pune

ngjarja-shiptare.jpg
G. P.17:36 | 13/10/2019

Të shumtë janë shqiptarët që kanë emigruar për një jetë më të mirë. Fatkeqësisht për disa prej tyre ka rezultuar në një tragjedi pasi kanë humbur jetën nëpër aksidente duke punuar.

Mediat italiane kanë renditur në një artikull, punëtorët të cilët kanë humbur jetën gjatë kohës që po punonin. Fatkeqësisht në listën e gjatë janë raportuar të paktën edhe katër shqiptarë, të cilët kanë humbur jetën tragjikisht në incidente të ndryshme gjatë vitit 2019.

Më 2 Mars, Arjan Cekani humb jetën pas 5 ditësh në spital. 40-vjeçari u plagos më 25 Shkurt në pastiçerinë ku punonte. Ai tentoi që të zhbllokonte makinerinë ku po punonte, por i ngeci krahun, duke i shkaktuar plagë të rënda. Ngjarja ndodhi në rajonin e Lombardisë.

13 Mars, një tjetër punëtor shqiptar humbi jetën. Mediat nuk e kanë bërë publik emrin e tij, por shkruajnë se ishte 45 vjeç. Edhe ai humbi jetën në spital pas plagëve të rënda që pësoi në kokë për shkak se ra nga shkalla.

Ngjarja ndodhi në rajonin e Toskanës, ku shqiptari po punonte për të rregulluar disa pisha, të cilat ishin rrëzuar për shkak të erërave të forta.

Më 1 Qershor humbi jetën Shpëtim Halili. 35-vjeçari ishte një njeri shumë i respektuar në picerinë Sant’Agostino, ku punonte që kur kishte ikur nga Shqipëria. Mirëpo kthimi për në shtëpi rezulton një tragjedi atë natë.

I riu humb jetën në një aksident me motor. Mediat shkruajnë se ende mbetet e paqartë shkaku i ngjarjes. Kjo pasi Shpëtimi ka frenuar përpara se rrëzohej nga skuteri, çka hedh hipotezat se mund të ketë hasur në ndonjë pengesë në rrugë.

Një muaj më vonë, më 1 Gusht humbi jetën 27-vjeçari Nertil Bushi, i cili banonte në Bibiena. I riu po punonte në çatinë e një magazine së bashku me një të afërm kur ra nga një lartësi prej 10 metrash.

Shkak u bë shembja e një pjese të strukturës. Edhe pse i riu u dërgua me helikopter në spital, plagët ishin shumë të rënda, aq sa i morën jetën./abcnews.al

dite.jpg
G. P.19:31 | 23/08/2019

Tashmë, një studim ka zbuluar se kur janë ditët në të cilat njerëzit kanë produktivitet më shumë në punë. The Mirror shkruan se për këtë kërkim u pyetën 2000 punonjës zyrash.

Në përfundim u zbulua se koha më produktive për një punonjës gjatë ditës është mes orës 10:00-11:00.  Më tej sipas studimit, e marta është dita në të cilën punonjësit ndiheshin se kishin më shumë produktivitet. Kjo ditë ndiqet nga e hëna dhe e mërkura.

“Është e rëndësishme të kuptojmë se çdo person punon ndryshe. Disa preferojnë të punojnë 9:00-17:00, e disa të tjerë me orar tjetër. Një përfitim i mundshëm i punës me orar të lëvizshëm është mundësia e punonjësve për të menaxhuar ditën kur niveli i produktivitetit mund të jetë më i lartë, dhe për këta arsye ndihmon në menaxhimin e kohës në mënyrë më eficente”, tha një drejtues i një kompanie në lidhje me kërkimin./ABC News Albania 24/7

mitsotakis-1.jpg
G. P.16:14 | 19/07/2019

Kryeministri i Greqisë Mitsotakis ka zhvilluar takimin e parë me deputetët e partisë demokracia e re, të cilët mbajnë një mazhorancë të fortë në parlamentin e ri grek. Ai u kërkoi deputetëve që të punonin shumë dhe të flisnin më pak.

Në takimin e parë të grupit parlamentar të “Demokracisë së Re” paraditen e së premtes, kryeministri grek Kyriakos Mitsotakis u bëri apel deputetëve që të punojnë më shumë dhe të flasin më pak.

Pasi u prit me duartrokitje nga deputetët e partisë së tij, Mitsotakis u shpreh i mallëngjyer për faktin se partia e tyre kishte marrë një mazhorancë të fortë parlamentare me 158 deputetë, duke theksuar se ishte mazhoranca më e fortë prej disa vitesh.

Mitsotakis u kërkoi deputetëve që të kërkonin një nivel më të lartë të dialogut politik të bazuar në argumente. Ai shtoi se në zgjedhjet e përgjithshme të 7 Korrikut që sollën demokracinë e re në pushtet ishin një përgjigje për populizmin dhe ekstremizmin, duke theksuar se mungesa e Agimit të Artë në parlamentin e ri ishte një arritje.

Ai u kërkoi atyre që të luftonin populizmin dhe traditën e vjetër të klientelizmit të përditshëm politik si dhe të punonin shumë. Stavros Kalafatis u zgjodh në mënyrë unanime për të qenë kryetari i grupit parlamentar i “Demokracisë së Re”./ABC News Albania 24/7

erion-brace-1280x720.jpg
G. P.16:10 | 09/07/2019

Qeveria po verifikon të gjithë punonjësit e shtetit që kanë dëmtuar procesin zgjedhor dhe do të largojë nga detyra këdo që provohet të ketë thyer rregullat. Zëvendës kryeministri Erjon Brace, në raportin e tij përpara Komisionit të Ligjeve, tha se tenderët, nxënësit dhe makinat shtetërore nuk u përdorën në funksion të 30 Qershorit.

Një javë pas zgjedhjeve, qeveria bën bilancin e sjelljes së administratës me fushatë. Numri dy i qeverisë raportoi përpara Komisionit të Ligjeve.

Por ndryshe nga qeverisja qendrore që vlerësohet të ketë mbajtur duart larg zgjedhjeve, punonjësit e bashkive opozitare po skanohen nga qeveria. Sa i takon administratës në tërësi, zëvendëskryeministri nuk ngurron të pranojë problemet.

Pranë komisionit të Ligjeve raportoi edhe Avokatura e Shtetit. Bashkim Fino u interesua për 13 milionë euro që familja e Lulzim Bashës fitoi në Strasburg për shkak të prishjes së një pallati në Vlorë nga qeveria e Ramës./ABC News Albania 24/7

sherbimet-dhe-bujqesia.jpg
G. P.16:05 | 06/07/2019

Shifrat e punësimit janë një ndër temat kryesore të diskutimeve publike. Po cilët janë sektorët që mbajnë peshën kryesore të punësimit në vend dhe japin kontribut kryesor në ekonomi. Instituti i Statistikave ka analizuar të dhënat e vitit të shkuar.

Shërbimet dhe bujqësia vijojnë të mbajnë peshën kryesore të punësimit në vend. Rreth 80% e shqiptarëve punojnë në këto dy sektorë. 42,9 % në të parin dhe  37,4 % në të dytin, sipas Institutit të Statistikave që ka analizuar të dhënat e vitit të shkuar.

Ndërkohë që jo të gjithë ata që kanë një punë marrin dhe një pagë. 21.6% e të punësuarve janë punëtorë pa pagesë. Më shumë gra, gati 28.7% se burra 15.9% thotë Instituti i Statistikave që ndërkaq sqaron se punojnë në biznesin e familjes.

44,5 % e punonjësve paguhen për punën që bëjnë ndërsa  34 % janë të vetëpunësuar. Ndërkohë që po sipas INSTAT, burrat e kanë pasur më të lehtë se gratë të gjejnë një punë.

Hendeku gjinor në punësim për grupmoshën nga 15 deri në 64 vjeç ishte 14.3%. Vitin që lamë pas 52,4 % e grave dhe 66,7 % e burrave të kësaj moshe arritën të siguronin një punë./ABC News Albania 24/7

 

uet.jpg
G. P.15:40 | 06/06/2019

Në kuadër të javës së inovacionit, Universiteti Evropian i Tiranës organizoi Panairin e Punës ku morën pjesë rreth 50 kompani të mëdha nga sektori i inxhinierisë së ndërtimit, energjisë, si dhe fushës së Teknologjisë së Informacionit. Sipas drejtuesve të Universitetit Evropian të Tiranës, kjo është një mundësi e mirë për të gjithë studentët e këtij universiteti që të integrohen në tregun e punës.

Tashmë prej dy vitesh oferta akademike e Universitetit Evropian të Tiranës vjen e zgjeruar në pesë Fakultete. Ky ndryshim është shoqëruar me një sërë risish, ku formati i organizimit të Panairit të Punës është një prej tyre. Ndryshe nga 10-vjeçari i parë tashmë në UET zhvillohen pesë panaire të ndryshme për secilin prej Fakulteteve të tij, të shtrira për gjatë pesë javëve.

Gjatë kësaj jave ishte Dita e Inovacionit në UET, ku Fakulteti i Inxhinierisë, Informatikës dhe Arkitekturës ka zhvilluar panairin e punës me rreth 50 kompani që i përkasin sektorit të inxhinierisë së ndërtimit , energjisë, studiove arkitekturore dhe kompani të fokusuara në fushën e Teknologjisë së Informacionit.

Aktivitetet që u zhvilluan gjatë ditës së Inovacionit, krijuan një atmosfere dinamike që nisi me Panairin e Punës, duke vijuar me seksionin “Profil biznesi” e më pas me takimin e Bordit të Tregut të Punës për të shkëmbyer ide e diskutime.

Panairi në UET përfundoi me një bashkëbisedim mes drejtuesve të burimeve njerëzore të disa prej kompanive më të mëdha në vend dhe studentëve e pedagogëve për një debat mbi “Sfidat e Burimeve Njerëzore në sektorin e Inxhinierisë dhe Teknologjisë në Shqipëri”./ABC News Albania 24/7

edi-reja-1.jpg
G. P.13:46 | 22/05/2019

Kombëtarja nis stërvitjet nën drejtimin e trajnerit të ri, Edi Reja. Italiani pati në dispozicion pak futbollistë, por u përpoq që të vepronte shpejt dhe të mos humbiste kohë

Mund të punohet edhe me ekip të cunguar, ndonëse lojtarë në fushë pati plot. Edi Reja shpreson ta ketë nisur me këmbën e mbarë punën tek Shqipëria, dhe të tregojë se 73 vitet që ka mbi shpinë nuk ia kanë humbur aspak zotësinë e trajnerit.

Me vetëm 10 lojtarë të kombëtares dhe me 12 të tjerë të përzgjedhur për ekipin Shpresa, trajneri italian i ndau që më parë detyrat për ndihmësit e tij, dhe vëzhgoi gjithçka nga një distancë e afërt.

Siç është bërë tashmë traditë, ishin tre teknikë të tjerë që u morën me zbatimin në praktikë të ideve të Rejës, duke i ndarë lojtarët pikërisht në tre grupe, të drejtuar nga Ervin Bulku, Hamdi Salihi i shtuar rishtaz në staf, si dhe njeriu i besuar i italo-sllovenit, Serxho Porrini, ish-mbrojtës i Juventusit.

Kërkesa kryesore e Rejës ishte që ushtrimet stërvitore të kuptoheshin mirë, të veproheshin shpejt, dhe të zbatoheshin pa gabime. Besohet se qetësia e tij do të jetë një faktor pozitiv në ekipin përfaqësues.

Një risi e trajnerit të sapoardhur ishte prania e dronit mbi fushën stërvitore në “Tropikalit”, duke filmuar stërvitjen për llogari të Rejës, në mënyrë që ai të ketë mundësi më të mira analize, si dhe për t’ua shpjeguar më mirë gjithçka lojtarëve.

Në grupin e kombëtares, tani për tani, bëjnë pjesë tre lojtarë të Partizanit, Alban Hoxha, Lorenc Trashi e Bruno Telushi, lojtarë të ardhur nga Greqia si Mihaj, Basha apo Kaçe, nga Italia si Dermaku e Ndoj, si dhe Grezda nga Skocia e Ramadani nga Danimarka.

Kombëtarja plotësohet të hënën e ardhshme, në 27 Maj./ABC News Albania 24/7

notre-dame-1.jpg
G. P.21:44 | 24/04/2019

Punëtorët e angazhuar në restaurimin e pjesës së sipërme të katedrales Notre Dame kanë pranuar se kanë pirë duhan në vendin e punës. Megjithatë, kompania përgjegjëse ka përjashtuar mundësinë që duhani të jetë bërë shkak i zjarrit në objektin shekullor të kultit.

Përfaqësues të kompanisë së ndërtimit që ishte angazhuar në punimet për pjesën e sipërme të katedrales Notre Dame të Parisit kanë pranuar përpara hetuesve se punonjësit konsumonin duhan në kantierin e punës.

Dhe në fakt, sipas mediave franceze, në vendin e ngjarjes, hetuesit kanë gjetur 7 bishta cigaresh. Por kompania “Le Bras Frere”, pasi është shprehur e hidhëruar për këtë episod ka përjashtuar çdo lidhje mes cigareve dhe zjarrit që përfshiu objektin e kultit të hënën e javës së kaluar.

“Mesa duket ka punëtorë që herë pas here kanë shkelur rregullat, por në asnjë rast shkak i zjarrit nuk mund të jetë bërë një bisht cigareje i fikur keq”, ka deklaruar zëdhënësi i kompanisë.

Sa i takon pistës së një zjarri të shkaktuar nga motorët elektrikë të ashensorëve, zëdhënësi i grupit ka siguruar se motorët nuk kanë paraqitur asnjë problem.

“Ata janë larg majës së katedrales dhe tashmë është konfirmuar se zjarri ra në brendësi të ndërtesës”, ka vijuar zëdhënësi.

Për momentin pista e privilegjuar për ngjarjen e rëndë është ajo e zjarrit aksidental, shkaktuar nga një qark i shkurtër, por kjo nuk është konfirmuar zyrtarisht dhe mbetjet e godinës do të analizohen një për një për gjetjen e indicieve./abcnews.al

uu-2-1280x708.jpg
ent ela14:53 | 28/02/2019

Marrëveshja e Brukselit kishte sjellë pak Kosovë në qytetin e Lleposaviçit, i cili kur flitet për territoret, mendohet se do t’i takojë Serbisë. Por, banorët e qytetit më të largët të Kosovës, thonë se problemet janë ekzistenciale dhe punë nuk ka shumë pasi uzinat e dikurshme tani janë gërmadha. Ata duan të jenë me Serbinë pasi thonë se identiteti i tyre nuk ka qenë kurrë Kosovar. Por, të rëndësishme e kanë punën dhe mbijetesën.

Pjesa më veriore e Kosovës nga kufiri Jarinje drejt Mitrovicës. Veriu është pjesa e kontestueshme dhe e paraqitur si mjet për zgjidhjen e konfliktit dhe firmosjen e marrëveshjes përfindimtare për paqe.

Serbia kërkon përkufizim në disa mijëra kilometra katrorë. Pak industri, natyrë e vdekur dhe flamuj pafund. Një hapësirë shtet në shtet.

Leposavici, është qytet me 17 mijë banorë. Shumë e përmendin në cdo variant se mund të bëhet pjesë e Serbisë. Negociatat për fatin e tyre i presin edhe këtu.

Në këtë pronë jeton familja Veçkoviç. Një ditë e zakonshme e punëve të shtëpisë për të kaluar të ftohtin që shkon e kthehet.

I biri i familjes, është Gorani, 42 vjecari që ka vendosur të rrijë këtu. Drejton dy punë për të mbijetuar. Njëra është një dyqan peshku. Punon edhe me shqiptarët në tregoti. Gatuan kryesisht për festat ortodokse, ahengjet e morte peshk nga liqeni I Gazivodës dhe nga Serbia si dhe supa me porosi .

Goran Vuçkoviç:Mund të jetojmë një jetë mesatare me këtë punë. Punojmë unë dhe gruaja dhe kemi edhe dy kamarier dhe punojmë shumë për t’ia dalë. Kam fëmijët këtu dhe djali dëshiron të shkoj në Serbi të mësoj për kuzhinier. Biznesi është i mirë, por jo edhe i sigurt. Në Kosovë apo Serbi, kur pyetet për zgjidhjen, problem thotë është politik”.

Goran Vuçkoviç: “Politika është përzier në gjithcka dhe unë planifikoj që fëmijët ti largoj pasi nuk kanë të ardhme këtu. Një të ardhme të munguar e tregon edhe zona industriale. Dikur këtu kishte prodhim, tani aty shëtisin qentë si nëpër një ekspozitë të ndryshkur. Investimet në këtë gjendje nuk janë të mundura”.

Flamujt natyrisht nuk mungojnë as këtu. Trengjyrshja e Serbisë tregon simbolikisht se kush e ka kontrollin. Institucionet e Kosovës këtu kanë shtrirje vetëm aq sa u duhen banorëve që në mendje janë në Serbi. Pak shqiptar jetojnë këtu.

Ivan Vuckovic, është gazetarë dhe raporton edhe për televizionin e Kosovës që këtu nuk ka valë. Pak thotë se serbët I besojnë shtetit të Kosovës.

Ivan Vuçkoviç: “Shumë njerëz punojnë në sistemin e Kosovës, kështu funksionon dhe bashkia. Por, njerëzit nuk varen pasi mbi 60 për qind nuk kanë qenë kurrë në Jug”.

Sanja Sovirlic, është sociologe me profesion. I takon një gjenerate të re dhe shkruan si gazetare në faqen e saj “bota bardh e zi”. Në këtë pab ka pak njerëz dhe rinia ka një realitet brenda dhe një jashtë. Bota e Sanjës megjithatë nuk është pa ngjyra.

Sanja Sovrliç:Njerëzit nga këtu jo vetëm për shkak të politikës duan të ikin në Serbi të punojnë ose jashtë. Unë këtu e kam punën, por nuk e imagjinoj të rri gjatë”.

Kafeneja është fati i xx. Këtu ai ka ndërtuar një jetë. Por, përtej një qyteti të izoluar mundësitë nuk japin shumë shpresë për ndryshim. Gorani, thotë se problemet në Kosovë ngjasojnë dhe zgjidhjet politike duhet të sjellin punësim.

Goran Vuçkovië: “Edhe shqiptarët kanë të njëjtat problem, dihet se edhe ata shkojnë jashtë për të punuar, edhe këtu nuk ka më fabrika dhe vende pune dhe ikin njerëzit”.

Nga e shkuara kanë fotografitë e vjetra, nga e tashmja frikën, nga e ardhmja vetëm shpresa./abcnews.al

lori-haxhiu.jpg
G. P.12:45 | 09/02/2019

Lori Haxhiu është Drejtoresha e Shërbimit Kombëtar për Rininë. Ajo ishte në ABC News për të folur rreth rihapjes së programit kombëtar të praktikave që shkon për punësimin e të rinjve.

“Qëllimi i tij është ofrimi i eksperiencës së punës për të gjithë të rinjtë shqiptarë. Kriteret janë shumë të thjeshta. E para duhet të jenë në një grupmoshë nga 21 deri në 26 vjeç dhe e dyta duhet të kenë mbaruar minimalisht studimet Bachelor. E themi rihapet pasi integrimi i të rinjve në vendet e punës ka qenë prioritet i qeverisë shqiptare. Mbetet prioritet i qeverisë shqiptare. Qasja është e tillë. Programi nuk është vetëm për administratën publike pasi në administratë janë të përfshira 15 insitucione qendrore shtetërore, 105 institucione të varësisë. Programi shtrihet në 50 njësi të qeverisjes vendore, pra bashkitë dhe në disa shoqri pr3esitgjoze tregtare. Të rinjtë janë të lirë të zgjedhin”, tha Haxhiu.

Haxhiu foli edhe për portali punëtëmbarë.al që i është dedikuar studentëve ekselentë. Është pikërisht ky ndryshimi me programin e praktikave. Haxhiu theksoi gjithashtu se studentët ekselentë kanë të drejtë të aplikojnë në portalin punë të mbarë.

“Diferenca midis dy programeve është që punë të mbarë i dedikohet jo praktikave të punës, por fillimit të një eksperience të mirëfilltë punësimi që në fazën fillestare të saj, por që kriteri është pak më i fortë pasi të gjithë duhet të kenë përfunduar studimet me mesatare nga 9 deri në 10. Interesi ka qenë i madh. Ka kaluar numrin 1000 të aplikimeve, 400 prej të cilëve tanimë janë kualifikuar. 804 vende janë vakante në departamentin e administratës publike në këtë thirrje të parë”, tha Haxhiu.  /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono