënësi i LDK-së, Besian Mustafa, tha se kjo parti i prolongon bisedat me VV-në për arritjen e marrëveshjes për formimin e Qeverisë, kreu i po të njëjtës parti ka deklaruar ndryshe. Kryetari i Lidhjes Demokratike të Kosovës, Isa Mustafa, ka thënë se partia e tij do të vazhdojë kontaktet me Vetëvendosjen për të harmonizuar qëndrimet për koalicion për të cilin, siç ka thënë ai, “mendojmë se është i mundur”.

Isa Mustafa, kryetar i LDK-së: Ulja në tavolinë për marrëveshjen përfundimtare do të bëhet vetëm kur të certifikohen rezultatet përfundimtare. Deri atëherë ne do të flasim, do të komunikojmë dhe do të kontaktojmë për të parë se sa prej çështjeve qeveritare janë të hapura, në mënyrë që të mos i bëjmë këto pas marrëveshjes.

Edhe kandidatja e LDK për kryeministre Vjosa Osmani, ka thënë se nuk është ndalur procesi i negociatave me Lëvizjen Vetëvendosje, për afrimin e programit të përbashkët qeverisës. Osmani ka thënë se grupet punuese do të krijohen varësisht prej temave.

Vjosa Osmani, kandidate e LDK për kryeministre: Disponimi në kryesi ka qenë shumë i mirë dhe nuk ka patur asnjë vendim për t’i ngrirë bisedimet me VV. Përkundrazi ka patur një vendim për të vijuar bisedimet mes ekspertëve tanë, që të diskutohen çështjet programore në mënyrë që të mos lihen pas negociatave.

Gjatë ditës pas mbledhjes së kryesisë  zëdhënësi i LDK-së, Besian Mustafa tha se nuk do të ketë negociata me Vetëvendosjen deri në shpalljen e rezultateve përfundimtare nga KQZ-ja.

“Diskutuam faktin se kemi një rezultat të ngushtë me VV, 50 me 50 dhe do presim rezultatin final, duke pasur parasysh se disa qendra votimi do të rinumërohen dhe do të numërohen votat e mërgatës”./ABC News Albania

blendi-klosi.jpg
G. P.16:51 | 11/10/2019

Për rastin e Bunës do të nisë një hetim dhe ministria do të mbajë një qëndrim për ndotjen në lumë tha Klosi nga Shkodra.

Ministri Klosi shprehu shqetësimin që disa bashki ende vazhdojnë t’i trajtojnë lumenjtë si venddepozitime legale për mbetjet urbane. Për këto raste parashikohet edhe dënim me burg.

Në territorin shqiptar ku janë hedhur shpendë të ngordhur po vijon aksioni për groposjen dhe dezinfektimin e tyre.

Puna është përqendruar përgjatë bregut të Bunës nga Darragjati i Dajçit deri në Pulaj të Velipojës.

Deri tani janë groposur rreth 100 shpendë./ABC News Albania 24/7

proteste-1280x606.jpg
Autor E11:39 | 09/10/2019

Ndërkohë që Gjykata Administrative shqyrton padinë e Fakultetit të Shkencave të Natyrës ndaj Bashkisë së Tiranës për vendimin e marrë në korrik, përmes të cilit i kalon në pronësi asaj Kopshtin Botanik, një numër i madh pedagogësh dhe studentësh kanë dalë në protestë në ambientet para godinës.

“Jemi të shqetësuar sepse është një aset i krijuar në 50 vjet dhe ka vlera të jashtëzakonshme. Kalimi në pronësi të pushtetit lokal krijon një rrezik për menaxhimin e kësaj prone”, shprehet njëri prej pedagogëve.

“Studentët kryejnë praktika dy javore aty dhe Kopshti Botanik dhe është nga të paktat laboratore që kemi”, u shpreh një prej studentëve protestues.

Bëhet fjalë për 13 hektarë tokë të Kopshtit Botanik që ka kaluar nga pronësia e Fakultetit të Shkencave të Natyrës tek Bashkia e Tiranës.

 

Ndërkohë, në një reagim kryebashkiaku i Tiranës, Erion Veliaj tha se projekti i Bashkisë është në mbrojtje të këtij kopështi, ashtu si shumë projekte të tjera, duke shtuar se është PD ajo që ka kryer vjedhje.

“Vetë PD ka vjedhur një pjesë të kopshtit dhe ka hedhur beton. Në fakt ne e garantojmë këtë ruajtje. Bashkia po e transformon kopshtin në fuqi të madhe mbjellëse.

Punët e bashkisë janë nga më të mirat. Ne sjellim sensibilizim. Dhe shumë mirë që këto projekte i kanë kaluar bashkisë. Ata që duan të bëjnë shkencë dhe nuk janë matrapazët e Mynyrit janë të mirëpritur. Mynyri me shokë kërkon të marrë pesë mijëlekshin e nuseve. Unë di të ndaj ata që marrin pesëmijë lekshet e nuseve për kopshtion botanik, nga shkencëtarët”-u shpreh ai. /abcnews.al/

OK-HOLANDA-MBYLL-DEREN-M1T1.mpg_snapshot_00.03-1280x720.jpg
G. P.22:21 | 08/10/2019

10 ditë para vendimit të Këshillit Europian për negociatat e Shqipërisë me BE-në,  Holanda duket se nuk e mbështet nisjen e bisedimeve mes Tiranës dhe Brukselit. Por gjatë një seance pyetjesh ne komisionin e jashtëm të parlamentit holandez, ministri i Jashtëm Stef Blok shmangu një përgjigje të drejtpërdrejtë për veton ndaj Shqipërisë.

Qeveria holandeze konsideron se Shqipëria nuk është gati për hapjen e negociatave të anëtarësimit në Bashkimin Europian.  Ministri i Punëve të Jashtme të Holandës, Stef Blok e bëri këtë deklaratë në komisionin parlamentar për çështjet europiane të Parlamentit holandez, i pyetur nga deputetë holandezë, nëse duhen hapur negociatat e anëtarësimit me Shqipërinë ose jo.

Por ende nuk ka një “jo” të prerë nga ky vend. Blok nuk e ka shtjelluar përgjigjen e tij, duke lenë tê paqartë nëse Holanda do të vendosë veton për Shqipërinë në takimin e Ministrave të Punëve të Jashtme në 15 Tetor apo samitin e liderëve europianë në 18 Tetor.

Ministri shmangu një përgjigje të drejtpërdrejtë për veton ndaj Shqipërisë, por ndryshe nga përgjigjja për Maqedoninë, la të kuptohet se Shqipëria nuk është në nivelin e duhur për hapjen e negociatave. Pas pyetjes të tre partive të koalicionit qeveritar nëse mbetet në fuqi mocioni i aprovuar nga 2/3 e deputetëve holandezë për Shqipërinë, ai është shprehur se ky mocion mbetet në fuqi.

Kjo nënkupton, se qeveria holandeze mbështet Parlamentin holandez kundër hapjes së negociatave të anëtarësimit me Shqipërinë, të aprovuar në Qershor të këtij viti. Menjëherë pas përfundimit të seancës në komisionin e Jashtëm të Parlamentit në Holandë, Ambasada holandeze në Tiranë, përcolli përmes një deklarate për mediat qëndrimin zyrtar të Ministrisë së Jashtme në Holandë.

Në të theksohet se vendet kandidate duhet të përmbushin kushtet strikte përpara se të bëjnë një hap tjetër në procesin e integrimit. Në datën 15 Tetor, Këshilli i Ministrave do të diskutojë në Luksemburg në lidhje me zgjerimin dhe do të vendosë në mënyrë unanime.

“Holanda, – theksohet në deklaratën e ambasadës së këtij vendi në Tiranë, – po ndjek në mënyrë kritike progresin në Shqipëri dhe Maqedoninë e Veriut dhe është e mendimit se Këshilli duhet të vleresojë secilin vend sipas meritave të veta.

Këshilli ka parashtruar një sërë kriteresh për t’u përmbushur nga Shqipëria përpara hapjes së negociatave.

“Holanda e mirëpret punën e madhe dhe hapat e ndërmarra në vitin e fundit. Holanda mendon se duhet bërë më shumë punë në luftën kundër korrupsionit dhe krimit të organizuar”, përfundon qëndrimi i ambasadës së Holandës në Tiranë./ABC NEws Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono