prokuroria

valdrin-pjetri.jpg
G. P.14:26 | 20/08/2019

Valdrin Pjetri i është përgjigjur kërkesës së Prokurorisë së Përgjithshme për të dhënë shenjat e gishtave. Ato pritet të krahasohen me të dhënat që do të mbërrijnë nga Italia, për të verifikuar një dënim të dhënë ndaj tij në vendin fqinj në 2003 dhe që nuk është deklaruar prej tij.

Kryetari i zgjedhur i Bashkisë Shkodër, që nuk pranoi të marrë detyrën Valdrin Pjetri ka dhënë shenjat e gishtave, pas kërkesës së bërë nga Prokuroria e Përgjithshme, në funksion të hetimit të nisur ndaj tij për shkelje të ligjit të dekriminalizimit. Lajmi konfirmohet nga burime zyrtare te institucionit të akuzës. Pas marrjes së gjurmëve daktiloskopike të Pjetrit pritet të bëhet krahasimi i tyre me ato që do të vijnë nga institucionet e drejtësisë në Itali.

Prokuroria e Përgjithshme ka nisur verifikimet për të kaluarën e Valdrin Pjetrit, pasi u vu në lëvizje nga një denoncim i PD-së, sipas së cilës kandidati fitues për Bashkinë e Shkodrës, kishte qenë i dënuar në Itali për trafik droge. Por këtë dënim nuk e kishte deklaruar në formularin e vetedeklarimit në KQZ, në kundërshtim me ligjin e dekriminalizmit.

Në funksion të këtij verifikimi, Prokuroria e Përgjithshme ka kërkuar informacion nga Ministria e Drejtësisë, prokuroritë e shkallëve të para dhe atyre të Apelit në Tiranë. Gjithashtu përmes letërporosive të dërguara u është kërkuar informacion institucioneve të drejtësisë në Itali, si dhe Interpolit e Europolit.

Burime nga Prokuroria e Përgjithshme konfirmojë se ky institucion është ende në pritje te përgjigjeve me të dhënat për Valdrin Pjetrin. Vetë Pjetri, pas publikimit nga PD të dokumenteve që provojnë dënimin e tij në Itali në 2003 për trafik droge, deklaroi mosmarrjen e detyrës së kryetarit të Bashkisë Shkodër.

Ai tha se do të përballet me ligjin si një qytetar i thjeshtë për të sqaruar të vërtetën e tij. Valdrin Pjetri e quajti episodin për të cilin e akuzon opozita, një ngjarje banale në kohen e adoleshencës, që nuk e përfshin atë dhe së cilës nuk i ka kushtuar asnjë rëndësi./ABC News Albania 24/7

prokue-1280x719.jpg
Sej rie16:15 | 17/08/2019

Kreu i Prokurorisë për ndjekjen e krimit të organizuar, në Maqedoninë e Veriut, Vilma Ruskoska, do të marrë në pyetje shefen në dorëheqje të Prokurorisë së Posaçme Publike, Katica Janeva. Paraqitja e kësaj të fundit pritet me interes për shkak se dëshmitë e saj do të hedhin më shumë dritë, si për rastin ‘Zhvatja’, por edhe për spekulimet se në Prokurorinë Speciale mund të jenë zhdukur shumë prova për raste shumë të ndjeshme.

Ekspertët e fushës nuk ngurojnë ta ndërlidhin këtë krizë më të re institucionale me atë që quhet gatishmëri e shtetit për të luftuar krimin e organizuar. Kjo për shkak se në regjistrimet-audio, të publikuara në gazetën italiane ‘La Verita’, rezulton pa pikë dyshimi se në skandalin ‘Zhvatja’ është e implikuar edhe prokurorja speciale publike Katica Janeva nga e cila pritej që ta zhbllokojë shtetin e kapur prej vitesh.

Të martën, kjo zonjë, që ndërkohë humbi epitetin ‘e çelikt’, do të dëshmojë në Prokurorinë e Shkupit dhe deponimet e saj do t’u japin përgjigje shumë pyetjeve, temave e dilemave, të shtruara e të hapura pas skandalit më të fundit. Kjo për shkak se ‘Zhvatja’ rezulton të na dalë një aferë shumëdimensionale, sikundër u shpreh presidenti Pendarovski në paraqitjen e fundit publike të tij. Të rikujtojmë: Javëve të shkuara ka pasur lajme për kompjuterë, për telefona të fshirë, jo dikur tjetër, por pikërisht në Prokurorinë Speciale Publike.

Burime të Televizionit Klan thonë se zbardhja e së vërtetës mund të përshkallëzojë edhe më këtë krizë ngaqë në ‘trezorët’ e saj kanë qenë ose ka qenë dashur të jenë ‘bombat’ politike të dorëzuara nga opozita e para tre vjetëve, Lidhja Socialdemokrate, sot në pushtet, e kryeministrit Zoran Zaev.

Risetimi i kompjuterëve nënkupton edhe zhdukjen e provave për rastet për të cilat Kryeministri me shokë rrihte gjoksin se ka për t’i zbardhur e që kanë të bëjnë me keqqeverisjen e qeverisë së kaluar të Nikola Gruevskit, por edhe me rastin e incidentit të rëndë të armatosur në Lagjen e Trimave në Kumanovë apo ‘Monstrën’ – me shumë viktima në njerëz.

Prandaj është me rëndësi dëshmia e prokurores Katica Janeva që, ndër të tjera të heq dilemën e shtruar në median maqedonase dhe jo vetëm maqedonase, nëse projekti politik i quajtur Prokuroria Speciale Publike, është pasuar me ndonjë pazar, po ashtu politik, mes kreut të saj Katica Janeva, dhe shefit të ekzekutivit, Zoran Zaev.

Komuniteti ndërkombëtar euro-amerikan nuk është se, jo njëherë, nuk ka tërhequr vërejtjen që mazhoranca dhe opozita në Shkup të bëjnë punën e tyre, pa veprime e manovrime për interesa thjesht politike-partiake, por të japin kontributin e tyre për vendosjen e shtetit të së drejtës, para së gjithash, dhe për llogaridhënie e përgjegjësi, çfarëdo natyre qoftë ajo. Shi për këtë menaxhimi juridik i skandalit ‘Zhvatja’ ka për të qenë busull orientuese se nga do të shkojë Maqedonia e Veriut./ABC News Albania 24/7

valdrin-pjetri.jpg
G. P.10:40 | 16/08/2019

Në një deklaratë për mediat, Prokuroria e Përgjithshme i ka kthyer përgjigje Partisë Demokratike mbi procedurën e verifikimit të Valdrin Pjetrit. Prokuroria thotë se ka regjistruar kërkesën e PD-së më 5 Gusht dhe brenda 24 orëve ka nisur procedurën e verifikimit.

Më datë 6 Gusht, Prokuroria ka vënë nën administrim formularin e vetëdeklarimit të Valdrin Pjetrit prej KQZ-së dhe pastaj ka filluar procesin e verifikimit të plotë e të gjithanshëm brenda dhe jashtë territorit të Shqipërisë.

Po atë ditë, i është dërguar shkresa për verifikim Zyrës së Gjendjes Gjyqësore, Drejtorisë së Përgjithshme të Gjendjes Civile, Drejtorisë së Policisë së Shtetit, organeve të prokurorisë. Më datë 9 Gusht Valdrin Pjetrit i është kërkuar të depozitojë gjurmët e tij daktiloskopike pranë Institutit të Policisë Shkencore.

Për sa i përket procedurës së verifikimit jashtë territorit të Shqipërisë, Prokuroria e Përgjithshme thotë se ka dërguar pranë Drejtorisë së Bashkëpunimit dhe Koordinimit Ndërkombëtar pranë Drejtorisë së Policisë së Shtetit, si dhe pranë Ministrisë së Drejtësisë kërkesën për verifikim të mëtejshëm nga autoritetet e drejtësisë italiane, duke iu kërkuar këtyre të fundit vënia në dispozicion e çdo lloji vendimi penal të dhënë nga gjykata, vendim për masa sigurimi personale apo vendime dëbimi, në emër të Valdrin Pjetrit.

“Në vijim të kësaj procedure, më datë 14 Gusht, Prokuroria e Përgjithshme ka përcjellë pranë Ministrisë së Drejtësisë kërkesën për ndihmë juridike për subjektin Valdrin Pjetri, duke bashkëngjitur të dhënat kriminale të dënimit penal në shtetin italian, të vëna në dispozicion me shkresën tuaj nr. 121/2 prot., datë 13 gusht 2019”, thotë më tej prokuroria.

Prokuroria e Përgjithshme sqaron se do të komunikojë rezultatin e verifikimit në zbatim të afateve të parashikuara në ligjin nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”./abcnews.al

bashkia-shkoder-1280x713.jpg
nev ila15:22 | 12/08/2019

Shkodra do të jetë bastioni i fundit i demokratëve në pushtetin vendor që do të bjerë. Javën e ardhshme Voldana Ademi pritet t’i lëshojë zyrën të zgjedhurit të ri socialist, Valdrin Pjetri, ndonëse selia blu ka vendosur të mos e ndalë betejën ligjore dhe politike ndaj tij.

Bashkia e Shkodrës me gjasë do të jetë godina e fundit e pushtetit vendor që Partia do ti dorëzojë Partisë socialiste, për të nisur drejtimin absolut në 61 njësi vendore në të gjithë vendin.

Pa një vendim final, 21 gushti paralajmërohet se do të jetë data e ndërrimit të pushteteve në kryeqendrën e veriut. Por deri të mërkurën e ardhshme PD paralajmëron zhvillime të forta.

Lulzim Basha i bëri thirrje sot Prokurorisë së Përgjithshme të marrë të pandehur kandidatin e PS në Shkodër në zgjedhjet e 30 qershorit, duke e akuzuar për fshehje të formularit të dekriminalizimit.

“Valdrin Pjetri duhet të merret urgjentisht i pandehur sepse ka shkelur Ligjin e Dekriminalizimit duke fshehur të dhënat mbi të kaluarën e tij si trafikant droge. Por Edi Rama i ka dhënë urdhër prokurorisë së korruptuar që ta mbrojë nga ligji i dekriminalizimit. Por sa kohë Edi Rama është në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë”, shkruan Basha.

Rezistencën për të mos lëshuar bashkinë simbol të qeverisur gjithmonë nga të djathtët, demokratët e paraqitën edhe përmes fotove që shpërndanë në qytet. Në  një fotomontazh, Pjetri prezantohet me logon e kanabisit gjatë momentit të votimit.

Por duket se përballë akuzave të demokratëve, kandidati fitues i PS është shfaqur i qetë. Valdrin Pjetri ka publikuar në rrjetet sociale çertifikatat e pastërtisë së figurës të lëshuara nga shtetit Italian.

Kandidati socialist ka garantuar se ditë më të mira do të vijnë për Shkodrën nën drejtimin e bashkisë prej tij.

Ndërkombëtarët kanë qenë shpresa e fundit për demokratët për të ndalur rotacionin e fundit në bashkinë simbol të së djathtës. Kryebashkiakja në detyrë, Voltana Ademi disa ditë më parë për 120 minuta denoncoi te ambasadori i OSBE-së, Borchard çdo parregullsi në procesin zgjedhor dhe pastërtinë e figurës së kandidatit që kërkon të marrë drejtimin e Bashkisë./ABC News Albania 24/7

pd-selia-1280x718.jpg
ent ela10:55 | 02/08/2019

Partia Demokratike i ka kërkuar Prokurorisë së Përgjithshme të verifikojë pastërtinë e figurës së Valdrin Pjetrit kryebashkiakut të Shkodrës të dalë nga zgjedhjet e 30 qershorit.Sipas sekretarit të përgjithshëm Gazment Bardhi kjo kërkesë bëhët në kushtet kur ekzistojnë indicie dhe dëshmi publike se Valdrin Pjetri nuk mund të ushtrojë këtë funksion publik për shkak të ligjit të dekriminalizimit.

A i përmbush Vldrin Pjetri kushtet për të drejtuar Bashkinë e Shkodrës?

Përgjigjen Partia Demokratike ia ka kërkuar Prokurorisë së Përgjithshme. Institucioni i akuzës duhet të  të verifikojë pa vonesë pastërtinë e figurës së Valdrin Pjetrit, i cili u regjistruar në votime si kandidat i PS për Bashkinë e Shkodrës- shkruhen në kërkesën e firmosur nga Sekretari i Përgjithshëm i PD, Gazment Bardhi.

 “Në vitin 2001-2002, Valdrin Pjetri ka qenë i arrestuar/ndaluar në Itali (ka jetuar në Firence, Itali) dhe, më pas, ndaj tij është marrë masa e dëbimit nga autoritetet përgjegjëse italiane. Nga verifikimi i të dhënave të sistemit TIMS rezulton se shtetasi Valdrin Pjetri nga periudha 2002 – 23.03.2010 nuk ka udhëtuar në asnjë rast të vetëm në drejtim të Italisë, çka përbën një indicie për saktësinë e të dhënave të bëra publike më parë.”

Nëse këto të dhëna publike verifikohen pa vonesë nga Prokuroria, kjo do të thotë se Valdrin Pjetri nuk mund ta marrë detyrën e Kryetarit të Bashkisë së Shkodrës, as si rrjedhojë e votimeve të pavlefshme të 30 Qershorit- është pretendimi i Partisë Demokratike. /ABC News Albania 24/7

auto_adriatik-llalla1492763275.jpg
ent ela17:15 | 29/07/2019

Prokuroria për Krime të Rënda ka nisur drejt autoriteteve të Shteteve të Bashkuara të Amerikës një lëtërporosi me disa pyetje, në lidhje më hetimet që po zhillon për ish-kryeprokurorin Adriatik Llalla. Burime konfirmojë për ABCNEËS se dy pyetjet më kryesorë janë për paratë që ka  shpenzuar ish-kryeprokurori për lindjen e djalit në Amerikë, gjithashtu Prokuroria kërkon informacion në lidhje me një pagesë prej 10 mijë dollarësh, që dyshon se Llalla i ka paguar një kompanie amerikane që ta heq atë nga lista e personave të padëshiruar. Ish-kryeprokurori po zhvillon betejen e tij me drejtëin shqiptare ku akuzohet për “fshehjes se pasurisë”, “mosdeklarimin e të hollave në kufi”, “pastrim parash” dhe “shpërdorim të detyrës”. Disa javë më parë organi i akuzës ka zgjatur hetimet edhe me 3 muaj për Llalën. /ABC News Albania 24/7

SINKRON-BASHA-PAS-PYETJEVE-ABCM5T1.mpg_snapshot_00.49-1280x720.jpg
ent ela11:19 | 25/07/2019

Kreu i PD Lulzim Basha ishte në Prokurorinë për Krime të Rënda për atë që njihet si çështja Toyota Yaris. Basha ka deklaruar për mediat se ka dhënë informacione të reja në lidhje me këtë çështje.

Për rreth 1 orë e 30 minuta Kryetari i PD Lulzim Basha ka dhënë sqarime para grupit të prokurorëve belgë dhe dy prokurorëve shqiptarë për atë që njihet si çështja e Toyota Yaris. Jashtë dyerve të prokurorisë Kreu i opozitës deklaroi se ka dhënë më tepër informacione nga ato që kishte bërë publike.

Kryetari i PD vijoi akuzat për mazhorancën duke u shprehur se ata po përdorin koncesionet dhe tenderat për të pastruar paratë e drogës.

Më herët në prokurorinë për Krime të Rënda kishin mbërritur me letërporosi 3 pyetje për liderin e opozitës ku konsistonin në mënyrën sesi ai është informuar për mbërritjen në vendin tonë të 3.4 milonë eurove.  Basha u largua pa dhënë një përgjigjie.

Të martën prokurorët belgë kanë morën në pyetje 4 të pandehurit Edi dhe Klevi Lika, Alban Mollaymeri dhe Agim Çeka, të cilët ndodhen të arrestuar në vendin tonë. Ndërkohë në kërkim nga autoritetet e të dy vendeve janë kushërinjtë Alfred dhe Elvis Vladi. /ABC News Albania 24/7

 

 

 

el-chapo.jpg
G. P.14:23 | 06/07/2019

Prokuroria e Nju Jorkut kërkon sekuestrimin e 12 miliardë dollarëve pasuri të El Chapo-s. Ish- bosi i drogës është dënuar me burgim të përjetshëm, dënim që do të fillojë ta vuajë nga data 17 Korrik.

Prokuroria federale e Nju Jork kërkoi sekuestrimin e pasurisë për një vlerë prej 12.6 miliardë dollarësh të “El Chapo”, bosit meksikan  të narkotrafikut, i cili është shpallur fajtor në Shtetet e Bashkuara të Amerikës për trafik droge.

Në një do kument të dorëzuar gjykatës në Bruklin lexohet se prokurori federal Ricard Donogiu e cilëson të drejtë sekuestrimin e çdo gjëje që është përfituar si pasojë e krimeve të kryera nga i dënuari dhe që lidhen me trafikun e drogës.

Ajo e 12.6 miliardë dollarëve është një shifër e drejtë duke pasur parasysh pasurinë e përfituar nga Hoakim “El Chapo” Guzman në kohën që ishte kreu i kartelit të Sinaloas.

Llogaritja është bërë duke u mbështetur në çmimet e shitjes së drogës, sipas dëshmive, dhe shifra përfshin 11.8 miliardë dollarë nga trafiku i kokainës, 846 milionë dollarë nga shitja e marijuanës dhe 11 milionë dollar nga shitja e heroinës.

“El Chapo” bënte një jetë luksoze dhe kishte një flotë anijesh dhe avionësh. Dënimi i tij me burgim të përjetshëm do të hyjë në fuqi në 17 korrik./ABC News Albania 24/7

pp.jpg
Sej rie22:15 | 02/07/2019

Prokuroria e Përgjithshme në një njoftim për mediat ka dhënë informacion lidhur me zgjedhjet e 30 Qershorit, përsa i përket kallëzimeve penale.

Njoftimi i plotë:

Sipas informacionit që u administrua nga Prokuroritë pranë Gjykatave të Rretheve Gjyqësore dhe Prokuroria pranë Gjykatës së Shkallës së Parë për Krime të Rënda Tiranë, deri në këtë moment, rezulton se:
-Prokuroria pranë Gjykatës së Rrethit Gjyqësor Shkodër, më datë 28.06.2019, ka regjistruar kallëzimin penal nr. 1237 të ardhur nga Bashkia Shkodër, përfaqësuar nga znj. Voltana Ademi, ndaj Drejtorisë Vendore të Policisë Shkodër. Gjithashtu, Prokuroria e Rrethit Gjyqësor Shkodër ka regjistruar 5 (pesë) kallëzime penale të referuara nga Drejtoria Vendore e Policisë Shkodër në ngarkim të shtetases Voltana Ademi, si dhe 1 (një) në ngarkim të shtetasit Z. H.

-Prokuroria pranë Gjykatës së Rrethit Gjyqësor Kurbin ka regjistruar procedimin penal nr. 228, datë 01.07.2019, për veprën penale “Falsifikimi i materialit zgjedhor dhe rezultateve të zgjedhjeve”, parashikuar nga neni 326 i Kodit Penal. Ky procedim është regjistruar mbi bazën e referimit të Komisariatit të Policisë Kurbin. Sipas këtij referimi, shtetasi Edmond Piroli, kandidat për kryetar i Bashkisë Kurbin për subjektin politik Bindja Demokratike, në zgjedhjet vendore të 30 Qershorit 2019, pretendon se anëtarët e Komisionit të dy Qendrave të Votimit në fshatin Fushë-Kuqe, Kurbin kanë futur në kutitë e votimit fletë votimi dhe kanë nënshkruar në emër të votuesve, pa qenë prezent votuesit. Konkretisht, sipas kallëzuesit, në dy qendrat e votimit, në ambientin privat “Lokal i shtetasit Vasil Ulaj”, në Fushë-Kuqe, pretendohet të kenë votuar 6 shtetas, ndërkohë që në kutitë e votimit janë futur dhe gjenden rreth 60 fletë votimi në njërën kuti dhe rreth 120 fletë votimi në kutinë tjetër.

-Prokuroria pranë Gjykatës së Rrethit Gjyqësor Fier ka regjistruar materialin kallëzues nr. 1131, datë 01.07.2019, aktet e të cilit bëjnë fjalë për veprën penale “Pengimi i subjekteve zgjedhore’’, parashikuar nga neni 325 i Kodit Penal në ngarkim të shtetasve Alfred Davidhi e Klevi Berzhezha. Në materialin e referuar nga policia gjyqësore e Komisariatit të Policisë Fier, pretendohet se këta shtetas i bënin presion zgjedhësve në fshatin Topojë, Fier. Materiali është në fazë verifikimi.

-Prokuroria pranë Gjykatës së Rrethit Gjyqësor Korçë ka në fazë verifikimi deklaratën për shtyp të kryetarit të Partisë Demokratike, dega Korçë, ku përmenden regjistrime video në lidhje me parregullsi të procesit të votimit, rezultatet e të cilit do të raportohen në ditët në vijim.

-Prokuroria pranë Gjykatës së Rrethit Gjyqësor Elbasan, më datë 02.07.2019 ka regjistruar kallëzimin penal nr. 1594 të vitit 2019 për veprën penale “Votimi më shumë se një herë” parashikuar nga neni 327/a i Kodit Penal, në ngarkim të shtetasit O.O. Ky material është regjistruar mbi bazë të referimit të Komisariatit të Policisë Cërrik datë 01.07.2019.

-Prokuroria e Përgjithshme informon se, përveç informacioneve të mësipërme, prokuroritë e rretheve të tjera gjyqësore kanë informuar se, deri në këtë moment, asnjë nga subjektet politike nuk ka bërë kallëzim/denoncim penal lidhur me procesin e zgjedhjeve vendore datë 30 qershor 2019, dhe se nuk janë filluar hetime kryesisht për materialet video të publikuara në media.

prokuroria-2.jpg
nev ila00:18 | 01/07/2019

Dy persona të arrestuar dhe një procedim pa autor dhe një tjetër procedim në gjendje të lirë, është bilanci i publikuar nga Prokuroria, lidhur me shkeljet e evidentuara gjatë procesit zgjedhor të së dielës. Arrestimi i parë është bërë në Sukth të Durrësit, pasi një 53-vjeçar është futur me kallashnikov në dorë në një qendër votimi dhe ka kërcënuar komisionerët. Ramiz Bakanaçi ka thyer kutinë e votimit e ka marrë materialet zgjedhore duke i hedhur jashtë qendrës së votimit.

I arrestuari i dytë mësohet se është 66-vjecari Astrit Çuçka, i cili ka grisur fletën e votimit në mënyrë demonstrative. Më pas, sipas policisë, ai ka tentuar të marrë vulat e qendrës së votimit e të thyejë kutinë e votimit.

Gjithashtu, sipas informacionit të shpërndarë nga Prokuroria e Përgjithshme, organi i akuzës në Mat ka regjistruar 1 procedim pa autor, për veprën penale të “Shkatërrimit të pronës me eksploziv”, pasi rreth orës 00:30, në njërën nga klasat e shkollës ku ishte caktuar një qendër votimi, është hedhur një sasi e dyshuar si lëndë eksplozive.

Ndërkaq, Prokuroritë e tjera kanë njoftuar se nuk kanë regjistruar procedime penale lidhur me veprat penale që prekin zgjedhjet e lira dhe çdo shkelje që lidhen me zgjedhjet e 30 qershorit.

Gjate paradites, në Shkodër policia ka proceduar penalisht në gjendje të lirë kryetaren e Bashkisë Voltana Ademi për veprën penale “Pengim i zgjedhësit”. Në njoftimin e policisë thuhet se procedimi ka ardhur pasi Ademi, duke ushtruar funksionin si kryetare e Bashkisë Shkodër ka urdhëruar me shkrim punonjësit e kësaj Bashkie që të mbyllin disa qendra votimi në shkolla që administrohen e janë në pronësi të Bashkisë Shkodër.

Nuk ka vonuar reagimi i kryebashkiakes së Shkodrës, e cila përmes një konference për shtyp ka deklaruar se procedimi penal ndaj saj është veprim politik i Edi Ramës./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono