projekt

shpat-kolgega.jpg
G. P.21:02 | 22/08/2018

Një projektligj për të rinjtë ishte thelbi i intervistës së zëvendësministrit të Arsimit, Sportit dhe Rinisë, Shpat Kolgega, në Edicionin Veror. E zhvilluar në parkun e Butrintit, ai tregoi se bëhet fjalë për projekte që kanë të bëjnë me shkëmbime rinore, me festivale dhe organizime.

“Deri sot ka disa organizime, ka disa qendra rinore, por nuk është organizuar në mënyrë të mirëfilltë që të mbështetet  nga shteti dhe të njihet nga shteti. Kështu që kjo gjë sjell struktura të organizuara, sjell infrastrukturë dhe sjell dhe buxhet për këta të rinj”, tregoi Shpat Kolgega.

E veçanta e ligjit, sipas Kolgegës është se do të mbështeten të rinjtë që janë të talentuar me anë të bursave, financimeve apo kurseve falas. Gjithashtu do të financohet në qendrat rinore, ku do të investohet për krijimin e tyre në çdo bashki.

“Të mundohemi që papunësinë të paktën ta luftojmë nëpërmjet orientimit dhe unë besoj se një nga arsyet që kemi edhe papunësi të të rinjve sot ka të bëjë edhe me faktin e orientimit sepse ka të rinj që janë orientuar keq”, u shpreh zv/ministri i Arsimit, Sporteve dhe Rinisë.

Në një kohë që shumica e të rinjve duan të largohen nga Shqipëria, Kolgega tha se qëllimi i këtij ligji është qëndrimi i tyre në vend.

“Ky është një ligj që t’i mbajmë të rinjtë këtu. Ky është një ligj që i ndihmon të rinjtë të kenë më shumë projekte, zhvillim, më shumë financim, me më shumë infrastrukturë”, tha ai.

Gjithashtu tregoi edhe mënyrën si do funksionojë.

“Për shembull në Korçë ne kemi qendër rinore. Do kemi mundësinë që nëpërmjet këtij ligji, të rinjtë që jetojnë në Korçë, Dardhë të mblidhen dhe të aplikojnë për financime dhe fonde që të krijojnë projekte në Korçë. Pra që të bëjnë një shkëmbim rinor, një udhëtim apo festival”, tregoi Kolgega.

Sipas tij, ky projekt ka të bëjë me argitimin, edukimin e deri tek vendimmarrja e të rinjve.

“Do të jemi në 12 qarqe të Shqipërisë për të konsultuar këtë ligj. Përgatitja e draftit do të përfundojë në muajin Nëntor, ndërsa më pas do të dërgohet për miratim në Kuvend. Nuk po them që do zgjidhen të gjitha problemet, por kjo do të jetë një bazë e mirë  për të filluar një proces tjetër aktivitetesh dhe jete rinore në të gjithë Shqipërinë”, përfundoi zv/ministri i Arsimit Rinisë dhe Sporteve./abcnews.al

natooo-1.jpg
G. P.10:24 | 29/07/2018

Në një kohë kur tensionet mes Shteteve të Bashkuara dhe Iranit janë rritur që kur Donald Trump mori detyrën, administrata amerikane po punon për një projekt për të frenuar ambicjet e Republikës Islamike duke bashkuar vendet arabe në një aleancë të quajtur paraprakisht NATO-ja Arabe.

Administrata amerikane po çon përpara një projekt për krijimin e një aleance politiko-ushtarake mes 6 shteteve të Gjirit Arab, Egjiptit dhe Jordanisë për t’i bërë ballë ekspansionit të Iranit në Lindjen e Mesme. Shtëpia e Bardhë dëshiron të shohë një bashkëpunim më të thellë mes vendeve në fjalë në aspektin e përgatitjes ushtarake, armatimit, në luftën kundër terrorizmit, por edhe në përforcimin e lidhjeve diplomatike dhe ekonomisë rajonale.

Burime zyrtare të cituara nga agjencia e lajmeve “Reuters” kanë deklaruar se Uashingtoni dhe Lindja e Mesme e kanë quajtur projektin “NATO-ja Arabe”, e përbërë nga aleatë të myslimanëve sunitë. Por krijimi i saj ka gjasa që të thellojë tensionet ekzistuese mes Shteteve të Bashkuara dhe Iranit shiit.

Shpresa e administratës amerikane është që përpjekjet për atë që njihet si Aleanca Strategjike e Lindjes së Mesme mund të diskutohet në një samit të parashikuar të mbahet më 12 tetor në Uashington. Zyrtarët sauditë e ngritën idenë për një traktat sigurie pak përpara se Trump të vizitonte Arabinë Saudite vitin e kaluar, por ideja nuk gjeti mirëkuptimin e pritur.

Megjithatë, burime nga Shtëpia e Bardhë kanë deklaruar se stafi i presidentit vijon punën mbi këtë projekt prej disa muajsh; ndërsa zyrtarë të vendeve arabe kanë zgjedhur të mos bëjnë komente./abcnews.al

 

arben-ahmetajj.jpg
G. P.14:46 | 26/07/2018

Projekti “IDEA”, i cili zbatohet për të dytin vit në vendin tonë është një mundësi për sipërmarrësit e rinj që të punësohen. Kështu është shprehur ministri i Financave dhe Ekonomisë, Arben Ahmetaj, gjatë  prezantimit të këtij projekti ku nënvizoi rëndësinë që ka fuqizimi i bizneseve të vogla e të mesme.

Një ide sot është e barabartë me punësim. Vlerësimi është bërë nga program me të njëjtin emër IDEA që është lançuar edhe nga ministri i Financave dhe Ekonomisë, Arben Ahmetaj.

“Projek “IDEA” është një projekt që u mundësohet të rinjve nga mosha 19 vjeç deri në moshën 34 vjeç. Ky program shkon në thelb të objektivit të qeverisë për të promovuar këta të rinj”.

Mbështetje do të thote fonde dhe dije, tha kreu i ministrisë së Financave dhe Ekonomisë, duke vlerësuar së duhen fuqizuar ndërmarrjet e vogla e të mesme.

“Për statistikë dhe jo vetëm, ndërmarrjet e vogla dhe të mesme, zenë 99% të ndërmarrjeve aktive në Shqipëri”.

Por qeveria gjermane nuk e ka kursyer ndihmën financiare gjatë gjithë këtyre vite, sipas ministrit Ahmetaj.

“Për gjatë këtyre 30 viteve Gjermania e ka mbështetur Shqipërinë me më shumë se 1 milardë euro në mënyrë direkte dhe po kaq në mënyrë indirekte”.

Projekti IDEA është iniciativë e “GIZ”, ku janë bërë trajnime në 4 qarqet kryesore të vendit Tiranë, Shkodër, Gjirokastër, Korçë.Në të morën pjesë rreth 100 biznese start-up, mbi mënyrën si të hartojnë dhe realizojnë një plan biznesi.

Në fazën finale të projektit, finalistët prezantuan planet e tyre të biznesit para një jurie eksperte të fushës të cilët shpallën edhe 5 fituesit e ideve më të mira./abcnews.al

27295723057_5f118fbd25_k-1280x854.jpg
G. P.14:02 | 12/06/2018

Palestra e shkollës “Qemal Stafa” në Tiranë hap dyert për fëmijët dhe të rinjtë e njësisë administrative numër 10. Kryetari i bashkisë, Erion Veliaj, iu bashkua nxënësve të shkollës dhe nxiti prindërit të dërgojnë fëmijët në kurset sportive.

Pasditeve, pas orarit të mësimit, të rinjtë dhe fëmijët e njësise administrative numër 10 në Tiranë mund të stërviten dhe luajnë në palestrën e rikonstruktuar të gjimnazit “Qemal Stafa”. Kjo është shkolla e katërt që i bashkohet nismës për t’i mbajtur dyert hapur për banorët e zonës.

“Kjo ka qenë një ndër shkollat e para që kemi rikonstruktuar dhe më vinte keq që gjithë kjo godinë e bukur duhej të mbyllej në orën 14.00. Këto dy vjet kemi menduar se si të gjenim një mënyrë që shkolla të hapej, jo si një shtëpi pa zot, por sipas një sistemi, për mirëmbajtje dhe kujdes. Ndaj, më vjen mirë që kemi gjetur këtë formulë fantastike midis bashkisë, drejtorisë dhe shoqatave sportive, për t’i shfrytëzuar këto mjedise jashtë orarit të mësimit”.

Veliaj theksoi se hapja e palestrave synon të nxisë fëmijët dhe të rinjtë të merren me sport.

“Jo të gjithë do të bëhen kampionë, por ky nuk është thelbi i këtij projekti. Sigurisht, është mirë të zbulojmë talente, por ama nuk është qëllimi i projektit. Qëllimi është që edhe ata që nuk do të bëhen basketbollistë elitarë, të kenë mundësi të luajnë në skuadër, të mësojnë çfarë është humbja, çfarë është fitorja. Arsyeja pse e them këtë është se loja më e rëndësishme nuk është kjo këtu, në këtë fushë, loja më e rëndësishme është tek ajo fusha aty jashtë, në fushën e jetës, mënyra sesi e trajtojmë njëri-tjetrin në këtë qytet, se si ndajmë hapësirën me njëri-tjetrin, si ndihmojmë ata që janë në nevojë, si respektojmë skuadrën”.

Kryebashkiaku veçoi si një mundësi të artë për të rinjtë e kësaj njësie faktin se në këtë palestër do të shërbejnë si trajnerë disa nga kampionët sportivë të vendit.

Prej disa javësh, Bashkia e Tiranës ka nisur projektin për të hapur të gjitha palestrat dhe mjediset sportive të shkollave të kryeqytetit për të rinjtë që duan të merren me sport./abcnews.al

projekte-1280x703.jpg
G. P.18:02 | 24/05/2018

Një dië pasi Zëri i Amerikës transmetoi një kronikë me banorë të fshatrave, ku po ndërtohen inceneratorët  për plehrat kryeministri Edi Rama ka reaguar në rrjetin social Facebook.

“Një fakt shembullor kundër hirit të syve”, e titullon kryeministri postimin, të cilit i ka bashkangjitur një video të projektit që po realizohet për mbetjet në Sharrë.

“Duke ju garantuar se kështu do ta zhbëjmë mallkimin e plehrave jo vetëm në Tiranë, Elbasan e Fier, po edhe së shpejti në Durrës e më tej në gjithë Shqipërinë, ju ftoj të gjithëve të mos dëgjoni zhurmën e kënetave politike e mediatike, ku gëlojnë njëmijë e një të zezat kundër këtyre projekteve kaq të dobishme për mjedisin e shëndetin, po thjesht t’u besoni syve tuaj dhe fakteve kokëforta të dobisë së jashtëzakonshme të këtyre nismave, për Shqipërinë e pastër Europiane që duam për fëmijët tanë”, shkruan kryeministri./abcnews.al

xhafaj.jpg
G. P.13:10 | 16/04/2018

Gjatë një takimi me qytetarë të Elbasanit për sigurinë publike, ministri i Brendshëm, Fatmir Xhafaj, ka deklaruar se në Elbasan operojnë 3 grupe kriminale. Ministri ishte i drejtpërdrejtë, kur u shpreh se Policia e Shtetit do t’ua nxijë jetën kriminelëve në Elbasan, por edhe në të gjithë vendin.  

Fatmir Xhafaj: “Ne kemi këtu dy-tre grupe kriminale, të cilat i njohim shumë mirë. Po punojmë për to. Secila prej tyre duhet të jetë e qartë që policia do t’ua nxijë jetën në mënyrë që veprimtaria e tyre kriminale të mund të përballet me drejtësinë”.

Duke folur në këtë takim me qytetarët elbasanas, ministri i Brendshëm shtoi se, gjatë katër muajve të fundit janë goditur nëpërmjet “Forcës së Ligjit” 7 grupe të struktuara kriminale, dhe janë prangosur 100 anëtarë të tyre.

 Fatmir Xhafaj: “Brenda pak muajve ne kemi arritur të skedojmë të gjitha grupet kriminale që veprojnë në Shqipëri apo e ushtrojnë veprimtarinë e tyre jashtë vendit në bashkëpunim edhe me grupe të tjera kriminale. Në bashkëpunim me Prokurorinë, rretheve gjyqësore apo dhe Prokurorisë së Krimeve të rënda kemi mundur të godasim një pjesë të madhe të këtyre rasteve kriminale”.

Ministri pranoi se edhe në radhët e Policisë së Shtetit ka policë që nuk e meritojnë të shërbejnë nën uniformë. Por Xhafaj garantoi se Vettingu që ka nisur në strukturat e policisë do t’i largojë këta efektivë nga sistemi.

 Fatmir Xhafaj: Ne morëm një proces të tillë, që është vettingu në radhët e policisë, i ngjashëm me atë të gjyqtarëve dhe prokurorëve dhe që është duke dhënë frytet e para dhe që është duke prodhuar drejtësinë që kjo mazhorancë është fokusuar fort”.

Sipas ministrit të Brendshëm, policia është para disa sfidave, ku proritet mbetet forcimi i policisë në komunitet./abcnews.al

GJERMANIA-DHE-FRANCA-1280x720.jpg
ent ela21:45 | 06/04/2018

Gjermania dhe Franca do t’i japin jetë këtë muaj një programi të ri për zëvendësimin e flotës së vjetëruar ajrore që përdoret për mbikëqyrjen e ujërave territoriale. Nisma, e paralajmëruar edhe më herët, vjen në një kohë kur në Europë është rritur shqetësimi nga patrullimet pa leje të nëndetëseve ruse. Ministrja gjermane e Mbrojtjes, Ursula von der Lejen dhe homologia franceze Florens Parli pritet të nënshkruajnë marrrëveshjen për “Sistemin ajror të mbikëqyrjes detare” më 27 prill, kur hap dyert panairi i mjeteve ajrore në Berlin. Dy vendet ranë dakord vitin e kaluar për gjetjen e një zgjidhjeje europiane për zëvendësimin e flotës së avionëve mbikëqyrës të sipërfaqeve detare. Projekti, që synon të formalizojë planet e vendeve lider të BE-së, i hap rrugë edhe harmonizimit të ushtrive mes dy vendeve. Në fakt, nisma është pjesë e një programi më të gjerë franko-gjerman për të rritur bashkëpunimin në fushën e mbrojtjes, që mes të tjerash parashikon prodhimin e një modeli të ri avionësh. Aktualisht Gjermania përdor modelin “P-3C Orion”, të prodhuar nga amerikania “LOKHID MARTIN” për të patrulluar ujërat oqeanike për nëndetëse dhe kërcënime të tjera; ndërsa Franca përdor “Atlantik 2”, i prodhuar nga “DASAULT AVIEJSHËN” në vitet ‘80. /abcnews.al

edi-rama-2-1280x728.jpg
G. P.17:44 | 12/03/2018

Pasditen e kësaj të hëne, Kryeministri, Edi Rama, ka prezantuar projektin për ndërtimin e Teatrit të ri Kombëtar.

Sipas kryeministrit, teatri do të jetë trefishi i këtij që është sot dhe do të përbëhet me një infrastrukurë që sot nuk ekziston.

“Jemi në kushtet, ku nuk kemi thjesht një teatër të ri, por do të jetë trefishi i këtij që do jetë sot dhe do të ketë një sistem të tërë infrastrukture përreth që sot nuk ekziston. Do të ketë hapësirën e yjeve, të shuar dhe të pashuar të historisë së Teatrit Kombëtar”, u shpreh Rama.

Kryeministri sqaroi dhe njëherë kundërshtuesit e projektit të ri të Teatrit Kombëtar, disa prej të cilëve ndodheshin në sallë.

“Godina do shëmbet dhe mbi gërmadhat e të shkuarës do ngrihet godina e re e Teatrit Kombëtar”, tha ai.

“Teatri është pjesë e një propozimi Partneritet Publik-Privat. Shteti dhe shqiptarët do përfitojnë ndërtimin e teatrit me një buxhet që Shqipëria nuk e bënte dot gati për 15 vjet bashku. Natyrisht sipërmarrësi nuk do vijë të bëjë teatrin dhe të shkojë në falimentim. Në pjesën tjetër do bëjë investim, që do jetë pjesë integrale e zhvillimit të qytetit”, u shpreh më tej Kryeministri, Edi Rama.

olsi-rama-1280x654.jpg
G. P.22:41 | 06/03/2018

Pas largimit nga pozicioni i trajnerit, Sulejman Starova pritet të mos ketë më asnjë rol në klubin e Partizanit. Largimi i tij besohet se është vendim i drejtorit sportiv të Partizanit, Olsi Rama. Ky i fundit duket se po mendon edhe për pasuesin e Starovës dhe në vemendje mësohet se ka një trajnier kroat.

Mund të quhet edhe projekti i Olsi Ramës.
Partizani tashmë duket se do të jetë produkt, përveç i parave të presidentit Demi edhe i ideve të drejtorit të ri sportive.
Largimi i trajnerit Sulejman Starova, që pritet të mos ketë më asnjë rol në klub, besohet se është vendim pikërisht i Ramës, i cili po mendon edhe për zëvendësuesin.
Partizani, sipas burimeve brenda tij, po bisedon me një trajner kroat, të cilit nuk i jepet emri, dhe për të cilin thuhet se ende nuk është bindur plotësisht për të pranuar kërkesën e klubit shqiptar.
Thuhet vetëm se është njeri me karrierë të rëndësishme, ndonëse përvoja ka treguar se të huajt në Shqipëri nuk kanë pasur sukses.
Vetë trajneri i sotëm i Kroacisë, Zllatko Daliç, ka qenë në stolin e Dinamos së Tiranës, nga ku u shkarkua për mungesë rezultatesh.
Gjithsesi, duket se Partizani do ta provojë edhe një herë.
Përse u largua Starova?
Me shumë gjasë, Ramës nuk i kanë pëlqyer konfliktet e shpeshta të tij me lojtarët, siç ndodhi së fundmi me Trashin.
Drejtori sportiv u shpreh hapur se sjellja e trajnerit në Vlorë ishte e papranueshme, kur sulmoi fizikisht gjyqtarin Jorgji, dhe klubi si ndëshkim nuk pagoi gjobën për dënimin e dhënë ndaj tij prej Federatës.
Po ashtu, mendohet se paraqitja e skuadrës në ndeshjen e fundit në Durrës nuk ishte aspak e mirë, jo thjesht për rezultatin 1-1, por për mënyrën e lojës, tepër mbrojtëse pas golit të avantazhit.
Tashmë, skuadra është në dorë të ish-zëvendësit të Starovës, Klevis Dalipit, i cili po sipas burimeve në klub, nuk kaloi mirë me ish-trajnerin.
Burimet theksojnë se Starova nuk e kishte në konsideratë ndihmësin, madje edhe i fliste keq në sy të lojtarëve.
Gjithsesi, Dalipi ka një bast me vetveten dhe me klubin, dhe nëse merr rezultate mund të konfirmohet.
Nga ana tjetër, kryeqytetasit duket se janë në konflikt me tifozët e tyre më të zjarrtë.
Tifogrupi “Ultras Guerrils” sulmuan drejtuesit në postin e tyre të fundit në rrjetet sociale, duke e quajtur sezonin një dështi, ndërsa italianët Moxhi e Preiti i quajtën plakushë të rrjedhur.
Mbetet të shihet ndërkaq se cili do të jetë projekti më i fundit tek Partizani, ai i Olsi Ramës, dhe nëse ai do të ketë sukses./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono