politikë

ruse.jpg
in a20:27 | 24/11/2019

Modelja ruse, Maria Liman pas një propozimi për të qenë pjesë e politikës, së fundmi ka zbuluar refuzimin e detyrës së zëdhënëses së partisë politike ruse LDPR, me arsyetimin se do të ishte shumë “shpërqëndruese”.

Unë nuk kam asnjë ide sa i përket kësaj fushe, nuk e di se si do të komentohesha nga njerëzit, por theksoj që kjo detyre do të më shpërqëndronte shumë, është shprehur ajo.

“Jeta ime është plotësisht e kanalizuar në karrierën time të aktrimit. Politika nuk ka qenë kurrë interesante për mua. Unë e kuptoj se si do të më shihnin njerëzit dhe nuk kam asnjë ide mbi fushën. Nuk dua të jem shpërqendrim për njerëzit”, shprehet modelja ruse.

25-vjeçarja fitoi vëmendjen e LDPR-së pas disa paraqitjeve televizive dhe u pikas si një nga tifozet më seksi të Kupës së Botës në vitin 2018./abcnews.al

agron-shehaj.jpg
ad min21:46 | 29/10/2019

Ish-deputeti i Partisë Demokratike, Agron Shehaj, ishte i ftuar këtë të martë në emisionin “Provokacija”. Ai tregoi se si u fut në politikë. Shehaj tha se hyri në politikë në një moment që kishte artur sukses në biznes.

Shehaj deklaroi se e ka ndjekur vazhdimisht politikën në Itali dhe Shqipëri. Ish-deputeti mendon se politika është e rëndësishme, sepse vendos për fatet e vendit.

“Mua më ka propozuar kryetari, Basha. Më prezantoi dikush. Ishte prezantim jo me qëllime kandidimi. Gjashtë muaj para zgjedhjeve të 2017-s. Mua më pëlqen të mendoj se më ka parë vlerat jo pasuritë. Më tha “Agron Hajde. Pa kushte, pa asgjë. Je totalisht i lirë”.

Jo nuk jam penduar. Politika është një sfidë e jashtëzakonshme. Në momente dukem naiv, ose vendimi mund të ketë qenë naiv kur e kam marrë. Edhe kur e kam hapur biznesin më dukej naive me synimet që kisha dhe me qëllimin që kisha, por mendoj se nuk ka gjë më të bukur se sa të punosh për vendin tënd dhe jo vetëm për vete. Kam një përfitim. Përfitimi i të bërit një punë të mirë”, tregoi Shehaj, sipas të cili politika është shumë e ngjashme me biznesin./abcnews.al

ilir-meta-pushimet-1280x657.jpg
nev ila16:05 | 31/08/2019

Një nga aktorët kryesorë, i impenjuar publikisht për zgjidhjen e krizës politike është kreu i shtetit Ilir Meta. Gushti ka qenë muaji ku presidenti ka ndërthurur mesazhet politike drejtuar palëve, me promovimin e bukurive të Shqipërisë.

U nis me pushime me celular të ndezur me shpresën se do ta telefononin drejtuesi i mazhorancës dhe ai i opozitës për ti dhënë lajmin se një marrëveshje kanë ndër mend. Por kjo nuk ndodhi.

E kryetari i shtetit vazhdoi udhëtimin e tij që kish nisur drejt maleve, me vete kishte edhe familjen.

Duket se kush marrë përsipër të promovonte pikat turistike e njëherësh të jepte mesazhe. Kështu bëri ndërsa përfundoi terapinë me ujë bore.

“Pas një terapie me ujë bore, më lindi një pyetje që dua ta ndaj me ju, dhe që u drejtohet atyre të cilët bëjnë si të paanshëm, pasi kanë shkëlqyer me njëanshmërinë e tyre, duke ia kaluar dhe Kryeministrit tonë, i cili në fund të fundit përfaqëson një anë politike: Pse nuk keni sy për të parë apo veshë për të dëgjuar zgjidhjen e krizës që ka dhënë një institucion që ekziston, por ia kërkoni zgjidhjen një institucioni që nuk ekziston, falë edhe paanësisë tuaj tepër të vonuar?
Kaq të domosdoshëm e keni dështimin e çeljes së negociatave për vendin tonë në 18 tetor?”

Që zgjedhjet janë e vetmja zgjidhje presidenti Ilir Meta i përsëriti edhe në ditët në vijim por përsëri nuk mori asnjë reagim.

Pas kësaj zgjodhi të përqendrohet më së shumti në promovimin e turizmit.

Nga ngjitja në ujëvarën e Bjeshkëve të Prevallës, në lartësinë 1850 m.

Në kredhjet në Liqenin e Jazhincës, një monument i rrallë natyror 2180 metra mbi nivelin e detit.

Pa harruar të shijojë boronicat në Bjeshkët e Sharrit. E kështu kaluan dy javë pushime të presidentit me familjen në Prevallë.

Një ftesë pune nuk mundi ta shmangë.  Në “Festën Tradicionale të Vjeljes së Rrushit – Hardh Fest 2019?” në Rahovec, u bë bashkë me Presidentin e Kosovës, Hashim Thaçi dhe Kryeministrin Ramush Haradinaj.

Tashmë duket se e ka harruar presidenti krizën politike për të cilën është angazhuar në Tiranë, vazhdon të shijojë peizazhet malorë midis Bizës dhe Martaneshit të cilët e bëjnë edhe të reflektojë.

Në këtë udhëtim mes këtyre bukurive magjepsëse pata kënaqësinë të takoja dhe disa nga blegtorët, të cilët punojnë mes shumë vështirësive dhe nuk dorëzohen, me bindjen se një ditë do të bëhet më mirë dhe për ta, do të ketë më shumë vëmendje dhe mbështetje, që këto vende të bekuara të mos braktisen.
Ndoshta për këtë ndihmojnë dhe objektet e kultit dhe besimit që ekzistojnë në këtë zonë, që njerëzit t’u qëndrojnë me kurajo disa vështirësive dhe pengesave që nuk i meritojnë
”.

Nga mali në plazhin e Gjirit të Lalzit.

E përsëri rikthim në mal në sfidën e fundit për këtë sezon pushimesh, ngjitjen në malin e Korabit.

Në 2751 m lartësi, maja më e lartë jo vetëm e Shqipërisë por edhe e Ballkanit presidenti Ilir Meta ka lënë në këmbët e tij refrenin e zgjedhjeve të 13 tetorit.

Tashmë i duket se prek qiellin me dorë dhe thotë se  kjo e frymëzon që të kalojë me sukses çdo pengesë që e pret në zbritje, aty ku ka gjithçka ka mbetur siç e ka lënë kur u nis./ABC News Albania 24/7

Lulzim-Basha-konference-1280x716.jpg
ad min18:26 | 21/08/2019

Sipas kryetarit të Partisë Demokratike, kryeministri Rama kandidon kriminelë dhe e përdor krimin për të vjedhur zgjedhjet. Në një postim në rrjetet sociale Basha shkruan se bashkë me krimin, kryeministri pasurohet duke vjedhur shqiptarët.

“Hajduti Psiqik përbën rrezik për jetën dhe sigurinë e çdo familje. Ai dhe krimi i organizuar janë të pandashëm. Që të shpëtojmë Shqipërinë nga kriminelët me pushtet, duhet të largojmë Edi Ramën”, thotë Basha.

Më poshtë, Basha shton se PD dhe opozita propozuan Vettingun e politikanëve para një viti, por Rama dhe organizata e Rilindjes e votoi kundër. Në një video ai renditi edhe 5 arsyet pse Rama nuk do Vettingun e politikanëve.

“Vettingu i politikanëve kërkon shumicë prej 93 votash në parlament. Edi Rama e ka mbushur parlamentin me kriminelë që nuk e duan fundin e tyre.

Vettingu i politikanëve heton të gjithë zyrtarët e lartë, deputetët, ministrat dhe kandidatët e pushtetit vendor. Edi Rama vodhi zgjedhjet për të mbushur bashkitë me të dënuar për trafik droge dhe qeniesh njerëzore

Vettingu i politikanëve largon nga jeta publike kriminelët në politikë dhe zbulon rrjette e tyre mafioze. Edi Rama e mban pushtetin me kriminelë dhe politikanë të lidhur me krimin.

Vettingu i politikanëve heton dhe largon të githë politikanët që nuk justifikojnë pasurinë e tyre. Edi Rama grabit shqiptarët dhe pasurohet bashkë me bandën e tij në politikë.

Vettingu i politikanëve përfshin kryeministrin e Shqipërisë. Edi Rama e ka frikë vettingun. Ai është në krye të kupolës së krimit që po mban peng Shqipërinë”, sipas Bashës.


/abcnews.al

773x435_french-farmers-damage-more-offices-of-macron-mps-over-trade-deals.jpg
ad min19:15 | 08/08/2019

Fermerët francezë kanë organizuar protestat e radhës, duke sulmuar zyrat politike të presidentit Emmanuel Macron. Ata kundërshtojnë marrëveshjet e fundit tregtare të BE-së, me argumentin se favorizojnë importet nga jashtë Evropës.

Fermerët francezë, të irrituar nga marrëveshjet tregtare mes BE-së dhe Kanadasë kanë protestuar duke dëmtuar zyrat e ligjvënësve të partisë së presidentit Emmanuel Macron.

Në orët e para të së enjtes, ata vunë në shënjestër zyrat e politikanëve në tre lokalitete në perëndim të Francës. Një shoqatë lokale fermerësh mori përsipër sulmin, që u pasua me bllokimin e aksesit të politikanëve në zyrat e tyre me mure të improvizuara, ku u shkruan parulla kundër marrëveshjes me Kanadanë, e njohur si CETA. Protestat anti-qeveritare nisën pasi parlamenti francez miratoi marrëveshjen në fjalë muajin e kaluar.

Kundërshtarët e saj deklarojnë se ajo do të minojë rregullat sociale të BE-së, duke lejuar importin e produkteve të prodhuara në kushte të palejueshme në Europë. Krahas CETA-s, fermerët francezë janë gjithashtu të pakënaqur për shkak të rrezikut që u kanoset mjeteve të tyre të jetesës për shkak të një tjetër marrëveshjeje të nënshkruar në qershor mes BE-së dhe vendeve të Amerikës së Jugut, që favorizon eksportet e vendeve si Argjentina dhe Brazili.

Fermerët francezë e kanë traditë mbajtjen e protestave. Ato aktuale vijnë paralelisht me protestat anti-qeveritare të “Jelekëve të Verdhë”, që nisën muaj më parë me kundërshtimin e rritjes së taksës mbi karburantet nga ana e qeverisë./ABC News Albania 24/7

salvini.jpg
ad min10:30 | 03/08/2019

Mateo Salvini, ministri i Brendshëm Italian, njëkohësisht zv. kryeministër e lider i Legës, shfaqet gjithnjë e më i vendosur në qëndrimet e tij. Kjo pavarësisht presioneve si nga aleatët në qeverisje ashtu dhe nga kolegë ndërkombëtarë. Një këmbëngulje që po e izolon gjithnjë e më shumë.

Mund  të konsiderohet një lajm ‘bombë’ por dhe një shqetësim ai I Bazfid, për zv/kryeministrin Italian Matteo Salvini. Fillimisht për atë që u zbulua nga audio përgjimet për takimin në Metropolin e Moskës. Është I turpshëm vetëm mendimi se mund të ketë pasur qoftë dhe një përpjekje për të marrë para ruse për Legën. Një parti sovraniste e cila vetëshpallet mbrojtëse e interesit kombëtar, nuk mund të marrë para nga fuqi të huaja. Marrëveshje politike dhe aleanca, dhe pse të diskutueshme, janë një tjetër gjë. Ndërsa marrja e parave nënkupton një marrëdhënie varësie apo kushtëzimi.

I vetmi person I identifikuar nga gjashtë pjesëmarrësit në takim – tre Italian dhe tre rusë – është Xhanluka Savoini, një mik prej 25 vitesh dhe ish zëdhënës I Salvinit, aktualisht president I shoqatës Lombardi – Rusi, pa një post zyrtar në partinë e Legës, po ende shumë pranë kryetarit për sa I përket marrëdhënieve me Rusinë. Aq sa e ka shoqëruar Salvinin dhe në dy vizitat e tij zyrtare në Moskë. Atëherë në emër të kujt fliste Savoini në Metropol? Nuk mund të merret për e mirëqenë që firmoste marrëveshje në emër të partisë por a nuk mund të përjashtohet si fakt. Nuk dihet ende as se dhe në emër të kujt flisnin rusët të cilët ende nuk janë identifikuar.

Strategjia mbrojtëse e Legës përballë sulmeve politike që i vijnë nga e majta – funksionon  vetëm nëse Lega nuk ka marrë asnjë rubël, ashtu si këmbëngul Salvini.

Por Salvini duhet të shqetësohet dhe për diçka tjetër aktualisht. Nga vjen audio-përgjimi? Dhe kush ia ka dorëzuar Bazfid? E pse pikërisht në këtë kohë?

Pas zgjedhjeve parlamentare evropiane, dhe pse me një rezultat të mirë Salvini mund të konsiderohet se gjendet në një fazë delikate.

As një muaj më parë, Salvini ndodhej në vizitë zyrtare në Uashington ku u takua me zv/presidentin amerikan Majk Pens dhe sekretarin amerikan të shtetit Majk Pompeo. Një vizitë e cila nga shumë u interpretua si një akreditim në administratën Trump të një lideri politik Italian, i favorizuar për të qenë kryeministri i ardhshëm i vendit.

Një zgjedhje e mirë kjo nga Salvini, për të marrë besimin dhe mbështetjen e Shteteve të Bashkuara të Amerikës, gati – gati një “bekim”, para se të nisë betejën për postin e kryeministrit.

“Italia është ndërmjetësuesi i parë, më i besueshëm dhe më i qëndrueshëm i Shteteve të Bashkuara të Amerikës në Bashkimin evropian”, deklaronte Salvini në Uashington. Për të shtuar më pas se Italia ishte vendi më i madh evropian me të cilin Shtetet e Bashkuara të Amerikës mund dhe duan  të dialogojnë. Dhe pas takimit me Pompeo, do të ishte radha e dy deklaratave totalisht në të njëjtën linjë me qëndrimin e Shteteve të Bashkuara të Amerikës dhe në kontrast të pastër me atë të Rusisë:

I takon Putin që të bëjë një hap përpara, pozitiv dhe konkret në Ukrainë para se të kërkojë heqjen e sanksioneve.

Dhe më pas Salvini premton se do të impenjohet personalisht për të njohur Huan Guaido si presidentin e ligjshëm të Venezuelës.

Por si I priti Kremlini deklaratat e tij? Jo dhe aq keq do të thuhej, duke marrë për bazë fjalët e pak ditëve më pas, para se të mbërrinte ën Romë, Putin than ë një intervistë për “Korriere dela Sera: “Salvini ka një qëndrim të ngrohtë për vendin tonë. Jemi takuar në vitin 2014, dhe që atëherë kemi kontakte të vazhdueshme mes Rusisë së Bashkuar dhe Legës, parti që bashkëpunojnë në kuadër të një marrëveshjeje bashkëpunimi. Si për të thënë: Jeni ju që zgjodhët, nuk e mbani mend?

Audio e publikuar nga Bazfid, mes pasojave të shumta ka dhe atë të krijimit të disa dyshimeve në Uashington për sa i përket sinqeritetit të Salvinit dhe të përpjekjes së tij për tu akredituar si një ndërmjetësues i besueshëm për Shtëpinë e Bardhë: si mund të ketë besim, kur vetëm pak muaj më parë një njeri I tij negocionte në Moskë një plan sekret për të marrë financime ruse?

Nga ana tjetër nuk është një mister që para vizitës së Salvinit, që kur në Shtëpinë e Bardhë është Donald Trump, Lega është afruar shumë me Uashingtonin. Pavarësisht admirimit këmbëngulës të zv/kryeministrit Italian për Putin dhe një rryme të fortë filoruse pranë tij, ndoshta Lega nuk ka qenë asnjëherë kaq shumë filo amerikane dhe atlantike në historinë e saj. Mjafton të kujtojmë manifestimet e organizuara nga ajo anti – Nato, pro Sadam dhe pro Miloshevic.

Pra nuk ka aq material sa duhet për të menduar për një paralajmërim nga ana e Moskës për dy provat zhgënjyese të Legës. Kjo e fundit do të duhet të japë llogari për qëndrimin e paqartë në marrëdhëniet mes shteteve të Bashkuara të Amerikës dhe Rusisë në një moment ku të dy fuqitë janë sërish në garë për ndikimin që synojnë të kenë në Europë dhe në mënyrë të veçantë tek partitë e ashtuquajtura sovraniste dhe euroskeptike.

Bazfid gjithashtu është uebsajti që në 11 Janar të vitit 20017, nëntë ditë para uljes në shtëpinë e Bardhë të presidentit të ri amerikan, publikoi dosjen “Stil” për të përbaltur Trump, dhe pse dihej që ishte një lajm i rremë, i përgatitur nga shërbime të huaja, me burime dhe ruse, me porosi të rivalëve politikë. Një dosje e cila ka udhëtuar mes Londrës dhe Romës përpara se të mbërrinte në FBI dhe t’i dorëzohej të gjitha mediave anti-Trump, deri tek Bazfid e cila e publikoi dhe pse ishte përgënjeshtruar prej ditësh. Kjo me qëllimin për të arsyetuar kërkesën për autorizimin që FBI të vëzhgonte këshilltarin e fushatës së Trump, Karter Pejxh. Por Bazfid vijoi përgjatë gjithë procesit “Russiagate”, të publikojë të dhëna që ushqenin përplasjen dhe pse ishin të pabazuara

Ndërkohë sidomos tek Lega, prej javësh shtrohet e njëjta pyetje pa përgjigje: “Përse Matteo Salvini vazhdon të qëndrojë në qeveri me Lëvizjen me Pesë yje? Dhe sigurisht që deklarata e Salvinit sipas të cilës ai është një burrë që mban fjalën nuk është shumë bindëse. Kjo  për faktin se Salvini i kishte dhënë fjalën dhe Silvio Berluskonit dhe Xhorxha Melonit, për të nënshkruar më pas një marrëveshje me Luixhi di Maion”.

Ishin të shumtë ata që deri pak kohë më parë ishin të bindur se Salvini, i fortë nga suksesi në zgjedhjet parlamentare evropiane, dhe nga sondazhet që e tregojnë gjithnjë e më shumë në rritje, do të prishte marrëveshjen me Luixhi di Maion. Por një gjë e tillë nuk ka ndodhur ende

Sjellja e Mateo Salvinit shpesh herë ka përfunduar në qendër të kritikave. Janë të shumtë ata që mendojnë se në disa raste sjellja e tij madje është jashtë logjikës

Sikur të mjaftonin shifrat, ato të ministrisë së tij, Matteo Salvini nuk duhej të bënte më kaq shumë zhurmë për ata dhjetëra emigrantë që mbërrijnë në brigjet italiane. Sipas të dhënave të ministrisë së brendshme italiane, emigrantët e mbërritur në Itali që nga fillimi i këtij viti janë 3.079, 82 për qind më pak se në të njëjtën periudhë në 2018-ën, dhe 96 për qind më pak se në vitin 2017.

Në reagimet e pakta të tij Salvini shprehet se nuk është normale që të sulmohesh nga aleatët

“Të sulmohesh nga opozita është normale. Më pak normale është të sulmohesh një ditë po dhe një ditë jo nga aleatët. Ajo të bezdis pak më shumë.” Në këtë mënyrë zv/kryeministri dhe ministri I brendshëm, do të shprehej pak para takimit me zv/kryeministrin Luixhi di Maio, pas akuzave dhe kundër akuzave publike të ditëve të fundit. Më tej Salvini theksoi se nëse skuadra e qeverisë është e bashkuar, atëherë puna mund të vazhdojë. Në rast të kundërt, ngrohja e poltronës së ministrit nuk ishte punë për të

Por Salvini kritikoi ashpër dhe ministrin e Ekonomisë Tria duke thënë se ai kishte bërë deklarata që nuk I kishin pëlqyer. Kjo duke iu referuar deklaratave se taksat do të uleshin pak por duke respektuar ligjet evropiane. Salvini këmbënguli se Lega është në qeveri për të ulur taksat për shumë italianë dhe të ndërmarrë një manovër kurajoze në këtë drejtim: “Nëse na lejojnë ta bëjmë, shumë mirë. Nëse jo do e bëjmë vetëm,” shtoi ai. Ai gjithashtu u shpreh se nëse ministri i ekonomisë mendon të bëjë një manovër të rreme atëherë ai nuk mund të jetë një ministër ekonomie i kësaj qeverie.

Duke iu referuar akuzave për fonde ruse, Salvini i konsideroi si një film spiunazhi i dorës së katërt. “Renzi dhe Boski thonë se kam tradhtuar Italinë, por janë ata që duhet të kërkojnë një atdhe tjetër pasi janë ata që kanë tradhtuar italianët, do të vazhdonte Salvini”.

“Nuk kam parë dhe nuk kam prekur para nga Rusia. Nëse edhe prokuroria e Milanos thotë se nuk I intereson të më marrë në pyetje, atëherë me kaq. Më lini të bëj ministrin e Brendshëm!”/ABC News Albania 24/7

6ADCDE3F-E92F-4789-A5F7-A06A834E053B_w1023_r1_s.png
ad min22:30 | 01/08/2019

Në një intervistë për Zërin e Amerikës, Matthew Palmer, Zëvendësndihmës Sekretar i Shtetit për Çështjet e Evropës dhe Euroazisë, tha se nëse zgjedhjet duhet të përsëriten ose jo, ky është një vendim që i takon gjykatës ta marrë dhe jo Shteteve të Bashkuara. Zoti Palmer foli me korrespondenten e shërbimit në gjuhën serbe, Jovana Djurovic, edhe për çështje të tjera të Ballkanit, si bisedimet Kosovë-Serbi.

Zëri i Amerikës: Departamenti i Shtetit sapo ka identifikuar Vangjush Dakon, kryetarin e bashkisë së Durrësit, për korrupsion të konsiderueshëm dhe i ndalon atij dhe familjes hyrjen në SHBA. Nga ana tjetër, Kryeministri Rama vazhdimisht e ka mbrojtur atë, të paktën deri para një muaji. Çfarë ju thotë kjo për qeverisjen e Kryeministrit Rama?

Matthew Palmer: Mendoj se çështja këtu për Shtetet e Bashkuara është se kemi pasur dëshmi të forta në lidhje me aktivitetet e korrupsionit nga ana e zotit Dako. Dhe ne kemi autoritetet që janë të nevojshme për të ndërmarrë veprime në përgjigje të kësaj. Do të shpresoja që ky veprim të demonstronte angazhimin e Shteteve të Bashkuara për të luftuar kundër korrupsionit dhe për të ndërmarrë veprime atje ku ka prova të forta dhe bindëse të praktikës korruptive. Ky është një autoritet që ne e kemi. Është një autoritet që ne me siguri nuk kemi frikë ta përdorim. Dhe është një autoritet që ne besojmë se mund të kontribuojë në procesin e luftimit të korrupsionit publik në Shqipëri dhe gjetkë.

Zëri i Amerikës: Ç’farë ju tregon kjo për qeverisjen e Kryeministrit Rama?

Matthew Palmer: Nuk mendoj se e shohim këtë si çështje të qeverisjes së Kryeministrit. Ne e shohim këtë si një çështje se si Shtetet e Bashkuara reagojnë ndaj sfidës së praktikës korruptive nga ana e atyre që janë në pozitën e besimit publik.

Zëri i Amerikës: Në Shqipëri, Partia Socialiste ka kontrollin e Parlamentit, të degës ekzekutive dhe tani, pas zgjedhjeve të qershorit, edhe bashkitë. Pra, në mungesë të gjykatave më të larta në vend, nuk ka asnjë institucion që mund të kontrollojë Kryeministrin Rama në ushtrimin e pushtetit të tij. A jeni i shqetësuar se qeveria e zotit Rama po kthehet në autokrate?

Matthew Palmer: Ajo që na shqetëson është se nuk ka Gjykatë të Lartë. Ne do të dëshironim që gjykata të konstituohej. Mendojmë se është shumë e rëndësishme që çdo sistem të ketë kontrollet dhe ekuilibrat e duhur, në mënyrë të ketë përgjegjshmëri, transparencë dhe respek për sundimin e ligjit. Ne ia kemi shtruar këto çështje Kryeministrit Rama, siç kemi bërë me paraardhësin e tij dhe si ç’do të bëjmë edhe me pasardhësin e tij. Kjo është shumë e rëndësishme për Shtetet e Bashkuara, është e rëndësishme për Shqipërinë dhe për popullin shqiptar. Është gjithashtu e rëndësishme për rajonin.

Zëri i Amerikës: Ju përmendët Gjykatën e Lartë. SHBA ka investuar në reformën në drejtësi në Shqipëri dhe tani, pas tre vjetësh, vendi nuk ka Gjykatë Kushtetuese apo të Lartë. Opozita është jashtë institucioneve dhe shumë thonë se SHBA kanë zgjedhur stabilitetin mbi demokracinë duke mbështetur kryeministrin Rama. Si u përgjigjeni atyre kritikëve?

Matthew Palmer: Ne nuk po mbështesim kryeministrin Rama. Shtetet e Bashkuara nuk po mbajnë anë në mosmarrëveshjet politike të Shqipërisë. Ajo që ne po mbështesim është sundimi i ligjit, mbështesim institucionet shqiptare. Dhe ne do të dëshironim që mosmarrëveshjet politike në Shqipëri të zgjidheshin përmes këtyre institucioneve e jo përmes ndërhyrjeve nga jashtë.

Zëri i Amerikës: OSBE-ja e di se zgjedhjet e 30 qershorit u mbajtën pa marrë parasysh interesin e elektoratit. Opozita vendosi të mos marrë pjesë, por zgjedhjet u mbajtën gjithsesi. Votuesit mund të mos kenë patur një zgjedhje domethënëse midis opsioneve politike. Pra, a duhen përsëritur zgjedhjet lokale?

Matthew Palmer: Kjo varet në të vërtetë nga institucionet shqiptare. Apo jo? Dhe pikërisht për këtë arsye ne do të donim që Gjykata e Lartë të ngrihej, e përbërë nga gjyqtarë që kanë kaluar procesin e duhur të verifikimit. Ajo gjykatë do të ishte pikërisht në gjendje t’i përgjigjej asaj pyetjes. Nuk u takon Shteteve të Bashkuara që ta gjykojnë atë çështje. I takon Gjykatës së Lartë të Shqipërisë ta marrë atë vendim.

Zëri i Amerikës: Po, por edhe SHBA kishin vëzhguesit e tyre në zgjedhje. Pra, bazuar në këtë fakt, mendoni se zgjedhjet duhet të përsëriten?

Matthew Palmer: Unë mund t’ju them se vëzhguesit tanë panë dhe ndoqën nga shumë afër atë që dëgjuam nga Misioni Monitorues i OSBE-ODIHR-it, pra që zgjedhjet dhe procesi aktual i votimit u zhvilluan kryesisht në mënyrë të përgjegjshme dhe transparente, por procesi i përgjithshëm i mohoi popullit të Shqipërisë një alternativë kuptimplote. Pra, ekzistojnë shqetësime dhe rezerva reale në lidhje me vetë zgjedhjet, siç artikulohen nga OSBE-ja. Përsa i përket se cilat janë përgjigjet e duhura ndaj kësaj, ne do dëshironim ta shihnim këtë të dilte nga institucionet shqiptare.

67299110_1269666503157761_302356575127863296_n.jpg
ad min21:00 | 21/07/2019

Për shkak të ftesës nga Gjykata Speciale në cilësinë e të dyshuarit, Ramush Haradinaj, ka dhënë dorëheqje nga posti i Kryeministrit.

Letrën e dorëheqjes, Haradinaj pritet që të hënën t’ia dorëzojë presidentit Hashim Thaçi.

Mirëpo, gjatë ditës së sotme, Haradinaj është takuar me presidentin e Shqipërisë, Ilir Meta, me të cilin kanë diskutuar rreth situatës aktuale politike në Kosovë.

Këtë e ka bërë të ditur vet Haradinaj përmes një postimi në profilin e tij zyrtar në rrjetin social Facebook.

Postimi i plotë i Haradinajt pa ndërhyrje:

Kënaqësi e veçantë të takoj sonte në Prishtinë Presidentin e Shqipërisë, Ilir Meta, bashkë me vajzën Borën.

Rast i mirë për të këmbyer mendime rreth aktualitetit politik në Kosovë, Shqipëri dhe rajon.

Në proceset që po kalon Kosova, angazhimi i përbashkët përballë sfidave e fuqizon faktorin shqiptar.

kulluri-1280x714.jpg
ad min22:00 | 05/07/2019

Anëtari i Këshillit Kombëtar të PD-së Edvin Kulluri i ftuar në “Provokacija” tha se Sali Berisha nuk qëndron pas gjithë kësaj situate që po ndodh në PD. Sipas tij është Lulzim Basha i cili duhet të mbajë përgjegjësi, pasi që kur është larguar Berisha, ai nuk ka arritur asnjë sukses.

Mustafa Nano: Ka njerëz që kanë dyshime se Basha është de jure kryetar i partisë por de facto vazhdon të mbetet Berisha. Ti e beson këtë?

Edvin Kulluri: Jo nuk e besoj. Nuk besoj për një arsye sepse Basha do ta kishte aq ndershmëri të thoshte se nuk jam më kryetari i partisë. E dyta nga ajo që di unë nuk është kështu. Nuk është mënyra e Berishës kjo e të drejtuarit të partisë. Sepse ka një problem, për ata që e njohin Berishën e pëlqejnë apo nuk e pëlqejnë dhe unë hyj tek njerëzit që them se e njoh në një masë të caktuar dhe përgjegjësit Berisha është prirur nga përmirësimi i vetvetes. Na e ka thënë dhe e kemi diskutuar nëpër takime. Është njeri që përgjithësisht nuk shkon në digresion. Mund të bëjë gabime të reja por ata që i ka bërë nuk i bën më. Mua më rezulton që këto gabime janë gabime prej fillestari. Nuk janë prej një lideri që ka drejtuar 23 vite në këtë vend. Nuk më del llogaria.

Mustafa Nano: Berisha është në politikë, përse vallë vazhdon të insistojë me kaq pasion dhe të mbetet aty si figurë dominonte?

Edvin Kulluri: Berisha është kafshë politike! Është njeri që jeton për politikën. Është njëri që lufton për politikën. Në këtë pjesë e njoh mirë.  

Mustafa Nano: Po për çfarë po lufton?

 Edvin Kulluri: Ai mendon se i shërben interesit politik. Edhe duke mbështetur këtë që po ndodh. Tek pjesa e intrigës politike nuk futem dot. Por di të them një gjë se që kur Sali Berisha ka dhënë dorëheqjen nga PD-ja, Lulzim Basha nuk ka asnjë sukses politik. Kjo nuk rëndon mbi Sali Berishën, kjo rëndon mbi Lulzim Bashën.

Mustafa Nano: Mesazhi është se çfarë ka marrë Luli, vetëm Berisha mund t’ia japi?  

Edvin Kulluri: Jo nuk po ia jep dot sepse lider je dhe nuk të bëjnë dot. Ky është problemi që ne kemi me lidershipin e partisë./abcnews.al

sejko-1280x706.jpg
ad min19:40 | 03/07/2019

Për herë të parë Banka e Shqipërisë ka bërë pjesë të deklaratës monetare konstatimin se zgjatja e situatës politike problematike godet aktivitetin ekonomik të vendit. Gjatë konferencës për shtyp guvernatori Gent Sejko tha se aktualisht nuk po ndërhyhet për stabilizimin e kursit të këmbimit e se niveli i valutave në treg është normal, ndërsa faktorët janë sezonalë.

Banka e Shqipërisë kërkon që të zgjidhet sa më parë situata politike ku ndodhet vendi në mënyrë që të mos goditet aktiviteti ekonomik i vendit.

Guvernatori i bankës qendrore Gent Sejko ishte duke lexuar deklaratën e Këshillit Mbikëqyrës kur tha se zgjatja e kësaj krize dëmton klimën e biznesit duke dhënë pasoja në zhvillimin dhe rritjen e ekonomike. Kjo është hera e parë pas disa muajsh që Këshilli Mbikëqyrës vendos një konstatim të tillë në deklaratën e politikës monetare.

Për Bankën e Shqipërisë forcimi i monedhës kombëtare në këtë periudhë, duke rrëzuar euron dhe dollarin lidhet me efekte sezonale e se për momentin banka nuk e sheh të arsyeshme ndërhyrjen, pasi nuk përbën rrezik për nivelin e inflacionit.

Aktualisht euro këmbehet me 122 lekë dhe dollari me 108. Një vit më parë banka qendrore injektoi një program ndërhyrjeje në treg me qëllim frenimin e rënies së euros, program i cili ende nuk është pezulluar dhe mund të përdoret në momentin që kursi do të ndikojë te inflacioni vjetor. Këshilli Mbikëqyrës edhe në këtë mbledhje vendosi të mbajë të pandryshuar normën bazë të interesit të lekut në 1%, duke vlerësuar se kushtet për dhënien e kredisë nga ana e bankave në këtë periudhë janë të kënaqshme./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono