proteste

protesta-1280x724.jpg
in a13:55 | 21/01/2020

Me veshje ushtarake dhe me mitralozë në krahë, manifestuan me mijëra persona në Virginia, për të protestuar kundër reformës së ligjit për armët, që synon të vështirësojë blerjen e armëve nga qytetarët.

Në protestën e cila u zhvillua pa incidente, morën pjesë grupe ekstremiste që vinin dhe nga shtete të tjera.

Sipas tyre mbajtja e një arme ka të bëjë me të drejtën që u ka dhënë Zoti për t’u vetëmbrojtur.

Iniciativës në Virginia nuk i mungoi as mbështetja e presidentit amerikan Donald Trump i cili përfitoi nga rasti për të kritikuar demokratët të cilët e mbështesin këtë reformë.

Kjo e fundit parashikon ndalimin e blerjes të më shumë se një pistolete në muaj, i lejon administratës vendore që të ndalojë armët në parqe dhe ndërtesa publike si dhe vendos kontrolle të detyruara për blerjen e armëve të zjarrit.

Masat e reja u propozuan pas të shtënave me armë në maj të vitit të kaluar në plazhin e Virginia ku një nënpunës shteti vrau 12 persona në një zyrë publike.

Të enjten e kaluar ne bregun lindor të vendit u arrestuan tre anëtarë të një grupi neonazist i njohur si “Baza” të cilët kishin planifikuar të ishin pjesë e manifestimit./abcnews.al

moske-1280x794.jpg
in a09:56 | 20/01/2020

Qindra rusë marshuan në Moskë në një tubim që shënoi 11 vjetorin e vrasjes së avokatit për të drejtat e njeriut, Stanislav Markelov dhe gazetares investigative, Anastasia Baburova në vitin 2009.

Avokati 34 vjeçar dhe gazetarja 25 vjeçare u vranë me armë zjarri në mes të ditës. Policia mbajti nën mbikëqyrje tubimin, i cili udhëhiqej nga një grup personash që krahas fotografive të avokatit dhe gazetares së vrarë, mbanin edhe kopje të Kushtetutës ruse.

Stanislav Markelov dhe Anastasia Baburova kishte mbrojtur e raportuar rreth vështirësive që hasnin viktimat e ekstremistëve të krahut të djathtë nacionalist. Kritikët e kanë cilësuar vrasjen e tyre si një nga aktet më të errëta të epokës së Vladimir Putin.

Ndërkohë disa nga protestuesit në marshimin e djeshëm mbanin pankarta që bënin thirrje për liri më të madhe në shoqërinë ruse./abcnews.al

protesta-ivanovic-serbi.jpg
nev ila15:59 | 19/01/2020

Ky është nipi i Olliver Ivanoviç. Aleksandër bashkë me familjen janë nisur për tu bashkuar me një marsh, në ndërim të xhaxhait të tij të ndjerë.

Këtë marsh-protestë e drejtojnë ata që bëjnë protesta kundër pushtetit. Familja e Ivanoviç nuk komenton qëndrimet e individëve, as në Kosovë, e as në Serbi.

Në emër të tyre Alleksandar flet duke treguar se si ndjehet familja, një pjesë e ndarë në ngjarjet ku merr pjesë pushteti, një në ato qytetare.

“Është një periudhë e vështirë për ne, dy vjet dhe hetimet ende qëndrojnë në një vend. Kemi parë vetëm një betejë në mes të Prishtinës dhe Beogradit. Prishtina tenton të tregoj që vrasja është kryer nga serbët, Beogradi të tregoj që Oliver u vra nga shqiptarët. Kjo është vetëm hedhje e përgjegjësisë. Ajo që familjes nuk i intereson, është se çfarë feje apo ngjyre ka ky person, por të dalë para drejtësisë. Më e rëndësishme se kjo, është se kush ka dhënë urdhër, dhe për interesa të kujt është vrarë”, thotë Aleksandër Ivanoviç.

Në këtë marsh kanë marrë pjesë edhe djemtë e politikanit të ndjerë. Alleksandar thotë se Olliver nuk ka patur armiq në jetë, por është vrarë për shkak të qëndrimeve të tij. Zbardhja e rastit është e rëndësishme edhe për shqiptarët dhe për serbët.

“Oliver nuk ka qenë agresiv. Në paqe dhe mënyrë civilizuese, ka dhënë qëndrimet e tij, dhe për këtë është vrarë. Është me rëndësi që të gjendet kush e ka bërë, dhe ky mund të jetë një hap drejt paqes në Kosovë, pasi prej 20 vjetësh kjo nuk po ndodh”.

Një vrasje që megjithatë nuk mendohej se ishte me motive etnike. Ishte krijuar ideja që ky rast do të zgjidhej shumë më shpejt. Por, tani kanë kaluar dy vite dhe për motivet familja nuk ka dyshim.

 “Kjo është një vrasje absolutisht politike pasi ai është marrë vetëm me politikë. Olliver është vrarë për shkak të fjalëve të tij, qëndrimeve politike të cilat i ka mbrojtur. Ka qenë nën presion pasi ia kanë djegur zyrën, makinën, i janë futur në shtëpi. Por, besoj se me kohë kanë kuptuar që nuk mund të blihet, të frikësohet dhe që nuk e ulë kokën para kërcënimeve, dhe dhunës, dhe dikush ka vendosur ta bëjë të hesht me plumb”, thotë Ivanoviç.

Vëllai i Ivanviç dhe familjarët e tjerë ndjehen emotiv dhe thonë se e kanë të vështirë të flasin për vrasjen dhe për ngjarjet që e pasuan atë. Por, kanë dalë edhe një herë për të kërkuar drejtësi, pasi përgjigjet politike nuk kanë dhënë fakte për ndriçimin e vrasjes.

Qindra njerëz janë bashkuar në rrugën drejt tempullit të krishterë në kryeqytetin serb, dhe thonë se nuk do të ndalen duke kërkuar ata që qëlluan mbi Ivanovic, dhe ata që dhanë idenë për atentat./abcnews.al

fierzw.jpg
in a20:36 | 16/01/2020

Qindra banorë të Kukësit nuk kanë përfituar ende kompensim të tokave apo zëvendësim të tyre që pas përmbytjeve të liqenit të Fierzës. Ata kanë protestuar këtë të enjtë dhe i kanë lënë afat qeverisë që të zgjidhë këtë problem brenda muajit në të kundërt do të spostojnë protestën në Tiranë.

Banorët e disa fshatrave të Kukësit kanë protestuar në lidhje me tokat e tyre që janë përmbytur nga liqeni i Fierzës në vitin 1978 gjatë ndërtimit të hidrocentralit. Ata kërkojnë që tokat ose të kompensohen ose t’ju jepen toka në zona të tjera.

“Ne jemi të përmbytur nga Liqeni i Fierzës. Jemi pa shkollë, pa drita, pa rrugë. Çfarë të bëjmë më parë”, shprehet një prej banorëve.

Ata kanë vendosur t’i lënë qeverisë një muaj afat në të kundërt do të përshkallëzojnë protestën deri tek godina e kryeministrisë.

“Një muaj do të presim, do ti drejtohemi Kryeministrit, Ministres së Drejtësisë, Energjitikës dhe Amabsadave. Nëse nuk kemi përgjigje, populli do të mblidhet në shesh dhe kthim pas nuk ka”, tha një tjetër banor.

Madje një prej banorëve thotë se çështjen do ta dërgojnë në gjykatat ndërkombëtare.

“Do ta çojmë në Gjykatën e Strasburgut, të njihet prona”, u shpreh ai.

Pas përmbytjes së rreth 3000 hektarëve tokë dhe qindra banesave në 34 fshatra të Qarkut Kukës, vetëm 400 familje kanë përfituar kompensim në para apo janë zhvendosur në qytete të tjera ku ju është dhënë edhe tokë. Kurse pjesa tjetër që është shumica, nuk kanë përfituar asgjë./abcnews.al

Screenshot_5-2.png
R D13:53 | 16/01/2020

Një grup studentësh të Universitetit të Prishtinës protestuan kundër zvarritjes së formimit të qeverisë së re të Kosovës. Studentët vendosën mbishkrime në hyrje të Kuvendit me sloganin “boll luajtët.”

Me moton “Boll ma se jemi lodhur”, një grup studentesh të Universitetit të Prishtinës mbajtën të enjten një protestë në Prishtinë në shenjë reagimi ndaj mosformimit të qeverisë së re, pavarësisht se kanë kaluar tashmë 3 muaj që nga mbajtja e zgjedhjeve, Studentët vendosen para hyrjes së Kuvendit mbishkrimin “Boll luajtët” ndërkohë që theksuan se të rinjtë e Kosovës po largohen nga vendi për shkak se nuk poi u ofrohet një jetë e mirë në Kosovë.

Studentët thanë se po shohin degradim në një numër fushash, në arsim, politikë, zhvillim ekonomik dhe se Kosova po zbrazet. Ata përmendën ikjen e qytetarëve për në Gjermani duke thënë se ky vend ofron mundësinë për kualifikim dhe punë. Ata thanë gjithashtu se nëse nuk votohet buxheti, do të ketë trazira edhe më të mëdha dhe akuzuan politikën për lojra pushteti. Policia ishte e pranishme, por protesta përfundoi e qetë. /abcnews.al

guri.jpg
in a20:08 | 13/01/2020

10 mijë banorë të Postribës janë ngritur sërish në protestë për shkak se një firmë private në këtë zonë prej punimeve në guroren e mermerit po ju dëmton resurset. Nga punimet banorët thonë se ju është bllokuar rruga dhe se uji është ndërprerë. Jetesa sipas tyre është bërë e pamundur aq sa duan të ikin dhe nga vendi.

“Të mbrojmë natyrën se natyra është e të gjithëve”, shprehet një prej banorëve.

Eksperti Sazan Guri ka dalë në krah të banorëve dhe ka publikuar një fakt të paprecedent se si 5 persona në mënyrë fiktive kanë firmosur për lejen e ushtrimit të aktivitetit kundrejt banorëve realë.

Guri ka folur dhe për dëmet ekonomike që i shkaktohen vetë banorëve dhe shtetit nga kjo sipërmarrje.

 “Shpresojmë te qeveria që të bëjë balancën, 10 milion euro në vit që fshatari nuk i kërkon shtetit ti mbajë,  por mbajnë vetveten”, tha Guri.

Pranë tyre kanë shkuar përfaqësues të qeverisë, koordinatorja për bashkëqeverisjen dhe drejtori i minierave, që ju siguruan monitorim në terren të shqetësimeve të tyre.

 “Platforma e bashkëqeverisjes kordinoi të gjithë institucionin për ti dhënë përgjigje sa më shpejt”.

Ndërsa përfaqësuesi i kompaninsë nuk pajtohet me akuzat e banorëve.

 “Punimet tona nuk sjellin probleme sa i përket ujësjellësit, policia e shtetit shqiptar është në gjendje të kontollojë nëse kemi apo jo të drejtë”, tha ai.

Në 5 ditë banorët e Postribës kanë organizuar dy protesta dhe deri sa problemet të zgjidhen thonë se nuk do të ndalen./abcnews.al

pro.png
in a17:00 | 11/01/2020

Banorët e disa fshatrave të Postribës kanë protestuar kundër punimeve që po kryhen prej 5 muajsh nga një gurore në zonë.

Edhe pse protestat e banorëve kanë qenë të vazhdueshme, firma ka vijuar punimet. Përfaqësuesi i banorëve, Bashkim Uruçi thotë se është kërkuar ndihmë nga të gjitha institucionet, por nuk është marrë asnjë masë.

Banorët thonë se nga punimet është dëmtuar lumi i Rosekut, kanalet vaditëse si dhe është bllokuar rruga për kalim.

Gjithashtu ata thonë se nga punimet po dëmtohet edhe bimësia në zonë, kryesisht ajo medicinale./abcnews.al

mehdi-malko-teatri-1280x610.jpg
nev ila10:42 | 30/12/2019

Aleanca për teatrin ka njoftuar ditën e sotme se do të mbajë protestë përpara Bashkisë së Tiranës.

Protesta e thirrur nga aleanca ka ardhur si shkak i mosinformimit të procedurave të tenderit për ndërtimin e teatrit që sipas aleancës është shkelje e rëndë ligjore.

Aleanca për mbrojtjen e teatrit ka kërkuar informacion për projektin e miratuar nga Bashkia e Tiranës. Sipas Aleancës ata po protestojnë për të denoncuar mungesën e transparencës në lidhje me këtë tender si minimumi i detyrimit ligjor që ka Bashkia.

“Konkursi për tenderin e teatrit nuk është publikuar në faqen zyrtare të bashkisë, nuk është publikuar në faqen zyrtare të Agjencisë së Prokurimit Publik. Ligji parashikon qartë që tenderët duhet të jenë publikë duke paraqitur edhe ofertuesit dhe fituesit. Në këtë moment nuk kemi asnjë informacion se cila ka qenë procedura për zbatim të  VKM 322″, ka theksuar Ardiana Kalaja.

Aktori Mehdi Malko i cili ishte i pranishëm në këtë protestë tha:

“Në fakt unë jam si macja përballë pianos kur flitet për ligje. E kam thënë dhe e them, teatri nxori bllof të gjithë arkitektët. Tërmeti e faktoi këtë, kryetari të ndërtojë diçka për ata që vuajnë nga pasojat e tërmetit sepse teatri është aty në këmbë. Çetë partizane, balliste, zogiste, çfarë çete jemi ne? Jemi të armatosur apo jo, lufta partizane me çeta filloi. Unë ndihem mirë që jam pjesë e kësaj çete”.

Ndërsa mjeshtria e artit Justina Aliaj tha:

“Kam një gjë që bërtet në shpirtin tim, Transparenca. Nuk e di pse mbahet kur një ditë do plasë. Në këto festa duhet të jemi më kompakt, më transparentë dhe të tregojnë se kush i ka fituar ato tenderë, nuk ka nevojë të klithim, ne duam tetarin. Nëse vijnë të thonë pse nuk janë transparentë do bëjnë një punë të mirë”.

Për Neritan Licaj teatri është pronë e gjithë shqiptarëve dhe për këtë arsye kryetari i Bashkisë duhet të bëjë transparencë:

“Teatri është pronë e bashkisë dhe e gjithë kombit. Tirana është e gjithë shqiptarëve. Zotëria kryetari i bashkisë duhet të bëj transparente tenderin sepse sot erdhëm si çetë por e sigurojë që herë të tjera do vijnë regjimente”.

 Ditën e sotme me anë të një komunikate Aleanca për mbrojtjen e Teatrit njoftoi se do të protestonte përpara Bashkisë së Tiranës: 

“Komunikatë

Ushtrojmë të Drejtën tonë për t’u informuar

Të dashur aktivistë, miq e mbështetës, ka kaluar 1 muaj e gjysëm që prej skadimit të afateve për shpalljen zyrtare të fituesit të konkursit për ndërtimin e projektit famëkeq e korruptiv Fusha.
Gjatë kësaj kohe, Bashkisë Tiranë, i janë drejtuar disa kërkesa për informacion, kemi dërguar ne, kanë dërguar gazetarë me kërkesa të personalizuara dhe kërkesa me logo mediatike. Asnjë përgjigje, injorim total, çensurë, terr informativ. Institucioni që menaxhon 120 milion euro, është mbyllur në bunker, ka marrë peng funksione zyrtare, informacionin publik, asgjë nuk kalon nëpër protokolle, asnjë nuk guxon të flasë, gjendje lufte.
Ndërkohë, kryetari i bashkisë u bën karshillëk qytetarëve të të gjithë Republikës, duke u thënë publikisht, në televizor, që informacionin e kam vetëm unë, po nuk dua t’jua them.
Situata është kaq serioze sa një artikull i gazetares Fatmira Nikollit tek Gazeta Shqiptare, ku publikohej përgjigja zyrtare e zyrës së informacionit të bashkisë, në të cilën nuk kishte asnjë informacion të vlefshëm për procedurat mbi projektin, u çensurua, u hoq, është zhdukur nga qarkullimi.
Në këtë situatë, ne kemi vendosur ta marrim informacionin vetë, fizikisht, te dera e institucionit. Fshehja, terrori në institucion për të mos lejuar asnjë pëshpërime, apo të qarkullojë publikisht informacion për aferën megakorruptive të Teatrit, është vetëm një nga shkeljet e rënda të një dosjeje kriminale plot me paudhësi, që ne kemi vendosur ta depozitojmë te SPAK, me besimin se një ditë, dikush do të mbajë përgjegjësi për vepra penale në dëm të interesit publik.
Ne ju ftojmë nesër, e Hënë, 30 Dhjetor në ora 10.00, të mblidhemi dhe ta ushtrojmë këtë të drejtë. Është një e drejtë legjitime që nuk lejojmë të na shkelet.
Mblidhemi te dera e Bashkisë të marrim atë që na takon. U bëjmë thirrje mediave që të jenë të pranishëm, pasqyrimi i këtij aksioni u shërben dhe atyre dhe qarkullimit të informacionit të lirë”, ka njoftuar Aleanca./abcnews.al

 

thumanaaa.jpg
R D18:36 | 28/12/2019

Banorët e Thumanës kanë protestuar sot pasi bonusi i ofruar nga bashkia është i pamjaftueshëm për të marrë shtëpi me qira. Bëhet fjalë për banorët e dy pallateve të shembura, të cilët pas 26 nëntorit u strehuan në hotelet e Shëngjinit. Nga data 3 janar, ata janë urdhëruar të lirojnë hotelet. Pranë tyre ishte demokratja Lindita Metaliaj, e cila tha se shteti po i vret për së dyti këta qytetarë.

“Qeveria e paaftë dhe e dështuar tashmë sillet në mënyrë kriminale me qytetarët e saj! Sot përfaqësues nga Bashkia Krujë u kanë kërkuar banorëve të firmosin për të dalë nga ambientet e hotelit ku strehohen dhe të kërkojnë banesa me qera duke ju ofruar vetem 30 mijë lekë të vjetra për frymë. Kjo sjellje kriminale dëshmon edhe njëherë braktisjen e këtyre banorëve duke tentuar ti hedhin në rrugë, pa mbështetje e përkrahje nga shteti i falimentuar i propagandës dhe i hajdutërise!”, deklaroi ish-deputetja demokrate.

Ndërkohë vetë banorët shprehen të revoltuar pasi bonusi i ofruar nga bashkia e Krujës, është minimal. “Na vijnë disa nga Bashkia e Krujës… Çfarë të bëj me atë bonus, dua që të më strehojë shteti. Ku do shkojmë me aq lek, jam interesuar për shpi me qira dhe çmimi është 250 mijë lekë (të vjetra) në muaj”, thotë njëri prej banorëve.

Një tjetër banor shprehet: “Gjakun tonë e lamë brenda nën rrënoja, dhe sot po dalim në 4 rrugët. Ne do qendrojmë në grevë urie, as nuk hamë as nuk pimë derisa të vijë shteti këtu. Unë e kam punën në Tiranë në privat. Marr 9 mijë lekë në ditë, gjysma më shkon rrugë. Unë nuk e pranoj bonusin. Më ka vra termeti, po më vret edhe shteti”./abcnews.al

Lexo edhe: PROTESTA/ Refuzojnë bonusin e qirasë, banorët e Thumanës: Do futemi në grevë 

1-thumanre.jpg
ger ta13:40 | 28/12/2019

Banorët e pallateve të shembura në Thumanë kanë protestuar sot në Shëngjin. Ata refuzojnë të marrin bonuset nga bashkia pasi sipas tyre shuma prej 3 mij lekë për person është shumë e vogël.

 

Siç theksojnë banorët vlerat e qirave janë më të medha dhe ata nuk kane asnjë të ardhur. Shumë prej tyre kërkojnë që t’i strehojë qeveria.

“Erdhën me na dhënë bonus dhe na thanë gjeni shtëpi vetë, ku të mundeni. Ne nuk kemi kundësi të gjejmë shtëpi vetë. Na kanë thënë me 3 janar të ikim. Të na gjejë shteti shtëpi. Unë s’kam ku të shkoj. Kam dy pleq, vëllain invalid me tre kalamaj dhe vetë vetë i katërt. I bëjmë thirrje shtetit të na strehojë vetë. Të na strehojë jo merre bonusin dhe shko nga të duash”, thotë një prej qytetarëve.

Qytetarët të cilët refuzojnë të largohen nga hotelet paralajmërojnë se do të futen në grevë nëse nuk gjejnë zgjidhje./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono