ps

POLITIKA-NE-ABCNEWS-ILIR-META-E-EDI-RAMA-LUFTE-ME-INSTITUCIONE-15.-06.2019.mpg_snapshot_02.00-1280x720.jpg
Sej rie17:40 | 17/06/2019

Socialistët regjistruan sot në Kuvend firmat për shkarkimin e Ilir Metës, por kjo procedurë parashikon një rrugë të gjatë deri në largimin e Presidentit nga zyra. Kuvendi duhet të ngrejë një komision hetimor parlamentar për këtë çështje, por edhe nëse ka 94 vota, PS nuk mund ta heqë kreun e shtetit pa marrë një vendim Gjykata Kushtetuese.

Një javë pasi Ilir Meta firmosi anulimin e zgjedhjeve në 30 qershor, edhe socialistët hodhën hapin e tyre zyrtar për ta nxjerrë jashtë presidencës. 55 deputetë dhanë firmat e tyre për t’i dhënë vlerë ligjore vlerësimit të kryeministrit se Ilir Meta e kishte humbur të drejtën të qëndronte në atë zyrë.  Firmat që prej të enjtes qëndronin në zyrën e Taulant Ballës u protokolluan në Kuvend.

Por shkarkimi i presidentit nuk është një proces që mbyllet brenda një ditë. Rregullorja parlamentare, që po zbatohet për herë të parë në këtë pikë, përcakton se pas depozitimit të firmave, Komisioni i Ligjeve duhet të vlerësojë nëse ka shkelje nga ana e Metës, e më pas, të ngrihet një komision hetimor për këtë çështje. Ky komision duhet ta dëgjojë presidentin nëse ai e dëshiron këtë, ndërsa votimi në parlament mund të bëhet vetëm pasi të ketë nxjerrë raportin komisioni hetimor.

Shkarkimi i presidentit kërkon 94 vota, të cilat së fundmi PS ka provuar se i siguron mes opozitës së re.

Por gjithsesi, ky votim nuk mjafton për shkarkimin e Metës. Duhet që Gjykata Kushtetuese, ta certifikojë atë. Kjo gjykatë nuk ekziston, dhe ajo pritet të vihet në punë me 3 anëtarë  të caktuar nga Kuvendit e 3 nga vetë Ilir Meta.

Ky proces mund të kërkojë disa muaj, ndaj PS, i kërkon Ilir Metës ta përdorë postin “me qetësi dhe dashuri”.

Shkarkimi i Presidentit kërkon 5 vota në Gjykatën Kushtetuese, e kur Kuvendi do të emërojë vetëm 3 gjyqtarë, ngelet për tu parë nëse 3 të emëruarit nga Meta do ta “tradhtojnë” atë që në vendimin e parë./ABC News Albania 24/7

TE-HENEN-NE-PS-NIS-SHKARIMI-I-METES.mpg_snapshot_00.23-1280x720.jpg
ent ela13:35 | 15/06/2019

Partia Socialiste do të depozitojë të hënën kërkesën për shkarkimin e presidentit të republikës me argumentin se ka shkelur Kushtetutën duke anulluar datën e zgjedhjeve. Pasi parlamenti të ndjekë procedurat e tij deri në votimin e shkarkimit të kryetarit të shtetit do të jetë Gjykata Kushtetuese që do të thotë fjalën e fundit.

Të hënën do të nisë procedura për shkarkimin e presidentit Ilir Meta. Lajmin e dha kryetari i komisionit të ligjeve Ulsi Manja gjatë një takimit me banorë të njësisë 11 në Tiranë.

“Ditën e hënë futet në furrë. Ka qenë në ngrirje, fillon dhe shkrihet nga e hëna”.

Partia Socialiste do të depozitojë në Kuvend kërkesën me firmat e deputetëve. Ndonëse mjaftojnë 35, mazhorancës i janë bashkuar edhe deputetë të opozitës parlamentare duke e cuar në 55 numrin e firmave të mbledhura.

Ky është hapi i parë që parashikon Rregullorja e Kuvendit, neni 112 I të cilës detyron që : “Jo më pak se një e katërta e të gjithë anëtarëve të Kuvendit mund të propozojë shkarkimin nga detyra të Presidentit të Republikës”.

Kërkesa do të shqyrtohet në Komisionin e Ligjeve nga ku pritet të shihet nëse do të merret vendim për ngritjen e një komisioni hetimor apo jo.

Brenda 15 ditëve raporti i komisionit të Ligjeve paraqitet për votim  në Kuvendin e Shqipërisë bashkëngjitur me propozimin ose jo të ngritjes së komisionit hetimor. Pasi të përfudojnë të gjitha këto procedura konferenca kryetarëve përcakton datën e votimit në Kuvend të kërkesës për shkarkim të Presidentit të Republikës dhe kohën e debatit.

Në rast se kërkohet nga Presidenti i Republikës për t’u dëgjuar në seancë plenare, Kuvendi është i detyruar ta dëgjojë atë. Kuvendi vendos për shkarkimin e Presidentit të Republikës me jo më pak se dy të tretat e të gjithë anëtarëve të tij dhe me votim të fshehtë.

Vendimi për shkarkimin e presidentit i dërgohet Gjykatës Kushtetuese. Është kjo gjykatë që hedh firmën e fundit mbi qëndrimin ose jo në detyrë të presidentit Ilir Meta. / ABC News Albania 24/7

mustafa-nano.jpg
G. P.20:36 | 14/06/2019

Në politikën shqiptare Mustafa Nano vë re një dukuri, e cila shfaqet sa herë që një person del kundër komunitetit ku bën pjesë. Në monologun e kësaj puntate të emisionit “Provokacija”, ai u ndal pikërisht tek kjo çështje në dy partitë më të mëdha politike në vend.

Edhe pse mendon se tek Partia Socialiste është më pak e theksuar si dukuri, Nano mori një shembull aktual që ndodhi gjatë seancës parlamentare të së enjtes ku u miratua dhe rezoluta kundër vendimit të Presidentit.

“Seanca e së enjtes parlamentare sikur të mos ishte Pandeli Majko dhe Ditmir Bushati do të ishte një seancë e mërzitshme, banale si të gjitha seancat ndoshta në parlament. Por ishin këta të dy që ndoshta i dhanë ngjyrë seancës sepse ishin dy zëra kundër. Pandeli Majko në diskutimin e vet, i cili bëri bujë tha midis të tjerash se, “data 30 Qershor si datë zgjedhjesh është një datë e diskutueshme”. Ai shprehu këtë frikë se “në qoftë se mbajmë zgjedhje në datën 30 Qershor, kjo do të thotë që do t’i fitojmë të gjitha njësitë vendore dhe kjo do të krijonte premisën për instalimin e  një regjimi në Shqipëri”. Nuk e përmendi regjimin si një disponim që do vinte nga brenda PS-së sipas mendimit tim, por e përmendi si një gjë që do vinte për shkak të një rrethane të caktuar politike. Kjo rrethanë e caktuar politike është ajo që sapo thashë, të gjitha njësitë vendore do të kalonin në duart e socialistëve.

Po kështu Bushati bëri të njëjtën gjë, vuri në diskutim datën e zgjedhjeve si një datë që mund të krijonte probleme. Të dy këta sigurisht fajësuar opozitën për sjelljen që kanë bërë, por dolën kundër mendimit të PS dhe kundër mendimit të kryetarit të tyre. Mua më kujtohet që Norberto Bobbio, politolog italian që nuk jeton më, ka thënë në një moment të caktuar që “forca dhe ndershmëria intelektuale e një robi duket qartë, ose matet me forcën që robi vetë ka për të ngritur zërin kundër një interesi që është i komunitetit të cilit ai i përket dhe ky komunitet mund të jetë një parti, një fe e caktuar, mund të jetë një etni e caktua”. Nëse një intelektual ka forcën e madhe për të qenë kritik ndaj komunitetit të cilit ai i përket kjo është ndershmëria e një intelektuali. Gjë që në Shqipëri nuk vihet re. Në Shqipëri vihet re e kundërta. Nëse në Shqipëri i kundërvihesh komunitetit të cilit i përket ti damkosesh, ti konsiderohesh si armik i popullit. Biles kjo gjë ndodh në PS herë pas here. Kam përshtypjen që edhe në momentin që po flasim mund të ketë socialistë që Majkon dhe Bushatin kanë filluar t’i shohin si armiq të tyre”, tha Nano.

Kjo dukuri është e theksuar edhe te PD-ja sipas Nanos. Sipas tij, edhe pse janë marrë vendime shumë të rëndësishme politike, brenda selisë blu nuk ka dalë një zë kritik.

“Kjo gjë në krahun tjetër te PD-ja është edhe më e theksuar. PD-ja ka një traditë më të gjatë dhe më të konsoliduar të mendjeve ndryshe. Vini re çfarë po ndodh sot. PD ka marrë disa vendime që janë vendimet më të rëndësishme që mund të ketë marrë në historinë politike të veten. Këto vendime janë djegia e mandateve parlamentare, është bojkotimi i zgjedhjeve lokale dhe një vendim i tretë është një vendim që kanë marrë si të thuash për të kërcënuar vendin dhe mazhorancën me një luftë civile nëse zgjedhjet do bëhen më 30 Qershor. Një vendim tjetër ka të bëjë me faktin që PD po e izolon veten përballë partnerëve ndërkombëtar. Asnjë zë, pothuajse asnjë zë i korit perëndimor nuk është dëgjuar kohët e fundit që të flasë në favor të opozitës.

Megjithëse jemi në këto rrethana politike ku do të ishte e natyrshme të dilte një ose dy zëra kritik sepse janë marrë shumë vendime shumë të forta dhe janë “by definition” të diskutueshme e megjithatë nuk ka dalë asnjë zë kritik kohët e fundit brenda PD-së. PD-ja është shumë kompakte në unitetin e vet. Ky unitet nuk është se manifestohet brenda PD-së por manifestohet edhe jashtë PD-së në bllokun e madh të popullit opozitar. Edhe ata kanë bërë të tyren tendencën për të kryqëzuar çdo gjë që del kundër, sepse e konsiderojnë si një zë në shërbim të mazhorancës, si një zë në shërbim të Edi Ramës. Kjo është dukuri e shëmtuar e politikës shqiptare majtas dhe djathtas. Për mua djathtas është më e theksuar dhe majtas më pak, por si duket dukuria ekziston. Dhe në këtë monolog unë doja të denoncoja këtë dukuri”, tha Nano./abcnews.al

ps123.jpg
G. P.23:03 | 12/06/2019

Socialistët kanë festuar ditëlindjen e 28-të. Në ceremoni mungonte kryeministri dhe kryetari i PS, por figurat e tjera nënvizuan rrugëtimin e partisë më të madhe të majtë dhe modelin e suksesit që i ofrojnë vendit, kryebashkiakun e Tiranës Erion Veliaj.

U mblodhën për të festuar 28 vjetorin e Partisë Socialiste. Në eventin e organizuar tek amfiteatri I liqenit, një nga investimet e fundit të Bashkisë Tiranë, u kujtua historia e 28 viteve dhe rrugëtimi i nisur me Fatos Nanon e emra të tjerë të njohur një pjesë e të cilëve politikanë aktivë e shumë të rinj. Në këtë 28 vjetor bilancin e bën Taulant Balla, sekretari i përgjithshëm, duke evidentuar se socialistët ia kanë dalë të vetëm të bëhen forca udhëheqëse në vend.

“Sa herë që Partia Socialiste e Shqipërisë ka marrë detyrën për të qeverisur vendin e ka nisur nga një pikë tejet e vështirë. E ka marrë Shqipërinë e lënë në humnerë gjithmonë nga Saliu dhe e ka ngritur atë. Sot jemi në një prej momenteve më të rëndësishme! Brenda 5 vite e gjysmë të qeverisjes sonë jo vetëm që morëm statusin e vendit kandidat, por Partia Socialiste sot teksa qeveris e vetme është në momentin e fillimit të bisedimeve për anëtarësim në Bashkimin Europian”, tha ai.

Nuk mungoi një socialist i orëve të para. Pandeli Majko kujtoi sfidën e kalimit nga partia komuniste në atë socialiste, si dhe tiparin e pakënaqësisë mes socialistëve për të arritur më të mirën. Por këtë 28 vjetor, simboli është kryebashkiaku i Tiranës Erion Veliaj.

“Sot jemi mbledhur jo vetëm për të kthyer kokën mbrapa dhe për të parë punën e jashtëzakonshme të atij eksperimenti të pabesueshëm që ktheu partinë më konservatore të lindjes komuniste në partinë më liberale të lindjes evropiane. Duhet me se s’bën të vazhdojmë atë histori të vjetër të socialistëve, të qënit të pakënaqur. Gjithmonë të qenit të pakënaqur me veten, të qenit të pakënaqur me atë që kemi arritur, të etur për më shumë sepse historia na kërkon më shumë, ne socialistëve sidomos. Jam i bindur se ditë më të mira do të vijnë, pa diskutim. Edhe unë jam fans i Erion Velisë. Po jam fans edhe i Taulantit jo i Taulantit nga Librazhdit, por i Taulantit nga Laçi. Është ky këtu. E kërkove tani. Mbaje”, tha Majko.

Edi Rama nuk ishte i pranishëm në këtë 28 vjetor, por rolin e tij e kujton Erion Veliaj, që kërkon një mandat të dytë në krye të bashkisë së kryeqytetit

“Dua të përshëndes të gjithë skuadrën tonë, gjithë qeverinë qendrore, ministrat tonë, ata që drejtojnë me Edi Ramën qeverinë tonë, qeverinë më progresiste që ka parë ndonjëherë Shqipëria. Bashkë me Edi ramin ata janë çdo ditë duke u përpjekur që vizioni ynë, ambicia jonë, për këtë qytet të bëhet realitet dhe mund ta bëjë vetëm një forcë Partia Socialiste e Shqipërisë”, tha Veliaj.

Flamujt kuqezi kishin zëvendësuar ata partiakë edhe në këtë ditëlindje, imazhi simbolik që shoqëron socialistët në këtë fushatë zgjedhjesh vendore./ABC News Albania 24/7

VELIAJ-SINKRON-_ABC-M4-T2.mpg_snapshot_01.26-1280x720.jpg
ent ela10:30 | 12/06/2019

Partia Socialiste feston sot 28-vjetorin e themelimit të saj. Përmes një postimi në rrjetet sociale, kryetari i Bashkisë së Tiranës Erion Veliaj uroi të gjithë socialistët.

Veliaj thotë se PS është e vetmja forcë politike që bën shtet dhe është e qartë në rrugën europiane të vendit, ndaj fton qytetarët që në 30 qershor të votojnë këtë forcë politike.

Gëzuar Ditëlindjen @partiasocialiste_al e vetmja forcë patriotike që ka provuar se nuk tradhëton kurrë vendin, se rimëkëmb ekonominë, se bën shtet 🇦🇱 e qytet si Tirana jonë.

E vetmja forcë qartësisht pro e pro, sot për sot! Në #30Qershor voto PS @ediramaal Nr. 30”, shkruan kryebashkiaku Veliaj. /abcnews.al

gjushi-933x445.jpg
Sej rie22:10 | 06/06/2019

Vangjush Dako ka deklaruar se Astrit Avdylaj është simpatizant i Partisë Socialiste. I ftuar në emisionin “Opinion” në Tv Klan, kryebashkiaku i Durrësit pranoi publikisht se e njeh Astrit Avdylajn, por deri në vitin 2016 nuk e ka takuar asnjëherë personalisht.

“Nuk e kam njohur kurrë Astrit Avdylajn. Deri në vitin 2016 nuk e kam njohur ndonjëherë fizikisht. Pas vitit 2016 e kam njohur siç njoh shumë njerëz në atë qytet. E di që ka qenë i dënuar. Është simpatizant i shpallur për të mbështetur Partinë Socialiaste. Nuk është me tesër. Është vetëm simpatizant i Partisë Socialiste në këto zgjedhje.

Keni 4 Avdylaj atje, dhe po t’i ndajmë secilin, Jasim Avdyli ka qenë mbështetës i Agron Dukës i Partisë Demokratike. Astrit Avdyli ka qenë mbështetës për të fituar Partia Socialiste. Unë di historinë e çdo qytetari të Durrësit. Ata kërkojnë të mbështesin në fushatë për të fituar”, deklaroi kryetari i Bashkisë së Durrësit, Vangjush Dako. /tvklan.al

taulant-balla.jpg
G. P.14:47 | 05/06/2019

Partia Socialiste është e gatshme për dialog me Partinë Demokratike, por kushtet e opozitës nuk do të merren në konsideratë nga ana e mazhorancës. Kështu ka thënë kreu i grupit parlamentar socialist Taulant Balla në një intervistë për Deutche Ëelle ku ka nënvizuar se pavarësisht situatës politike në vend, Shqipërisë do ti ccelen negociatat brenda këtij viti.

Ia kanë thënë edhe gjermanëve socialistët shqiptarë, gatishmërinë për të dialoguar me opozitën.

“Ne gjithmonë kemi qenë të hapur për një dialog dhe besoj që jemi të maturuar tashmë për të pasur një dialog pa qenë nevoja e miqve të huaj për të ardhur për të na ulur në tavolinë”, tha Balla.

Pa harruar të përmendin edhe kushtin që përfshijnë në ftesën e tyre.

“Kërkesa që asnjë në rast nuk mund të merren në konsideratë nga ana jonë”, tha Balla.

Në një intervistë për Deutsche Welle-n kryetari i grupit parlamentar të Partisë Socialiste, Taulant Balla, njëherazi edhe kryetar i grupit parlamentar gjermano-shqiptar ka folur edhe mbi takimet që ka zhvilluar me deputetët gjermanë .

“Nuk kam gjetur një deputet të vetëm të ccdo grupimi politik të ccdo diskutimi që të mirëkuptojë vendimin vetëasgjesues të Partisë Demokratike për t’u larguar nga parlamenti”, tha Balla.

Ndodhet në Gjermani për të lobuar me deputetët e Bundestagut që të votojnë pro çeljes së negociatave. Dhe për këtë shprehet optimist Taulant Balla.

“Unë jam shumë shpresëplotë që pozicioni zyrtar edhe i Bundestagut do të jetë i njëjtë edhe me atë të qeverisë gjermane”, tha Balla.

Deputetët e mazhorancës gjermane, e sidomos të partisë kristdemokrate CDU kanë perceptimet të ndryshme për çështjen e çeljes së negociatave shkruan Deutsche Ëellë sipas të cilës qeveria gjermane ende nuk ka dalë me një opinion zyrtar.  /ABC News Albania 24/7

si-do-te-jene-fletet-e-votimit.jpg
G. P.15:30 | 04/06/2019

Nuk janë bërë ende publike emrat e të gjithë kandidatëve për kryebashkiakë në faqen zyrtare të Komisionit Qendror të Zgjedhjeve megjithatë ky institucion ka nisur nga puna për printimin e fletëve të votimit. Në rreth 31 bashki alternative e vetme për votuesit është Partia Socialiste me aleatët e saj.

Kjo është fleta e votimit për kandidatët për kryebashkiakë. Ndërsa kjo tjetra për kandidatët për këshillat bashkiakë.

flete votimi
flete votimi 2

Modelet janë gati dhe kanë nisur të printohen për zgjedhjet e 30 Qershorit.

Nga 61 bashki gjithsej në mbi 30 fleta e votimit do të ketë vetëm një kandidat. Në të tjerat do të jetë do të jenë kandidatët e partisë Bindja Demokratike, të cilët duhet të sqarojnë numrin e saktë të Bashkive ku do të garojnë pas dorëheqjes së kandidatëve të tyre në Kavajë, Kamzë, Lezhë e Çorovodë.

Në garë përballë socialistëve në disa bashki do të jenë partitë: Shpresa për Ndryshim, Partia Konservatore Albania, MEGA, Aleanca e Maqedonasve dhe Partia Komuniste. Në faqen zyrtare të Komisionit Qendror të Zgjedhjeve mungon informacioni i saktë se ku do të garojnë këta kandidatë.

Mbi 3. 5 milionë është numri i shqiptarëve që kanë të drejtën të zgjedhin ose alternativën e vetme të Partisë Socialiste ose ndonjë nga kandidatët e partive të tjera të vogla që garojnë aty ku e shohin të mundshme se mund të marrin vota.

Kjo formë zgjedhje ndodh për herë të parë në 30 vjet demokraci, një eksperiencë e re që mazhoranca socialiste shprehet e bindur për ta testuar në 30 Qershor./ABC News Albania 24/7

kuvendi.jpg
G. P.12:18 | 03/06/2019

Socialistët ndryshojnë axhendën e parlamentit. Angazhimi i mazhorancës në fushatën elektorale ka përcaktuar edhe axhendën e parlamentit. Burime pranë selisë së Partisë Socialiste bëjnë me dije se Kuvendi do të mblidhet në datat 13 dhe 20 Qershor.

E po ashtu anëtarëve të komisioneve parlamentare i është kërkuar që të mbyllin këtë javë të gjitha diskutimet mbi projektligjet apo pika të tjera të rendit të ditës. Në datë 13 Qershor deputetët socialistë janë porositur të mos mungojnë, por pa dhënë detaje se përse seanca parlamentare e kësaj ditë është e rëndësishme.

Partia Socialiste ka nisur fushatën elektorale dhe në 30 ditët në vazhdim do të jetë në të 61 bashkitë e vendit për të kërkuar pjesëmarrjen e votuesve në zgjedhjet e 30 Qershorit./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono