qeveri

silvio-berlusconi-berlusconi.jpg
gra moz13:46 | 18/05/2018

Lideri i Forza Italia, Silvio Berluskoni i kërkon presidentit Matarella që t’i japë mandatin e kryeministrit. Kavalieri është i bindur se një qeveri e qendrës së djathtë do të arrinte të merrte dhe mazhorancën në parlamentin italian.

Për momentin nuk ekziston asnjeri me eksperiencën e duhur për të bërë kryeministrin. Unë jam i gatshëm nëse Presidenti Matarella më beson detyrën. Është ky apeli që lideri i Forza Italia, Silvio Berlusconi, i ka drejtuar apelit të shtetit me idenë e krijimit të një qeverie të qendrës së djathtë. Kërkesa e tij ndaj presidencës bëhet në rast se Lëvizja 5 Yjet dhe Lega nuk do arrijnë dot t’i japin një qeveri Italisë. Berlusconi shprehet i bindur se qendra e djathë do të gjente mbështetjen e duhur për të nisur punën në drejtimin e vendit.

Lideri i Forza Italia i bëri këto deklarata në prag të vizitës së tij në Vale d’Aosta ku të dielën votohet në zgjedhjet rajonale. Sipas tij, kontrata e qeverisë mes Lëvizjes 5 Yjet dhe Legës nuk ka të bëjë fare me qendrën e djathtë, madje janë dy qëndrime krejt të ndryshme. Berlusconi theksoi se mes tij dhe Salvinit aktualisht ka shumë largësi.

Duke folur për veten e tij ai tha se nuk ka asnjë kandidat tjetër të krahasueshëm me emrin e Silvio Berluskonit. Ai shtoi se presidenti Matarella duhet t’i dorëzojë detyrën sa më shpejt pasi qendra e djathtë do ia dilte të merrte mazhorancën në parlament, dhe qeveria e krijuar prej tij do të funksiononte deri në fund të mandatit.

Pyetjes së gazetarëve se pse Di Maio dhe Salvini e kanë kaq të vështirë të gjejnë një emër për kryeministrinë, Berlusconi i përgjigjet se ka mungesë personazhesh. Personazhe që do të duhej të garantonin besueshmëri dhe ekuilibër. Dhe në fund të deklaratës, Berluskoni rithekson se ka një eksperiencë nëntë-vjeçare në drejtim të vendit dhe se ka drejtuar tre herë samite ndërkombëtare si G7 e G8. Por mbi të gjitha është shumë i disponueshëm./abcnews.al

gjuric.jpg
gra moz15:27 | 20/04/2018

Shefi i Zyrës për Kosovën në qeverinë e Serbisë, Marko Gjuriç, viziton sot Kosovën. Ministria e Punëve të Jashtme e Kosovës ka dhënë pëlqimin për vizitën e njeriut kryesor të Beogradit për Prishtinën.

Sëbashku me të udhëtoi dhe Nikola Selakoviç, sekretari i përgjithshëm i Presidencës së Serbisë, të cilët do të marrin pjesë në një aktivitet politik në veri të Mitrovicës. Kalimi i dy politikanëve serbë në pikën kufitare në Jarinjë u bë pa problem.

Sipas asaj që raportohet Gjuriç dhe Selakoviç do marrin pjesë pasditen e sotme në një event në qendrën studentore të Universitetit të Mitrovicës së Veriut. Gjithashtu do të inspektojnë disa zona ku po investon qeveria serbe./abcnews.al

maqedoni-kuvendi.jpg
gra moz18:30 | 10/04/2018

Të mërkurën në Parlamentin e Maqedonisë do të diskutohet rreth mocionit të mosbesimit ndaj qeverisë së kryeministrit Zaev të propozuar nga opozita. Seanca për mocionin e besimit duhet të mbarojë në mesnatë, ndërsa votimi pritet të bëhet të enjten.

Parlamenti Maqedonisë të mërkurën do të ketë në diskutim mocionin e mosbesimit ndaj qeverisë së kryeministrit Zoran Zaev. VMRO-DPMNE-ja pret që mosbesimi të votohet nga shumica e deputetëve. Me këtë iniciativë, partia e Mickoskit zyrtarisht kthehet në Kuvend.

Nga ana e saj, LSDM, iniciativën për mocion mosbesimi e sheh si mundësi për të treguar arritjet e deritanishme të qeverisë. Nga grupi parlamentar i Lëvizjes Besa është paralajmëruar se nuk do ta votojnë mocionin.

Kryetari i Parlamentit, Talat Xhaferi, nuk pranoi të komentojnë iniciativën e opozitës, të njëjtin qëndrim mbajti dhe Aleanca për Shqiptarët dhe BDI duke mos pranuar të prononcohen. Në përmbajtjen e iniciativës së opozitës, e firmosur nga 41 deputetë përmendet ndër të tjera rënia ekonomike, ngecja e reformave në gjyqësor si dhe qasja, sipas tyre, jo transparente e qeverisë në negociatat me Greqinë për çështjen e emrit.

Në iniciativë është kritikuar edhe puna e të gjithë ministrave aktualë. Deputetët që kanë propozuar mocionin, kanë të drejtë fjale më shumë se një here. Seanca e parlamentit për mocionin e besimit pritet të mbarojë në mesnatë, ndërsa votimi i saj të enjten. Mosbesimi votohet me shumicë të thjeshtë./abcnews.al

berlusconi.jpg
gra moz15:17 | 05/04/2018

Në Itali vazhdojnë ende bisedimet mes liderëve të partive për krijimin e qeverisë së re. Ish-kryeministri italian Belusconi këmbëngul për një ekzekutiv të qendrës së djathtë dhe me Salvinin kryeministër.

Lideri i Legës, Matteo Salvini, kërkon një qeveri të qendrës së djathtë që përfshin dhe lëvizjen Pesë Yjet. Por ai këmbëngul se kërkon një qeveri që të kryejë mandatin e saj pesë vjeçar dhe se do i drejtohet Parlamentit vetëm kur të ketë votat e duhura. Deklarata e Salvinit vjen pas takimit me presidentin Italian Matarela në ditën e dytë të bisedimeve për krijimin e qeverisë së re në vend.

Pak para tij dhe partneri në koalicionin e qendrës së djathtë, lideri i Forza Italia, Silvio Berluskoni, u takua me kreun e shtetit duke kërkuar një qeveri pa populizma dhe me kryeministër Salvinin. Nga ana e saj Partia Demokratike këmbëngul se do të qëndrojë në opozitë.

Lideri i Legës dhe kandidati për kryeministër nga qendra e djathtë i ka kërkuar dhe një herë lëvizjes me pesë yje që të ndryshojë linjën e saj dhe të pranojë të jetë pjesë e një ekzekutivi të qëndrueshëm.

Nga ana e tij ish-kryeministri Berlusconi bëri të qartë se qeveria duhet të nisë nga ata që kanë fituar zgjedhjet pra qendra e djathtë. Para gazetarëve, ai u shpreh për bisedën me kreun e shtetit, të cilit i kishte shprehur urgjencën për tu përballur sa më parë me problemet e italianëve.

Ndërkohë gjatë pasidtes pritet që të jetë Lëvizja Pesë Yjet që do të bisedojë me presidentin Matarela, duke pasur parasysh që sot skadon dhe afati për raundin e parë të negociatave./abcnews.al

pacolli.jpg
gra moz15:19 | 02/04/2018

Qeveria e Kosovës mund të ketë probleme pas shkarkimit të ministrit të Brendshëm nga kryeministri Haradinaj. Lideri i AKR-s, Behgjet Pacolli ka paralajmëruar daljen nga koalicioni qeveritar nëse shkarkohet ministri Flamur Sefaj, i cili ishte përfaqësues i saj.

Partia e Behgjet Pacollit, Aleanca për Kosovën e Re, nuk e ka pranuar ende zyrtarisht largimin nga detyra të ministrit të Brendshëm, Flamur Sefaj. Ndonëse kryeministri Ramush Haradinaj ka kërkuar lirimin e menjëhershëm nga detyra të ministrit të AKR-s, për shkak të aksionit policor, ku u arrestuan dhe deportuan gjashtë shtetas turq, AKR-ja ende nuk ka dhënë vendimin përfundmitar për këtë kërkesë të kryeministrit.

Haradinaj në arsyetimin e tij ka thënë se Sefaj ishte në dijeni për zhvillimin e këtij aksioni disa ditë më parë se sa ai të ndodhte dhe pavarësisht kësaj nuk e kishte informuar.

Në bazë të marrëveshjes së koalicionit PAN, ministrat e AKR-s nuk ka të drejtë t’i shkarkojë askush tjetër përveç liderit të partisë, Behgjet Pacolli.

Kryetari i të rinjve në AKR, Zijadin Geci, u shpreh se Flamur Sefaj do jetë ministër, në të kundërt askush tjetër nga AKR nuk do ta zëvendësojë atë.

MBLEDHJA-E-QEVERISE-KOSOVE-1280x720.jpg
ent ela14:18 | 29/03/2018

Lista Serbe, me anë të një deputeti të saj që mori pjesë në mbledhjen e qeverisë së Kosovës, shpalosi kushtet për qëndrimin në koalicion. Kryeministri Haradinaj nënvizoi se ekzekutivi aktualisht nuk mund të diskutohet për formimin e Asociacionit të komunave me shumicë serbe.

Qeveria e Kosovës zhvilloi një mbledhje, në të cilën ishte i pranishëm edhe Dalibor Jevtiç, zëvendëskryeministër nga radhët e Listës Serbe. Gjatë fjalës së tij, duke parashtruar kushtet e qëndrimin në koalicion, theksoi se arrestimi i Marko Gjuriç të hënën në Mitrovicë nuk ishte vendim i ekzekutivit. Jevtiç kërkoi sqarime rreth dhunës së përdorur gjatë operacionit dhe i rikujtoi ministrave se deputetët e Listës Serbe i mbështetën gjatë gazit lotësjellës të lëshuar në kuvend nga Vetëvendosje.

Dalibor Jevtic, Zv/Kryeministër i Kosovës: “Do të më vinte turp nëse ndonjë ministër shqiptar do të trajtohej në Beograd sikurse Gjuriç në Prishtinë. Atë nuk do t’ia dëshiroja askujt sepse nuk bëhet fjalë për nacionalitet por për njerëz. Njerëzit nuk trajtohen ashtu. Nëse jeni të hapur dhe dëshironi që në të ardhmen të punojmë në paqe e qetësi e pakta që duhet të bëni është që të hapni hetime për të gjetur përgjegjësit për atë çfarë ndodhi”.

Atij iu përgjigj drejtëpërdrejtë kryeministri Haradinaj duke thënë se operacioni nuk ishte kundër qytetarëve dhe deputetëve të Listës Serbe, por ndaj një zyrtari të Beogradit që kishte hyrë ilegalisht. Pas mbledhjes shefi I qeverisë mbajti një konferencë për shtyp ku njoftoi se ende nuk është arritur në diskutimin për formimin e Asociacionit të Komunave Serbe në Kosovë, që është një ndër kushtet e deputetëve serbë.

Ramush Haradinaj, Kryeministër i Kosovës: “Ajo që është me rëndësi është qe si Kosovë, shqiptaret e kanë traditë që dinë t’i ruajnë të gjithë. E hëna ka pasur ato zhvillimet që dimë. Por është për t’u përshëndetur guximi i Jevtiç për te lënë mundësinë e hapur për diskutim. S’kemi zgjidhje tjetër pos të ulemi, pos tavolinës”.

Gjithashtu sqaroi se ministri i bujqësisë, Nenad Rikalo është dhunuar nga agjentët e “ROSU”, pasi nuk është njohur dhe është menduar se ai ishte pjesë e sigurimit të Gjuriç për shkak të gjatësisë. /abcnews.al

 

 

shoqata-e-biznesit-1280x654.jpg
gra moz15:30 | 24/03/2018

Shoqata e Biznesit të Vogel i ka lënë 15 ditë afat qeverisë për të anuluar vendimin që fut në skemën e TVSH-s, bizneset me xhiro vjetore 2 milionë lekë. Në të kundërt sipërmarresit paralajmerojne fillimin e protesave ne te gjithe vendin. Perfaqesuesit e biznesit te vogel deklarojnë se përfshirja në skemën e TVSH do t’i çojë drejt falimentit. Shoqata e Biznesit të Vogël parashikon që brenda vitit 2018 do të mbyllen 50 mijë biznese. Njëkohësisht ky vendim, shprehen sipërmarrësit, do të favorizoje monopolet dhe do të rrisë çmimin e produkteve që tregtohen nga biznesi i vogël për qyetarët./abcnews.al

permbytjet-ne-shkoder-1280x661.jpg
ent ela08:40 | 07/03/2018

Përmbytjet në zona të ndryshme të Bashkisë së Shkodrës kanë sjellë përplasje mes drejtuesve lokalë dhe qeverisë. Palët nuk ndahen vetëm për shifrat e tokës së përmbytur, por edhe me kërkesën për shpalljen e gjendjes së emergjencës.

Përmbytjet nga reshjet e shiut kanë sjellë përplajsje të pushtetit vendor me atë qëndror në Bashkinë e Shkdorës. Sipas verifikimeve të kryera në terren nga Bashkia, mbi 900 ha tokë janë përmbytur në njësinë administrative Ana e Malit në Shkodër. Informacioni është dhënë nga bashkia, sipas të cilës, niveli i ujit në rrugën e fshatit Obot arrin 30-50 cm.

Por të tjera shifra jep ministria e mbrojtjes për këtë situatë. Në një njoftim për mediat kjo ministri thotë se në Anën e Malit, ndodhen nen ujë vetëm 300 hektarë.

Për situaten forcat e armatosura kanë vënë në gatishmëri batalionin e Vaut te Dejes, batalionin e mbrojtjes rajonale, mjete të kalueshmërisë së lartë dhe rreth 200 trupa, per nderhyrje ne rast evakuimi. Nga ana e saj Bashkia kërkon shpalljen e gjendjes së emergjencës në zonat e përbytura bazuar në verifikimet e saj në terren. E deklaroi pasditen e të martës, në një  konferencë për mediat, kryetarja e bashkisë së Shkodrës Voltana Ademi.

Por ndryshe mendon prefekti Cesk Millja, i cili ka mbledhur në mbrëmje shtabin e emergjencave. Mësohet se prefekti ka deklaruar se situata e përmbytjeve në Shkodër nuk është e tillë, sa të kërkojë shpalljen e emergjencës. Prej disa ditësh reshjet e shiut kanë evidentuar pikat problematike të rrezikuara nga përmbytjet në bashkinë më të madhe të veriut. /abcnews.al

konfindustria-1280x623.jpg
gra moz12:39 | 04/03/2018

Konfindustria do t’i kërkojë zyrtarisht qeverisë shqiptare shtyrjen e zbatimit të tatimit të vlerës së shtuar mbi kategorinë e biznesit të vogël të parashikuar në 1 Prill 2018. Shtyrja e afatit këshillohet të jetë fillimi i vitit 2019. Në një njoftim për shtyp, Konfindustria sqaron se shtrirja e TVSH-së mbi biznesin e vogël me qarkullim vjetor mbi 2 milionë/lekë nuk duhet të ndërmerret si një akt i veçuar, por pjesë e një procesi të mirë studiuar.
Në rast të kundërt, pasojat do të jenë mbyllja e disa mijëra biznesesh të vogla, që do të kërkojne mbështetje sociale papunësie nga buxheti, monopolizim sektorial, rrezikim masiv të prodhimit vendor, që punon me cikël të mbyllur për tregun e brendshëm dhe favorizim i prodhimeve të importit./abcnews.al

vlcsnap-error873-2-1280x720.jpg
gra moz22:15 | 23/02/2018

Qeveria ka prezantuar planet për zhvillimin e Beratit. Projektet janë përqendruar në të gjithë sektorët. Qëllimi kryesor pas zbatimit të tyre është që i gjithë qarku të ketë mundësi të zhvillojë turizëm 12 muajt e vitit.

Këto përshkrime dy ministrat e qeverisë nuk ia dedikojnë Beratit sepse është vërtet i tillë por duan të thonë se qyteti i një mbi një dritareve do të marrë përkujdesjen e tyre.

13 .2 miliardë lekët që janë investuar nga viti 2013-2017 janë vetëm një tregues i ndryshimeve që ka pësuar qarku Berat. Duke risjellë në vëmendje aksionin e pastrimit kreu i qeverisë tha se një prej përfituesëve më të mëdhenj është Mali i Tomorrit, jo nga mbeturinat, por nga guroret.

Edi Rama: “Patjetër që në Shqipëri mund të ketë e duhet të ketë dhe gurore, por nuk mund të ketë dhe nuk do ketë gurore si ato që e kthyen malin e Tomorit në një skenë barbarie primitive apo si ato që qëndrojnë mbi kokat e fëmijëve të Urës Vajgurore, sot e gjithë ditën.”

Kryeministri Edi Rama kërkoi që ti drejtojnë sytë edhe nga agroturizmi pasi qeveria ka krijuar lehtësira për të përfituar nga skemat mbështetëse.
Nga ana tjetër ai shprehet besimplotë se një lumë parash do të rrjedhë nga shpimet që ka nisur kompania Shell në Shpirag.

Edi Rama: “Kërkuan dhe firmosën kontratë në Bllokun 4, në ndërkohë që kanë ndërprerë pjesën dërrmuese të programit të tyre të eksplorimit nëpër botë, – të mos harrojmë që është një kompani, e cila ka një buxhet vjetor 35 herë më të madh sesa Prodhimi i Brendshëm Kombëtar i Shqipërisë, pra nga pikëpamja e vlerës financiare është si të thuash midis Christiano Ronaldos dhe lojtarëve të Tomorit të Beratit.”/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono