porto romano

PORTO-ROMANO-VENDIMI1-1280x720.jpg
ent ela14:45 | 23/11/2018

Kryetari i Bashkisë ka njoftuar se pika e grumbullimit të mbetjeve në Porto Romano do të mbyllet brenda vitit 2019. Të njëjtin premtim ka dhënë dhe ministrit i Mjedisit Blendi Klosi.

Brenda 2019-ës vendgrumbullimi i mbetjeve në Porto-Romano do të mbyllet, për t’u kthyer në një park të gjelbër. Ndërsa po shikohet mundësia për mbylljen e kanaleve të hapura të ujërave të zeza që përshkojnë disa zona të qytetit bregdetar. Është ky premtimi i dhënë nga kryetari i bashkisë Durrës Vangjush Dako, për qytetarët durrsakë.

Vangjush Dako: Pasi e shpallëm gjëndje të jashtëzakonshme, jemi duke bashkëpunuar për të realizuar mbylljen e fushës së mbetjeve në Durrës dhe për t’i dërguar në Sharrë.

Në të njëjtën linjë me kryebashkiakin e Durrësit, ishte dhe ministri i Mjedisit Blendi Klosi. I pranishëm në aksionin kombëtar “Ta pastrojmë Shqipërinë”, ministri Klosi tha se prioritet do t’i jepet zgjidhjes së mbetjeve në Porto-Romano.

Blendi Klosi: Jemi në përgatitje të një aksioni të madh që do të zgjidhë përfundimisht problematikat e zonës më të ndotur në Porto Romano dhe për këtë duhet përpjekje e përbashkët dhe kontribut i qytetarëve.

Vengrumbullim i mbetjeve në Porto Romano dhe asgjësimi i tyre në terren të hapur është kthyer nder ndotësit me të mëdhenj të mjedisit në qytet. Për të minimizuar ndotjen, pas shumë vitesh bashkia ka nderhyrë.

Fillimisht u ndalua djegia e mbeturimave, ndërsa më pas u investua në rrethimin e vendngrumbullimit. /abcnews.al

PORTO-ROMANO-DURRES-1280x720.jpg
ent ela16:49 | 10/11/2018

Pas një kohe shumë të gjatë kanë nisur masat e para për sistemimin e vendgrumbullimit të mbeturinave në Porto Romano të Durrësit. Vendorët kanë caktuar një shërbim zjarrfikës si dhe ka nisur pastrimi i kanaleve përreth territorit.

Ka pak ditë që këtu nuk po digjen më plehra. Një shërbim zjarrfikës është vend në gatishmeri për çdo rast. Pesë muaj nga shpallja e emergjencës mjedisore në Porto Romano po ndjehen ndërhyrjet e para. Institucionet janë vënë në lëvizje dhe po veprohet në terren.

Ndalimi i djegies së mbeturinave në terren të hapur ka ulur ndjeshëm nivelin e ndotjes të ajërit nga tymërat toksikë. Një praktikë kjo e ndjekur prej më shumë se dy dekadash, duke rrezikuar seriozisht shëndetin e popullatës.
Paralel me monitorimin e zjarreve në ketë territor, punonjës të ndërmarrjës së komunales të ngarkuar për menaxhimin e mbetjeve  kanë nisur marrjen  masave paraprake.

Në terren ata po punojnë për pastrimin e kanaleve të tejmbushura nga mbeturinat me qëllim  minimizimin e nivelit të ndotjes. Prej vitesh në to nuk ishte kryer asnjë ndërhyrje duke ndikuar në zgjerimin e  hartës së  zonës së ndotur.

Ndërhyrjet konsiderohen vetëm fillimi i punës për kthimin e kësaj zonë në një vend të gjelbëruar, por që aktualisht shërben për grumbullim e tonelatave mbetjeje. Ndotja që vinte nga kjo zonë, kryesisht nga djegia e mbeturinave sëfundmi nxiti protesta të banorëvë por edhe studentëve.

Gazetare e ABC News, Durrës: Enkeleda Arapi

ndotjaa.png
G. P.14:39 | 02/11/2018

Edhe pse është shpallur Emergjenca Mjedisore prej disa muajsh, gjendja në Porto Romano jo vetëm nuk ka ndryshuar, por po bëhet edhe më e rëndë. Studentë dhe pedagogë të Universitetit “Aleksandër Moisiu” në Durrës protestuan sot për të kërkuar zgjidhje për situatën. 

Pedagogë e studentë të Universitetit “Aleksandër Moisiu” dhe banorë të qytetit të Durrësit protestuan për ndotjen e lartë  nga djegia e mbeturinave në vendgrumbullimin në Porto Romano. Kjo pikë grumbullimi i plehrave të qytetit dhe të rrethinave ndodhet vetëm 200-250 metra larg nga korpusi universitar.  Studentët thonë se tymi me gazra toksike i mbeturinave që digjen në ambient të hapur futet në godinen e universitetit. Situata është e rëndë dhe e papërshtatshme për leksione.

“Jo vetëm që vjen një erë e rëndë dhe nuk zhvillojmë dot mësim por edhe është e dëmshme për shëndetin. Ne kërkojmë nga Bashkia mos t’i djegë mbeturinat por t’i çojë diku tjetër”.

“Vetëm për një qëllim. Të ndalojmë ndotjen në Porto Romano, e cila po bëhet kancer për ne”.

Ky është një nga shqetësimet kryesore që banorët kanë ngritur herë pas here. Por tashmë duket se studentët dhe pedagogët nuk do të ndalen. Këtu është e pamundur të zhvillohet në kushte normale procesi mësimor. Nëse hapim dritaret, nuk arrijmë të shohim njëri-tjetrin nga dendësia e tymit. Zhvillojmë mësim me dritare e dyer të mbyllura dimër-verë, thonë protestuesit. Nga shpallja e emergjencës mjedisore nuk është bërë asgjë. Bashkia pret zgjidhje nga qeveria dhe është pikërisht Komiteti i Menaxhimit të Integruar të mbetjeve që duhet të vendosë mbi kohën dhe vendin se ku do t’i depozitohen mbetjet urbane të Durrësit. Landfilli i Tiranës u diskutua si mundësi për zgjidhje./abcnews.al

MBETJET-NE-DURRES_ABC-M2-T1.mpg_snapshot_01.31-1280x720.jpg
G. P.15:22 | 17/10/2018

Nuk është bërë asgjë nga koha kur në Durrës u shpall Emergjenca Mjedisore. Në vendgrumbulimin e mbetjeve në Porto Romano plehrat po marrin më shumë terren dhe zona është akoma më e ndotur.

Këtu mbetjet po zgjerojnë territor. Gjendja jo vetëm nuk është permirësuar si kundër u premtua pas shpalljes së emergjencës mjedisore, por po përkeqësohet dita ditës. Kamionet shkarkohen çdo ditë në terren të hapur. Për tu ulur volumin, plehrave u vihet zjarri i pakontrolluar.

Banorja 1: “Shkarkojnë kamionët çdo ditë e çdo natë. Pisllëk më të madh se këtu nuk ka.”
Banori 2: “Të gjitha mbeturinat lëshohen në terren dhe gjëja më e keqe është që iu vendoset zjarri. Ndotja e ajrit është masive, sidomos nga mbrëmja dhe në orët e natës ka shumë ndotje.”

Rrethimi i vengrumbullimit, i cili do të sherbente për disiplinuar derdhjet dhe hyrje-daljet e njerëzve apo të kafshëve shtëpiake mungon. Zyrtarët e bashkisë e premtuan një gjë të tillë. Madje as kanali i ujërave të larta, i kthyer në një vatër ndotjeje nuk po pastrohet. Banorët flasin për përkeqësim të situatës. Ata thone se askush nuk po punon per kthimin e zonës në një vend të pastër.

Banori 3: “Më vjen turp më ardhë ata të shkollës time e tu them që banoj këtu, tek lagjia e plehrave, se dikur thuhej “tek burimi” të paktën, por ça është burimi këtu, tek lagjia e plehrave.”

Në bashkinë e Durrësit presin që zgjidhja të vijë nga qeveria. Pas shpalljes së emergjencës mjedisore duhet të ishte Komiteti i Menaxhimit të integruar të mbetjeve ai që do të vendoste kohën dhe vendin për depozitimin e mbetjeve urbane të qytetit bregdetar. Landfilli i Tiranës u përfol si mundësi. Por nga koha e shpalljes së emergjencës në fillim të muajit korrik, nuk janë bërë as ndërhyrjet paraprake. Madje bashkitë i shohin si një investim i shkuar dëm. Deri në gjetjen e një alternative përfundimtare, banorët e Durrësit do të frymojnë mes ndotjes.

Përgatit: Enkeleda Arapi, gazetare e ABC News, Durrës

porto-romanoo.jpg
G. P.17:10 | 12/07/2018

Plehrat e Durrësit vazhdojnë të shkarkohen në Porto Romano dhe do të vazhdojnë të depozitohen atje derisa të gjendet zgjidhja përfundimtare. Kryetari i degës së Shërbimit Komunal në Bashkinë e Durrësit tregon se çfarë do të ndodhë pas shpalljes së emergjencës.

Tre ditë nga vendimi i Këshillit Bashkiak Durrës për shpalljen e emergjencës mjedisore, në depozitimin e mbetjeve urbane në Porto Romano asgjë nuk ka ndryshuar.

Kamionë të ngarkuar me plehra shkarkohen në të njëjtin vend. Në ndërmarrjen komunale në varësi të bashkisë Durrës, drejtuesit thonë se deri në një vendim të dytë ato do të vazhdojnë të depozitohen në Porto Romano.

“Edhe pse është marrë ky vendim i Këshillit Bashkiak para 2-3 ditësh, ne vazhdojmë punën në mënyrë të përditësuar për shkarkimin e mbetjeve në këtë fushë, sepse duhet një hapësirë kohore më e zgjatur që ne të reflektojmë ndryshimet që duhen bërë”, tha Fadil Ago, kryetar i degës së Shërbimit Komunal.

Ago sqaron se shpallja e emergjencës mjedisore është vetëm fillimi i një sërë procedurash shkresore dhe ligjore që duhet të ndiqen nga bashkia e qytetit dhe ministritë përkatëse, për të cilat duhet shumë kohë.

“Natyrisht që këto nuk mund të bëhen menjëherë. Ka disa vendime që do të merren më pas. Ato kanë të bëjnë më planifikimin financiar , me masat organizative që duhen marrë si dhe me gjithë përmirësimin e infrastrukturës së transpotit”, tha Ago, kryetari i degës së Shërbimit Komunal

Gjetja e një alternative për depozitimin e mbetjeve në Durrës, apo dërgimi i tyre në ndonjë landfill tjetër, mbeten disa nga opsionet. Nuk përjashtohet mundësia e ndërtimit të një të riu në Durrës.

“Për krijimin e një landfilli të ri, i cili mund të bëhet në Bashkinë e Durrësit, ose mund të çohet në Sharrë të Bashkisë së Tiranës.”

Një muaj më parë kryeministri Edi Rama, i cili pa nga afër gjendjen në Porto Romano tha se

“Të vazhdojmë procesin e bashkëpunimit për mbylljen e kësaj fushe dhe trasformimin në një park të madh të qytetit, t’i çojmë mbetjet, tha ai, në impiantin e Tiranës duke llogaritur edhe kostot”.

Drejtues të ndërmarrjes së komunales të ngarkuar për pastrimin e qytetit dhe menaxhimin e mbetjeve në Porto Romano sqarojnë së kanë nisur marrjen e masave paraprake në terren për minimizimin e nivelit të ndotjes. Fillimisht do të pastrohen kanalet pranë venddepozitimit në Porto Romano dhe më pas do të bëhet rrethimi i zonës./abcnews.al

EMERGJENCA-PORTO-ROMANO1-1280x720.jpg
ent ela22:12 | 10/07/2018

Këshilli bashkiak i Durrësit ka miratuar shpalljen e emergjencës mjedisore në fushën e menaxhimit të integruar të mbetjeve urbane në territorin e Bashkisë Durrës. Shpallja e gjendjes së emergjencës ne Porto Romano gjeti dakortësinë e të gjithë anëtarëve të Këshillit Bashkiak, të pranishëm në mbledhje. Këshilltari i PD-së, Armand Teliti tha  se ky ishte një propozim i bërë nga PD e Durrësit në vite dhe kërkoi që autoriteti përkatës për të menaxhuar situatën duhet të jetë Këshilli Bashkiak e jo kryebashkiaku Vangjush Dako. Vendgrubullimi i mbetjeve urbane në Porto Romano ndër vite është kthyer në një shqetësim për banorët për shkak të ndotjes masive të ajrit që vjen si pasojë e djegies së mbetjeve në një terren të hapur. /abcnews.al

porto-romano-1280x720.jpg
G. P.12:17 | 07/07/2018

Dy persona janë mbytur këtë të shtunë në bregdetin e Durrësit. Një pushues 62-vjeçar u mbyt në vendin e quajtur Porto Romano, ndërsa ishte duke u larë. Megjithëse pushues të tjerë i shkuan në ndihmë, ai nuk mundi të mbijetojë. Një tjetër person u gjet i pajetë në mëngjes në plazhin e Currilave. Ai është 72 vjeç, banor i Durrësit dhe policia dyshon se është mbytur, megjithëse për të dyja rastet po hetohet rreth shkakut të saktë që ka shkaktuar vdekjet e tyre./abcnews.al

RAMA-NE-PORTO-ROMANO-1280x720.jpg
ent ela16:26 | 13/06/2018

Kryeministri Edi Rama vizitoi vend-grumbullimin e mbetjeve në Porto Romano një ditë pas protestës së banorëve të zonës banesat e të cilëve janë shumë pranë mbetjeve. Mbyllja e kësaj pike grumbullimi ishte premtimi i kryeministrit.

Një ditë pas protestës së banorëve të Porto Romanos për vend-shkarkimin e mbetjeve të cilat janë fare pranë banesave të tyre, I shoqëruar nga ministri i mjedisit Blendi Klosi, kryeministri Edi Rama vizitoi vend-grumbullimin.

“Të vazhdojmë procesin e bashkëpunimit për mbylljen e kësaj fushe dhe trasformimin në një park të madh të qytetit, ti çojmë mbetjet në impjantin e Tiranës duke llogaritur edhe kostot”.

Për kryeministrin Shqipëria nuk është e ndotur për shkak të industrive por është pis për shkak të papastërtisë që njerëzit prodhojnë dhe që për ta mjafton të jetë jashtë shtëpive të tyre. /abcnews.al

PROTESTA-PORTO-ROMANO.mpg_snapshot_00.10-1280x720.jpg
ent ela22:38 | 12/06/2018

Banorët që kanë shtëpitë e tyre pranë vendgrumbullimit të Porto Romanos u ngritën në protestë ditën që Kryeministri ndodhej në Durrës në një takim me qytetarë. Kërkesa e tyre është të ndalet shkarkimi i mbetjeve në Porto Romano.

4 km prej këtu kryeministri Edi Rama po zhvillonte një takim me qytetarët, por banorët e Porto Romanos mendojnë se llogaridhënia duhet të nisë pikërisht tek ky vend.

“Lekët i do ai, hajd epaguaju taksat, po ku është taksa e pastrimit dhe e gjelbërimit këtu”

Familjet e periferisë së Durrësit protestuan kundër shkarkimit të mbetjeve dhe më pas asgjësimit të tyre në terren të hapur.

“Na vijnë mbeturinat afër shtëpisë, do na vijnë në kuzhinë se te dera e shtëpisë kanë ardh”.

“Ne kërkojmë o landfilldi ose të na zhukë ne nga kjo lagje e Durrësit”.

Në mbështetje të banorëve ishin edhe deputetë dhe drejtues të PD në këtë qytet.

Xhaferri: “Po protestojmë në vendgrumbullimin e mbeturinave, protetsat tjetër te dera e bashkisë dhe brenda bashkisë”.

Bylykbashi: “Po shkatërron jetën e qytetarëve durrsakë”

Vendgrumbullimi i mbetjeve në Porto Romano po kërcënon durrsakët.  Çdo vit në këtë hapësirë jashtë çdo standardi shkarkohen mbi 70 mijë tonë mbetje. /abcnews.al

 

porto-romano.jpg
G. P.15:55 | 06/06/2018

ABC News ka realizuar një reportazh në zonën më të ndotur të Durrësit që është vendgrumbullimi i mbetjeve të Porto Romanos. Një katastrofë mjedisore fare pranë mijëra banorëve, i cili çdo ditë u rrezikon jetën nga helmet. Përballë kësaj “bombe me sahat”,  Bashkia e Durrësit është dorëzuar pasi puna e saj ka mbetur tek projektet në mungese të fondeve.  

Këtu ndodhemi në veri të Durrësit. ABC News ka filmuar me dron vendgrumbullimin e Porto Romanos. Katastrofa mjedisore që bashkëjeton me durrsakët dhe jo vetëm.

Mbeturinat janë shpërndarë pa kontroll. 4 kilometra nga qendra e qytetit turistik, tonelata mbetjesh shkarkohen çdo ditë në këtë terren të hapur.

Hapësira prej 17 hektarësh nuk plotëson asnjë kriter. Askush nuk është kujdesur për rrethimin e zonës. Këtu familje në nevojë punojnë në mbledhjen e mbetjeve të riciklueshme.

Ndërsa të tjerë e shfrytëzojnë për të ushqyer edhe kafshët. Gjendja mbetet alarmante. Mbi 45 mijë banorë po thithin çdo ditë dioksidin e karbonit, i cili përhapet në ajër nga asgjesimi i mbeturinave me anë të djegies.

Era e keqe dhe niveli i lartë i ndotjes është shqetësimi kryesore për banorët e Porto Romanos. Sëmundjet e provokuara nga helmet kanë nisur të shfaqen.

Banorët thonë se po marrin fund.    Të prekura nga kjo situatë janë edhe institucionet arsimore, të cilat gjenden fare pranë vendgrumbullimit.

Nxënës të shkollës  9-vjeçare “Met Hasa”, por edhe studentë të kampusit të ri universitar, përveçse dijes, marrin edhe ndotjen që shkaktohet nga ky masiv mbetjesh.

Çdo vit në këtë hapësirë, e cila shërben për grumbullimin e mbeturinave të 3 bashkive, Durrës, Shijak dhe Kavajë, shkarkohen mbi 70 mijë tonë mbetje.

Puna e Bashkise së Durrësit ka mbetur tek konstatimi i fakteve dhe hartimi i projekteve. Jashtë kamerave ata thonë për ABC News se janë financiarisht të pafuqishëm për të ngritur një landfill. Pretendimi tjetër i bashkisë është se nuk kanë një terren të përshtatshëm.

Institucionet vendore të pafuqishëm mbeten edhe në menaxhimin e plazheve të prekura nga hedhja pa kriter e mbetjeve urbane.

Zonat turistike që ndodhen në pjesën veriore e perëndimore të qytetit vuajnë nga niveli i lartë i ndotjes në një kohë që Durrësi frekuentohet nga një numër i lartë turistësh vendas dhe të huaj.

Kur askush nuk ndërhyn rrezikohet që pushuesit të braktisin Durrësin./abcnews.al

Gazetare: Enkeleda Arapi


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono