PUNIMET

arena-kombetare-1-1280x729.jpg
nev ila18:30 | 12/11/2019

Reshjet e shiut sjellin vonesa në punimet e Arenës Kombëtare. Ritëm i ulët në sheshet dhe rrugët jashtë stadiumit, ndërsa ka ende shqetësim për pjesën jugore të fushës.

Ndoshta kanë nisur të luten.

Kjo statujë e vogël e Papës së dikurshëm Gjon Pali II, sikur të kujton gjendjen në të cilën ndodhen ndërtuesit e Arenës Kombëtare dhe drejtuesit e Federatës Shqiptare të Futbollit.

Sikur të mos mungonin shqetësimet, ja ku nisën përsëri reshjet e shiut për të vonuar edhe më shumë.

Ndikimi i tyre duket menjëherë sapo shikon sheshin për këmbësorët përpara tribunës kryesore, ku punimet sikur i ka ndalur në vend një dorë misterioze.

Ka shumë pak lëvizje të punonjësve, ndërsa një ditë më parë shtrohej me vrull betoni, sprucohej substanca kimike për lëmimin, forcimin dhe ngjyrosjen, si dhe punoje për asfaltin.

Togje me pllaka të bëra gati qendrojnë nën shi, në pritje të një kohe më të mirë për t’u vendosur aty ku duhet.

Natyrisht, duhet pak për të plotësuar mozaikun e sheshit, por e mërkura që mendohej si dita D, afati i përfundimit të punimeve, nuk pritet të jetë e tillë.

Me gjasë, do të ketë punë të sforcuar deri të premten.

Po ashtu, do të punohet me nxitim për mbylljen e çdo veprimi nga jashtë, në mënyrë që të largohen skelat, makineritë e gjithçka tjetër që pengon deklarimin “gati” të stadiumit.

Një nga detyrat kryesore të lëna nga UEFA që ditën e diel ishte pikërisht spastrimi i sheshit kryesor, dhe i shesheve pranë tribunave anësore, pasi ishin ende shumë të ngarkuara nga punimet që vazhdonin.

Një tjetër porosi ishte përfundimi i sistemit të ndriçimit të jashtëm të stadiumit, pasi dihet se një ndriçim i mirë krijon më shumë rregull e siguri edhe sesa një sistem i kamerave.

Shqetësim nga UEFA ka edhe për sinjalistikën që do të orientonte tifozët për të hyrë në tribunën e duhur dhe pa humbur kohë.

A mund të thuhet se reshjet do të rrezikojnë dhe se ndeshja ndaj Francës do të luhet në një impiant që do të cilësohet i përfunduar, por që do të ketë ende gjëra jo në 100 për qind?

Nëse forcat punëtore kanë bërë maksimumin këto javë, ditë dhe tanë, padyshim ato nuk po ndihmohen nga moti.

Për fat, reshjet nuk mund të pengojnë punimet në brendësi.

Llozhat e VIP-it, baret dhe restorantet në të dy katet e tribunës kryesore, muzeumi, stukimet dhe rifiniturat e fundit janë duke u bërë shpejt, dhe nuk besohet se këto do të ketë vonesa.

Po ashtu, punimet në pjesën e parkimit, të hyrjes kryesore nën tokë, të sallës së konferencave apo të zonës Miks, mund të vazhdojnë pa ndërprerje.

Një shqetësim më vete është fusha.

Edhe pse UEFA e dha lejën zyrtare, pas inspetimit të së dielës, sërish terreni do ende kohë që të jetë në gjendjen e duhur.

Në rastin më të mirë, fusha do të jetë në 100 për qind vetëm në ditën kur do të luhet ndeshja, në 17 nëntor, pra të dielën që vjen.

Pjesa jugore e saj vazhdon të përpunohet, me plehërim e mbjellje.

Shpresohet shumë që ngrohja artificiale me llampa të sjella nga Greqia do të ndikojë siç duhet, edhe pse shiu pengon edhe në këtë rast.

Në Federatë janë optimistë që terreni do të jetë gjithashtu gati në kohën e duhur, dhe ndaj Francës nuk do të ndodhë dëmtimi i zonës pranë portës jugore, ashtu siç ngjau në ndeshjen e femrave Vllaznia-Apolonia.

E detyrueshme është që stadiumi të jetë gati të premten, pasi të shtunën Franca do të stërvitet aty.

Edhe më shumë e detyrueshme është që të mos zhgënjejë tifozët shqiptarë, ndërsa thuhet se tashmë janë shitur të 22 000 biletat./abcnews.al

edi-Rama-1280x679.jpg
nev ila15:50 | 01/10/2019

Lumi Zezë në Fushë Krujë nuk do të përmbysë më zonat përreth shtratit të tij. Kryeministri Rama inspektoi punimet, por kritikoi projektin për mungesë gjelbërimi dhe mos prishjen e disa ndërtimeve afër shtratit.

Ky është Lumi Zezë…

Çdo dimër ai kthehej në një shqetësim për banorët e Fushë Krujës, duke shkaktuar përmbytje sa herë binin reshje…

Por, ky dimër pritet të jetë ndryshe pasi, shtrati i lumit është rehabilituar.

Kemi prekur tre pikat kryesore më delikate të lumit, Aramerasin në jug të Fushë-Krujës, urën ku ka pas dalë çdo vit uji dhe hapjen e grykës në dalje të lumit në veri të Fushë Krujës. Në këto  tre pika që kemi bërë ndërhyrjen më të shpejtë kemi bërë të mundur që të mos dali uji kësaj radhe, kur kanë qenë edhe reshjet më rekord 140 milimetra ujë në 5 orë brenda një dite.”

Kryeministri nuk u duk i kënaqur me projektin dhe kërkoi korrigjime.

Është mirë të bëhet një sistemim që të mos jetë një histori ferrash dhe ndërhyrjesh, është mirë që të bëhet një sistemim nga të dy anët, me vendos edhe një brez të gjelbër pemësh. Nuk është thjeshtë nga ana estetike, por edhe aspekti mjedisor. Edhe ato godinat që hyjnë dhe fusin hundën në shtrat duhen prishur, nuk mund të vazhdojnë të rrinë ashtu,” – u shpreh ai.

Kryeministri theksoi se përfundimi i  projektit do t’i japë një dimension të ri infrastrukturës së zonës./ABC News Albania 24/7

69619826_366207640995986_8509455069605789696_n.jpg
ent ela10:30 | 03/09/2019

Qytetarët të cilët vijnë nga jugu ose nga veriu i vendit përmes autostradës Tiranë Durrës nuk do të duhet të shqetësohen më për hyrjen në kryeqytet. Bashkia e Tiranës ka finalizuar një tjetër investim të rëndësishëm duke bërë të mundur mirëmbajtjen e shtresave të asfaltit në rrugën “Dritan Hoxha” në Tiranë.  Rruga “Dritan Hoxha” është një aks kryesor në kryeqytet, ku qarkullojnë shumë makina dhe për të mos bllokuar qarkullimin, ekipi ka punuar gjatë natës për mirëmbajtjen e shtresave asfaltike.

Krahas ndërtimit të rrugëve të reja, Bashkia e Tiranës i kushton një vëmendje të posaçme edhe mirëmbajtjes së shtresave asfaltime në rrugët ekzistuese,  vijëzimit, sinjalistikës dhe kangjellave, për ta bërë sa më të lehtë përditshmërinë e banorëve e duke rritur sigurinë e tyre. /ABC News Albania 24/7

rama-1-1280x650.jpg
nev ila11:30 | 12/08/2019

Shumë shpejt qeveria do të nisë ndërtimin e rrugës turistike të Thethit.

Kryeministri  Edi Rama e ka ndarë lajmin për këtë investim të qeverisë me ndjekësit e tij në rrjetin social facebook.

Bashkë me lajmin shefi i qeverisë ka publikuar dhe këtë video të bukurive të zonës malore.

Kryeministri tregon se filmimet janë bërë nga dy vizitorë të huaj të magjepsur nga Thethi. Rama thotë se e poston këtë video me lejen e autorëve Cathy Brown dhe Greg William.

Me natyrën e mrekullueshme të Thethit shefi i qeverisë i uron ndjekësve të tij në facebook javë të mbarë./ABC News Albania 24/7

MIRËMËNGJES ?dhe me këtë video ekskluzive që postohet me lejen e autorëve Cathy Brown dhe Greg Williams, dy vizitorë të magjepsur nga Thethi, si edhe me lajmin e mirë të nisjes së shpejti të investimit për rrugën turistike të Thethit, ju uroj një javë të mbarë ?

Publiée par Edi Rama sur Dimanche 11 août 2019

67791384_1512862882187060_196259174835814400_n-1280x854.jpg
ad min15:00 | 09/08/2019

Fshatrat përreth Tiranës do të marrin vëmendjen e Erion Veliajt këtë mandat te dyte në krye të bashkisë.

“Nuk mund të kemi një Tiranë e cila ecën me 2 shpejtësi: me të pestin te Sheshi  “Skënderbej” dhe rri në vend kur vjen puna te Ndroqi, te Vaqarri, te Shën Gjergji, apo në Petrelë”.

Kryetari i bashkisë ishte në Ndroq ku inspektoi punimet e kryera për rehabilitimin e disa prej rrugëve të zonës.

 “Rruga është mundësi, është ekonomi, rruga është dije. Fëmijët që vijnë te kjo shkollë, nuk ka nevojë të kalojnë përroin sepse rruga e vjetër ishte një përrua i tërë. Tani që kemi rrugën, marrin vlerë këto shtëpi, vajtja në shkollë nuk është një betejë spartane, por është një shëtitje në trotuar, me ndriçim dhe me ambient të sigurt”.

Në këto ditë gushti kryebashkiaku tha se  vëmendja e bashkisë do të jetë tek shkollat, kopshtet, çerdhet dhe infrastruktura e tyre ndihmëse, që shtatori t’i gjejë gati për të mikpritur fëmijët./ABC News Albania 24/7

veliaj-1-1280x716.jpg
ad min15:00 | 08/08/2019

Kryebashkiaku i Tiranës Erion Veliaj beson se bulevardi “Zogu i I” do të kthehet në një nga destinacionet më tërheqëse në kryeqytet.

Më në fund do të kemi të njëjtën cilësi, si në Bulevardin e Ri, ashtu edhe në sheshin “Skënderbej”, ashtu edhe në Bulevardin “Zogu I”, i cili besoj do të kthehet në një nga destinacionet më atraktive të qytetit tonë”.

Gjate inspektimit te punimeve kryebashkiaku tregoi dhe detaje te projektit qe do te zbatohet ne segmentin nga ish stacioni i trenit deri tek sheshi “Skënderbe”

 “Është konceptuar si një destinacion komercial, rrugë shopingu, një rrugë tregtare ku do të gëlojnë lokalet, dyqanet, minisheshet në secilën prej minihapësirave që do të hapen mes pallateve, dhe sigurisht lajmi i mirë për banorët është se u ka rënë lotaria. Pra, do të fitojnë nga Bashkia e Tiranës prej këtij investimi riveshjen e pallateve, duke filluar nga suvaja, në disa vende çatia, në disa vende lulishtet përpara pallateve, boja, unifikim jo vetëm i fasadave në vertikalitet, por edhe në sensin horizontal”.

Hapësira do të konceptohet si vazhdim i sheshit “Skenderbej”. Qarkullimi i makinave do të kufizohet ndërsa trotuaret do të zgjerohen.

 “Duke qene se trotuaret janë një hapësirë demokratike, zgjerimi i tyre aty ku lejohet për t’i çuar makinat nëntokë te “Bulevardi i Ri” ose te Sheshi “Skënderbej” është diçka që e kemi me prioritet. Do t’i japim një hapësirë të jashtëzakonshme këmbësorëve. 

Risi e këtij projekti është  ndërtimi i galerisë nëntokësore me qëllim që në raste defektesh hapja e rrugës të mos jetë më e nevojshme.

Punimet parashikohet te përfundojnë brenda një viti e gjysme por kryebashkiaku mendon se bulevardi do të jetë gati më shpejt./ABC News Albania 24/7

himare-1280x732.jpg
ad min15:50 | 05/08/2019

Nisin punimet për ndërtimin e stacionit të mbetjeve në Vumblo të Himarës. Ky investim sipas ministrit te Mjedisit dhe Turizmit Blendi Klosi garanton ndarjen e mbetjeve në burim dhe ul koston e transportit.
Mbetjet urbane të qytetit të Himarës prej vitesh transportohen në landfillin e Bajkaj.  Transporti shoqërohet me kosto të lartë. Shumë shpejt mbetjet do të transferohen në Vumblo.  Punimet për ndërtimin e fushës kanë nisur.  Sipas ministrit te Turizmit dhe Mjedisit Blendi Klosi ky stacion do të garantojë ndarjen në burim të mbetjeve e njëkohësisht do të ule kostot.

“U krijua ky stacion, i cili është vetëm 7 km nga bashkia e Himarës, larg zonës turistike, në një zonë publike ku është bërë një investim për dy aspekte: E para për ndarjen në burim të të gjitha mbetjeve dhe për të siguruar riciklim në masë të madhe të mbetjeve të bashkisë Himarë, po ashtu një stacion tranzitor i mbetjeve për bashkinë e Himarës, i cili do të garantojnë edhe Bashkinë edhe sipërmarrësin privat që kostot do të përgjysmohen dhe po ashtu do kemi riciklim dhe një trajtim shumë më ndryshe të mbetjeve në bashkinë Himarë.”

Projekti është i qeverisë gjermane. Përmes tij ministri Klosi tregoi se janë siguruar dhe 700 kosha.

“Në qoftë se do të jemi të gjithë së bashku në këtë përpjekje, këtë sezon besoj do ta kemi shumë më të pastër Himarën, do të kemi një model shumë të mirë që do të duam ta implementojmë në disa bashki të tjera bregdetare, falë projektit të qeverisë gjermane dhe projekteve të tjera që mbështesin filozofinë e re të trajtimit të mbetjeve urbane në vendin tonë, për të garantuar sezon turistik të pastër dhe cilësor”.

Investimi gjithashtu pritet të ulë sasinë e mbetjeve që do të depozitohen në landfillin e Bajkaj, duke krijuar të ardhura shtesë për bashkinë Himarë, por edhe vende të reja punë në industrinë e riciklimit./ABC News Albania 24/7

RRUGA-E-KOMBIT-PUNIMET_ABC-M2-T1.mpg_snapshot_00.02-1280x720.jpg
ent ela13:40 | 12/07/2019

Brenda muajit gusht do të përfundojë ndërhyrja që po bëhet në rrugën e Kombit për hyrjet dhe daljet në autostradë. Në të gjitha këto nyje po vendoset sinjalistika e nevojshme dhe sistemi i ndriçimit duke shmangur në këtë mënyrë edhe aksidentet me pasoja të rënda.

Segmenti i Rrugës së Kombit nga Tuneli deri në Morinë, është kthyer në një kantier ndërtimi.

Kompania koncesionare është drejt përfundimit të hyrje-daljeve në autostradë dhe tre nyjeve kryesore në Kolsh, Kukës qendër- ura gjashtëmetroshe dhe Perbreg.

Investimet u nisën vetëm tre muaj më parë dhe duket se do të mbyllen brenda muajit gusht.

Në nyjën kryesore që devijon trafikun edhe për Fushë Arrëz, Pukë e Shkodër është hedhur shtresa e asfaltit. Inxhinieri i kompanisë Spartak Tumani thotë se rruga e kombit me punimet shtesë që po kryhen do të ketë parametrat e nevojshme.

Në të gjitha nyjet hyrëse e dalëse, do të vendoset sinjalistika e nevojshme përfshirë edhe sistemin e ndriçimit. Tashmë duket se me këto punime do të zgjidhen edhe elementët e munguar të sigurisë rrugore dhe shmangien e  aksidenteve të panumërta që kanë ndodhur në këtë aks të rëndësishëm. /ABC News Albania 24/7

BALLUKU-NE-AKSIN-KARDHIQ-DELVINE.mpg_snapshot_00.33-1280x720.jpg
ent ela13:05 | 29/06/2019

Punimet në tre lotet e rrugës Kardhiq-Delvinë kanë avancuar në 60 përqind të tyre. Kjo është një garanci se kjo vepër do të jetë gati para afatit të parashikuar është shprehur ministrja e Infrastrukturës dhe energjisë Belinda Balluku gjatë inspektimit të punimeve.

Kanë qenë të shumta problematikat e shfaqura për shkak të terrenit ku shtrihet rruga Kardhiq Delvinë. Sot duket se kanë marrë zgjidhen e duhur teknike duke e bërë optimiste ministren e infrastrukturës dhe energjisë Belinda Balluku se aksi do të përfundojë para afatit.

“Ecuria e punimeve në lotin 5  në rrugën Kardhiq-Delvinë duket se po shkon mirë. 60 përqind e volumit të punimeve ka avancuar. Kryesisht kemi përfunduar pjesën e gërmimeve qoftë për trasenë e rrugës e cila është gati edhe qoftë për krijimin e veprave të artit. Problematikat këtu i kemi diskutuar dhe terreni është i vështirë për të thënë të drejtën, ka pasur edhe rrëshqitje në disa nga rastet megjithatë po bëhet një punë e mirë e cila na jep shpresë se ndoshta do mbarojmë edhe para afatit”.

Nga ana e saj drejtoresha e Autoritetit Rrugor Sonila Qato theksoi se Këshilli Teknik i Autoritetit Rrugor Shqiptar ka dhënë zgjidhje teknike për të gjitha problematikat e paraqitura nga ana e supervizorëve.

“Kemi diskutuar të gjitha problematikat që kanë pasur të trijalotet të cilat janë duke punuar, si loti 4,5 dhe 6, për të korrigjuar ato defekte të paraqitura nga ana e supervizorit dhe për t’u riprojektuar siç duhet dhe marrë masat në mënyrë që vepra të eci me të njëjtat ritme dhe gjatë kësaj periudhe të thatë kohore ku punohet me ritme të mira të treja kompanitë të kenë mundësi të ndjekin grafikun e punimeve të miratuara”.

Krahas ndërtimit të rrugës po punohet edhe për rehabilitimin e depozitimeve të inerteve me standardet e TAP ndërsa është bërë e mundur edhe lidhja e fshatrave që shtrihen përgjatë aksit Kardhiq-Delvinë me rrugën e re. /ABC News Albania 24/7

 

corovoifde-permet-1280x705.jpg
ad min17:50 | 05/06/2019

Ndërtimi i aksit Corovodë-Përmet do të ndikojë në zhvillimin e turizmit në zonë. Gjatë inspektimit të punimeve për ndërtimin e kësaj rruge, ministrja Belinda Balluku foli për përfitimet që do të kenë banorët e kësaj zone nga përmirësimi i Infrastrukturës.

Kanë përfunduar punimet për ndërtimin e lotit të parë në aksin që lidh Çorovodën me qytetin e Përmetit. Ky segment rrugor do lehtësojë kalimin e qytetarëve të dy zonave, por edhe turistëve që po shtohen dita- ditës.

Ministrja e Infrastrukturës dhe Energjisë, Belinda Balluku gjatë inspektimit të rrugës tha se përmirësimi i infrastrukturës në zonat me potencial turistik zhvillon turizmin në vend, duke sjellë edhe rritjen e numrit të vizitorëve.

Segmenti rrugor Çorovodë- Përmet ka një gjatësi rreth 5 kilometra, me gjerësi 6 metra. Ai karakterizohet nga mure pritës dhe mbajtës, ndërsa përgjatë tij është ndërtuar edhe një urë me konstruksion metalik./ABC News Albania 24/7

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono