procesi

votat-kosove-1280x713.jpg
nev ila15:31 | 20/11/2019

Prokuroria e Shtetit në Kosovë ka ngritur akt-akuza ndaj 18 personave që kryen vepra penale gjatë ditës së zgjedhjeve në Kosovë.  Ata akuzohen për cënim të lirisë të votuesve, parandalim të ushtrimit të së drejtës për të votuar dhe cënim të fshehtësisë së votimit.

Prokuroria e shtetit në Kosovë ka ngritur 14 aktakuza ndaj 18 personave në të gjitha rajonet e Kosovës në lidhje me shkelje të ligjit gjatë procesit zgjedhor të 6 tetorit.

Zëdhënësi Ekrem Lutfiu i tha medias në ata akuzohen për cënim të përcaktimit të lirë të votuesve, parandalim të ushtrimit të së drejtës për të votuar dhe cënim të fshehtësisë së votimit.

Shumica e akt-akuzave janë ngritur në Gjakovë. Lutfiu tha se Prokuroria po heton edhe zarfat e ardhura nga Serbia, nga të cilët, disa janë marrë si provë materiale për t’u dërguar për ekzaminim më të detajuar.

Përfaqësues nga shoqëria civile kërkojnë që ata që bëjnë shkelje gjatë procesit zgjedhor të marrin dënime maksimale nga drejtësia. Betim Musliu nga Instituti i Kosovës për Drejtësi tha se politika e dënimeve jo të përshtatshme, ka ndikuar që komisionerët të vazhdojnë të manipulojnë me vota edhe në zgjedhjet e 6 tetorit.

Sipas tij deri tani asnjëherë nuk janë dënuar ata që i kanë nxitur komisionerët që të bëjnë vepra penale gjatë zgjedhjeve, qoftë liderët e partive politike apo edhe sponzorizuesit e fushatave zgjedhore të tyre.

Në zgjedhjet e parakohshme parlamentare të vitit 2017 Prokuroria e Shtetit kishte ngritur gjithsej 23 kallëzime penale për keqpërdorim në zgjedhje ku u përfshinë 27 persona./abcnews.al

kqz-votat-1280x719.jpg
nev ila10:59 | 09/10/2019

Një votë në 20 ka rezultuar e pavlefshme në zgjedhjet e së dielës në Kosovë. Komisioni Qendror i Zgjedhjeve pas numërimit të 100 për qind të votave, ka deklaruar se mijëra vota janë shpallur të pavlefshme dhe më shumë se 40 mijë fletëvotime janë shpërdoruar.

Komisioni Qendror i Zgjedhjeve në Kosovë, konfirmoi se janë numëruar 100 për qind e votave, dhe në faqen zyrtare bëhet e ditur se ka përfunduar numërimi i të gjitha votave.

Dhjetëra mijëra vota janë shpallur të pavlefshme në zgjedhjet e 6 tetorit. Mbi 40 mijë fletëvotime kanë shkuar dëm, që do të thotë një votues në 20. Lëvizja Vetëvendosje ka dalë fituese 202.968 vota ose 25.48 për qind, ndërsa koalicioni NISMA-AKR-PD nuk e ka kaluar pragun.

Koalicioni AAK-PSD renditet në vend të katërt më 11.57 për qind, pasuar nga Lista Serbe me 6.61 për qind. Ndërkaq, gjatë ditëve në vijim KQZ do të numërojë edhe votat e diasporës, nga të cilat mund të pritet ndonjë ndryshim i lehtë në përqindjen e partive./ABC News Albania 24/7

 

 

 

 

 

romina-kuko.jpg
ad min12:40 | 03/10/2019

Policimi vullnetar është nisma e re e qeverisë. Këtë të enjte, zv/ministrja e Brendshme, Romina Kuko, gjatë një konference për mediat bëri publike të tjera detaje rreth funksionimit të policisë vullnetare.

Ajo tha se personat që do të jenë pjesë e kësaj policie nuk do të paguhen, pasi është e bazuar në vullnetarizëm. Për sa i përket pjesës së përzgjedhjes, Kuko tha se personat do të trajnohen dhe në fund do të certifikohen.

Gjithashtu ata do të jenë të pajisur me një unifomë e cila ka shenjat e saj dalluese.

“Lidhur me pjesën e pagesës së tyre e thotë vetë fjala  është policia vullnetari dhe është i bazuar tërësisht në vullnetarizëm. Pra është një shërbim që kryet pa pagesë. Është një shërbim që kryhet nga qytetarët që duan të angazhohen në shtimin e sigurisë sidomos në komunitetet dhe në lagjet ku ata banojnë. Lidhur me pjesën e përzgjedhjes, me trajnimin e tyre, do të ketë… ne kemi miratar kuadrin e përgjithshëm për organizmin dhe funksionimin e policisë vullnetare. Hapi i dytë do të jetë një akt që do jetë urdhër i Drejtorit të Përgjithshëm, i cili do të përcaktojë të gjitha detajet, duke filluar nga momenti i aplikimit, tek momenti i trajnimit, momenti i certifikimit dhe pastaj deri tek momenti i angazhimit të tyre”, tha Kuko.

Por si është menduar procesi i aplikimit?

“Secili person dhe individ që do dojë të aplikojë për t’u bërë polic vullnetar do duhet të japë një kërkesë tek drejtoria vendore e policisë e vendit ku banon. Specifikisht në Tiranë kemi 6 Komisariate. Më pas do të ketë një testim në Akademinë e Sigurisë  për aftësitë fizike, intelektuale, etj. deri në nivelin që kërkohet. Pasi kalohet testi i parë do të bëjnë një trajnim të specifikuar në Akademinë e Sigurisë ku do të certifikohen si policë vullnetarë. Ka një benefit, patjetër që nuk ka pagesë si shërbim, por ka një benefit sepse në fund të ditës je një person i certifikuar për të ushtruar këtë shërbim. Ne kemi projektin e oficerëve të policisë në shkolla. Ne e kemi testuar idenë e ofrimit të sigurisë në publik nga civilë. Këta persona nuk do kenë mundësi të arrestojnë të kryejnë hetime. Ajo është diçka që i përket ekskluzivisht Policisë së Shtetit”, tha Kuko./abcnews.al

anila-kapaj.jpg
ad min15:48 | 13/09/2019

Vonesat në vettingun e Policisë kanë ardhur për shkak të mungesës së bashkëpunimit të disa institucioneve shtetërore si dhe lëvizjet në detyrë të drejtuesve të policisë. Kryetarja e Komisionit të Jashtëm të Vlerësimit Ana Kapaj raportoi në komisionin e Sigurisë, ku dha detaje mbi ngecjen e këtij procesi.

Dy institucionet kushtetuese si Prokuroria e Përgjithshme dhe Shërbimi Informativ i Shtetit, janë bërë pengesë për mos nisjen në kohë të procesit të Vettingut në radhët e policisë.

Kështu u shpreh kreu i Komisionit të Jashtëm të Vlerësimit Ana Kapaj para deputetëve të Komisionit të Sigurisë, cila theksoi se, edhe institucione e tjera shtetërore nuk kanë bashkëpunuar për dorëzimin e dokumenteve në kohë.

“Nëse flasim për institucione të cilat kemi vështirësi në leximin e informacionit që na vjen, çka na ka çuar në një fazë të dytë të kërkimit të një informacioni nga këto institucione, kryesisht lidhet me institucione si SHISH”, tha Kapaj.

Një problem tjetër sipas Kapaj është edhe lëvizja nga detyra e shumë drejtuesve të policisë dhe të Gardës së Republikës, duke e futur në ngërç monitorimin e dosjeve brenda afatit kohor.

“Një nga problematikat e tjera që na janë ngritur janë ndryshimet e vazhdueshme që ndodhin në radhët e institucioneve me të cilat bashkëpunojmë. Ndodhin ndryshime të vazhdueshme në stafin e tyre. Ne kemi një fashë emrash fillestare që hyjnë në fazën e vetimit, ndërkohë që në vazhdimësi të kohës vijnë spostime të posteve pranë këtyre institucioneve”, tha Kapaj.

Dy anëtarët e nënkomisionit të Sigurisë i ngritur për të monitoruar ecurinë e Vettingut në radhët e Policisë kërkuan ndëshkimi i disa prej anëtarëve të Sekretariatit Teknik, të cilët kanë dhënë dorëheqje në mes të procesit shqyrtimit të dosjeve.

45 dosjet e para për gradën më të lartë në radhët e Policisë së Shtetit priten të paraqiten në seancën dëgjimore. Vettingu i uniformave blu do të jetë i ngjashëm me atë në drejtësi, ndërsa afati përfundimtarë për 250 dosjet është qershori i 2020./ABC News Albania 24/7

becb60de-1dd0-4d58-8ac3-a9889aa6bc92-1280x720.jpg
ent ela12:25 | 07/09/2019

15 biznesmenët e arrestuar të mërkurën për mashtrim më fatura fiktive të TVSH-së janë liruar nga gjykata. Gjyqtarja Ardjana Bera caktoi masën e sigurisë arrest në shtëpi për 9 prej të dyshuarve dhe për 6 të tjerë masën e sigurisë arrest në burg me afat 20 ditë. gjatë zhvillimit të seancës Prokuroria ndryshoi pretencës pasi dëgjoi deklarimet e personave nën hetim.

Gjykata penale e Tiranës ka vendosur që të lirojë 9 nga biznesmenët e arrestuar të cilët dyshohet se kanë krijuar një skemë mashtrimi me faturat e Tatimit të Vlerës së Shtuar. Për 6 biznesmenë gjyqtarja Ardjana Bera vendosi që të caktojë masën e sigurisë arrest me burg me afat 20 ditor.

15  biznesmenët janë aksionerë dhe pronarë të disa kompanive, që kanë përfituar shuma të mëdha parash nëpërmjet tenderave. Gjatë seancës pati debate midis personave nën hetim dhe prokurores së çështjes Elisabeta Imeraj, pasi pjesa më e madhe pretendoi se kishte kushte të vështira shëndetësore e nuk mund te qëndronin në burg.

Avokatët deklaruan para gjykatës se klientët e tyre janë viktima. Prokurorja Imeraj vendosi që të ndryshonte pretencën e saj duke kërkuar lirimin e 8 prej të arrestuarve me argumentin se duhet të provojnë deklarimet e tyre.

Imeraj lexoi në seancë edhe deklarimet e dhëna para grupit hetimor nga biznesmeni i 16 i arrestuar Drilon Bareti, administrator i kompanisë E.B,A. i cili ka treguar se si është bërë administrator i kësaj kompanie.

Në deklarimet e Baretit thoshte se me profesion është bojaxhi dhe se para 3 vitesh gjendej në kushte të vështira financiare. 31 vjeçari kishte pranuar që emri i tij të vendosej si administrator i disa magazinave që do të përdoreshin për materiale ndërtimi.

Sipas Baretit, për të regjistruar emrin në QKB ka marrë 150 mijë lekë dhe më pas për tre vite do të paguhej 30 mijë lekë në muaj. Drilon Bareti është shprehur se nuk i njihte dy personat pasi i ka takuar nëpërmjet komshiut të tij.

Sipas prokurorisë, Drejtoria e Hetimit Tatimor po kryen hetime edhe për 5 kompanitë  “BTI”, “UniService”, “EBA Ndërtim”, “Banis shpk” dhe “Aleni shpk” që dyshohet se kanë konsumuar veprën e krijimit të skemave mashtruese lidhur me tatimet.

30 milionë lekë është dëmi shkaktuar buxhetit të shtetit nga prodhimi i faturave të shitblerjes fiktive, shifër kjo e përllogaritur nga faturat që policia ka arritur të sigurojë si provë./ABC News Albania 24/7

kokainaekapurnedurres1-840x440.jpg
ad min14:56 | 29/07/2019

Gjykata për Krime të Rënda ka shtyrë gjyqin e themelit për tre të pandehurit Arbër Çekaj, Armando Pezaku dhe Donaldo Lushaj. Për 613 kilogramë kokainë të kapura në Maminas vitin e kaluar pritet që Gjykata për Krime të Rënda të shprehet në Shtator nëse kjo çështje do kalojë për gjykim apo do të pushohen hetimet.

Shkak për shtyrjen është bërë fakti që pranë kësaj gjykate nuk ka mbërritur letërporosia nga Gjermania me  përgjigjen e Arbër Çekajt, nëse ai dëshiron që procesi gjyqësor të zhvillohet në mungesë të tij apo do të jetë vetë i pranishëm.

Kryesuesja e seancës Danjela Shirka relatoi në sallë se pronari i kompanisë “Arbi Garden” është i paraburgosur në Gjermani, ku po zhvillon betejën ligjore për të përfituar statusin e azilantit në këtë shtet.

Gjithashtu në sallë mungonin edhe avokatët e Armando Pezakut, Ardjan Visha dhe Arben Prenga, mungesë për të cilën togat e zeza nuk ishin në dijeni. Arbër Çekaj është marrë në pyetje nga prokurorët shqiptarë në Gjermani, ku nuk ka pranuar të jap asnjë të dhënë që mund të ndihmojë organin e akuzës për të zbuluar se kush janë porositësit e sasisë më të madhe të kokainës të kapur ndonjëherë në vendin tonë./ABC News Albania 24/7

procesi-berlini.jpg
ad min11:27 | 06/07/2019

Konferenca e Ballkanit Perëndimor në Poznan, Poloni, i shtoi paratë për rajonin, por zbatimi i projekteve pengohet nga tensionet e shtuara në rajon.

Nga Konferenca e Ballkanit Perëndimor, e cila përfundoi këtë të premte në Poznan të Polonisë, nuk pritej shumë. Sinjali që shkoi në rajon mund të kuptohet si “para për pritjen”. Pritje, derisa, për shembull, Presidenti francez Emmanuel Macron të ndryshojë qëndrimin e tij mbi zgjerimin e BE-së dhe të japë dritën e gjelbër për fillimin e negociatave me Maqedoninë e Veriut dhe Shqipërinë. Ose derisa ai të japë miratimin e tij për liberalizimin e vizave për qytetarët e Kosovës. Këto dy premtime të bëra prej kohësh, BE-ja deri tani nuk mund t’i përmbushë për shkak të mosmarrëveshjeve të brendshme.

Këtë boshllëk duhet ta plotësojë Procesi i Berlinit, iniciativa e përbashkët e disa vendeve të BE-së, gjashtë vendeve të Ballkanit Perëndimor dhe Komisionit Evropian. Me fonde dhe samite,  që mbahen çdo vit – si Samiti i Poznańit. Tetë projekte të reja infrastrukturore u miratuan në këtë samit, afro  700 milionë euro ka vënë në dispozicion BE për to, 180 milionë syresh grante, pjesa tjetër ne formë kredish:. “Prej tyre përfitojnë njerëzit në rajon”, tha kancelarja gjermane Angela Merkel në fund të samitit.

Përfituesi kryesor është Maqedonia  e Veriut

Tre prej këtyre projekteve do të shkojnë direkt në Maqedoninë e Veriut, e cila ka dhjetë vjet që është në pritje të çeljes së negociatave për anëtarësim dhe që tashmë konsiderohet si “shembull i ndritshëm” për të gjithë rajonin për arritjen e Marrëveshjes së Prespës me Greqinë. .”Unë nuk njoh askënd në BE që nuk është plot admirim për atë që kanë bërë Greqia dhe Maqedonia e Veriut,” tha kancelarja gjermane, Angela Merkel, themeluesja dhe figura drejtuese e iniciativës për Ballkanin Perëndimor.

Maqedonisë së Veriut i jepet edhe një përgjegjësi e re në kuadër të Procesit të Berlinit: Së bashku me Bullgarinë ajo do të marrë përsipër kryesinë e radhës së Procesit të Berlinit.  “Është një nder i madh për ne, si vend kandidat që tani, së bashku me një vend anëtar të BE-së do të  koordinojmë projekte kaq komplekse”, tha Kryeministri maqedonas Zoran Zaev para gazetarëve.

Tensione të shtuara 

Koordinimi i projekteve në Ballkan nuk është detyrë e lehtë:. Në veçanti, konflikti midis Serbisë dhe Kosovës e vështirëson gjithmonë e më shumë zbatimin e projekteve. As në këtë drejtim Samiti i Poznanit nuk mundi të jepte ndonjë sinjal të ri.

Kryeministrat e dy Serbisë dhe Kosovës sollën në Poznan vetëm akuza për njëri-tjetrin. Kështu, kryeministrja e Serbisë, Ana Brnbabic, raportoi se, për shkak të tarifave doganore prej 100 për qind, të vendosura nga qeveria e Kosovës për mallrat nga Serbia dhe Bosnja-Hercegovina, “ky është viti i parë që tregtia mes dy vendeve ka shënuar rënie “. “Kjo  ka dëmtuar edhe besimin e përgjithshëm midis vendeve të rajonit”, tha Brnabiç. Kryeministri i Kosovës, Ramush Haradinaj, e ritheksoi edhe njëherë qëndrimin tashmë të njohur të qeverisë kosovare për tarifat: “Ato do të hiqen, vetëm kur  Serbia të njohë Kosovën”.

Më pak histori suksesi

Së paku për një gjë ranë dakord vendet e Ballkanit Perëndimor në këtë samit: njohja e diplomave universitare. Por ato nuk arritën të binin dakord për njohjen e kualifikimeve profesionale. Marrëveshje të ndër-rajonale të këtij lloji, Procesi i Berlinit ka krijuar mjaft.  Për shembull, krijimin e një Zone të përbashkët ekonomike ose një platforme biznesi. Por në zbatimin e tyre ato  ndeshin në kufijtë e diktuara prej politikës. “Marrëveshja më e mirë nuk vlen, kur për shembull, një qytetar i Kosovës ende ka nevojë për një vizë për të hyrë në Bosnje-Hercegovinë. Ose nëse një shofer kamioni humb me orë të tëra me zhdoganime, vetëm se mungon vullneti politik për të bashkuar pikat doganore, ” tha për Deutsche Welle-n sekretarja e Këshillit për Bashkëpunim Rajonal, Majlinda Bregu.

“Një histori sukses, siç ishte ulja e tarifave roaming nga 1 korriku, tregojnë se kompromiset janë të mundshme”, tha Bregu Por ajo pret më shumë histori suksesi të këtij lloji, “përndryshe nuk do të mund ta mbajmë dot ndezur dritën e perspektivës evropiane”./DW

blerina-gjyameti.jpg
ad min17:02 | 28/06/2019

“Fenomeni i shitblerjes në Shqipëri nuk është një fenomen as që ka lindur me PS në pushtet, aq që është shumëfishuar me PS në pushtet”.

Kështu deklaroi këtë të premte deputetja e Partisë Socialiste, Blerina Gjylameti. Ajo ishte e ftuar studion e ABC News dhe tha se rezultati në Dibër krahasuar me vitin 2016 dhe 2017 ka ardhur në rritje.

Blerina Gjylameti: Nuk kam qenë drejtuese, kam qenë pjesë e shtabit si sekretare e koordinimit elektoral. Unë e kam në përshkrimin e punës time që të jem kudo për sa i përket ngritjes së strukturave të koordinimit elektoral në Shqipëri dhe po ashtu kam qenë në Dibër gjatë gjithë kohës. Mjafton të shikojmë rezultatin në Dibër të 2016-s dhe më pas të shikojmë thellimin e rezultatit të 2017-s për të kuptuar që nuk ka ndryshuar rezultati për shkak të ndonjë fenomeni tek-tuk të ndonjë shitblerje votash.

Juli Xhokaxhi: Realisht thjesht një fenomen tek-tuk ishte zonja Gjylameti?

Blerina Gjylameti: Po të shikojmë që nga njësitë administrative qytet, njësitë administrative ish-komunat e dikurshme që i janë bashkuar bashkisë së madhe Dibër, po të shikojmë rezultatin mjafton për të kuptuar që nuk është një çështje fenomeni shitblerje. Nëse kjo ka të bëjë në 2016-n po në 2017-n? Askush nga ne nuk ka qenë në Dibër, por rezultati është shtuar me 3100 vota përafërsisht./abcnews.al

moisi-habilaj-933x445.jpg
ad min18:00 | 19/06/2019

Gjykata e Katanias në Itali ka dënuar me mbi 15 vjet burg Moisi Habilaj, i konsideruar kreu i bandës që trafikonte drogë dhe armë drejt Sicilisë. Gjyqtarja e çështjes ka pranuar kërkesën e prokurorëve, që e kanë cilësuar atë një bos të mirëfilltë të narkotrafikut.

Është mbyllur të mërkurën në shkallën e parë të Gjykatës së Katanias procesi gjyqësor ndaj bandës shqiptare të Habilajve. Për gjyqtaren e çështjes së njohur si “Trëndafili i erës”, Maria Kardilo, në krye të kartelit që importonte narkotikë dhe armë nga Shqipëria në Sicili ishte Moisi Habilaj.

Sipas mediave italiane, kushëriri i ish-ministrit të Brendshëm Saimir Tahiri nuk ka qenë një trafikant i thjeshtë por një bos i mirëfilltë, arsye për të cilën është dënuar me 15 vjet, 5 muaj dhe 10 ditë burg. Dënimi është tre vjet më pak nga sa është kërkuar nga prokuroria e Katanias e përfaqësuar nga prokurori Andrea Bonomo.

Sipas mediave italiane, Habilaj e ka dëgjuar dënimin në heshtje, brenda një prej qelive të katit të parë të gjykatës. Për avokatët e tij, Xhuzepe Ragaco dhe Maria Kaltabiano, Moisi Habilaj ka patur rolin e thjeshtë të “vektorit”, motiv për të cilin kishin kërkuar shfajësimin e tij nga akuza e trafikut në rrethana të rënda, në cilësinë e kreut të organizatës. Ndërkohë, akuza që u rrëzua ishte ajo për sasinë e madhe.

Bashkë me Habilaj është dënuar edhe Nazer Seiti, i konsideruar si arkëtari i organizatës, me 7 vjet, 4 muaj dhe 26 ditë burg. Kushëriri i Tahirit, siç preferojnë ta etiketojnë mediat italiane, në muajt e fundit kishte pranuar pjesërisht përgjegjësinë e tij, duke vendosur t’u përgjigjej pyetjeve të prokurorëve italianë dhe atyre shqiptarë.

Në përfundim të procesit janë dënuar gjithashtu Meridian Sulaj me 8 vjet dhe 4 muaj, si dhe shtetasit italiane Antonio Riela, Anxhelo Busaka dhe Vincenco Spampinato, me nga 14, 7 dhe 4 vjet burg. Mbetet ndërkohë mister se ku ka përfunduar Florian Habilaj, vëllai i Moisiut, i cili i shpëtoi operacionit të Guardia di Finanza dhe është shpallur në kërkim prej dy vjetësh. Banda e Habilajve furnizonte me lëndë narkotike të llojit kanabis tregun e drogës në Katania, ku bashkëpunonte me familje të njohura mafioze si Kapelo dhe Santapaola./ABC News Albania 24/7

LLESHAJ-POROSI-POLICEVE.mpg_snapshot_00.16-1280x720.jpg
ent ela13:10 | 09/05/2019

Në ditën e zgjedhjeve askush nuk duhet të ketë shans të prekë integritetin e këtij procesi. Kërkesën ministri i brendshëm Sandër Lleshaj ua drejton strukturave të policisë duke i këshilluar gjithashtu që të qëndrojnë jashtë palëve politike.

Edhe pse jo zyrtarisht dhe në kundërshtim me ligjin, fushata zgjedhore ka nisur. Këtë fakt e ka vënë re edhe Ministri i Brendshëm Sandër Lleshaj i cili porosit vartësit e tij të kujdesen që procesi zgjedhor të mos cënohet.

“Vendi është pothuajse i futur në fushatë, të gjitha agjencitë ligjzbatuese kanë detyra për një proces zgjedhor sikur e kërkon ligji. Zhvillimi i zgjedhjeve në prag të vendimmarrjeve së rëndësishme për vendin. Ka përpjekje për të krijuar vështirësi për zhvillimin e procesit. Të gjitha strukturat, prefektët të koordinojnë institucionet me qëllim që të ofrohen të gjitha mundësitë që qytetarët të kenë mundësi të shprehin të drejtën për të votuar“.

Përgjegjësi ka edhe policia, që duhet të krijojë mjedis të sigurt, që të realizohet kjo cdo drejtues i policisë duhet të jetë i angazhuar dhe i motivuar që procesi të zhvillohet si duhet- thotë ministri Lleshaj në takimin em anëtarët e task forcës qendrore, prefektët, drejtorët e policive vendore dhe të kufirit.

“Policia është jashtë palëve. Janë disa detyra, policia është aty për të bërë detyrën e pa përfshirë me partitë dhe diskutimin politik. Askush nuk mund të cënojë procesin, janë e drejtë e qytetarëve. Dita e zgjedhjeve, askush nuk duhet të ketë të drejtë, mundësi apo shans që të prekë integritetin e një procesi që është thelbi i demokracisë së vendit”.

Pas porosive për mbarëvajtjen e procesit zgjedhor rradhën e ka paralajmërimi për fidanët e kanabisit.

“Çdo fidan që kapet në Shqipëri deri në 15 qershor është meritë e juaja, drejtuesve të policisë, cfarë kapet pas 15 qershorit, është përgjegjësi e secilit prej jush e drejtpërdrejtë.”

Vëmendjen nuk duhet ta shkëpusin as nga lufta kundër krimit të organizuar. Lista e personave në kërkim është e gjatë, qindra thotë ministri në harkun e dy-tre dekadave.

“Lista e kalon rendin e treshifrorëve, prioritet i madh është ulja e kësaj liste, që ju e keni në dorë me emra konkretë, që kërkohet të ulet me ritëm të lartë. Puna juaj matet me emra konkretë sa zbret kjo listë”.

Dy pikat e tjera për të cilat kërkoi rezultate konkrete Ministri i Brendshëm ishin goditja e grupeve që trafikojnë emigrantët nga lindja drejt vendeve të Bashkimit Evropian dhe ndalimi i azilkërkuesve, një çështje që nëse nuk shkon në zero sipas ministrit Sandër Lleshaj, prodhon pasoja negative për integrimin e vendit. /ABC News Albania 24/7

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono