ppp

kkk-1-1280x717.jpg
ent ela16:30 | 24/02/2019

Ndryshimet në ligjin për “Partneritetin publik, privat dhe koncesionet e pakërkuara” të miratuara së fundmi në Këshillin e Ministrave, janë të pamjaftueshme dhe kanë nevojë për përmirësime thelbësore për të mbrojtur interesin publik. Është ky qëndrimi i konfederatës së industrive të Shqipërisë. Në një njoftim për shtyp Konfindustria vlerëson se politikat e PPP dhe koncesioneve të pakërkuar kanë prodhuar pakënaqësi të mëdha te biznesi dhe qytetarët për shkatërrim konkurence, krijim monopolesh, dëme mjedisore, ka thelluar borxhin publik në mbi 82% të Prodhimit të Brendshëm Bruto, ka rritur kostot financiare në shumë sektorë./abcnews.al

 

provokacija-1280x700.jpg
G. P.22:00 | 08/02/2019

Inxhinieri Xhevair Ngjeqari ishte i ftuari i radhës në emisionin “Provokacija”. Ai ka folur për Ligji i Partneritetit Publik-Privat, ku sipas tij ai është: “ligji i grabitjes së të ardhurave popullore ka nevojë urgjente të reformohet dhe ndryshohet”.

“Të ndërtosh rrugë dhe objekte ku shteti yt bëhet bashkëinvestitor në kushte jo të rregullta, jo me interes publik, këto nuk janë koncesione. Këto janë grabitje të pastra të pasurive kombëtare. Shumë banka po hezitojnë të japin paratë, financimet sepse nuk kanë besim se shteti mund t’ua shlyetj. Por nuk ka mundësi të jepien, të harxhohen 1 miliad lek për rrugën Thumanë –Rrogozhinë. Ky ligj nuk fuqizon vetëm një mbretësi por edhe një sulltan. Ky lidh i jep kepetenca të jashtëzakonshme qeverisë që të kryej çfarëdolloj partneriteti.  I bëj thirrje publikut nëprmjet emisionit të Mustafa Nanos se këto partneritete duhet t’i anulloni në mënyrë urgjente. Ligji për PPP duhet të riformatohet. Koncesionet që financohen nga shteti nuk kanë për qëllim zhvillimin e vendit”./abcnews.al

FMN-PER-PPP.mpg_snapshot_00.59-1280x720.jpg
ent ela16:08 | 29/01/2019

Fondi Monetar Ndërkombëtar ka nënvizuar edhe njëherë rrezikshmërinë për ekonominë shqiptare të kontratave me Partneritet Publik Privat. Duke përshendetur vullnetin e qeverisë për ndalimin e kësaj praktike, FMN në raportin e fundit shkruan se në buxhetin e 2019, parashikohet një listë e PPP-ve potenciale, sa 15% e prodhimit të brendshëm bruto të vendit.

Të hartuara dobët dhe me risk të lartë. Kështu i sheh fondi ndërkombëtar ndërkombëtar kontratat me partneritet publik privat. Në raportin e publikuar së fundi për Shqipërinë shprehet shqetësimi për shifrat në rritje në raport me GDP.

“Rritja e shpejtë e PPP ka shtuar edhe risqet fiskale dhe stafi propozoi hapa të mëtejshëm për të kontolluar këtë aspekt. Përveç stokut ekzistues të PPP-ve prej 31 për qind e GDP-së (që mbulon më shumë se 220 projekte përfshirë koncesionaet në energji me më shumë se 23 pikë përqindje) në buxhetin e 2019 dokumentet parashikojnë një listë të PPP-ve potenciale që arrinin në 15 për qind të GDP-së”.

Borxhi publik është i lartë, “ndërsa niveli i ulët i kursimeve të brendshme dhe mungesa e investitorëve të mëdhenj institucionalë e rrit varësinë ndaj burimeve të huaja të financimit – vëren Fondi Monetar Ndërkombëtar sipas të cilit  Rritja e varësisë nga PPP-të për projektet e infrastrukturës ka rezultuar në shtimin e detyrimeve potenciale. Rreziqet e brendshme gjithashtu përfshijnë ndikimin e thatësirës në prodhimin e energjisë, duke krijuar risqe për buxhetin.

Fondi vlerësuar pozitivisht ndryshimet në ligjin për parneritetin publik privat.

“FMN mirëpriti ndryshimet e planifikuara në legjislacionin e PPP për të rritur rolin e Ministrisë së Financave dhe Ekonomisë si një mbikqyrës për koston potenciale të PPP-ve si një hap i parë pozitiv. Do të ishte kritike që të sigurohet vlera e parave përmes një procesi ofertimi konkurrues për të gjithë projektet duke ndaluar kështu pranimin e ofertave të pakërkuar”.

Fondi Monetar Ndërkombëtar nënvizon gjithashtu rëndësinë për marrjen e masave për të mos krijuar më detyrime të prapambetura të cilat kanë arritur në 24.5 miliardë lekë (200 milionë euro) deri në shtator të vitit 2018.

Kjo shumë  që është sa 1.5 për qind e PBB, dominohet nga borxhet e qeverisë qendrore me rreth 17 miliardë lekë dhe nga borxhet e qeverisë lokale me mbi 7 miliardë lekë. /abcnews.al

 

konfindustria.jpg
G. P.13:32 | 26/01/2019

Konfindustria do të kërkojë përmirësimin në thelb të projekt ligjit për “Partneritetin Publik Privat dhe koncesionet e pakërkuara” të paraqitur së fundmi në Kuvendin e Shqipërisë. Nëpërmjet një njoftimi për shtyp Konfederata e Industrive të Shqipërisë bën me dije se ndërhyrjet e parashikuara në projekt ligj janë të paplota, të vonuara në kohë dhe sërish lënë hapsira të shumta për korrupsion dhe shpërdorim të parave publike.

Shqipëria nuk është ende gati për ndërtimin dhe zbatimin e politikave të Partneritetit Publik Privat dhe koncensionet e pakërkuara. Këtë konstatim Konfindustria e mbështet edhe në projektligjin për PPP-të.

“Lënia jashtë e Projekt Ligjit të ndalimit të Partneritetit Publik Privat dhe koncesioneve të pakërkuara të sektoreve strategjike kryesore ekonomike si energjia, portet, aeroportet, është i papranueshëm dhe zeron efektin e qellimit të këtij Projektligji”.

Shqipëria është krejtësisht e papërgatitur për ndërtimin dhe zbatimin e politikave të PPP-ve dhe si rrjedhim domosdoshmërisht duhet që për në një afat kohor deri në krijimin e mekanizmave institucionale të duhur, politikat e PPP-ve dhe koncesioneve të pakërkuara duhet të ndërpriten menjëherë dhe pa kufizim sektorësh, sugjeron Konfindustria.

Ndërhyrjet e parashikuara në projekt ligj janë të paplota, të vonuara në kohë dhe sërish lënë hapsira të shumta për subjektivizëm, korrupsion dhe shpërdorim të parave publike. Kufizimi i PPP vetëm në projektet e infrastrukturës rrugore dhe lënia hapur e mundësive për sektorët strategjikë të ekonomisë si energjia, portet, aeroportet, rrezikojnë ta kthejnë projekt ligjin vetëm në një retorikë politike pa asnjë ndikim të prekshëm”. 

Konfindustria vlerëson se është e papranueshme, që në draftin e paraqitur përsëri nuk ndalohet në mënyrë të prerë pjesëmarrja në kontrata koncesionare dhe PPP të kompanive “guackë” të regjistruar në parajsa fiskale, pavarësisht dëmit të madh ekonomik, financiar, moral të sjellë ndaj interesit publik dhe seriozitetit të vendit në afatgjatë./abcnews.al

tirane-elbasan.jpg
ent ela18:45 | 22/01/2019

Qeveria ka vendosur që të mos pranojë më oferta të pakërkuara në koncesionet për infrastrukturën rrugore. Këto kërkesa të biznesit do të lejohen vetëm në sektorët me rëndësi të veçantë, por edhe në këtë pjesë nuk do të shpërblehen me bonus të pikëve në garë. Drafti është depozituar në kuvend dhe është miratuar nga qeveria.

Qeveria ka vendosur që të tërhiqet nga ofertat e pakërkuara që propozohen nga biznesi për koncesionet në infrastrukturën rrugore.

Ndryshimet në ligjin e 2013-s për koncesionet dhe partneritetin publik-privat janë depozituar në Kuvendin e Shqipërisë dhe kanë marrë dhe miratimin e Këshillit të Ministrave.

Ky standard i ri do të zbatohet në korrik të këtij viti, por qeveria mbetet e hapur për të bërë oferta të tilla në fushën e sektorëve strategjikë si portet, aeroportet, prodhimi dhe shpërndarja e energjisë dhe gazi natyror.

Në këto fusha, ligji nuk do të shpërblejë më bizneset me bonus në garë për shkak të studimit dhe ofertës së bërë prej tyre, por do të shpallë fituesin në një garë të hapur. Në rastin kur fitues nuk do të jetë kompania që ka hartuar projektin, qeveria do t’i japë shumën e shpenzuar për atë projekt.

Një ditë më parë Ministria e Infrastrukturës dhe Energjisë u tërhoq nga firmosja e kontratës për ndërtimin me PPP të aksit Thumanë-Kashar, ndërsa deri tani në infrastrukturën rrugore janë miratuar afro 1 miliard euro projekte, ku bizneset kanë dorëzuar oferta të pakërkuara.

Kërkesën ndaj ekzektuvit për të hequr dorë nga këto oferta e ka bërë prej dy vitesh edhe Fondi Monetar Ndërkombëtar.

Drafti tashmë pret të marrë votat e parlamentarëve ndërsa qeveria ka ende në shqyrtim një ofertë të fundit atë zgjerimit të autostradës Tiranë – Durrës, rehabilitimit të rrugës së vjetër të Ndroqit dhe të ndërtimin e Kashar – Rrogozhinë. Dispozitat e ligjit të ri e lejojnë miratimin e kërkesave që janë në proces./abcnews.al

ahmetaj.jpg
G. P.15:40 | 20/11/2018

807 miliardë lekë është vlera totale e kontratave të dhëna me Partneritet Publik Privat. Shifrën e bëri publike ministri i Financave dhe Ekonomisë, Arben Ahmetaj, sipas të cilit ky bashkëpunim me privatin është më fitimprurës.

Me sytë e ministrit të Financave dhe Ekonomisë, Partneriteti Publik Privat i njohur si PPP janë një alternativë që jo vetëm shton asetet, por edhe mundëson shërbime për qytetarët. Si pjesë e diskutimit në komisionin e ekonomisë, Arben Ahmetaj tregoi me shifra kontratat që qeveria ka dhënë me PPP.

“Vlera totale e kontratave të dhëna PPP është 807 miliardë lekë nga të cilat 391 miliardë lekë janë te hidrocentraleve. Sipas Ahmetajt  262 hidrocentrale vijojnë të jenë akoma në proces ndërkohë që balanca e fryrë e PPP është pikërisht kjo që raportohet”, u shpreh Ahmetaj.

Ndërsa akuzave të opozitës i përgjigjet po me akuzë. Rruga Tiranë-Elbasan e kontraktuar në 2011, deri në këtë moment ka kaluar vlerën me 100 mln dollarë.

“U nis me një kosto 304 milionë dollarë por ka shkuar 405 milionë dollarë. Nëse verifikohen, pretendimet ekstra kapin vlerën 36 milionë dollarë, 41.6 % më shumë në raport me prokurimin publik. Aksi Qafë Thanë-Lin-Pogradec ka kërkuar sërish më shumë para”, tha Ahmetaj.

Nuk la pa përmendur as ligjin e ri të Partneriteteve Publike Private që do të ndryshojë për ofertat e pakërkuara.

“Konkretisht me anë të këtij ligji është propozuar që nga 1 Korriku 2019 transporti dhe infrastruktura nuk do të ketë PPP me ofertë të pakërkuar. Po kështu do të bëhet heqja e bonusit për PPP të pakerkuara ndërkohe që dhe ato që do të mbeten pra portet dhe aeroportet, do te hiqet bonusi”, u shpreh kreu i financave.

Ministri Arben Ahmetaj theksoi se do të bëhet heqja e PPP të pakërkuara në një sërë sektorësh./abcnews.al

BANKA-E-SHQIPERISE-PER-BUXHETIN.mpg_snapshot_00.44-1280x720.jpg
G. P.18:16 | 19/11/2018

Banka e Shqipërisë kërkon përmirësim të standardeve të kontabilizimit në buxhet të efekteve që do të kenë angazhimet në kontratat partneritet publik – privat. Për herë kreu i Bankës Qëndrore bëri të qartë rrezikqet që mund të kenë këto projekte për buxhetin dhe insistoi që të njihet efekti i mundshëm në borxhin publik të vendit.

Banka e Shqipërisë kërkon që qeveria të njohë efektin që do të kenë detyrimet e buxhetit ndaj projekteve partneritet publik-privat në rritjen e borxhi publik. Kjo është hera e parë që institucioni i bankës qendrore shpreh shqetësimin për rreziqet që kanë angazhimet e programeve PPP. Guvernatori Gent Sejko ndodhej në komisionin e Ekonomisë për dhënien e mendimit për buxhetin e 2019-s, ku kërkoi edhe vendosjen e një tavani buxhetor për këto kontrata në ligjin bazë të buxhetit.

Gent Sejko, guvernator i Bankës së Shqipërisë: “Ta njohim vlerën, efektin e PPP-ve në nivelin e borxhit në mënyrë realiste. Pra të dimë se sa këto pagesa për PPP do të ndikonin në nivelin e borxhit.”

Kreu i bankës qëndrore nuk përkrahu as idenë e përjashtimeve nga taksat për disa sektorë të caktuar.

“Një tipas tjetër i dëshirueshëm i politikës së taksave është edhe thjeshtimi i sistemit në drejtim të reduktimit të përjashtimeve tatimore.”

Por një tjetër shqetësim i Bankës së Shqipërisë është edhe defiçiti që kanë krijuar skemat e sigurimeve shoqërore dhe shëndetësore.

“Deficiti i skemave të sigurimeve shoqërore e shëndetësore është rreth 5.6% e PPB-së ose 2.6 herë më e lartë së deficiti i përgjithshëm buxhetor”.

Pavarësisht rreziqeve që sheh në buxhetin e vitit të ardhshëm, Banka Qendrore vlerësoi nismën e qeverisë për uljen e borxhit publik dhe po ashtu parimin për mosndryshimin e regjimeve tatimore. Ulja e tatimit të dividentit sipas Bankës, do të shtojë investimet vendase dhe të kompanive të huaja që operojnë në Shqipëri./abcnews.al

KRONIKE-JORIDA-BORXHI-I-PARALAJMERUAR.mpg_snapshot_00.22-1280x720.jpg
ent ela17:56 | 19/11/2018

Mosllogaritja e parave që dalin nga buxheti i shtetit për kontratat e Partneritetit Publik Privat, si pjesë e borxhit publik, është një nismë që do të shkatërrojë arkat e shtetit dhe paratë publike si asnjëherë më parë. Këmbanës së alarmit i bie demokratja Jorida Tabaku, sipas së cilës borxhi publik do të kapë shifrën e 83% të Prodhimit të Brendshëm Bruto, ne vitin e ardhshëm.

“Skemë piramidale që përfshin gjithë buxhetin e shtetit”. Të tillë e quan nënkryetarja e komisionit të ekonomisë, Jorida Tabaku praktikën e qeverisë, atë të Partneritetetit Publik Privat, që sipas saj po zhyt vendin në një borxh të paralajmëruar si nga opozita ashtu edhe nga Fondi Monetar Ndërkombëtar.

“Sot shqipëria ka një borxh publik 71% të Prodhimit të Brendshëm Bruto, ndërsa vetëm PPP-të e dhëna deri më tani përbëjnë 12% të PBB-së”.

Për këtë Tabaku kujton kur gjatë miratimit të buxhetit vitin e shkuar, propozoi një amendament të Ligjit për buxhetin 2018 për të ndaluar rritjen e borxhit dhe për problematikat e projektit “1 miliard euro”. Amendamentet kërkonin njohjen si borxh publik të shtetit, paratë që paguhen çdo vit për kontratat e Partneritetit publik privat, thirrje kjo e ardhur edhe nga Fondi Monetar Ndërkombëtar në tetor të 2017-ës.

“Një vit më parë e paralajmëruam por ato vazhduan me kokëfortësinë e tyre duke ndërmarrë këtë nismë me pasoja të frikshme për ekonominë shqiptare. Pasi u dhuron kontrata disa milionë euro në xhepat e koncesionarëve oligarkë dhe më pas në xhepat e qeveritarëve të lidhur me to, nis një gjoja reformë për të rritur taksat për qytetarët duke shtuar varfërinë dhe duke prodhuar më shumë pabarazi”.

Ballona e borxhit tanimë është kokëposhtë, shkruan Tabaku, sipas së cilës vitin tjetër borxhi pritet të shkojë më shumë se 83% e PBB-së ndërsa taksat jane rritur më shumë se 5 miliardë USD. /abcnews.al

arbnen-ahmetajjj.jpg
G. P.14:20 | 31/07/2018

Raporti i Departamentit Amerikan të Shtetit ka  nxjerrë para mediave ministrin e Ekonomisë dhe Financave, Arben Ahmetaj, për të sqaruar se çfarë e dallon këtë qeveri me atë që sot është në opozitë. Për ta sqaruar thjeshtë zgjodhi investimet në infrastrukturë.

“Nëse do t’i lemë të gjithë qytetarët e Dibrës dhe Shqipërisë të presin derisa buxheti të bëhet gati do suhen 15 deri në 20 vjet. Atëherë çfarë bën qeveria? Qeveria vendos të thërrasë si partner aktorët privatë në mënyrë që rrugën që qytetarët e Dibrës do ta kishin vetëm pas 15 apo 20 vitesh ta bëjnë të mundur ta kenë rrugën brenda 3 vitesh”, tha Ahmetaj.

Parneriteti Publik Privat është një zgjedhje për t’i bërë qytetarët shqiptarët me rrugë brenda një kohe të shkurtër sipas numrit një të financave, një metodë që përdoret në të gjithë botën.

“Ky është thelbi i një koncesioni. Koncepti i PPP-ve është ky, pra në konceptin e rrugëve ka një infrastrukturë që është e nevojshme për vendinj. Nuk e bëjmë dot me buxhetin e shtetit, ftojmë privatin për ta bërë dhe afrojmë rrugën nga 20 vjet që  nuk ishte e mundur në dy apo tre vite menjëherë”, tha ministri.

Ministri Arben Ahmetaj njoftoi se së shpejti do të depozitojë në Kuvend një projektligj që në thelb heq mundësinë e ofertës së pakërkuar në disa sektorë, sidomos në infrastrukturë.

“Që do të thotë se duke filluar ndoshta mesi i vitit tjetër nuk do të ketë më oferta të pakërkuara kryesisht në infrastrukturën rrugore, pra do të ketë vetëm oferta të kërkuara”, u shpreh ministri.

Puna e qeverisë matet edhe me nivelin e borxhit publik, sipas ministrit Ahmetaj dhe e thënë me gjuhën e shifrave mundësitë për uljen e tij janë reale.

Mundësia që borxhi të shkojë në 67% në fund të këtij viti dhe në 65% në fund të vitit tjetër janë reale”, tha ai.

E sa i përket pikpyetjeve për klimën e biznesit në Shqipëri, ministri i Financave dhe Ekonomisë duke iu referuar raportit të Departamentit Amerikan të Shtetit tha se celësi është zbatimi i reformës në drejtësi./abcnews.al

vlcsnap-error132-1-1280x720.jpg
G. P.19:53 | 13/02/2018

FMN është vetëofruar për të ndihmuar Shqipërinë në programet e PPP-ve. Asistenca për minimizimin e rreziqeve fiskale në këto projekte është ofruar nga zv/drejtori ekzekutiv i saj, Tao Zhang. Gjatë një vizite në Shqipëri, ai është takuar me kryeministrin, ministrin e Financave dhe guvernatorin e Bankës së Shqipërisë.

Fondi Monetar Ndërkombëtar ofron asistencë për qeverinë shqiptare në programet e investimeve partneritet publik-privat.
Një delegacion i lartë i fondit ka mbërritur në Tiranë për të mbajtur takime,me kryeministrin, ministrin e Financave dhe guvernatorin e Bankës së Shqipërisë.

Zv/drejtori ekzekutiv i FMN-s, Tao Zhang, tha se programi i qeverisë shqiptare me fondin ka qënë i sukseshëm, ndërsa nxiti që vendi të vijojë reformat.

Tao Zhang, zv/drejtori ekzekutiv i FMN-s: “Kapacitetet implementuese janë shumë të rëndësishme për PPP dhe FMN është e gatshme të punojë me qeverinë shqiptare, në mbështetje të angazhimit të sektorit privat dhe kontrollin e risqeve potenciale”.

Ministri Arben Ahmetaj i tha përfaqësuesve të FMN-së se qeveria do të vijojë reformat. Tashmë po punohet me formalizimin e sektorit të ujit dhe shkurtimin e burokracive të administratës.

Ndërsa, guvernatori Gent Sejko i ka prezantoi Z. Zhang masat që ka marrë Banka e Shqipërisë për deurizimin e ekonomisë.

Fondi i vlerësoi rregullat e reja si të domosdoshme në forcimin e stabilitetit financiar.

Zv/drejtori i FMN-së i tha guvernatorit se Shqipëria tashmë duhet të nisë të marrë reforma të rëndësishme në forcimin e institucioneve dhe mirëqeverisjen e vendit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono